အခန်း ၂၄၂
Vol. 25 Ch. 242
အခန်း (၂၄၂) ဖြေရှင်းချက်
ဟွမ်ဖူမြစ်ပေါ်ရှိ ဧရာမပေါက်ကွဲမှုကြီးက ပျားအုံကို တုတ်နှင့်ထိုးလိုက်သကဲ့သို့ ဖြစ်သွားစေပြီး အနီးနားရှိ ဂျပန်မြေပြင်တပ်ဖွဲ့များကို ချက်ချင်း ကမောက်ကမဖြစ်သွားစေလေသည်။
မရေမတွက်နိုင်သော စစ်သားများနှင့် ယာဉ်များက ကယ်ဆယ်ရေး သို့မဟုတ် ကာကွယ်ရေးလုပ်ငန်းများ လုပ်ဆောင်ရန် ရည်ရွယ်ချက်ဖြင့် သင်္ဘောကျင်းများနှင့် မြစ်ကမ်းပါးများဆီသို့ အပြေးအလွှား ရောက်လာခဲ့ကြသည်။
သို့သော်လည်း သူတို့ အပြေးအလွှား စုရုံးကာ ယာဉ်တန်းက မြစ်ကမ်းပါးဆီသို့ ထွက်ခွာသွားချိန်မှာပင် သေမင်း၏ တီးတိုးစကားသံကဲ့သို့ ထူးဆန်းသော တဝီဝီမြည်သံတစ်ခုက ညကောင်းကင်ယံမှ ရုတ်တရက် ထွက်ပေါ်လာ၏။
“အဲဒါ ဘာအသံလဲ...” ဂျပန်တပ်ကြပ်ကြီးတစ်ဦးက သတိထားကာ ခေါင်းမော့ကြည့်လိုက်၏။
စကားပင် မဆုံးလိုက်ခင်မှာပဲ တစ္ဆေများကဲ့သို့ မည်းမှောင်နေသော ပုံရိပ်ဒါဇင်ပေါင်းများစွာက ကောင်းကင်မှ ထိုးဆင်းလာကာ သူတို့၏ အမြန်နှုန်းမှာ အံ့မခန်းပင်။
၎င်းတို့က ဂျပန်စစ်ကူများ အများဆုံးစုဝေးရာ နေရာများဖြစ်သော စစ်သားများ အပြည့်တင်ဆောင်ထားသည့် ထရပ်ကားများ၊ အမြောက်များဆွဲလာသည့် ထွန်စက်များနှင့် ထိတ်လန့်တကြားဖြစ်နေသော ခြေလျင်တပ်ဖွဲ့များကို တိကျစွာ ပစ်မှတ်ထားလေသည်။
“ဒိုင်း... ဝုန်း...”
ပထမဆုံး ဖုန်း-၁၇ ဒရုန်းသည် တိကျသော ခွဲစိတ်ဓားတစ်ချောင်းကဲ့သို့ ထရပ်ကားတစ်စီး၏ ယာဉ်မောင်းခန်းထဲသို့ တိုက်ရိုက် ထိုးဖောက်ဝင်ရောက်သွားလေသည်။ နောက်ခဏ၌ ပြင်းထန်သော ပေါက်ကွဲမှုက ထရပ်ကားကို မီးလောင်နေသော သံခေါင်းတလားအဖြစ်သို့ ချက်ချင်းပြောင်းလဲသွားစေပြီး အနီးနားရှိ စစ်သားများက ကျည်စများနှင့် ပေါက်ကွဲမှုလှိုင်းများကြောင့် လွင့်စင်သွားကြရသည်။
“ရန်သူ့တိုက်ခိုက်မှု... လေယာဉ်တွေ... အကာအကွယ်ယူကြ...” ဂျပန်အရာရှိတစ်ဦးက အက်ကွဲသောအသံဖြင့် အော်ဟစ်လိုက်၏။
စစ်သားများက သူတို့၏ ရိုင်ဖယ်များနှင့် အပေါ့စား စက်သေနတ်များကို ရူးသွပ်စွာ မြှောက်ကာ ညကောင်းကင်ယံသို့ ရမ်းသန်းပစ်ခတ်လိုက်ကြသည်။
သို့သော် ဒရုန်းများ၏ တိုက်ခိုက်မှုပုံစံများက သူတို့၏ နားလည်နိုင်စွမ်းထက် လုံးဝကျော်လွန်နေလေသည်။
ဤသေမင်းတမန်အုပ်စုက ကျဲပါးလှသော လေယာဉ်ပစ်လက်နက်များ၏ ပစ်ခတ်မှုကို လုံးဝ လျစ်လျူရှုထားကြသည်။ သူတို့က ကျည်ဆန်များ၏ လမ်းကြောင်းကို ကျွမ်းကျင်စွာ ရှောင်တိမ်းကာ တစ်ခါတစ်ရံ မြေပြင်နှင့် ကပ်၍ ပျံသန်းပြီး တစ်ခါတစ်ရံ လျင်မြန်စွာ အပေါ်သို့ ပျံတက်ကာ ဒေါင်လိုက်နီးပါး ထောင့်ချိုးဖြင့် ပြန်လည် ထိုးဆင်းလာကြခဲ့သည်။
“ဝုန်း...”
