အခန်း ၁၆၂

အခန်း ၁၆၂

ရွှယ်ချင်းချင်းသည် သီချင်း ၁၀ ပုဒ်ကို ဆက်တိုက် ဆိုပေးခဲ့သည်။

သူမ၏ အဆိုစွမ်းရည်မှာ အလွန်ပင် နားဝင်ချိုပြီး ပရိသတ်များမှာလည်း အလွန်နှစ်သက်ကြသည်။ လက်ဆောင်ပေးသည့် သူဌေးကြီးမှာလည်း အလွန်ရက်ရောလှသည်။

[နှင်းနို့ရည်] က ကွန်ဖန်းဝမ်လီ ၁၀ ခု ကို လက်ဆောင်ပေးလိုက်ပြန်သည်။ ထပ်မံ၍ ယွမ် ၁ သိန်း ၆ သောင်းတန် လက်ဆောင်များ ထပ်ပေးလိုက်ခြင်းပင်။

ရွှယ်ချင်းချင်း၏ တိုက်ရိုက်ထုတ်လွှင့်မှုတွင် ကြည့်ရှုသူဦးရေမှာ ၃ သိန်းခွဲအထိ တိုးတက်လာခဲ့သည်။ မှတ်ချက်များမှာလည်း အလွန်မြန်ဆန်လွန်းသဖြင့် သူမပင် မဖတ်နိုင်တော့ပေ။

[လှလည်းလှ သီချင်းလည်း ဆိုတတ်တော့ ဂူချန်တစ်ယောက် အရမ်းပျော်နေမှာပဲ]

[သူတို့ နှစ်ယောက်က ခုထိ တရားဝင် မတွဲသေးဘူးဆိုတော့ ငါ့မှာ အခွင့်အရေး ရှိသေးတယ်]

သီချင်း ၁၀ ပုဒ် ဆိုပြီးချိန်တွင် ရွှယ်ချင်းချင်းက "ကျေးဇူးတင်ပါတယ် သူဌေးရေ။ အခုတော့ ဥပဒေအကြောင်း ပြန်ပြောကြရအောင်။ ဒါက အလေးအနက်ထားရမယ့် တိုက်ရိုက်ထုတ်လွှင့်မှုဖြစ်လို့ပါ။ သူဌေးသာ ကျွန်မ သီချင်းပဲ ဆိုနေမှန်း သိရင် လစာဖြတ်ခံရလိမ့်မယ်" ဟု ရယ်မောကာ ပြောလိုက်သည်။ သူမသည် သူမ၏ လုပ်အားဖြင့် ရရှိသော လစာကို အလွန်တန်ဖိုးထားသူ ဖြစ်သည်။ ဖန်တတွင် အလုပ်လုပ်စဉ်ကထက် အလုပ်ပိုများသော်လည်း ဂူချန်ဆီမှာ သင်ယူရမှုများသည့်အတွက် သူမ ကျေနပ်နေသည်။

[နှင်းနို့ရည်] က "မင်း ကိုယ်ပိုင် တိုက်ရိုက်ထုတ်လွှင့်မှုစဖွင့်ပါလား စဖွင့်ရင်လည်း လက်ဆောင်တွေ ထပ်ပေးမယ်" ဟု ရေးသည်။

ရွှယ်ချင်းချင်းက ပြုံးလျက် "ကျွန်မ ကိုယ်ပိုင် တိုက်ရိုက်ထုတ်လွှင့်မှုမဖွင့်ပါဘူး။ သူဌေးကို ကူညီပြီး ခဏပဲ လွှင့်ပေးတာပါ။ အလုပ်တွေ ပြန်လုပ်ရဦးမယ်" ဟု ငြင်းဆန်သည်။

သူမသည် တကယ့်ကို ချမ်းသာကြွယ်ဝသော မိသားစုမှ ဆင်းသက်လာသူ ဖြစ်သည်။ သူမ၏ အဘိုးမှာ နိုင်ငံ၏ ထိပ်တန်းဥပဒေကုမ္ပဏီတစ်ခု၏ ဒါရိုက်တာဖြစ်ပြီး မိဘများမှာလည်း ဥပဒေလောကတွင် ထိပ်တန်း ပညာရှင်များ ဖြစ်ကြသည်။

သူမသည် အိမ်မှာပင် အေးဆေးနေနိုင်သော်လည်း ပညာရပ်နယ်ပယ်တွင် တောက်ပလိုသူ ဖြစ်သည့်အတွက် ပီကင်းတက္ကသိုလ်တွင် မဟာဘွဲ့များ ရယူခဲ့သည်။

သူမ၏ အဆိုကို အင်တာနက်အသုံးပြုသူများက ချီးကျူးကြပြီး သူမအား ကိုယ်ပိုင် တိုက်ရိုက်ထုတ်လွှင့်မှုလွှင့်ရန် တိုက်တွန်းနေကြသည်။

