အခန်း ၁၆၅

အခန်း ၁၆၅

ဂူချန်က "ကောင်းပြီ ဒီအမှုကို ကျွန်တော် တာဝန်ယူပါ့မယ်။ ကျွန်တော့်ကို ဆက်သွယ်ဖို့ အချက်အလက်တွေကို သီးသန့်စာပို့တဲ့နေရာကနေ ပို့ပေးလိုက်ပါမယ်။ အဲ့ဒါကို Add လုပ်ထားလိုက်ပါ။ အသေးစိတ်ကို နောက်မှ ဆွေးနွေးကြတာပေါ့။ အရင်ဆုံး အမှုရဲ့အခြေအနေကို ကျွန်တော် နားလည်အောင် အရင်လေ့လာပါရစေ" ဟု ပြောလိုက်သည်။

နွီရှကျွမ်းမှာ ဝမ်းသာလွန်း၍ မျက်ရည်များပင် ကျလာပြီး "ဟုတ်ကဲ့ ဟုတ်ကဲ့ တကယ် ကျေးဇူးတင်ပါတယ် ရှေ့နေဂူ" ဟု ပြောသည်။

တိုက်ရိုက်ထုတ်လွှင့်မှုထဲမှ ကြည့်ရှုသူများမှာလည်း နွီရှကျွမ်းကို အားပေးစကားများ ဆိုနေကြသည်။

[ဥပဒေမဲ့မိုက်ရူးရဲလှုပ်ရှားပြီ။ စိတ်မပူပါနဲ့ သူ သေချာပေါက် သားဖြစ်သူရဲ့ ပြစ်ဒဏ်ကို လျော့ပေါ့အောင် ကူညီပေးပါလိမ့်မယ်။ ၁၅ နှစ်ဆိုတာတော့ ဖြစ်နိုင်ပါ့မလား။ နောက်ဆုံးတော့ ပိုက်ဆံယူသွားတာက နွီရှကျွမ်းရဲ့သား မဟုတ်ဘူးလေ။ သူက သူ့အဖေ ဆေးကုသခရိတ်အတွက်ပဲ ကြိုးစားခဲ့တာပါ။ ပြီးတော့ ပိုက်ဆံမထုတ်ပေးဘဲ ခက်ခဲအောင် လုပ်တဲ့ ဘဏ်မှာပဲ အပြစ်ရှိတာပါ။ ဘယ်သူ့ကို အပြစ်တင်ရမှာလဲ]

[ဒါလည်း ဟုတ်တာပဲ၊ ဒါပေမဲ့ ရာဇဝတ်သားက ပိုက်ဆံရတာနဲ့ ချက်ချင်းပဲ ဆေးရုံစရိတ်အတွက် ပေးသွားတယ်။ အဲ့ဒီလုယက်သူက ကျောက်ရိရှန်းကို သိနေတာလား သူတို့ တကယ်ပဲ သိကျွမ်းနေကြတာလား။ ဘယ်လိုလုပ်ပြီး ဒီလောက်တိုက်ဆိုင်နေရတာလဲ]

[ကျွန်တော်ထင်တာကတော့ ၁၅ နှစ်ဆိုတာ အခြေအနေအရ ကြည့်ရင် အရမ်းများလွန်းပါတယ်။ ကျောက်ရိရှန်းနဲ့ လုယက်သူတွေက ပူးပေါင်းကြံစည်သူတွေ ဖြစ်နေရင်တောင် သူ့အဖေကို ကယ်တင်ဖို့ ကြိုးစားခဲ့တာကို ထည့်သွင်းစဉ်းစားပြီး ပြစ်ဒဏ်လျှော့ပေါ့ပေးသင့်ပါတယ်။ ဒီလောက် ပြင်းထန်တဲ့ ပြစ်ဒဏ်ပေးစရာ မလိုပါဘူး။ ၁၅ နှစ်နဲ့ စတင်တဲ့ ပြစ်ဒဏ်ဆိုတာ ဘယ်သူမဆို ခံနိုင်ရည်မရှိပါဘူး]

[လုယက်တဲ့သူနဲ့ ကျောက်ရိရှန်းက ပူးပေါင်းကြံစည်သူတွေ ဖြစ်နေပုံပဲ မဟုတ်ဘူးလား။ သူတို့က တူညီတဲ့ဘဏ်၊ တူညီတဲ့ဆေးရုံမှာ ရှိနေခဲ့ကြပြီး အလယ်တန်းကျောင်းတုန်းက သူငယ်ချင်းတွေလည်း ဖြစ်နေကြတယ်လေ...]

