အခန်း ၁၃၀
Vol. 13 Ch. 130
အခန်း (၁၃၀) ကျော်ကြားမှုဟူသည် ကောင်းကင်ဘုံကို လောင်ကျွမ်းစေနိုင်သော မီးပွားလေးတစ်ခုကဲ့သို့ပင်
ကျန်းယဲ့က အွန်လိုင်းပေါ်မှ ပွက်လောရိုက်နေမှုများကို လုံးဝ မသိရှိခဲ့သလို ၎င်းက သူ့အပေါ် မည်သို့မျှ သက်ရောက်မှု မရှိခဲ့ချေ။
ကိုယ်ပိုင်မီဒီယာများ၏ အလုပ်လုပ်ပုံကို ရင်းနှီးသူများက ဤအချက်ကို သိကြပေသည်။
ရေပန်းစားသော အကြောင်းအရာတစ်ခု ပေါ်ထွက်လာသည်နှင့် တပြိုင်နက် ထိုအကြောင်းအရာ၏ ဗဟိုချက်တွင် ရှိနေသူများက ကိုယ်ပိုင်မီဒီယာသမားများနှင့် တိုက်ရိုက်ထုတ်လွှင့်မှု အမျိုးမျိုး၏ ဝိုင်းရံမှုကို မလွှဲမရှောင်သာ ခံရမည်ဖြစ်၏။
ကြည့်ရှုသူများပြားစေမည့် အလားအလာကြောင့် ဆွဲဆောင်ခံရသော ဤဈေးကွက်ရှာဖွေရေး အကောင့်များနှင့် ကိုယ်ပိုင်မီဒီယာသမားများက ရီယဲ့ခရီးသွားအေဂျင်စီသို့ အုံနှင့်ကျင်းနှင့် ရောက်ရှိလာခဲ့ကြသည်။
အချို့လူများက တိုက်ရိုက်ထုတ်လွှင့်မှုတစ်ခု စတင်ရန် အဆင်သင့်ဖြစ်နေကြသော်လည်း ရီယဲ့ခရီးသွားအေဂျင်စီ၏ ဧရိယာထဲသို့ ဝင်ရောက်လာချိန်တွင် သူတို့အားလုံး တားဆီးခံလိုက်ရပြီး ရင်းနှီးစွာ ဆွေးနွေးရန် မှောင်မိုက်နေသော အခန်းငယ်လေးတစ်ခုဆီသို့ ဖိတ်ခေါ်ခံလိုက်ရ၏.....
ဤကိုယ်ပိုင်မီဒီယာသမားများက ထို အခန်းမည်းလေးထဲမှ ပြန်လွတ်လာပြီးနောက် အကြောက်လွန်ကာ တုန်ယင်နေခဲ့ကြလေသည်။
(NT -လက်ဆွဲနှုတ်ဆက်ရုံပါပဲ.......)
