အခန်း ၁၅၃၃

အခန်း ( ၁၅၃၃ ) အင်မော်တယ်နယ်မြေကြီး၏ တန်ပြန်တိုက်စစ်။

ကျွင်းမိသားစု၏ ဦးဆောင်မှုအောက်တွင် အင်မော်တယ်နယ်မြေကြီးရှိ အဓိက အင်မော်တယ်အင်အားစုအားလုံးမှာ ပြန်လည်တိုက်ခိုက်ရန် စတင်လာကြသည်။

၎င်းက ကွင်းဆက်တုံ့ပြန်မှုတစ်ခုကဲ့သို့ ဖြစ်ပေါ်စေပြီး အင်အားစုများစွာ ပါဝင်လာကြ၏။

ဤသည်မှာ တားမြစ်နယ်မြေများမှ ဧကရာဇ်များကို အမျက်ချောင်းချောင်း ထွက်စေသည်။

"မင်းတို့က ဆန့်ကျင်ချင်ကြသေးတာလား။ အင်မော်တယ်နယ်မြေရဲ့ ပုရွက်ဆိတ်တွေ ပုန်ကန်နေကြပြီ"

"မင်းတို့လို နိမ့်ကျတဲ့ သတ္တဝါတွေက ငါတို့တားမြစ်နယ်မြေရဲ့ သန့်စင်မှုကို ငြိမ်ငြိမ်သက်သက် လက်ခံနေသင့်တယ်။ ဒါကို ခုခံဝံ့ကြသေးတယ်လား"

အင်မော်တယ်နယ်မြေအနှံ့တွင် တားမြစ်နယ်မြေမှ ဧကရာဇ်များသည် ဒေါသတကြီး ဟိန်းဟောက်လိုက်ကြသည်။

မူလက တားမြစ်နယ်မြေမှ ဧကရာဇ်ကြီးများ ဆယ်ဂဏန်းခန့် ဆင်းသက်လာခဲ့ကြရာ အင်မော်တယ်နယ်မြေထက် များစွာသာလွန်သော အင်အားရှိခဲ့ပေသည်။

သို့သော်လည်း ယခုမူ ရှေးဟောင်းအင်မော်တယ်ခုံရုံးနှင့် အင်မော်တယ်နယ်မြေကြီးရှိ အင်အားစုအသီးသီးက ဆန့်ကျင်လာကြပြီ ဖြစ်သည်။

သူတို့၏ မဟာဧကရာဇ် အရေအတွက်မှာလည်း ကောင်းကင်ကိုးပါး တားမြစ်နယ်မြေထက် များစွာလျော့နည်းခြင်း မရှိတော့ပေ။

ထိုမျှသာမက ကျွင်းမိသားစုသည်လည်း တိုက်ပွဲတွင် ပါဝင်လာခဲ့သည်။

ကျွင်းထိုက်ဟွမ်၊ ကျွင်းရှန်းယွီနှင့် အခြားသူများ အပါအဝင် ကျွင်းမိသားစု၏ ပင်မနှင့် လျှို့ဝှက်မျိုးရိုးများမှ ဧကရာဇ် ခုနစ်ပါး၊ ရှစ်ပါးခန့် ရှိနေသေးသည်။

အရေးကြီးဆုံးအချက်က ဤသည်မှာ ကျွင်းမိသားစု၏ အင်အားအပြည့် မဟုတ်သေးခြင်း ဖြစ်သည်။

ကျွင်းမိသားစု၏ ပထမဆုံးဘိုးဘေးမှာ ဒုတိယဘိုးဘေးနှင့်အတူ ပေါ်မလာသေးပေ။

ထို့ပြင် ကျွင်းမိသားစု၏ အစစ်အမှန် ထိပ်တန်းပညာရှင်များသည်လည်း အင်မော်တယ်နယ်မြေကြီးတွင် မရှိကြပါ။

မပြည့်စုံသော မိသားစုတစ်ခုပင် ဖြစ်သော်လည်း...

