အခန်း ၁၅၆၈

အခန်း ( ၁၅၆၈ ) တုန်ဟွဧကရာဇ်၏ အစစ်အမှန်ဝိညာဉ် စတေးခံခြင်း။

ထိုအကန့်အသတ်မဲ့သော သွေးနီရောင်မြူထုကြီးက သက်ရှိသတ္တဝါအားလုံးကို တိုက်စားပစ်နိုင်စွမ်း ရှိနေပုံရသည်။

၎င်းသည် သွေးယဇ်ပူဇော်ခြင်း စွမ်းအားမှ ဆင်းသက်လာခြင်း ဖြစ်၏။

သွေးယဇ်ပူဇော်ခြင်း စွမ်းအားတွင် သက်ရှိအပေါင်းကို ကြေမွပျက်စီးသွားစေနိုင်သည့် စွမ်းရည် ရှိသည်။

၎င်းက ကြောက်မက်ဖွယ်ကောင်းသော စွမ်းအားတစ်မျိုးပင်။

အလွန်အမင်း အစွမ်းထက်သော နည်းလမ်းများကို အသုံးမပြုနိုင်ပါက ၎င်းတို့ကို တားဆီးရန် ခက်ခဲသည်။

သို့သော်လည်း အမှန်အတိုင်းဆိုရလျှင် ဤသွေးနီရောင်မြူထုက သန်မာသော ပုဂ္ဂိုလ်များ သို့မဟုတ် အစွမ်းထက် အင်အားစုများအပေါ်၌ ကြီးမားသော သက်ရောက်မှုများ ရှိလိမ့်မည် မဟုတ်ချေ။

အကြောင်းမှာ သူတို့အနေဖြင့် ခုခံကာကွယ်ပြီး ပိတ်ဆို့ထားနိုင်သောကြောင့် ဖြစ်သည်။

သို့သော်လည်း သာမန်ကျင့်ကြံသူများ သို့မဟုတ် ကျင့်ကြံမှုအဖွဲ့အစည်း၏ အောက်ခြေအလွှာရှိ သက်ရှိအများစုအတွက်မူ ၎င်းက အရာအားလုံးကို သုတ်သင်ဖျက်ဆီးမည့် အဆိပ်မြူထုတစ်ခု ဖြစ်တော့သည်။

"မဟုတ်ဘူး... ကယ်ကြပါဦး"

"တစ်ယောက်ယောက်... ကျေးဇူးပြုပြီး ကယ်တင်ပေးပါ..."

အနီရောင်မြူထုက အင်မော်တယ်နယ်မြေဆီသို့ ပျံ့နှံ့သွားခဲ့ပြီး တဖြည်းဖြည်းချင်း လွှမ်းခြုံသွားခဲ့သည်။

မရေတွက်နိုင်သော သက်ရှိသတ္တဝါများက နာကျင်စွာဖြင့် အော်ဟစ်ငိုကြွေးနေကြရ၏။

သူတို့၏ အသားအရေနှင့် အရိုးများက သွေးအဖြစ်သို့ အရည်ပျော်သွားခဲ့ကြရသည်။

အလွန်နည်းပါးသော အင်အားစုများသာလျှင် သူတို့၏ မျိုးနွယ်စုများကို သွေးရောင်မြူထုမှ သီးခြားခွဲထုတ်ရန်အတွက် အကာအကွယ် အစီရင်တစ်ခု တည်ဆောက်နိုင်ခဲ့ကြပေသည်။

"ဒီအတိုင်း ဆက်သွားနေရင် အခြေအနေတွေက အရမ်းဆိုးရွားသွားလိမ့်မယ်..."

"ငါတို့ ကျွင်းမိသားစုက ဂရုစိုက်စရာမလိုပေမဲ့ အင်မော်တယ်နယ်မြေတစ်ခုလုံးရဲ့ ကံကြမ္မာက ထိခိုက်သွားနိုင်တယ်... ပြီးတော့ အရာအားလုံးက မျှခြေ ပျက်စီးသွားလိမ့်မယ်..."

