အခန်း ၁၆၇

အခန်း။ ၁၆၇

ဂူချန်သည် ခေါင်းညိတ်လိုက်ပြီး "ဟုတ်ပါတယ်။ ကျွန်တော် ခုခံချေပမှာက ပြစ်ဒဏ်လျှော့ပေါ့ပေးဖို့ မဟုတ်ဘူး။ အပြစ်မရှိကြောင်းအမိန့်ရဖို့အတွက်ပါ" ဟု ခိုင်မာစွာ ပြောလိုက်သည်။

တရားရုံးဝန်ထမ်းမလေးမှာ ထိုစကားကို ကြားလိုက်ရသည့်အခါ အံ့ဩလွန်း၍ စကားပင် ဆွံ့အသွားတော့သည်။

"ဒါ... ဒါပေမဲ့..."

အခြေအနေက ဒီလောက်အထိ ကွင်းဆက်မိနေပြီး သက်သေအထောက်အထားတွေ အခိုင်အလုံ ရှိနေတဲ့ ဒီအမှုကြီးကိုမှ ဂူချန်က အပြစ်မရှိကြောင်း လိုက်ပြီး ချေပပေးဦးမယ်တဲ့လား...

ဘယ်လိုလုပ် ဖြစ်နိုင်မှာလဲ...

အကယ်၍သာ အခြားရှေ့နေတစ်ယောက်က ပြောလိုက်မည်ဆိုလျှင် ထိုသူကို အရည်အချင်းမရှိသူ၊ မယုံကြည်ရသူဟု သတ်မှတ်မိပေလိမ့်မည်။

သို့သော်လည်း ထိုစကားကို ပြောသူမှာ ဂူချန် ဖြစ်နေသောကြောင့် ဝန်ထမ်းမလေးမှာ သံသယဖြစ်ခြင်းထက် ထိုစကား၌ တစ်စုံတစ်ရာသော အကြောင်းရင်းရှိမည်ဟုသာ တွေးမိသည်။

ဒါပေမဲ့လည်း... ဒီအမှုမှာ ဓားပြတိုက်မှု ကျူးလွန်ခဲ့တာက အထင်အရှားကြီး ဖြစ်နေတာပဲဥစ္စာ။ အဲဒါကို... သူက ဘယ်လိုနည်းနဲ့ အပြစ်မရှိကြောင်း ချေပပေးမှာလဲ...

သူမ ခေါင်းခါလိုက်ကာ သူမ၏ ဉာဏ်ဖြင့် မည်သို့မှ မတွေးတတ်တော့ပေ။

"ရှေ့နေဂူ... ကံကောင်းပါစေရှင်။ ဒီအမှုကိုသာ အပြစ်မရှိကြောင်း အောင်မြင်အောင် ချေပနိုင်မယ်ဆိုရင်တော့ ရှေ့နေဂူဟာ တကယ့်ကို ထူးချွန်လွန်းနေပါပြီ... တကယ်ကို အံ့ဩဖို့ကောင်းတာပဲ"

ဂူချန်သည် အေးဆေးစွာ ပြုံးလိုက်ပြီး "ကောင်းပါပြီ စောင့်ကြည့်ကြတာပေါ့" ဟုသာ ပြန်ပြောသည်။

ဝန်ထမ်းမလေးသည် အမှုတွဲကို ထုတ်ပေးလိုက်ပြီးနောက် "ဒါဆို ရှေ့နေဂူကို ကျွန်မ မနှောင့်ယှက်တော့ပါဘူး" ဟု ပြောကာ ထွက်ခွာသွားခဲ့သည်။

ဂူချန်သည် အမှုတွဲကို စတင်ဖတ်ရှုသည်။

ဤအမှုသည် အပေါ်ယံအားဖြင့် ကြည့်လျှင် အလွန်ရိုးရှင်းလှသည်။

အထောက်အထားများအားလုံးသည်လည်း မျက်မြင်ထင်ရှားရှိနေသည်။

အမှန်ဆိုရလျှင် ဤအမှုမျိုးအတွက် ဂူချန်အနေဖြင့် သူ၏လျှို့ဝှက်စနစ်ကိုပင် အသုံးပြုစရာ မလိုပေ။

