အခန်း ၁၆၀၃

အခန်း ( ၁၆၀၃ ) ကျွင်းရှောင်ယောက် တစ်ကိုယ်တည်းတံခါးပိတ်ကျင့်ကြံခြင်းမှ ထွက်လာပြီ။

တစ်ဆယ့်ငါးနှစ်တာ တစ်ကိုယ်တည်း တံခါးပိတ်ကျင့်ကြံခြင်း ကာလအတွင်း၌၊ လက်မှတ်ရေးထိုးခြင်းစနစ်သည် အမြဲ တိတ်ဆိတ်ငြိမ်သက်နေခဲ့သည်။

ကျွင်းရှောင်ယောက်သည်ပင် သူအနေဖြင့် တစ်ဖန်ပြန်လည်မွေးဖွားခဲ့ပြီး အသွင်သစ်ခန္ဓာကိုယ်တစ်ခုအဖြစ် ပြောင်းလဲသွားခဲ့ရခြင်းကြောင့်၊ သူ့ထံ၌ စနစ် ရှိမနေတော့ခြင်း ဖြစ်နိုင်သည်ဟု သံသယဝင်ခဲ့မိပေသည်။

ယခုအခါတွင်၊ ၎င်းက ဤကဲ့သို့မဟုတ်ကြောင်း ထင်ရှားလာခဲ့ပြီ ဖြစ်သည်။

၎င်းက ကျွင်းရှောင်ယောက်အနေဖြင့် နေရာတစ်ခုတည်း၌သာ နေထိုင်ခဲ့ပြီး ရွေ့လျားသွားလာခြင်း မပြုခဲ့ခြင်းကြောင့်သာ ဖြစ်ပေသည်။

ထို့ကြောင့်ပင်၊ လက်မှတ်ထိုးဝင်ရန် သတိပေးချက် မရရှိခဲ့ခြင်း ဖြစ်သည်။

အတိတ်က နယ်နိမိတ်ပင်လယ်အတွင်း၌ လက်မှတ်ရေးထိုးခြင်းနှင့် ပတ်သက်၍မူ၊ ၎င်းက သတိမပေးသေးပေ။

ကျွင်းရှောင်ယောက်အနေဖြင့် နယ်နိမိတ်ပင်လယ်၏ အနက်ရှိုင်းဆုံးသော အပိုင်းဆီသို့ သွားရောက်စွန့်စားခြင်း မပြုရသေးသဖြင့် လက်မှတ်ထိုးဝင်ရန် အချိန်မကျသေးခြင်း ဖြစ်နိုင်သည်။

'ဒီအချိန်ကျမှ လက်မှတ်ရေးထိုးခြင်းက သတိပေးချက် တက်လာတယ်ဆိုတော့...'

ကျွင်းရှောင်ယောက်က လေးနက်စွာ တွေးလိုက်နေမိသည်။

ယေဘုယျအားဖြင့် လက်မှတ်ရေးထိုးခြင်းစနစ်၏ လက်မှတ်ရေးထိုးရာ နေရာများအားလုံးတွင် ထူးခြားမှုကိုယ်စီ ရှိနေတတ်ကြသည်။

ဥပမာအားဖြင့် ကြီအင်မော်တယ်ယဇ်ပလ္လင်၊ ကွေ့ရှအပျက်အယွင်းကဲ့သို့ ကြီးမားသော အကြောင်းအကျိုး ဆက်စပ်မှုများဖြင့် တည်ရှိနေသော နေရာမျိုးပင်။

ဤဟင်းလင်းပြင်အက်ကွဲကြောင်းက နိုမန်မရဏနယ်မြေနှင့် ဆက်နွှယ်နေသော်လည်း...

ထိုနေရာတွင် အချို့သော ဖုတ်ကောင်နတ်ဆိုးများသာ အခြေချနေထိုင်နေကြခြင်း ဖြစ်သည်။

ထို့ကြောင့် ကျွင်းရှောင်ယောက်သည် ဂရုစိုက်ခြင်း မရှိခဲ့ပါချေ။

ထို့ပြင် သူ၏ လေ့ကျင့်မှုအပေါ် အာရုံစိုက်နေရသောကြောင့် အခြား မည်သည့်အရာကိုမျှ ဂရုမစိုက်နိုင်ခဲ့ပါ။

