အခန်း ၃၁၆
Vol. 32 Ch. 316
အခန်း (၃၁၆) ခရစ်စတယ်စွမ်းအင်တုံးနှင့် သိုင်းပညာအောင်မြင်မှု
သူက ခန္ဓာကိုယ်၏ အလေးချိန်ကို ညီညာစွာ ခွဲဝေနိုင်ရန် သူ၏အတွင်းအားများကို လျင်မြန်စွာ ချိန်ညှိလိုက်ပြီး မြင်ရခက်သော ကြွတင်အားတစ်ခုကို ဖန်တီးရန် ခြေဖဝါးမှနေ၍ အတွင်းအား အနည်းငယ်ကို ထုတ်လွှတ်လိုက်လေသည်။
တစ်လှမ်း... နှစ်လှမ်း... သုံးလှမ်း...
သူက တကယ်ပဲ မြစ်ပြင်ပေါ်မှာ လမ်းလျှောက်နေခဲ့ပြီ။
ထို့အပြင် ယင်းက ပိုမို၍ချောမွေ့လာပြီး အမြန်နှုန်းမှာလည်း တဖြည်းဖြည်း တိုးလာခဲ့သည်။ သူက မမြင်ရသော ခိုင်မာသည့် ရေခဲပြင်ပေါ်တွင် လမ်းလျှောက်နေသည့်အလား ဖြစ်နေပြီး ဖိနပ်အောက်ခြေတွင် အလွန်သေးငယ်သော ရေလှိုင်းဂယက်လေးများသာ ပြန့်ထွက်နေလေသည်။
ညလေပြေက သူ၏ အဝတ်စများကို တဖျပ်ဖျပ် လွင့်နေစေပြီး သူက မြစ်နှင့် ကောင်းကင် တစ်သားတည်းကျနေသော ညမြင်ကွင်းထဲတွင် လုံးလုံးလျားလျား ပေါင်းစပ်သွားသကဲ့သို့ ပေါ့ပါးကာ လူ့လောကမှ မဟုတ်သည့်အလား ထင်မှတ်ရ၏။
ထိုအချိန်တွင် မြစ်၏ တစ်ဖက်ကမ်းရှိ ချိန်းတွေ့နေကြသော စုံတွဲတစ်တွဲက ဤယုံကြည်နိုင်ဖွယ်ရာ မရှိသော မြင်ကွင်းကို မြင်တွေ့သွားကြသည်။
ကောင်မလေးက သူ၏ ချစ်သူကောင်လေး၏ အနမ်းကို စောင့်မျှော်ရင်း မျက်လုံးများကို အနည်းငယ် မှိတ်ထားသော်လည်း မျက်လုံးထောင့်မှနေ၍ မြစ်ထဲတွင် ရွေ့လျားနေသော အရာတစ်ခုကို သတိထားမိသွားခဲ့သည်။
သူမက အလိုအလျောက်ပင် ချစ်သူကောင်လေးကို တွန်းဖယ်လိုက်ပြီး မြစ်ပြင်ဆီသို့ အံ့သြတကြီး လက်ညှိုးထိုးပြလိုက်၏။ "ဟေ့... ဟိုမှာ ကြည့်လိုက်ဦး... မြစ်ထဲမှာ လူတစ်ယောက် ရှိနေတာလား..."
ကောင်လေးမှာ သူ့အလုပ်ကို အနှောင့်အယှက်ပေးခံရသဖြင့် အနည်းငယ် စိတ်တိုသွားသော်လည်း သူမ လက်ညှိုးထိုးပြရာဆီသို့ လှမ်းကြည့်လိုက်၏။
ကျယ်ဝန်းသော မြစ်ပြင်ကြီးက ခြားထားသဖြင့် အစပိုင်းတွင် သိပ်မသေချာလှချေ။ ရွေ့လျားနေသော လူပုံစံ အရိပ်မည်းမည်းတစ်ခုကိုသာ ဝေဝါးဝါး မြင်နေခဲ့ရသည်။
"လူတစ်ယောက် ကယက်လှေ ဒါမှမဟုတ် လှော်တက်အပြားကို စီးနေတာနဲ့ တူတယ်... ဒီလောက် ညနက်နေတာတောင် သူတို့က တကယ်ကို ကြိုးစားနေကြတာပဲ..."