သူသည် စနစ်မပါဘဲနှင့်ပင် ထိပ်တန်းရှေ့နေတစ်ဦး၏ ကျွမ်းကျင်မှုဖြင့် ဖြေရှင်းနိုင်စွမ်းရှိသည်။

အမှုတွဲကို စေ့စေ့စပ်စပ် စစ်ဆေးပြီးနောက် ဂူချန်က "ဒီအမှုကို ကျွန်တော် အပြည့်အဝ နားလည်သွားပြီ အခြေအနေက ရှင်းသွားပြီ" ဟု ပြောလိုက်သည်။

ရွှယ်ချင်းချင်းက စိတ်လှုပ်ရှားစွာဖြင့် "သူဌေး... ဘယ်လိုထင်လဲ အနိုင်ရဖို့ ယုံကြည်မှုရှိလား" ဟု မေးသည်။

ဂူချန်က ပြုံးလျက် "ငါ မယုံကြည်တဲ့ အမှုကို ကိုင်တွယ်တာ မြင်ဖူးလို့လား"

ထို့နောက် သူက ဆက်ပြောသည် "ဒီအမှုရဲ့ အခြေအနေက ဒီလိုပါ။ အနိုင်ရဖို့က မခက်ခဲပါဘူး။ ဒါပေမဲ့ တစ်ခုခုတော့ လိုအပ်နေသေးတယ်"

ရွှယ်ချင်းချင်းမှာ နားမလည်နိုင်ဖြစ်ကာ "သူဌေး... ဘာကို လိုအပ်တာလဲ" ဟု မေးမြန်းသည်။

ဂူချန်က အမှုတွဲကို ပိတ်လိုက်ပြီး "ဒီအမှုမှာ ကြီးမားတဲ့ ပြဿနာတစ်ခု ရှိနေတယ်။ ကျောက်ရိရှန်းအကြောင်း မပြောခင် ရွီမော်ဘဏ်အကြောင်း ပြောရမယ်။ ရွီမော်ဘဏ်မှာ ပြဿနာကြီးကြီးမားမား ရှိနေတယ်"

"ကျောက်ရိရှန်း ငွေထုတ်ဖို့ သွားတဲ့အခါ ဘဏ်က လူကိုယ်တိုင် လာရမယ်လို့ အတင်းတောင်းဆိုတယ်။ သူ့အဖေက ICU ထဲမှာ ရှိနေတယ်ဆိုတာ သိလျက်နဲ့ကို အဖေက ကိုယ့်အဖေဖြစ်ကြောင်း သက်သေပြဖို့ အတင်းဖိအားပေးတယ်။ အိမ်ထောင်စုစာရင်းနဲ့လည်း မရ၊ ID ကတ်နဲ့လည်း မရ။ အကုန်လုံးနဲ့ မရဘူး။ သက်သေစာရွက်တစ်ခုပဲ တောင်းဆိုနေတာ။ ဒါပေမဲ့ အဲ့ဒီသက်သေစာရွက်ကို ဘယ်ကနေ ရမှာလဲ။ သူ့အဖေက သူ့အဖေဖြစ်ကြောင်း ဘယ်သူကများ အတည်ပြုပေးနိုင်မှာလဲ"

