အခန်း ၁၉၆

အခန်း (၁၉၆) နိုင်ငံတကာတွင် လူကြိုက်များမှု တိုးလာခြင်း

​သမုဒ္ဒရာ၏ အခြားတစ်ဖက်ရှိ ဟောင်းနွမ်းသော တိုက်ခန်းတစ်ခုတွင် ဖြူရော်နေသော မျက်နှာနှင့် လူငယ်တစ်ဦးသည် ကွန်ပျူတာ မျက်နှာပြင်ကို စိုက်ကြည့်နေ၏။

​ကျန်းဖန်သည် အမေရိကန်တွင် ပညာသင်ကြားနေသော နိုင်ငံတကာ ကျောင်းသားတစ်ဦး ဖြစ်ခေသည်။ သူသည် သာမန် မိသားစုတစ်ခုမှ ဆင်းသက်လာသူဖြစ်ပြီး သူ၏ ပညာရေးထူးချွန်မှုကြောင့်သာ နိုင်ငံခြားတွင် ပညာသင်ကြားခွင့် ရရှိခဲ့ခြင်း ဖြစ်၏။

​မိသားစုက သူ၏ နေထိုင်စားသောက်စရိတ်များကို ထောက်ပံ့ရန် သူတို့တွင် ရှိသမျှ အကုန်ပေးခဲ့သော်လည်း သူတို့ကိုယ်တိုင်မှာမူ ဝမ်းစာအတွက် ရုန်းကန်နေကြရဆဲ ဖြစ်လေသည်။

​ထို့ကြောင့် သူသည် YouTube၏ ဝင်ငွေရှာနိုင်သော လမ်းကြောင်းများကို အာရုံစိုက်လာပြီး သူ၏ ကိုယ်ပိုင်အကောင့်ကို စတင် ဖွင့်လှစ်ခဲ့သည်။

​သူသည် ကြည့်ရှုသူနှင့် ဖော်လိုဝါများ ရရှိရန် ပြည်တွင်းမှ ဗီဒီယိုများကို နိုင်ငံရပ်ခြားဆိုဒ်များသို့ တင်ကာ ၎င်းမှတစ်ဆင့် အကျိုးအမြတ်များ ရယူခဲ့ခေသည်။

​လွန်ခဲ့သည့် အချိန်အတန်ကြာက တရုတ်နိုင်ငံတွင် အလွန်လူကြိုက်များနေသော ရီယဲ့ခရီးသွားအေဂျင်စီ၏ ဗီဒီယိုများကို စတင်တင်ပြီးကတည်းက ကျန်းဖန်သည် သူ၏ ဘဝကို မေးခွန်းထုတ်လာရ၏။

​ကျန်းဖန်သည် ကွန်ပျူတာ မျက်နှာပြင်ကို စူးစိုက်ကြည့်နေပြီး သူ၏ မျက်မှောင်များ ကျုံ့သွားခဲ့သည်။

​သူ၏ ယူကျူဘ်ချန်နယ်ဖြစ်သော Oriental Insights - Fan တွင် လတ်တလော တင်ထားသည့် ဗီဒီယိုအချို့မှာ ကြည့်ရှုသူ အရေအတွက် အလွန် နည်းပါးနေချေသည်။

​အန်းရှီး တပ်မတော်က မီးရှူးတိုင်စင်မြင့်များကို ကာကွယ်နေသည့် မှတ်တမ်းဗီဒီယိုမှာ ကြည့်ရှုသူ ၁,၃၂၇ ဦးသာ ရှိပြီး ချင်ရှီဟွမ်အကြောင်း အကြောင်းအရာမှာ ပို၍ပင် ဆိုးရွားကာ မှတ်ချက်ပေးသည့် နေရာတွင် မေးခွန်းသင်္ကေတများဖြင့် ပြည့်နှက်နေခဲ့သည်။

​“ဒီနိုင်ငံခြားသားတွေ လုံးဝ နားမလည်ကြဘူးပဲ...” သူက စိတ်ပျက်လက်ပျက်ဖြင့် ခေါင်းကို ကုတ်ကာ အသံထွက်ပြောလိုက်၏။

​‘ထင်တဲ့အတိုင်း ယဉ်ကျေးမှုကွာဟချက်တွေ ရှိနေတာပဲ.... ဒီတောဝက်တွေက အစားကောင်းကို အစာမကြေနိုင်ကြဘူး....’