ယခုအခါတွင်မူ၊ လက်မှတ်ရေးထိုးရန် လှုံ့ဆော်ခြင်း ခံလိုက်ရပြီ ဖြစ်သည်။

တစ်ချိန်တည်းမှာပင် ထိုဟင်းလင်းပြင်အက်ကွဲကြောင်းက ဤမျှမရိုးရှင်းနိုင်ကြောင်း ခံစားလိုက်ရပေသည်။

ထို့ပြင် ၎င်းက နိုမန်မရဏနယ်မြေ၏ လျှို့ဝှက်ချက်တချို့နှင့် ပတ်သက်ဆက်နွှယ်နေနိုင်သည်။

၎င်းက ဖျက်ဆီးခြင်း အမှောင်ကပ်ဘေးကြီးဟု ခေါ်ဆိုကြသော အရာနှင့်ပင် ဆက်နွှယ်နေနိုင်သေးသည်။

"ကြည့်ရတာ... ကျင့်ကြံခြင်းကနေ ထွက်ရမယ့်အချိန် ရောက်ပြီ ထင်တယ်"

ကျွင်းရှောင်ယောက်က သက်ပြင်းချလိုက်သည်။

သူက ကျင့်ကြံခြင်းမှ အမှန်တကယ် မထွက်ခွာလိုသေးပါချေ။

ရန်သူအားလုံးကို အပြတ်အသတ် ချေမှုန်းနိုင်သည်အထိ တစ်ကိုယ်တည်း တံခါးပိတ်ကျင့်ကြံခြင်းက ပိုမိုကောင်းမွန်သော အကြံဉာဏ်တစ်ခု ဖြစ်ပုံရသည်။

သို့သော်လည်း ယခုအခါတွင်မူ လက်မှတ်ရေးထိုးခြင်းစနစ်က လှုံ့ဆော်ခြင်း ခံလိုက်ရပြီဖြစ်သဖြင့်၊ ကျွင်းရှောင်ယောက်သည် သဘာဝအတိုင်း သွားရောက်ကြည့်ရှုရတော့မည်။

ထို့ပြင်၊ သူ၏ ညီမငယ်လေးသည်လည်း ဟင်းလင်းပြင်အက်ကွဲကြောင်းဆီသို့ အတွေ့အကြုံများ ရယူရန် သွားရောက်ခဲ့ပြီ ဖြစ်သည်။

အမှန်အတိုင်း ပြောရမည်ဆိုလျှင်၊ ကျွင်းရှောင်ယောက်သည် မူလက သူ၏ ညီမငယ်လေးမှာ ကျန်းစန်းယီ၏ ဝိညာဉ်လေးခုအနက် တစ်ခု ဖြစ်နိုင်ချေရှိသည်ဟုပင် အလွန်တရာ တွေးတောခဲ့မိသည်။

ထိုသို့မဟုတ်ပါက၊ ဤကဲ့သို့သော တိုက်ဆိုင်မှုမျိုးကို ရှင်းပြရန် မဖြစ်နိုင်ပါချေ။

သို့သော်လည်း နောက်ပိုင်းတွင်မူ သူ အတွေးလွန်မိခဲ့ခြင်းဖြစ်ကြောင်း သတိပြုမိခဲ့သည်။

ဤကဲ့သို့သော လုပ်ကြံဖန်တီးထားသည့် ဇာတ်ကွက်မျိုးက သူ့ထံတွင် ဘယ်သောအခါမျှ ဖြစ်ပေါ်လာနိုင်မည် မဟုတ်ချေ။

ထို့ပြင်၊ သူက ကျင့်ကြံရန်အတွက် အချိန်အတော်ကြာ တစ်ကိုယ်တည်း တံခါးပိတ်ကျင့်ကြံခြင်း ပြုလုပ်နေခဲ့ခြင်းကြောင့်လည်း...

သူ၏ တစ်ဖန်ပြန်လည်မွေးဖွားခြင်းနှင့်အတူ ပါလာခဲ့သော အလကားရသည့် ညီမငယ်လေးအပေါ်တွင်မူ လုံးဝ ဂရုမစိုက်ခဲ့ပါ။

ယခုအကြိမ်တွင်သာ၊ ယွင်ရှီက အတွေ့အကြုံရှာရန် သွားရောက်တော့မည်ဖြစ်သဖြင့် သူမအား ကာကွယ်ပေးရန်အတွက် တာ့လော့ဓားသန္ဓေကို ထုတ်ပေးခဲ့ခြင်း ဖြစ်သည်။

သို့သော်လည်း အစ်ကိုကြီးတစ်ယောက် အနေဖြင့် ကိုယ်ပိုင် တာဝန်ဝတ္တရားများကို ဖြည့်ဆည်းပေးရဦးမည်။