ကျွင်းမိသားစုက အင်မော်တယ်နယ်မြေကြီးကို ဦးဆောင်လျက် ကောင်းကင်ကိုးပါး တားမြစ်နယ်မြေကို ပြန်လည်တိုက်ခိုက်နိုင်ခဲ့သည်။

ယင်းက အမှန်တကယ်ပင် အံ့ဖွယ် ကောင်းပေသည်။

ရွှမ်ထျန်းအင်မော်တယ်နယ်မြေရှိ အင်မော်တယ်နှင့်နတ်ဆိုးသူတော်စင်နှစ်ပါးကဲ့သို့သော တားမြစ်နယ်မြေမှ အထွတ်အထိပ်ဧကရာဇ်များလည်း ဒေါသထွက်သွားကြသည်။

"ကျွင်းမိသားစု... မင်းတို့က ကောင်းကင်ကိုးပါး တားမြစ်နယ်မြေရဲ့ ရန်သူဖြစ်ဖို့ လုံးဝဆုံးဖြတ်လိုက်ပြီလား။ ဒါက ဘယ်လိုအကျိုးဆက်တွေ ဖြစ်လာစေမလဲဆိုတာ မင်းတို့ သိရဲ့လား"

အင်မော်တယ်နှင့် နတ်ဆိုး သူတော်စင်နှစ်ပါးက သံပြိုင် အော်ဟစ်လိုက်ကြသည်။

ဒုတိယဘိုးဘေး ကျွင်းလင်ရှောင်းက ကောင်းကင်ယံအမြင့်သို့ ပျံတက်သွားသည်။

သူက အေးစက်စွာ ရယ်မောလိုက်ပြီး ပြောလိုက်၏။

"ဘာတွေဖြစ်လာမလဲ ဟုတ်လား။ အဟက်... ဘာတွေဖြစ်လာမလဲဆိုတာ ငါလည်း မြင်ချင်နေတာ။ မင်းတို့ရဲ့ ကောင်းကင်ကိုးပါး တားမြစ်နယ်မြေက ဘာတွေကြံစည်နေလဲဆိုတာ ငါ့ကျွင်းမိသားစုက မသိဘူးလို့ မင်းတို့ ထင်နေကြတာလား။ ဒီခေတ်ရဲ့ အဆိုးဝါးဆုံး ကပ်ဘေးလှိုင်းကနေတစ်ဆင့် ငါ့ကျွင်းမိသားစုကို ဖျက်ဆီးချင်နေကြတာ မဟုတ်လား"

"ဒါပေမဲ့ မင်းတို့ တားမြစ်နယ်မြေတွေမှာ အဲဒီလိုလုပ်နိုင်တဲ့ အစွမ်းရှိမရှိဆိုတာ ငါ ဒီနေရာကနေ စောင့်ကြည့်စမ်းမယ်"

ဤစကားများက အင်မော်တယ်နှင့် နတ်ဆိုး သူတော်စင်နှစ်ပါးကို ပို၍ပင် ဒေါသထွက်သွားစေခဲ့သည်။

တစ်ချိန်တည်းမှာပင်၊ သူတို့၏ မျက်ဝန်းထဲတွင် ထိတ်လန့်မှု အရိပ်အယောင်များ ပေါ်ထွက်လာ၏။

ကျွင်းမိသားစုဝင် ဒုတိယဘိုးဘေး ကျွင်းလင်ရှောင်း၏ စွမ်းအားက အမှန်တကယ်ပင် ခန့်မှန်းရခက်သည်။

ကျွင်းလင်ရှောင်း၏ မျက်နှာပေါ်တွင် အေးစက်သော အပြုံးတစ်ခု ပေါ်လာခဲ့သည်။

'ငါတို့ရဲ့ ခေါင်းဆောင်ကြီးက နယ်နိမိတ်ပင်လယ်ကမ္ဘာမှာ ရှိနေတာ ဘယ်လောက်တောင် ကြာသွားပြီလဲ မသိနိုင်ဘူး။ တကယ်လို့ သူသာ အင်မော်တယ်နယ်မြေကို ပြန်လာနိုင်ရင် ကောင်းကင်ကိုးပါးရဲ့ ဒီလိုလူဖျင်းလူညံ့တွေက ဒီလောက်အထိ ခုန်ပေါက်လှုပ်ရှားဝံ့မှာ မဟုတ်ဘူး'