​ကျန်းဖန်သည် ကျန်းယဲ့၏ ဗီဒီယိုများကို ဆက်တင်ရန် လက်လျှော့တော့မည် အပြုတွင် ကျန်းယဲ့တွင် ဗီဒီယို အကြောင်းအရာအသစ်များ ရှိမရှိ မသိစိတ်မှ အလိုအလျောက် ဝင်ကြည့်လိုက်၏။

​နိုင်ငံခြားသားတွေ စိတ်မဝင်စားပေမယ့် သူကတော့ စိတ်ဝင်စားလေသည်။

​ရလဒ်အနေဖြင့် သူသည် ဇွန်ဘီမြို့တော်အတွက် ပရိုမိုးရှင်း ဗီဒီယိုကို မြင်လိုက်ရချိန်တွင် အံ့သြသွားခဲ့ရသည်။

​‘ဘုရားရေ...’

​ကျန်းဖန်သည် ကုတင်ပေါ်မှ ဝုန်းခနဲ ခုန်ထလိုက်ပြီး သူ၏ လက်တော့ပ်ကို ဆွဲယူလိုက်ရာ သူ၏ မျက်လုံးများ တောက်ပသွားရသည်။

​‘ဒါက အရမ်းကောင်းတဲ့ အကြောင်းအရာပဲ...’

​ကျန်းဖန်သည် စကားတစ်ခွန်းမှ မပြောဘဲ ဗီဒီယိုများကို စတင် တင်လိုက်လေသည်။

​သူက စာသားနှင့် ခေါင်းစဉ်ကို ရိုက်ထည့်လိုက်ပြီး ဗီဒီယိုကို “တကယ့် အချိန်ခရီးသွားတာလား။ တရုတ် ခရီးသွားလမ်းညွှန်က ဇွန်ဘီကမ္ဘာပျက်ကပ်ကို ခံစားကြည့်ဖို့ အဖွဲ့ကို ဦးဆောင်သွားတယ်...” ဟု တိုက်ရိုက် ခေါင်းစဉ်တပ်လိုက်၏။

​ဗီဒီယို တင်ပြီးနောက် သူ စာမျက်နှာကို အကြိမ်အနည်းငယ် ပြန်လည် Refreshလုပ်လိုက်ရာ အချက်အလက်များက ဖြည်းညှင်းစွာ တက်လာလေသည်။

​နာရီအနည်းငယ် အကြာတွင် မှတ်ချက်ပေးသည့် နေရာမှာ စည်ကားလာ၏။

​【ဝီလီရန်】 - ဇွန်ဘီ အထူးပြုလုပ်ချက်တွေက အရမ်း အသက်ဝင်တာပဲ... ဒါက တရုတ်ရုပ်ရှင်အသစ်ရဲ့ နမူနာလား။ ခေါင်းစဉ်ကဘာလဲ။

​【ဘန်ဂျာမင်】 - ရေခဲမြှားနဲ့ မြင်ကွင်းက အရမ်းမိုက်တာပဲ.... ဒါက ဘယ်ဂိမ်းကနေ ယူသုံးထားတာလဲ။

​【ဗစ်တိုးရီယား】 - IMDb မှာ ဘာလို့ ရှာမတွေ့တာလဲ။ တရုတ်ရုပ်ရှင်တွေက နိုင်ငံတကာ ပလက်ဖောင်းတွေမှာ မပါဘူးလား....

​【အီသန်】 - အသေးစိတ် အချက်အလက်တွေကို ဂရုစိုက်ထားတာ အံ့သြစရာပဲ... ပုပ်ဟက်နေတဲ့ အရေပြားရဲ့ အရောင်ပြောင်းသွားတဲ့ အကျိုးသက်ရောက်မှုကို သူတို့ ဘယ်လို ဖန်တီးခဲ့တာလဲ။ နောက်ကွယ်က ရိုက်ကွင်းတွေကို ကြည့်ချင်လိုက်တာ...