ဤအချိန်တွင် အချိန်ခရီးသွားခြင်းမှာ အမှန်တကယ်ဖြစ်ကြောင်းနှင့် အာဏာပိုင်များက ၎င်းကို အစောကြီးကတည်းက သတိထားမိခဲ့ပြီး မည်သူ့ထက်မဆို ပို၍ ကောင်းစွာ သိရှိထားကြောင်း သူတို့ ရှင်းရှင်းလင်းလင်း သဘောပေါက်သွားကြရသည်။
သူတို့ မလာရောက်မီက သူတို့အားလုံးက ကြည့်ရှုသူများပြားမှုကိုသာ လိုလားခဲ့ကြပြီး ကြည့်ရှုသူများပြားမှုအတွက် စိတ်အားထက်သန်နေခဲ့ကြသည်။
သူတို့ ရောက်ရှိလာပြီးနောက်တွင်မူ ကြည့်ရှုသူများပြားရေးကို မတွေးတောတော့သလို ကြည့်ရှုသူများပြားရေးအကြောင်းကို ပြောဆိုရန်လည်း စိတ်မဝင်စားကြတော့ခေေ။ သူတို့တွင် ကျန်ရှိနေသည်မှာ အချိန်ခရီးသွားခြင်းအတွက် ရူးသွပ်လုမတတ် ဆန္ဒတစ်ခုသာ ဖြစ်၏။
ကျန်းဖုန်း နှင့် သူ၏ လက်ထောက်တို့က အခန်းမည်းထဲမှ ယိမ်းယိုင်စွာ ထွက်လာကြပြီး သူတို့၏ ခြေထောက်များမှာ သစ်ရွက်များကဲ့သို့ တုန်ယင်နေခဲ့သည်။
အပေါ်သို့ မော့ကြည့်လိုက်ပြီး နေရောင်ခြည် ကျဆင်းနေသည်ကို မြင်လိုက်ရမှသာ နွေးထွေးမှုက အရိုးထဲအထိ တဖြည်းဖြည်း စိမ့်ဝင်လာပြီး ခန္ဓာကိုယ်တွင် ကပ်တွယ်နေသော အအေးဓာတ်ကို ဖြည်းညှင်းစွာ ဖယ်ရှားပေးလိုက်၏။
လက်ထောက်ဖြစ်သူက ကျန်းဖုန်းကို ကြည့်ကာ အံ့သြတကြီး အာမေဍိတ်သံဖြင့် ပြောလိုက်၏။ "အစ်ကိုဖုန်း... အချိန်ခရီးသွားတာ တကယ်ရှိတယ်လို့ ကျွန်တော် တစ်ခါမှ မတွေးဖူးဘူး"
ကျန်းဖုန်း ကိုယ်တိုင်လည်း အချိန်ခရီးသွားခြင်း တကယ်ရှိမည်ဟု ဘယ်တုန်းကမှ မမျှော်လင့်ထားခဲ့ချေ။
သူတို့နှစ်ယောက် ကားပေါ်သို့ ပြန်လည်ရောက်ရှိသွားပြီးနောက်တွင်မှသာ သူတို့၏ စိုးရိမ်ပူပန်နေသော နှလုံးသားများ တဖြည်းဖြည်း တည်ငြိမ်သွားရတော့သည်။
လက်ထောက်ဖြစ်သူက အသံကို နှိမ့်ကာ မေးလိုက်၏။ "ကျွန်တော်တို့ အချိန်ခရီးသွားတဲ့အကြောင်းကို အွန်လိုင်းမှာ ဆက်တင်လို့ရသေးလား.."
ကျန်းဖုန်းက သူ၏အသက်အန္တရာယ်ကို စိုးရိမ်နေသည်မှာ ထင်ရှားစွာဖြင့် ခေါင်းခါပြလိုက်သော်လည်း တစ်ခုခု မှားယွင်းနေကြောင်းကို လျင်မြန်စွာ သတိပြုမိသွားခဲ့သည်။
သူ တစ်ခုခုကို တွေးမိသွားသည့်အလား သူ၏ သူငယ်အိမ်များ ရုတ်တရက် ကျယ်လာလေသည်။
ကျန်းဖုန်း၏ တစ်စုံတစ်ခုကို အသစ်ရှာဖွေတွေ့ရှိသွားသော မျက်နှာအမူအရာကို မြင်သောအခါ လက်ထောက်ဖြစ်သူက စပ်စုချင်စိတ်ဖြင့် မေးလိုက်၏။ "အစ်ကိုဖုန်း... ဘာဖြစ်လို့လဲ။ တစ်ခုခု တွေ့လို့လား"
ကျန်းဖုန်းက သူ၏ လက်ထောက်ဘက်သို့ လှည့်ကာ သူ၏ လက်မောင်းကို ဆုပ်ကိုင်ပြီး အော်ပြောလိုက်လေသည်။ "တရားဝင်လိုင်းတွေက ဒီရေပန်းစားနေမှုကို ထိန်းချုပ်ဖို့တောင် မကြိုးစားကြဘူး..."