ကျွင်းလင်ရှောင်းက စိတ်ထဲမှ တွေးလိုက်လေသည်။

သူပြောသော "ခေါင်းဆောင်ကြီး" မှာ ကျွင်းမိသားစု၏ လျှို့ဝှက်ဆန်းကြယ်လှသော ပထမဆုံးဘိုးဘေးပင် ဖြစ်သည်။

ထိုဘိုးဘေးမှာ အလွန် လွတ်လပ်ပေါ့ပါးသူဖြစ်ပြီး ကမ္ဘာအနှံ့ လှည့်လည်ရသည်ကို နှစ်သက်သည်။

လွန်ခဲ့သော အချိန်အတော်ကြာကတည်းက သူသည် ကျွင်းမိသားစုမှ ထွက်ခွာသွားကာ နယ်နိမိတ်ပင်လယ်ကမ္ဘာသို့ သွားရောက်ခဲ့ပြီး ပြန်မလာတော့ပေ။

'အခု‌တော့ အကိုကြီး မရှိတဲ့အတွက် ငါကပဲ ကျွင်းမိသားစုရဲ့ အလံကို လွှင့်ထူရတော့မှာပေါ့'

ထိုသို့တွေးမိသောအခါ ကျွင်းလင်ရှောင်း၏ ဓားက တုန်ခါသွားပြီး ဓားအလင်းတစ်ခုက အင်မော်တယ်နှင့် နတ်ဆိုး သူတော်စင်နှစ်ပါးထံသို့ ကျဆင်းသွားတော့သည်။

ကျွင်းလင်ရှောင်း၏ ဦးဆောင်မှုအောက်တွင် ကျွင်းမိသားစုက ဖျက်ဆီးခြင်းတံပိုးသံကို မြည်စေလျက် တားမြစ်နယ်မြေကို တိုက်ခိုက်ရန် အစပြုလိုက်သည်။

အင်မော်တယ်နယ်မြေကြီးရှိ အင်အားစုအသီးသီးသည်လည်း စိတ်အားထက်သန်စွာ တုံ့ပြန်လာကြပြီး အစွမ်းထက်ပုဂ္ဂိုလ်များစွာက ကျွင်းမိသားစုနှင့်အတူ ကောင်းကင်ကိုးပါးကို ဆန့်ကျင်တိုက်ခိုက်ရန် အသင့်ဖြစ်နေကြပြီ။

ဤသည်မှာ ကျွင်းမိသားစု၏ ကြီးမားသော သြဇာအာဏာကို ပြသနေခြင်း ဖြစ်သည်။

ဤအချိန်တွင် အင်မော်တယ်ခုံရုံးက အနေရခက်သော အခြေအနေသို့ ရောက်ရှိနေသည်။

အဓိပတိအင်မော်တယ်ခုံရုံးသည် အင်မော်တယ်နယ်မြေ၏ တရားဝင်အုပ်ချုပ်သူဟု ကြွေးကြော်ခဲ့ပြီး ကောင်းကင်ကိုးပါးကို တစ်ချိန်က စည်းလုံးစေခဲ့သည်။

သို့သော်လည်း ဤကပ်ဘေးလှိုင်းတွင်မူ သူတို့က ရှေ့မထွက်သေးဘဲ လက်ရှောင်နေခဲ့ကြပေသည်။

ရှေးဟောင်းအင်မော်တယ်ခုံရုံးက ဝင်ရောက်ကူညီချိန်တွင်ပင် သူတို့မှာ ဘေးမှကြည့်နေခဲ့ကြသည်။