[စိတ်မပူပါနဲ့ ရှေ့နေဂူ ဝင်ကူညီပေးပါလိမ့်မယ်။ ရှေ့နေဂူရေ ပြစ်ဒဏ်လျှော့ပေါ့ပေးဖို့ ကူညီပေးပါဦး။ ပြစ်ဒဏ်လျှော့ပေါ့နိုင်ရင်ပဲ အောင်ပွဲခံရသလို ခံစားရမှာပါ။ ၁၅ နှစ်ဆိုတာ တကယ်ကို ကြာလွန်းပါတယ်]

[ဟူး... အဓိကကတော့ ပထမအဆင့်မှာ ငှားခဲ့တဲ့ရှေ့နေက မယုံကြည်ရတာပါ။ ပိုက်ဆံတွေ အများကြီး သုံးခဲ့ပေမဲ့ ဘာမှ အသုံးမဝင်ခဲ့ဘူး။ နောက်ဆုံးတော့ အမြင့်ဆုံးပြစ်ဒဏ် ၁၅ နှစ် ချမှတ်ခံလိုက်ရတယ်... ဥပဒေအရ လုယက်မှုအတွက် ၁၅ နှစ်ပဲ ရှိတာလေ]

[ကျွန်တော်လည်း သူတို့အတွက် စိတ်မကောင်းဖြစ်ရပါတယ်။ ဒါပေမဲ့ ဘဏ်တွေက တကယ်ကို ရက်စက်ပြီး စိတ်ပျက်ဖို့ ကောင်းတယ်။ သူတို့ရဲ့ ကောင်တာက ထွက်သွားရင် တာဝန်မယူဘူးဆိုတဲ့ မူဝါဒက တကယ်ကို ရွံရှာဖို့ကောင်းပြီး သည်းမခံနိုင်စရာပါပဲ]

....

ဂူချန်က "ဒီနေ့ တိုက်ရိုက်ထုတ်လွှင့်မှုကတော့ ဒီလောက်ပါပဲ။ အခြေအနေကို နားလည်ဖို့အတွက် တရားလိုနဲ့ ဆက်သွယ်ဖို့ လိုအပ်ပါတယ်။ နောက်မှ တိုက်ရိုက်ထုတ်လွှင့်မှုပြန်လွှင့်ပါမယ်။ ကျွန်တော်လည်း ၂ ရက်လောက် အနားယူဖို့ စီစဉ်ထားပေမဲ့ မဖြစ်နိုင်တော့ဘူးထင်ပါတယ်။ ဒီအမှုကို အရင် ဖြေရှင်းရတော့မှာပါ" ဟု ပြောသည်။

တိုက်ရိုက်ထုတ်လွှင့်မှုအဆုံးသတ်ပြီးနောက် ဂူချန်သည် နွီရှကျွမ်းနှင့် ချက်ချင်း ဆက်သွယ်လိုက်သည်။

ဖုန်းထဲတွင် နွီရှကျွမ်းက "ရှေ့နေဂူ ဒီအမှုအတွက် ရှေ့နေခ ဘယ်လောက် ပေးရမလဲရှင်" ဟု မေးသည်။

ဂူချန်က "ပုံမှန်ဆိုရင်တော့ တစ်မှုအတွက် ယွမ်နှစ်သိန်း ယူပါတယ်။ ဒါပေမဲ့ ဒီအမှုက ထူးခြားတယ်။ ကျွန်တော်တို့သာ အနိုင်ရရင်တော့ ဘဏ်ကပဲ ဥပဒေရေးရာစရိတ်ကို တာဝန်ယူပေးပါလိမ့်မယ်" ဟု ပြန်ဖြေသည်။

