အခန်း ၁၀၆၁

အခန်း ၁၀၆၁ - မင်းတို့ ဘယ်သွားမလို့လဲ

"သူက ဘယ်သူလဲ"

လော့ကျစ်၏ မေးခွန်းက လူတိုင်း၏စိတ်ထဲကို မကောင်းသော အတိတ်နိမိတ်တစ်ခု ချက်ချင်းရောက်သွားစေသည်။

ဤမျှကြီးမားလှသော မဟာမိတ်တပ်ဖွဲ့ကြီးက သူတို့၏ ရှေ့မှောက်တွင် ရှိနေသော်လည်း လော့ကျစ်သည် ထူးဆန်းစွာ တည်ငြိမ်နေပြီး မျက်နှာထက်တွင် ပျာယာခတ်လေဟန် အရိပ်အယောင်မျှပင် မရှိချေ။ ဤသည်မှာ အလွန်ပုံမှန်မဟုတ်သော အခြေအနေပင်။

ယခုမူ သူ့ဘက်က ဤကဲ့သို့သော မေးခွန်းကို မေးမြန်းလိုက်သဖြင့် လူတိုင်း အလေးအနက် တွေးတောမိစေရန် ဖိအားပေးလိုက်သလို ဖြစ်သွားသည်။

မော့ဆက်၏စိတ်ထဲတွင် ကျန်းမုန့်လောင်၏ မျက်နှာ ပေါ်လာပြီးနောက် ထိုမျက်နှာမှာ သူ့မှတ်ဉာဏ်ထဲရှိ အခြားမျက်နှာတစ်ခုနှင့် တဖြည်းဖြည်း ထပ်တူကျသွားခဲ့သည်။

ယခင်က သူသည် ကျန်းမုန့်လောင်၏ အချက်အလက်များကို လေ့လာခဲ့ဖူးသော်လည်း ထိုလူနှင့် ဘယ်သောအခါမှ ဆက်စပ်တွေးတောမိခြင်း မရှိပေ။ သို့သော် လော့ကျစ်၏ အရိပ်အမြွက်ကြောင့်...

အလွန်တူလွန်းလှသည်။ ထိုလူနှစ်ယောက်၏ ရုပ်ရည်က အံ့သြစရာကောင်းလောက်အောင် ဆင်တူနေရုံသာမက သူတို့၏ အမူအရာများကလည်း လောကရှိ အရာအားလုံးကို ကစားစရာတစ်ခုအလား လျစ်လျူရှုတတ်သည့် သဘောထားချင်းလည်း ထပ်တူကျနေပေသည်။

"သူက အဲဒီလူနဲ့ ပတ်သက်နေတာလား"

ကြောက်မက်ဖွယ်ကောင်းသော တစ်ကိုယ်တော်စွမ်းအား၊ သူ ပြုစုပျိုးထောင်ထားသည့် ထူးခြားပြောင်မြောက်သော တပ်ဖွဲ့၊ ကုန်ခမ်းခြင်းမရှိသော လက်နက်သစ်များနှင့် အဆုံးအစမရှိ နက်ရှိုင်းမှုတို့ကြောင့် သူထွက်ပေါ်လာပုံမှာ ထိုအချိန်က ထိုလူ ရုတ်တရက်ကျော်ကြားလာပုံနှင့် အလားတူပင် အံ့အားသင့်ဖွယ် ကောင်းလှသည်။

"သွားကြစို့... မြန်မြန်သွား။ အခုချက်ချင်း ထွက်သွားကြ"

မော့ဆက်က အော်ဟစ်လိုက်သည်။

"စစ်ယာဉ်တန်းအားလုံး တိုက်ခိုက်တာကို ရပ်လိုက်တော့။ စကြဝဠာအမှတ်၇ကနေ ချက်ချင်း ဆုတ်ခွာကြစို့။ မြန်မြန်လုပ်"

