အခန်း ၇၂၉

အခန်း (၇၂၉) ကြယ်မြစ် တပိုင်းသူတော်စင် ကို ခြိမ်းခြောက်ခြင်း၊ မိုးကြိုး အဆောင်များ ဖြန့်ဝေခြင်း

“ဂိုဏ်းချုပ်ယဲ့... ခင်ဗျား ဘာတွေ ပြောနေမှန်း ကျွန်တော် တကယ် နားမလည်တော့ဘူး ဗျာ...”

ကြယ်မြစ် တပိုင်းသူတော်စင် က လက်ရှိ အကြောင်းအရာကို ရှောင်လွှဲရန် ခေါင်းကို ဆက်တိုက် ရမ်းပြလိုက်၏။

ယဲ့ဖုန်း ပြုံးလိုက်သည်။

သူက အရာရာကို ပုံဖော်နိုင်သော မျက်လုံး ဖြင့် ကြယ်မြစ် တပိုင်းသူတော်စင်အား ထိုးဖောက် မြင်ပြီးပြီ ဖြစ်သည်။

မြို့ကိုးမြို့ ကြယ်တိမ်တိုက် သည် ကမ္ဘာငယ် များထက် အဆင့်တစ်ဆင့် ပိုမြင့်သော ကမ္ဘာလတ် တစ်ခုမျှသာ ဖြစ်ပြီး၊ ကမ္ဘာကြီး တစ်ခု ဖြစ်သော ရှန်ကျိုး တိုက်ကြီး ကို မီရန် အလှမ်းဝေးလှသည်။ ၎င်းတွင် အစစ်အမှန် ကောင်းကင်ဘုံ မရှိသဖြင့် သူတော်စင်တက်လှမ်းခြင်း ကပ်ဘေး ကို မထုတ်လုပ်ပေးနိုင်ချေ။

ထို့ကြောင့် ကြယ်မြစ် တပိုင်းသူတော်စင် သည် သူတော်စင် တစ်ပါး ဖြစ်မလာနိုင်ခြင်း ဖြစ်၏။

ကမ္ဘာကြီး တစ်ခုထဲသို့ ဝင်ရောက်နိုင်ခြင်း မရှိပါက…မဖြစ်နိုင်ပေ။

အနီးဆုံး ကမ္ဘာကြီး မှာ ရှန်ကျိုး တိုက်ကြီး မဟုတ်ပါလား။

ယဲ့ဖုန်းသည် ကြယ်မြစ် တပိုင်းသူတော်စင် ကို မည်သို့ မြူဆွယ်ရမည်ကို တွေးထားပြီး ဖြစ်၏။

“ငါ ပြောနေတာတွေကို နားမလည်ဘူး ဟုတ်လား...” ယဲ့ဖုန်းက ကြယ်မြစ် တပိုင်းသူတော်စင် ၏ စကားကို ဖမ်းယူကာ ပြုံးလိုက်၏။ “ဒါဆိုရင် မင်းကို မေးခွန်း တစ်ခု မေးမယ်... မြို့ကိုးမြို့ ကြယ်တိမ်တိုက် ရဲ့ အရှင်သခင် အနေနဲ့ မင်းက ဒီမှာ အမြင့်ဆုံး အာဏာပိုင်ပဲ... မင်းကို ဘယ်သူမှ မဆန့်ကျင်ရဲဘူး မဟုတ်လား...”

ကြယ်မြစ် တပိုင်းသူတော်စင် က ခြောက်ကပ်ကပ် ရယ်လိုက်သည်။ “ဒီ သူတော်စင် ရဲ့ ကျင့်ကြံခြင်း အဆင့်က မဆိုးပေမယ့် အားနည်းတဲ့ သူတွေကိုတော့ ဘယ်တော့မှ အနိုင်မကျင့်ပါဘူး...”

“အံ့သြစရာကောင်းတဲ့ စရိုက်လေးပဲ... ဒါနဲ့ မင်း ကမ္ဘာကြီး တစ်ခုထဲကို ဝင်ရောက်ဖို့ကော စဉ်းစားဖူးလား...” ယဲ့ဖုန်းက စကားလမ်းကြောင်း လွှဲကာ မေးလိုက်၏။

ကမ္ဘာကြီး ဟုတ်လား...

