အခန်း ၂၇၇

အခန်း (၂၇၇) လီယွဲ့ - ခပ်သိမ်းသော ကမ္ဘာလောကများကြားတွင် တူညီသော အဆင့်ရှိသူများ၌ ငါသည် ပြိုင်ဘက်ကင်း၏

ဤအခိုက်အတန့်၌။

လူမျိုးသုံးမျိုးမှ ပါရမီရှင်များ ဖြစ်စေ၊ ကျန့်ရှန်းခံတပ်မှ နတ်ဘုရားများ ဖြစ်စေ သူတို့အားလုံးသည် မျက်လုံးအပြူးသားဖြင့် ကြည့်နေကြပေ၏။

သူတို့ အဘယ်အရာကို မြင်လိုက်ရသနည်း။

ခေတ်အဆက်ဆက် ပါရမီရှင်များ စာရင်း တွင် အဆင့် (၁၄) ရှိသော တောက်ဝူဝီ၊ အဆင့် (၁၉) ရှိသော တီယန်ချုံးဟွာနှင့် အဆင့် (၂၂) ရှိသော ကူချန်း ဟူသည့် တာအိုသားတော်အဆင့်ရှိ ပြိုင်ဘက်ကင်း ပါရမီရှင် သုံးဦးစလုံး အသတ်ခံလိုက်ရသည်လော။

သူတို့သုံးဦး ပူးပေါင်းတိုက်ခိုက်ခဲ့သော်လည်း တူညီသော အဆင့်ရှိသည့် နတ်ဘုရားတစ်ပါး၏ သတ်ဖြတ်ခြင်းကို ခံလိုက်ရသည်လော။

လူမျိုးသုံးမျိုးမှ ပါရမီရှင်များစွာသည် အိပ်မက်မက်နေသလားဟု တွေးတောရင်း မှင်တက်မိနေကြ၏။

သို့မဟုတ်လျှင်...

ထိုမျှ မယုံနိုင်စရာကောင်းသော မြင်ကွင်းကို သူတို့ မည်သို့ မြင်တွေ့နိုင်မည်နည်း။

သူတို့သည် တာအိုမျိုးနွယ်၏ တာအိုသားတော်၊ ကောင်းကင်မျိုးနွယ်၏ ကောင်းကင်သားတော်နှင့် သွေးပင်လယ်မျိုးနွယ်၏ သန့်ရှင်းသော သားတော်တို့ ဖြစ်ကြပေ၏။

ထိပ်တန်း မျိုးနွယ်စုကြီးသုံးခုသည် ပြိုင်ဘက်ကင်း ပါရမီရှင်များကို မရေမတွက်နိုင်သော အရင်းအမြစ်များဖြင့် ပျိုးထောင်ပေးခဲ့ကြပြီး ၎င်းတို့သည် အနာဂတ်တွင် ဧကရာဇ်ဖြစ်လုနီးပါးအဆင့်သို့ တက်လှမ်းနိုင်မည့် အလားအလာရှိသူများ ဖြစ်ကြပေ၏။

သို့သော် ဤအခိုက်အတန့်၌...

သူတို့ ခေါင်းဖြတ်ခံလိုက်ရသည်လော။

ထိုလူမျိုးသုံးမျိုးမှ ပါရမီရှင်များကို မဆိုထားဘိ၊ လူမျိုးသုံးမျိုးမှ ရှေးဟောင်း သိုင်းပညာရှင်ကြီးအချို့ပင်လျှင် ထိုနေရာ၌ ကြောင်အမ်းသွားခဲ့ကြသည်။

ရှေးဟောင်း သိုင်းပညာရှင်ကြီးအချို့သည် သူတို့၏ နောက်ဆုံးအချိန်များအထိပင် ၎င်းတို့မျိုးနွယ်စုမှ တာအိုသားတော်အဆင့်ရှိသူများကို ဆဋ္ဌမအဆင့် နတ်ဘုရားတစ်ပါးက ဤမျှ လွယ်ကူစွာ သုတ်သင်နိုင်လိမ့်မည်ဟု လုံးလုံးလျားလျား မယုံကြည်နိုင်ခဲ့ကြပေ။

ထို့ကြောင့်...

ရှေးဟောင်း သိုင်းပညာရှင်ကြီးများသည် တုံ့ပြန်မှု အလွန်နှေးကွေးသွားခဲ့ပြီး သူတို့ကို ကယ်တင်ရန် အချိန်မမီလိုက်ချေ။

အမှန်တကယ်တွင်မူ...

အကယ်၍ သူတို့ မြန်မြန်ဆန်ဆန် တုံ့ပြန်နိုင်ခဲ့လျှင်ပင် ထိုပါရမီရှင်များကို ကယ်တင်နိုင်ခဲ့မည် မဟုတ်ပေ။

အဘယ်ကြောင့်ဆိုသော်...

ကျန့်ရှန်းခံတပ်တွင် တတိယအဆင့် နတ်ဘုရားများ ရှိနေပေ၏။ ရွှေရောင် တိမ်တိုက်များအထက်တွင်လည်း ဒုတိယအဆင့် နတ်ဘုရားများ ရှိနေသေးသည်။

"ဒါ တကယ်ကို အံ့ဩစရာပဲ..."

