အခန်း ၃၇၂
Vol. 38 Ch. 372
အခန်း (၃၇၂) - အစာဆိပ်သင့်ခြင်း (၁)
ရှာထင်က အမှုသည်နှစ်ဖက်လုံးကို သက်ဆိုင်ရာနေရာများဆီသို့ လမ်းညွှန်ပေးပြီးနောက် ယန်ချင်းအား ဦးညွှတ်နှုတ်ဆက်ကာ နောက်သို့ဆုတ်သွားလေ၏။
"မင်္ဂလာပါ၊ ကျုပ်နာမည်က ယန်ချင်းပါ။ ဒီအမှုကို တာဝန်ယူစစ်ဆေးမယ့် တရားသူကြီးဖြစ်ပါတယ်”
“ကျုပ်ရဲ့ လုပ်ဖော်ကိုင်ဖက်က ပြောပြထားပြီးသားဖြစ်နိုင်ပေမယ့် မင်းတို့နှစ်ဖက်လုံး ဒီတရားရုံးခန်းထဲကို ခြေလှမ်းလိုက်တဲ့အချိန်ကစပြီး တရားရုံးတော်ရဲ့ စည်းမျဉ်းဥပဒေတွေကို လိုက်နာရမှာဖြစ်ပါတယ်”
"ငါတို့ ဘယ်လိုဆုံးဖြတ်ချက်နဲ့ စီရင်ချက်ကိုပဲ ချမှတ်ပါစေ၊ မင်းတို့အားလုံး တိတိကျကျ လိုက်နာရပါမယ်”
ယန်ချင်းက တည်ကြည်လေးနက်သော လေသံဖြင့် ပြောလိုက်ရာ အမှုသည်နှစ်ဖက်လုံးကလည်း နားလည်ကြောင်း ခေါင်းညိတ်ပြကြလေ၏။
"ကောင်းပြီ၊ မင်းတို့က ဒီကိစ္စကို မျှမျှတတဖြေရှင်းပေးဖို့ ငါတို့ကို ယုံကြည်အပ်နှံထားတဲ့အတွက် ငါတို့စွမ်းဆောင်နိုင်သမျှ အစွမ်းကုန် ကြိုးစားပေးသွားမှာပါ”
"ဆိုင်ရှင်ပိုင်ကျိုး၊ မင်းရဲ့ ရွှေဘဲဟင်းလျာစားသောက်ဆိုင်က တာအိုရောင်းရင်းလီရှုကို ဆေးလုံးတွေခတ်ထားတဲ့ ဟင်းလျာတွေ ရောင်းချခဲ့တယ်ဆိုပြီး စွပ်စွဲတိုင်တန်းခြင်း ခံထားရတယ်”
"သူမရဲ့ ထွက်ဆိုချက်အရ သူမက လွန်ခဲ့တဲ့ နှစ်ပေါင်းနှစ်ဆယ့်ရှစ်နှစ်လုံးလုံး မင်းတို့ဆိုင်ရဲ့ ပုံမှန်ဖောက်သည်တစ်ဦးဖြစ်ခဲ့ပြီးတော့ ဆိုင်မှာ လာမစားဖြစ်တဲ့နေ့ဆိုတာ အရမ်းကိုရှားတယ်”
"လွန်ခဲ့တဲ့သုံးနှစ်လောက်ကစပြီး သူမရဲ့ ချီလှည့်ပတ်မှုကျင့်စဉ်ကို အသုံးပြုတဲ့နေရာမှာ ချီစီးဆင်းရခက်ခဲတဲ့ ပြဿနာလေးတွေ စတင်ကြုံတွေ့ခဲ့ရတယ်”
“အဲဒီနောက်ပိုင်း ပြဿနာတွေက ပိုကြီးထွားလာခဲ့တယ်၊ သူမရဲ့ ချီစီးဆင်းမှုက နှေးကွေးပြီး မူမမှန်ဖြစ်လာသလို တချို့သွေးကြောမျှင်တွေ အားနည်းလာပြီး တချို့ကတော့ ပိတ်ဆို့သွားခဲ့တယ်”
"ဒီနောက်ပိုင်းမှာတော့ သူမရဲ့ အရေပြားပေါ်မှာ အစိမ်းရောင်နဲ့ ခရမ်းရောင်အကွက်တွေ ခန္ဓာကိုယ်အနှံ့ ပေါ်လာခဲ့တယ်”