နွီရှကျွမ်းက "ဈေးနှုန်းက အရေးမကြီးပါဘူး ရှေ့နေဂူ။ ကျွန်မတို့သားကို ကူညီပေးဖို့ပဲ လိုပါတယ်။ ဘယ်လိုပဲ ဖြစ်ဖြစ် သားရဲ့ ပြစ်ဒဏ်ကို လျော့ပေါ့ပေးနိုင်ရင်ပဲ အများကြီး ကျေးဇူးတင်ပါပြီ" ဟု ခေါင်းညိတ်သည်။

ဂူချန်က "အသေးစိတ်တွေကို ကျွန်တော် လေ့လာကြည့်ဖို့ လိုပါသေးတယ်။ ကျွန်တော့်ကို လိပ်စာနဲ့ ခင်ဗျားသိထားတဲ့ အကြောင်းအရာတွေကို ပို့ပေးပါ။ ပြီးရင် လူချင်းတွေ့ဆုံ ဆွေးနွေးကြတာပေါ့" ဟု ပြောသည်။

နွီရှကျွမ်းက "ဟုတ်ကဲ့ ရပါတယ်" ဟု ပြောကာ လိပ်စာကို ပို့ပေးလိုက်သည်။

ဂူချန် စစ်ဆေးကြည့်လိုက်ရာ လိပ်စာမှာ ကျန်းချန်တွင် ဖြစ်နေသည်။ ယွမ်မြို့မှ ကျန်းချန်သို့ လေယာဉ်ဖြင့် ၂ နာရီမှ ၃ နာရီခန့် ကြာမြင့်မည်ပင်။

ဂူချန်သည် ရွှယ်ချင်းချင်းကို ကြည့်ကာ "ကျွန်တော်တို့ အနားယူဖို့ မဖြစ်နိုင်တော့ဘူးထင်တယ်။ မနက်ဖြန်အတွက် လေယာဉ်လက်မှတ် ကြိုတင်ပြင်ဆင်ထားပါ။ ကျန်းချန်ကို သွားကြမယ်။ ကျွန်တော်တို့မှာ တိုက်ပွဲဝင်ရမယ့် အမှုတစ်ခု ရှိနေပြီ" ဟု ပြောသည်။

ရွှယ်ချင်းချင်းက "သူဌေး ဒီအမှုက တကယ် ခက်ခဲမယ်လို့ ခံစားရတယ်။ တရားရုံးက ပထမအဆင့်မှာတင် ၁၅ နှစ် ချမှတ်ထားပြီးဖြစ်သလို ကျောက်ရိရှန်းက လုယက်တဲ့သူကို သိမသိဆိုတာလည်း မသေချာဘူး။ သူတို့တွေက သူငယ်ချင်းတွေလည်း ဖြစ်နေကြတယ်။ ဒီအခြေအနေမှာ ကျောက်ရိရှန်းက ဘဏ်ကောင်တာကို ဖျက်ဆီးခဲ့တာလည်း အမှန်ပဲ... ကျွန်တော်တို့ ဘယ်လို ကာကွယ်ပေးမှာလဲ" ဟု မေးသည်။

ဂူချန်က "ကျောက်ရိရှန်း တကယ်ပဲ ပြစ်မှုကျူးလွန်ခဲ့တယ်လို့ မင်း ထင်သလား" ဟု ပြန်မေးသည်။

ရွှယ်ချင်းချင်းက ဂူချန်ကို အပြစ်ကင်းစင်သော အကြည့်ဖြင့် ကြည့်ကာ "သူ မကျူးလွန်ခဲ့ဘူးလား။ ကျွန်မတော့ ကိုယ်ကျင့်တရားအရဆိုရင် ဘာမှ မမှားဘူးလို့ ထင်ပါတယ်။ ပြဿနာက ဘဏ်မှာပါ။ ဒါပေမဲ့ ဆက်စပ်မှုတွေက အရမ်းများနေတယ်။ ကျောက်ရိရှန်းကို လုယက်သူရဲ့ အပေါင်းအပါလို့ သတ်မှတ်ထားတယ်။ သူတို့တကယ် ပူးပေါင်းကြံစည်ခဲ့ရင် ကျောက်ရိရှန်းက လုယက်မှုမှာ အပြစ်ရှိသူ ဖြစ်သွားမှာပါ။ အကယ်၍ သူ တကယ်ပဲ ဘာမှ မပတ်သက်ခဲ့ရင်..." ဟု ပြောလိုက်သည်။