မော့ဆက်ခမျာ လန့်ဖျန့်ကာ အော်ဟစ်နေပြီး သူ့မျက်နှာမှာ အလွန်အမင်း ကြောက်လန့်မှုကြောင့် ရှုံ့မဲ့နေချေသည်။

သူသည် မမျှတသော ထိုတိုက်ပွဲကို သူ့တစ်သက်တာလုံး ဘယ်တော့မှ မေ့နိုင်တော့မည်မဟုတ်ပေ။

တစ်ယောက်အားဖြင့် တစ်ထောင်ကျော်ကို တိုက်ခိုက်ခြင်းဖြစ်လေရာ ရလဒ်မှာ ကြိုတင်သတ်မှတ်ထားပြီးသားဟု ထင်ရသော်လည်း ထိုလူက သူ့စွမ်းအားအစစ်အမှန်ကို ပြသလိုက်ချိန်တွင်မူ စိတ်ပိုင်းဆိုင်ရာရော ဝိညာဉ်ပိုင်းဆိုင်ရာပါ မယှဉ်နိုင်သော အနှိုင်းမဲ့အခြေအနေကြောင့် သူတို့အားလုံး ဝပ်ဆင်းညွတ်တွားလိုက်ရလေသည်။

ထို့နောက် သူတို့သည် ထူးဆန်းသော စွမ်းအားတစ်ခုကြောင့် ဆန်းပြားသော အာကာသနယ်မြေတစ်ခုထဲသို့ ဆွဲသွင်းခံလိုက်ရပြီး ထိုနေရာတွင် နှစ်ပေါင်းတစ်သောင်းတိုင်အောင် နှိပ်စက်ညှဉ်းပန်းမှု အမျိုးမျိုးကို ခံစားခဲ့ရသည်။ သို့သော် လက်တွေ့ကမ္ဘာတွင်မူ တစ်စက္ကန့်မျှသာ ကုန်ဆုံးသွားပြီး သူတို့ ပြန်ထွက်လာချိန်တွင် ဝိညာဉ်မရှိသည့် ရုပ်အလောင်းများအလား ဖြစ်နေခဲ့သည်။

ပိုအရှက်ရစရာကောင်းသည်မှာ ထိုလူက သူတို့၏ အဝတ်အစားများကို ချွတ်ကာ သစ်ပင်ပေါ်၌ ချိတ်ဆွဲထားခဲ့ခြင်းပင်။ သူတို့လည်း စိတ်ပိုင်းဆိုင်ရာနှင့် ရုပ်ပိုင်းဆိုင်ရာ အလွန်အမင်း အားနည်းနေချိန်တွင် ထိုလူ စိတ်ကြိုက်ပြုမူသမျှကို နာခံရုံမှတစ်ပါး အခြားရွေးချယ်စရာ မရှိခဲ့ချေ။

ရာစုနှစ်ပေါင်းများစွာ ကုန်လွန်သွားခဲ့ပြီးနောက် သူတို့၏ ရုပ်ပိုင်းဆိုင်ရာဒဏ်ရာများ အနာကျက်သွားခဲ့သော်လည်း စိတ်ပိုင်းဆိုင်ရာဒဏ်ရာများမှာမူ ကျန်ရှိနေဆဲပင်။ ထိုလူ၏မျက်နှာကို မြင်ယောင်မိရုံမျှဖြင့်ပင် အိပ်မက်ဆိုးတစ်ခု ဖြစ်နေချေပြီ။

"မော့ဆက်... မင်း ဘာဖြစ်နေတာလဲ"

"ငါတို့ သူတို့ရဲ့ခံစစ်ကို ချိုးဖျက်တော့မှာလေ။ သူတို့ရဲ့စွမ်းအင်က သိပ်မခံတော့ဘူး။ အဲဒါကို ဘာလို့ ဆုတ်ခွာရမှာလဲ"