ယခုတော့ သူတို့က သူတို့ ဝင်ရောက်စွက်ဖက်ရန် ပို၍ပင် မဖြစ်နိုင်တော့ပေ။

ယခုမှ ဝင်ပါလျှင်၊ သူတို့က ကျွင်းမိသားစုကို ထောက်ခံအားပေးရာ ရောက်သွားမည် မဟုတ်ပါလား။

ဤသည်မှာ သူတို့အတွက် လက်ခံနိုင်စရာ မရှိပေ။

သူတို့တွင် သတ္တိမရှိခဲ့သဖြင့် လူထု၏ ထောက်ခံမှုနှင့် ဦးဆောင်နိုင်စွမ်းကို ဆုံးရှုံးသွားခဲ့ရသည်။

ရွှမ်ထျန်းအင်မော်တယ်နယ်မြေကြီးတွင်...

တိုက်ပွဲက အလွန်ပင် ပြင်းထန်သည်။

သို့သော်လည်း ကျွင်းလင်ရှောင်း၏ ဦးဆောင်မှုနှင့်အတူ အနီရောင်လီလီပန်းလေးများ၏မိခင်နှင့် နတ်ဆိုးနတ်ဘုရား အဘိုးအိုကဲ့သို့သော အထွတ်အထိပ် ဧကရာဇ်အဆင့် အကျော်အမော်များက ကောင်းစွာ ရင်ဆိုင်နိုင်ခဲ့ကြပေသည်။

တားမြစ်နယ်မြေဘက်မှ မည်သည့် အားသာချက်မျှ မရရှိခဲ့သည့်အပြင် ဖိနှိပ်ခြင်းကိုပင် ခံနေရသည်။

ကျွင်းဧကရာဇ်ခုံရုံးဘက်တွင်မူ ကျွင်းရှောင်ယောက်က လက်နှစ်ဖက်ကို နောက်သို့ယှက်လျက် ရပ်နေသည်။

သူသည် တိုက်ပွဲတွင် ပါဝင်ခြင်းမရှိသော်လည်း တိုက်ပွဲအခြေအနေကို အမြဲမပြတ် စောင့်ကြည့်နေ၏။

သူ၏ လက်ရှိစွမ်းအားက အားမနည်းလွန်းသော်လည်း ဤကဲ့သို့သော တိုက်ပွဲမျိုးတွင်မူ သူ ဘာမျှ မတတ်နိုင်သေးပေ။

သူ၏ နတ်ဘုရားဓမ္မခန္ဓာကို ထုတ်သုံးမှသာ ဖြစ်နိုင်သည်။

သို့သော်လည်း ထိုခန္ဓာမှာ အရေးကြီးဆုံး အချိန်ကျမှ ထုတ်သုံးရမည့် ဝှက်ဖဲတစ်ခုပင်။

ကျွင်းရှောင်ယောက်က လက်ရှိတွင် အင်မော်တယ်နယ်မြေဘက်မှ တဖြည်းဖြည်း အသာစီးရလာသည်ကို မြင်ရသော်လည်း...

ကြီးမားသော လျှို့ဝှက်အန္တရာယ်တစ်ခုမှာ ပေါ်မလာသေးသည်ကို သတိထားမိသည်။

၎င်းမှာ ယဇ်ဆရာသခင် ငါးဦးပင်။

သို့မဟုတ် လေးဦးဟု ဆိုရမည်။

ထိုယဇ်ဆရာသခင် လေးဦးမှာ အဘယ်ကြောင့် ယခုအချိန်ထိ ငြိမ်သက်နေပြီး ပေါ်မလာသေးသနည်း။

ကျွင်းရှောင်ယောက်က ဤမေးခွန်းကို စဉ်းစားနေစဉ်မှာပင် ရုတ်တရက် တစ်စုံတစ်ခုကို သတိရသွားသည်။

ကျောချမ်းစရာ ကောင်းလှသော အတွေးတစ်ခု သူ၏ စိတ်ထဲတွင် ပေါ်လာ၏။

၎င်းမှာ...

ယဇ်ဆရာသခင် လေးဦးက တမင်တကာ ပေါ်မလာဘဲ အချိန်ဆွဲနေခြင်းပင်။

အချိန်ဆွဲနေရခြင်း အကြောင်းရင်းမှာမူ...

