အခန်း ၁၀၆၅

အခန်း ၁၀၆၅ - အိမ်ခြံမြေ ကစားခြင်း

စကြဝဠာအမှတ်၇၏ စစ်မြေပြင်အခြေစိုက်စခန်းတွင် ကမ္ဘာခြားစစ်မြေပြင်သို့ သွားရာ လမ်းကြောင်းတစ်ခု ရှိနေလေသည်။ နည်းပညာအသစ်များ ဖွံ့ဖြိုးတိုးတက်လာသည်နှင့်အမျှ ဤလမ်းကြောင်းမှာ ကြီးမားသော စစ်ယာဉ်တန်းကြီး ဖြတ်သန်းသွားလာနိုင်လောက်အောင် ကျယ်ဝန်းလာခဲ့သည်။

ယခုအခါ ဤစစ်အခြေစိုက်စခန်းမှာ မရှိတော့ပေ။ ထိုနေရာတွင် ကမ္ဘာခြားနယ်မြေအုပ်ချုပ်ရေးဗဟိုဌာနဟုခေါ်သော နေရာတစ်ခုဖြင့် အစားထိုးလိုက်လေပြီ။ ဤနေရာမှာ အခြားသော အပြိုင်ကမ္ဘာများဆီသို့ သွားနိုင်သည့် တစ်ခုတည်းသော လမ်းကြောင်းဖြစ်သည်ဟု ဆိုကြပြီး ကမ္ဘာခြားနယ်မြေအုပ်ချုပ်ရေးဗဟိုဌာနဟုခေါ်သော ဤအဖွဲ့အစည်းကတစ်ဆင့် အပြိုင်ကမ္ဘာအားလုံးသို့ ဤနည်းပညာကို ချိတ်ဆက်မျှဝေပေးထားပြီးဖြစ်၏။

ဤနေရာသည် တစ်ချိန်က စကြဝဠာအသီးသီးမှ ကိုလိုနီနယ်ချဲ့ရန် သို့မဟုတ် ကာကွယ်ရန်အတွက် တိုက်ခိုက်ခဲ့ကြသည့် အလွန်ကြောက်မက်ဖွယ်ကောင်းသော စစ်မြေပြင်တစ်ခုဖြစ်ခဲ့ဖူးသည်ဟု ဆိုကြသည်။ နှစ်ပေါင်းသန်းဆယ်ဂဏန်း သို့မဟုတ် ထို့ထက်ပို၍ကြာရှည်ခဲ့သော စစ်ပွဲများအပြီးတွင် နောက်ဆုံး၌ ငြိမ်းချမ်းရေးကို ပြန်လည်ရရှိခဲ့ပြီဖြစ်၏။ ဤငြိမ်းချမ်းရေးကို ရယူပေးနိုင်ခဲ့သူမှာ သူတို့၏ စကြဝဠာအမှတ်၇မှ ရီထျန်းဂိုဏ်းဟုခေါ်သော အဖွဲ့အစည်းတစ်ခုပင်။

နှစ်သန်းပေါင်းများစွာ ကြာမြင့်ခဲ့သော ဤစစ်ပွဲကြီးကို အပြီးတိုင်အဆုံးသတ်ရန် နှစ်နှစ်ပင် မပြည့်ခဲ့ချေ။ တန်ခိုးစွမ်းအားကြီးမားသူများဖြင့် ပြည့်နှက်နေသော ဤနေရာတွင် သူတို့၏ စကြဝဠာအမှတ်၇က နယ်မြေတစ်ခုလုံးဝယ် သူတို့၏ ဩဇာလွှမ်းမိုးမှုကို ထင်ရှားစေခဲ့သည်။ သူတို့ အင်အားကြီးမားစွာ ထွက်ပေါ်လာပြီးနောက် စစ်ပွဲကြီး ပြီးဆုံးသွားခဲ့ပြီး ကြာရှည်တည်တံ့မည့် ငြိမ်းချမ်းရေးကို ဖော်ဆောင်နိုင်ခဲ့သည်။ ထို့ပြင် သူတို့၏ စကြဝဠာအမှတ်၇သည် ဤအုပ်ချုပ်ရေးဗဟိုဌာန၏ အမြဲတမ်း ဥက္ကဋ္ဌနေရာကိုပင် ရရှိခဲ့သေးသည်။