ကျွင်းမိသားစု၏ ဒုတိယမြောက် ဘိုးဘေးဖြစ်သူ ကျွင်းလင်ရှောင်းက မျက်မှောင်ကျုံ့လိုက်သည်။

ဤအနီရောင်မြူထုက ကျွင်းမိသားစုအတွက် သို့မဟုတ် ပျက်စီးခြင်းကောင်းကင် အင်မော်တယ်နယ်မြေနှင့် ဆန်းကြယ်ကောင်းကင် အင်မော်တယ်နယ်မြေ တစ်ခုလုံးအတွက်ပင် မည်သည့်အရာမျှ မဟုတ်ခဲ့ချေ။

အကြောင်းမှာ၊ ကျွင်းမိသားစုက ဤအင်မော်တယ်နယ်မြေ နှစ်ခုကို ကာကွယ်ပေးထားမည် ဖြစ်သောကြောင့် ဖြစ်သည်။

သို့သော်လည်း ဤအရာက အခြားသောအင်မော်တယ်နယ်မြေများတွင် အလွန်အမင်း ပြင်းထန်သော သေကျေပျက်စီးမှုများကို ဖြစ်ပေါ်စေလိမ့်မည်။

ထိုသို့ဖြစ်လာပါက အောက်ခြေအလွှာရှိ သက်ရှိအားလုံး ပျက်စီးသွားကြမည် ဖြစ်သည်။

၎င်းက အင်မော်တယ်နယ်မြေအတွက် သေစေနိုင်သော ရိုက်ခတ်မှုတစ်ခု ဖြစ်လာလိမ့်မည်။

၎င်းမှာ မြင့်မားသော ပိရမစ်တစ်ခုကဲ့သို့ဖြစ်ပြီး အောက်ခြေသာ ပြိုလဲသွားပါက ပိရမစ်တစ်ခုလုံး ပြိုလဲသွားရမည် ဖြစ်သည်။

ပိရမစ်၏ ထိပ်ဆုံးတွင် တည်ရှိနေသော ကျွင်းမိသားစုသည်လည်း သဘာဝအတိုင်း သက်ရောက်မှု ခံရလိမ့်မည်ဖြစ်ပြီး လောကကြီးက ၎င်း၏ မျှခြေကို ဆုံးရှုံးသွားလိမ့်မည်။

စန်းမျိုးနွယ်စုကလည်း ဤအချက်ကို စဉ်းစားမိခဲ့ပုံရသည်။

နတ်ဘုရားစိတ်အာရုံတစ်ခုက အချိန်အဆုံးသတ်၏အရှင်သခင်ထံသို့ သတင်းစကားတစ်ခု ပေးပို့လိုက်၏။

၎င်းက စန်းမျိုးနွယ်စုမှ ဝေါလ်ဖေ့အရှင် ဖြစ်သည်။

'အချိန်အဆုံးသတ်ရဲ့အရှင်သခင်... ခင်ဗျားရဲ့ နည်းလမ်းတွေက နည်းနည်း ရက်စက်လွန်းမနေဘူးလား...'

'ခင်ဗျား သွေးချောင်းစီးစေတဲ့ သတ်ဖြတ်မှုတွေ၊ ကမောက်ကမဖြစ်ခြင်းတွေကို လှုံ့ဆော်တာက ကျုပ်တို့နဲ့ ဘာမှမဆိုင်ဘူး...'

'ဒါပေမဲ့ အောက်ခြေအလွှာက သက်ရှိတွေ အများကြီး သေဆုံးသွားမယ်ဆိုရင် အဲဒါက အင်မော်တယ်နယ်မြေတစ်ခုလုံးရဲ့ ကောင်းကင်လမ်းစဥ် မျှခြေကို ထိခိုက်သွားလိမ့်မယ်...'

