အခန်း ၇၃၀

အခန်း (၇၃၀) လီဝမ်ရှန်း ၏ မဆုတ်မနစ်သော ဇွဲလုံ့လ၊ ကပ်ဘေး ဖြတ်ကျော်ခြင်း၊ ရှန်ကျိုး ၏ ဒဏ္ဍာရီ

“ဝါးမြို ငါး က စားဖို့လောက်ပဲ သိပြီး သူ့ရဲ့ တိုက်ခိုက်ရေး စွမ်းအားက သာမန်ပါပဲ... လီဝမ်ရှန်း က တပိုင်း ဟင်းလင်းပြင်ဖြိုခွဲအဆင့် ကို အခုမှ ရောက်ခါစ ဆိုပေမယ့် သူ အနိုင်ရသင့်တယ်...”

ယဲ့ဖုန်းသည် ထိုမြင်ကွင်းကို ကြည့်ရင်း တိုးတိတ်စွာ ရေရွတ်လိုက်၏။

လီဝမ်ရှန်း အဆင့်တက်မည့်နေ့သည် ဝါးမြို ငါး ချိတ်ပိတ်မှုမှ လွတ်မြောက်မည့် အချိန်နှင့် ကိုက်ညီနေမည် ဆိုသည်ကို သူ အစောကတည်းက တွက်ချက်ထားခဲ့ပြီး ဖြစ်သည်။

ဤတိုက်ပွဲမှာ သူ၏ မျှော်လင့်ထားမှု အတွင်းတွင်သာ ရှိနေ၏။

ပေဟယ် ကြယ်။

လူတိုင်း ဆူညံပွက်လောရိုက် နေကြ၏။

“ဟေ့... ဟိုမှာ ကြည့်စမ်း...”

“ကောင်းကင်လျှို့ဝှက်ချက် ဂိုဏ်း ရဲ့ ဂိုဏ်းချုပ် က မူလနတ်ဘုရားအဆင့် အထွတ်အထိပ် ကို ကျော်လွန်သွားပြီ... သူများ ဒဏ္ဍာရီထဲက ဟင်းလင်းပြင်ဖြိုခွဲအဆင့် ကို တက်လှမ်းသွားပြီး ငါတို့ ပေဟယ် ကြယ် ရဲ့ သမိုင်းကြောင်းမှာ ပထမဆုံး ကြီးမြတ်တဲ့ ဧကရာဇ် တစ်ပါး ဖြစ်လာပြီလား...”

“ကြီးမြတ်တဲ့ ဧကရာဇ် ဝမ်ရှန်း ဟာ အင်အားကြီးမားလိုက်တာဟေ့...”

ကျင့်ကြံသူများ အားလုံး စိတ်လှုပ်ရှား တက်ကြွနေကြ၏။

“ဒါက ဟင်းလင်းပြင်ဖြိုခွဲအဆင့် ရဲ့ ကြီးမြတ်တဲ့ ဧကရာဇ် တစ်ပါး မဟုတ်သေးဘူး... တပိုင်း ဟင်းလင်းပြင်ဖြိုခွဲအဆင့် ဒါမှမဟုတ် ဧကရာဇ် နီးပါး လို့ ခေါ်တယ်... အခုလို အဆင့်တက်နိုင်ရတဲ့ အကြောင်းရင်းက ကျွန်တော်တို့ရဲ့ ဂိုဏ်းချုပ် ဟာ အင်မော်တယ် ယဲ့ဖုန်း ချီးမြှင့်တဲ့ နဂါးဧကရာဇ် သွေး ကို ရရှိခဲ့လို့ပဲ...”

လူအုပ်ကြီး၏ မေးခွန်းများကို ကောင်းကင်လျှို့ဝှက်ချက် ဂိုဏ်း ၏ ဒုတိယ ဂိုဏ်းချုပ် က ရှေ့ထွက်ကာ တက်ကြွစွာ ရှင်းပြလိုက်သည်။

ဤသည်မှာ အင်မော်တယ် ယဲ့ဖုန်း ၏ ကျေးဇူးတော်သာ ဖြစ်ပြီး၊ ကောင်းကင်ဘုံ၏ အပြစ်ပေးမှုကို ခံရမည် စိုးသဖြင့် သူတို့အတွက် အခွင့်အရေး ယူရန် မဝံ့ရဲကြချေ။

“အင်မော်တယ် ယဲ့ဖုန်း ချီးမြှင့်တဲ့ နဂါးဧကရာဇ် သွေး လား...”