ကြယ်မြစ် တပိုင်းသူတော်စင် ၏ နှလုံးသား တစ်ချက် ခုန်ရပ်သွားတော့သည်။

သူ အမှန်တကယ် လိုချင်ကြောင်း ဝန်ခံရမည်။

သူ၏ လက်ရှိ အခြေအနေဖြင့် သူတော်စင်တက်လှမ်းခြင်း ကပ်ဘေး ကို ဖြတ်ကျော်နိုင်မည် မဟုတ်သော်လည်း၊ ကပ်ဘေးကို ဖြတ်ကျော်နိုင်မည့် စွမ်းအားကို ပိုင်ဆိုင်လာသည်အထိ စောင့်ဆိုင်းနေပြီးမှ ကမ္ဘာကြီး တစ်ခုကို ရှာဖွေချင်စိတ် မရှိချေ။

ထိုအချိန်ရောက်လျှင် နောက်ကျလွန်းနေပြီ ဖြစ်မည်။

သူသာ ကမ္ဘာကြီး တစ်ခုသို့ ဝင်ရောက်နိုင်ခဲ့လျှင်၊ ထိုလောက၏ စွမ်းအားကို အသုံးပြု၍ သူ၏ စွမ်းအားများကို ပိုမို မြှင့်တင်နိုင်မည် ဖြစ်ပြီး၊ နောက်ပိုင်းတွင် ကပ်ဘေး ဖြတ်ကျော်မှုအတွက် အောင်မြင်နိုင်ခြေ ပိုမို မြင့်မားစေမည်ပင်။

အောင်မြင်သွားသည်နှင့် တစ်ပြိုင်နက် ကြယ်မြစ် သူတော်စင် ဖြစ်လာတော့မည်တည်း။

ဤအကြောင်းကို တွေးမိပြီး ကြယ်မြစ် တပိုင်းသူတော်စင် ပို၍ပင် စိတ်လှုပ်ရှား လာတော့သည်။

“ဂိုဏ်းချုပ်ယဲ့... ခင်ဗျားက ဝိညာဉ်တည်ငြိမ် နယ်မြေ က မဟုတ်ဘဲ ကမ္ဘာကြီး အဆင့်ရှိတဲ့ ရှန်ကျိုး တိုက်ကြီး က များလား...”

ကြယ်မြစ် တပိုင်းသူတော်စင် က စမ်းသပ်မေးမြန်း လိုက်၏။

အနီးအနားတွင် ကမ္ဘာကြီး တစ်ခုသာ ရှိပြီး၊ ၎င်းမှာ နာမည်ကျော် ရှန်ကျိုး တိုက်ကြီး ဖြစ်ကြောင်း သူ သိထား၏။

“မှန်တာပေါ့...”

ယဲ့ဖုန်း အနေဖြင့် ဖုံးကွယ်ထားရန် မလိုအပ်ချေ။

“ငါက ရှန်ကျိုး တိုက်ကြီး က မိုးကြိုးရေကန် နန်းတော် ရဲ့ နတ်ဘုရား တစ်ပါး ဖြစ်ပြီး မိုးကြိုး အပြစ်ပေးခြင်း တွေကို တာဝန်ယူရတယ်... မင်း ရှန်ကျိုး တိုက်ကြီး ထဲကို ဝင်ရောက်ဖို့ ငါ သေချာပေါက် ကူညီနိုင်ပြီး ကပ်ဘေး ဖြတ်ကျော်ဖို့ အရည်အချင်းတွေ ရလာအောင် ကူညီပေးမယ်...”

သူ၏ လက်ကို ဆန့်ထုတ်လိုက်ရာ၊ လက်ဝါးထဲတွင် တောက်ပသော မိုးကြိုး အလင်းတန်းများ ထွက်ပေါ်လာ၏။

၎င်းမှာ ကမ္ဘာပျက် ကောင်းကင်ကပ်ဘေး အရင်းအမြစ် ၏ အရှိန်အဝါပင် ဖြစ်၏။

“မိုးကြိုး နန်းတော် နတ်ဘုရား ဟုတ်လား...”

ကြယ်မြစ် တပိုင်းသူတော်စင် သည် ဤဘွဲ့နာမကို ယခင်က တစ်ခါမှ မကြားဖူးချေ။

အမှန်တကယ်တွင်မူ သူသည် ရှန်ကျိုး တိုက်ကြီး သို့ တစ်ခါမှ မရောက်ဖူးပေ။ ထိုနေရာရှိ သူတော်စင်များ၏ ပြင်ပမှ နတ်ဆိုး အဖြစ် သတ်ဖြတ်ခံရမည်ကို ကြောက်ရွံ့သောကြောင့်ပါ။