သို့သော်လည်း ဤစကားများကို ကြားရသည့်တိုင် အချိန်အဆုံးသတ်၏အရှင်သခင်က လုံးဝ တုန်လှုပ်ခြင်းမရှိပေ။

ယခင်က သက်ရှည်ခြင်းဧကရာဇ်သည် အင်မော်တယ်နယ်မြေ ကိုးခုစလုံးကို ဖျက်ဆီးပစ်ရန် ကြိုးပမ်းခဲ့သော်လည်း စန်းမျိုးနွယ်စု၏ တားဆီးခြင်းကို ခံခဲ့ရသည်။

သက်ရှည်ခြင်းဧကရာဇ်သည် စန်းမျိုးနွယ်စုကို မျက်နှာသာပေးခဲ့၏။

သို့သော်လည်း အချိန်အဆုံးသတ်၏အရှင်သခင်က သက်ရှည်ခြင်းဧကရာဇ် မဟုတ်ချေ။

'ငါ ဘာပဲလုပ်လုပ် မင်းတို့ စန်းမျိုးနွယ်စုနဲ့ ဘာမှမဆိုင်ဘူး... ငြိမ်ငြိမ်လေးနေပြီး ထွက်မလာခဲ့နဲ့...'

အချိန်အဆုံးသတ်၏အရှင်သခင်က ကြီးစိုးစွာဖြင့် အသံပြန်လည်ပို့လွှတ်လိုက်သည်။

'အချိန်အဆုံးသတ်ရဲ့အရှင်သခင်... ခင်ဗျား...'

'ကျုပ်တို့ စန်းမျိုးနွယ်စုက ကောင်းကင်လမ်းစဥ်ရဲ့ မျိုးဆက်တွေ ဖြစ်တယ်ဆိုတာ သိရဲ့လား... ကျုပ်တို့က...'

'ဟမ့်... မင်းတို့ဘာသာ ကောင်းကင်လမ်းရဲ့ မျိုးဆက်တွေပဲ ဖြစ်ဖြစ် ဒါမှမဟုတ် စစ်မှန်တဲ့ ကောင်းကင်လမ်းစဉ်ပဲဖြစ်ဖြစ် ဘာအရေးစိုက်စရာ ရှိလို့လဲ..."

"ဒါက အင်မော်တယ်နယ်မြေရဲ့ ကောင်းကင်လမ်းစဥ်သက်သက်ပဲ... ကောင်းကင်အားလုံးကို အုပ်ချုပ်တဲ့ အထွတ်အထိပ် ဖြစ်တည်မှု မဟုတ်ဘူး... နောက်ပြီးတော့ မင်းတို့က အခြေအနေကို အခွင့်ကောင်းယူနေကြတဲ့ အစေခံတစ်စုထက် မပိုပါဘူး'

အချိန်အဆုံးသတ်၏အရှင်သခင်က အထင်မြင်သေးစွာ ပြောလိုက်၏။

ဝေါလ်ဖေ့အရှင်သခင်၏ နတ်ဘုရားစိတ်အာရုံက ထပ်မံမထွက်ပေါ်လာတော့ပေ။

စန်းမျိုးနွယ်စုက တိတ်ဆိတ်သွားခဲ့ရသည်။

သူတို့နေဖြင့် ဒေါသထွက်သွားခဲ့ခြင်းလား သို့မဟုတ် အမှန်တကယ်ပင် တတ်နိုင်ခြင်းမရှိတော့ခြင်းလား ဆိုသည်ကိုမူ မသိရချေ။

သို့သော်လည်း နက်ရှိုင်းသော အခြေခံအုတ်မြစ်ရှိသည့် စန်းမျိုးနွယ်စုက အချိန်အဆုံးသတ်၏အရှင်သခင်ကို မတိုက်ခိုက်ရဲခြင်းမျိုး မဖြစ်နိုင်ပါ။

သူတို့က ဤမျှ အစွမ်းထက်ပြီး ကြောက်မက်ဖွယ်ကောင်းသော ရန်သူတစ်ဦးနှင့် ရန်ဘက်ပြုရမည့် တန်ဖိုးကို မပေးဆပ်လိုကြခြင်းသာ ဖြစ်သည်။

အင်မော်တယ်ခုံရုံးကလည်း ဤကဲ့သို့သော အတွေးမျိုး ရှိကြပေသည်။

သူတို့၏ ဤကဲ့သို့ တစ်ကိုယ်ကောင်းဆန်သော အတွေးအခေါ်များကြောင့်ပင် အချိန်အဆုံးသတ်၏အရှင်သခင်က စိတ်ကြိုက် ပြုမူနိုင်နေခြင်း ဖြစ်သည်။