ကောင်လေးက သာမန်ကာလျှံကာ မှန်းဆလိုက်၏။
သို့သော်လည်း ထိုပုံရိပ်က ပိုမိုနီးကပ်လာပြီး ပုံမှန်မဟုတ်သော အမြန်နှုန်းဖြင့် တည်ငြိမ်စွာ ရွေ့လျားလာသောအခါ သူတို့နှစ်ဦးစလုံး တစ်ခုခု မှားယွင်းနေပြီဖြစ်ကြောင်း သတိထားမိလိုက်ကြသည်။
ဒီမှာ ကယက်လှေ ဒါမှမဟုတ် လှော်တက်အပြားရဲ့ ပုံစံ ဘယ်မှာရှိလို့လဲ...
ပုံရိပ်က ပိုမိုနီးကပ်လာသောအခါ တစ်ဖက်ကမ်းရှိ လမ်းမီးရောင်နှင့် လရောင် ပေါင်းစပ်နေမှုအောက်တွင် နောက်ဆုံး၌ သေချာစွာ မြင်လိုက်ရလေသည်။
မည်သည့် ကိရိယာမှ လုံးဝ မပါဝင်ချေ။ ၎င်းက မြေပြင်ပေါ်တွင် လမ်းလျှောက်နေသကဲ့သို့ ခြေနှစ်ဖက်ဖြင့် ရေပြင်ပေါ်တွင် လမ်းလျှောက်နေသော အသက်ရှင်လျက်ရှိသည့် လူတစ်ယောက်ပင်။
"ယီး... ဘာကြီးလဲဟ..."
ကောင်လေး၏ မျက်လုံးများ ချက်ချင်း ပြူးကျယ်သွားပြီး သူ အမြင်မှားနေတာလားဟု တွေးကာ ဆဲဆိုလိုက်မိသည်။
"ဘုရားရေ... သူ ရေပေါ်မှာ မတ်တတ်ရပ်နေတယ်... သူ ရေပေါ်မှာ လမ်းလျှောက်နေတယ်..."
ကောင်မလေးမှာ အလွန်အမင်း ထိတ်လန့်သွားပြီး ပါးစပ်ကို အုပ်ထားကာ သူမ၏ အသံမှာပင် ပြောင်းလဲသွားရသည်။
သူတို့ကြားရှိ ရိုမန်းတစ်ဆန်သော အငွေ့အသက်လေးမှာ ချက်ချင်းပင် ပျောက်ကွယ်သွားရတော့သည်။
"NT- ဝဋ်လည်တတ်တယ်နော် ကျန်းကြီး...)
ခေတ္တမျှ မှင်တက်သွားပြီးနောက် ကောင်လေးက ချက်ချင်းပင် ဖုန်းကို ထုတ်လိုက်၏။
"မြန်မြန်... ဓာတ်ပုံရိုက်... ဒါ ဘယ်လိုလုပ် ဖြစ်နိုင်မှာလဲ..."
"ဗီဒီယိုရိုက်... အခုချက်ချင်း ဗီဒီယိုရိုက်လိုက်..."
ဖုန်းကင်မရာက ရူပဗေဒ နိယာမများကို ဆန့်ကျင်လျက် မြစ်ပြင်ပေါ်ရှိ ပုံရိပ်ဆီသို့ လျင်မြန်စွာ အာရုံစိုက်သွားပြီး အနီးကပ် ဆွဲယူလိုက်ကာ ရေပြင်ပေါ်တွင် လမ်းလျှောက်နေစဉ် လွင့်ခါနေသော အဝတ်အစားများဖြင့် အံ့မခန်းမြင်ကွင်းကို ရှင်းလင်းစွာ ရိုက်ကူးလိုက်သည်။
ကျန်းယဲ့မှာ မြစ်ပြင်ပေါ်တွင် ကိုယ်ဖော့သိုင်းပညာ သဘောတရားများကို လေ့လာခံစားနေခြင်းအပေါ် အာရုံစိုက်ထားသော်လည်း တစ်ဖက်ကမ်းရှိ မှိန်ပျပျ အလင်းရောင်နှစ်ခုနှင့် ဝေဝါးဝါး ပုံရိပ်များကို သဘာဝကျကျပင် သတိထားမိခဲ့သည်။ သို့သော်လည်း သူက ဂရုမစိုက်သလို သူ၏ အမြန်နှုန်းကိုလည်း မလျှော့ချခဲ့ချေ။
အင်မော်တယ်ရာချီမြို့မှ ရရှိခဲ့သော လျှို့ဝှက်သိုင်းစာအုပ်များကို လက်တွေ့ကမ္ဘာတွင် အောင်မြင်စွာ ကျင့်ကြံနိုင်ပြီး သဘာဝလွန် စွမ်းအားများကို ထုတ်ဖော်အသုံးပြုနိုင်သောကြောင့်...