ရှန်ကျိုး တိုက်ကြီး နှင့် ပတ်သက်၍ သူ၏ နားလည်မှုမှာ ကြားဖူးနားဝမျှသာ ရှိပါ၏။

သို့သော် ထိုကမ္ဘာကို သူ အမှန်တကယ် တောင့်တနေခဲ့သည်။

ယဲ့ဖုန်း၏ လက်ဝါးထဲမှ ကမ္ဘာပျက် ကောင်းကင်ကပ်ဘေး ၏ စစ်မှန်သော အရှိန်အဝါကို ခံစားလိုက်ရပြီး သူ၏ နောက်ကျောတွင် ဖြည်းညင်းစွာ ပေါ်လာသော ဝေဝါးဝါး မိုးကြိုး နန်းတော် ကြီးကို မြင်လိုက်ရသောအခါ၊ ကြယ်မြစ် တပိုင်းသူတော်စင် သည် ယဲ့ဖုန်း၏ စကားများကို ယုံကြည်သွားတော့သည်။

သူသည် ကပျာကယာ လက်နှစ်ဖက်ကို ဆုပ်မိုးကာ မေးလိုက်၏။ “ဂိုဏ်းချုပ်ယဲ့... ရှန်ကျိုး တိုက်ကြီး မှာ ကပ်ဘေး ဖြတ်ကျော်ဖို့ အရည်အချင်းတွေ ရလာအောင် ကျွန်တော် ဘာလုပ်ရမလဲ ခင်ဗျာ...”

“ငါ့အတွက် အလုပ်လုပ်ပေး...”

ယဲ့ဖုန်းက ထပ်ပြောလိုက်၏။

“မင်းရဲ့ အကူအညီ လိုအပ်တဲ့ ကိစ္စတချို့ ရှိတယ်... အဲဒါတွေ ပြီးသွားရင် မင်း သဘာဝကျကျ အရည်အချင်းတွေ ရလာမှာပါ... စိတ်ချပါ... မိုးကြိုး နန်းတော် ရဲ့ နတ်ဘုရား ဆိုတဲ့ ငါ့ရဲ့ အဆင့်အတန်း နဲ့ အာမခံတယ်... ဘာပြဿနာမှ မရှိစေရဘူး...”

ကြယ်မြစ် တပိုင်းသူတော်စင် စဉ်းစားခန်း ဝင်သွား၏။

ယဲ့ဖုန်းကို ကိုင်တွယ်ရန် မလွယ်ကူကြောင်း သူ သိသော်လည်း ဤအရာက ပိုကောင်းသည်။ သူ ယဲ့ဖုန်းကို ကူညီမည် ဖြစ်ပြီး၊ အပြန်အလှန် အနေဖြင့် ယဲ့ဖုန်းက မိုးကြိုး နန်းတော် နတ်ဘုရား အဖြစ် ကပ်ဘေး ဖြတ်ကျော်ရန် အရည်အချင်းများ သူ့ကို ပေးအပ်မည်ပင်။ နှစ်ဦးနှစ်ဖက် အကျိုးရှိသော ကိစ္စပင်။

“သဘောတူတယ်...”

ခေတ္တအကြာတွင် ကြယ်မြစ် တပိုင်းသူတော်စင် က ဝမ်းသာအားရ သဘောတူလိုက်၏။

“နောင်တစ်ချိန်မှာ ဒီနေ့ ဆုံးဖြတ်ချက် အတွက် မင်း ဝမ်းသာနေရလိမ့်မယ်...” ယဲ့ဖုန်းက ပြုံးလျက် ပြောလိုက်ပြီး သူ၏ မျက်လုံးများက တောက်ပနေ၏။

သူသည် ပေဟယ် ကြယ် ပေါ်တွင် စမ်းသပ်မှုများ ပြုလုပ်ခဲ့ပြီး ကောင်းကင်တာအို၏ အကြွင်းအကျန်များ နှင့် ဆက်သွယ်ကာ၊ မရေမတွက်နိုင်သော အောက်လောကများ ဖန်တီး၍ အကြွင်းအကျန်များကို အားကောင်းစေမည့် နည်းလမ်းသည် အမှန်တကယ် အလုပ်ဖြစ်ကြောင်း အတည်ပြုပြီး ဖြစ်၏။

ထို့ကြောင့် မြို့ကိုးမြို့ ကြယ်တိမ်တိုက် သို့ ရောက်ရှိပြီးနောက် ယဲ့ဖုန်းသည် ဤလောကကို မျက်စိကျနေခဲ့ခြင်း ဖြစ်၏။

