အခန်း ၂၇၆
Vol. 28 Ch. 276
အခန်း (၂၇၆) ရုပ်ရှင်ပြသခြင်း
စစ်သူကြီးကောရှင်းသည် ကျန်းယဲ့အား ဂိုဒေါင်ဆီသို့ ခေါ်ဆောင်သွားပြီး လေးလံသော ဂိုဒေါင်တံခါးကြီးကို တွန်းဖွင့်လိုက်၏။
ပြီးခဲ့သည့်အကြိမ် သူတို့ ထွက်ခွာသွားစဉ်က အပြည့်အမောက် ရှိနေခဲ့သော ဂိုဒေါင်ကြီးမှာ ယခုအခါ အများစုမှာ ဟာလာဟင်းလင်းဖြစ်နေပြီး ထူးထူးခြားခြား ကျယ်ဝန်းကာ ခြောက်ကပ်နေချေသည်။
စစ်သူကြီးအိုက "တချို့ကိုတော့ တိဘက်တွေကို ခုခံဖို့ သုံးလိုက်ရတယ်။ အများစုကိုတော့ ပေ့ထင်ဆီ ပို့လိုက်တယ်" ဟု ပြောလေသည်။
ကျန်းယဲ့သည် တိတ်ဆိတ်စွာ ခေါင်းညိတ်လိုက်ပြီး ဘာမျှ ထပ်မပြောတော့ချေ။
သူ၏ စိတ်ထဲတွင် လျင်မြန်စွာ စဉ်းစားလိုက်ပြီး ဂိုဒေါင်အတွင်းရှိ ရှိရင်းစွဲ ခွဲခြားထားသော နေရာများအပေါ် အခြေခံကာ စနစ်၏ အွန်လိုင်းစတိုးမှ သက်ဆိုင်ရာ ထောက်ပံ့ရေးပစ္စည်းများကို စတင် ထုတ်ယူလိုက်၏။
ဆန်အိတ်များ၊ ဆေးသေတ္တာများ၊ အသစ်စက်စက် ဓားများနှင့် မြားအစည်းများ၊ သေချာစွာ ပိတ်လှောင်ထားသော ယမ်းစည်များ...
မျက်လှည့်ပြလိုက်သကဲ့သို့ ထိုဟာလာဟင်းလင်းဖြစ်နေသော နေရာများတွင် လျင်မြန်စွာ ပြည့်နှက်သွားလေသည်။
မကြာမီမှာပင် ယခင်က ဟာလာဟင်းလင်းဖြစ်နေသော ဂိုဒေါင်ကြီးမှာ ပြန်လည်ပြည့်နှက်သွားပြီး အရင်ကထက်ပင် ပိုမို ပြည့်ကျပ်သွားခဲ့သည်။
သူတို့နှစ်ဦး စောင့်ရှောက်ရေးနယ်မြေ အဆောက်အအုံ၏ အရှေ့ဘက်ခြံဝင်းသို့ ပြန်ရောက်လာသောအခါ အန်းရှီးစစ်သည်အများအပြားက ထိုနေရာတွင် စုရုံးနေကြသည်ကို တွေ့လိုက်ရ၏။
ကျန်းယဲ့ ထွက်လာသည်ကို မြင်သည်နှင့် တစ်ပြိုင်နက် သူတို့အားလုံး၏ မျက်လုံးများမှာ သူ့ထံသို့ ချက်ချင်း ရောက်ရှိသွားပြီး အလွန်အမင်း စိတ်အားထက်သန်ပြီး ပြင်းပြသော မျှော်လင့်ချက်များ ပြည့်နှက်နေသဖြင့် ကျန်းယဲ့မှာ လုံးဝ ဇဝေဇဝါ ဖြစ်သွားရ၏။
ထိုအချိန်တွင် ရှီမော့က လူအုပ်ထဲမှ ပြုံးလျက် ထွက်လာပြီး ကျန်းယဲ့အား ရှင်းပြလိုက်၏။ "ညွှန်ကြားရေးမှူးကျန်း... ကောင်းကျွင်းတို့က အခုလေးတင် အန်းရှီးတပ်ဖွဲ့က ညီအစ်ကိုတွေနဲ့ စကားပြောရင်း အနာဂတ်က ငါတို့ရဲ့ စစ်သားတွေ ဘယ်လိုတိုက်ပွဲဝင်ကြလဲဆိုတာကို သူတို့ မြင်တွေ့နိုင်အောင် ညွှန်ကြားရေးမှူးကျန်းက ရုပ်ရှင်တစ်ကားလောက် ပြပေးနိုင်မလား ဆိုပြီး ပြောနေကြတာ..."