နောက်ထပ် ဒရုန်းတစ်စင်းက ခဲယမ်းမီးကျောက် နောက်တွဲယာဉ်တစ်စီးကို ဝင်တိုက်မိရာမှ ကပ်ဆိုးကြီးတစ်ခုကဲ့သို့ ဆက်တိုက်ပေါက်ကွဲမှုများ ဖြစ်ပေါ်စေခဲ့သည်။
မီးတောက်များက ကောင်းကင်သို့ ထိုးတက်သွားပြီး ပတ်ဝန်းကျင်ကို နေ့လယ်ခင်းကဲ့သို့ လင်းထိန်သွားစေကာ ပြတ်တောက်သွားသော ကိုယ်လက်အင်္ဂါများနှင့် လက်နက်အစိတ်အပိုင်းများ နေရာအနှံ့ လွင့်စဉ်သွားချေသည်။
“ဘာကာ... ငါ ပစ်ချလို့ မရဘူး...” စက်သေနတ်သမားက စိတ်ပျက်လက်ပျက်ဖြင့် အော်ဟစ်လိုက်၏။ သူ၏ ကျည်ဆန်များက အမြဲတမ်း နောက်ကျနေတတ်ပြီး ခန့်မှန်းရခက်သော လမ်းကြောင်းများဖြင့် လျင်မြန်စွာ ရွေ့လျားနေသည့် ထိုပစ်မှတ်ငယ်လေးများကို မချိန်ရွယ်နိုင်ခဲ့ချေ။
ဒရုန်းအုပ်စုက ဂျပန်တပ်ဖွဲ့များကြားတွင် လွတ်လပ်စွာ လှုပ်ရှားနေပြီး ပေါက်ကွဲမှုတိုင်းက အသက်များကို နုတ်ယူသွားကာ မြစ်ကမ်းပါးသို့သွားမည့် ဂျပန်စစ်ကူများကို ထိရောက်စွာ ဟန့်တားနိုင်ခဲ့ပြီး ကြီးမားသော ထိတ်လန့်မှုနှင့် သေဆုံးဒဏ်ရာရမှုများကို ဖြစ်စေခဲ့သည်။
ထိုစဉ် ဂျပန်စစ်ကြောင်းများ၏ အနောက်ဘက်တွင် နောက်ထပ် တိတ်ဆိတ်သော ဖျက်ဆီးမှုတစ်ခု ဖြစ်ပေါ်နေခဲ့သည်။
အဝေးထိန်းစနစ်ဖြင့် ကွပ်ကဲသော နောက်ထပ် ဒရုန်းတစ်စုက ၎င်းတို့၏ ထောက်လှမ်းရခက်ခဲမှုနှင့် သာလွန်ကောင်းမွန်သော ထိုးဖောက်ဝင်ရောက်နိုင်စွမ်းတို့ကြောင့် ရန်ရှုဖူနှင့် အခြားနေရာများရှိ ဂျပန်တို့ ထိန်းချုပ်ထားသော အရေးကြီးသည့် ဂိုဒေါင်များနှင့် ခဲယမ်းမီးကျောက်သိုလှောင်ရုံများအပေါ်သို့ တိတ်တဆိတ် ပျံသန်းရောက်ရှိနေပြီဖြစ်၏။
ရှေ့တန်း စောင့်ကြည့်ရေးအဖွဲ့မှ ပြန်လည်ပေးပို့သော တိကျသည့် နေရာပြဩဒိနိတ်များနှင့် အချိန်နှင့်တပြေးညီ ပုံရိပ်များကြောင့် ဤဒရုန်းများက မျက်စိပါသကဲ့သို့ သူတို့၏ ပစ်မှတ်များဆီသို့ တိကျစွာ ထိုးဆင်းသွားကြခေသည်။
“ပစ်မှတ် အတည်ပြုပြီးပါပြီ... ဂိုဒေါင် အမှတ် ၃... ဂျပန်ခြေလျင်တပ် ခဲယမ်း သိုလှောင်ရုံ ဖြစ်ပါတယ်...”