“သူမက ဆေးဆရာနဲ့ တိုင်ပင်ဆွေးနွေးတဲ့အခါ ဆေးလုံးဆိပ်သင့်မှုကြောင့် ချီမမျှတမှုနဲ့ သွေးကြောပိတ်ဆို့မှုဒဏ်တွေကို ခံစားနေရတယ်လို့ ရှာဖွေတွေ့ရှိခဲ့တယ်”
"သူမရဲ့ ထွက်ဆိုချက်အရ ဒဏ်ရာကုသဖို့အတွက် ရံဖန်ရံခါ ဆေးလုံးသောက်တာကလွဲလို့ ကျင့်ကြံခြင်းအတွက် တခြားဆေးလုံးတွေကို ဘယ်တုန်းကမှ အသုံးမပြုခဲ့ဘူး”
“ဒါကြောင့် သူမအတွက် ဆေးလုံးဆိပ်သင့်စရာနေရာဆိုလို့ မင်းတို့စားသောက်ဆိုင်က အစားအစာတွေပဲရှိတယ်”
"ဒါတွေကတော့ ဆိုင်ရှင်ပိုင်ကျိုးနဲ့ မင်းရဲ့စားသောက်ဆိုင်အပေါ် တိုင်ချက်ဖွင့်ထားတဲ့ စွပ်စွဲချက်တွေပဲ”
"မင်းတို့နှစ်ဖက်လုံး အလှည့်ကျ ရှင်းပြရမယ်၊ တတ်နိုင်သမျှ ရှင်းရှင်းလင်းလင်းနဲ့ တိုက်ရိုက်ပြောပြကြပါ၊ ဒီအမှုနဲ့ သက်ဆိုင်တယ်လို့ထင်ရတဲ့ ဘယ်အချက်အလက်ကိုမှ ချန်မထားပါနဲ့”
"နှစ်ဖက်လုံးရဲ့ ထွက်ဆိုချက်တွေကို ကြားနာပြီးရင်တော့ ဒီအမှုအတွက် ဘက်မလိုက်တဲ့ ဆေးလုံးဖော်စပ်သူတွေနဲ့ ဆေးဆရာတွေကို ခေါ်ယူပြီး အခြေအနေကို ပိုပြီးထင်သာမြင်သာရှိအောင်နဲ့ မင်းတို့နှစ်ဖက်လုံး လက်ခံနိုင်မယ့် ဖြေရှင်းချက်မျိုးရရှိအောင် ကူညီပေးသွားမှာပါ”
"အခုတော့ တရားလိုဖြစ်တဲ့ တာအိုရောင်းရင်းလီရှုဆီကနေ အရင်စလိုက်ကြရအောင်”
ယန်ချင်းက ပန်းရောင်ဆံပင်နှင့် အမြုတေဖွဲ့စည်းခြင်းအဆင့်ကျင့်ကြံသူအား စတင်ရန် လက်ဟန်ပြရင်း ပြောလိုက်၏။
"ဒီလိုအခွင့်အရေးပေးတဲ့အတွက် ကျေးဇူးတင်ပါတယ် တရားသူကြီးယန်ချင်း”
“ကျွန်မနာမည်က လီရှုပါ၊ ကျမက အဆင့် ၄ မျိုးနွယ်စုဖြစ်တဲ့ ရှောက်မျိုးနွယ်စုရဲ့ ဧည့်သည်တော်အကြီးအကဲတစ်ယောက် ဖြစ်ခဲ့ပေမယ့် ဒီဖြစ်ရပ်ကြောင့် အခုတော့ သူတို့အဖွဲ့ဝင် မဟုတ်တော့ပါဘူး”
"ကျွန်မတော့ တစ်ကိုယ်တော်ကျင့်ကြံသူတစ်ယောက် ဖြစ်သွားပြီထင်တယ်”
သူမက ခါးသီးစွာပြုံးလျက် ပြောလိုက်၏။
သူမက ရယ်စရာများဖြင့် ဖုံးကွယ်ရန် ကြိုးစားနေသော်လည်း ယန်ချင်းအနေဖြင့် သူမ၏လေသံထဲရှိ ခါးသီးမှုနှင့် စိတ်ပျက်အားလျော့မှုများကို ရိပ်မိနိုင်၏။
သူမ၏ စကားများကို အခြေခံ၍ နန်းတော်အဆင့်ကျင့်ကြံသူတစ်ဦး ပိုင်ဆိုင်သည့် ရွှေဘဲဟင်းလျာစားသောက်ဆိုင်ကို ဆန့်ကျင်ရန် ဆုံးဖြတ်လိုက်စဉ်ကပင် ရှောက်မျိုးနွယ်စုက သူမနှင့် ပတ်သက်မှုများကို ဖြတ်တောက်လိုက်ပြီဖြစ်ကြောင်း ခန့်မှန်းရန် မခက်ခဲချေ။