ထိုသို့ပြောရင်း သူက ရှက်ကိုးရှက်ကန်းဖြင့် သူ၏ နှာခေါင်းကို ပွတ်သပ်လိုက်၏။
၎င်းကို ကြားပြီးနောက် ကျန်းယဲ့ဟာ ဘေးတွင် ရပ်နေသော ကောင်းကျွင်း၊ ကျန်ရွှမ် နှင့် အခြားသူများထံသို့ သူ၏ အကြည့်ကို ချက်ချင်း ပြောင်းလိုက်၏။
ထိုလူများက ကျန်းယဲ့၏ အကြည့်နှင့် ဆုံမိသည့် အခိုက်အတန့်တွင် ချက်ချင်းပင် ကြောင်တောင်တောင်အပြုံးများ ပြုံးပြလိုက်ကြပြီး သူတို့၏ မျက်လုံးများထဲတွင် စိတ်လှုပ်ရှားမှုနှင့် အနည်းငယ် စိုးရိမ်မှုတို့ ရောနှောနေခဲ့သည်။
ကျန်းယဲ့ ချက်ချင်း သဘောမတူသည်ကို မြင်သောအခါ အန်းရှီးမှ အသက်အရွယ်ရနေပြီဖြစ်သော စစ်မှုထမ်းဟောင်းတစ်ဦးက သူ့ကို အခက်တွေ့စေမည် စိုးသဖြင့် အမြန်ပင် စာနာနားလည်စွာဖြင့် ဝင်ပြောလိုက်၏။ "မိတ်ဆွေလေးကျန်း... အဆင်မပြေဘူးဆိုရင်လည်း မကြည့်ရလည်း ကိစ္စမရှိပါဘူး။ ညီအစ်ကိုတွေက စူးစမ်းချင်စိတ်နဲ့ ဆူညံနေကြတာပါ...."
ကျန်းယဲ့သည် စစ်မှုထမ်းဟောင်း၏ သတိထားနေသော်လည်း မျှော်လင့်နေသော အမူအရာကို ကြည့်လိုက်ပြီး စကားမပြောကြသော်လည်း မျက်လုံးများ တောက်ပနေကြသည့် ပတ်ဝန်းကျင်ရှိ စစ်သည်များကို ဝေ့ကြည့်လိုက်ပြန်သည်။ ထို့နောက် သူက ပြုံးလိုက်ကာ "ရပါတယ်... စိတ်မပူပါနဲ့။ ကြည့်လို့ ရပါတယ်" ဟု ပြောလိုက်လေသည်။
သူက ကောင်းကင်ကို မော့ကြည့်လိုက်၏။ "ဒါပေမဲ့ အခုက အရမ်းလင်းနေတော့ သေချာမြင်ရမှာ မဟုတ်ဘူး။ မှောင်သွားတဲ့အခါမှ ဒီခြံဝင်းထဲမှာပဲ ပြပေးပါ့မယ်..."
"တကယ်လား..."
"အရမ်းကောင်းတာပဲ..."
"ညွှန်ကြားရေးမှူးကျန်း... အရမ်းကို ကျေးဇူးတင်ပါတယ်..."
