အခန်း ၁၆၁၀

အခန်း ( ၁၆၁၀ ) နှောင်းနောင်တ။

ပိုင်ရွယ်ဝေတွင် ဖြူဝင်းသော အသားအရေနှင့် ရေခဲပြာရောင် ဆံနွယ်များ ရှိသည်။

သူမ၏ မျက်ဝန်းသူငယ်အိမ်များပင်လျှင် ရေခဲပြာရောင် ဖြစ်နေခဲ့၏။

သူဟာ ရေခဲကျောက်ဆစ်ရုပ်ကဲ့သို့ ကြည်လင်တောက်ပပြီး လှပလွန်းလှသူ ဖြစ်သည်။

သို့သော်လည်း ဤကဲ့သို့ နူးညံ့ဖော်ရွေခြင်းကို တစ်ခါမှ မမြင်ဖူးကြသဖြင့် လူတိုင်းမှာ အံ့ဩသွားမိကြလေသည်။

သို့သော်လည်း၊ ကျွင်းရှောင်ယောက်၏ မျက်ဝန်းထဲတွင်မူ လှိုင်းတွန့်လေးတစ်ခုမျှပင် ထွက်ပေါ်မလာခဲ့ချေ။

ပိုင်ရွယ်ဝေမှာ စိုးရွံ့မှုကို မအောင့်နိုင်ဘဲ သူမ၏ နှုတ်ခမ်းကို အနည်းငယ် ကိုက်လိုက်မိသည်။

အမှန်တကယ်တော့၊ ပိုင်ရွယ်ဝေ တစ်ယောက်တည်းတင် မဟုတ်ပါချေ။

မည်သည့် ပါရမီရှင်မဆို ကျွင်းရှောင်ယောက်၏ ရှေ့မှောက်တွင်မူ နိမ့်ကျချက်များ ခံစားရပြီး အလိုအလျောက် နှိမ့်ချမိသွားကြလိမ့်မည် ဖြစ်သည်။

ကျွင်းရှောင်ယောက်ထံတွင် မမြင်ရသော အရှိန်အဝါတစ်ခုက ကြာမြင့်စွာကတည်းက ဖြစ်တည်ခဲ့ပြီး လူတိုင်းကို လွှမ်းမိုးနိုင်ပေသည်။

"မင်းက ဘယ်သူလဲ..."

ထိုမိန်းကလေးကို ကြည့်ရင်း ကျွင်းရှောင်ယောက်က စဉ်းစားဟန်ပြုလိုက်သည်။

"ကျွန်မက ရေခဲနဲ့ဆီးနှင်း နတ်ဘုရားမနန်းတော်က ပိုင်ရွယ်ဝေပါ..."

ပိုင်ရွယ်ဝေ တိုးညှင်းစွာ ပြောလိုက်၏။

ဤမြင်ကွင်းက ပတ်ဝန်းကျင်ရှိ လူတိုင်းကို မျက်လုံးအရောင်ပြောင်းစေခဲ့သည်။

အခြားသူများ၏ ရှေ့တွင်၊ ပိုင်ရွယ်ဝေသည် ရေခဲနှင့်ဆီးနှင်း နတ်ဘုရားမနန်းတော်၏ မြင့်မြတ်သော သူတော်စင်ငယ်တစ်ဦးဖြစ်ပြီး အေးစက်ကာ စိမ်းသက်သော အမူအရာမျိုး ရှိသည်။

သူမက အေးစက်စိမ်းကားလွန်းသော မိန်းမလှမျိုး မဟုတ်လျှင်ပင်...