ရှောက်မျိုးနွယ်စုသည် ဧည့်သည်တော်အကြီးအကဲမျှသာဖြစ်သည့် ပြင်ပလူ လီရှုအတွက်နှင့် နန်းတော်အဆင့်ကျင့်ကြံသူတစ်ဦးအား ရန်မစနိုင်ကြောင်း တွေးတောခဲ့ကြခြင်း ဖြစ်ပေလိမ့်မည်။
ယန်ချင်းသည် နှမြောတသမှုကို မအောင့်အီးနိုင်ဖြစ်သွားရ၏။
လီရှုသည် အသက်တစ်ရာ့ရှစ်ဆယ်မျှသာ ရှိသေးသော်လည်း အမြုတေဖွဲ့စည်းခြင်းအဆင့်၏ ဆဋ္ဌမအဆင့်သို့ ရောက်ရှိနေပြီဖြစ်လေသည်။
ဆေးလုံးဆိပ်သင့်မှုကြောင့် သူမ၏ ချီစီးဆင်းမှုမှာ မတည်မငြိမ်ဖြစ်နေသော်လည်း ယန်ချင်း၏ စစ်ဆေးမှုအရ သူမတွင် အပြာရောင်အဆင့်နီးပါးရှိသော အမြုတေတစ်ခုရှိနေကြောင်း သိရှိလိုက်ရ၏။
ဤကဲ့သို့ပါရမီမျိုးဖြင့်ဆိုပါက မည်သည့်အဆင့် ၃ အဖွဲ့အစည်းမဆို သူမအား အမြန်ဆုံး ခေါ်ယူကာ အခွင့်အရေးကောင်းများ ပေးအပ်ကြမည်ဖြစ်ပြီး အဆင့် ၂ အဖွဲ့အစည်းများပင်လျှင် ဧည့်သည်တော်အကြီးအကဲအဖြစ် မဟုတ်သော်လည်း သာမန်တပည့်တစ်ဦးအဖြစ် လက်ခံရန် အရည်အချင်းပြည့်မီပေသည်။
သူရရှိထားသော အချက်အလက်များအရ ရှောက်မျိုးနွယ်စုတွင် ကျင့်ကြံမှုအမြင့်ဆုံးပုဂ္ဂိုလ်မှာ အမြုတေဖွဲ့စည်းခြင်းအဆင့်၏ အဋ္ဌမအဆင့်ရှိသော အကြီးအကဲချုပ်ကြီးဖြစ်သော်လည်း အစီရင်ခံစာအရ သူ၏ သက်တမ်းမှာ နှစ်တစ်ရာပင် မကျန်တော့ချေ။
သူ့နောက်တွင်ရှိသော အခြားရှောက်မျိုးနွယ်ဝင်တစ်ဦးမှာ လီရှုကဲ့သို့ အမြုတေဖွဲ့စည်းခြင်းအဆင့်၏ ဆဋ္ဌမအဆင့်သို့ ရောက်ရှိနေသော လက်ရှိမျိုးနွယ်စုခေါင်းဆောင် ဖြစ်သော်လည်း လီရှုကဲ့သို့ ငယ်ရွယ်ခြင်းမရှိတော့ပေ။
မှတ်တမ်းများအရ သူသည် အသက်တစ်ထောင်ကျော်နေပြီဖြစ်၏။
သူ့အပြင် ရှောက်မျိုးနွယ်စုတွင် အမြုတေဖွဲ့စည်းခြင်းအဆင့်သို့ ရောက်ရှိထားသူ ခြောက်ဦးသာရှိပြီး အားလုံးမှာ အစောပိုင်းအဆင့်များတွင်သာ ရှိကြကာ မည်သူမျှ လီရှုကဲ့သို့ ပါရမီမျိုး မရှိကြချေ။
အပြင်လူတစ်ဦးအဖို့ လီရှုကဲ့သို့သော ပါရမီရှင်တစ်ဦးသည် ထိုကဲ့သို့သောမိသားစုမျိုးတွင် ဧည့်သည်တော်အကြီးအကဲအဖြစ် ရှိနေရသည့်အချက်မှာ ဇဝေဇဝါဖြစ်စရာပင်။