ဤအုပ်ချုပ်ရေးဗဟိုဌာနသို့ ပထမဆုံး အပြန်အလှန်ဖလှယ်ရေး လျှောက်လွှာကို တင်သွင်းလိုက်သည်နှင့်တစ်ပြိုင်နက် စကြဝဠာအမှတ်၇နှင့် စကြဝဠာအမှတ်၃၄တို့သည် ပထမဆုံး တရားဝင် အပြန်အလှန် ကူးလူးဆက်ဆံမှုကို စတင်ခဲ့ကြသည်။ စကြဝဠာအမှတ်၃၄မှ သံတမန်ပညာရှင် ကိုယ်စားလှယ်အဖွဲ့သည် စကြဝဠာအမှတ်၇သို့ လာရောက်လည်ပတ်ခဲ့ပြီး နှစ်ဖက်စလုံး၏ အားသာချက်၊ အားနည်းချက်များအပေါ် အခြေခံကာ ပူးပေါင်းဆောင်ရွက်ရေး စီမံကိန်းပေါင်း ၂၀၀ကျော်ကို ဖွဲ့စည်းတည်ထောင်ခဲ့ကြသည်။

ထိုအချိန်မှစ၍ ကြီးမြတ်သော စကြဝဠာခေတ်ကြီး ရောက်ရှိလာတော့သည်။

...

စတားဂေဇာအာကာသယာဉ်တစ်စင်းသည် ကမ္ဘာခြားနယ်မြေအုပ်ချုပ်ရေးဗဟိုဌာနသို့ သွားရာ အလွှာပါးကို ဖြည်းညင်းစွာ ဖြတ်သန်းသွားသည်။ ထိုယာဉ်ပေါ်ရှိ ခရီးသည်များရှေ့တွင် ပို၍နက်နဲဆန်းကြယ်ပြီး ဆွဲဆောင်မှုရှိသော ကမ္ဘာသစ်ကြီးတစ်ခု ပေါ်လာခဲ့သည်။

လုရီယောင်၊ ဝမ်လင်၊ ချင်ဖုန်းနှင့် အခြားသူများသည် စတားဂေဇာယာဉ်၏ မှန်ပြတင်းပေါက်များကို မှီကာ အပြင်ဘက်ရှိ အရာအားလုံးကို တမ်းတမှု၊ စိတ်ကူးယဉ်မှုများ ပြည့်နှက်နေသော မျက်လုံးများဖြင့် ငေးမောကြည့်နေကြသည်။ ဤသည်မှာ သူတို့၏ လက်ရှိကမ္ဘာနှင့် လုံးဝကွဲပြားခြားနားနေသော ကမ္ဘာသစ်ကြီးတစ်ခုပင်။

အတန်ကြာအောင် ဖွံ့ဖြိုးတိုးတက်လာပြီးနောက် ကမ္ဘာမြေသည် အဆင့်သစ်တစ်ခုသို့ တက်လှမ်းနိုင်ခဲ့သည်မှာ ကြာမြင့်နေပြီဖြစ်၏။ အခြားမျိုးနွယ်စုများလည်း အလုံးအရင်းဖြင့် လာရောက်လည်ပတ်ကြပြီး ကုန်သွယ်ရေးယာဉ်တန်းများ အဝင်အထွက် များပြားလာသည်နှင့်အမျှ ဤနှစ်များအတွင်း အမြွှာဝေလငါး စကြဝဠာအင်ပါယာတစ်ခုလုံး၏ ဗဟိုချက်အဖြစ်သို့ လျင်မြန်စွာ ဖွံ့ဖြိုးတိုးတက်လာခဲ့သည်။

ဝမ်လင်နှင့် ချင်ဖုန်းတို့သည် ယခင်ကတည်းက ထူးရှယ်နတ်ဘုရားကျောင်းတော်၏ တပည့်များ ဖြစ်လာခဲ့ကြသည်။ ယခုအခါ သူတို့၏ သက်ရှိအဆင့်များမှာ အဆင့်ခြောက်နီးပါးသို့ ရောက်ရှိနေလေပြီ။ ကမ္ဘာအသီးသီးရှိ အဆင့်မြင့် စီးပွားရေးပညာရပ်အမျိုးမျိုးကို လေ့လာဆည်းပူးပြီးနောက် ဝမ်လင်သည် ယခုအခါ အမြွှာဝေလငါး စကြဝဠာအင်ပါယာတစ်ခုလုံးတွင် ကြီးမားကျယ်ပြန့်သော စီးပွားရေးအင်ပါယာကြီးတစ်ခုကို တည်ထောင်နိုင်ခဲ့ပြီဖြစ်၏။