"ငါတို့က သူတို့ကို အရေးယူနေတာ မဟုတ်ဘူးလား။ တကယ်လို့ တခြားအဆင့်ကိုးသက်ရှိတွေသာ ထပ်သောင်းကျန်းလာရင် ယာယီပိတ်ဆို့အရေးယူရေးကော်မတီရဲ့ ဂုဏ်သိက္ခာကလည်း ကျဆင်းသွားလိမ့်မယ်"

"တိုက်ချင်ရင်တိုက်ကြ။ ဒီမှာပဲနေခဲ့။ ဒါပေမဲ့ ငါတို့အားလုံး သေရလိမ့်မယ်... မင်းရော ငါရော သူရောပဲ။ ငါတို့အားလုံး သေရလိမ့်မယ်"

မော့ဆက်ခမျာ စိတ်ဖောက်ပြန်သွားသည့်အလားပင်။

"မော့ဆက်... ဘာတွေဖြစ်နေတာလဲ"

ကမ္ဘာခြားစစ်မြေပြင်တွင် အဆင့်တစ်နေရာ၌ ရှိနေသော မော့ဆက်၏ လက်ရှိအခြေအနေက လူအများကို စိတ်မသက်မသာ ဖြစ်စေခဲ့သည်။

"မင်း တစ်ခုခုသိထားတာလား။ ပွင့်ပွင့်လင်းလင်း ပြောစမ်းပါ"

"အခုချက်ချင်း ထွက်သွားကြ။ တွန့်ဆုတ်မနေနဲ့"

မော့ဆက်၏ စိတ်ထဲတွင် ကြောက်ရွံ့မှုများကြောင့် ဗလာဖြစ်နေပြီး ကောင်းကောင်း မတွေးတောနိုင်တော့ချေ။

"မင်းတို့မသွားရင် ငါ သွားမယ်။ ငါ မသေချင်သေးဘူး။ အဲဒီလိုနှိပ်စက်တာကို ထပ်မခံစားချင်တော့ဘူး။ စကြဝဠာအမှတ်၇ဆိုတာ ငါတို့ ရန်စလို့ရတဲ့ အရာမဟုတ်ဘူး။ အခုကစပြီး သူတို့စိတ်တိုင်းကျ ပြုမူပါစေ။ သူတို့ကြိုက်သလို ဖွံ့ဖြိုးတိုးတက်ပါစေ။ သူတို့ကို ဘယ်တော့မှ သွားမရှုပ်ကြနဲ့တော့"

"မော့ဆက်"

စကြဝဠာအမှတ်၁မှ အခြားအဆင့်ကိုးသက်ရှိတစ်ယောက်က သူ့ကို ဖိထိန်းထားလိုက်သည်။

"စိတ်အေးအေးထားစမ်း"

"နေဦး"

ထိုအဆင့်ကိုးသက်ရှိက တစ်ခုခုကို ရုတ်တရက် တွေးမိသွားသည်။

"IPX-001တပ်ဖွဲ့ရဲ့ တပ်မှူးက အဲဒီလူနဲ့ ပတ်သက်နေတယ်လို့ ပြောလိုက်တာလား"

မော့ဆက်က ခေါင်းကို အပြင်းအထန် ညိတ်ပြလိုက်သည်။

"သွား... မြန်မြန်သွား... နောက်ကျရင် ငါတို့ထဲက တစ်ယောက်မှ လွတ်မှာမဟုတ်ဘူး"

"သူက အဲဒီလူနဲ့ ပတ်သက်နေတာလား"

"ဒါကြောင့်ကိုး"

"ဒါဆိုရင် အဲဒီလူက အခုထိ သက်ရှိထင်ရှားရှိနေသေးတယ်ဆိုတဲ့ အဓိပ္ပာယ်လား။ သူ စကြဝဠာအမှတ်၇မှာ ရှိနေသေးတာဖြစ်မယ်"

"ဘုရားရေ... ငါတို့သာ သူတို့ရဲ့ဌာနချုပ်ကို ဖျက်ဆီးပြီး စကြဝဠာအမှတ်၇ထဲကို ဇွတ်ဝင်သွားရင် ငါတို့ ဘယ်လိုသေသွားမှန်းတောင် သိလိုက်ရမှာ မဟုတ်ဘူး"