ဂူချန်က ပြုံးလျက် "ဖိုင်တွေကို စစ်ဆေးကြည့်ရင် အမှန်တရားကို သိရမှာပါ။ နွီရှကျွမ်း ပြောသလိုသာဆိုရင် ကျွန်တော်ကတော့ ကျောက်ရိရှန်းကို အပြစ်ကင်းစင်တယ်လို့ပဲ ထင်တယ်။ ပိုက်ဆံက သူ့ငွေ မဟုတ်သလို လုယက်သူနဲ့လည်း မသိဘူး။ ကြိုတင်စီစဉ်ထားတာလည်း မရှိဘူး။ သူတို့နဲ့လည်း ပူးပေါင်းတာ မဟုတ်ဘူးဆိုရင် လုံးဝ အပြစ်မရှိပါဘူး။ ကောင်တာကို ဖျက်ဆီးခဲ့တာအတွက်တော့ လျော်ကြေး ပေးရမှာပေါ့" ဟု ပြောသည်။

ရွှယ်ချင်းချင်း၏ မျက်လုံးများ ပြူးကျယ်သွားပြီး "အပြစ်မရှိဘူးလား သူဌေး အပြစ်မရှိကြောင်းကို ဘယ်လို ငြင်းချက်ထုတ်မှာလဲ" ဟု မေးသည်။

ရွှယ်ချင်းချင်း၏ ဥပဒေကျွမ်းကျင်မှုမှာလည်း ထက်မြက်သည်။

သို့သော်လည်း ကျောက်ရိရှန်းအတွက် အပြစ်မရှိကြောင်း ငြင်းချက်ထုတ်ရန် သူမ မတွေးတောနိုင်ခဲ့ပေ။

မူလပြစ်ဒဏ် ၁၅ နှစ်မှသည် အပြစ်မရှိကြောင်း သက်သေပြရန်မှာ အလွန်ကျွမ်းကျင်မှု လိုအပ်သည်။ ဤအမှုမှာ ဂူချန် ကိုင်တွယ်ခဲ့ဖူးသော အမှုများနှင့် မတူညီပေ။

ဂူချန်၏ ယခင်အမှုများမှာ မိမိကိုယ်ကို ကာကွယ်ခြင်း သို့မဟုတ် ခိုင်လုံသော အထောက်အထားများ ရှိခဲ့သည်။

နောက်ဆုံး ဖြစ်ပျက်ခဲ့သည့် တိုက်ပြေးသည့်အမှုမှာလည်း အဘိုးအိုက တမင်တကာ မတော်တဆမှုဖြစ်အောင် ဖန်တီးခဲ့ခြင်းကြောင့် အပြစ်မရှိကြောင်း ပြောင်းလဲနိုင်ခဲ့သည်။

သို့သော်လည်း ဤအမှုမှာမူ သဘာဝချင်း ကွဲပြားသည်။

ဘဏ်ရဲ့ စည်းမျဉ်းတွေက ဘယ်လောက်ပဲ စိတ်ပျက်စရာကောင်းကောင်း ကျောက်ရိရှန်း ငွေထုတ်ရခက်အောင် ဘဏ်ဘက်က အခက်အခဲမျိုးစုံ လုပ်ခဲ့တာကြောင့် ဒီပြဿနာကို ဘယ်လိုကိုင်တွယ်ဖြေရှင်းမလဲဆိုတာက တကယ့်ကို စိန်ခေါ်မှုကြီးတစ်ခု ဖြစ်နေပြီ။

ဒါတင်မကသေးဘူး...