ဤစီးပွားရေးအင်ပါယာမှာ ဒေသတွင်း ပိုင်ဆိုင်မှုများအပေါ် အခြေခံထားပြီး ပြည်သူ့အသက်မွေးဝမ်းကျောင်းကိစ္စများ၊ ဖျော်ဖြေရေးနှင့် အခြားနယ်ပယ်များလည်း ပါဝင်သည်။ ဝမ်လင်၏ ပိုင်ဆိုင်မှုတစ်ခုတည်းကပင် အမြွှာဝေလငါးအင်ပါယာအပါအဝင် ပတ်ဝန်းကျင်ရှိ ရာနှင့်ချီသော မျိုးနွယ်စုများ၏ စုစုပေါင်းပိုင်ဆိုင်မှုထက် များစွာသာလွန်နေပြီး အဆင့်ခုနစ် သို့မဟုတ် အဆင့်ရှစ်သက်ရှိများ၏ ပိုင်ဆိုင်မှုများနှင့်ပင် ယှဉ်ပြိုင်နိုင်စွမ်းရှိသည်။

တစ်ချိန်တည်းမှာပင် ချင်ဖုန်းသည် ကမ္ဘာမြေသားအဖွဲ့ချုပ်၏ တပ်မတော်ကို တရားဝင် တာဝန်ယူကွပ်ကဲနေပြီး လူသားမျိုးနွယ်စု စစ်ယာဉ်တန်း၏ တိုက်ခိုက်ရေးစွမ်းရည်မှာ အထွတ်အထိပ်အဆင့်ငါး မျိုးနွယ်စုများရှိ စစ်ယာဉ်တန်းများကို ချက်ချင်း ဖျက်ဆီးပစ်နိုင်လုနီးပါး အားကောင်းနေပြီဖြစ်၏။

ကျန်းမုန့်လောင်ကလည်း ကျန်းနန်သိပ္ပံနှင့်နည်းပညာတက္ကသိုလ်နှင့်အတူ ပညာရေးစနစ်သစ်တစ်ခုကို တည်ထောင်ခဲ့ပြီး ယခုအခါ တစ်ကမ္ဘာလုံးသို့ တိုးချဲ့နေလေပြီ။ ကမ္ဘာမြေတစ်ခုလုံး၏ မျိုးနွယ်စုအဆင့်အတန်းမှာ အံ့မခန်း အမြန်နှုန်းဖြင့် တိုးတက်လျက်ရှိ၏။

ပြတင်းပေါက်အပြင်ဘက်တွင် ဉာဏ်ရည်တုက ထိန်းချုပ်ထားသော အရည်ပျော်သတ္တုများဖြင့် တည်ဆောက်ထားသည့် ဧရာမမြို့တော်သစ်ကြီးတစ်ခုရှိပြီး ရွေ့လျားနိုင်သော ပုံစံများလည်း ပါဝင်သည်။ မီတာသောင်းနှင့်ချီ၍ မြင့်မားသော အဆောက်အအုံများနှင့် အလွန်တရာ လှပဆန်းကြယ်သော အလှဆင်မှုများက ဤမြို့တော်၏ ထူးခြားဆန်းပြားမှုကို ဖော်ပြနေသည်။

ဤနေရာမှာ ကမ္ဘာခြားနယ်မြေအုပ်ချုပ်ရေးဗဟိုဌာနတစ်ခုလုံး၏ အဓိက ဗဟိုချက်ဒေသပင်။

စကြဝဠာအသီးသီးရှိ အာကာသယာဉ်များမှာ ဤနေရာတွင် အဆက်မပြတ် ဝင်ထွက်သွားလာနေပြီး ဖွံ့ဖြိုးစည်ပင်မှုမှာ စကြဝဠာအမှတ်၇ရှိ မည်သည့်မျိုးနွယ်စုထက်မဆို များစွာသာလွန်ပေသည်။