ယန်ချင်းသည်လည်း ဤမေးခွန်းကို ကိုယ့်ကိုယ်ကိုမေးမြန်းခဲ့ဖူးသော်လည်း သူမ အမြုတေဖွဲ့စည်းခြင်းအဆင့်၏ အစောပိုင်းကာလများတွင် ဒဏ်ရာရရှိခဲ့စဉ်က ထိုမိသားစု၏ အကြီးအကဲတစ်ဦးက ကူညီခဲ့ဖူးကြောင်း သိရှိသွားခဲ့သည်။
အဆိုပါအကြီးအကဲမှာ အခြေတည်အဆင့်၏ အထွတ်အထိပ်တွင်ရှိသော ဆေးလုံးဖော်စပ်သူတစ်ဦး ဖြစ်လေသည်။
သူက သူမ၏ ဒဏ်ရာများကို ကုသပေးခဲ့သဖြင့် လီရှုသည် ကျေးဇူးဆပ်လိုသောစိတ်ဖြင့် ထိုမျိုးနွယ်စုတွင် ဧည့်သည်တော်အကြီးအကဲအဖြစ် တာဝန်ထမ်းဆောင်ရန် ကမ်းလှမ်းခဲ့ခြင်းဖြစ်ပေ၏။
ရှောက်မျိုးနွယ်စုသည် အသက်ငယ်ရွယ်ပြီး အမြုတေဖွဲ့စည်းခြင်းအဆင့်၏ ပထမအဆင့်ရှိသော ကျင့်ကြံသူတစ်ဦး၏ အကူအညီကို ရရှိမည်ဖြစ်သဖြင့် အလွန်တရာ ဝမ်းသာအားရဖြင့် သဘောတူခဲ့ကြလေ၏။
သာမန်အခြေအနေမျိုးတွင် သူတို့၏ အခြေခံအုတ်မြစ်ဖြင့်ဆိုပါက လီရှုကဲ့သို့သော ပါရမီရှင်တစ်ဦးကို ဖိတ်ခေါ်နိုင်ရန် အလွန်ပင် ခက်ခဲလှ၏။
သူမ၏ အကူအညီဖြင့် သူတို့သည် အဆင့် ၄ အဖွဲ့အစည်းများထဲတွင် ထိပ်သီးအဆင့်ရှိပြီး လွတ်လပ်စွာ ရှင်သန်နိုင်သည့် ကျောက်စိမ်းစမ်းချောင်းတိုင်းပြည်၏ အုပ်ချုပ်မှုအောက်ရှိ ငြိမ်သက်မိုးမခခရိုင်၌ ခြေကုပ်ယူနိုင်ခဲ့ကြလေသည်။
တော်ဝင်မိသားစုတွင် အမြုတေဖွဲ့စည်းခြင်းအဆင့်ကျင့်ကြံသူ တစ်ရာကျော်နှင့် နန်းတော်အဆင့်နီးပါးကျင့်ကြံသူ တစ်ဆယ့်တစ်ဦးခန့်ရှိသော်လည်း ထူးဆန်းစွာပင် နန်းတော်အဆင့် ကျင့်ကြံသူတစ်ဦးမျှ မရှိချေ။
ကောလာဟလများအရ နိုင်ငံတော်တွင် နန်းတော်အဆင့်ကျင့်ကြံသူ မရှိရခြင်းမှာ အင်အားကြီးမားသော ကျင့်ကြံသူတစ်ဦးအား စိတ်အနှောင့်အယှက်ဖြစ်စေခဲ့သောကြောင့်ဖြစ်ပြီး ထိုအချိန်မှစ၍ တော်ဝင်မိသားစုမှ ထွက်ပေါ်လာသမျှ နန်းတော်အဆင့်ကျင့်ကြံသူတိုင်းမှာ နားမလည်နိုင်သော နည်းလမ်းများဖြင့် သေဆုံးခဲ့ကြရကြောင်း ပြောစမှတ်ပြုကြ၏။
ထို့ကြောင့် တော်ဝင်မိသားစုမှ မည်သူမျှ နန်းတော်အဆင့်သို့ ချိုးဖျက်ဝင်ရောက်ရန် မဝံ့ရဲကြတော့ဘဲ နိုင်ငံတော်ကို အဓိကအုပ်ချုပ်သူများအဖြစ် ဆက်လက်ထိန်းသိမ်းထားလိုသဖြင့် လက်အောက်ရှိ မှူးမတ်မျိုးနွယ်စုများကိုလည်း ကန့်သတ်ထားကာ အခြားအဖွဲ့အစည်းများကို သူတို့၏ နယ်မြေအတွင်း လွတ်လပ်စွာ အခြေချခွင့်ပေး၍ အရင်းအမြစ်များအတွက် ပြိုင်ဆိုင်စေခဲ့ကြ၏။