အနည်းဆုံးတော့ မည်သူမဆို အလွယ်တကူ ချဉ်းကပ်နိုင်သူမျိုး လုံးဝ မဟုတ်ချေ။

သို့ရာတွင်၊ ယခုကျတော့ကော။

ရေခဲနှင့်ဆီးနှင်း နတ်ဘုရားမနန်းတော်၏ သူတော်စင်ငယ်က တိုးညှင်းညင်သာစွာ စကားပြောဆိုနေခဲ့ပြီး၊ သူမ၏ အသံကို အလွန်အမင်း ကျယ်လောင်အောင်ပင် မပြုလုပ်ရဲချေ။

သူက သူ့ရှေ့မှ ဝတ်စုံဖြူဝတ် လူငယ်အား စိတ်အနှောင့်အယှက် ဖြစ်စေမိမည်ကိုပင် စိုးရိမ်နေခဲ့သည်။

"ဪ... ဒါဆို မင်းက ကျုပ်ရဲ့ စေ့စပ်ထားခဲ့ဖူးသူပဲ"

ကျွင်းရှောင်ယောက်က ချက်ချင်း သဘောပေါက်သွားခဲ့သည်။

"ဧကရာဇ်ငယ်က ကျွန်မကို မှတ်မိနေသေးတာပဲ..."

ပိုင်ရွယ်ဝေလည်း ပြုံးလိုက်၏။

ပတ်ဝန်းကျင်ရှိ လူတိုင်းမှာ မှင်တက်သွားကြရသည်။

ထိုအပြုံးသည် မည်သို့ပင် ကြည့်ပါစေ၊ အလိုလိုက်အကြိုက်ဆောင်လိုသော အရိပ်အယောင် အနည်းငယ် ရှိနေခဲ့သည်။

လူအများအပြားက ၎င်းကို စတင်ဆွေးနွေးလာကြတော့သည်။

"ဧကရာဇ်ငယ်က စေ့စပ်မှုကို ဖျက်သိမ်းချင်တုန်းက၊ သူတော်စင်မ ပိုင်ရွယ်ဝေကိုယ်တိုင် လွယ်လွယ်လေး သဘောတူခဲ့တာ မဟုတ်ဘူးလား။ ဒါပေမဲ့ အခုကျတော့..."

"ခင်ဗျားကလည်း စားပြီဗျာ၊ အဲဒီတုန်းက ဧကရာဇ်ငယ်နဲ့ ပတ်သက်ပြီး အခြေအမြစ်မရှိတဲ့ ကောလာဟလတချို့ ရှိခဲ့တယ်လေ။ ရေခဲနဲ့ဆီးနှင်း နတ်ဘုရားမနန်းတော်နဲ့ သူတော်စင်ငယ် ပိုင်ရွယ်ဝေတို့က အဲဒါတွေကို ယုံကြည်ခဲ့ကြတာ ဖြစ်မယ်လို့ ကျုပ်လောင်းရဲတယ်"

"ဒါဆို အခု သူတော်စင်ငယ် ပိုင်ရွယ်ဝေက သူ့ရဲ့ နောင်တတွေအတွက် လာပြီး ပြုပြင်တာပေါ့... ဟုတ်လား"

"လုပ်ပြန်ပြီ၊ ဧကရာဇ်ငယ်ရဲ့ ဒီလိုမျိုး မကောင်းဆိုးရွားဆန်တဲ့ ပါရမီနဲ့ဆိုရင် တောင်ပိုင်းကြယ်စင်စုလောကကို မပြောနဲ့... နယ်နိမိတ်ပင်လယ်တစ်ခုလုံးမှာတောင် သူ့လိုမျိုး နောက်တစ်ယောက် ရှာတွေ့နိုင်မှာ မဟုတ်ဘူး"

"ကျုပ်သာဆိုရင်လည်း မျက်နှာအကုန် ပျက်ရမယ်ဆိုရင်တောင် သူ့ကို ကပ်နေမိမှာပဲ"

ပတ်ဝန်းကျင်မှ တီးတိုးပြောသံများကို ကြားရသောအခါ ပိုင်ရွယ်ဝေ၏ မျက်နှာမှာ အနည်းငယ် နီရဲသွားရသည်။

အမှန်တကယ်ပင်။

ကျွင်းရှောင်ယောက်၏ ထွက်ပေါ်လာမှုက သူမကို အမှန်တကယ် ထိတ်လန့်တုန်လှုပ်သွားစေခဲ့သည်။

အသက်တစ်ဆယ့်ငါးနှစ်အရွယ် အဓိပတိ...