အပြောင်းအလဲအချို့က တိတ်တဆိတ် ဖြစ်ပေါ်နေပြီ.. သို့မဟုတ် ကမ္ဘာကြီးက ဤထူးခြားသော သတ္တဝါများကို လက်ခံရန် အဆင်သင့် ဖြစ်နေပြီဟု ဆိုလိုခြင်းပင်။
ယခု သူတို့ မြင်တွေ့နေရသည်မှာ အစပိုင်းမျှသာ ဖြစ်နိုင်ပြီး ပိုမိုကြီးမားကာ ကမ္ဘာမြေကို တုန်လှုပ်စေမည့် အပြောင်းအလဲများက ဆက်လက် ဖြစ်ပေါ်လာဦးမည် ဖြစ်၏။
သူ၏ စိတ်က ရေကဲ့သို့ တည်ငြိမ်နေလေသည်။ သူ၏ ပုံရိပ်က မြစ်ပြင်ပေါ်တွင် အနည်းငယ်မျှသော ခြေရာကိုသာ ချန်ထားခဲ့ပြီး မြစ်အောက်ပိုင်း ညအမှောင်ထဲသို့ လျင်မြန်စွာ ပျောက်ကွယ်သွားလေရာ တစ်ဖက်ကမ်းတွင် ဘဝ၏ အဓိပ္ပာယ်ကို မေးခွန်းထုတ်လျက် ဖုန်းကိုင်ထားသော စုံတွဲကိုသာ ချန်ရစ်ခဲ့တော့သည်။
........
အလွန်လျှို့ဝှက်ထားသော သိပ္ပံဓာတ်ခွဲခန်းတစ်ခုအတွင်းတွင် လေထုက လေးလံကာ အာရုံစိုက်မှုများ ပြည့်နှက်နေခဲ့သည်။
နိုင်ငံ၏ ထိပ်တန်းအာဏာပိုင် သိပ္ပံပညာရှင်အများအပြားက ရှုပ်ထွေးပြီး ခေတ်မီဆန်းပြားသော စက်ကိရိယာတစ်ခု၏ ဘေးတွင် စုဝေးနေကြလေသည်။ စက်ကိရိယာ၏ အလယ်ဗဟိုရှိ အထူး စွမ်းအားစက်ကွင်း ထိန်းချုပ်ရေးကိရိယာအတွင်းတွင်တော့ ဖုတ်ကောင်ကမ္ဘာမှ ရရှိခဲ့သော ထူးဆန်းသည့် ခရစ်စတယ်စွမ်းအင်တုံးကို တိတ်တဆိတ် ရှိနေလေသည်။
"စွမ်းအင်ထုတ်လွှတ်မှုက တည်ငြိမ်နေတယ်... ကြိမ်နှုန်းက တစ်ပြေးညီဖြစ်နေတယ်... အခုပဲ..."