“ချိန်ရွယ်ထားလိုက်.....တိုက်ခိုက်။”
ဒရုန်းတစ်စင်းက ဥက္ကာပျံတစ်လုံးကဲ့သို့ ဂိုဒေါင်ခေါင်မိုး၏ အားနည်းသောနေရာကို ဖောက်ထွင်းကာ အတွင်းပိုင်းသို့ ဝင်ရောက်သွားပြီး ပြင်းထန်စွာ ပေါက်ကွဲသွားလေသည်။
ချက်ချင်းပင် ဂိုဒေါင်တစ်ခုလုံး အတွင်းပိုင်းမှ ပေါက်ကွဲသွားခဲ့သည်။ ခဲယမ်းများ ပေါက်ကွဲသည့် တဖြောက်ဖြောက် မြည်သံများနှင့်အတူ ဧရာမ မီးလုံးကြီးတစ်ခုက ကောင်းကင်သို့ ထိုးတက်သွားပြီး ညကောင်းကင်ယံကို နေ့လယ်ခင်းကဲ့သို့ လင်းထိန်သွားစေခဲ့သည်။
“ပစ်မှတ် အတည်ပြုပြီးပါပြီ.... လဟာပြင် အမြောက်ဆန်သိုလှောင်ရာ နေရာ။”
“တိုက်ခိုက်...”
ဒရုန်းအများအပြားက အစဉ်လိုက် ထိုးဆင်းလာပြီး သူတို့၏ ပေါက်ကွဲစေတတ်သော အရာများကို ခဲယမ်းပုံထဲသို့ တိကျစွာ ပစ်ချခဲ့ကြသည်။
နားကွဲမတတ် ဆက်တိုက်ပေါက်ကွဲမှုများ တစ်ခုပြီးတစ်ခု ဖြစ်ပေါ်လာပြီး ငလျင်လှုပ်သကဲ့သို့ မြေကြီးမှာ ပြင်းထန်စွာ တုန်ခါသွားကာ တန်ဖိုးကြီး အမြောက်ဆန်များနှင့် ပေါက်ကွဲစေတတ်သော ယမ်းများမှာ မီးတောက်များထဲတွင် သတ္တုအပိုင်းအစများအဖြစ်သို့ ပြောင်းလဲသွားချေသည်။
ဂျပန်တပ်စခန်းက ဤသေမင်းတမန် ပျံသန်းနေသော အင်းဆက်ငယ်လေးများကို တွေ့ရှိသွားပြီး ထိတ်လန့်တကြားဖြင့် သူတို့၏ အပေါ့စား လက်နက်အားလုံးကို အသုံးပြုကာ ပစ်ခတ်ကြပြီး လေယာဉ်ပစ် စက်သေနတ်များကိုပင် ယူဆောင်လာခဲ့ကြသည်။
သို့သော်လည်း ဒရုန်းများ၏ အလွန်နိမ့်သော ပျံသန်းမှုအမြင့်... အရွယ်အစား သေးငယ်မှုနှင့် ခန့်မှန်းရခက်သော ပျံသန်းမှုလမ်းကြောင်းတို့ကြောင့် လေကြောင်းရန်ကာကွယ်ရေး ပစ်ခတ်မှုများမှာ အများအားဖြင့် အရာမရောက်ခဲ့ချေ။
များသောအားဖြင့် ကျည်ဆန်များက သူတို့၏ နောက်ကွယ်မှ လိုက်နေချိန်မှာပင် သူတို့က နောက်ထပ် တန်ဖိုးဖြတ်မရသော ပစ်မှတ်တစ်ခုဆီသို့ ဦးခေါင်းစိုက်ကာ ဝင်ရောက်သွားပြီးဖြစ်၏။
ပေါက်ကွဲသံများ တစ်ခုပြီးတစ်ခု ပဲ့တင်ထပ်နေပြီး ရှန်ဟိုင်းမြောက်ပိုင်း ညကောင်းကင်ယံတစ်ခွင်တွင် မီးတောက်များ ပြန့်ကျဲနေချေသည်။