လက်ထောက်ဖြစ်သူက ခေတ္တမျှ အံ့အားသင့်သွားသော်လည်း ဘာတွေဖြစ်နေသည်ကို လျင်မြန်စွာ သဘောပေါက်သွားလေသည်။
သူက သူ၏ နဖူးကို ရုတ်တရက် ရိုက်လိုက်၏။ "ဟုတ်သားပဲ... ဘာလို့ အာဏာပိုင်တွေက ဒီရေစီးကြောင်းကို မထိန်းချုပ်တာလဲ။ ဘာလို့ ဒါကို ပိုကြီးထွားလာအောင် ခွင့်ပြုထားတာလဲ"
အာဏာပိုင်များကသာ ဤရေပန်းစားမှုကို ထိန်းချုပ်လိုပါက မည်သည့်မီဒီယာကများ သတင်းအချက်အလက် အနည်းငယ်လေးကိုပင် ပေါက်ကြားအောင် လုပ်ရဲမည်နည်း။
အာဏာပိုင်များကသာ ဤကိစ္စကို ဖုံးကွယ်လိုပါက အွန်လိုင်းတွင် ဤမျှ ကြီးထွားလာစေရန် သေချာပေါက် ခွင့်ပြုထားမည် မဟုတ်ချေ။ သို့သော် လက်ရှိ အွန်လိုင်းတွင် ပွက်လောရိုက်နေမှုများ ဤမျှ မြင့်မားနေသော်လည်း သူတို့က လုံးဝ ထိန်းချုပ်ထားခြင်း မရှိချေ။
မီဒီယာသမားများက ရီယဲ့ခရီးသွားအေဂျင်စီ၏ တာဝန်ခံကို သွားရောက်နှောင့်ယှက်ခြင်းမှသာ တားဆီးနေခြင်း ဖြစ်၏။
ထို့နောက် လက်ထောက်ဖြစ်သူက သူတို့၏ စကားဝိုင်းထဲမှ လွတ်နေသော အချက်တစ်ချက်ကို သတိပြုမိသွားခဲ့သည်။ "အဲဒီလူက အွန်လိုင်းမှာ ဆက်မတင်ဖို့ တစ်ခွန်းမှ မပြောခဲ့ဘူးထင်တယ်...."
ကျန်းဖုန်းကလည်း သဘောတူညီစွာ ခေါင်းညိတ်လိုက်ပြီး ထိုအချက်ကို သတိပြုမိထားသည်မှာ ထင်ရှားလေသည်။
"ကျွန်တော်တို့ ဒီရေပန်းစားနေတဲ့ အကြောင်းအရာကို ဆက်တင်လို့ ရနိုင်မလား.." လက်ထောက်ဖြစ်သူက မေးလိုက်၏။
ကျန်းဖုန်းက ပြန်မဖြေဘဲ 'ဘာလို့ အဲဒီလို ဖြစ်ရတာလဲ' ဟု တီးတိုးရေရွတ်လိုက်မိသည်။
ချင်မင်းဆက် ခရီးသွားအဖွဲ့မှ အဖွဲ့ဝင်များသာ ဤကိစ္စကို သိရှိပါက သူတို့ အကြောင်းရင်းကို သိကြပေလိမ့်မည်။
ဤအရာက ဆန်းကြယ်မှုများ ပြည့်နှက်နေပေသည်။
အချိန်မှန် ထတတ်သော ကျန်းယဲ့က ရှေးဦးစွာ ရပ်ကွက်ထဲတွင် ပြေးလွှားလေ့ကျင့်ခန်း လုပ်ပြီးနောက် သူ ပုံမှန်သွားနေကျ နံနက်စာစားသောက်ဆိုင်သို့ သွားကာ အစပ်တိုဟူးပေါက်စီများနှင့် အရသာရှိသော ပဲနို့တစ်ခွက်ကို မှာယူလိုက်၏။
အဝစားသောက်ပြီးနောက် အိမ်သို့ အေးဆေးစွာ လမ်းလျှောက်ပြန်လာခဲ့လေသည်။
ကျန်းယဲ့ နူးညံ့သော ဆိုဖာပေါ်သို့ ပစ်ချထိုင်လိုက်ပြီး "စနစ်... ရှင်းလင်းမှုကို စတင်လိုက်ပါ" ဟု ပြောလိုက်၏။
[ဒင်... ဟင်းလင်းပြင်ခရီးစဉ် ပြီးဆုံးသွားပါပြီ..]