"ငါတို့ ထွက်သွားရမယ်။ အခုချက်ချင်းနော်"

ကျန်ရှိနေသော လူအယောက်နှစ်ထောင်ကျော်ထဲတွင် မော့ဆက်နှင့် ဆင်တူသော အတွေ့အကြုံမျိုးကို ခံစားခဲ့ရသူများ ရှိနေလေရာ ထိုလူနှင့် ပတ်သက်လာလျှင် သူတို့အနေနှင့် ကြောက်ရွံ့လေးစားစွာ ရင်ဆိုင်ရန်သာ တတ်နိုင်ကြသည်။

"စစ်ယာဉ်တန်းတွေအားလုံး တိုက်ခိုက်တာကိုရပ်ကြ။ ငါတို့ အခုချက်ချင်း ထွက်ခွာမယ်"

တစ်ခဏအတွင်းမှာပင် သောင်းနှင့်ချီသော စစ်ယာဉ်တန်းများမှာ လှည့်ထွက်သွားပြီး အရှိန်မြှင့်ရန် ပြင်ဆင်ကြတော့သည်။

"ဗိုလ်ချုပ်... သူတို့ ဘာဖြစ်နေကြတာလဲ"

"သူတို့ ထွက်သွားကြပြီလား။ ဘာဖြစ်လို့လဲ"

"မုန့်လောင်မှာ တပ်ဖွဲ့တစ်ခုပဲ ရှိတာလေ။ သူတို့မှာ အစွမ်းထက်လက်နက်တွေ ရှိနေရင်တောင် ဟိုဘက်မှာ အဆင့်ကိုးသက်ရှိထောင်ဂဏန်းလောက် ရှိတာကို"

"ဟုတ်တယ်... သူက အဲဒီလူနဲ့ အမျိုးတော်တယ်ဆိုပေမဲ့ အဲဒီလူနဲ့ယှဉ်ရင် သူက အားနည်းလွန်းသေးတယ်။ လောလောဆယ် ယာယီပိတ်ဆို့အရေးယူရေးကော်မတီကို ဘာခြိမ်းခြောက်မှုမှ မပေးနိုင်သေးပါဘူး"

"မဟုတ်ဘူး။ မဟုတ်ဘူး။ မဟုတ်ဘူး"

လော့ကျစ်က ရယ်မောလိုက်သည်။

"မင်းတို့ သူ့ကို အထင်သေးနေတာပဲ။ သူရဲ့ စွမ်းဆောင်ရည်က အရမ်းပြောင်မြောက်တယ်"

"သူ့ကို မြင်ဖူးလို့လား"

"အဲ့လိုတော့မဟုတ်ပါဘူး"

လော့ကျစ်က ခပ်ပြုံးပြုံးဖြင့် ပြောလေသည်။

"ဒါပေမဲ့ မင်းတို့ ယုံကြည်ထားလိုက်။ အဲဒီလူရဲ့ မျိုးဆက်တစ်ယောက်အနေနဲ့... သူတို့မှာ လုံးဝဥဿုံစိတ်ချရတဲ့ အကာအကွယ်တွေမရှိဘဲနဲ့ ဒီလောက်အန္တရာယ်များတဲ့ ကမ္ဘာခြားစစ်မြေပြင်ကို သူ့ကို လွှတ်ပါ့မလား"

"ဗိုလ်ချုပ်က တကယ်လောင်းကြေးထပ်နေတာပဲ"

တပ်မှူးများအားလုံးက လော့ကျစ်၏သတ္တိကို မချီးကျူးဘဲ မနေနိုင်တော့ပေ။

"ဟားဟားဟား... ဒါပေမဲ့ ဒါက ငါတို့ သေချာပေါက်နိုင်မယ့် လောင်းကစားတစ်ခုလို့ ယုံကြည်တယ်"

...