သုတေသီချုပ်တစ်ဦးက လေးနက်သော အသံဖြင့် အမိန့်ပေးလိုက်၏။
လက်ထောက်ဖြစ်သူက ထိန်းချုပ်ခလုတ်ခုံပေါ်တွင် နောက်ဆုံး အမိန့်ပေးချက်ကို ဂရုတစိုက် ရိုက်ထည့်လိုက်လေသည်။
တစ်ခဏအတွင်းမှာပင် စက်ကိရိယာကြီးက တောက်ပစွာ လင်းလက်သွားပြီး ခရစ်စတယ်စွမ်းအင်တုံးကို အသက်သွင်းလိုက်ပုံရသည်။ ၎င်းအတွင်းတွင် ပါဝင်သော ထူးဆန်းသော စွမ်းအင်များကို တဖြည်းဖြည်း လမ်းကြောင်းပြ ဆွဲထုတ်လိုက်ပြီး သတ်မှတ်ထားသော ပြောင်းလဲရေးကိရိယာတစ်ခုမှတစ်ဆင့် တည်ငြိမ်ကာ ယခင်က မကြုံဖူးလောက်အောင် သန့်စင်သော စွမ်းအင်စီးကြောင်းအဖြစ်သို့ ထုတ်လွှတ်လိုက်လေသည်။
စောင့်ကြည့်ရေး မျက်နှာပြင်ပေါ်ရှိ အချက်အလက်များမှာ ရူးသွပ်စွာ အတက်အကျ ဖြစ်နေပြီး နောက်ဆုံးတွင် လူတိုင်းကို အသက်ရှူမှားသွားစေသည့် ရလဒ်တစ်ခုတွင် ရပ်တန့်သွား၏။
"ငါတို့ လုပ်နိုင်ခဲ့ပြီ... ငါတို့ လုပ်နိုင်ခဲ့ပြီကွ..." လူငယ် သုတေသီတစ်ဦးက စိတ်လှုပ်ရှားစွာဖြင့် တီးတိုး အော်ဟစ်လိုက်မိသည်။
"စွမ်းအင် ပြောင်းလဲမှု စွမ်းဆောင်ရည်က ၁၇ ရာခိုင်နှုန်းအထိ ရောက်တယ်ဟေ့။ ပြီးတော့ ဂုဏ်သတ္တိတွေကလည်း အရမ်း တည်ငြိမ်တယ်..."
နောက်ထပ် ပါမောက္ခအိုကြီးတစ်ဦးက သူ၏ မျက်မှန်ကို ပင့်တင်ရင်း တုန်ရီသော အသံဖြင့် ပြောလိုက်၏။
ဓာတ်ခွဲခန်းတစ်ခုလုံးရှိ သုတေသီများမှာ ထိန်းချုပ်ရခက်သော စိတ်လှုပ်ရှားမှုနှင့် ရွှင်မြူးမှုများဖြင့် ပြည့်နှက်နေခဲ့ကြသည်။ ပြီးခဲ့သည့် ရက်အနည်းငယ်အတွင်း သူတို့၏ ကြိုးပမ်းအားထုတ်မှုများက နောက်ဆုံးတွင် ကြီးမားသော အောင်မြင်မှုတစ်ခုကို ရရှိခဲ့ပြီ ဖြစ်၏။
ထိုအချိန်တွင် ဓာတ်ခွဲခန်း၏ လုံခြုံရေး ဆက်သွယ်ရေးလိုင်း လင်းလာလေသည်။ ယင်းက အထူးဗျူရိုမှ ဒုတိယ ညွှန်ကြားရေးမှူးကျိုး၏ သီးသန့်လိုင်းပင်။
စီမံကိန်းကို တာဝန်ယူထားသော သိပ္ပံပညာရှင်ချုပ်က ဖုန်းကို ချက်ချင်းကိုင်လိုက်ပြီး ဤကြီးမားသော အောင်မြင်မှုကို စိတ်လှုပ်ရှားစွာဖြင့် အစီရင်ခံလိုက်၏။
အစီရင်ခံစာကို နားထောင်ပြီးနောက် ဖုန်း၏ တစ်ဖက်စွန်းမှ ဒုတိယညွှန်ကြားရေးမှူးကျိုးမှာ ဝမ်းသာရွှင်မြူးမှုများ ပြည့်နှက်သွားရသည်။
"အရမ်းကောင်းတယ်... အရမ်းကောင်းတယ်... အားလုံး ကြိုးစားလိုက်ကြတာကို ကျေးဇူးတင်ပါတယ်။ ဒါက ကြီးမားတဲ့ ခြေလှမ်းတစ်ခုပဲ... ဒီစွမ်းအင်ရဲ့ အသုံးချနိုင်စွမ်းတွေကို နားလည်ဖို့အတွက် ငါတို့ ဆက်ပြီး နက်နက်ရှိုင်းရှိုင်း သုတေသန လုပ်ရမယ်..."
သိပ္ပံပညာရှင်ချုပ်က နောက်ထပ် လုပ်ဆောင်ရမည့် အဆင့်များကို သတိထား၍ အကြံပြုလိုက်၏။
"ညွှန်ကြားရေးမှူးကျိုး... လက်ရှိ တိုးတက်မှုတွေအရ ကျွန်တော်တို့က စေတနာ့ဝန်ထမ်း အနည်းငယ်ကို ခေါ်ယူပြီး လူသားတွေနဲ့ လိုက်လျောညီထွေဖြစ်မှု စမ်းသပ်ခြင်း ပထမအဆင့်ကို စတင်ပြင်ဆင်ဖို့ အကြံပြုချင်ပါတယ်..."