ကြယ်မြစ် တပိုင်းသူတော်စင် ၏ အကူအညီဖြင့် အရာအားလုံး ပိုမို ချောမွေ့သွားမည်ပင်။

“ဒါဆိုရင် ဂိုဏ်းချုပ်ယဲ့... ဒီ သူတော်စင် ကို ဘာလုပ်ခိုင်းချင်တာလဲ ဗျ...” ကြယ်မြစ် တပိုင်းသူတော်စင် က မေးလိုက်သည်။

“မင်း သိတဲ့အတိုင်းပဲ... ရှန်ကျိုး တိုက်ကြီး က မိုးကြိုး နန်းတော် နတ်ဘုရား တစ်ပါး အနေနဲ့ ငါ ပြည့်မီအောင် လုပ်ရမယ့် ကပ်ဘေး ဖြတ်ကျော်မှု ခွဲတမ်း တွေ အများကြီး ရှိတယ်... လူဘယ်နှစ်ယောက် ကပ်ဘေး ဖြတ်ကျော်ရမလဲ ဆိုတဲ့ နှစ်စဉ် လိုအပ်ချက် ရှိတယ်... မပြည့်မီရင် ကောင်းကင်ဘုံက ငါ့ကို အပြစ်ပေးလိမ့်မယ်...”

“လတ်တလော နှစ်တွေမှာ ရှန်ကျိုး တိုက်ကြီး မှာ ကပ်ဘေး ဖြတ်ကျော်တဲ့ လူအရေအတွက် လျော့နည်းလာပြီး ငါ့ရဲ့ ခွဲတမ်း ကို ပြည့်မီဖို့ မဖြစ်နိုင်လုနီးပါး ဖြစ်လာတယ်... ငါ့ရဲ့ တစ်ခုတည်းသော ရွေးချယ်စရာက အပြင်ဘက်ကို တိုးချဲ့ဖို့ပဲ...”

“ဒီလုပ်ငန်းစဉ်မှာ ဝိညာဉ်တည်ငြိမ် နယ်မြေ အပါအဝင် လောကအချို့ကို ငါ ရှာတွေ့ခဲ့ပြီး ခွဲတမ်း အများကြီး ရခဲ့တယ်... ဒါပေမဲ့ မလုံလောက်သေးဘူး...”

“ဒီနေ့ မြို့ကိုးမြို့ ကြယ်တိမ်တိုက် ကို ငါ ရှာတွေ့တဲ့ အချိန်အထိပေါ့...”

“ငါ့ရဲ့ ခွဲတမ်း ပြည့်မီအောင် ကူညီပေးဖို့ ရှန်ကျိုး တိုက်ကြီး ထဲက မိုးကြိုး နန်းတော် ကတစ်ဆင့် ဒီကလူတွေကို ကပ်ဘေး ဖြတ်ကျော် ခိုင်းစေချင်တယ်...”

ယဲ့ဖုန်းသည် သူ၏ နတ်ဘုရား အဆင့် မြူဆွယ်မှု များကို စတင်လိုက်တော့သည်။

“ဟုတ်လား...”

ကြယ်မြစ် တပိုင်းသူတော်စင် မှာ ဇဝေဇဝါ ဖြစ်သွားပြီး ယုံကြည်ရန် ခက်ခဲနေ၏။ နတ်ဘုရား တစ်ပါး ဖြစ်သော ယဲ့ဖုန်း တွင် ကပ်ဘေး ဖြတ်ကျော်ရန် ခွဲတမ်း များ ရှိနေလိမ့်မည်ဟု သူ ဘယ်တုန်းကမျှ မတွေးမိခဲ့ချေ။

ဆိုလိုသည်မှာ သူသာ ယဲ့ဖုန်း နောက်သို့ လိုက်ပါက သူတော်စင်တက်လှမ်းခြင်း ကပ်ဘေး အတွက် အရည်အချင်းများ ရရှိနိုင်မည် မဟုတ်လား။

သူ၏ စိတ်ဝင်စားနေသော အမူအရာကို မြင်သောအခါ ယဲ့ဖုန်းသည် အမူအရာ ကင်းမဲ့စွာ နေနေသော်လည်း၊ ရင်တွင်း၌မူ 'ငါ့ငါးစာကိုတော့ ဟပ်မိပြီဟေ့' ဟု တိတ်တဆိတ် တွေးလိုက်၏။

“သေချာတာပေါ့... ဒါ အပြည့်အဝ အမှန်တရားပဲ...”