ဂျပန်စစ်တပ်၏ ထောက်ပံ့ရေးစနစ်က အတိုင်းအတာတစ်ခုအထိ လျှော့ချပစ်သည့် တိုက်ခိုက်မှုမျိုးကဲ့သို့ အနာဂတ်မှ လာသော တိကျသည့် ဖျက်ဆီးမှုကို ခံစားနေရခေသည်။
ထိုညတွင် သေမင်းတမန် ပျားအုပ်ကြီးက ဟွမ်ဖူမြစ်ကမ်းနှစ်ဖက်စလုံးကို တိုက်ခတ်သွားပြီး ဂျပန်စစ်တပ်၏ စစ်ကူများကို သွေးနှင့် မီးများဖြင့် ပိတ်ဆို့ကာ သူတို့၏ နောက်တန်းရှိ စစ်ရေးအလားအလာများကို လျင်မြန်စွာ လောင်ကျွမ်းဖျက်ဆီးပစ်ခဲ့သည်။
ဒရုန်းအုပ်စု၏ သေမင်းတမန် တိုက်ခိုက်မှုအပြီးတွင် ဂျပန်တို့၏ စစ်ကူလမ်းကြောင်းများနှင့် ကွပ်ကဲမှုစနစ်တို့မှာ မီးတောက်များနှင့် ကမောက်ကမဖြစ်မှုများထဲတွင် နစ်မြုပ်သွားချေသည်။
မူလက ကြောက်မက်ဖွယ်ကောင်းသော စစ်ကူများက ဗုံးကြဲတိုက်ခိုက်မှုကြောင့် အကြီးအကျယ် ပျက်စီးသွားရသည်။ အသက်ရှင်ကျန်ရစ်သော ဂျပန်စစ်သားများဟာ တုန်လှုပ်နေဆဲဖြစ်ပြီး သူတို့၏ အဖွဲ့အစည်းမှာလည်း ပြိုကွဲသွားကာ မည်သည့် ထိရောက်သော ခုခံမှုကိုမျှ မပြုလုပ်နိုင်ကြတော့ချေ။
“ညီအစ်ကိုတို့... တိုက်ခိုက်ကြ... အရေးနိမ့်နေတဲ့ ခွေးကို ရိုက်ရမယ့် အချိန်ရောက်ပြီဟေ့.....”
တရုတ်စစ်တပ်တပ်မှူး၏ အမိန့်နှင့်အတူ တိုက်ပွဲဝင်ရန် စိတ်အားထက်သန်နေပြီး လက်နက်သစ်များ တပ်ဆင်ထားသော မြေပြင်တပ်ဖွဲ့များက ဖရိုဖရဲဖြစ်နေသော ဂျပန်စစ်တပ်ကို အကြီးအကျယ် တန်ပြန်တိုက်ခိုက်ခဲ့ကြသည်။
AK-47 ချေမှုန်းရေးရိုင်ဖယ်များမှ ပစ်ခတ်လိုက်သော ကျည်ဆန်များက ပဲလှော်ပေါက်သကဲ့သို့ဖြစ်ပြီး ပစ်ခတ်မှုအားက ဂျပန်တို့၏ တိုက်-၃၈ ရိုင်ဖယ်များမှ ဟိုတစ်စဒီတစ်စ ပြန်လည်ပစ်ခတ်မှုများကို ချက်ချင်း လွှမ်းမိုးသွားခဲ့သည်။
အာပီဒီ အပေါ့စား စက်သေနတ်များက မီးများ မှုတ်ထုတ်နေပြီး ချီတက်လာသော ခြေလျင်တပ်များအတွက် အားကောင်းသော အကာအကွယ်ပေး ပစ်ခတ်မှုများကို ထောက်ပံ့ပေးနေချေသည်။
အာပီဂျီ-၇ ကို မည်သို့ အသုံးပြုရမည်ကို ယခုမှ သင်ယူထားသော စစ်သားများက ဂျပန်စစ်တပ်၏ ယာယီကတုတ်ကျင်းများနှင့် အသက်ရှင်ကျန်ရစ်သော သံချပ်ကာယာဉ်များကို ဒုံးကျည်များဖြင့် စိတ်လှုပ်ရှားစွာ ပစ်ခတ်ကြပြီး ပေါက်ကွဲမှုတိုင်းက အောင်ပွဲခံ အော်ဟစ်သံများကို ထွက်ပေါ်လာစေ၏။