ကျန်းယဲ့ ကိုယ်တိုင် သဘောတူလိုက်သည်ကို ကြားသောအခါ ခြံဝင်းအတွင်းရှိ အန်းရှီးစစ်သည်များထံမှ အားရပါးရ ဝမ်းသာသံများ ထွက်ပေါ်လာပြီး အားလုံးက အလွန်အမင်း စိတ်လှုပ်ရှားသွားကြ၏။
သူတို့သည် ကောရွှိုက်နှင့် ဝမ်ကျန့်ချင်တို့ကဲ့သို့သော မိတ်ဆွေဟောင်းများအပြင် ခရီးသွားအသစ်များ၏ ပြတ်တောင်းပြတ်တောင်း ပြောပြချက်များမှတစ်ဆင့် နောင်လာနောက်သားများ၏ စစ်တပ်များ မည်သို့ တိုက်ပွဲဝင်ကြသည်ဆိုသည့် အံ့မခန်း ဇာတ်လမ်းများစွာကို ကြားသိခဲ့ပြီးဖြစ်သည်။
မိုင်ထောင်ချီအကွာမှ ရန်သူ၏ ခေါင်းကို ယူခြင်း၊ ကောင်းကင်ယံတွင် သံငှက်ကြီးများ ပျံသန်းခြင်း နှင့် စစ်မြေပြင်တစ်ခွင် သံချပ်ကာယာဉ်များ သောင်းကျန်းခြင်း...
အရင်က စစ်ရေးပြပွဲများနှင့် လက်နက်ပြသသည့် ဗီဒီယိုအချို့ကို သူတို့ မြင်ဖူးခဲ့သော်လည်း ထိုအရာများမှာ အခမ်းအနားများသာ ဖြစ်၏။ အစစ်အမှန် တိုက်ပွဲက မည်သို့ရှိမည်ကို သူတို့ စိတ်ကူးနှင့်ပင် ပုံမဖော်တတ်ကြသဖြင့် မြင်တွေ့ချင်စိတ်များ ပြင်းပြနေကြလေသည်။
ထိုသတင်းမှာ တောမီးကဲ့သို့ ပျံ့နှံ့သွားပြီး ခူချာရှိ အန်းရှီးတပ်ဖွဲ့ တစ်ခုလုံးကို လှုပ်လှုပ်ရွရွ ဖြစ်သွားစေခဲ့သည်။
မရှိမဖြစ် လိုအပ်သော ကင်းစောင့်များမှလွဲ၍ ကျန်းမာသန်စွမ်းသော စစ်သည်အားလုံးနီးပါးက စောင့်ရှောက်ရေးနယ်မြေအဆောက်အအုံ၏ အရှေ့ဘက်ခြံဝင်းသို့ စိတ်အားထက်သန်စွာ ပြေးလာကြပြီး အလွှာလိုက် အလွှာလိုက်ထိုင်ကာ ညအချိန်ရောက်လာမည့်ကို စိတ်အားထက်သန်စွာ စောင့်မျှော်နေကြလေသည်။
ဒဏ်ရာသိပ်မပြင်းထန်သော ဒဏ်ရာရ စစ်သားအချို့ပင်လျှင် ဘဝတွင် တစ်ခါသာကြုံရမည့် ဤအခွင့်အရေးကို လက်လွတ်မခံနိုင်ဟု ဆုံးဖြတ်ထားကာ ရဲဘော်ရဲဘက်များ၏ အကူအညီဖြင့် လာခဲ့ကြ၏။
ထို့နောက် ကျန်းယဲ့က စနစ်စတိုးဆိုင်မှ ကြီးမားသော ပရိုဂျက်တာ ပိတ်ကားတစ်ချပ်၊ ကြည်လင်ပြတ်သားမှုမြင့်မားသော ဖွင့်ပြသည့်ကိရိယာတစ်ခုနှင့် စွမ်းအားမြင့် ဘက်ထရီတစ်ခုတို့ကို ထုတ်ယူလိုက်သည်။
ထို့နောက် စစ်သားအချို့၏ အကူအညီဖြင့် သူသည် ပိတ်ကားကို ခြံဝင်း၏ တစ်ဖက်စွန်းရှိ နံရံပေါ်တွင် လျင်မြန်စွာ ချိတ်ဆွဲလိုက်ပြီး ကိရိယာများကို ချိန်ညှိလိုက်လေသည်။
နောက်ဆုံးတွင် ညအချိန်သို့ လုံးဝရောက်ရှိသွားသောအခါ တောက်ပနေသော ကြယ်ရောင်များအောက်တွင် စောင့်ရှောက်ရေးနယ်မြေအဆောက်အအုံ၏ အရှေ့ဘက်ခြံဝင်းမှာ သိပ်သည်းလှသော လူအုပ်ကြီးဖြင့် ပြည့်ကျပ်နေတော့သည်။