သို့မဟုတ်ဘဲ အင်မော်တယ်နယ်မြေရှိ အင်အားစုအားလုံး ဖြစ်ကြသော အင်မော်တယ်ခုံရုံး၊ မြေအောက်ကမ္ဘာ၊ စန်းမျိုးနွယ်စုနှင့် ရှေးဦးတော်ဝင်မျိုးနွယ်စုတို့ ပူးပေါင်းကြမည်ဆိုပါက...

စွမ်းအားကြီးမားသော အချိန်အဆုံးသတ်၏အရှင်သခင်ပင်လျှင် သတိထားရပေလိမ့်မည်။

သို့သော်လည်း ၎င်းက လူသားတို့၏ သဘာဝပင် ဖြစ်သည်။

လူတိုင်းတွင် အတ္တ ရှိ၏။

ဤအခြေအနေမှ မည်သို့ အကျိုးအမြတ်ထုတ်ရမည်ကို တွေးတောနေကြသည့် မြေအောက်ကမ္ဘာ ကဲ့သို့သော အင်အားစုမျိုးမှာ အချိန်အဆုံးသတ်၏အရှင်သခင်ကို ဆန့်ကျင်တိုက်ခိုက်ရန် ဘယ်သောအခါမှ ထွက်လာကြမည် မဟုတ်ချေ။

ကျွင်းရှောင်ယောက်နှင့် အခြားသော လူအနည်းငယ်သာ ဆက်လက်၍ တိုက်ပွဲဝင်နေကြဆဲ ဖြစ်သည်။

"ဒီအတိုင်း ဆက်သွားနေရင် အင်မော်တယ်နယ်မြေက ကြီးမားတဲ့ ဆုံးရှုံးမှုတွေကို ခံစားရလိမ့်မယ်..."

တုန်ဟွဧကရာဇ်၏ အစစ်အမှန်ဝိညာဉ်က ပြောလိုက်သည်။

သူသည် တစ်ချိန်က ရှေးဟောင်းအင်မော်တယ်ခုံရုံး၏ အုပ်စိုးရှင်ဖြစ်ခဲ့ပြီး အင်မော်တယ်နယ်မြေကို အုပ်ချုပ်ခဲ့သည့် အရှင်သခင်လည်း ဖြစ်ခဲ့၏။

ယခုအခါတွင် ဝမ်းနည်းပူဆွေးမှုများနှင့် ကြေကွဲမှုများဖြင့် ပြည့်နှက်နေသည့် ဆိတ်သုဉ်းပြီး ကြေကွဲဖွယ်ကောင်းသော အင်မော်တယ်နယ်မြေကို ကြည့်ရင်း တုန်ဟွဧကရာဇ်၏ မျက်ဝန်းထဲတွင် ဝေဝါးသော ခံစားချက်တစ်ခု ဖြတ်ပြေးသွားခဲ့သည်။

"အကြီးအကဲ...၊ ခင်ဗျား..."

ကျွင်းရှောင်ယောက်နှင့် အခြားသူများ ခေတ္တရပ်တန့်သွားခဲ့ကြသည်။

"ငါ့ရဲ့ အရာအားလုံးကို ပေးဆပ်လိုက်ရင် သူ့ကို ဒဏ်ရာရအောင် လုပ်နိုင်မလားဆိုတာ ငါ သိချင်မိတယ်..."