သို့သော်လည်း ၎င်းက အနည်းငယ်သာ ဖြစ်နိုင်သည်။

နောက်ဆုံးတွင်၊ ကျွင်းရှောင်ယောက်က ပြန်လည်ဝင်စားခြင်းပင်လယ် အတွင်းသို့ ပြန်လည်မွေးဖွားလာခဲ့ရခြင်း၏ အဓိက ပန်းတိုင်မှာ ကျန်းစန်းယီ၏ ဝိညာဉ်လေးခုကို ရှာဖွေရန် ဖြစ်သည်။

သူ့တွင် ညီမတစ်ယောက်ကို ပျိုးထောင်ပေးရန်အတွက် အချိန်မရှိပါ။

ထို့ကြောင့်ပင် သူက ရေခဲနှင့်ဆီးနှင်း နတ်ဘုရားမနန်းတော်မှ ပိုင်ရွယ်ဝေနှင့် စေ့စပ်ထားခြင်းကို တိုက်ရိုက် ဖျက်သိမ်းပစ်ခဲ့ခြင်း ဖြစ်သည်။

သူက သူ့ချစ်သူကို ရှာဖွေရန် ရောက်ရှိလာခဲ့ခြင်းဖြစ်ပြီး၊ အခြားသော အမျိုးသမီးများနှင့် ထိမ်းမြားလက်ထပ်ရန်အတွက် စိတ်ဝင်စားမှု ရှိမနေခဲ့ပါချေ။

"အပြင်ထွက်ဖို့ အချိန်တန်ပြီ"

တစ်ဆယ့်ငါးနှစ်တာ တစ်ကိုယ်တည်း တံခါးပိတ်ကျင့်ကြံခြင်း ပြီးနောက်တွင်...

ကျွင်းရှောင်ယောက်က ပထမဆုံးအကြိမ်အဖြစ် ရွှမ်ထျန်းနန်းတော်၏ တံခါးကြီးကို မိမိကိုယ်တိုင် တွန်းဖွင့်လိုက်တော့သည်။

သူက နန်းတော်တံခါးကို တွန်းဖွင့်လိုက်ချိန်တွင် နန်းတော်တံခါးတမှာ မိန်းမပျိုလေးနှစ်ဦး စောင့်ကြပ်နေကြသည်ကို မြင်လိုက်ရသည်။

သူတို့က ကျွင်းရှောင်ယောက်၏ အမိန့်ကို နာခံရန် အသင့်ရှိနေကြခြင်း ဖြစ်၏။

ဤအခိုက်တွင်၊ နန်းတော်တံခါး ပွင့်လာခြင်းကြောင့် သူ့အား လှမ်းမျှော်ကြည့်ရှုလိုက်မိပြီးနောက် နှစ်ဦးစလုံး ကျောက်ရုပ်ဖြစ်သွားကြတော့သည်။

အနောက်အရပ်က နေထွက်လာခြင်းကို မြင်နေရသကဲ့သို့...

သူတို့၏ တုန်လှုပ်မှုများမှာ စကားလုံးများဖြင့်ပင် ဖော်ပြ၍မရနိုင်တော့ပေ။

တစ်ဆယ့်ငါးနှစ်တာ တစ်ကိုယ်တည်း တံခါးပိတ်ကျင့်ကြံခြင်း ပြီးနောက်တွင်၊ ဒဏ္ဍာရီလာ ဆန်းကြယ်လှသော ရွှမ်းထျန်းဧကရာဇ်ငယ် ထွက်ပေါ်လာခဲ့ပြီ ဖြစ်သည်။

သူသည် အမှန်တကယ်ပင် နန်းတော်တံခါးကို တွန်းဖွင့်လိုက်ပြီး ကျင့်ကြံခြင်းမှ ထွက်လာခဲ့ခြင်း ဖြစ်၏။

ဤအရာက ရွှမ်ထျန်းနတ်ဘုရားမင်းဆက်တစ်ခုလုံးအတွက် သာမကဘဲ...

တောင်ပိုင်းကြယ်စင်စုလောက တစ်ခုလုံးအတွက်ပင် ကြီးမားလှသော ဖြစ်ရပ်ကြီးတစ်ခုအဖြစ် သတ်မှတ်နိုင်သည်။

သို့သော်လည်း၊ သူတို့၏ အကြည့်များက ကျွင်းရှောင်ယောက်ထံသို့ ကျရောက်သွားခဲ့သည့် အချိန်တွင်မူ...