ရွှယ်ချင်းချင်းက ခေါင်းခါလိုက်ပြီး "ကျွန်မလည်း မသိဘူး။ အဲ့ဒီအတွက် သက်သေကို ဘယ်ကနေ ရှာရမှာလဲ။ ဒီဘဏ်က တကယ့်ကို ပြဿနာပဲ မဟုတ်ရင် ကျောက်ရိရှန်း ဒီလိုလမ်းကြောင်းမျိုး ရောက်မှာ မဟုတ်ဘူး။ ဘဏ်က ဘာလို့ သက်သေအထောက်အထားတွေကို ဒီလောက်တောင် ရှုပ်ထွေးအောင် လုပ်နေရတာလဲ။ ပိုက်ဆံအပ်တုန်းကတော့ ဒီလောက် အဆင့်တွေ မလိုပါဘူး။ ပိုက်ဆံထုတ်တော့မှ အဆင့်တွေက အများကြီး ဖြစ်နေတာ"

ဂူချန်က တည်ငြိမ်စွာဖြင့် "ဒါပေမဲ့ အဲ့ဒါက ရွီမော်ဘဏ်ရဲ့ အကြီးမားဆုံး ပြဿနာ မဟုတ်သေးဘူး" ဟု ထောက်ပြသည်။

ရွှယ်ချင်းချင်း "သူဌေး... ရွီမော်ဘဏ်မှာ တခြား ဘာပြဿနာတွေ ရှိနေသေးလို့လဲ"

ဂူချန်က အေးဆေးစွာပင် "ရွီမော်ဘဏ်က ဥပဒေကို ချိုးဖောက်ထားတယ်။ ကျွန်တော်ထင်တယ် ဒီဘဏ်မန်နေဂျာကို ထောင်ထဲ ပို့လိုက်လို့ ရမယ်ထင်တယ်"

ရွှယ်ချင်းချင်းမှာ အံ့အားသင့်သွားပြီး "……."

ရွှယ်ချင်းချင်းမှာ ထိုစဉ်က ရွီမော်ဘဏ်၏ ပြဿနာကို မည်သို့မျှ မတွေးမိသေးပေ။ သူဌေးဖြစ်သူ ဂူချန်က ဘဏ်မန်နေဂျာကို ထောင်ထဲပို့မည်ဟု ပြောလိုက်သည့်အခါ သူမအံ့အားသင့်သွားသည်။

"သူဌေး... မန်နေဂျာကို ထောင်ပို့တယ်ဆိုတာ... ဒါ... ဒါက သိပ်ပြီး လွန်လွန်းမနေဘူးလား။ အဲ့ဒီလောက်ထိ လုပ်ဖို့ လိုလို့လား"

ဘဏ်၏ လုပ်ထုံးလုပ်နည်းတွေက ပုံမှန်မဟုတ်မှန်းတော့ သူမသိသည်။

ပိုက်ဆံအပ်ဖို့ လွယ်ကူသော်လည်း "အဖေက ကိုယ့်အဖေဖြစ်ကြောင်း" သက်သေပြခိုင်းသည့် ဟာသလိုလို လုပ်ငန်းစဉ်များကတော့ စိတ်ပျက်စရာကောင်းလှသည်။

ဒါပေမဲ့ ဒါအတွက်နဲ့ မန်နေဂျာကို ထောင်ပို့လို့ ရပါ့မလား။

ဂူချန်က တည်ငြိမ်စွာပင် "ကျောက်ရိရှန်း ပိုက်ဆံထုတ်ဖို့ ကြိုးစားတုန်းက ဘာလို့ ထုတ်လို့မရတာလဲ" ဟု မေးသည်။

"သူဌေး... ဘဏ်က လူကိုယ်တိုင် လာရမယ်လို့ ပြောတယ်။ ပြီးတော့ အဖေက ကိုယ့်အဖေဖြစ်ကြောင်း သက်သေပြဖို့ အတင်းဖိအားပေးတယ်။ အဲ့ဒါကြောင့် သူ ငွေထုတ်လို့မရတာ"

ရွှယ်ချင်းချင်းက ပြန်ဖြေသည်။

ဂူချန်က စကားဆက်သည်။

"ပြီးတော့ လုယက်တဲ့သူတွေက ပိုက်ဆံ ၃ သောင်းကို ယူသွားပြီး ကျောက်ရိရှန်းရဲ့အဖေဆေးရုံစရိတ်အတွက် ပေးသွားတယ် မဟုတ်လား"

