အခန်း ၁၅၇

အခန်း ၁၅၇

တရားသူကြီးချုပ်နှင့် တရားသူကြီးများအားလုံး ဂူချန်တင်ပြလိုက်သော ဗီဒီယိုအထောက်အထားကို ကြည့်ရှုပြီးသွားကြပြီဖြစ်သည်။

ဤဗီဒီယိုမှတ်တမ်းသည် အမှန်တရားကို တိုက်ရိုက်ပြန်လည်ဖော်ထုတ်ပေးလိုက်ခြင်းဖြစ်ပြီး ရှဲ့စီယုအနေဖြင့် မည်သူ့ကိုမျှ တိုက်မိခြင်းမရှိကြောင်း သက်သေပြလိုက်ခြင်းပင်။

သူမသည် အဘိုးအိုကို စေတနာဖြင့် ကူညီပေးခဲ့သူဖြစ်ပြီး ယခုမူ ငွေညှစ်ခံထားရသူ ဖြစ်ကြောင်း ထင်ရှားသွားသည်။

တရားသူကြီးချုပ် ယန်လီဝေက "အခုတော့ ဒီအမှုနဲ့ပတ်သက်ပြီး ဘာမှငြင်းစရာမရှိတော့ဘူး။ အမှန်တရားက ထင်ရှားသွားပြီ။ ကျန်းကျီချန်နဲ့ ကျူးဂွေးကျန်းတို့က ငွေညှစ်မှု၊ ခြိမ်းခြောက်မှု၊ ငွေပမာဏကြီးမားတဲ့ လိမ်လည်မှုနဲ့ တရားရုံးစည်းကမ်းကို ဖောက်ဖျက်မှုတို့အတွက် အပြစ်ရှိကြောင်း ထင်ရှားတယ်။ ကျန်းဂူဘင်ရဲ့ တခြားသားသမီး ၅ ယောက်ကလည်း တရားခွင်မှာ ရုန်းရင်းဆန်ခတ်ပြုလုပ်ပြီး ငွေညှစ်မှုမှာ ပါဝင်ပတ်သက်နေတာမို့ သူတို့ကိုလည်း ပြင်းထန်စွာ အပြစ်ပေးရမယ်" ဟု မိန့်ကြားသည်။

တရားသူကြီးများကလည်း "ကျွန်တော်တို့ ထောက်ခံပါတယ်။ ဘယ်လောက်အထိ ပြစ်ဒဏ်ချမလဲဆိုတာပဲ လိုတော့တယ်" ဟု ပြောလိုက်သည်။

တရားသူကြီးများ တိုင်ပင်ဆွေးနွေးနေကြစဉ်တွင်ပင် တိုက်ရိုက်ထုတ်လွှင့်မှုကြည့်ရှုသူများမှာလည်း စိတ်လှုပ်ရှားစွာ စောင့်မျှော်နေကြသည်။

[တရားခွင်က ဘယ်တော့ ပြန်စမလဲ]

[မသိဘူး စောင့်နေတာပဲ။ လူကောင်းတွေကို ရာဇဝတ်ကောင်တွေလို မသတ်မှတ်သင့်ဘူး။ လူကောင်းတွေ တာဝန်ယူစရာ မလိုဘူး]

[ဒီနေ့ခေတ်မှာ ကူညီတာက အမှားဖြစ်သွားပြီလား လူဆိုးတွေက ဘာလို့ အပြစ်မခံရတာလဲ ဘာလို့လဲ]

[ဒီလူဆိုးတွေကိုသာ ထောင်မချဘူးဆိုရင် ကျွန်တော်တို့လည်း ပိုက်ဆံရဖို့ ငွေပဲ ညှစ်တော့မယ်။ ဘယ်သူမှ အလုပ်မလုပ်ကြတော့ဘူးပေါ့]

[တရားသူကြီးက တကယ်ပဲ စီရင်ချက်ချတတ်ရဲ့လား။ ဒီလိုမျိုးပဲ စီရင်မှာလား။ တကယ်ကို ရွံစရာကောင်းတယ်]

အခြားတစ်ဖက်တွင် ဖန်တဥပဒေကုမ္ပဏီမှ ကောင်းရုန်သည် ဂူချန်၏ အမှုကို ကိုင်တွယ်ပုံကို ကြည့်ရှုရင်း အံ့အားသင့်နေသည်။ သူသာဆိုလျှင် ဂူချန်ကဲ့သို့ အကောင်းဆုံး ကိုင်တွယ်နိုင်မည်မဟုတ်ကြောင်း ဝန်ခံလိုက်သည်။