ပုံပြင်ပြောသူများပင်လျှင် ဤမျှအထိ စိတ်ကူးယဉ်၍ ချဲ့ကားပြောဆိုရဲကြမည် မဟုတ်ချေ။

ယခင်က သူမအနေဖြင့် ဧကရာဇ်ငယ်သည် ပါရမီထူးချွန်သော်လည်း၊ ကျင့်ကြံရန် စိတ်ဆန္ဒကင်းမဲ့နေခဲ့သည်ဟု ပြောဆိုခဲ့မိခြင်းက ရယ်စရာကောင်းလှသည်။

အသက်တစ်ဆယ့်ငါးနှစ်အရွယ် အဓိပဓိကျွမ်းကျင်သူတစ်ဦးကို၊ ကျင့်ကြံရန် စိတ်ဆန္ဒကင်းမဲ့နေသူဟု ခေါ်ဆိုနိုင်ပါ့မလား။

အကယ်၍ ကျွင်းရှောင်ယောက်သာ ကျင့်ကြံရန် စိတ်ဆန္ဒမရှိခဲ့ပါက...

ထိုအခါ ဤပါရမီရှင်များမှာ ဝက်များနှင့် ခွေးများကဲ့သို့ ရှင်သန်နေခဲ့ကြသည် မဟုတ်ပါလော။

သူမ၏ ရိုးအသော အတွေးများကို ပြန်လည်တွေးတောရင်း၊ ပိုင်ရွယ်ဝေမှာ မိမိကိုယ်ကိုယ် အနည်းငယ် လှောင်ပြောင်လိုက်မိသည်။

"သေချာတာပေါ့၊ ကျုပ် မင်းကို မှတ်မိပါတယ်။ တကယ်တော့ ကျုပ်က မင်းကို ပိုပြီးတော့တောင် ကျေးဇူးတင်သင့်သေးတယ်"

ကျွင်းရှောင်ယောက် ပိုင်ရွယ်ဝေအား ပြုံးပြလိုက်သည်။

ပိုင်ရွယ်ဝေမှာ ထိုအပြုံးကြောင့် မှင်တက်သွားခဲ့ရပြီး မျက်နှာလေး နီမြန်းသွားပြန်လေသည်။

သူက ထစ်ငေါ့စွာ မေးလိုက်မိသည်။

"ဧကရာဇ်ငယ်... ဧကရာဇ်ငယ်က ကျွန်မကို ဘာအတွက် ကျေးဇူးတင်တာလဲဟင်"

ကျွင်းရှောင်ယောက်က ညင်သာပြီး ယဉ်ကျေးသော အမူအရာဖြင့် ပြောလိုက်လေသည်။

"အရင်က အိမ်ထောင်ရေး ကတိကဝတ်တွေဆိုတာ သာမန်စီစဉ်မှုတစ်ခုထက် ဘာမှမပိုခဲ့ပါဘူး"

"ဒါပေမဲ့လည်း ကျုပ်က အစပိုင်းမှာ စေ့စပ်မှုကို ဖျက်သိမ်းချင်တဲ့အချိန်မှာ... မိန်းကလေး ပိုင်ရွယ်ဝေ စိတ်ထဲရှိနေမှာကို စိုးရိမ်ခဲ့မိသေးတယ်"

"ဒါပေမဲ့ မိန်းကလေးက ဒီလောက်ထိ နားလည်ပေးတတ်ပြီး ကျိုးကြောင်းဆင်ခြင်တတ်ပါတယ်။ မင်းက ပြဿနာမရှာဘဲ စေ့စပ်မှုကို ဖျက်သိမ်းဖို့ တန်းပြီး သဘောတူခဲ့တယ်။ အဲဒါက ကျုပ်ကို နည်းနည်းတောင် အားနာမိစေပါတယ်"