ရွှယ်ချင်းချင်း ခေါင်းညိတ်လိုက်သည်။

ဒါပေမဲ့ ဒါက ဘဏ်မန်နေဂျာနဲ့ ဘာဆိုင်လို့လဲ။

ဂူချန်က ရှင်းပြသည်။ "အဲ့ဒီမှာတင် ဇာတ်လမ်းက စတာပဲ။ ကျောက်ရိရှန်းမှာ ပိုက်ဆံလည်း မရှိဘူး၊ ပိုင်ဆိုင်မှုလည်း မရှိဘူး။ ဒါပေမဲ့ ဘဏ်က ဘာလုပ်လိုက်လဲ သိလား။ ရွီမော်ဘဏ်က ကျောက်ရိရှန်းရဲ့ ဖခင် ဘဏ်ကတ်ထဲကနေ ပိုက်ဆံ ၃ သောင်းကို အလိုလို နုတ်ယူသွားတယ်။ သူတို့က ဒါကို ဘဏ်ရဲ့ ဆုံးရှုံးမှုကို လျော်ကြေးပေးတာလို့ ခေါင်းစဉ်တပ်တယ်"

"လုယက်သူတွေက ပိုက်ဆံ ၃ သောင်းကို ယူသွားတဲ့အတွက် ဘဏ်က ဆုံးရှုံးသွားတယ်ဆိုပြီး ကျောက်ရိရှန်းက လုယက်သူနဲ့ အပေါင်းအပါ ဖြစ်မယ်လို့ ဘဏ်က သတ်မှတ်လိုက်တယ်။ အဲ့ဒီ ၃ သောင်းကို ပြန်ဖြည့်ဖို့အတွက် ကျောက်ရိရှန်းမှာ ပိုက်ဆံမရှိသလို ထောင်ထဲ ရောက်နေတော့ ဘဏ်က သူ့အဖေရဲ့ ကတ်ထဲက ပိုက်ဆံကို တိုက်ရိုက် နုတ်ယူလိုက်တာ။ ဒီလုပ်ရပ်က ကျိုးကြောင်းဆီလျော်တယ်လို့ မင်း ထင်လား"

"သားသမီးက အကြွေးတင်ရင် မိဘက ပေးဆပ်ရမယ်ဆိုတဲ့ သဘောမျိုး ဖြစ်နေတာပေါ့။ ဒါ တရားလား"

ရွှယ်ချင်းချင်းမှာ ရုတ်တရက် သဘောပေါက်သွားသည်။

"သူဌေး ကျွန်မ နားလည်ပြီ ဒါ လုံးဝ မတရားဘူး ကျွန်မတို့နိုင်ငံရဲ့ မြို့ပြဥပဒေအရဆိုရင် ၁၈ နှစ်အောက် ကလေးတွေရဲ့ အကြွေးကို မိဘတွေက တာဝန်ယူပေးရပေမဲ့ ၁၈ နှစ်ပြည့်ပြီးသားသူတွေက အရွယ်ရောက်ပြီးသူတွေ ဖြစ်သွားပြီ။ သူတို့ရဲ့ အကြွေးကို သူတို့ပဲ တာဝန်ယူရမှာ။ အရွယ်ရောက်ပြီးသား သားသမီးတွေရဲ့ ပိုင်ဆိုင်မှုနဲ့ မိဘတွေရဲ့ ပိုင်ဆိုင်မှုက ဥပဒေအရ သီးခြားစီ ဖြစ်ပြီး တာဝန်ရှိမှုကလည်း ပူးတွဲမရှိဘူး"

"ဒါဆို ရွီမော်ဘဏ်က ကျောက်ရိရှန်းရဲ့ ဖခင်ကတ်ထဲကနေ ပိုက်ဆံကို ခွင့်ပြုချက်မပါဘဲ အလိုလို နုတ်ယူသွားတာက ဥပဒေနဲ့ မညီဘူး။ ဒါက ပြဿနာပဲ"