"ဂူချန် ဒီအမှုကို တကယ်ကို လှပအောင် ကိုင်တွယ်သွားတာပဲ ကျွန်တော် သူ့ဆီမှာ သွားသင်ယူဖို့ လိုနေပြီ"

သူ့ဘေးတွင်ရှိသော ရွှယ်ယောင်ထင်က "သွားချင်ရင် သွားလိုက်လေ။ ဂူချန်ရဲ့ ကုမ္ပဏီက အခုတလော အရမ်းအောင်မြင်နေတာ။ ဝန်ထမ်းလည်း ခေါ်နေတယ်။ နောက်ဆိုရင် သူ့ကုမ္ပဏီက တကယ့်ကို ထိပ်တန်း ဥပဒေကုမ္ပဏီတစ်ခု ဖြစ်လာလိမ့်မယ်" ဟု ပြုံးလျက် ပြောသည်။

ကောင်းရုန်က "တရုတ်နိုင်ငံရဲ့ထိပ်တန်းဥပဒေရုံးဆိုတာကတော့ ဝေးပါသေးတယ်။ ဒါပေမဲ့ ဂူချန်ဆီမှာတော့ အများကြီး သင်ယူနိုင်မယ်လို့ ကျွန်တော် ယုံကြည်တယ်" ဟု ပြန်ပြောသည်။ ရွှယ်ယောင်ထင်ကလည်း "သွားချင်ရင် အချိန်မရွေး သွားလို့ရပါတယ်" ဟု အားပေးစကား ပြောလိုက်သည်။

ကောင်းရုန်က ခေါင်းခါလိုက်သည်။ ဂူချန်၏ ကုမ္ပဏီ မည်မျှပင် တိုးတက်လာပါစေ တစ်နိုင်ငံလုံးတွင် ထိပ်တန်း ၃ ခုစာရင်းဝင်ဖြစ်ပြီး တစ်ခါတစ်ရံ အမှတ် ၁ ချိတ်တတ်သည့် ဖန်တဥပဒေကုမ္ပဏီနှင့် ယှဉ်ရန် ခက်ခဲသည်။ ဖန်တတွင် အလုပ်လုပ်ပါက တစ်နှစ်လျှင် ယွမ်သန်းနှင့်ချီ ဝင်ငွေရနိုင်သော်လည်း ဂူချန်၏ ကုမ္ပဏီအသစ်စက်စက်တွင်မူ မသေချာသေးဟု သူ တွက်ဆသည်။

"ဂူချန်က အမှုတွေကို တကယ်ကို ကျွမ်းကျင်စွာ ကိုင်တွယ်တာပါ။ ရွှယ်ချင်းချင်းက သူ့ကို အားကျတဲ့မျက်လုံးတွေနဲ့ ကြည့်နေတာကို ကြည့်ပါဦး။ ဂူချန်ဆီမှာ သူမ အများကြီး သင်ယူခဲ့ရမှာပဲ"

ကောင်းရုန်က မှတ်ချက်ပေးသည်။

ရွှယ်ယောင်ထင်က ပြုံးလျက် "ငါလည်း မနေ့က မြေးမလေးကို ဖုန်းဆက်ခဲ့တယ်။ ချင်းချင်းက အများကြီး ရင့်ကျက်လာပြီ" ဟု ပြောလိုက်သည်။

ကောင်းရုန်က ရုတ်တရက် သဘောပေါက်သွားသည်။

"ဒါရိုက်တာ... ခင်ဗျား ဂူချန်ကို တကယ်ပဲ အားပေးနေတာပဲ။ ခင်ဗျားရဲ့ မြေးမလေးနဲ့ လက်ထပ်ပေးဖို့ ရည်ရွယ်ထားတာလား။ ပီကင်းတက္ကသိုလ် ဥပဒေဌာနမှာ သင်ကြားဖို့ ဂူချန်ကို ထောက်ခံစာပေးခဲ့တာလည်း ခင်ဗျားပဲ။ အဲဒါက တကယ့်ကို တည်ငြိမ်တဲ့ ရာထူးတစ်ခုပဲလေ" ဟု ပြောသည်။