ငြိမ်သက်မိုးမခခရိုင်သည် အဖွဲ့အစည်းအားလုံး ရောနှောနေထိုင်နိုင်သည့် တံခါးဖွင့်ဝါဒကျင့်သုံးသော နယ်မြေများထဲမှ တစ်ခုဖြစ်ပြီး ရှောက်မျိုးနွယ်စုမှာ ထိုနေရာတွင် အခြေချထားသော ကျင့်ကြံခြင်းမိသားစုများထဲမှ တစ်ခုမျှသာဖြစ်ကာ ရွှေဘဲဟင်းလျာစားသောက်ဆိုင်သည်လည်း ထိုခရိုင်အတွင်း အဓိကဆိုင်ခွဲတစ်ခု ဖွင့်လှစ်ထားခဲ့၏။
ထိုကဲ့သို့သောနေရာမျိုးတွင် ရှင်သန်နိုင်ရန် လီရှု၏ အကူအညီမှာ အလွန်ပင် အသုံးဝင်ခဲ့ပြီး သူမအား ကူညီခဲ့ဖူးသော အကြီးအကဲသည် အသက်ကြီးရင့်၍ သေဆုံးသွားခဲ့သည့်တိုင် သူမသည် ရှောက်မျိုးနွယ်စုကို ဆိုင်းလန့်ဝီလိုခရိုင်၌ ခြေကုပ်ခိုင်မာစေရန် ဆက်လက်ကူညီပေးခဲ့ပေ၏။
သို့သော် သူမ ဆေးလုံးဆိပ်သင့်ပြီး ရွှေဘဲဟင်းလျာစားသောက်ဆိုင်နှင့် အမှုအခင်းဖြစ်ပွားလာသောအခါတွင်မူ ထိုသူတို့သည် သူမနှင့် ပတ်သက်မှုများကို ဖြတ်တောက်လိုက်ကြပုံရ၏။
သူဖတ်ရှုခဲ့ရသမျှအရ ဆေးကုသစရိတ်များနှင့် ပတ်သက်၍ပင် သူတို့သည် ကုသစရိတ်တစ်ခုလုံးကို မကာမိနိုင်သော ပိုက်ဆံအနည်းငယ်မျှသာ ကူညီပေးခဲ့ကြသဖြင့် သူမအနေဖြင့် နောင်ကျင့်ကြံခြင်းခရီးလမ်း ရပ်တန့်မသွားစေရန်အတွက် ရွှေဘဲဟင်းလျာစားသောက်ဆိုင်ထံမှ လျော်ကြေးရရှိရန် တရားရုံးသို့ တိုင်တန်းရခြင်းဖြစ်ပေ၏။
ကျင့်ကြံသူတစ်ဦး၏ ခရီးလမ်းကို ဟန့်တားနှောင့်ယှက်ရာတွင် ဆေးလုံးဆိပ်သင့်ခြင်းမှာ အတွင်းဒဏ်ရာများကဲ့သို့ပင် အလွန်အန္တရာယ်များလှ၏။
ဖယ်ရှားခြင်းမပြုလျှင် အချိန်ကြာလာသည်နှင့်အမျှ ၎င်းသည် ချီစီးဆင်းမှုကို ထိခိုက်စေပြီး သွေးကြောများနှင့် ကိုယ်တွင်းအင်္ဂါများထဲသို့ စိမ့်ဝင်ကာ ကျင့်ကြံသူ၏ ခန္ဓာကိုယ်ကို တဖြည်းဖြည်း တိုက်စားသွားမည်ဖြစ်ပြီး တိုက်စားမှုတိုင်းတွင် နောက်ဆက်တွဲဆိုးကျိုးများကို ပိုမိုတိုးပွားစေလိမ့်မည်ဖြစ်၏။
ခန္ဓာကိုယ်အတွင်း အချိန်ကြာကြာရှိနေလေလေ၊ အန္တရာယ် ပိုကြီးမားလေလေဖြစ်၏။