ကုမ္ပဏီများအကြား၊ နိုင်ငံများအကြား၊ မျိုးနွယ်စုများအကြား အရောင်းအဝယ် ကိစ္စရပ်များကို မျက်မြင်ကိုယ်တွေ့ ကြုံခဲ့ရသည့်အပြင် ယခုအခါ စကြဝဠာတစ်ခုနှင့်တစ်ခုအကြား ကူးလူးဆက်ဆံမှုများကိုပါ ထပ်မံမြင်တွေ့ခွင့်ရပြီဖြစ်၍ ဝမ်လင်တစ်ယောက် ဤဘဝတွင် နောင်တရစရာ ဘာမှမရှိတော့ဘူးဟု ခံစားလိုက်ရသည်။

အာကာသယာဉ်သည် အုပ်ချုပ်ရေးဗဟိုဌာန၏ ယာဉ်ရပ်နားစခန်းတွင် ရပ်တန့်သွားပြီးနောက် ဝန်ထမ်းတစ်စုက သူတို့ကို ချက်ချင်း လာရောက်ကြိုဆိုကြသည်။ သူတို့အားလုံးမှာ စကြဝဠာအမှတ်၇မှ စစ်သည်တော်ဟောင်းများ ဖြစ်ကြပြီး ကျန်းမုန့်လောင်အပေါ် ထားရှိသည့် သူတို့၏ လေးစားမှုကား စကားလုံးများ၊ အပြုအမူများဖြင့်ပင် ဖော်ပြ၍ မကုန်နိုင်အောင်ရှိ၏။

"မင်းတို့အလုပ် မင်းတို့ ဆက်လုပ်ကြပါ။ ငါ့သူငယ်ချင်းတွေကို ခေါ်ပြီး လိုက်ပြလိုက်ဦးမယ်"

"ဟုတ်ကဲ့ပါ တပ်မှူး"

"ဝိုး... ဒီနေရာက တကယ်မိုက်တာပဲ"

ချင်ဖုန်းက အာမေဍိတ်သံဖြင့် ပြောလိုက်သည်။

"ဒီနေရာက လွန်ခဲ့တဲ့လပိုင်းကမှ စစ်ဖြစ်ခဲ့တာ သေချာလို့လား။ ပြီးတော့ ငါတို့ရဲ့ စကြဝဠာအမှတ်၇က အမြဲတမ်း အရှုံးဘက်ကချည်းပဲဆိုတာရော ဟုတ်လို့လား"

"ဒီကောင့်ကို သံသယသွားမဖြစ်နဲ့"

ဝမ်လင်က ဝင်ပြောလိုက်သည်။

"သူရှိနေတဲ့နေရာမှာ သူက အရှုံးခံပါ့မလား။ တခြားစကြဝဠာတွေတော့ သူ ခေါင်းပုံဖြတ်တာကို အဆင့်ဆင့် ခံလိုက်ရလောက်ပြီထင်တယ်"

"ဟားဟားဟား... မင်းက ငါ့အကြောင်း သိပ်သိတာပဲ"

ကျန်းမုန့်လောင်က ရယ်မောလိုက်သည်။

"ဟိုဘက်မှာ ဘာလို့ ငိုသံတွေ ကြားနေရတာလဲ"

မလှမ်းမကမ်းမှ သနားစဖွယ် ငိုကြွေးသံများကို ကြားလိုက်ရသည်။ ဤသည်မှာ အလွန်တရာ အဖိုးတန်သော ကုန်ကြမ်းများဖြင့် တည်ဆောက်ထားသည့် ပေ ၈၀၀၀ကျော်မြင့်သော ဧရာမ အထိမ်းအမှတ်ကျောက်တိုင်ကြီးတစ်ခု ဖြစ်၏။ ဤကျောက်တိုင်တစ်ခုတည်း၏ တန်ဖိုးကပင် ကြီးမားလှသော အဆင့်ငါး မျိုးနွယ်စုရာဂဏန်း၏ တန်ဖိုးထက် သာလွန်ပေသည်။

"အဲဒါက စကြဝဠာစစ်ပွဲတွေမှာ ကျဆုံးသွားခဲ့တဲ့ စစ်သည်တော်တွေကို ဂုဏ်ပြုဖို့အတွက် တည်ဆောက်ထားတဲ့ ငါတို့စကြဝဠာအမှတ်၇ရဲ့ သူရဲကောင်းအထိမ်းအမှတ်ကျောက်တိုင်ပဲ"

ကျန်းမုန့်လောင်က မဟာမိတ်တပ်ဖွဲ့များ စကြဝဠာအမှတ်၇ကို ကျူးကျော်ခဲ့သည့်အကြောင်းကို အတိုချုံးရှင်းပြလိုက်သည်။