[ပီကင်းတက္ကသိုလ် ကျောင်းဘုရင်မတစ်ယောက် တိုက်ရိုက်ထုတ်လွှင့်မှုလွှင့်ရင် တစ်နှစ်ကို သန်းနဲ့ချီ ရှာနိုင်မှာပဲ]

[အဲ့ဒီ ရုပ်ရည်၊ အဲ့ဒီ အသံနဲ့ဆိုရင် အဆိုတော်တောင် ဖြစ်နိုင်တယ်]

[ရွှယ်ချင်းချင်းက ဂူချန်ရဲ့ လက်ထောက်အဖြစ်ပဲ ဆက်လုပ်နေတာ... သူတို့နှစ်ယောက်ကြားမှာ ဘာမှမရှိဘူးလို့တော့ မယုံဘူး]

[အမှန်ပါပဲ ရှေ့နေဂူကိုယ်တိုင်လည်း ပိုက်ဆံအနည်းငယ်အတွက်နဲ့တော့ အချိန်မဖြုန်းပါဘူး။ ဘိုင်တီဖျော်ဖြေရေးကနေ ဥပဒေအကြံပေးအဖြစ် တစ်နှစ်ကို ယွမ်သန်းချီ လစာနဲ့ ကမ်းလှမ်းတာကိုတောင် သူ ငြင်းခဲ့တာ။ သူက ကိုယ်ပိုင်ကုမ္ပဏီနဲ့ပဲ ပျော်နေတာပါ။ တကယ့်ကို စိတ်ဓာတ်ကောင်းတဲ့ ရှေ့နေပဲ]

[ဟုတ်တယ်။ သူ တိုက်ရိုက်ထုတ်လွှင့်မှုလွှင့်တာကလည်း ဥပဒေရေးရာ အသိပညာပေးဖို့အတွက်ပဲလေ...]

ပရိသတ်များမှာ ရှေ့နေဂူနှင့် ရွှယ်ချင်းချင်းတို့၏ အရည်အချင်းများကို အံ့ဩချီးကျူးရင်း အငြင်းပွားနေကြသည်။

ရွှယ်ချင်းချင်းမှာလည်း ဂူချန်၏ ရုံးခန်းတွင် အလုပ်များအား စနစ်တကျ ပြန်လည်လုပ်ဆောင်နေတော့သည်။

ခဏအကြာတွင် ဂူချန်သည် သူ၏ အလုပ်များကို ပြီးမြောက်အောင် လုပ်ဆောင်ပြီးနောက် ပြန်လည်ရောက်ရှိလာခဲ့သည်။

ဂူချန် ပြန်ရောက်လာသည်နှင့် တိုက်ရိုက်ထုတ်လွှင့်မှုအခန်းမှာ ထပ်မံ၍ ပွက်လောရိုက်သွားပြန်သည်။

တိုက်ရိုက်ထုတ်လွှင့်မှုထဲတွင် မိန်းကလေးပရိသတ်များစွာ ရှိနေပြီး ဂူချန်ကို အလွန်နှစ်သက်ကြသည်။

ဂူချန်သည် ရုပ်ရည်ချောမောရုံသာမက ထိပ်တန်းရှေ့နေများထက်ပင် ပိုမိုကျွမ်းကျင်သော ရှေ့နေတစ်ဦး ဖြစ်သည်။

ယခုအခါတွင် ဂူချန်သည် လူသိများသော ရှေ့နေ လျိုရှန်းထက်ပင် ပိုမိုကျော်ကြားနေပြီး အင်တာနက်ပေါ်တွင် လူသိအများဆုံး ပုဂ္ဂိုလ်တစ်ဦး ဖြစ်လာသည်။

သူရေးသားခဲ့သော ဥပဒေရေးရာ အသိပညာပေးစာအုပ်မှာလည်း အရောင်းရဆုံး စာရင်းဝင်နေသည်။

ရွှယ်ချင်းချင်းက "သူဌေး ခုနက သူဌေးကြီးတစ်ယောက်က လက်ဆောင်တွေ အများကြီး ပေးသွားတယ်။ ယွမ် ၆ သိန်းကျော်လောက် ရှိမယ်" ဟု ပြောသည်။

ဂူချန်က ခေါင်းညိတ်လိုက်သည်။

သူက ပိုက်ဆံ လိုနေတဲ့လူ မဟုတ်တာတော့ မှန်ပါတယ်။

ဒါပေမဲ့လည်း လက်ထဲ ငွေပိုဝင်လာတာကို ဘယ်သူကများ ငြင်းမှာလဲ။

"ကျေးဇူးတင်ပါတယ် သူဌေးရေ အင်မတန် ရက်ရောလိုက်တာ"