ရွှယ်ယောင်ထင်က ရယ်မောရင်း "ငါကတော့ မပြောဘူးနော်။ ဂူချန်က အမှု ၇ မှု စလုံးမှာ ၁၀၀ ရာခိုင်နှုန်း အောင်နိုင်ထားတယ်။ သူ့ရဲ့ အရည်အချင်းက တကယ်ကို ထူးခြားပါတယ်။ သူ့ကုမ္ပဏီကလည်း ကောင်းကောင်း လည်ပတ်နေပြီ" ဟုသာ ပြန်ဖြေသည်။

ကောင်းရုန်မှာ ငြူစူစိတ် ဝင်လာသည်။ ရွှယ်ချင်းချင်းကိုယ်တိုင်က ထူးချွန်ပြီး လှပသလို မိသားစုကလည်း ဥပဒေနယ်ပယ်တွင် ဩဇာရှိသည်။ ဂူချန်ကတော့ ဘာမှ မလုပ်ရသေးခင်မှာပင် ရွှယ်ယောင်ထင်၏ အသိအမှတ်ပြုမှုကို ရရှိသွားပြီဖြစ်သည်။

အဆက်အသွယ်ရှိခြင်း၏ အကျိုးကျေးဇူးမှာ ဤသို့ပင်။ ဂူချန်နှင့် ချင်းချင်းတို့သာ တကယ်တွဲဖြစ်ခဲ့ပါက ကောင်းရုန် စဉ်းစားပင် မကြည့်ရဲပေ။

"သူဌေး ကျွန်မတို့ အမှုနိုင်ပြီ"

ရွှယ်ချင်းချင်းက ဂူချန်ကို အားကျသည့်အကြည့်ဖြင့် ကြည့်ပြီး ပြောသည်။

"ဟုတ်တယ်လေ နိုင်မှာပေါ့။ စိတ်မပူပါနဲ့"

ဂူချန်က အေးဆေးစွာ ပြန်ပြောသည်။

"အမှုပြီးရင် ခင်ဗျားကို ရက်အနည်းငယ် အနားယူခွင့် ပေးမယ်။ ကျွန်တော်လည်း နားချင်တယ်။ တိုက်ရိုက်ထုတ်လွှင့်မှုလွှင့်ပြီး အနားယူရမလားပဲ။ အမှုတွေ ဆက်တိုက်ကိုင်တွယ်ရတာ တကယ်ကို ပင်ပန်းတယ်"

ဂူချန်က ပြောလိုက်သည်။

ကုမ္ပဏီအခြေအနေအကြောင်း မေးမြန်းရာ ရွှယ်ချင်းချင်းက "ကုမ္ပဏီက တိုးချဲ့နေတာပါ။ အဘိုးနဲ့လည်း တိုင်ပင်ပြီးပြီ။ မြို့တော်မှာလည်း ရုံးခွဲဖွင့်ဖို့ နေရာရထားပြီ။ ကုမ္ပဏီက အခုဆိုရင် အမြတ်တောင် ပြနေပြီ။ ဝန်ထမ်းတွေကလည်း အလုပ်ကြိုးစားကြတယ်။ အဘိုးကလည်း အတွေ့အကြုံရှိတဲ့ ရှေ့နေကောင်းတွေကို ကျွန်မတို့ဆီ ပို့ပေးဖို့ စီစဉ်နေတယ်" ဟု ဝမ်းသာအားရ ပြောသည်။

ဂူချန်၏ နာမည်ဂုဏ်သတင်းကြောင့် ကြော်ငြာစရာပင် မလိုတော့ဘဲ အမှုလိုက်ပေးရန် လာရောက်တောင်းဆိုသူများပြားနေပြီဖြစ်သည်။

ဂူချန်က "အဘိုးက ကျွန်တော့်ကို အမြဲကူညီနေတာပါ။ တကယ်ကို ကျေးဇူးတင်ပါတယ်။ တစ်ရက်တော့ သူ့ဆီသွားပြီး ကျေးဇူးတင်စကား ပြောရဦးမယ်" ဟု ပြောသည်။

"ဟဲဟဲ သူက ကျွန်မအဘိုးလေ။ ရှင််က ကျွန်မသူဌေးလေ။ ကုမ္ပဏီကို ကြီးထွားအောင် လုပ်ထားမှ ကျွန်မ အလုပ်လက်မဲ့ မဖြစ်မှာပေါ့"

ရွှယ်ချင်းချင်းက မျက်တောင်ခတ်ရင်း ရယ်မောပြောဆို လိုက်သည်။