ထိုစကားကို ကြားသောအခါ ဒုတိယညွှန်ကြားရေးမှူးကျိုးက ခေတ္တမျှ စဉ်းစားလိုက်ပြီးမှ ပြောလိုက်၏။
"အဖိုးကြီးချန်... မလောပါနဲ့ဦး။ ဒီစွမ်းအင်အပေါ် ငါတို့ရဲ့ နားလည်မှုက အရမ်းအခြေခံကျတဲ့ အဆင့်မှာပဲ ရှိနေသေးတယ်။ သူ့ရဲ့ ရေရှည်အကျိုးသက်ရောက်မှုတွေနဲ့ ဖြစ်နိုင်ချေရှိတဲ့ အန္တရာယ်တွေကို ငါတို့ မသိသေးဘူး။ ဘေးကင်းစေဖို့အတွက် ငါတို့ ထပ်ပြီး သုတေသနတွေ လုပ်ကြတာပေါ့... လူသားတွေနဲ့ စမ်းသပ်ဖို့ မစဉ်းစားခင် အရာအားလုံးက အမှားအယွင်းကင်းတယ်ဆိုတာကို သေချာအောင် လုပ်ကြရအောင်။ ဘေးကင်းရေးက ပထမပဲ..."
"ဟုတ်ကဲ့ပါ ညွှန်ကြားရေးမှူးကျိုး... ကျွန်တော်တို့ နားလည်ပါပြီ..."
ဓာတ်ခွဲခန်းနှင့် ဖုန်းပြောပြီးပြီးချင်းပင် ဒုတိယညွှန်ကြားရေးမှူးကျိုး၏ ရုံးခန်းရှိ ကြိုးဖုန်းက ထပ်မံ မြည်လာပြန်သည်။
သူ ဖုန်းကိုင်လိုက်ရာ သိုင်းပညာ သုတေသနနှင့် ဖွံ့ဖြိုးတိုးတက်ရေးဌာနကို တာဝန်ယူထားသော အကြီးအကဲဖြစ်နေခဲ့သည်။ တစ်ဖက်လူ၏ အသံမှာလည်း ထိန်းချုပ်ရခက်သော စိတ်လှုပ်ရှားမှုများဖြင့် ပြည့်နှက်နေ၏။
"ညွှန်ကြားရေးမှူးကျိုး... သတင်းကောင်းပဲ။ ရဲဘော် ကျန်းယဲ့ ပေးထားတဲ့ နက်နဲသော ယင်စွမ်းအင် စစ်မှန်သောကျမ်းစာကို အခြေခံပြီး အကြိမ်ကြိမ် သုတေသနနဲ့ စမ်းသပ်မှုတွေ လုပ်ပြီးတဲ့နောက်မှာ... ကျွန်တော်တို့ရဲ့ အကောင်းဆုံး အရည်အချင်းရှိတဲ့ အဖွဲ့ဝင်သုံးယောက်က သူတို့ရဲ့ ခန္ဓာကိုယ်ထဲမှာ ချီစွမ်းအင်လေး နည်းနည်းကို အောင်မြင်စွာ ကျင့်ကြံနိုင်ခဲ့ပြီ။ အဲဒါက အရမ်း အားနည်းနေသေးပေမယ့် ခံစားချက်ကတော့ အရမ်းကို ရှင်းလင်းနေတယ်..."
ဒုတိယညွှန်ကြားရေးမှူးကျိုးမှာ ပို၍ပင် တက်ကြွသွားရသည်။ "အရမ်းကောင်းတာပေါ့... ရလဒ်က ဘယ်လိုနေလဲ..."