ပို၍ပင် မလှုပ်ရှားနိုင်ကြတော့ပေ။

သူတို့အနေဖြင့် နယ်နှင်ဒဏ်ခံလိုက်ရသော အင်မော်တယ်တစ်ပါးကို တွေ့မြင်လိုက်ရသည့်အလား ခံစားလိုက်ကြရသည်။

ထိုဝတ်စုံဖြူကို ဝတ်ဆင်ထားသော ပုံရိပ်က ချောမောခန့်ညားလွန်း၍ လောကကြီးထဲရှိ အလှအပဆိုင်ရာ စကားလုံးများသည်ပင် သူ့ထံတွင် အသုံးပြုလိုက်သည့် အခါ စော်ကားမှုတစ်ခုကဲ့သို့ ဖြစ်နေပုံရသည်။

ထိုသို့သော အသွင်အပြင်မျိုးက မိန်းကလေးနှစ်ဦး၏ လောကကြီးအပေါ် နားလည်သဘောပေါက်မှုများကို အသစ်ပြင်ဆင်ပေးလိုက်သကဲ့သို့ ဖြစ်သွားခဲ့ရကာ မေ့‌လဲကျသွားတော့သည်။

"ဒါက..."

ကျွင်းရှောင်ယောက်မှာ ဆွံ့အသွားရသည်။

ထိုအခိုက်မှာပင် ကျက်သရေရှိစွာ လှပသော ပုံရိပ်တစ်ခုက ရုတ်တရက် ထွက်ပေါ်လာခဲ့ပြီး ဆင်းသက်လာခဲ့ပေသည်။

ကျွင်းရှောင်ယောက်အနေဖြင့် တုံ့ပြန်မှုများ မပြုလုပ်နိုင်သေးမီမှာပင်၊ သူသည် တစ်စုံတစ်ဦး၏ ရင်ခွင်အတွင်းသို့ တင်းကျပ်စွာ ပွေ့ဖက်ခြင်း ခံလိုက်ရသည်။

"ငါ့ရဲ့သားလေး... မင်း နောက်ဆုံးတော့ ကျင့်ကြံခြင်းကနေ ထွက်လာခဲ့ပြီ"

ကျက်သရေရှိစွာ လှပသော အမျိုးသမီးက ကျွင်းရှောင်ယောက်ကို ပွေ့ဖက်ထားခဲ့ခြင်း ဖြစ်သည်။

သူမ၏ မူလက တောက်ပသော်လည်း ဩဇာအာဏာကြီးခြင်းနှင့် လှပသော မျက်ဝန်းများထဲတွင် ယခုအခါ အံ့ဩဝမ်းသာမှုများနှင့် ချစ်ခြင်းတရားများဖြင့် ပြည့်နှက်နေခဲ့ပြီ ဖြစ်သည်။

ဤအမျိုးသမီးကား ရွှမ်ထျန်းတိုင်းပြည်၏ ဧကရီ ယွဲ့ကျစ်လန်မှတစ်ပါး အခြားမဟုတ်ပါချေ။

ကျွင်းရှောင်ယောက်က တစ်ကိုယ်တည်း တံခါးပိတ်ကျင့်ကြံခြင်းမှ ထွက်လာခဲ့သည့် ထိုခဏချင်းတွင်ပင်...

သူမက သူ၏ တည်ရှိမှုကို အာရုံခံမိလိုက်ပြီး မျက်စိတစ်မှိတ်အတွင်း ဆင်းသက်လာခဲ့ခြင်း ဖြစ်သည်။

"အမေ..."

ကျွင်းရှောင်ယောက်က စကားစလိုက်သည်။

သူ့ထံတွင် မည်သည့် စိမ်းသက်မှု ခံစားချက်မျိုးမျှ ရှိမနေခဲ့ချေ။

မည်သို့ပင်ဆိုစေ၊ သူမက သူ၏ မွေးမိခင်ရင်း ဖြစ်သည်။

ထို့ပြင်၊ ကျွင်းရှောင်ယောက်က အရင်ဘဝမှာပင် အလွန်တရာ အသက်ကြီးရင့်ခြင်း မရှိခဲ့ပါချေ။

သူ၏ အတိတ်ဘဝမှာ အသက်သုံးဆယ်ကျော်အရွယ်မျှသာ ရှိသေးပြီး၊ ၎င်းက ကျင့်ကြံသူများကြားတွင် လူငယ်လေးတစ်ဦးအဖြစ် သတ်မှတ်နိုင်သည်။