[အခြေခံ ဆုလာဘ် - သက်တမ်း +၃၀ ရက်၊ အပိုဆုငွေ ယွမ် ၄၀၀,၀၀၀ (၅၈၅၈ ဖြင့် အဆုံးသတ်သော အကောင့်ထဲသို့ ထည့်သွင်းပြီးပါပြီ)]
[ခရီးသွားလာရေး မစ်ရှင် ဆုလာဘ် - တိရစ္ဆာန်များနှင့် ဆက်သွယ်နိုင်သော ကျွမ်းကျင်မှု (လဲလှယ်နိုင်သည်)]
"လဲလှယ်မယ်..."
ကျွမ်းကျင်မှုကို လဲလှယ်လိုက်သည်နှင့် တပြိုင်နက် ဘာမှ မဖြစ်ခဲ့သည့်အလား ကျန်းယဲ့ဟာ ဘာမှ မခံစားရပေ။
၎င်းမှာ သိုင်းပညာနှင့် သေနတ်ပစ် ကျွမ်းကျင်မှုများကဲ့သို့သော ကျွမ်းကျင်မှုများကို လဲလှယ်ခြင်းနှင့် လုံးဝ ကွဲပြားနေခဲ့သည်။
ကျန်းယဲ့က ပြတင်းပေါက်ဆီသို့ လျှောက်သွားလိုက်ရာ ရုတ်တရက် ကြည်လင်သော ငှက်အော်သံတစ်ခုကို ကြားလိုက်ရ၏။
"ကျွီ... ကျွီ... ဒီနေ့ ပိုးကောင်တွေ အများကြီးပဲ"
"အရှေ့ဘက်က အဲဒီသစ်ပင်ပေါ်မှာ ပိုးဖလံတုတ်တုတ်ကြီး တစ်ကောင်ရှိတယ်ဟ... "
"ကြည့်.. ကြည့်.... ခြေနှစ်ချောင်း အကောင်ကြီးတွေက ငါတို့ကို စိုက်ကြည့်နေတယ်...."
သူ၏ မျက်ခုံးများ ပင့်တက်သွားပြီး သူ၏ သူငယ်အိမ်များ အနည်းငယ် ကျယ်လာရသည်။
ပြတင်းပေါက်အပြင်ဘက်ရှိ သစ်ကိုင်းတစ်ခုပေါ်တွင် စာကလေး အနည်းငယ် စုအုံနေပြီး သူတို့၏ အမွေးများက ဖောင်းပွနေကာ သူတို့၏ ခေါင်းသေးသေးလေးများကို ဟိုဒီ လှည့်၍ စူးစူးညံညံ အော်ဟစ်နေခဲ့ကြသည်။
ဤအချိန်တွင် မူလက ကျွီကျွီဟုသာ အသံထွက်နေသော ငှက်အော်သံများက သူ၏ နားထဲတွင် ကြည်လင်သော စကားလုံးများအဖြစ် အလိုအလျောက် ပြောင်းလဲသွားပြီး ကလေးဆန်ကာ သက်ဝင်လှုပ်ရှားနေပြီး ငှက်တစ်ကောင်၏ မာနထောင်လွှားမှု အနည်းငယ်လည်း ပါဝင်နေလေသည်။
ကျန်းယဲ့က လက်ကို ဖြည်းညှင်းစွာ မြှောက်လိုက်ပြီး မှန်ကို စမ်းသပ်သည့်အနေဖြင့် ခေါက်ကြည့်လိုက်၏။
"ဒေါက်... ဒေါက်"
စာကလေးများက ချက်ချင်း အမွေးများထောင်သွားကြပြီး မီတာဝက်ခန့် အမြင့်သို့ ပျံတက်သွားကြသည်။
"အဲဒါ တော်တော် လန့်စရာကောင်းတာပဲ.."