အန်းရှီးတပ်ဖွဲ့မှ စစ်သည်များက ရာထူး သို့မဟုတ် အသက်အရွယ်မရွေး မြေကြီးပေါ်တွင် သေသပ်စွာ ထိုင်နေကြပြီး သူတို့၏သံချပ်ကာများကို တင်းကျပ်စွာ ရစ်ပတ်ထားကာ သူတို့၏ မျက်လုံးများမှာ အေးစက်သော ညကောင်းကင်ယံတွင် ပြင်းထန်သော စိတ်အားထက်သန်မှုများဖြင့် တောက်ပနေပြီး သူတို့ရှေ့ရှိ ဧရာမ ပိတ်ကားဖြူကြီးကို စူးစိုက်ကြည့်နေကြ၏။
ခူချာ၏ ဆောင်းဦးညမှာ တော်တော်လေး အေးစက်နေပြီ ဖြစ်သော်လည်း စစ်သားများ၏ နှလုံးသားများမှာမူ စိတ်အားထက်သန်မှုများဖြင့် လောင်ကျွမ်းနေချေသည်။
အမှောင်ထု လုံးဝကျဆင်းသွားသောအခါ ကျန်းယဲ့က ကိရိယာများကို အလုပ်လုပ်စေလိုက်ပြီး Operation Red Seaရုပ်ရှင်၏ အစပိုင်း စာတန်းများ စတင် ပြသလာခဲ့သည်။
ဤရုပ်ရှင်ကို ရွေးချယ်မှုမှာ ကျန်ရွှမ်နှင့် ကောရွှိုက်တို့ကဲ့သို့သော ဝါရင့်ခရီးသွားများက သီးသန့် မဲခွဲဆုံးဖြတ်ခဲ့ခြင်း ဖြစ်၏။
အကြောင်းရင်း နှစ်ချက် ရှိခေသည်။ ပထမအချက်မှာ ဤခေတ်မီစစ်ရေးနောက်ခံရုပ်ရှင်သည် စိတ်အားထက်သန်မှုနှင့် စိတ်လှုပ်ရှားမှုများ အပြည့်အဝပါဝင်ပြီး အထက်တန်းလွှာတပ်ဖွဲ့များအကြား မြင့်မားသော ပူးပေါင်းဆောင်ရွက်မှုနှင့် လူနည်းနည်းဖြင့် အနိုင်ယူသည့် သူတို့၏ အကောင်းဆုံး နည်းဗျူဟာများကို ပြည့်ဝစွာ ပြသထားသဖြင့် နှစ်တစ်ထောင်အကြာမှ အထက်တန်းလွှာစစ်သားများ မည်သို့ တိုက်ပွဲဝင်ကြသည်ကို ထန်စစ်တပ်အား တိုက်ရိုက် ခံစားခွင့်ရစေခြင်း ဖြစ်သည်။
ဒုတိယအချက်မှာ မိမိတို့၏ နိုင်ငံသားများကို ကယ်တင်ရန်အတွက် အန္တရာယ်ရှိသော အခြေအနေများသို့ ပြတ်သားစွာ ဝင်ရောက်ကာ အနစ်နာခံရန် မကြောက်ရွံ့ခဲ့သည့် ရုပ်ရှင်ထဲမှ ကျောင်လုံအထူးတပ်ဖွဲ့၏ စိတ်ဓာတ်က အနောက်ဘက်ဒေသတွင် အထီးကျန်စွာ နိုင်ငံကို ကာကွယ်နေရသော အန်းရှီးတပ်ဖွဲ့၏ ကြေကွဲဖွယ်ကောင်းမှုနှင့် တာဝန်သိစိတ်တို့နှင့် ထပ်တူကျနေခြင်းကြောင့်ပင်။
ရုပ်ရှင်က ဖြည်းညင်းစွာ ဖြန့်ကျက်လာပြီး ပြင်းထန်သော သေနတ်ပစ်ခတ်ပွဲများ၊ ပေါက်ကွဲမှုများ၊ အဆင့်မြင့်နည်းပညာသုံး ပစ္စည်းကိရိယာများနှင့် ရင်ခုန်စရာကောင်းသော နည်းဗျူဟာ လှုပ်ရှားမှုများကို ပြသလာ၏။