"ရှောင်အာ... အမေ့ကို မင်းကို သေချာ ကြည့်ခွင့်ပေးပါဦး"

ယွဲ့ကျစ်လန်က ကျွင်းရှောင်ယောက်၏ ပါးပြင်ကို သူမ၏ နူးညံ့သော လက်ဖဝါးများဖြင့် ပွတ်သပ်ရင်း စူးစိုက်ကြည့်ရှုနေခဲ့မိသည်။

အမြဲတမ်း အရှိန်အဝါကြီးခဲ့သော ဧကရီတစ်ပါး၏ မျက်ဝန်းများထဲတွင် ယခုအခါ၌မူ ပျော်ရွှင်မှုများနှင့် စိတ်ကျေနပ်မှုများသာ တည်ရှိနေပြီ။

သူက ကျွင်းရှောင်ယောက်ကို ပိုမိုကြည့်ရှုလေလေ၊ ပို၍ ကျေနပ်အားရလေလေ ဖြစ်လာခဲ့ရသည်။

ဒါက သူ ရွှမ်ထျန်းဧကရီ၏ သားဖြစ်ပြီး ထိပ်တန်းအဆင့် အသွင်အပြင်၊ ထိပ်တန်းအဆင့် ပါရမီစွမ်းရည်နှင့် ထိပ်သီးအဆင့် သန်မာမှုများကို ပိုင်ဆိုင်ထားသူ ဖြစ်ပေသည်။

လက်ရှိ ရွှမ်ထျန်းဧကရီ၏ ကျင့်ကြံမှုဖြင့်ပင် ကျွင်းရှောင်ယောက်၏ အရှိန်အဝါကို ဝေဝါးစွာသာ အာရုံခံနိုင်စွမ်း ရှိပေသည်။

၎င်းက ကျွင်းရှောင်ယောက်သည် သူမထက် သန်မာနေခြင်းကြောင့် မဟုတ်ချေ။

ဆန့်ကျင်ဘက်အနေဖြင့်၊ ကျွင်းရှောင်ယောက်က အလွန်တရာ ဆန်းကြယ်ပြီး ထူးခြားလွန်းသဖြင့် အပြင်လူများအနေဖြင့် သူ့အား အလွယ်တကူ ထိုးဖောက်မြင်နိုင်ရန် မဖြစ်နိုင်ခြင်းကြောင့် ဖြစ်သည်။

ဤအရာကပင် သူ၏ ထူးခြားမှု ဖြစ်ပေသည်။

"ရှောင်အာ... မင်းက မွေးဖွားလာပြီး သိပ်မကြာခင်မှာဘဲ တစ်ကိုယ်တည်း တံခါးပိတ်ကျင့်ကြံခြင်းကို စတင်ပြုလုပ်ခဲ့တာပဲ"

"အမေ မင်းကို တွေ့ရတာ အလွန်တရာ ရှားပါးလှတယ်၊ နှစ်အနည်းငယ်မှာ တစ်ကြိမ်တောင်မှပဲ မလွယ်ဘူးလေ"

"အမေ တွေးနေမိတာက... မင်း အမေ့ကို မုန်းနေတာလားလို့ပါ"

ရွှမ်ထျန်းဧကရီက အနည်းငယ် ဝမ်းနည်းရိပ်သန်းနေသော လေသံဖြင့် ဆိုလိုက်သည်။

ပြင်ပလောကကြီးတွင် သူက နတ်ဘုရားမင်းဆက်တစ်ခု၏ အရှိန်အဝါကြီးသော ဧကရီတစ်ပါး ဖြစ်သော်လည်း...

တကယ်တမ်းမှာတော့ အမျိုးသမီးတစ်ဦး၊ မိခင်တစ်ဦးသာ ဖြစ်သည် မဟုတ်လော။

မည်သည့် မိခင်မဆို မိမိ၏ သားဖြစ်သူအား မိမိနှင့် နီးစပ်မှု ရှိစေလိုကြသည်သာ ဖြစ်သည်။

ထို့ကြောင့်ပင် ရွှမ်ထျန်းဧကရီက ကျွင်းရှောင်ယောက်အပေါ် ဤမျှအလိုလိုက်ချစ်ခင်နေခဲ့ခြင်း ဖြစ်သည်။