"ခြေနှစ်ချောင်း အကောင်ကြီးက ပြတင်းပေါက်ကို လာခေါက်နေတယ်။ ပြေး..m."
စာကလေးများက ချက်ချင်းပင် ရုတ်ရုတ်သဲသဲ ဖြစ်သွားကြသည်။
ကျန်းယဲ့က စူးစူးညံညံ အော်ဟစ်နေသော စာကလေးငယ် တစ်စုကို ကြည့်လိုက်ရာ သူ၏ နှုတ်ခမ်းများပေါ်တွင် အပြုံးဖျော့ဖျော့လေးတစ်ခု ပေါ်လာခဲ့သည်။
'ဒီကျွမ်းကျင်မှုက နည်းနည်း ဆူညံပုံရတယ်...'
ကျန်းယဲ့မှာ ထိုဆူညံသံကြောင့် စိတ်အနှောင့်အယှက် ဖြစ်လာချိန်မှာပင် အတွေးတစ်ခု သူ့ခေါင်းထဲ ရုတ်တရက် ပေါ်လာ၏။
ထို့နောက် ဆူညံနေသော ငှက်အော်သံများက ချက်ချင်းပင် သာမန် ကျွီကျွီ အသံများအဖြစ်သို့ ပြန်လည်ပြောင်းလဲသွားပြီး နားလည်နိုင်သော လူနှင့်ငှက် ဘာသာစကား မဟုတ်တော့ချေ။
'ကောင်းတယ်... ဒါက ထိန်းချုပ်လို့ ရတာပဲ'
'အဲဒါက အကောင်းဆုံးပဲ...'
ထိုစဉ် စနစ်၏ အသံက သူ၏ စိတ်ထဲတွင် ထွက်ပေါ်လာခဲ့ပြန်သည်။ မစ်ရှင်အသစ်တစ်ခု ပေးနေသည်ဟု သူ ထင်ခဲ့သော်လည်း ၎င်းမှာ.......
[ဒင်.... ဟင်းလင်းပြင်အသီးသီးသို့ ခရီးစဉ်သုံးခုကို အောင်မြင်စွာ ပြီးမြောက်ခဲ့ပြီး အတွေ့အကြုံမရှိသေးသူ ကာလကို တရားဝင် ဖြတ်ကျော်သွားတဲ့အတွက် လက်ခံသူကို ဂုဏ်ပြုပါတယ်....]
[ဒင်... ကျော်ကြားမှု အမှတ်များ ပြည့်မီသွားပါပြီ... အဆင့်မြှင့်တင်မှု ယန္တရားကို ဖွင့်လိုက်ပါပြီ]
[ဟင်းလင်းပြင် ခရီးသွားအေဂျင်စီများ၏ ဝါရင့် လုပ်ငန်းဆောင်ရွက်သူတစ်ဦးအနေဖြင့် လုပ်ငန်းတိုးချဲ့ရန်အတွက် ကျော်ကြားမှုနှင့် ဂုဏ်သတင်းတို့က အဓိက သော့ချက်ဖြစ်ပါသည်]
[ကောင်းကင်ဘုံတစ်ခွင်လုံးတွင် နာမည်ကြီးလာမှသာ နယ်ပယ်အားလုံးကို ဖြတ်သန်းသွားလာနိုင်မည် ဖြစ်သည်]
[ကျော်ကြားမှု အမှတ်များကို ယခု ရရှိနိုင်ပါပြီ]
၁။ အလားအလာ၏ ကနဦး လက္ခဏာများ (၀-၁၀၀၀၀ အမှတ်)
ဖွင့်နိုင်သော ဟင်းလင်းပြင်များ - သမိုင်းရေစီးကြောင်းရှည်ကြီး အတွင်းရှိ ရှေးဟောင်း ယဉ်ကျေးမှုများ....