"ဘုရားရေ... အဆင့်ကိုးသက်ရှိထောင်ဂဏန်းနဲ့ အဆင့်ရှစ်သက်ရှိသန်းပေါင်းများစွာကို ဝမ်းနည်းခြင်းအထိမ်းအမှတ် အဝတ်အစားတွေ ဝတ်ခိုင်းပြီး ဒီမှာ လာငိုခိုင်းထားတာလား"

"သူတို့ ရင်ထဲကလာတဲ့အတိုင်း အော်ဟစ်ငိုကြွေးရမှာပေါ့။ ဒါမှမဟုတ်ရင် သူတို့ရင်ထဲက နောင်တနဲ့ အပြစ်ရှိသလို ခံစားချက်တွေကို ဖော်ပြနိုင်မှာမဟုတ်ဘူး"

"ဝိုး... မင်းတစ်ယောက်တည်းပဲ ဒီလိုလုပ်နိုင်တာ"

ဝမ်လင်က ဆိုသည်။

"ပြီးတော့ တခြားပေးဆပ်မှုတွေလည်း အများကြီးလုပ်ခဲ့ရမှာ သေချာတယ်မလား"

"ခန့်မှန်းကြည့်ရအောင်..."

ဝမ်လင်က စဉ်းစားခန်းဝင်၍ ဆက်ပြောလေသည်။

"ပြီးခဲ့တဲ့တစ်ခေါက် ငါ့အာကာသယာဉ်ကို စွမ်းအင်ဖြည့်ဖို့ သွားတုန်းက ၉၅အဆင့် စွမ်းအင်ဈေးနှုန်းက သုံးပုံတစ်ပုံလောက် ကျသွားတယ်။ ဒီဈေးနှုန်းက နှစ်ထောင်ချီကြာတဲ့အထိ အတက်အကျ သိပ်မရှိခဲ့ဘူး။ အခုတော့ အများကြီး ပြောင်းလဲသွားပြီ။ စွမ်းအင်အရင်းအမြစ်တွေ အလုံးအရင်းနဲ့ ဝင်လာလို့ဖြစ်မယ်။ မင်း တခြားစကြဝဠာတွေဆီကနေ စွမ်းအင်အရင်းအမြစ်တွေကို လုယက်လာခဲ့တာ မဟုတ်လား"

"ဝမ်လင်... မုန့်လောင်ရဲ့ ကောင်မလေးက ဘယ်သူလဲဆိုတာ ငါတောင် သံသယဝင်လာပြီ"

လုရီယောင်က ဘေးမှနေ၍ နောက်ပြောင်လိုက်သည်။

"သိပ်မကြာခင် ဒီနေရာက စကြဝဠာ စီးပွားရေးနဲ့ နိုင်ငံရေးနယ်ပယ်တစ်ခုလုံးရဲ့ ဗဟိုချက် ဖြစ်လာတော့မှာ"

ကျန်းမုန့်လောင်က ပြောလိုက်သည်။

"ပြီးတော့ ဒီစကြဝဠာငါးထောင်ထဲမှာ အဖွံ့ဖြိုးဆုံး မျိုးနွယ်စုထက်တောင် ပိုပြီး စည်ကားလာတော့မှာ။ ငါ့မှာ အကြံတစ်ခုရှိတယ်။ ငါတို့ရဲ့ ကမ္ဘာမြေမျိုးနွယ်စုတစ်ခုလုံးကို ဒီနေရာကို ပြောင်းရွှေ့ဖို့ စီစဉ်နေတာ။ မင်းတို့ ဘယ်လိုထင်လဲ"

"အကြံကောင်းပဲ"

ဝမ်လင်က သဘောတူလိုက်သည်။

"ဒီက စကြဝဠာမူလစွမ်းအင်တွေက အရမ်းပေါကြွယ်ဝတော့ လူသားတွေရဲ့ မျိုးရိုးဗီဇအဆင့်အတန်းတစ်ခုလုံး မြင့်တက်လာစေဖို့အတွက် အကျိုးရှိတယ်။ နောက်ပြီး ဒီက အနာဂတ်စီးပွားရေးနဲ့ နိုင်ငံရေးနယ်ပယ်တွေကလည်း အရမ်းဖွံ့ဖြိုးတိုးတက်လာမှာ။ တကယ်လို့ ငါတို့ လူသားမျိုးနွယ်စုသာ ဒီကို ပြောင်းရွှေ့နိုင်မယ်ဆိုရင် လူသားတွေရဲ့ သိုင်းပညာ၊ စီးပွားရေးနဲ့ နည်းပညာပိုင်းဆိုင်ရာ တိုးတက်မှုက သိသိသာသာ မြန်ဆန်လာလိမ့်မယ်"