​【ဆိုဖီရာ】 - နေပါဦး... ဒါက တကယ် ရုပ်ရှင်လား။ ဘာလို့ သရုပ်ဆောင်တွေ အားလုံးရဲ့ မျက်နှာအမူအရာ အသေးစိတ်လေးတွေက အရမ်း အသက်ဝင်နေရတာလဲ...

​【လီရန်】 - အကယ်လို့ ဒါက တကယ့် မှတ်တမ်းရုပ်ရှင်ဆိုရင် ငါ တိုက်ရိုက်ထုတ်လွှင့်မှုမှာ ကီးဘုတ်ကို စားပြမယ်... တရုတ်တွေက ဒီလို စိတ်ဝင်စားစရာတွေ ဖန်တီးရတာကို သဘောကျကြတယ်။

​【အေဗာ】 - ခရီးသွားလမ်းညွှန်က အရမ်း ချောတာပဲ... ကျေးဇူးပြုပြီး သူ့ရဲ့ လူမှုကွန်ရက်အကောင့်တွေကို ပြောပြပေးလို့ ရမလား....

​ကျန်းဖန်၏ ဗီဒီယိုများ လူကြိုက်များလာသည်နှင့်အမျှ တရုတ်နိုင်ငံမှ အကြောင်းအရာများကို ပြန်လည်မျှဝေလေ့ရှိသော အခြားနိုင်ငံခြားရှိ ဘလော့ဂါများကလည်း စတင် လိုက်လုပ်လာကြလေသည်။

​【တုန်းဖန်တာကဲ့】က “တုန်လှုပ်ဖွယ်ရာ.... လျှို့ဝှက်ဆန်းကြယ်တဲ့ တရုတ် ခရီးသွားအေဂျင်စီတစ်ခုက ခရီးသွားတွေကို ဇွန်ဘီကမ္ဘာဆီ ခေါ်သွားသလား။ အပြည့်အစုံ မှတ်တမ်း....” ဟူသော တည်းဖြတ်ထားသည့် ဗားရှင်းကို ပထမဆုံး တင်ခဲ့၏။

​ယင်းနောက် 【ဟွာလျိုပင်လျို】 က “အသေးစိတ် ခွဲခြမ်းစိတ်ဖြာခြင်း - ရီယဲ့ခရီးသွားအေဂျင်စီရဲ့ ကမ္ဘာပျက်ကပ် ခရီးစဉ်က အထူးပြုလုပ်ချက်တွေလား... ဒါမှမဟုတ် တကယ့်အချိန်ခရီးသွားတာလား” ဟူသော ဆောင်းပါးတစ်ပုဒ်ကို ထုတ်ဝေခဲ့ပြီး 4K Ultra HDဟူသော စကားလုံးများကိုလည်း အထူးတလည် မှတ်ချက်ပြုထားပေသည်။

​၂၄ နာရီ မပြည့်မီမှာပင် ဆက်စပ် ဗီဒီယိုများက ယူကျုဘ်နှင့် တွစ်တာ ကဲ့သို့သော ပလက်ဖောင်းများပေါ်တွင် တောမီးကဲ့သို့ ပျံ့နှံ့သွား၏။

​မှတ်ချက်ပေးသည့် နေရာတွင် ပွက်လောရိုက်သွားလေသည်။

​【နိုအာ】 - ဒါက ငါ တစ်ခါမှ မမြင်ဖူးတဲ့ အသက်အဝင်ဆုံး ဇွန်ဘီ အထူးပြုလုပ်ချက်တွေပဲ.... တရုတ်ရဲ့ ရုပ်ရှင်လုပ်ငန်းက ဒီလောက်အထိ တိုးတက်နေပြီလား....

​【ကတ်ဆန်ဒရာ】 - အရင်းအမြစ်ကို တောင်းဆိုပါတယ်... အပြည့်အစုံဗားရှင်းကို ကြည့်ဖို့ ပိုက်ဆံပေးရပေးရ ကြည့်ချင်တယ်... ဘာလို့ တရုတ်ရုပ်ရှင်တွေက အမြဲတမ်း ဒီလောက် လျှို့ဝှက်ဆန်းကြယ်နေရတာလဲ။

​...