ချင်မင်းဆက်၊ ထန်မင်းဆက်၊ မင်မင်းဆက် စသည်ဖြင့်.....
စနစ်၏ မက်ဆေ့ချ် - ပထမဆုံး ခြေလှမ်းကို လှမ်းပြီး သမိုင်း၏ ဖုန်မှုန့်များကို မျက်မြင်ကိုယ်တွေ့ ကြုံတွေ့ပါ။
၂။ နာမည်ကျော်ကြားလာခြင်း (၁၀၀၀၁-၅၀၀၀၀ အမှတ်)
ဖွင့်နိုင်သော ဟင်းလင်းပြင်များ - အထူး ယဉ်ကျေးမှု ကမ္ဘာများ
ကမ္ဘာပျက်ပြီးနောက်ပိုင်း စွန့်ပစ်နယ်မြေ၊ ရေနွေးငွေ့စွမ်းအင်သုံး ခေတ်ဟောင်းနည်းပညာ၊ မှော်ပညာအနည်းငယ်ရှိသော စိတ်ကူးယဉ်ကမ္ဘာ စသည်ဖြင့်.....
စနစ်၏ မက်ဆေ့ချ် - နယ်မြေတစ်ခွင် ကျော်ကြားပြီး ယဉ်ကျေးမှုများ၏ အတက်အကျကို စူးစမ်းလေ့လာပါ။
၃။ ကမ္ဘာတစ်ဝန်း ကျော်ကြားခြင်း (၅၀,၀၀၁-၂၀၀,၀၀၀ အမှတ်)
ဖွင့်နိုင်သော ဟင်းလင်းပြင်များ - ထူးခြားဆန်းကြယ်သော ကမ္ဘာများ
ကျင့်ကြံခြင်းကမ္ဘာ၊ သိုင်းလောကကမ္ဘာ၊ ဂြိုဟ်အချင်းချင်း နယ်ချဲ့သည့်ခေတ်
စနစ်၏ မက်ဆေ့ချ် - မရေမတွက်နိုင်သော နယ်ပယ်များကို ဖြတ်သန်းသွားလာပြီး ထူးခြားဆန်းကြယ်မှု၏ နယ်နိမိတ်များကို ထိတွေ့ပါ။
၄။ ကောင်းကင်ဘုံ၏ ဂန္ထဝင်များ (၂၀၀,၀၀၁ အမှတ် သို့မဟုတ် ထို့ထက်ပို၍)
ဖွင့်နိုင်သော ဟင်းလင်းပြင် - ဒဏ္ဍာရီလာ ဟင်းလင်းပြင်
ကောင်းကင်ဘုံ နယ်ပယ်၊ မြေအောက်ကမ္ဘာ၊ စသည်ဖြင့်....