"ဝူး... ဝူး... ဝူး"

ဝေးလံသော ကောင်းကင်ယံထက်မှ ရွှေရောင်အလင်းတန်းများက လွှမ်းမိုးချုပ်ကိုင်နိုင်သော စွမ်းအားကြီးဖြင့် ပြေးဝင်လာသည်။

အရှိန်မြှင့်နေသော စစ်ယာဉ်တန်းများလည်း ကြီးမားလှသော မီးလုံးကြီးများ၏ ဝါးမြိုခြင်းကို ရုတ်တရက် ခံလိုက်ရပြီး အဆင့်မြင့်ပေါင်းစပ်အလင်းတန်းငါးရာကျော်က ယာယီပိတ်ဆို့အရေးယူရေးကော်မတီ၏ ယာဉ်တန်းကို တစ်ပြိုင်နက်တည်း ပစ်ခတ်တိုက်ခိုက်လိုက်သည်။

ခဏအတွင်းမှာပင် ယခင်က စနစ်တကျ ရှိနေခဲ့သော ယာဉ်တန်းကြီးမှာ မီးပင်လယ်အတွင်းသို့ ကျဆင်းသွားခဲ့ရသည်။

"အီတလီအမြောက်ပဲ။ ဒါ ကျန်းမုန့်လောင်ရဲ့ တပ်ဖွဲ့ပဲ။ သူတို့ ပြန်ရောက်လာပြီ"

စကြဝဠာအမှတ်၇ရှိ စစ်သည်တော်များက ကျယ်လောင်စွာ အော်ဟစ်အားပေးကြလေတော့သည်။

"တိုက်စစ်ဖွင့်ကြ။ သူတို့ရဲ့စစ်တပ်ကို ချေမှုန်းပြီး ကျဆုံးသွားတဲ့ ငါတို့စကြဝဠာအမှတ်၇ရဲ့ စစ်သည်တော်တွေအတွက် လက်စားချေကြစို့"

စိတ်လှုပ်ရှားနေသော စကြဝဠာအမှတ်၇ရှိ စစ်သည်တော်များမှာ အဆုံးမရှိသော သတ္တိများ ရုတ်တရက် ဝင်ရောက်လာသည့်အလားပင်။

ယခုတစ်ခေါက်တွင် သူတို့ဘက်က သုံးပုံတစ်ပုံကျော် ဆုံးရှုံးခဲ့ရပြီး မရေမတွက်နိုင်သော စစ်သည်တော်များကိုလည်း စွန့်လွှတ်ခဲ့ရသည့်အပြင် အရင်းအမြစ်များစွာ ကုန်ဆုံးခဲ့ရသဖြင့် ရန်သူအနေနှင့် ထိုအတွက် ပြန်လည်ပေးဆပ်ရမည် ဖြစ်၏။

ကျန်းမုန့်လောင်နှင့် အခြားသူများ အစွမ်းကုန် ခရီးနှင်လာခဲ့ပြီးနောက် တစ်ချိန်က သူတို့စကြဝဠာ၏ အခြေစိုက်စခန်းဟောင်းနေရာမှာ ယခုမူ စကြဝဠာအမှတ်၇ရှိ စစ်သည်တော်များ၏ ရုပ်အလောင်းများဖြင့် ပြည့်နှက်နေသော အပျက်အစီးပုံများ ဖြစ်နေသည်ကို တွေ့လိုက်ရသည်။ ထိုမြင်ကွင်းက ရင်နင့်ဖွယ်ရာကောင်းလှသည်။

ကျန်းမုန့်လောင်အနေနှင့် သူတို့အပေါ် ပုဂ္ဂိုလ်ရေးအရ သံယောဇဉ်သိပ်မရှိသော်လည်း သူတို့မှာ စကြဝဠာအမှတ်၇အတွက် သတ္တိရှိရှိ စွန့်လွှတ်အနစ်နာခံခဲ့ကြသည့် စစ်သည်တော်များပင်။ ယခု သူ ပြန်ရောက်လာပြီဖြစ်၍ တရားမျှတမှုကို ဖော်ဆောင်ပေးရမည်သာ။