​နိုင်ငံခြား အင်တာနက်အသုံးပြုသူများထံမှ အံ့အားသင့်သံများနှင့် ဗီဒီယိုတောင်းဆိုမှုများကြားတွင် မှတ်ချက်တစ်ခုက သူတို့၏ အာရုံစိုက်မှုကို အထူး ဆွဲဆောင်သွားခဲ့သည်။

​【လူနာအင်ပေကျင်း】 (နိုင်ငံတကာ ကျောင်းသား) - နိုးကြပါတော့... ဒါက ရုပ်ရှင်မဟုတ်ဘူး... တရုတ်ပြည် တစ်ဝန်းလုံးမှာ ပြန့်နေပြီ... ဒီရီယဲ့ခရီးသွားအေဂျင်စီက တကယ်ပဲ အချိန်ခရီးသွားတာကို စီစဉ်ပေးနေတာ...

​【တေလာ】 - အပေါ်ကလူက နောက်နေတာလား။ အချိန်ခရီးသွားတယ်.... အဲဒါက ဇွန်ဘီတွေထက်တောင် ပိုပြီး ယုံတမ်းစကား ဆန်နေသေးတယ်... ဟုတ်ပြီလား။

​【ဂျော်ဒန်】 - အရမ်း မိုက်တာပဲ... အကယ်လို့ ဒီလို ခရီးစဉ်မျိုးသာ ရှိမယ်ဆိုရင် ငါက ပထမဆုံး စာရင်းပေးမှာပဲ... ဘယ်လောက်ပေးရပေးရ...

​【ရိုင်လီ】 - ဒါက ပုံမှန် တရုတ် စျေးကွက်ရှာဖွေရေး နည်းဗျူဟာပဲ။ အရင်ဆုံး ဖြစ်ရပ်မှန်အဖြစ် သတင်းလွှင့်မယ်... ပြီးတော့ လူဝင်များလာတဲ့ အခါကျမှ ရုပ်ရှင်ဆိုပြီး ကြေညာလိမ့်မယ်။ သူတို့ မှားကြောင်း သက်သေပြတာကို ငါ စောင့်ကြည့်နေမယ်...

​【စကိုင်လာ】 - ဟားဟား... လူတွေက အချိန်ခရီးသွားတာကို တကယ် ယုံနေကြတာလားကွာ... ဒါက တရုတ်ရုပ်ရှင်အသစ်ရဲ့ ပရိုမိုးရှင်း နည်းဗျူဟာ ဆိုတာ ရှင်းနေတာပဲ။ အထူးပြုလုပ်ချက်တွေက အတော်လေးကောင်းပေမဲ့ တကယ့် ဖြစ်ရပ်တွေဆိုပြီး ပြောတာကတော့ လွန်လွန်းတယ်...

​နိုင်ငံခြားရောက် တရုတ်လူမျိုးများက တစ်စုံတစ်ယောက်က သူတို့ကို လှောင်ပြောင်နေသည်ကို မြင်သောအခါ ချက်ချင်း ပြန်လည် တိုက်ခိုက်ကြတော့သည်။

​သူတို့သည် နိုင်ငံခြားတွင် ရောက်နေကြသော်လည်း တရုတ်နိုင်ငံတွင် ဘာတွေဖြစ်နေသလဲ ဆိုတာကို သိကြလေသည်။

​ကျန်းယဲ့၏ ရီယဲ့ခရီးသွားအေဂျင်စီက အချိန်ခရီးသွားနေသည့်အကြောင်းကို သူတို့ သဘာဝကျကျ ကြားဖူးထားကြ၏။

​အစပိုင်းတွင် သူတို့က မယုံကြည်ခဲ့ကြသော်လည်း နေရပ်ရှိ သူတို့၏ အတန်းဖော်များကို မေးမြန်းပြီးနောက် ၎င်းမှာ အမှန်ဖြစ်ကြောင်း ယုံကြည်သွားကြရသည်။