"လောလောဆယ်တော့ ချီစွမ်းအင်ခံစားမှုကို အခုမှ စတင် ဖန်တီးနိုင်တာပါ။ လျှို့ဝှက်ကျမ်းစာအုပ်အရဆိုရင်... ဆက်တိုက်ကျင့်ကြံပြီး သွေးကြောတွေကို ပိုပြီး ဖွင့်ပေးဖို့ လိုအပ်သေးတယ်။ ခန္ဓာကိုယ်တစ်ခုလုံးကို ချီစွမ်းအင် လည်ပတ်နိုင်မှသာ အမျိုးမျိုးသော အံ့ဖွယ်အကျိုးသက်ရောက်မှုတွေက တဖြည်းဖြည်း ပေါ်လာမှာ။ ဒါပေမယ့် ဒါက လျှို့ဝှက်ကျမ်းစာအုပ်ရဲ့ စစ်မှန်မှုနဲ့ ဖြစ်နိုင်ချေကို သက်သေပြနေပြီလေ..."
ဒုတိယညွှန်ကြားရေးမှူးကျိုး၏ အပြုံးက ပိုမို ကျယ်ပြန့်သွားလေသည်။ "ငါ နားလည်ပါပြီ။ အရာရာတိုင်းကို တစ်ဆင့်ချင်းစီ သွားရမှာပေါ့။ ဒီလောက် တိုတောင်းတဲ့ အချိန်လေးအတွင်းမှာ ဒီလို ရလဒ်မျိုး ရခဲ့တာက မျှော်လင့်ထားတာထက် အများကြီး သာလွန်နေပါပြီ။ ရဲဘော်တွေကို ဆက်ကြိုးစားဖို့ ပြောလိုက်ပါ။ ဒါပေမယ့် ဘေးကင်းရေးကို သေချာ ဂရုစိုက်ဖို့နဲ့ နေမကောင်းဖြစ်သလို ခံစားရရင် ချက်ချင်း ရပ်တန့်ဖို့ သတိပေးလိုက်ပါဦး..."
သတင်းကောင်းနှစ်ခုကို ဆက်တိုက် လက်ခံရရှိပြီးနောက် ဒုတိယညွှန်ကြားရေးမှူးကျိုးမှာ စိတ်ဓာတ်များ တက်ကြွနေလေသည်။ သူက မသိစိတ်မှနေ၍ သံစဉ်မကျသော သီချင်းတစ်ပုဒ်ကို တီးတိုးညည်းတွားရင်း လက်ဖက်ရည်တစ်ခွက် ငှဲ့ရန် မတ်တတ်ထရပ်လိုက်၏။
ရုံးခန်းတံခါးကို ဖွင့်လိုက်ချိန်တွင် အပြင်ဘက်မှ ပြန်လာသော အထူးဗျူရို၏ အကြီးအကဲ ညွှန်ကြားရေးမှူးချုပ်ကျန်းနှင့် တိုက်ဆိုင်စွာ ဆုံမိလေသည်။
သူ၏ ဝမ်းသာရွှင်မြူးနေသော မျက်နှာကို မြင်သောအခါ ညွှန်ကြားရေးမှူးချုပ်ကျန်းက မနေနိုင်ဘဲ ပြုံးကာ မေးလိုက်၏။ "ဟေး... အဖိုးကြီးကျိုး... ဘာသတင်းကောင်းတွေ ရထားလို့ ဒီလောက်တောင် စိတ်လှုပ်ရှားနေရတာလဲဟ..."
ဒုတိယ ညွှန်ကြားရေးမှူးကျိုးက သူ၏ ဂုဏ်ယူမှုကို ဖုံးကွယ်မထားနိုင်ဘဲ အားပါးတရ ရယ်မောလိုက်ကာ စွမ်းအင်သစ် ဖော်ထုတ်နိုင်မှုနှင့် သိုင်းပညာကျင့်ကြံခြင်းမှ ချီစွမ်းအင်ရရှိမှု သတင်းကောင်း နှစ်ခုကို အကျဉ်းချုံး ပြောပြလိုက်လေသည်။
ယင်းကို ကြားပြီးနောက် ညွှန်ကြားရေးမှူးချုပ်ကျန်းက လက်ခုပ်တီးကာ ရယ်မောလိုက်၏။ "ဟားးဟားး.... ဒါက တကယ်ကို သတင်းကောင်းပဲ။ ဒါတွေက ခိုင်မာတဲ့ အခြေခံအုတ်မြစ်တွေပဲ။ ဒါနဲ့... ငါတို့ ဒီအကြောင်းကို ကျန်းယဲ့ဆီ အမြန်ဆုံး အကြောင်းကြားသင့်တယ်။ သူလည်း သေချာပေါက် အရမ်း ဝမ်းသာသွားမှာ..."
အခန်း ၃၁၆ပြီး၏။