ဂူချန်က ပြုံးလိုက်ပြီး "ဟုတ်ပြီ ဒါဆို အသုံးပြုသူရဲ့ အပ်ငွေကို ခွင့်ပြုချက်မပါဘဲ သုံးစွဲတာက ဘာပြစ်မှုမြောက်မလဲ"

ရွှယ်ချင်းချင်း၏ ဥပဒေအသိပညာက အလုပ်လုပ်လာသည်။

"ဒါကတော့ ဖောက်သည်ရဲ့ ငွေကြေးကို တရားမဝင် ရယူသုံးစွဲမှုမြောက်ပါတယ်။ ကျွန်မတို့နိုင်ငံရဲ့ ရာဇသတ်ကြီးဥပဒေအရဆိုရင် ဒီလို လုပ်ရပ်မျိုးက ထောင်ဒဏ် ၃ နှစ်ကနေ ၇ နှစ်အထိ၊ ပမာဏများရင် ၇ နှစ်ကျော်အထိ ဖြစ်နိုင်တယ်။ ဘဏ်အနေနဲ့ ပိုင်ရှင်ရဲ့ ခွင့်ပြုချက်မပါဘဲ ငွေလွှဲပြောင်းတာက တရားမဝင်သလို၊ ဥပဒေကြောင်းအရ အရေးယူလို့ ရပါတယ်"

ဂူချန်က "ဒါဆို ရွီမော်ဘဏ်မန်နေဂျာက ဥပဒေကို ချိုးဖောက်တယ်ဆိုတာ သေချာပြီပေါ့နော်"

"ဒီလိုကိစ္စမျိုးမှာ မန်နေဂျာက အမိန့်ပေးမှ ဝန်ထမ်းတွေက လုပ်မှာပဲ။ ဘယ်သူပဲ လုပ်လုပ် ဒီတာဝန်ကတော့ မန်နေဂျာဆီမှာပဲ ရှိတယ်။ သူ ထောင်ကျဖို့ သေချာနေပြီ"

ရွှယ်ချင်းချင်းမှာ ဂူချန်၏ ဉာဏ်ရည်ကို အထင်ကြီးစွာဖြင့် လက်မထောင်လိုက်သည်။

အိုး... ငါ... ဘာကြောင့်များ ဒါကို မတွေးမိခဲ့ပါလိမ့်...

သူဌေးကတော့ တကယ့်ကို ပါးနပ်ပြီး ထူးချွန်လွန်းတယ်...

တကယ်လို့ ဒီအမှုကိုသာ အနိုင်ရခဲ့ရင်တော့ အင်တာနက်တစ်ခွင်မှာတင်မကဘဲ တစ်နိုင်ငံလုံး ဟိုးဟိုးကျော် သွားမှာ အသေအချာပဲ။

ဘဏ်ကြီးတစ်ခုလုံးကို ပြန်ပြီးတရားစွဲရဲတဲ့အပြင် ဘဏ်မန်နေဂျာကိုပါ ထောင်ထဲပို့နိုင်မယ့် ရှေ့နေမျိုးဆိုတာ လောကမှာ ဂူချန်တစ်ယောက်ပဲ ရှိနိုင်လိမ့်မယ်။

ရွှယ်ချင်းချင်းမှာ စိတ်လှုပ်ရှားစွာဖြင့် သက်ပြင်းချမိသည်။

ရွီမော်ဘဏ်ကတော့ ဒုတိယအဆင့်အတွက် အကောင်းဆုံး ပြင်ဆင်နေသော်လည်း သူတို့ဘဏ်မန်နေဂျာကိုယ်တိုင် ထောင်ကျတော့မည်ဆိုသည်ကိုတော့ ဘယ်လိုမှ မတွေးမိထားပေ။