​ယခုအခါ အချို့လူများက သရော်စာများနှင့် မေးခွန်းထုတ်မှုများ ပြုလုပ်နေသည်ကို မြင်ရသောအခါ သူတို့ ဘယ်လိုလုပ် ငြိမ်နေနိုင်မည်နည်း။ သူတို့ ပြန်လည် တိုက်ခိုက်ရချေမည်။

​【ဝိုင်】 - တရုတ်နိုင်ငံက တိုရင်မှာ ရီယဲ့ခရီးအေဂျင်စီကို သွားရှာကြည့်ကြ... သူတို့က အကြိမ်ပေါင်းများစွာ အချိန်ခရီးသွားခဲ့ပြီးပြီ... ချင်မင်းဆက်ကနေ ကမ္ဘာပျက်ကပ် အထိပဲ...

​【ယန်ယန်】 - နင်တို့ ဘာမှ မသိပါဘူး... ဒါက တရုတ်နိုင်ငံက လူမှုကွန်ရက်မှာ ရေပန်းစားနေတာ ကြာလှပြီ.... နင်တို့ဘာသာ တိုရင်မှာ ရီယဲ့ခရီးသွားအေဂျင်စီကို သွားရှာကြည့်ကြ။ ဒါက ချင်မင်းဆက်ကနေ မင်မင်းဆက်အထိ တိုက်ရိုက်ထုတ်လွှင့်ခဲ့တဲ့ မှတ်တမ်းတွေပဲ.... အဲဒါကို နင်တို့က အထူးပြုလုပ်ချက်တွေလို့ ပြောနေတာလား။ ဟောလိဝုဒ်ကတောင် ဒီလို အသက်ဝင်တဲ့ဟာမျိုး ဖန်တီးနိုင်လို့လား....

​【ယွင်】 - အထူးပြုလုပ်ချက်တွေ ဖြစ်နေရင်ရော ဘာဖြစ်လဲ။ အနည်းဆုံးတော့ မင်းတို့ဆီကဟာတွေထက် ပိုကောင်းတာပေါ့... တချို့နိုင်ငံတွေ နေ့တိုင်း စူပါဟီးရိုး ရုပ်ရှင်တွေ ရိုက်နေတာထက်စာရင် ပိုကောင်းတယ် မဟုတ်လား....

​【ချင်းလီ】 - တချို့လူတွေက တရုတ်နိုင်ငံမှာ ကောင်းတာတစ်ခုခု မြင်ရရင်ကို သည်းမခံနိုင်ကြဘူးပဲ... ယုံသည်ဖြစ်စေ မယုံသည်ဖြစ်စေ ကျွန်တော်တို့က ပျံသန်းတော့မယ်... မင်းတို့ကို သေလောက်အောင် လန့်သွားစေရမယ်...

​၎င်း၏ အမှန်တရားအပေါ် အငြင်းပွားမှုများကြားတွင် အချို့သော နိုင်ငံခြားအင်တာနက် အသုံးပြုသူများက ထိုကိစ္စကို အေးချမ်းသော ချဉ်းကပ်မှုဖြင့် ရှုမြင်နေကြသည်။

​【ကွင်း】 - စိတ်ဝင်စားစရာပဲ။ အကယ်လို့ ဒါက တကယ့် အချိန်ခရီးသွားတာဆိုရင် ဘာလို့ တရုတ်နိုင်ငံမှာပဲ ပေါ်လာရတာလဲ... NASAကကော ဘာလုပ်နေတာလဲ..

​【ဖလင်ခရစ်တစ်အက်စ်】 - အကယ်လို့ ဒါက စျေးကွက်ရှာဖွေရေး ဆိုရင်တောင် အရမ်းမိုက်တယ်လို့ ပြောရမယ်.... အရင်က Resident Evil ထက်တောင် ပိုမိုက်သေးတယ်...