စိတ်ကူးဉာဏ်ထက် များစွာကျော်လွန်နေသော ခေတ်သစ်စစ်ပွဲမြင်ကွင်းများက လွန်ခဲ့သော နှစ်တစ်ထောင်ကျော်က ဤစစ်သားများ ရှေ့မှောက်တွင် ပေါ်လာချေသည်။
အန်းရှီးမှ စစ်မှုထမ်းဟောင်းအားလုံးမှာ အသက်အောင့်ထားပြီး အသေးစိတ် အချက်အလက်တစ်ခုလေးကိုမျှ လက်လွတ်သွားမည် စိုးသဖြင့် စူးစိုက်စွာ ကြည့်ရှုနေကြ၏။
သူတို့၏ မျက်နှာများပေါ်တွင် အံ့အားသင့်မှု၊ မယုံကြည်နိုင်မှုတို့အပြင် အင်အားကြီးမားမှုနှင့် ခေတ်မီဆန်းပြားသော နည်းဗျူဟာများအပေါ် အလိုအလျောက် တမ်းတမှုနှင့် နားလည်သဘောပေါက်မှုတို့ ပြည့်နှက်နေခဲ့ကြသည်။
ကျောင်လုံအထူးတပ်ဖွဲ့ဝင်များက အလွန်မြင့်မားသော စွမ်းဆောင်ရည်ဖြင့် ရန်သူများကို ရှင်းလင်းရန် အတူတကွ ပူးပေါင်းဆောင်ရွက်နေကြသည်ကို မြင်သောအခါ စစ်မှုထမ်းဟောင်းအများအပြားက နည်းဗျူဟာဆိုင်ရာ အနှစ်သာရတစ်ခုခုကို သဘောပေါက်သွားသည့်အလား အလိုအလျောက် ခေါင်းညိတ်လိုက်ကြ၏။
တာဝန်အတွက် အသင်းဖော်များ ဒဏ်ရာရသွားခြင်း သို့မဟုတ် အသက်စတေးလိုက်ရခြင်းကို မြင်သောအခါ လူအများအပြား၏ မျက်လုံးများ အနည်းငယ် နီရဲလာပြီး တာဝန်အတွက် တိုက်ပွဲဝင်ခြင်းဆိုသည့် တူညီသောခံစားချက်က သူတို့၏ နှလုံးသားများကို ပြင်းထန်စွာ ရိုက်ခတ်သွားလေသည်။
တစ်ချိန်တည်းမှာပင် ခူချာမြို့ရိုးပေါ်တွင် ညကင်းစောင့်နေသော စစ်သားများမှာ အာရုံလွင့်နေခဲ့သည်။။
သူတို့က ရံဖန်ရံခါ လည်ပင်းကို ဆန့်ကာ စောင့်ရှောက်ရေးနယ်မြေအဆောက်အအုံရှိရာဘက်မှ မှုန်ဝါးဝါး ထွက်ပေါ်လာသော ပေါက်ကွဲသံများနှင့် အလင်းရောင်များဆီသို့ လှမ်းကြည့်နေကြပြီး သူတို့၏ မျက်လုံးများထဲတွင် မနာလိုမှုနှင့် တမ်းတမှုတို့ ပြည့်နှက်နေချေသည်။
လူငယ် စစ်သားတစ်ဦးက "အဲဒီ ရုပ်ရှင်ဆိုတာကြီးက ဘယ်လိုများ နေမလဲမသိဘူး... အသံက တကယ်ကို ကျယ်တာပဲ.." ဟု တီးတိုး မရေရွတ်ဘဲ မနေနိုင်တော့ချေ။
ဘေးနားရှိ လူငယ်လေးများ၏ စိတ်အားထက်သန်နေသော မျက်လုံးများကို ကြည့်ရင်း စစ်မှုထမ်းဟောင်း ကျောက်ချီက ရယ်မောလိုက်ပြီး သူတို့ကို နောက်ပြောင်လိုက်၏။ "မင်းတို့ကိုမင်းတို့ ကြည့်ကြပါဦး... အရမ်းတွေ ဖြစ်နေလိုက်တာ။ မနက်ဖြန်ညကျရင် ငါတို့ ကင်းစောင့်နေရတဲ့ ညီအစ်ကိုတွေအတွက် သီးသန့်ပွဲတစ်ပွဲ ပြပေးမယ်လို့ ညွှန်ကြားရေးမှူးကျန်း ပြောထားတယ်လေ... မင်းတို့အလှည့်လည်း ရောက်မှာပါ။ တစ်ရက်လေးနောက်ကျတာကို ဘာတွေ လောနေကြတာလဲ..."