ဂျပန်စစ်တပ်က တိုက်ခိုက်လိုစိတ် လုံးဝ ပျောက်ဆုံးသွားခဲ့လေသည်။
ဤမျှ ပြင်းထန်ပြီး တိကျသော ပစ်ခတ်မှုမျိုးကို သူတို့ တစ်ခါမှ မကြုံဖူးခဲ့ဘဲ သူတို့၏ စိတ်ပိုင်းဆိုင်ရာ ကာကွယ်မှုများက မြစ်ပေါ်ရှိ ရေတပ်နှင့် အနောက်ဘက်ရှိ ဂိုဒေါင်များနှင့်အတူ ကြာမြင့်စွာကတည်းက ပြိုလဲသွားခဲ့ပြီဖြစ်၏။
ဂျပန်စစ်သားများ ထိတ်လန့်သွားကြသည်။ အချို့က ဒူးထောက်ကာ လက်နက်ချကြပြီး အချို့ကမူ သူတို့၏ လက်နက်ကိရိယာများကို စွန့်ပစ်ကာ ထိတ်လန့်တကြား ထွက်ပြေးကြသော်လည်း လိုက်လံပစ်ခတ်နေသော ကျည်ဆန်များကြောင့် လဲကျသွားကြရသည်။
အမည်ခံ ကာကွယ်ရေးခံစစ်မျဉ်းက ပထမဆုံး အထိအတွေ့မှာပင် ပြိုကျသွားပြီး တဖြည်းဖြည်း နောက်ဆုတ်သွားကာ မည်သည့် ထိရောက်သော အတားအဆီးကိုမျှ မဖွဲ့စည်းနိုင်တော့ချေ။
ဤအလွန် ကမောက်ကမဖြစ်နေသည့် အခြေအနေကြားတွင် အထူးစစ်ဆင်ရေးအဖွဲ့တစ်ခုက ပင်မ စစ်မြေပြင်မှ တစ္ဆေများကဲ့သို့ ခိုးထွက်သွားကြပြီး သူတို့၏ ရည်မှန်းချက်မှာ သိသိသာသာ ရှင်းလင်းနေချေသည်။
အဆင့်အမြင့်ဆုံး ဂျပန်စစ်တပ်တပ်မှူးမှာ မက်ဆိုအီဝါနဲ ဖြစ်သည်။
ဒရုန်းမှ ပြန်လည်ပေးပို့သော နောက်ဆုံးပုံရိပ်များနှင့် ရှေ့တန်း စောင့်ကြည့်ရေးသမားများ၏ လမ်းညွှန်မှုကို အသုံးပြုကာ မက်ဆိုအီ ကွပ်ကဲမှုစခန်း ပြောင်းရွှေ့သွားနိုင်သည့် ဖြစ်နိုင်ခြေရှိသော နေရာအချို့ကို သူတို့ တိကျစွာ ထောက်ပြနိုင်ခဲ့ကြသည်။
ခေါင်းဖြတ်အဖွဲ့ဝင်များက ညကြည့်ကိရိယာများနှင့် အသံတိတ်လက်နက်များကို အသုံးပြုကာ ပြန့်ကျဲနေသော ဂျပန်ကင်းစောင့်များနှင့် သက်တော်စောင့်များကို တိတ်တဆိတ် ရှင်းလင်းရင်း လျှပ်စီးလက်သကဲ့သို့ အမြန်နှုန်း၊ ပြီးပြည့်စုံသော အဖွဲ့လိုက်လုပ်ဆောင်မှုတို့ဖြင့် လှုပ်ရှားလိုက်ကြသည်။
နောက်ဆုံးတွင် သူတို့ဟာ ယာယီသိမ်းပိုက်ထားပြီး အတော်အသင့် ခိုင်ခံ့သော မြေအောက်ခန်းတစ်ခု၏ ဝင်ပေါက်အပြင်ဘက်၌ ထူးထူးခြားခြား တင်းကျပ်သော လုံခြုံရေးနှင့် ဆက်သွယ်ရေး အင်တင်နာများကို တွေ့ရှိခဲ့ကြသည်။