ထိုစကားကို ကြားသောအခါ အားလုံး ချက်ချင်း သဘောပေါက်သွားကြ၏။

ယဲ့ဖုန်း အကြောင်း ပြောလိုက်တိုင်း လူတိုင်း၏ စိတ်ထဲတွင် ပထမဆုံး ပေါ်လာသည့် ပုံရိပ်မှာ ကောင်းကင်ယံကို ထက်ပိုင်း ခွဲခဲ့သော ထိုကြောက်မက်ဖွယ် ဓားအလင်းတန်းကြီး ပင် ဖြစ်၏။

ယနေ့တိုင်အောင် သူတို့၏ မှတ်ဉာဏ်ထဲတွင် လတ်ဆတ်နေဆဲပင်။

နောက်ကွယ်တွင်..

ယဲ့ဖုန်းသည် အားရပါးရ ရယ်လိုက်၏။

“ဒါမှပေါ့... အဲဒီလိုပဲ... ငါ့ကို အပြင်းအထန် ချီးကျူးကြ... မြူခိုးဂိုဏ်း ကို သေချာ အရောင်းမြှင့်တင်ပေးကြ... ဒါမှ ငါ ဂုဏ်သတင်း မှတ်တိုင်တွေ ပိုရမှာ...”

ပေဟယ် ကြယ်၊ ကောင်းကင်အောက်တွင်..

လီဝမ်ရှန်း သည် လက်များကို တင်းကျပ်စွာ ဆုပ်ကိုင်ထားပြီး သူ၏ အနောက်တွင် ယခုမှ စတင် စုစည်းထားသော ကျန်းပေါင်း သောင်းချီ မြင့်မားသည့် ဓမ္မရုပ်တုကြီး တစ်ခု ဖွဲ့တည်လာ၏။

ဝါးမြို ငါး နှင့် ရင်ဆိုင်ရာတွင် သူ၏ အရှိန်အဝါမှာ အနည်းငယ်မျှပင် အားနည်းနေခြင်း မရှိချေ။

“တာအို ရောင်းရင်းတို့... သတိထားကြပါဗျို့...”

လီဝမ်ရှန်း က လေးနက်သော အသံဖြင့် သတိပေးလိုက်၏။

နတ်ဘုရား အာရုံ ၏ အားဖြည့်မှုဖြင့် သူ၏ အသံမှာ ပေဟယ် ကြယ် တစ်ခုလုံးသို့ လျင်မြန်စွာ ပျံ့နှံ့သွားပြီး လူတိုင်း၏ နားဘေးတွင် တိုက်ရိုက် ပြောနေသကဲ့သို့ ဖြစ်နေ၏။

ကျင့်ကြံသူများ အားလုံး ကောင်းကင်ကို မော်ကြည့်လိုက်ကြပြီး သူတို့၏ ဝိညာဉ် မျက်လုံး များကို အသုံးပြု၍ လီဝမ်ရှန်း သည် ကောင်းကင်အောက်တွင် ဝါးမြို ငါး နှင့် ရင်ဆိုင်နေသည်ကို မြင်တွေ့လိုက်ကြရ၏။

သူ၏ အိုမင်းနေသော ပုံရိပ်ကို မြင်ရသောအခါ မရေမတွက်နိုင်သော လူများက သူသည် အလွန် ခမ်းနားကြီးကျယ်သည်ဟု ခံစားလိုက်ရသည်။

သူ တစ်ယောက်တည်းက ထို ဘီလူးကို ထိန်းထားပေးနေသည် မဟုတ်ပါလား။

“အုန်း”

ဝါးမြို ငါး သည် လီဝမ်ရှန်း ၏ ကျန်းပေါင်း သောင်းချီ မြင့်မားသော ဧရာမ ဓမ္မရုပ်တုကြီးကို စိုက်ကြည့်ရင်း၊ ၎င်း၏ မျက်လုံးများထဲတွင် ကြောက်ရွံ့မှု အရိပ်အယောင် အနည်းငယ် လင်းလက်သွားသော်လည်း မကြာမီမှာပင် လောဘက ကြောက်ရွံ့မှုကို လွှမ်းမိုးသွားတော့သည်။