​【အက်တစ်ကပ်စ်】 - Resident Evil က ရုပ်ရှင် ခြောက်ကား ရိုက်ပြီးတာတောင် မြင်မြင်သမျှ အရာအားလုံးကို ပစ်ဖို့ စက်သေနတ် အသေးစားတွေကိုပဲ သုံးနေတုန်းပဲ။ သူတို့ရဲ့ ရေခဲ အထူးပြုလုပ်ချက်တွေကို ကြည့်လိုက်ဦး.... အဲဒီရေခဲမြှား အေးခဲသွားတဲ့ အနှေးပြကွက်လေးဆိုရင် အမှုန်လေးတွေရဲ့ အကျိုးသက်ရောက်မှုက တကယ့်ကို အံ့သြစရာပဲ... ဟောလိဝုဒ် အထူးပြုလုပ်ချက်အဖွဲ့တွေ သူတို့ဆီကနေ သင်ယူသင့်တယ်...

​【ဆယ်ရာဖီနာ】 - ဇွန်ဘီတွေကို သေနတ်နဲ့ တိုက်ခိုက်နေတာ မြင်ရတာ ငါ ငြီးငွေ့နေပြီ။ ဓာတ်သဘာဝ အစွမ်းတွေကို ထိန်းချုပ်တဲ့ ဒီလို နောက်ခံမျိုးက အများကြီး ပိုပြီး စိတ်လှုပ်ရှားဖို့ ကောင်းတယ်... အထူးသဖြင့် အဲဒီ လျှပ်စီးစွမ်းအားရှင်ဆိုရင် သူက မာဗယ်က သော ထက်တောင် ပိုမိုက်သေးတယ်.... တရုတ်ရုပ်ရှင်နဲ့ ရုပ်မြင်သံကြားက အခု ဒီလောက်အထိ တိုးတက်နေပြီလား....

​အငြင်းပွားမှုများ ပြင်းထန်လာပြီး #ရီယဲ့ခရီးသွားအေဂျင်စီဟူသော ဟက်ရှ်တက်သည် နိုင်ငံအများအပြားရှိ တွစ်တာ တွင် ခေတ္တမျှ ရေပန်းစားလာလေသည်။

​ကျန်းဖန်သည် သူ၏ ဖော်လိုဝါ အရေအတွက် ဒုံးပျံလို ထိုးတက်သွားသည်ကို မြင်ရသောအခါ အလွန် ဝမ်းသာသွားရသည်။

​ထို့နောက် သူက ပြည်တွင်းအကောင့်သို့ အမြန် ဝင်လိုက်ပြီး သူ၏ ဗီဒီယိုများအောက်တွင် ကမ္ဘာပျက်ကပ် ဗီဒီယိုများ ထပ်လုပ်ပေးရန် ကျန်းယဲ့ကို အရူးအမူး တောင်းဆိုတော့၏။

​ကျန်းယဲ့သည် နိုင်ငံခြားတွင် လူကြိုက်များလာမှုနှင့် ပတ်သက်၍ လုံးဝ မသိရှိခဲ့ချေ။

​တစ်ဝက်ဖွင့်ထားသော ရေချိုးခန်းတံခါးမှ နွေးထွေးသော ရေနွေးငွေ့များ ထွက်ပေါ်လာခဲ့သည်။ ကျန်းယဲ့က သူ၏ စိုစွတ်နေသော ဆံပင်များကို ပေါ့ပေါ့ပါးပါး နောက်သို့ သပ်တင်လိုက်ရာ ရေစက်များက သူ၏ လည်ပင်းမှတစ်ဆင့် လျှောကျလာပြီး ညှပ်ရိုးပေါ်သို့ ကျရောက်သွားလေသည်။

​ထို့နောက် ကုလားထိုင် ကျောမှီပေါ်တွင် တင်ထားသော တီရှပ်ကို ဆွဲယူကာ ဝတ်လိုက်၏။ သို့သော် အင်္ကျီအောက်စကို အပြည့်အဝ မဆွဲချရသေးမီမှာပင် ရင်းနှီးသော အီလက်ထရောနစ် အသံတစ်ခုက သူ၏ နားထဲတွင် ရုတ်တရက် မြည်လာပေသည်။

အခန်း ၁၉၆ပြီး၏။