ယဲ့ဖုန်းက အတည်ပြုသည့် အနေဖြင့် ခေါင်းညိတ်လိုက်သည်။

“စိတ်ချပါ ဂိုဏ်းချုပ်ယဲ့... ကပ်ဘေး ဖြတ်ကျော်ဖို့က ပြဿနာ မရှိပါဘူး... ကျပန်း ရွေးလိုက်တဲ့ ဘယ်သူမဆို ရပါတယ်... ကျွန်တော် အပြည့်အဝ ပူးပေါင်း ဆောင်ရွက်ပေးပါ့မယ်... မိုးကြိုး နန်းတော် ကို ဖြတ်ပြီး ကပ်ဘေး မဖြတ်ကျော်ရဲတဲ့ သူ ဘယ်သူပဲဖြစ်ဖြစ် လက်တစ်ချက် ဝှေ့ယမ်းပြီး ဖိနှိပ်ပစ်လိုက်မယ်...”

ကြယ်မြစ် တပိုင်းသူတော်စင် က လက်သီးဆုပ်လိုက်သည်။

ကပ်ဘေး ဖြတ်ကျော်မည့် ခွဲတမ်း တစ်ခု ရရှိရန် သူ အစွမ်းကုန် ကြိုးစားရန် ဆုံးဖြတ်လိုက်၏။ အောင်မြင်သည် ဖြစ်စေ၊ မအောင်မြင်သည် ဖြစ်စေ စမ်းကြည့်ရကျိုး နပ်သည်။

“ဒီလောက် အကြမ်းဖက်စရာ မလိုပါဘူးကွာ...” ယဲ့ဖုန်းက လက်များကို ဆက်တိုက် ဝှေ့ယမ်းလိုက်၏။ “မိုးကြိုး နန်းတော် ကို ဖြတ်ပြီး စမ်းသပ်မှု အောင်မြင်ဖို့က အဲဒီလောက် မရိုးရှင်းဘူး...”

“ခက်လို့လား...” ကြယ်မြစ် တပိုင်းသူတော်စင် က မျက်မှောင်ကြုတ်လျက် မေးလိုက်သည်။

“မိုးကြိုး နန်းတော် မှာ စမ်းသပ်မှု အောင်မြင်ဖို့ မိုးကြိုး အဆောင် တစ်ခု ကိုင်ဆောင်ထားရမယ်... ဒီ အဆောင် တွေကို ကျင့်ကြံခြင်း လောက အမျိုးမျိုးမှာ ဖြန့်ဝေပေးလိုက်...” ယဲ့ဖုန်းက ပြောလိုက်၏။

ယဲ့ဖုန်းက လက်ဝါးကို ဖြန့်လိုက်သည်။

သူ၏ လက်ဝါး အလယ်တွင် "မိုးကြိုး" ဟူသော စာလုံးနှင့် တူညီသည့် အပြာရောင်နှင့် အဖြူရောင် အဆောင် ရာချီ ထွက်ပေါ်လာပြီး၊ ပြင်းထန်သော မိုးကြိုး စွမ်းအင် များ တလက်လက် တောက်ပနေ၏။

ဤအဆောင်များကို မိုးကြိုး နန်းတော် ရှိ မိုးကြိုးရေကန် ၏ စွမ်းအားကို အသုံးပြု၍ ဖန်တီးထားခြင်းပင်။

ရှန်ကျိုး တိုက်ကြီး မှ မဟုတ်သော သတ္တဝါများသည် မိုးကြိုး နန်းတော် ၏ စမ်းသပ်မှုကို အောင်မြင်ရန် မိုးကြိုး အဆောင် တစ်ခုကို သန့်စင်ရမည်ပင်။

မိုးကြိုး နန်းတော် ကို အသုံးပြု၍ စမ်းသပ်မှု အောင်မြင်ဖူးသော မည်သည့် နေရာတွင်မဆို၊ ထိုနေရာသည် မိုးကြိုး နန်းတော် နှင့် ကောင်းကင်တာအို၏ အကြွင်းအကျန်များ နှစ်ခုလုံး၏ အမှတ်အသား ပြုခြင်းကို ခံရမည်ပင်။ နောက်ပိုင်းတွင် အခြား ကျင့်ကြံသူ တစ်ဦးက စမ်းသပ်မှု လိုအပ်ချက်များနှင့် ပြည့်မီသောအခါ၊ သူတို့ အသုံးပြုရန် မိုးကြိုး အဆောင် တစ်ခု ဖန်တီးပေးမည်ပင်။