၎င်း စတင် တိုက်ခိုက်တော့၏။

ပေဟယ် ကြယ် ကို ဝါးမြိုနိုင်သည်နှင့် တစ်ပြိုင်နက်၊ ၎င်းသည် အစစ်အမှန် ဟင်းလင်းပြင်ဖြိုခွဲအဆင့် ကို တက်လှမ်းနိုင်မည် ဖြစ်ပြီး ပိုမို အစွမ်းထက်သော ခွန်အားကို ပိုင်ဆိုင်နိုင်မည်ပင်။

ဤစွန့်စားမှုမှာ တန်ဖိုးရှိသည်။

“ကောင်းကင်လျှို့ဝှက်ချက် ရတနာ တံဆိပ်တုံး...”

လီဝမ်ရှန်း ၏ လက်များက မန္တန် လက်ဟန်များကို ဖော်စပ်လိုက်ပြီး သူ၏ အနောက်ရှိ ဓမ္မရုပ်တု ၏ ပုံရိပ်ယောင် သည်လည်း မန္တန် လက်ဟန်များ စတင ရေးဆွဲကာ ပြေးဝင်လာသော ဝါးမြို ငါး ကို ရိုက်ချလိုက်၏။

"အွတ်"

ဝါးမြို ငါး မှာ တန်ဖိုးကြီး တံဆိပ်တုံး ၏ ရိုက်နှက်မှုကြောင့် လွင့်ထွက်သွားသည်။ ၎င်း၏ ခေါင်းပေါ်တွင် ဒဏ်ရာ တစ်ခု ပွင့်သွားသော်လည်း၊ အမြီးကို ဝှေ့ယမ်းကာ ဓမ္မရုပ်တု ၏ ပုံရိပ်ယောင်ကို ရိုက်ခွဲပစ်ပြီး လီဝမ်ရှန်း ကို ယူဇနာ ရာပေါင်းများစွာ အထိ လွင့်ထွက်သွားစေခဲ့သည်။

“ဝေါ့...”

လီဝမ်ရှန်း သွေးတစ်ပွက် အန်ချလိုက်ရ၏။

“တော်တော် ပြင်းထန်တဲ့ တိုက်ခိုက်မှုပဲ...”

သူ၏ မျက်နှာအမူအရာမှာ အံ့အားသင့်မှုများ ပြည့်နှက်နေသည်။

နောက်ကွယ်တွင်..

ယဲ့ဖုန်း ခေတ္တမျှ မှင်သက်သွား၏။

“လီဝမ်ရှန်း က အနည်းဆုံးတော့ တပိုင်း ဟင်းလင်းပြင်ဖြိုခွဲအဆင့် မှာ ရှိနေပြီး နဂါးဧကရာဇ် သွေး နဲ့ ပေါင်းစပ်ထားတာတောင် ဝါးမြို ငါး ရဲ့ ပြိုင်ဘက် မဟုတ်ဘူးလား...”

“သြော်... ဟုတ်သားပဲ...”

“လီဝမ်ရှန်း က အထောက်အကူပြု ကျင့်စဉ် နည်းလမ်း ကို ကျင့်ကြံဖို့ အချိန် မရသေးဘူးလေ... ဒါကြောင့် သူ့ရဲ့ တိုက်ခိုက်ရေး စွမ်းအားက သာမန်ပဲ ရှိနေပြီး ဝါးမြို ငါး နဲ့ အကြမ်းဖျင်း တူညီနေတာပဲ...”

“ဒီပွဲက အချင်းချင်း အားနည်းနေတဲ့ သူနှစ်ယောက် ရန်ဖြစ်နေသလိုပဲ...”

ယဲ့ဖုန်း အနည်းငယ် ဆွံ့အသွားသည်။

အကယ်၍ ရှန်ကျိုး တိုက်ကြီး မှ တပိုင်း ဟင်းလင်းပြင်ဖြိုခွဲအဆင့် ကျင့်ကြံသူ တစ်ဦးသည် အဆင့်လတ် ဝိညာဉ်ရတနာ တစ်ခုကို ကိုင်ဆောင်ကာ အစွမ်းထက်သော နတ်ဘုရား စွမ်းရည် များကို ကျင့်ကြံထားပြီး အစွမ်းထက် အထောက်အကူပြု ကျင့်စဉ် နည်းလမ်း အချို့ကိုပါ တပ်ဆင်ထားမည် ဆိုပါက၊ ဝါးမြို ငါး ကို သတ်ဖြတ်ရန် တိုက်ကွက် တစ်ကွက် သို့မဟုတ် နှစ်ကွက်ခန့်သာ လိုအပ်မည်ပင်။