တုန်ဟွဧကရာဇ်က ပြောဆိုပြီးသည်နှင့် တစ်ပြိုင်နက် သူ၏ ခန္ဓာကိုယ်တစ်ခုလုံးကို စွမ်းအားများဖြင့် စတင်လောင်ကျွမ်းစေလိုက်သည်။

ဏမျှအတွင်းမှာပင် ဒဏ္ဍာရီလာ စွမ်းအားတစ်ခုက ကျယ်ပြောလှသော ကောင်းကင်နှင့် မြေပြင်ကို လွှမ်းမိုးသွားခဲ့ပုံရ၏။

အနီရောင် အဆိပ်မြူထု အများအပြားပင်လျှင် လွင့်ပါးပျက်စီးသွားခဲ့ရတော့သည်။

"အလို"

အနီရောင်မြူထုအတွင်း၌ ကွယ်ဝှက်နေသော အချိန်အဆုံးသတ်အရှင်သခင်၏ အကြည့်များက တုန်ဟွဧကရာဇ် အပေါ်သို့ ကျရောက်လာခဲ့သည်။

"အဖေ..."

အင်မော်တယ်နယ်မြေဘက်တွင် ဤမြင်ကွင်းကို မြင်ရသောအခါ ယွမ်ချယ် စူးရှစွာ အော်ဟစ်လိုက်သည်။

သူမ၏ လှပသော မျက်နှာပြင်ပေါ်တွင် မျက်ရည်များ စီးကျလာခဲ့၏။

သူသည် ခေတ်အဆက်ဆက်ကို ဖြတ်သန်းကာ အိပ်မောကျခဲ့ရပြီး သူမ၏ ဖခင်ဖြစ်သူနှင့် မရေတွက်နိုင်သော နှစ်ပေါင်းများစွာ ကွဲကွာခဲ့ရသည်။

ယခုအချိန်တွင် တုန်ဟွဧကရာဇ်ကို ထပ်မံ၍ မြင်တွေ့နိုင်ခြင်းကပင် သူ့အတွက် ကံကောင်းမှုတစ်ခု ဖြစ်နေပြီ။

သို့သော်လည်း ယခုအခါ သူမ၏ ဖခင်က ထပ်မံ၍ ပျောက်ကွယ်သွားတော့မည် ဖြစ်သည်။

"‌အဖေ့ရဲ့ မိုက်မဲတဲ့ သမီးလေးရယ်... ဒါက အစစ်အမှန်ဝိညာဉ် သက်သက်ပါပဲ... တကယ်လို့ ဒါကို စတေးခံလိုက်ရမယ်ဆိုရင်လည်း စတေးခံလိုက်ရ‌တယ်ပေါ့ကွယ်"

"ဒါပေမဲ့ အခုကစပြီး မင်းက မင်းကိုယ်မင်း ပိုပြီး အားကိုးရတော့မယ်..."

"ပြီးတော့ ဒါကို မှတ်ထားပါ... မင်းရဲ့ ကိုယ်ပိုင် ပျော်ရွှင်မှုနောက်ကိုပဲ လိုက်ပါစေ"

တုန်ဟွဧကရာဇ်က ပြုံးနေခဲ့သည်။

သူသည် သူ့ကိုယ်သူ လောင်ကျွမ်းစေပြီး ဤအစစ်အမှန်ဝိညာဉ်ကို စတေးရန် ပြင်ဆင်လိုက်ခြင်း ဖြစ်၏။

ဤအခိုက်တွင် သူက စစ်မှန်သော ဒဏ္ဍာရီလာဧကရာဇ် တစ်ပါး၏ စွမ်းအားကို ထုတ်ဖော်လိုက်ပြီ ဖြစ်သည်။

"ပြီးတော့ မင်း... ငါ့သမီးကို စိတ်ပျက်အောင် မလုပ်ပါနဲ့... မဟုတ်ရင် မင်း အကျိုးဆက်တွေကို ရင်ဆိုင်ရလိမ့်မယ်..."

တုန်ဟွဧကရာဇ်က ကျွင်းရှောင်ယောက်ကို ထပ်မံပြောလိုက်သည်။

ဤအခိုက်အတန့်တွင် ကျွင်းရှောင်ယောက်က တိတ်ဆိတ်နေခဲ့လေသည်။

တုန်ဟွဧကရာဇ်က အချိန်အဆုံးသတ်၏အရှင်သခင်ကို တိုက်ခိုက်ရန်အတွက် သူ့ကိုယ်သူ လောင်ကျွမ်းပစ်နေပြီ ဖြစ်သည်။