ထို့အပြင် သူက နယ်ပယ်များ၏ အရှင်သခင်ဘွဲ့ကို ရရှိခဲ့ပြန်သည်။
စနစ်၏ မက်ဆေ့ချ် - သင့်နာမည်ကို ထာဝရ မှတ်မိပါစေ.... သင့်ဇာတ်လမ်းကို အချိန်နှင့်အမျှ တည်တံ့သော ဂန္ထဝင်တစ်ခုအဖြစ် ရေးသားနိုင်ပါစေ။
[လက်ခံသူ၏ လက်ရှိ ကျော်ကြားမှု - ၁၅၀၀ အမှတ် (ပေါ်ထွန်းလာသော ပါရမီရှင်)]
[နောက်ထပ် ပန်းတိုင် - နာမည်ကျော်ကြားလာခြင်း (အမှတ် ၈၅၀၁ ထပ်မံ လိုအပ်ပါသည်)]
[စနစ်၏ မက်ဆေ့ချ် - ကျော်ကြားမှုဟူသည် ကောင်းကင်ဘုံကို လောင်ကျွမ်းစေနိုင်သော မီးပွားလေးတစ်ခုကဲ့သို့ပင်]
[ရီယဲ့ခရီးသွားအေဂျင်စီကို ကောင်းကင်ဘုံနှင့် နယ်ပယ်အားလုံးတွင် နာမည်ကြီးလာစေရန် ကျေးဇူးပြု၍ ကြိုးစားလုပ်ဆောင်ပါ]
[အထူးမှတ်ချက် - ကျော်ကြားမှု အမှတ်များက ဟင်းလင်းပြင်အသစ်များကို ဖွင့်ခြင်းအပေါ် သက်ရောက်မှု ရှိရုံသာမက လက်ခံသူ၏ ဆုလာဘ်များ၏ အရည်အသွေးကိုလည်း မြှင့်တင်ပေးပါသည်]
စနစ်က ဖြည့်စွက် ရှင်းလင်းချက်တစ်ခုကို ဖော်ပြပေးလာခဲ့ပြန်သည်။
[ရင်းနှီးသော သတိပေးချက် - လက်ခံသူသည် လူမှုမီဒီယာအကောင့် စီမံခန့်ခွဲမှု၊ အခြားကမ္ဘာမှ အမှတ်တရပစ္စည်းများကို လေလံတင်ခြင်း နှင့် ပညာရပ်ဆိုင်ရာ ပူးပေါင်းဆောင်ရွက်မှုများမှတစ်ဆင့် ကျော်ကြားမှုကို လျင်မြန်စွာ စုဆောင်းနိုင်ပါသည်]
ကျန်းယဲ့ ပြတင်းပေါက်ကို မှီကာ နောက်ဆုံး refresh လုပ်ထားသော မျက်နှာပြင်ကို ကြည့်လိုက်၏။
လက်ရှိတွင် အနိမ့်ဆုံးအဆင့်ဖြစ်သော [ရှေးဟောင်း ယဉ်ကျေးမှု ကမ္ဘာ]ကိုသာ ဖွင့်ထားပြီး ကျန်ရှိသော မျက်နှာပြင်ကို မီးခိုးရင့်ရောင်ဖြင့် ပြသထားလေသည်။
သူ၏ အကြည့်များက [ထူးခြားဆန်းကြယ်သော ကမ္ဘာ] ပေါ်တွင် စူးစိုက်သွားချိန်၌ ပြင်းထန်လာခဲ့သည်။
'အဲဒီမှာ မသေမျိုး ကျင့်ကြံတဲ့ နေရာတစ်ခု ရှိတယ်....'
'အဲဒါ မသေမျိုး ကျင့်ကြံခြင်းပဲ....'
'ငါ သွားချင်တယ်...'
'ကျင့်ကြံခြင်းကမ္ဘာမှာ သေနိုင်တဲ့ ရောဂါက ဘာများ အရေးကြီးလို့လဲ...'
'သွေးဆောင်ဖြားယောင်းမှုက အရမ်းကြီးမားလွန်းတာပဲ.... '
[ဒင် လက်ခံသူသည် အဆင့်မြှင့်တင်မှု ယန္တရားကို အောင်မြင်စွာ ဖွင့်လိုက်ပါပြီ။ မဲနှိုက်ခွင့် တစ်ကြိမ် ဆုချီးမြှင့်ပါသည်]
အခန်း ၁၃၀ပြီး၏။