ကျွင်းရှောင်ယောက်၏ ခန့်မှန်းချက်အရ သူတို့သည် ကောင်းကင်ကိုးပါး တားမြစ်နယ်မြေမှ ဧကရာဇ်များနှင့် အင်မော်တယ်နယ်မြေကြီးမှ ဧကရာဇ်များ တိုက်ပွဲကို စောင့်ကြည့်နေခြင်းပင် ဖြစ်သည်။

ဧကရာဇ်တစ်ပါး ကြွေလွင့်သွားပါက ရရှိလာမည့် ယဇ်ပူဇော်ခြင်း အနှစ်သာရမှာ သာမန်အဆင့် သတ္တဝါများ သန်းပေါင်းများထက်ပင် သာလွန်သည်။

တစ်နည်းအားဖြင့်ဆိုရသော် ဧကရာဇ်တစ်ပါး ကျဆုံးခြင်းမှာ ရှေးဟောင်းကြယ်စက်ဝိုင်းတစ်ခုလုံးရှိ သက်ရှိများကို သတ်ဖြတ်ခြင်းထက် ပို၍ ထိရောက်သည်။

ထို့ကြောင့် ယဇ်ဆရာသခင် လေးဦး၏ အစီအစဉ်က အင်မော်တယ်နယ်မြေနှင့် တားမြစ်နယ်မြေမှ ဧကရာဇ်များကို အချင်းချင်း သတ်ဖြတ်စေရန်ပင်။

ထို့ကြောင့်ပင် ယဇ်ဆရာသခင်များက ကျွင်းမိသားစုကိုပါ ဆွဲသွင်းရန် ဆုံးဖြတ်ခဲ့ခြင်း ဖြစ်သည်။

ကျွင်းမိသားစု ပါဝင်လာမှသာ အင်မော်တယ်နယ်မြေမှ ဧကရာဇ်များက တားမြစ်နယ်မြေကို ပြန်လည်တိုက်ခိုက်ရန် သတ္တိရှိလာကြမည် မဟုတ်ပါလား။

ဤအကြောင်းကို တွေးမိလိုက်သောအခါ ကျွင်းရှောင်ယောက်ကဲ့သို့ အရာရာကို အေးအေးဆေးဆေး ရင်ဆိုင်နိုင်သူပင် ကျောချမ်းသွားရသည်။

ယဇ်ဆရာသခင်လေးဦးက အလွန်တရာ သွေးအေးရက်စက်ပြီး သူတို့၏ ကိုယ်ပိုင်တားမြစ်နယ်မြေမှ ဧကရာဇ်များကိုပင် ယဇ်ပူဇော်ဝံ့ကြသည်။

ဤသည်မှာ သူတို့က ဤခေတ်တွင် အင်မော်တယ်တံခါးကို ဖွင့်နိုင်မည်ဟု အပြည့်အဝ ယုံကြည်ချက် ရှိနေကြောင်း သက်သေပြနေခြင်းပင်။

သို့သော်လည်း အင်မော်တယ်တံခါးကို ဖွင့်ရန်အတွက် အလွန်ကြီးမားသော ယဇ်ပူဇော်မှုများ လိုအပ်သည်။

ထိုအတွက်၊ ဤတားမြစ်နယ်မြေနှင့် အင်မော်တယ်နယ်မြေမှ ဧကရာဇ်များက အကြီးမားဆုံးသော ယဇ်ပစ္စည်းများပင် ဖြစ်တော့သည်။

'ယဇ်ဆရာသခင်တွေ... မင်းတို့က ဘယ်လိုကောင်တွေဖြစ်လို့ ဒီလောက်အထိ နက်နဲတဲ့ အကြံအစည်တွေ ရှိနေရတာလဲ'