ဘဏ်ဓားပြက ကျောက်ရိရှန်းရှိနေတဲ့ ဘဏ်ကိုမှ ရွေးပြီး ဓားပြတိုက်ခဲ့တာဖြစ်သလို ဆေးရုံကလည်း တစ်ခုတည်း တူညီနေပြန်တယ်...

ဒါက တိုက်ဆိုင်လွန်းနေတာ မဟုတ်ဘူးလား...

အဆိုးဆုံးအချက်ကတော့ ကျောက်ရိရှန်းနဲ့ အဲဒီဘဏ်ဓားပြက အလယ်တန်းကျောင်းတုန်းက အတူတက်ခဲ့တဲ့ သူငယ်ချင်းတွေ ဖြစ်နေကြတာပဲ။

ပြီးတော့ အဲဒီဓားပြက ကျောက်ရိရှန်းရဲ့ အဖေ ဆေးကုသဖို့အတွက် လိုအပ်နေတဲ့ ယွမ် ၃ သောင်းကို ထုတ်ပေးခဲ့သေးတယ်။

သူတို့နှစ်ယောက်ကြားမှာ ဘာပတ်သက်မှုမှ မရှိပါဘူးလို့ ပြောရင်... ဒါက သာမန်ကိစ္စလို့ ယူဆလို့ရပါဦးမလား...

ပိုပြီး အခြေအနေဆိုးသွားတာကတော့ ကျောက်ရိရှန်းကိုယ်တိုင်က ဘဏ်ကောင်တာရဲ့ မှန်ကာနံရံကို ရိုက်ခွဲပစ်ခဲ့တာပဲ။

အဲဒီအချက်တစ်ခုတည်းနဲ့တင်ပဲ ရာဇဝတ်မှု မြောက်နေပြီလေ...

ကျောက်ရိရှန်းနဲ့ ဘဏ်ဓားပြတို့က တစ်ယောက်နဲ့တစ်ယောက် မသိကြပါဘူးလို့ ဘယ်လိုပဲ ငြင်းငြင်း ဘယ်သူက ယုံမှာလဲ...

သူဌေးအနေနဲ့ကော... အားလုံးကွင်းဆက်မိနေတဲ့ ဒီအမှုကို လုံးဝ အခြေအနေ ပြောင်းပြန်လှန်ပစ်နိုင်ပါ့မလား...။

ဂူချန်က "မင်း နောက်ဆုံးသိရမှာပါ။ အခုတော့ ဒီည ကောင်းကောင်းနားလိုက်ပါ။ ကျွန်တော့်အတွက် လက်မှတ်ဘွတ်ကင်လုပ်ထားလိုက်။ မနက်ဖြန် ကျန်းချန်ကို သွားကြမယ်" ဟု ပြောသည်။

ရွှယ်ချင်းချင်းမှာ အံ့ဩနေဆဲ ဖြစ်သော်လည်း သူမ၏သူဌေးကို ယုံကြည်နေသည်။

သူမ ဂူချန်ဘေးမှာ သင်ယူနေရခြင်းမှာလည်း ဤအချက်ကြောင့်ပင်။

အမှုများစွာကို သူမ ကိုင်တွယ်နိုင်သော်လည်း ဤကဲ့သို့သော အမှုမျိုးကိုတော့ သူမ တစ်ယောက်တည်း ဘယ်လိုဖြေရှင်းရမှန်း မသိခဲ့ပေ။

သူမအနေဖြင့်မူ ပြစ်ဒဏ်လျှော့ပေါ့ရုံမျှအတွက်သာ အစွမ်းကုန် လျှောက်လဲချက်ပေးနိုင်မည်ပင်။

ထိုသို့သော အခြေအနေမျိုးတွင်ပင် အနည်းဆုံး ၇ နှစ်မှ ၁၀ နှစ်အထိ ထောင်ဒဏ် ကျခံရနိုင်ခြေ ရှိနေသေး၏။

သို့သော်လည်း ဂူချန်ကမူ ကျောက်ရိရှန်းတွင် လုံးဝအပြစ်မရှိကြောင်း တရားသေလွှတ်ရန် တိုက်ရိုက် ရည်မှန်းနေခြင်းပင်။