ကျွင်းရှောင်ယောက်လည်း အနည်းငယ် စိတ်မကောင်းဖြစ်သွားခဲ့ရသည်။

မမှားပေ။

လွန်ခဲ့သော နှစ်ပေါင်းများစွာအတွင်း သူ၏ တစ်ခုတည်းသော ပန်းတိုင်မှာ အလျင်အမြန် ကျင့်ကြံရန်၊ ခိုင်မာသော အခြေခံအုတ်မြစ်ကို ချမှတ်ရန်နှင့် သူ၏ မူလအဆင့်အတန်းဆီသို့ အမြန်ဆုံး ပြန်လည်ရောက်ရှိရန် ဖြစ်ပြီး၊ ထိုမှတစ်ဆင့် ကျန်းစန်းယီ၏ ဝိညာဉ်လေးခုကို သွားရောက်ရှာဖွေနိုင်ရန် ဖြစ်သည်။

ထို့ကြောင့်၊ မိသားစု သံယောဇဉ်များကို အမှန်တကယ်ပင် လျစ်လျူရှုမိခဲ့ပေသည်။

ဤအရာက သူ့အတွက် ဘဝသစ်တစ်ခုသာ ဖြစ်လင့်ကစား သူ၏ မွေးမိခင်ရင်းက မွေးမိခင်ရင်း ဖြစ်နေဆဲပင်။

သူ့အနေဖြင့် သူမအပေါ်တွင်လည်း သံယောဇဉ်နှင့် မေတ္တာတရားများ ရှိနေသင့်သည်။

ကျွင်းရှောင်ယောက်သည် မူလက ယွဲ့ကျစ်လန်အား ကျွင်းမိသားစုနှင့် သူ အသွင်သစ်ခန္ဓာကိုယ်အဖြစ် ပြောင်းလဲမွေးဖွားလာခဲ့ရခြင်း အပါအဝင် အမှန်တရားအားလုံးကို ပြောပြရန် ဆန္ဒရှိခဲ့သည်။

သို့သော်လည်း ယွဲ့ကျစ်လန်၏ ဝမ်းသာအားရဖြစ်နေသော အမူအရာကို တွေ့မြင်လိုက်ရသောအခါ...

ကျွင်းရှောင်ယောက်လည်း အခြားသော အခွင့်အရေးတစ်ခုကို စောင့်ဆိုင်းခြင်းက အကောင်းဆုံးဖြစ်လိမ့်မည်ဟု တွေးတောလိုက်မိလေသည်။

"ဒါနဲ့ စကားမစပ်... ရှောင်အာ၊ မင်း သန်မာလာတာနဲ့ မင်းရဲ့ အဖေကို သေချာပေါက် ကောင်းကောင်းကြီး ရိုက်နှက်ဆုံးမရမယ်"

ရွှမ်ထျန်းဧကရီက ရုတ်တရက် တစ်စုံတစ်ရာကို တွေးတောမိသွားဟန်ဖြင့် ဆိုလိုက်သည်။

ကျွင်းရှောင်ယောက်က ဇဝေဇဝါ ဖြစ်သွားရ၏။

ရွှမ်ထျန်းဧကရီက အံကြိတ်လိုက်ရင်း ဆက်ပြောလိုက်သည်။

"အဲဒီနှလုံးသားမရှိတဲ့ လူယုတ်မာက သူ့ရဲ့ ကလေးကို ချန်ထားခဲ့ပြီးတာနဲ့ အမေတို့ သားအမိသုံးယောက်ကို ဘာမှဂရုမစိုက်ဘဲ ထွက်ပြေးသွားခဲ့တာလေ"

ရွှမ်ထျန်းဧကရီမှာ ဒေါသထွက်နေပုံရသည်။

ကျွင်းရှောင်ယောက်လည်း ထပ်မံ၍ စိတ်မကောင်းဖြစ်ရလေသည်။

ဤဘဝတွင် သူ၏ မိခင်အသစ်က တကယ်ကို ခံစားခဲ့ရသည်။

သို့သော်လည်း ရွှမ်ထျန်းဧကရီက အလွန်တရာ ထူးကဲသော အမျိုးသမီးတစ်ဦးဖြစ်ကြောင်း သူမြင်နိုင်သည်။

သူမ၏ နှလုံးသားကို သိမ်းပိုက်နိုင်ခဲ့သော အမျိုးသားမှာ အလွန်တရာ ထူးခြားလှသော နောက်ခံနောက်ကြောင်းကို ပိုင်ဆိုင်ထားရမည်မှာ အထူးပြောနေရန် မလိုချေ။

မြင့်မြတ်သော အမျိုးသမီးတစ်ဦးက မထင်မှတ်ဘဲ သာမန်အမျိုးသားတစ်ဦးနှင့် ဆုံတွေ့ခဲ့ရပြီး၊ ကံကြမ္မာ၏ ရွေးချယ်ခံကလေးငယ်တစ်ဦးကို မွေးဖွားပေးခဲ့သည်။

ထို့နောက်တွင်မူ ကံကြမ္မာ၏ ရွေးချယ်ခံ ကလေးလေးက သူ၏မိခင်ကို လိုက်လံရှာဖွေရသည်ဟူသော ပုံစံခွက် ဇာတ်လမ်းမျိုးနှင့် ပတ်သက်၍မူ...