အကယ်၍ မိုယင်၊ ဟိုယွင်ကျဲ နှင့် အခြား သူများ တပိုင်း ဟင်းလင်းပြင်ဖြိုခွဲအဆင့် သို့ ရောက်ရှိသွားပါက၊ ဝါးမြို ငါး ကို သတ်ဖြတ်ရန် ဓားတစ်ချက်တည်းဖြင့်ပင် လုံလောက်နေမည်ပင်။

'အင်း... အပြင်လောကကို ရောက်လာမှပဲ ရှန်ကျိုး တိုက်ကြီး က ကျင့်ကြံသူတွေရဲ့ အခြေခံတွေက ဘယ်လောက် နက်ရှိုင်းတယ်၊ အစွမ်းထက်တဲ့ နတ်ဘုရား စွမ်းရည် တွေနဲ့ အထောက်အကူပြု ကျင့်စဉ် နည်းလမ်း တွေ အများကြီး ပိုင်ဆိုင်ထားတယ် ဆိုတာကို ငါ သဘောပေါက်တော့တယ်... သူတို့ရဲ့ အလုံးစုံ စွမ်းအားက တကယ်ကို မြင့်မားတာပဲ...'

ယဲ့ဖုန်း တိတ်တဆိတ် တွေးတောနေမိသည်။

ပေဟယ် ကြယ်။

“ဒုက္ခပဲ...”

“ကောင်းကင်လျှို့ဝှက်ချက် ဂိုဏ်း ရဲ့ ဂိုဏ်းချုပ် ဒဏ်ရာ ရသွားပြီဟေ့...”

လီဝမ်ရှန်း နှင့် ဝါးမြို ငါး တို့ အနိုင်အရှုံး မပေါ်ဘဲ အကြိတ်အနယ် တိုက်ခိုက်နေရသည်ကို မြင်သောအခါ ကျင့်ကြံသူ အများအပြား အကြီးအကျယ် ထိတ်လန့်သွားကြ၏။

“အားလုံးပဲ... မကြောက်ကြနဲ့...”

“ကောင်းကင်ကြီး ပြိုကျလာရင်တောင်... ငါ ကာကွယ်ပေးထားမယ်...”

လီဝမ်ရှန်း က ဟိန်းဟောက်လိုက်သည်။

ပေဟယ် ကြယ် တစ်ခုလုံးရှိ တစ်ဦးတည်းသော တပိုင်း ဟင်းလင်းပြင်ဖြိုခွဲအဆင့် ကျင့်ကြံသူ တစ်ယောက် အနေဖြင့်၊ သူသည် ပြင်ပရန်သူများကို ကာကွယ်ရန် တာဝန်ယူရမည်ပင်။

သူသာ ကျရှုံးသွားခဲ့လျှင် ပေဟယ် ကြယ် တစ်ခုလုံး ပျက်စီးသွားတော့မည်တည်း။

ထိုအခိုက်အတန့်တွင်..

လီဝမ်ရှန်း မှာ မီးဟုန်းဟုန်း တောက်လောင်နေသည့်အလား သူ၏ အရှိန်အဝါများ တဟုန်ထိုး မြင့်တက်လာပြီး၊ သူ၏ ခန္ဓာကိုယ် ပတ်လည်ရှိ မိုးကြိုးများမှာ ပိုမို တောက်ပ စူးရှလာတော့သည်။

“အန္တရာယ်ကြုံလာတဲ့ အချိန်မှာ ကောင်းကင်လျှို့ဝှက်ချက် ဂိုဏ်း ရဲ့ ဂိုဏ်းချုပ် က ရှေ့ထွက်ပြီး ကြောက်စရာကောင်းတဲ့ ရန်သူကို တားဆီးပေးတယ်... ကမ္ဘာလောကကြီး အောက်က လူတွေကို ကယ်တင်ပေးတယ်... ဒါက တကယ့် ဖြောင့်မတ်မှန်ကန်မှု ပဲကွ...”