၎င်းကို ကြားသောအခါ မြို့စောင့်စစ်သားများက ရှက်ကိုးရှက်ကန်းဖြင့် ရယ်မောလိုက်ကြသော်လည်း သူတို့၏ စူးစမ်းလိုစိတ်မှာ လျော့ကျမသွားချေ။
"ဦးလေးကျောက်... ကျွန်တော့်ကို ပြောပြပါဦး။ နောက်အနှစ်တစ်ထောင်ကြာရင် တိုက်ပွဲတွေကို တကယ်ပဲ ဒီလို တိုက်ကြမှာလား။ အဲဒီသံခွံကြီးတွေက မြင်းတွေထက် ပိုပြေးနိုင်မှာလား။ အဲဒီ မီးမှုတ်တဲ့ တုတ်တွေကရော ခြေလှမ်းတစ်ရာအကွာအဝေးက ပစ်မှတ်ကို တကယ် ထိနိုင်မှာလား..."
"သေချာပေါက် အံ့သြစရာ ကောင်းမှာပဲ။ အသံကို ကြားရုံနဲ့တင် စိတ်လှုပ်ရှားဖို့ ကောင်းနေပြီ..."
"အဲဒီ နောင်လာနောက်သားတွေသုံးတဲ့ လက်နက်တွေက ယုံနိုင်စရာမရှိလောက်အောင် အစွမ်းထက်မှာ သေချာတယ်။ ငါတို့ နားလည်နိုင်ပါ့မလား မသိဘူး..."
"နားမလည်ရင်တောင် ကြည့်ရမှာပဲ။ ဒါက အနာဂတ် မျိုးဆက်တွေ ဘယ်လို တိုက်ပွဲဝင်ကြမလဲ ဆိုတာပဲ။ နည်းလမ်းတစ်ခု နှစ်ခုလောက်တောင် သင်ယူနိုင်ကောင်း သင်ယူနိုင်မှာပေါ့ဟ...."
မြို့ရိုးပေါ်ရှိ အေးစက်သော လေပြေထဲတွင် ရုပ်ရှင်၏ မသိရသေးသော အကြောင်းအရာများအပေါ် သူတို့၏ စိတ်အားထက်သန်သော မှန်းဆမှုများနှင့် တမ်းတမှုများ ပြည့်နှက်နေပြီး ခြံဝင်းအတွင်းရှိ ရုပ်ရှင်ကြည့်နေသည့် တိတ်ဆိတ်သော်လည်း စိတ်လှုပ်ရှားဖွယ်ကောင်းသော လေထုနှင့် စိတ်ဝင်စားဖွယ် ပဲ့တင်သံတစ်ခုကို ဖန်တီးပေးနေလေသည်။
ထိုညတွင် နှစ်တစ်ထောင်စာ စစ်ရေးဉာဏ်ပညာနှင့် စိတ်အားထက်သန်မှုတို့က ဤအထီးကျန်မြို့လေးတွင် တိတ်ဆိတ်စွာ ပေါင်းဆုံသွားခဲ့လေသည်။
အခန်း ၂၇၆ပြီး၏။