“ပစ်မှတ်က ဒီမှာဖြစ်နိုင်တယ်....” အရိပ်က သူ၏ နားကြပ်ထဲသို့ တီးတိုးပြောလိုက်၏။
ထို့နောက် တုံ့ဆိုင်းနေခြင်းမရှိဘဲ တိုက်ခိုက်မှုကို ချက်ချင်း စတင်လိုက်လေသည်။
အလင်းဗုံးများနှင့် မီးခိုးဗုံးများကို ဦးစွာ ပစ်သွင်းလိုက်ပြီး ပြင်းထန်သော ပေါက်ကွဲမှုများနှင့် မျက်စိကျိန်းမတတ် အဖြူရောင်အလင်းတန်းများက ကာကွယ်နေသော ဂျပန်စစ်သားများကို ချက်ချင်း မျက်ကန်း၊ နားကန်း ဖြစ်သွားစေခေသည်။
ထိုအချိန်ကို အခွင့်ကောင်းယူကာ အထူးတပ်ဖွဲ့ဝင် စစ်သားများက လျှပ်စီးကဲ့သို့ ဝင်ရောက်တိုက်ခိုက်ကြပြီး သူတို့၏ အလိုအလျောက် လက်နက်များက တိကျသော အတိုချုံးပစ်ခတ်မှုများ ပြုလုပ်ကာ ခုခံရန် ကြိုးစားသော အစောင့်တိုင်းကို လျင်မြန်စွာ ရှင်းလင်းပစ်လိုက်၏။
ထို့နောက် အတွင်းခန်းတံခါးကို အသံမထွက်ဘဲ ကန်ဖွင့်လိုက်လေသည်။
အခန်းထဲတွင် မက်ဆိုအီဝါနဲက ဒေါသထွက်နေသော မျက်နှာဖြင့် ရေဒီယိုကို အော်ဟစ်နေပြီး စစ်ဦးစီးအရာရှိအများအပြားက သူတို့၏ သေနတ်များကို ထုတ်ရန် အသည်းအသန် ကြိုးစားနေကြ၏။
သို့သော် နောက်ကျသွားခဲ့ပြီဖြစ်သည်။
စနိုက်ပါရိုင်ဖယ်က အရင်ပစ်လိုက်ပြီး ကျည်ဆန်က မက်ဆိုအီအား ကာကွယ်ရန် ကြိုးစားနေသည့် စစ်ဦးစီးချုပ်၏ ခေါင်းကို တိကျစွာ ဖောက်ဝင်သွားခဲ့သည်။
တစ်ချိန်တည်းမှာပင် တိတ်ဆိတ်ခြင်းနှင့် အခြားအဖွဲ့ဝင်တစ်ဦးတို့က သူတို့၏ ချေမှုန်းရေးရိုင်ဖယ်များမှ ဆက်တိုက်ပစ်ခတ်လိုက်ရာ အခြားသော စစ်ဦးစီးအရာရှိ အများအပြားကို လဲကျသွားကြလေသည်။
မက်ဆိုအီအီဝါနဲသည် ရုတ်တရက် လှည့်ကြည့်လိုက်ရာ သူ၏ မျက်နှာတွင် တုန်လှုပ်မှု၊ ဒေါသနှင့် မယုံကြည်နိုင်မှုတို့ ပြည့်နှက်နေပြီး သူ၏လက်က ခါးရှိ သေနတ်ဆီသို့ လှမ်းသွားချိန်သာ ရှိသေး၏။
...
ထို့နောက်တွင်တော့ နောက်ကျသွားခဲ့ပြီဖြစ်သည်။
ထိုသူသည် တဖြည်းဖြည်း လဲကျသွားခဲ့ချေသည်...
တောက်ပသော သွေးနီရဲရဲများက ဖြည်းညင်းစွာ စီးကျလာ၏...
အခန်း ၂၄၂ပြီး၏။