လောက တစ်ခုသည် မိုးကြိုး နန်းတော် ကို စမ်းသပ်မှုများအတွက် အကြိမ်များစွာ အသုံးပြုပြီးပါက၊ နောက်ဆုံးတွင် ရှန်ကျိုး တိုက်ကြီး ၏ ဝါးမြိုခြင်းကို ခံရကာ အောက်လောက တစ်ခု ဖြစ်လာမည်ပင်။

အထက်ပါအချက်များသည် ယဲ့ဖုန်း၏ အစီအစဉ်ပင် ဖြစ်၏။

“ဂိုဏ်းချုပ်ယဲ့ စိတ်ချပါ... မိုးကြိုး အဆောင် တွေ ဖြန့်ဝေဖို့ ကျွန်တော် တာဝန်ယူလိုက်ပြီ...” ကြယ်မြစ် တပိုင်းသူတော်စင် သည် မိုးကြိုး အဆောင် ရာချီကို ယူလိုက်ပြီး သူ၏ ခန္ဓာကိုယ် တလက်လက် တောက်ပသွားကာ ပျောက်ကွယ်သွား၏။

မြို့ကိုးမြို့ ကြယ်တိမ်တိုက် ၏ တစ်နေရာတွင်..

အချင်း မိုင်ရှစ်သောင်း ရှိသော သက်ရှိကြယ် တစ်ခုဝယ်..

ကြယ်မြစ် တပိုင်းသူတော်စင် သည် ဝိညာဉ်ပင်လယ်အဆင့် အထွတ်အထိပ် တွင် ရှိသော ကျင့်ကြံသူ တစ်ဦး၏ ကော်လာကို ဆွဲကိုင်ကာ မိုးကြိုး အဆောင် တစ်ခုကို သူ၏ လက်ထဲသို့ အတင်း ထည့်ပေးလိုက်၏။

“ဒီ မိုးကြိုး အဆောင် ကို သန့်စင်ပြီး မိုးကြိုး နန်းတော် ရဲ့ စမ်းသပ်မှုကို အောင်မြင်အောင် လုပ်... မလုပ်ရင် မင်းရဲ့ ကောင်းကင်ဝါး ကြယ် ကို လက်သီး တစ်ချက်တည်းနဲ့ ရိုက်ခွဲပစ်မယ်... နားလည်လား...” သူက ခြိမ်းခြောက်လိုက်သည်။

ပြောပြီးသည်နှင့် လက်သီးတစ်ချက် ပစ်သွင်းလိုက်၏။

ချက်ချင်းပင် အဝေးရှိ လူသူကင်းမဲ့သော တောင်ကြီး တစ်တောင်မှာ တစ်စစီ ကြေမွသွားတော့သည်။

“နား... နားလည်ပါပြီ ခင်ဗျာ...”

ဝိညာဉ်ပင်လယ်အဆင့် ကျင့်ကြံသူ မှာ ကြောက်လွန်း၍ ခြေထောက်များ ပျော့ခွေသွားပြီး မေ့လဲလုနီးပါး ဖြစ်သွားရ၏။

ကြယ်တာရာ ဟင်းလင်းပြင်တွင်..

ယဲ့ဖုန်းသည် ထိုမြင်ကွင်းကို ကြည့်ရင်း နှုတ်ခမ်းထောင့်များ တွန့်ကွေးသွား၏။

‘အိုက်ယား... '

'မင်းကို အစွမ်းအထက်ဆုံး "အဆောင် တမန်တော်" အဖြစ် ငါ ဂုဏ်ပြုလိုက်ပါတယ်ကွာ...'

အစပိုင်းတွင် ယဲ့ဖုန်း အနေဖြင့် ဤကဲ့သို့ အတင်းအဓမ္မ လုပ်ဆောင်မည့် နည်းလမ်းကို မမျှော်လင့်ထားခဲ့သော်လည်း၊ မိုးကြိုး အဆောင် ကို သန့်စင်ရန်နှင့် သူတို့၏ စမ်းသပ်မှုများအတွက် မိုးကြိုး နန်းတော် ကို အတင်းအဓမ္မ အသုံးပြုရန် ကျင့်ကြံသူများကို ခြိမ်းခြောက်ခြင်းသည် ကြောက်စရာကောင်းသော်လည်း အလွန် အကျိုးသက်ရောက်မှု ရှိလှသည်။

"ဝုန်း ဝုန်း ဝုန်း"

မကြာမီ အချင်း မိုင်ရှစ်သောင်း ရှိသော ကောင်းကင်ဝါး ကြယ် ပေါ်မှ တစ်စုံတစ်ယောက်သည် သူ၏ စမ်းသပ်မှုကို စတင်ခဲ့ပြီး မိုးကြိုး နန်းတော် ထွက်ပေါ်လာခြင်းက ကြယ်တစ်လုံးလုံးကို လှုပ်ခတ်သွားစေခဲ့၏။