"တိုက်ခိုက်ကြ... သူတို့ကို ပြင်းပြင်းထန်ထန် နှိမ်နင်းကြ"

ကျန်းမုန့်လောင်က ယာဉ်တန်းကို အမိန့်ပေးလိုက်သည်။ ယခုအကြိမ်တွင် သူသည် စကြဝဠာတစ်ခုလုံးကို ထိတ်လန့်တုန်လှုပ်သွားစေရန် ပြုလုပ်ချင်နေပေသည်။

"သူတို့ ရောက်လာပြီ။ ငါတို့ ဆုတ်ခွာဖို့ အချိန်မရှိတော့ဘူး"

အာကာသဖြတ်လမ်းဖြင့် ခရီးသွားခြင်းဖြစ်စေ၊ ကွေးညွှတ်မှုအရှိန်မြှင့်ခြင်းဖြစ်စေ နှစ်ခုစလုံးမှာ ရှည်လျားလှသော အရှိန်မြှင့်တင်မှုလုပ်ငန်းစဉ်ကို ဆောင်ရွက်ရန် လိုအပ်ပြီး ထိုအချိန်အတွင်း ကျန်းမုန့်လောင်၏ ယာဉ်တန်းမှာ သူတို့ကို အထိနာအောင်လုပ်ရန် အချိန်အလုံအလောက်ရှိ၏။

"သွားစို့... ယာဉ်တန်းကို စွန့်ပစ်လိုက်တော့။ တတ်နိုင်သမျှ အမြန်ဆုံးဆုတ်ခွာကြ။ ငါတို့ အရင်သွားနှင့်မယ်"

အဆင့်ကိုးသက်ရှိများသည် စကြဝဠာ၏ အဆင့်မြင့်စည်းမျဉ်းများကို နားလည်ထားကြသဖြင့် အကွာအဝေးတိုသော အာကာသရွှေ့ပြောင်းမှုများကို လွတ်လပ်စွာ ပြုလုပ်နိုင်ကြသည်။ ပြဿနာများသော ဤနေရာက ထွက်ခွာခြင်းဖြင့် သူတို့အနေနှင့် လွတ်မြောက်ရန် အခွင့်အရေး ရှိပေလိမ့်မည်။

သို့သော် သူတို့ နေရာရွှေ့ပြောင်းရန် အာကာသဟင်းလင်းပြင်ကို ထိုးခွင်းရန် ကြိုးပမ်းလိုက်ချိန်မှာပင် ပတ်ဝန်းကျင်ရှိ အာကာသသိပ်သည်းဆမှာ အလွန်အမင်း မြင့်တက်သွားကြောင်း ရုတ်တရက် တွေ့လိုက်ရသဖြင့် အာကာသကို မထိုးခွင်းနိုင်တော့ချေ။ သူတို့ ပိတ်မိသွားခဲ့လေပြီ။

လူအုပ်ကြီးကြားထဲရှိ အာကာသအက်ကွဲကြောင်းတစ်ခုအတွင်းမှ ကျန်းမုန့်လောင် ထွက်ပေါ်လာချိန်တွင်မူ သူတို့၏ရှေ့မှောက်၌ အနက်ရောင်ကန့်လန့်ကာကြီးတစ်ခု ဖြည်းညင်းစွာ ပွင့်လာခဲ့သည်။

"လူကြီးမင်းတို့... ငါ့စကြဝဠာအမှတ်၇ အခြေစိုက်မြို့တော်ကို ဖျက်ဆီးပြီး ငါ့ရဲ့စစ်သည်တော်တွေကို သတ်ဖြတ်ပြီးတာတောင်မှ မင်းတို့က အခု ဘယ်သွားဖို့စဉ်းစားနေတာလဲ"

********************