ကျွင်းရှောင်ယောက် စိတ်ရင်းမှန်ဖြင့် ပြောလိုက်သည်။

သူ လိမ်ညာနေခြင်း မဟုတ်ချေ။

သူက နယ်နိမိတ်ပင်လယ်သို့ ကျန်းစန်းယီ၏ ဝိညာဉ်လေးခုကို ရှာဖွေရန် ရောက်ရှိလာခဲ့ခြင်း ဖြစ်ရာ၊ အခြားသော အမျိုးသမီးများကို လက်ထပ်နေရန် သူ့အတွက် မဖြစ်နိုင်ပါ။

သို့သော်လည်း စေ့စပ်ပွဲကို ဖျက်သိမ်းလိုက်လျှင် မျှော်လင့်မထားသော အရာတစ်ခုခု ဖြစ်ပျက်လာနိုင်သည်ဟု သူက အစပိုင်းတွင် ထင်မှတ်ထားခဲ့သည်။

ဥပမာအားဖြင့် သုံးနှစ်စာချုပ် စိန်ခေါ်ချက် သို့မဟုတ် တစ်ခုခုကို ယူဆောင်လာတတ်ကြပေသည်။

၎င်းက အနည်းငယ် အနှောင့်အယှက် ဖြစ်စရာပင်။

သို့သော်လည်း မမျှော်လင့်ဘဲ ပိုင်ရွယ်ဝေက အတော်လေး အသိတရားရှိပြီး စေ့စပ်ပွဲ ဖျက်သိမ်းခြင်းကို အလွယ်တကူ သဘောတူခဲ့သည်။

၎င်းက ကျွင်းရှောင်ယောက်ကို သဘာဝအတိုင်း ကျေးဇူးတင်ရှိစေသော်လည်း၊ အားနာစိတ်ကိုလည်း ဖြစ်ပေါ်စေခဲ့ပေသည်။

နောက်ဆုံးတွသ်၊ မိန်းကလေးတစ်ယောက်အတွက် သူမ၏ စေ့စပ်ပွဲ ပျက်ပြယ်သွားသည့်အခါ ဂုဏ်သိက္ခာကို ထိခိုက်ရသည်။

သို့သော်လည်း၊ ကျွင်းရှောင်ယောက်၏ ရှင်းပြချက်ကို ကြားပြီးနောက် ပိုင်ရွယ်ဝေမှာမူ ဆန့်ကျင်ဘက်အနေဖြင့် ငိုမဲ့မဲ့မျက်နှာထက်ပင် ပို၍ ကြည့်ရဆိုးလှသော အပြုံးတစ်ခုကိုသာ အတင်းအကျပ် ပြုံးလိုက်ရတော့သည်။

သူက ပို၍ပင် ဝမ်းနည်းသွားခဲ့ရသည်။

အကယ်၍ ကျွင်းရှောင်ယောက်ကသာ ဤမျှအထိ မကောင်းဆိုးရွားဆန်သော ပါရမီရှင်တစ်ဦးဖြစ်မှန်း သူမ အစောကြီးကတည်းက သိခဲ့ပါက...

သူမအနေဖြင့် ကပ်စေးနှဲကော်တစ်ရာအဖြစ် ပြောင်းလဲသွားပြီး၊ သူ့နောက်သို့ မဆုတ်မနစ် လိုက်လံကာ မိမိကိုယ်ကိုယ် ပေးအပ်ရမည်ဆိုလျှင်ပင် စေ့စပ်ပွဲ ဖျက်သိမ်းရန် လုံးဝ သဘောတူလိမ့်မည် မဟုတ်ချေ။

သူမ၏ စေ့စပ်ထားသူ အဆင့်အတန်းကို ထိန်းသိမ်းထားနိုင်ရန်အတွက် ငိုယိုခြင်း၊ ပြဿနာရှာခြင်းနှင့် သေကြောင်းကြံစည်မည်ဟု ခြိမ်းခြောက်ခြင်း အရာအားလုံးကို လုပ်ဆောင်မိလိမ့်မည် ဖြစ်သည်။