ဤအချိန်မျိုးတွင် သူက ငြင်းပယ်သည့် စကားတစ်ခွန်းမျှ မပြောနိုင်ခဲ့ဘဲ တိတ်ဆိတ်စွာဖြင့်သာ ခေါင်းညိတ်ပြနိုင်ခဲ့ပေသည်။

တုန်ဟွဧကရာဇ်လည်း နောက်ဆုံးတွင် စိတ်သက်သာရာ ရသွားဟန်ဖြင့် ပြုံးလိုက်သည်။

သူ၏ ခန္ဓာကိုယ်တစ်ခုလုံးသည် နိယာမတရားများဖြင့် နတ်ဘုရားမီးတောက်များအတွင်း၌ ဝါးမျိုခြင်း ခံလိုက်ရ၏။

သူ့နောက်ကွယ်တွင် ကောင်းကင်ဘုံရှိ နတ်ဘုရားနန်းတော် သို့မဟုတ် နတ်ဘုရားခုံရုံးတစ်ခုကဲ့သို့ ကျယ်ပြောပြီး ခန့်ညားထည်ဝါသော ရှေးဟောင်းအဆောက်အအုံတစ်ခု ပေါ်ထွက်လာပုံရသည်။

၎င်းသည် တစ်ချိန်က အနှိုင်းမဲ့တောက်ပပြီး ဘုန်းတန်ခိုးကြီးခဲ့သော ရှေးဟောင်းအင်မော်တယ်ခုံရုံးပင်။

"အရှင်မင်းကြီး..."

ခန့်ညားထည်ဝါသော ရှေးဟောင်းအင်မော်တယ်ခုံရုံးနှင့် မီးတောက်များကဲ့သို့ လောင်ကျွမ်းနေသော တုန်ဟွဧကရာဇ်ကို မြင်တွေ့လိုက်ရချိန်တွင်...

ရှေးဟောင်းအင်မော်တယ်ခုံရုံး၏ ပုဂ္ဂိုလ်များ အားလုံး၏ မျက်ဝန်းထဲတွင် မျက်ရည်များ ဝဲလာခဲ့ကြသည်။

၎င်းသည် တစ်ချိန်က ဘုန်းတန်ခိုးကြီးသော ရှေးဟောင်းအင်မော်တယ်ခုံရုံး ဖြစ်၏။

ထိုခေတ်ကာလ၏ ဘုန်းအာနုဘော်နှင့် တောက်ပမှုအားလုံးက ဤအခိုက်အတန့်တွင် ပြန်လည်ပေါ်ပေါက်လာခဲ့ပြီ။

"ငါ... ရှေးဟောင်းအင်မော်တယ်ခုံရုံးရဲ့ နောက်ဆုံးအရှင်သခင် တုန်ဟွဧကရာဇ်က အမိန့်ပေးတယ်။ ရှေးဟောင်းအင်မော်တယ်ခုံရုံးရဲ့ စစ်သူကြီးအားလုံး အင်မော်တယ်နယ်မြေကို ကာကွယ်စေ"

တုန်ဟွဧကရာဇ်၏ အသံက မိုးနှင့်မြေကြားတွင် ဟိန်းထွက်သွားခဲ့သည်။

"ကျုပ်တို့ အမိန့်ကို နာခံပါ့မယ်..."

ရှေးဟောင်းအင်မော်တယ်ခုံရုံး၏ စစ်သူကြီးအားလုံး ဒူးထောက်လိုက်ကြ၏။

အရှေ့အရပ်မှ ကျစ်ဝေဧကရာဇ်၊ တောင်ဘက်အရပ်က ကုံးချန်ဧကရာဇ်၊ အနောက်ဘက်အရပ်က ယွမ်ရှန့်ဧကရာဇ်နှင့် မြောက်ဘက်အရပ်မှ ဟော်တုဧကရာဇ် အစရှိသည့် ဧကရာဇ်လေးပါးတို့ကလည်း ဦးညွှတ်ကာ ပြောလိုက်ကြသည်။

"ဧကရာဇ်အရှင်ကို ပို့ဆောင်ပါတယ်"

"ဝုန်း"