ဂူချန်က ပြောလိုက်သည်။ ထို့နောက် ရွှယ်ချင်းချင်းကို အလုပ်ဆက်လုပ်ရန် ပြောလိုက်သည်။

သူမကလည်း "ဟုတ်ကဲ့ သူဌေးအတွက် ရေတစ်ခွက် ငှဲ့ပေးလိုက်ဦးမယ်" ဟု ပြောကာ အလုပ်ရှုပ်နေပြန်သည်။

တိုက်ရိုက်ထုတ်လွှင့်မှုကြည့်ရှုသူများမှာမူ မကျေမနပ် ဖြစ်နေကြသည်။

[ဟာ... ညီမလေး တိုက်ရိုက်ထုတ်လွှင့်မှုမလွှင့်တော့ဘူးလား]

[ညီမလေးကိုပဲ ကြည့်ချင်တာ]

[ဒီနေ့ တိုက်ရိုက်ထုတ်လွှင့်မှုကြည့်နေတဲ့သူတွေထဲမှာ ထောင်ထဲ အပို့ခံရမယ့်သူတွေ အများကြီးပဲ။ သိပ်ရဲတင်းကြလွန်းတယ် ဟားဟား]

ဂူချန်က "ချင်းချင်းက ကျွန်တော့်ရဲ့ လက်ထောက်ပါ။ မှားယွင်းတဲ့အတွေးတွေ မတွေးကြပါနဲ့။ ဒီနေ့တော့ အမှုတစ်ခုအကြောင်း ပြောပြမယ်" ဟု ပြောကာ စတင်ပြောပြသည်။

"အမှုက ဒီလိုပါ။ အမျိုးသားတစ်ယောက်ရှိတယ်။ သူ့ဇနီးက အရမ်းလှတယ်။ ဒါပေမဲ့ စိတ်ဝေဒနာ ခံစားနေရလို့ ဂရုစိုက်ဖို့ လိုအပ်တယ်။ တစ်ရက်မှာတော့ သူ အလုပ်မှာ ညလုံးပေါက် အချိန်ပို လုပ်ရတော့မယ်။ ဇနီးဖြစ်သူကို ဂရုစိုက်ပေးဖို့ အလုပ်ဖော်တစ်ယောက်ကို သူ အကူအညီတောင်းလိုက်တယ်..."

[…..]

[ဘာအမှုမျိုးလဲ]

[ပြီးတော့ကော]

[အဲ့ဒီအလုပ်ဖော်နဲ့ပဲ ဇနီးသည်က တစ်ခုခု ဖြစ်သွားတာလား]

[ကျွန်တော်တော့ ကြိုတွေးနေပြီ။ မြန်မြန်ပြောပြပါ ရှေ့နေဂူ နောက်ဆက်တွဲက ဘာဖြစ်တာလဲ]

ဂူချန်က ဆက်ပြောသည်။

"ပြီးတော့ အဲ့ဒီအမျိုးသားက အချိန်ပိုလုပ်ဖို့ သွားတယ်။ သူက သူ့ရဲ့ အလုပ်ဖော် အမျိုးသားကို သူ့ဇနီးကို ဈေးဝယ်ခေါ်သွားပေးဖို့နဲ့ ဂရုစိုက်ပေးဖို့ ပြောခဲ့တာ။ ဒါပေမဲ့ သူ့ဇနီးက စိတ်ဝေဒနာရှိတော့ အသိစိတ်က ရှင်းရှင်းလင်းလင်း မရှိဘူး။ အချိန်ပိုပြီးလို့ အိမ်ပြန်ရောက်တဲ့အခါ ဇနီးသည် အိမ်မှာ မရှိတော့ဘူး။ ခင်ဗျားတို့ သိလား သူ့ဇနီး ဘယ်ရောက်သွားလဲ။ ပြီးတော့ အဲ့ဒီအလုပ်ဖော် အမျိုးသားကကော ဘယ်ရောက်သွားလဲ"

တိုက်ရိုက်ထုတ်လွှင့်မှုထဲမှ ပရိသတ်များမှာ စိတ်လှုပ်ရှားနေကြသည်။

ဇာတ်လမ်းကို စိတ်ဝင်စားအောင် လုပ်ခြင်းကို ကောင်းကောင်းသုံးတတ်သည့် ရှေ့နေဂူ၏ ပြောပြချက်ကြောင့် နောက်ဆက်တွဲကို သိချင်နေကြသည်။

သူ့ဇနီးသည် အဲ့ဒီညက အိမ်မှာ မရှိဘူးဆိုတော့... ဘယ်သွားမလဲ။ အဲ့ဒီ အလုပ်ဖော် အမျိုးသားအိမ်ကို ရောက်သွားတာလား။