ဤကဲ့သို့သော ပုံစံခွက်မျိုးက လက်တွေ့ဘဝတွင် လုံးဝ မဖြစ်နိုင်ပါချေ။

ဤကဲ့သို့သော ဇာတ်ကွက်မျိုးက အဓိပ္ပာယ်သိပ်မရှိသော အရာမျိုးသာ ဖြစ်သည်။

ဆင်းရဲသားနှင့် သူဌေးသမီး ညားကြရသည်အထိ ဘဝက မရိုးရှင်းပါချေ။

ထို့ကြောင့် ကျွင်းရှောင်ယောက်သည် ဤဘဝသစ်တွင် သူ၏ ဖခင်နှင့် သူ့မျိုးနွယ်စုက ကြီးမားသော အဆင့်အတန်းကို ပိုင်ဆိုင်ထားရမည် ဖြစ်သည်။

အနည်းဆုံးတော့ ရွှမ်ထျန်းနတ်ဘုရားမင်းဆက်ထက် အားနည်းနေလိမ့်မည် မဟုတ်ပါ။

"ဒါနဲ့ စကားမစပ်... ရှောင်အာ၊ မင်း ဒီတစ်ကြိမ် ကျင့်ကြံခြင်းကနေ ထွက်လာရခြင်းရဲ့ ရည်ရွယ်ချက်က ဘာလဲ"

ရွှမ်ထျန်းဧကရီက မေးမြန်းလိုက်သည်။

သူမ သိရှိထားသလောက် ကျွင်းရှောင်ယောက်၏ ပင်ကိုယ်စရိုက်အရ ကြီးမားလှသော ကိစ္စရပ်တစ်ခု ဖြစ်ပေါ်မလာခဲ့ပါက ကျင့်ကြံခြင်းမှ ထွက်ခွာလာလိမ့်မည် မဟုတ်ပါချေ။

"ကျွန်တော် လေ့ကျင့်ဖို့အတွက် ဟင်းလင်းပြင်အက်ကြောင်းဆီကို သွားချင်လို့ပါ"

ကျွင်းရှောင်ယောက်က ဆိုလိုက်သည်။

ရွှမ်ထျန်းဧကရီက ခေါင်းညိတ်မိရင်း ပြောလိုက်၏။

"ကောင်းတာပဲ၊ ရှောင်အာအနေနဲ့ ‌ဒီလောက် လူမသိသူမသိ နေထိုင်လွန်းတာက မကောင်းပါဘူး။ လောကကြီးအနေနဲ့ မင်းရဲ့ တောက်ပမှုတွေကို တွေ့မြင်ရမယ့်အချိန် ရောက်ပြီ"

ထို့နောက်တွင်၊ ရွှမ်ထျန်းဧကရီက လက်ခုတ်တစ်ချက်တီးလိုက်သည်။

ဟင်းလင်းပြင်အတွင်း၌၊ အနက်ရောင်ဝတ်စုံကို ဆင်ယင်ထားပြီး၊ မျက်နှာပြင်ထက်တွင် အနက်ရောင်မျက်နှာလွှာကို အုပ်မိုးထားသော အမျိုးသမီးတစ်ဦး ပေါ်လာခဲ့၏။

သူက နက်ရှိုင်းလှသော အေးစက်မှု အငွေ့အသက်များကို သယ်ဆောင်ထားခဲ့သည်။

"ရှောင်အာ... သူက အမေ့ရဲ့ ယုံကြည်ရတဲ့ သူတွေထဲက တစ်ယောက်ပဲ။ သူ့ရဲ့ ကျင့်ကြံခြင်းက အဓိပတိနယ်ပယ် မှာ ရှိတယ်"

"သူ့ရဲ့ ကျင့်ကြံခြင်းအဆင့်က ဒီလောက် မမြင့်မားသေးဘူးဆိုပေမဲ့လည်း သစ္စာရှိပြီး မင်းရဲ့ ဒီခရီးစဉ်တစ်လျှောက်မှာ ကာကွယ်ပေးဖို့အတွက် သူမရဲ့ အသက်ကိုတောင် စွန့်လွှတ်ဝံ့သူ ဖြစ်တယ်။ သူနဲ့ဆိုရင် မင်း သေချာပေါက် ဘေးကင်းမှာပါ"