အဘယ်ကြောင့်ဆိုသော် ခန္ဓာကိုယ်အတွင်း စုပုံနေသော ဆေးလုံးများက ကမ္ဘာမြေပေါ်ရှိ မည်သည့်အရာများနှင့် တုံ့ပြန်မှုဖြစ်ပွားပြီး ကျင့်ကြံသူ၏ အခြေခံအုတ်မြစ်ကို ထာဝရပျက်စီးစေခြင်းကဲ့သို့သော ပြန်လည်မပြင်ဆင်နိုင်သည့် ထိခိုက်မှုများ ဖြစ်လာစေမည်ကို မည်သူမျှ မသိနိုင်သောကြောင့်ဖြစ်၏။
အမြုတေဖွဲ့စည်းခြင်းအဆင့်၏ ဆဋ္ဌမအဆင့်ရှိသော ကျင့်ကြံသူတစ်ဦးအတွက် ဆေးလုံးဆိပ်သင့်မှုကို အပြီးသတ်ဖယ်ရှားပြီး ပြန်လည်ကောင်းမွန်လာစေရန်မှာ အပြာရောင်အဆင့်ရှိသော ဆေးဆရာ သို့မဟုတ် ဆေးလုံးဖော်စပ်သူတစ်ဦး၏ အကူအညီလိုအပ်ပြီး ထိုကဲ့သို့သောပုဂ္ဂိုလ်၏ အကူအညီကို ရယူရန်မှာလည်း စရိတ်အလွန်ကြီးမား၏။
ထို့ကြောင့်ပင် လီရှုသည် နန်းတော်အဆင့်ကျင့်ကြံသူတစ်ဦးအား ရန်စမိမည့် အန္တရာယ်နှင့် နောက်ဆက်တွဲဆိုးကျိုးများကို သိရှိပါသော်လည်း တရားစွဲဆိုရန် နောက်တွန့်မနေခဲ့ခြင်း ဖြစ်ပေလိမ့်မည်။
သူမသည် တစ်ဖက်တွင် သူမ၏ ကျင့်ကြံခြင်းခရီးလမ်း၏ ကံကြမ္မာကို ဆုပ်ကိုင်ထားရပြီး အခြားတစ်ဖက်တွင်မူ နန်းတော်အဆင့်ကျင့်ကြံသူတစ်ဦးအား ရန်သူအဖြစ် ရင်ဆိုင်နေရကာ နောက်ကျောတွင်မူ ဓားဖြင့်ထိုးရန်ပြင်နေသော မျိုးနွယ်စုတစ်ခု ရှိနေခဲ့လေသည်။
ယန်ချင်းသည် ဘက်မလိုက်ဘဲ တရားမျှတစွာ ဆောင်ရွက်ရမည်ဖြစ်သော်လည်း သူမ၏ ကံကြမ္မာဆိုးအပေါ် ကိုယ်ချင်းစာစိတ်မဖြစ်ဘဲ မနေနိုင်ခဲ့ချေ။
...
လီရှုက သူမ၏ စိတ်ခံစားချက်များကို အမြန်ဆုံး ပြန်လည်ထိန်းချုပ်လိုက်ပြီး ဆက်လက်ပြောကြားလေ၏။
"ကျွန်မက လှံအသုံးပြုတာနဲ့ အစားစားတာကလွဲရင် တခြားအရာတွေမှာ သိပ်ပြီး အရည်အချင်းမရှိပါဘူး၊ ရိုးရိုးသားသားပြောရရင်တော့ လှံကိုင်ရတာထက် စားရတာကို ပိုသဘောကျတယ်”
ထိုသို့ပြောလိုက်စဉ်တွင် သူမ၏ မျက်လုံးများထဲ၌ အစားမက်သော အရိပ်အယောင်များ ဖြတ်ပြေးသွားခဲ့ပြီး တစ်ချိန်တည်းမှာပင် ယန်ချင်း၏ မျက်လုံးများထဲတွင်လည်း နေ့လယ်စာအတွက် မည်သည်ကိုစားရမည့်အကြောင်း တွေးတောနေသည့် ထပ်တူကျသော အရိပ်အယောင်တစ်ခု ဖြတ်ပြေးသွားခဲ့လေ၏။
'သူက ငါနဲ့ တူတာပဲ’
'သူမက ငါနဲ့ တူတာပဲ’
ထိုအခိုက်အတန့်တွင် သူတို့နှစ်ဦးလုံးသည် အခြားတစ်ဦး၏ အစားမက်သော စိတ်ဝိညာဉ်များကို အာရုံခံမိသွားကြလေ၏။