“ဒါကမှ ကြီးမြတ်တဲ့ ဧကရာဇ် တွေရဲ့ လုပ်ရပ်မျိုးပဲ...”

“သူက ‘ကြီးမြတ်တဲ့ ဧကရာဇ်’ ဆိုတဲ့ ဘွဲ့နဲ့ တကယ်ကို ထိုက်တန်ပါတယ်...”

ပေဟယ် ကြယ် ပေါ်ရှိ သတ္တဝါများသည် လီဝမ်ရှန်း ၏ စကားများကို ကြားသောအခါ သူတို့ကိုယ်တိုင် တိုက်ပွဲတွင် ပါဝင်နေရသကဲ့သို့ ခံစားလိုက်ရပြီး၊ အားလုံး လက်သီးများကို ဆုပ်ကိုင်ထားကာ သူတို့၏ တိုက်ခိုက်လိုစိတ်များ အပြင်းအထန် မြင့်တက်လာတော့သည်။

“အင်း... တကယ်ပဲ...”

နောက်ကွယ်တွင် ယဲ့ဖုန်းသည်လည်း သဘောတူသည့် အနေဖြင့် ခေါင်းညိတ်လိုက်၏။

လီဝမ်ရှန်း သည် ထွက်မပြေးဘဲ သူ၏ နေရာတွင် အခိုင်အမာ ရပ်တည်ကာ သူ၏ တိုက်ခိုက်ရေး စွမ်းအားကို မြှင့်တင်ရန် အတွင်းရှိ နဂါးဧကရာဇ် သွေး ကို လှုံ့ဆော် အသုံးပြုလိုက်ခြင်းအပေါ် ယဲ့ဖုန်း တော်တော်လေး ကျေနပ်မိသည်။

ဤအချက်က သူ လူကဲခတ် မမှားခဲ့ကြောင်း သက်သေပြနေ၏။

“နဂါးသွေး ရဲ့ စွမ်းအား...”

လီဝမ်ရှန်း က သူ၏ လက်သီးများကို ဆုပ်ကိုင်လိုက်ရာ သူ၏ ခန္ဓာကိုယ်ပေါ်တွင် လောင်ကျွမ်းနေသော မီးတောက်များပမာ အနီရောင် အလင်းတန်းလေး တစ်ခု ထွက်ပေါ်လာပြီး၊ သူ၏ အရှိန်အဟုန်ကို ၃၀ ရာခိုင်နှုန်းခန့် မြှင့်တင်ပေးလိုက်၏။

“ခွပ်... ခွပ်... ခွပ်…”

လက်သီးများကို ဝှေ့ယမ်းကာ ကောင်းကင်ယံရှိ ဧရာမ ဝါးမြို ငါး နှင့် အပြင်းအထန် တိုက်ခိုက်လိုက်ရာ လက်သီးချက် တစ်ချက်ပြီး တစ်ချက် ထိမှန်သွား၏။ ဝါးမြို ငါး ၏ ခန္ဓာကိုယ်မှာ ဆက်တိုက် ပေါက်ကွဲထွက်ကာ အနီရဲရဲ သွေးများ တရစပ်.. ပန်းထွက်လာတော့သည်။

"ဝုန်း"

ဝါးမြို ငါး မှာ နာကျင်လွန်းသဖြင့် အမြီးကို ဆက်တိုက် ရိုက်ခတ်ကာ လီဝမ်ရှန်း ကို လွင့်ထွက်သွားစေပြီး နှစ်ဖက်စလုံး ဒဏ်ရာများ ရရှိသွားကြ၏။

သို့သော် လီဝမ်ရှန်း သည် အနည်းငယ်မျှပင် မကြောက်ရွံ့ဘဲ တိုက်ပွဲထဲသို့ ဆက်လက် ဝင်ရောက် တိုက်ခိုက်နေဆဲပင်။

အချီ ရာပေါင်းများစွာ ကြာပြီးနောက်..

ဝါးမြို ငါး သည် နောက်ဆုံးတွင် ကြောက်လန့်သွားပြီး လှည့်ကာ ကောင်းကင်ယံဆီသို့ စတင် ထွက်ပြေးတော့သည်။

“ထွက်ပြေးဖို့ မစဉ်းစားနဲ့ကွ...”