ရွှမ်ထျန်းဧကရီက ဆိုလိုက်သည်။

ထိုအမျိုးသမီး၏ နာမည်မှာ ယဲ့လျိုလီ ဖြစ်သည်။ သူက သူမ ကာကွယ်ပေးရမည့် ကျွင်းရှောင်ယောက်အား အကဲခတ်သလို လှမ်းကြည့်လိုက်၏။

ရုတ်တရက်၊ သူမ၏ မျက်ဝန်းများမှာ အနည်းငယ် တုန်လှုပ်သွားမိသည်။

ကျွင်းရှောင်ယောက်၏ အသွင်အပြင်နှင့် ကိုယ်ဟန်အမူအရာက သူမကိုလည်း ဖမ်းစားသွားခဲ့ကြောင်း ထင်ရှားသည်။

သူမအနေဖြင့် ဤမျှလောက် ထူးခြားသော သူမျိုးကို တစ်ကြိမ်တစ်ခါမျှ မတွေ့မြင်ခဲ့ဖူးချေ။

ရွှမ်ထျန်းဧကရီက ရုတ်တရက် ပြုံးလိုက်မိရင်း ဆိုလိုက်သည်။

"လျိုလီ... မင်းအနေနဲ့ ငါ့သားအပေါ်ကိုတော့ မျက်စိကျလို့မရဘူးနော်၊ သူက ငယ်သေးတယ်"

"ကျွန်မ ဘယ်လိုလုပ် ဝံ့ပါ့မလဲရှင်"

ယဲ့လျိုလီက ချက်ချင်း ခေါင်းငုံ့လိုက်၏။

"ဟင်းဟင်း... ငါက နောက်လိုက်တာပါ"

ရွှမ်ထျန်းဧကရီက ပြုံးလိုက်သည်။

ကျွင်းရှောင်ယောက်သည် တစ်ဆယ့်ငါးနှစ်တာ တစ်ကိုယ်တည်း တံခါးပိတ်ကျင့်ကြံခြင်းမှ ထွက်လာခဲ့ပြီဖြစ်၍ သူမ အလွန်ပျော်ရွှင်နေခြင်း ဖြစ်သည်။

ယဲ့လျိုလီသည်လည်း တိတ်တဆိတ် အံ့ဩခဲ့မိသည်။

သူမအနေဖြင့် ဧကရီ ဤမျှပျော်ရွှင်နေသည်ကို တစ်ကြိမ်တစ်ခါမျှ မတွေ့မြင်ခဲ့ဖူးချေ။

"ဒါပေမဲ့... တကယ်လို့ ငါ့သားက နင့်ကို သဘောကျတယ်ဆိုရင်တော့ ဘယ်လိုဖြစ်လာမလဲဆိုတာကို သိထားသင့်တယ်"

ရွှမ်ထျန်းဧကရီက ဆိုလိုက်သည်။

"အရှင်မ စိတ်ချပါရှင်... လျိုလီအနေနဲ့ ဧကရာဇ်ငယ်အတွက် အရာအားလုံးကို သေချာပေါက် ပေးဆပ်သွားမှာပါ"

ယဲ့လျိုလီက ရိုသေစွာ ပြောလိုက်၏။

ကျွင်းရှောင်ယောက်မှာ ဘေးတစ်ဖက်တွင် ရပ်နေရင်း ဘာပြောရမည်မှန်း မသိတော့ပေ။

တကယ်တော့ သူ့အတွက် မည်သည့် ကာကွယ်စောင့်ရှောက်မှုကိုမျှ လုံးဝ လိုအပ်နေခြင်း မရှိပါဟု ပြောလိုသည်။

သို့သော်လည်း၊ ရွှမ်ထျန်းဧကရီ၏ မျက်နှာထက်ရှိ ပျော်ရွှင်နေသော အကြည့်များကို တွေ့မြင်ရသောအခါ ကျွင်းရှောင်ယောက်အနေဖြင့် တိတ်ဆိတ်စွာသာ လက်ခံလိုက်ရုံမှတပါး အခြားမရှိတော့ပေ။

အဓိပတိနယ်ပယ်လား။

ဘယ်သူက ဘယ်သူ့ကို ကာကွယ်ပေးရမှာလဲ။