မကြာမီပင် ပထမဆုံး ကျင့်ကြံသူ သည် စမ်းသပ်မှုကို ပြီးဆုံးသွား၏။

သူသည် မိုးကြိုး နန်းတော် ထဲသို့ ဝင်ရောက်သွားပြီး ကုသိုလ်မှတ်တမ်း စာရင်း ၏ အပေါ်ပိုင်းကိုသာ မြင်တွေ့နိုင်ခဲ့၏။ ကောင်းကင်သူတော်စင် ယဲ့ဖုန်း နှင့် မိုးကြိုး နန်းတော် ကို ဖန်တီးရာတွင် ပါဝင်သူ အားလုံး အကြောင်းကို သိရှိသွားသော်လည်း၊ အောက်ပိုင်းရှိ နောက်ခံ အကြောင်းအရာများကိုမူ မမြင်တွေ့နိုင်ခဲ့ချေ။

တစ်ချိန်တည်းမှာပင် မြို့ကိုးမြို့ ကြယ်တိမ်တိုက် သည် ရှန်ကျိုး တိုက်ကြီး ၏ ကောင်းကင်တာအို၏ အကြွင်းအကျန်များ ကြောင့် အမှတ်အသား ပြုခံလာရပြီး ကနဦး ထိုးဖောက် ဝင်ရောက်မှုကို စတင်လိုက်၏။

မိုးကြိုး နန်းတော် နတ်ဘုရား နှင့် ရွေးချယ်ခံရသူ အနေဖြင့်၊ ယဲ့ဖုန်းသည် ကောင်းကင်တာအို၏ အကြွင်းအကျန်များ ကြီးထွားလာမှုကို ခံစားသိရှိနိုင်၏။

နှေးကွေးသော်လည်း နောက်ဆုံးတွင် ပထမဆုံး ခြေလှမ်းကို စတင်နိုင်ခဲ့ပြီ ဖြစ်သည်။

“အောင်မြင်ပြီကွ...”

“ဟားဟားဟား”

ယဲ့ဖုန်းက အောင်ပွဲခံသည့် အနေဖြင့် သုံးကြိမ်တိုင်တိုင် ကျယ်လောင်စွာ ရယ်မောလိုက်၏။

ဆက်လက်၍ သူသည် ဤနည်းလမ်းကို ပုံတူကူးကာ ရှန်ကျိုး တိုက်ကြီး အတွက် အောက်လောကပေါင်း မရေမတွက်နိုင်အောင် ဖန်တီးပြီး၊ ကောင်းကင်တာအို၏ အကြွင်းအကျန်များ ကို အားကောင်းလာစေရန် သေချာအောင် လုပ်ဆောင်တော့မည်ပင်။

ကောင်းကင်ဘုံ ပြန်လည် တည်ဆောက်ခြင်းမှာ မကြာမီ ဖြစ်လာတော့မည်တည်း။

ထိုအချိန်ရောက်လျှင် ရွေးချယ်ခံရသူ တစ်ဦးအနေဖြင့် သူသည် နတ်ဘုရား အဆင့် အကူအညီများကို ရရှိမည် ဖြစ်ပြီး၊ မျှော်လင့်မထားသော အကျိုးကျေးဇူးများကိုပါ ရရှိလာမည် ဖြစ်သည်။

ပေဟယ် ကြယ် ပေါ်တွင်..

ကောင်းကင်လျှို့ဝှက်ချက် ဂိုဏ်း ၏ ဂိုဏ်းချုပ် လီဝမ်ရှန်း သည် နောက်ဆုံးတွင် နဂါးဧကရာဇ် သွေး တစ်ပုလင်းလုံးကို သန့်စင်နိုင်ခဲ့ပြီး၊ သူ၏ အခြေခံကို မယုံနိုင်လောက်အောင် ခိုင်မာစေကာ တပိုင်း ဟင်းလင်းပြင်ဖြိုခွဲအဆင့် သို့ ရောက်ရှိသွားတော့၏။

“ဂျုန်း…”

သူ၏ အရေပြားပေါ်တွင် မိုးကြိုးများ စတင် လက်လာ၏။

ဤသည်မှာ မိုးကြိုး နန်းတော် မှတစ်ဆင့် သူ စမ်းသပ်မှုကို အောင်မြင်နိုင်ပြီ ဖြစ်ကြောင်း လက္ခဏာ တစ်ရပ်ပင်။