သို့သော်လည်း အခုတော့ အရာအားလုံးက နောက်ကျသွားခဲ့ချေပြီ။

"ယွင်ရှီ၊ သွားကြစို့"

ကျွင်းရှောင်ယောက် ပြောလိုက်သည်။

“ဟို... ဟိုလေ၊ အစ်ကို…”

ယွင်ရှီက တစ်ခုခုပြောလိုသော်လည်း တွန့်ဆုတ်နေဟန်ဖြင့်း သူမ၏ လက်ချောင်းလေးများကို လိမ်ယှက်ထားမိသည်။

"ဘာဖြစ်လို့လဲ"

ကျွင်းရှောင်ယောက် လှည့်မေးလိုက်၏။

"အစ်ကို၊ ညီမကို... 'ရှီအာ'လို့ ခေါ်ပေးလို့ရမလား"

ယွင်ရှီ၏ မျက်နှာပေးလေးဖြင့် မော့ကြည့်ရင်း ပြောလိုက်ခြင်း ဖြစ်သည်။

“ကောင်းပါပြီ၊ ရှီအာ"

ကျွင်းရှောင်ယောက်က ပြောလိုက်သည်။

လွန်ခဲ့သည့် နှစ်များအတွင်းက၊ သူ့အနေဖြင့် ဤအပိုဆုညီမလေးကို မည်သည့်ဂရုစိုက်မှုမျှ မပေးခဲ့မိချေ။

ယခုအခါတွင် သူမ၏ ဆန္ဒကို အနည်းငယ် လိုက်လျောပေးလိုက်ခြင်းက အဆင်ပြေပုံရသည်။

ယွင်ရှီလည်း ကျေနပ်စွာပြုံးလိုက်ပြီး သတ္တိမွေးလျက် ကျွင်းရှောင်ယောက်၏ လက်တစ်ဖက်ကို ချိတ်လိုက်လေသည်။

"ညီမလေးတို့ သုံးယောက် နောက်ဆုံးတော့ အတူတူ ရှိနိုင်ခဲ့ကြပြီ။ အမေကြီးလည်း အရမ်း ပျော်နေလိမ့်မယ်"

ယွင်ရှီက အပြုံးဖြင့် ပြောလိုက်သည်။

အတိတ်ကာလတွင်၊ သူက ဖိအားများစွာကို ကြံ့ကြံ့ခံခဲ့ရသည်။

ယခုမူ၊ သူမ၏ အနှိုင်းမဲ့အစ်ကိုဖြစ်သူက ကျင့်ကြံခြင်းမှ ထွက်ပေါ်လာခဲ့ပြီ။

ယွင်ရှီက နောက်ဆုံးတွင် သူမ၏ မိန်းကလေးဆန်သော အပြစ်ကင်းစင်မှုနှင့် ရိုးသားမှုအချို့ကို ပြသနိုင်ခဲ့ပြီ ဖြစ်သည်။

ပိုင်ရွယ်ဝေမှာမူ ထိုလူနှစ်ယောက် လက်ချင်းချိတ်ကာ ထွက်ခွာသွားသည်ကို ကြည့်ရင်း အနည်းငယ် စိတ်လွင့်နေခဲ့မိသည်။

ပတ်ဝန်းကျင်ရှိ လူတချို့မှာလည်း ပိုင်ရွယ်ဝေကိုကြည့်ကာ တိတ်တဆိတ် ခေါင်းယမ်းလိုက်ကြလေသည်။

ပိုင်ရွယ်ဝေက ဤအနှိုင်းမဲ့ ဧကရာဇ်ငယ်၏ မိဖုရားဖြစ်လာရန် နီးစပ်ခဲ့သည်။

မိဖုရားငယ်တစ်ယောက်မျှသာ ဖြစ်လင့်ကစား၊ အကျိုးကျေးဇူး အမြောက်အမြား ရရှိနိုင်ဦးမည်။

မွေးရာပါ မြင့်မြတ်ခန္ဓာ တာအိုသန္ဓေပိုင်ရှင် ဖြစ်နေသည့်အပြင် အသက်တစ်ဆယ့်ငါးနှစ်အရွယ် အဓိပတိတစ်ဦး ဖြစ်နေခြင်းက ဘာကိုဆိုလိုသနည်း။