လီဝမ်ရှန်း က ဟိန်းဟောက်လိုက်ပြီး သူ၏ စွမ်းအား အားလုံးကို စုစည်းကာ မပြည့်စုံသော်လည်း အစွမ်းထက်သော နတ်ဘုရား စွမ်းရည် တစ်ခုကို ဖော်စပ်လိုက်၏။

“သွေးနဂါး ဓား...”

သူသည် ဘယ်ဘက်လက်ဖြင့် မန္တန် လက်ကွက် တစ်ခုကို ရေးဖော်ကာ ညာဘက် လက်ကောက်ဝတ်ကို ဖိလျက် ညာဘက် လက်ချောင်းများကို ဓားတစ်လက်ပမာ ပေါင်းစပ်ကာ အားကုန် ခုတ်ချလိုက်သည်။

"ဝှစ်..."

သူ့အတွင်းရှိ နဂါးသွေး စွမ်းအားများသည် တစ်ခဏအတွင်း ထုတ်လွှတ်လိုက်ပြီး နားကွဲမတတ် နဂါးဟိန်းသံကြီး နှင့်အတူ ဝါးမြို ငါး ကို ခေါင်းဖြတ်လိုက်ရာ၊ ၎င်းမှာ ဥက္ကာပျံ တစ်ခုပမာ ပေဟယ် ကြယ် ပေါ်သို့ ပြုတ်ကျလာတော့သည်။

“ကြီးမြတ်တဲ့ ဧကရာဇ် ဝမ်ရှန်း ဟာ အင်အားကြီးမားလိုက်တာဟေ့...”

ပေဟယ် ကြယ် ပေါ်ရှိ ကျင့်ကြံသူများ အားလုံး ဟိန်းဟောက်လိုက်ကြရာ လီဝမ်ရှန်း ၏ လူကြိုက်များမှုမှာ ယခင်က တစ်ခါမှ မရှိဖူးသော အဆင့်တစ်ခုသို့ မြင့်တက်သွား၏။

ထိုအခိုက်အတန့်တွင်..

လီဝမ်ရှန်း သည် သူ၏ ဘဝအထွတ်အထိပ် သို့ ရောက်ရှိသွားပြီဟု ခံစားလိုက်ရ၏။

"ဝုန်း" ဒိုင်း...

ထိုစဉ် လေဟာနယ်ထဲတွင် ဝေဝါးဝါး မိုးကြိုး နန်းတော် တစ်ခု ပေါ်လာပြီး၊ ပေဟယ် ကြယ် ၏ ကောင်းကင်နှင့် မြေကြီး စွမ်းအားများကို စုစည်းကာ ဗဟိုချက်သို့ ဖြည်းညင်းစွာ ရွေ့လျားလာပြီးနောက် မိုးကြိုး နန်းတော် ကို ဝန်းရံကာ ကမ္ဘာပျက် ကောင်းကင်ကပ်ဘေး ကို ဖန်တီးလိုက်တော့သည်။

“ဒါ... ဒါဘာကြီးလဲ...”

“ဒါ ကောင်းကင်ဘုံက အပြစ်ပေးတာ များလား...”

ပေဟယ် ကြယ် ပေါ်ရှိ ကျင့်ကြံသူများ အားလုံး ထိတ်လန့်သွားကြ၏။

ကောင်းကင်လျှို့ဝှက်ချက် ဂိုဏ်း မှ လူအနည်းငယ်သာ အမှန်တရားကို သိရှိကြသည်။

“အားလုံးပဲ... မကြောက်ကြပါနဲ့...”

လီဝမ်ရှန်း က စိတ်လှုပ်ရှားစွာဖြင့် ပြောလိုက်၏။ သူ၏ အသံမှာ ပေဟယ် ကြယ် တစ်ခုလုံးသို့ ပျံ့နှံ့သွားသည်။ “ဒါက အင်မော်တယ် ယဲ့ဖုန်း ပြောပြခဲ့တဲ့ ကမ္ဘာပျက် ကောင်းကင်ကပ်ဘေး ပဲ... ဒါက မင်းတို့ရဲ့ ဂိုဏ်းချုပ် ဟင်းလင်းပြင်ဖြိုခွဲအဆင့် ကို တက်လှမ်းတော့မယ် ဆိုတဲ့ လက္ခဏာပဲဟေ့...”

“ကမ္ဘာပျက် ကောင်းကင်ကပ်ဘေး တဲ့လား...”