လီဝမ်ရှန်း ကောင်းကင်ကပ်ဘေး ကို ဆွဲဆောင်နိုင်ရခြင်း အကြောင်းရင်းမှာ၊ ယဲ့ဖုန်းသည် မိုးကြိုး အဆောင် တစ်ခုကို နဂါးဧကရာဇ် သွေး နှင့် ပေါင်းစပ်ထားခဲ့သည် ဖြစ်ရာ လီဝမ်ရှန်းက သွေးကို သန့်စင်လိုက်ချိန်တွင် ထို အဆောင် ကိုပါ သန့်စင်လိုက်သောကြောင့် ဖြစ်၏။

“ငါ...နောက်ဆုံးတော့ ကပ်ဘေး ဖြတ်ကျော်နိုင်ပြီကွ...”

လီဝမ်ရှန်း ကောင်းကင်သို့ မော်ကြည့်ကာ ဝမ်းသာလွန်း၍ မျက်ရည်များ စီးကျလာရင်း အော်ဟစ်လိုက်မိသည်။

သို့သော် ထိုအချိန်တွင် ဆယ်ရက် ကုန်လွန်သွားခဲ့ပြီပင်။

ယဲ့ဖုန်း ချုပ်နှောင်ထားသော ဝါးမြို ငါး မှာ သူ၏ ချုပ်နှောင်မှုမှ ရုန်းထွက်လာပြီး၊ ပေဟယ် ကြယ် ၏ ကောင်းကင်ယံသို့ လျင်မြန်စွာ ကူးခတ်လာသည်။ မုန်တိုင်း တစ်ခုကို ဖန်တီး၍ ကြောက်မက်ဖွယ် အရှိန်အဝါများကို ထုတ်လွှတ်လိုက်ရာ ကျင့်ကြံသူ မရေမတွက်နိုင်အောင် ဖိနှိပ်ခံလိုက်ရ၏။

“ဒါ တပိုင်း ဧကရာဇ် အဆင့်ရှိတဲ့ ဘီလူး တစ်ကောင်ပဲ...”

“ငါတို့ ပေဟယ် ကြယ် ပေါ်မှာ အသန်မာဆုံး ဖြစ်တဲ့ ကောင်းကင်လျှို့ဝှက်ချက် ဂိုဏ်း ရဲ့ ဂိုဏ်းချုပ် က မူလနတ်ဘုရားအဆင့် အထွတ်အထိပ် မှာပဲ ရှိသေးတာ... သူ့ကို ဘယ်လိုမှ ယှဉ်နိုင်မှာ မဟုတ်ဘူး...”

“ပြီးသွားပြီကွာ...”

လူများမှာ မျက်နှာများ ဖြူရော်သွားကြတော့သည်။

“ဒါ ဝါးမြို ငါး ပဲ... ဒီ ဘီလူးရဲ့ အကောင်ပေါက် တွေက တစ်ချိန်က မုန်တိုင်း မျက်လုံး ကတစ်ဆင့် ပေါ်လာဖူးပြီး ကြီးမားတဲ့ ပျက်စီးဆုံးရှုံးမှုတွေ ဖြစ်စေခဲ့တယ်... ဒီအကောင်က ကြီးထွားလာတဲ့ အကောင် ဖြစ်ရမယ်...”

ကောင်းကင်လျှို့ဝှက်ချက် ဂိုဏ်း ၏ ဂိုဏ်းချုပ် လီဝမ်ရှန်း သည် သူ၏ ကပ်ဘေး ဖြတ်ကျော်မှုကို ဂရုမစိုက်နိုင်တော့ချေ။ တပိုင်း ဟင်းလင်းပြင်ဖြိုခွဲအဆင့် ၏ အရှိန်အဝါများကို ပေါက်ကွဲထွက်ပေါ်စေကာ ကောင်းကင်ယံသို့ တဟုန်ထိုး ပျံတက်သွား၏။

မြို့ကိုးမြို့ ကြယ်တိမ်တိုက် တွင်..

ယဲ့ဖုန်းသည် လေထဲတွင် မျောလွင့်နေသော လေဝိညာဉ်ပုလဲ ကို ကြည့်ကာ ပေဟယ် ကြယ် မှ ပို့လွှတ်လာသော မြင်ကွင်းကို ကြည့်ရှုခံစားရင်း သူ၏ နှုတ်ခမ်းများ အနည်းငယ် ကွေးတက်သွား၏။

“ပွဲစပြီဟေ့…”

--