ကျွင်းရှောင်ယောက်အတွက် တောင်ပိုင်းကြယ်စင်စုလောက၏ အရှင်သခင် ဖြစ်လာရန်မှာ အခြေခံအားဖြင့် အလွန်လွယ်ကူသော ကိစ္စတစ်ခု ဖြစ်သည်ဟုသာ ပြောနိုင်သည်။

နောင်တွင် ဤကဲ့သို့သော ပုဂ္ဂိုလ်များအတွက် တိုက်ပွဲဝင်ရမည့် နယ်ပယ်များမှာ ပို၍ မြင့်မားသောအဆင့်ရှိ တစ်ခုတည်းသော စကြဝဠာ သို့မဟုတ် နယ်နိမိတ်ပင်လယ်လောကတစ်ခုလုံးပင် ဖြစ်လိမ့်မည်။

ပိုင်ရွယ်ဝေက ကြီးမားသော အခွင့်အလမ်းတစ်ခုကို လွဲချော်ခဲ့ရသည်မှာ သံသယဖြစ်ဖွယ် မရှိပါချေ။

အကယ်၍ ရေခဲနှင့်ဆီးနှင်း နတ်ဘုရားမနန်းတော်သာ ဤသတင်းကို သိရှိသွားခဲ့ပါက...

သူတို့သည်လည်း နက်ရှိုင်းသော နောင်တများဖြင့် ပြည့်နှက်သွားနိုင်သည်။

ရှင်းယွမ် ခရီးစဉ်ပြီးနောက်၊ ကျွင်းရှောင်ယောက်နှင့် ပတ်သက်သည့် သတင်းများက တောင်ပိုင်းကြယ်စင်စုလောကတစ်ခုလုံးသို့ ပေါက်ကွဲထွက်မတတ် အရှိန်အဟုန်ဖြင့် သေချာပေါက် ပျံ့နှံ့သွားလိမ့်မည်။

ထိုအချိန်တွင်၊ အင်မော်တယ်အင်အားစုများ အားလုံးမှာ အကြီးအကျယ် လှုပ်ခါသွားကြ ဖြစ်သည်။

သို့သော်လည်း ကျွင်းရှောင်ယောက်ကမူ၊ ထိုမျှလောက်အထိ ဂရုစိုက်မနေခဲ့ပါချေ။

တောင်ပိုင်းကြယ်စင်စုလောကမှာ သူ့အတွက် သေးငယ်လွန်းလှသည်။

ကျွင်းရှောင်ယောက်အတွက် တောင်ပိုင်းကြယ်စင်စုလောကသည် နယ်နိမိတ်ပင်လယ်၏ အစောပိုင်းအဆင့်များတွင် သူ့အတွက် ခြေကုပ်စခန်းတစ်ခုမျှသာ ဖြစ်ပေသည်။

ကျွင်းရှောင်ယောက်၏ ရည်မှန်းချက်မှာ ပို၍ မြင့်မားသော အဆင့်အတန်းသို့ ရောက်ရှိရန် ဖြစ်သည်။

တစ်ခုတည်း‌ေသာ စကြဝဠာ၊ အနန္တစကြဝဠာ သို့မဟုတ် နိုမန်မရဏနယ်နှင့် ကျယ်ပြောလှသော နယ်နိမိတ်ပင်လယ်တစ်ခုလုံးပင်။

ထိုနေရာမျိုးတွင်သာ ကျွင်းရှောင်ယောက် စိတ်ဝင်စားရမည့် ပြိုင်ဘက်တစ်ဦးနှင့် ရင်ဆိုင်ရရန် ဖြစ်နိုင်ချေ ရှိသည်။