လုယက်မှုပုဒ်မဆိုသည်မှာ နှစ်ပေါင်းများစွာ ထောင်ဒဏ်ကျခံရနိုင်သည့် ကြီးလေးသော ရာဇဝတ်မှုတစ်ခု ဖြစ်သော်လည်း အကယ်၍ ပြစ်မှု၏ သဘောသဘာဝနှင့် အလှည့်အပြောင်းကိုသာ ပြောင်းလဲပစ်နိုင်ပါက အမှုတစ်ခုလုံး၏ ရလဒ်ကလည်း တစ်ဆစ်ချိုး ပြောင်းလဲသွားနိုင်သည်။

ရွှယ်ချင်းချင်းသည် လေယာဉ်လက်မှတ်များကို အမြန်ဆုံး ဝယ်ယူလိုက်ပြီး နောက်တစ်နေ့ လေဆိပ်သို့ သွားရန်အတွက် အထုပ်အပိုးများကို သေသေချာချာ ပြင်ဆင်တော့သည်။

နောက်တစ်နေ့ နံနက်စောစောတွင် ဂူချန်နှင့် ရွှယ်ချင်းချင်းတို့သည် ကျန်းချန်မြို့ဆီသို့ စတင်၍ ထွက်ခွာခဲ့ကြသည်။

ဝေဟင်၌ ပျံသန်းနေသော လေယာဉ်ပေါ်တွင် ရွှယ်ချင်းချင်းက ဂူချန်ကို စိုးရိမ်တကြီး ကြည့်

လိုက်ရင်း "သူဌေး... ဒီအမှုမှာ ကျွန်မတို့ အနိုင်ရဖို့ အခွင့်အရေး ဘယ်လောက်အထိ ရှိနိုင်မလဲရှင့်" ဟု တိုးတိုးလေး မေးလိုက်တော့သည်။

ဂူချန်က "ဘယ်အမှုမဆို ၁၀၀ ရာခိုင်နှုန်း အနိုင်ရမယ်လို့ မရှိပါဘူး။ ဒီအမှုကတော့ ၉၉.၉၉၉၉ ရာခိုင်နှုန်းလောက် အနိုင်ရဖို့ အခွင့်အရေး ရှိပါတယ်" ဟု ဖြေသည်။

ရွှယ်ချင်းချင်း "….."

၉၉.၉၉၉၉ ရာခိုင်နှုန်းနဲ့ ၁၀၀ ရာခိုင်နှုန်း ဘာကွာလို့လဲ။

ဆိုလိုသည်မှာ သူဌေးက ထိုအမှုအပေါ် အလွန်ပင် ယုံကြည်မှု ရှိနေခြင်းပင်။

သူတို့နှစ်ဦး ကျန်းချန်သို့ အမြန်ရောက်ရှိလာကြသည်။

ကျန်းချန်ရောက်သည်နှင့် ဂူချန်နှင့် ရွှယ်ချင်းချင်းတို့သည် နွီရှကျွမ်းနှင့် ပထမဆုံး တွေ့ဆုံကြသည်။

အခြေအနေကို နားလည်သဘောပေါက်ပြီးနောက် ဂူချန်သည် နွီရှကျွမ်းနှင့် စာချုပ်ချုပ်ဆို လိုက်သည်။

နွီရှကျွမ်းက "ကျေးဇူးတင်ပါတယ် ရှေ့နေဂူ ဒီအမှုကို ကူညီပေးတဲ့အတွက်ပါ။ ရှေ့နေဂူ ကျွန်မတို့ ဒုတိယအဆင့်အတွက် အယူခံဝင်ရမှာလား" ဟု မေးသည်။

ဂူချန်က ခေါင်းညိတ်ကာ "ဟုတ်ပါတယ်။ လုပ်ငန်းစဉ်အတိုင်း ဆက်လုပ်ပြီး အယူခံဝင်ဖို့ ပြင်ဆင်ထားလိုက်ပါ" ဟု ပြောသည်။