ကျယ်လောင်သော မြည်ဟီးသံနှင့်အတူ တုန်ဟွဧကရာဇ်သည် တစ်ချိန်က ခန့်ညားထည်ဝါခဲ့သော ရှေးဟောင်းအင်မော်တယ်ခုံရုံးကို သယ်ဆောင်လျက် အချိန်အဆုံးသတ်၏အရှင်သခင်အပေါ်သို့ ပြင်းထန်လှသော တိုက်ခိုက်မှုတစ်ခုကို ထုတ်ဖော်လိုက်သည်။

ဤလှုပ်ရှားမှုတွင် ဒဏ္ဍာရီလာဧကရာဇ်တစ်ပါး၏ စွမ်းအားများ အမှန်တကယ် ပါဝင်နေ၏။

၎င်းက တုန်ဟွဧကရာဇ်၏ မူလခန္ဓာဖြင့် အစွမ်းကုန် တိုက်ခိုက်မှုတစ်ခုနှင့် ညီမျှသည်။

ဤလှုပ်ရှားမှုမှာ ဂြိုဟ်တစ်စင်းဖြင့် အချိန်အဆုံးသတ်၏အရှင်သခင်ကို ကိုင်ရိုက်လိုက်သလို ဖြစ်တော့သည်။

အနှိုင်းမဲ့သော အင်အားလှိုင်းများ ပေါက်ကွဲထွက်လာခဲ့ပြီး အနီရောင် သွေးမြူထု အများအပြားလည်း လွင့်ပါးပျက်စီးသွားခဲ့သည်။

"ဝုန်း... ဝုန်း... ဝုန်း..."

အသံများက ဆက်တိုက်ထွက်ပေါ်လာခဲ့သည်။

၎င်းတို့သည် ခြေနင်းသံများဖြစ်ပြီး ဟင်းလင်းပြင်ကို နင်းလျှောက်နေသည့် ခြေသံများ ဖြစ်၏။

"သူ နောက်ကို ဆုတ်သွားခဲ့ရပြီ... အချိန်အဆုံးသတ်ရဲ့အရှင်သခင် နောက်ကို ခြေလှမ်းနည်းနည်း ဆုတ်သွားခဲ့ရပြီ..."

ကျွင်းရှောင်ယောက်နှင့် အခြားသူများက စူးစိုက်ကြည့်လိုက်ကြသည်။

တုန်ဟွဧကရာဇ်၏ အစစ်အမှန်ဝိညာဉ်က သူ၏ စွမ်းအင်အားလုံးကို လောင်ကျွမ်းစေပြီး ဒဏ္ဍာရီလာ တိုက်ခိုက်မှုတစ်ခုကို ထုတ်ဖော်ခဲ့ခြင်း ဖြစ်၏။

အချိန်အဆုံးသတ်အရှင်သခင်၏ ဘေးပတ်ဝန်းကျင်ရှိ သွေးမြူထုက လုံးဝ လွင့်ပါးသွားခဲ့ရပြီး နောက်သို့ ခြေတစ်လှမ်းဆုတ်ရန် ဖိအားပေးခြင်း ခံလိုက်ရတော့သည်။

သွေးမြူထုများ လွင့်ပါးပျက်စီးသွားခဲ့သည့်အခါ...

ခေတ်ကာလအဆက်ဆက်၏ နောက်ကွယ်တွင် ပုန်းအောင်းနေခဲ့သည့် အချိန်အဆုံးသတ်အရှင်သခင်၏ မူလရုပ်သွင်က နောက်ဆုံးတွင် ပေါ်ထွက်လာခဲ့သည်။

ထိုအခါ သူတို့ မြင်တွေ့လိုက်ရသည့်အရာကြောင့် သူတို့၏ အရိုးထဲအထိ အေးစိမ့်သွားစေခဲ့၏။

အအေးလှိုင်းတစ်ခုက သူတို့၏ အရိုးများကို ဖြတ်သန်းသွားခဲ့ပြီး သူတို့၏ လည်ချောင်းဝဆီသို့ တိုက်ရိုက် တက်လာခဲ့တော့သည်။