ကျွင်းရှောင်ယောက်၏ မျက်နှာက တင်းမာသွားသည်။

သူ၏ မျက်ဝန်းထဲတွင် အေးစက်မှုများ ပြည့်နှက်နေ၏။

ယဇ်ဆရာသခင် လေးဦးက ကျားကစားသမား လေးဦးနှင့် တူသည်။

အင်မော်တယ်နယ်မြေနှင့် ကောင်းကင်ကိုးပါးက ကျားကွက် ဖြစ်၏။

တားမြစ်နယ်မြေများနှင့် အင်မော်တယ်နယ်မြေရှိ အင်အားစုများမှာမူ သူတို့ စိတ်ကြိုက်ကစားနေသော ကျားစေ့များသာ ဖြစ်ချေတော့သည်။

ဤယဇ်ဆရာသခင်များမှာ လျှို့ဝှက်ဆန်းကြယ်ပြီး အင်အားကြီးကာ သွေးအေးရက်စက်၍ အံ့သြစရာကောင်းသော အကြံအစည်များ ရှိကြသည်။

သူတို့က အမှန်တကယ် ကြောက်မက်ဖွယ်ကောင်းသော ရန်သူများပင်။

'ယဇ်ဆရာသခင်... မင်းတို့က ငါ့ကျွင်းမိသားစုကို ကျားစေ့အဖြစ် သုံးနိုင်မယ်လို့ ထင်နေရင်တော့ အရမ်းကို ရိုးအလွန်းရာ ရောက်လိမ့်မယ်'

ကျွင်းရှောင်ယောက်က ကောင်းကင်ယံသို့ မော့ကြည့်လိုက်သည်။

သူ့အကြည့်က အလွန်လျှို့ဝှက်ဆန်းကြယ်ပြီး အင်အားကြီးမားကာ ကြောက်မက်ဖွယ်ကောင်းသော အရှိန်အဝါ လေးခုတို့ ကောင်းကင်ဘုံ၌ တိတ်ဆိတ်စွာ ရှိနေသည်ဟု မြင်နေရသကဲ့သို့ပင်။

သူတို့က ဤသွေးစွန်းသော ကျားကစားပွဲကို အေးအေးဆေးဆေး စောင့်ကြည့်နေကြခြင်း ဖြစ်သည်။

'ဒါဆိုရင်... ငါ ကျွင်းရှောင်ယောက်ကပဲ မင်းတို့ ယဇ်ဆရာသခင် လေးယောက်ကို ရင်ဆိုင်ပြီး ကစားပေးရသေးတာပေါ့။ ဒီကစားပွဲမှာ ဘယ်သူက နောက်ဆုံး ရယ်မောနိုင်မလဲဆိုတာ ကြည့်ရအောင်'

ကျွင်းရှောင်ယောက်က လက်ကိုနောက်ပစ်လျက် ရပ်နေသည်။

သူ၏ ဝတ်ရုံမှာ လေထဲတွင် တဖျတ်ဖျတ် လွင့်နေလေ၏။

လောကကြီးက ကျားကွက် ဖြစ်သည်။

တစ်ဖက်တွင် ယဇ်ဆရာသခင် လေးဦးရှိပြီး အခြားတစ်ဖက်တွင်မူ ကျွင်းရှောင်ယောက် တစ်ဦးတည်းသာ။

တိုက်ခိုက်ရေးအင်အားသက်သက်ဖြင့်ဆိုလျှင် ကျွင်းရှောင်ယောက်မှာ လျှို့ဝှက်ဆန်းကြယ်သော ယဇ်ဆရာသခင်လေးဦးကို မယှဉ်နိုင်သည်မှာ သေချာသည်။

သို့သော် ဗျူဟာပိုင်းတွင်မူ...

သူတစ်ဦးတည်းနှင့်ပင် ထိုယဇ်ဆရာသခင် လေးဦးကို ယှဉ်ပြိုင်ရန် လုံလောက်သည်။

ကျွင်းရှောင်ယောက်က သူတို့၏ အစစ်အမှန်ပုံစံများ ပေါ်လာမည့် အချိန်ကို တိတ်ဆိတ်စွာပင် စောင့်ဆိုင်းနေလိုက်တော့သည်။