ကျွင်းရှောင်ယောက်က တောင်ပိုင်းကြယ်စင်စုလောက၏ ပါရမီရှင်များကို တစ်ချက်ကြည့်ရန်ပင် စိတ်ကူးမရှိပေ။

သူက သူတို့အုပ်စုတစ်ခုလုံးကို လက်ညှိုးတစ်ချောင်းတည်းဖြင့်တင် ချေမှုန်းပစ်နိုင်သည်။

ထို့နောက်တွင်မူ၊ ကျွင်းရှောင်ယောက်နှင့် ယွင်ရှီတို့က ရွှမ်ထျန်းနတ်ဘုရားမင်းဆက်သို့ ပြန်လည်ရောက်ရှိလာခဲ့ကြပေသည်။

ရွှမ်ထျန်းဧကရီက သူတို့ကို ကြိုတင်စောင့်ဆိုင်းနေခဲ့သည်။

"ရှောင်အာ၊ ရှီအာ..."

ရွှမ်ထျန်းဧကရီ ပြုံးလိုက်သည်။

"အမေ"

ယွင်ရှီက ရွှမ်ထျန်းဧကရီ၏ ရင်ခွင်ထဲသို့ ချက်ချင်းတိုးဝင်လိုက်၏။

ထို့နောက်မှာတော့ မျက်နှာလေး နီမြန်းလျက် စိတ်လှုပ်ရှားစွာဖြင့် စတင်ပြောဆိုလေသည်။

"သမီးရဲ့အစ်ကိုက ဘယ်လောက်တောင် စွမ်းအားကြီးလဲဆိုတာ အမေ သိလား။ သူက ဒဏ္ဍာရီလာ အနက်ရောင်ကပ်ဘေးမျိုးနွယ်ကို ဓားချက်တစ်ချက်တည်းနဲ့ သုတ်သင်ပစ်လိုက်တာ၊ ပြီးတော့ ကောင်းကင်အဓိပဓိငယ်ကိုတောင် သတ်ပစ်လိုက်သေးတယ်..."

ရွှမ်ထျန်းဧကရီနှင့် ကျွင်းရှောင်ယောက်တို့၏ ရှေ့မှောက်တွင်သာ ယွင်ရှီက ထိုအပြစ်ကင်းစင်ပြီး ပူပန်မှုကင်းမဲ့သော အသက်တစ်ဆယ့်ငါးနှစ်အရွယ် မိန်းကလေးငယ်အဖြစ်သို့ ပြောင်းလဲသွားနိုင်သည်။

"အမေလည်း သိပါတယ်၊ ဒါပေမဲ့ မင်းရဲ့အစ်ကိုကြီးကို လျှော့တွက်မိခဲ့သေးတယ်"

ရွှမ်ထျန်းဧကရီက ကျွင်းရှောင်ယောက်အပေါ် အလွန်တရာ ကျေနပ်အားရနေမိသည်။

ထို့နောက်၊ ကျွင်းရှောင်ယောက်က မေးမြန်းလိုက်၏။

"‌အမေ၊ အနက်ရောင်ကပ်ဘေးမျိုးနွယ်အကြောင်းကို အမေ ဘယ်လောက်အထိ သိထားလဲ"

ထိုစကားကို ကြားလိုက်ရသောအခါ၊ ရွှမ်ထျန်းဧကရီ၏ ဖီးနစ်မျက်ဝန်းများတွင် လေးနက်သော အမူအရာတစ်ခု ထွက်ပေါ်လာခဲ့သည်။

"တောင်ပိုင်းကြယ်စင်စုလောကဟာ နောင်ကျရင် သေချာပေါက် ငြိမ်းချမ်းနေမှာ မဟုတ်တော့ဘူး၊ ကြီးမားတဲ့ ကမောက်ကမဖြစ်မှုတစ်ခုတောင် ဖြစ်ပွားလာနိုင်တယ်"

ရွှမ်ထျန်းဧကရီက လေးနက်လွန်းသော လေသံဖြင့် ပြောဆိုလိုက်တော့သည်။