လူအုပ်ကြီးမှာ ထို အသုံးအနှုန်းကြောင့် ဇဝေဇဝါ ဖြစ်သွားကြ၏။

လီဝမ်ရှန်း က ဆက်လက် ရှင်းပြလိုက်သည်။

“အင်မော်တယ် ယဲ့ဖုန်း လာခဲ့တဲ့ ရှန်ကျိုး အထက်လောက တွေမှာ တပိုင်း ဟင်းလင်းပြင်ဖြိုခွဲအဆင့် ကနေ ဧကရာဇ် ဖြစ်ချင်တဲ့ သူတိုင်း ကပ်ဘေး ဖြတ်ကျော်ဖို့ လိုအပ်တယ်... အောင်မြင်သွားတာနဲ့ တစ်ပြိုင်နက် ဟင်းလင်းပြင်ဖြိုခွဲ ဧကရာဇ် ဆိုတဲ့ ပလ္လင်ကို အလွယ်တကူ တက်လှမ်းနိုင်တယ်...”

“မင်းတို့ရဲ့ ဂိုဏ်းချုပ် ဟာ ကပ်ဘေး ဖြတ်ကျော်ဖို့ အရည်အချင်း မရှိလို့ မူလနတ်ဘုရားအဆင့် အထွတ်အထိပ် မှာပဲ အမြဲ တစ်ဆို့နေခဲ့တာ...”

“ဒါပေမဲ့ အင်မော်တယ် ယဲ့ဖုန်း က ငါတို့ရဲ့ ပေဟယ် ကြယ် ကို သနားငဲ့ညှာပြီး ကမ္ဘာပျက် ကောင်းကင်ကပ်ဘေး ဖြတ်ကျော်ခွင့်ကို ချီးမြှင့်ပေးခဲ့တယ်...”

“ဒီနေ့ကစပြီး ငါတို့ ပေဟယ် ကြယ် အတွက် ဧကရာဇ် ဖြစ်ဖို့ လမ်းစ ပွင့်သွားပြီဟေ့...”

လီဝမ်ရှန်း က စိတ်လှုပ်ရှားမှု အပြည့်ဖြင့် ကျယ်လောင်စွာ ကြေညာလိုက်၏။

ထိုစကားများကို ကြားသောအခါ ပေဟယ် ကြယ် မှ လူများ အလွန်အမင်း အံ့အားသင့်သွားကြပြီး ယခုမှသာ ရှန်ကျိုး အထက်လောက များ ရှိနေကြောင်းကို သိရှိသွားကြတော့သည်။

“မင်းတို့ကို ပိုပြီး ထိတ်လန့်စရာကောင်းတဲ့ သတင်း တစ်ခု ပြောပြမယ်... ငါတို့ ပေဟယ် ကြယ် ကို ပညာပေးခဲ့တဲ့ သူတော်စင် ပေဟယ် ကလည်း ရှန်ကျိုး အထက်လောက ကပဲကွ...”

ကောင်းကင်လျှို့ဝှက်ချက် ဂိုဏ်း ၏ ဂိုဏ်းချုပ် လီဝမ်ရှန်း က ဆက်လက် ကြေငြာလိုက်၏။

ထိုစကားများကို ကြားသောအခါ ပေဟယ် ကြယ် တစ်ခုလုံး တိတ်ဆိတ်သွားတော့သည်။

သူတော်စင် ပေဟယ် က ရှန်ကျိုး အထက်လောက က ဟုတ်လား...

အင်မော်တယ် ယဲ့ဖုန်း ကလည်း ရှန်ကျိုး ကပဲလား...

ဒါဆို ရှန်ကျိုး အထက်လောက ဆိုတာ ဘယ်လောက်တောင် ခမ်းနားကြီးကျယ်ပြီး စည်ကားတဲ့ နေရာများလဲ...

ပေဟယ် ကြယ် ပေါ်ရှိ လူများ အားလုံး တောင့်တမှုများဖြင့် ပြည့်နှက်နေကြတော့သည်။

နောက်ကွယ်တွင်မူ..

“ကောင်းတယ်... တကယ့်ကို ကောင်းတယ်...”

ယဲ့ဖုန်းသည် လီဝမ်ရှန်း ၏ ဝါဒဖြန့်မှု အပေါ် အပြည့်အဝ ကျေနပ်သွားလေတော့၏။

--