"ကောင်းကင်ဧကရာဇ်တောင်မှ ဆဋ္ဌမအဆင့် မှာရှိနေတုန်းက ဒီလို တိုက်ခိုက်နိုင်စွမ်းမျိုး ရှိခဲ့မှာ မဟုတ်ဘူး..."

"ခေတ်အဆက်ဆက် ပါရမီရှင်များ စာရင်း ထဲက မိစ္ဆာကောင်တွေအားလုံးကို သတ်ပစ်နိုင်တယ်..."

"သူက ဘယ်သူ့ရဲ့ သွေးသားဆက်ခံသူလဲ... ဘယ်လိုလုပ်ပြီး ဒီလောက်တောင် သန်မာနေရတာလဲ..."

"ငါတို့ နတ်ဘုရား လျှောက်လှမ်းတဲ့ ခြေလှမ်းတိုင်းကို ခြေရာခံလို့ ရပါတယ်... သူက ဒီလောက်အထိ သန်မာမနေသင့်ဘူး..."

စွမ်းအားကြီးမားသော နတ်ဘုရားများအားလုံး အံ့သြသွားကြပြီး တစ်ချိန်တည်းမှာပင် တွေဝေသွားကြသည်။

နတ်ဘုရားများ၏ စွမ်းအားသည် တစ်ညတည်းနှင့် ရရှိလာခြင်းမျိုး လုံးလုံးလျားလျား မဟုတ်ပေ။

သူသည် ကောင်းကင်ဧကရာဇ် တစ်ပါးပါး၏ သွေးသားဆက်ခံသူ ဖြစ်နေနိုင်သလော။

သို့သော် ကောင်းကင်ဧကရာဇ်၏ အမွေဆက်ခံသူဟူ၍ မရှိကြောင်း သူတို့အားလုံး ကောင်းစွာ သိထားကြသည်။

အကယ်၍ သူတို့သည် ကောင်းကင်ဧကရာဇ်၏ မျိုးဆက်များ ဖြစ်နေခဲ့လျှင်ပင်... ဤမျှ ကြောက်မက်ဖွယ်ကောင်းသော တိုက်ခိုက်နိုင်စွမ်းကို ပိုင်ဆိုင်ရန် လုံးလုံးလျားလျား မဖြစ်နိုင်ပေ။

"မျှော်လင့်ထားတဲ့အတိုင်းပဲ... သူက..."

တီယန်ယီက တိုးတိုးလေး ရေရွတ်လိုက်သည်။ သူမ၏ မျက်ဝန်းများ တောက်ပနေ၏။

"တကယ်လို့များ..."

"ငါတို့ အနာဂတ်အတွက် မျှော်လင့်ချက် ရှိနေသေးတယ်..."

"တကယ်လို့များ..."

"ငါတို့ ဒါကို အနာဂတ်မှာ ပြန်လည်ဖန်တီးနိုင်မယ်..."

"အချိန်ကာလရဲ့ အရိပ်တစ်ခု..."

သူမ၏ နှလုံးသားသည် ဗြောင်းဆန်နေပြီး အတွေးများ လွင့်မျောနေလေ၏။

...

"မင်းက ငါတို့ မျိုးနွယ်စုရဲ့ အဆင့် (၁၁) သန့်ရှင်းသော သားတော်ကို စိန်ခေါ်ချင်တာလား..."

သွေးပင်လယ်မျိုးနွယ်မှ ရှေးဟောင်း သိုင်းပညာရှင်ကြီးတစ်ဦးက လီယွဲ့ကို သတ်ဖြတ်လိုသော အကြည့်များဖြင့် စိုက်ကြည့်ကာ အေးစက်စွာ ပြောဆိုလိုက်သည်။

သန့်ရှင်းသော သားတော် ကူချန်း သေဆုံးသွားခဲ့ပြီ ဖြစ်၏။

သေချာသည်မှာ... ဤသည်မှာ ပြဿနာကြီးတစ်ခု မဟုတ်ပေ။ သူတို့၏ ဘိုးဘေးသည် ကူချန်းကို ပြန်လည်ရှင်သန်စေရန် နည်းလမ်းများ သေချာပေါက် ပိုင်ဆိုင်ထားသည်။

သို့သော် လူတိုင်း၏ စောင့်ကြည့်နေမှုအောက်တွင် သူတို့ မျိုးနွယ်စု၏ သန့်ရှင်းသော သားတော်သည် တူညီသော အဆင့်ရှိ နတ်ဘုရားတစ်ပါး၏ လက်ချက်ဖြင့် ဤမျှ လွယ်ကူစွာ သေဆုံးသွားခဲ့ခြင်းက သူတို့ မျိုးနွယ်စု၏ ဂုဏ်သိက္ခာကို ကျဆင်းစေခဲ့သည်။ ဤကိစ္စသည် ပြင်ပအာကာသ စစ်မြေပြင်ရှိ နောက်ဆုံးတိုက်ပွဲကိုပင် သက်ရောက်မှု ရှိနိုင်ပေသည်။