"ဟုတ်တယ်။ ငါတွေးနေတာလည်း အဲဒါပဲ"

ကျန်းမုန့်လောင်က ပြောလေသည်။

"အခု ဒီနေရာကို စတည်ထောင်ခါစမှာတင် ဒီလိုအတိုင်းအတာမျိုး ရှိနေပြီဆိုတော့ အနာဂတ်မှာ ဘယ်လိုဖြစ်လာမလဲဆိုတာ တွေးကြည့်လို့ရပါတယ်။ ပေါင်းကူးစကြဝဠာကုမ္ပဏီတွေနဲ့ တခြားအဖွဲ့အစည်းတွေအများကြီးက ဒီကို အခြေချလာကြဦးမှာ။ ဒီလောက်ဖွံ့ဖြိုးတိုးတက်နေတဲ့နေရာမျိုး တခြားမှာ လုံးဝမရှိနိုင်ဘူး"

"ငါတို့ ဒီနေရာမှာ ဘယ်လို အသာစီးရအောင် ယူမလဲဆိုတာ စဉ်းစားဖို့လိုတယ်"

ဝမ်လင်က ပြောသည်။

"ဒါပေမဲ့ စီးပွားရေး ဒါမှမဟုတ် အဲဒီလို အလားတူနယ်ပယ်တွေဆိုရင်တော့ ငါတို့လူသားတွေရဲ့ အခြေခံအုတ်မြစ်က သေးငယ်လွန်းတယ်"

"ဖွီး"

ကျန်းမုန့်လောင် ရယ်ချလိုက်သည်။

"လောလောဆယ်တော့ ဒီကမ္ဘာခြားနယ်မြေအုပ်ချုပ်ရေးဗဟိုဌာနကို ငါ တာဝန်ယူထားတာလေ။ ကြီးကျယ်ခမ်းနားတဲ့ စကြဝဠာငွေကြေးစနစ်ကို မကြာခင် တည်ထောင်တော့မှာ။ အနာဂတ်မှာ ဒီနေရာက သေချာပေါက် အရမ်းတန်ဖိုးရှိလာမှာမို့ မြေနေရာတွေက ငါတို့ရဲ့ အရင်းအနှီးပဲ။ မင်း ကျွမ်းကျင်တဲ့ အိမ်ခြံမြေလုပ်ငန်းကနေစပြီး ဈေးကစားကြတာပေါ့"

မည်သည့်မျိုးနွယ်စုတွင်မဆို အရင်းအမြစ်များနှင့် မြေနေရာမှာ အမြဲတစေ တန်ဖိုးအရှိဆုံး အရာများဖြစ်ကြသည်။

သူသည် တစ်ချိန်က အလွန်ကြီးမားသော အဆင့်ငါးအထွတ်အထိပ် မျိုးနွယ်စုတစ်ခုသို့ သွားရောက်လည်ပတ်ခဲ့ဖူးသည်။ ထိုမျိုးနွယ်စု၏ အုပ်ချုပ်ရေးဗဟိုဌာနအနီးတွင် အိမ်တစ်လုံးဝယ်ယူခြင်းမှာ သေးငယ်သော အဆင့်လေးမျိုးနွယ်စုတစ်ခုကို ဝယ်ယူခြင်းနှင့် ကုန်ကျစရိတ် တူညီနိုင်ပေသည်။

ယခု ဤနေရာကား ကောင်းမွန်သော ဖွံ့ဖြိုးတိုးတက်မှု အလားအလာရှိသည့် နေရာကောင်းတစ်ခု ဖြစ်နေပေသည်။

ဤနေရာရှိ တစ်စတုရန်းမီတာကို အဆင့်ငါးမျိုးနွယ်စုတစ်ခု၏ တန်ဖိုးဖြင့် ရောင်းချမည်ဆိုလျှင် များလွန်းရာကျပေမည်လော။

********************