အခန်း (၃၃၅)
Vol. 34 Ch. 335
အခန်း (၃၃၅) ဆုကြေးများ ပေးအပ်ခြင်း
သူတို့၏ ဝိညာဉ်စွမ်းအင်များ ပုံမှန်အခြေအနေသို့ ပြန်လည်ရောက်ရှိသွားသော်လည်း ဤအခိုက်အတန့်တွင် သူတို့မှာ ဝမ်းသာမနေဘဲ ခြေဖဝါးမှနေ၍ ဦးခေါင်းထိပ်အထိ နက်ရှိုင်းသော ချမ်းစိမ့်မှုတစ်ခုကို ခံစားလိုက်ကြရ၏။
သူက ဘယ်လိုလုပ်ပြီး အဲဒီလို လုပ်နိုင်ခဲ့တာလဲ...
ဒီလောက်တောင် အသံတိတ်ပြီး... ဒါက... ဒါက အရိပ်အယောင်မကျန် သတ်ဖြတ်ခြင်းနဲ့ အတူတူပဲ။
လူလေးယောက်က ကျန်းယဲ့ကို အံ့သြမှုနှင့် နက်ရှိုင်းသော အကြောက်တရားများ ရောယှက်နေသည့် အကြည့်များဖြင့် ကြည့်လိုက်ကြသည်။
"ဟုတ်... ဟုတ်ကဲ့ပါ စီနီယာ..." ဝမ့်ကျန့်ရှင်းက တစ်စက္ကန့်မျှပင် မတုံ့ဆိုင်းရဲဘဲ အလျင်အမြန် ဦးညွှတ်ကာ ပြန်ဖြေလိုက်ပြီး သူ၏ နဖူးမှ ချွေးအေးများ စီးကျလာလေသည်။
သူက ကြောက်လန့်နေသော အခြား ညီငယ်သုံးဦးကို အလျင်အမြန် ခေါ်လိုက်ပြီး သူတို့၏ ထက်မြက်သော ဓားများကို ဆွဲထုတ်ကာ မျှော်လင့်ချက်မဲ့နေသော မျက်လုံးများဖြင့် ကြည့်နေသည့် မိုးပြာရောင် ရေဖားပြုတ် နှစ်ကောင်ဆီသို့ လျှောက်သွားလိုက်ကြသည်။
မိုးပြာရောင်ရေဖားပြုတ်နှစ်ကောင်က သူတို့၏ သေဆုံးရတော့မည့် အခြေအနေကို အာရုံခံမိပုံရပြီး ပို၍ပင် ဝမ်းနည်းဖွယ်ကောင်းပြီး မခံမရပ်နိုင်ဖြစ်နေသော ဟိန်းဟောက်သံကြီးများကို ပြုလုပ်လိုက်ကြသည်။ သူတို့၏ ဧရာမခန္ဓာကိုယ်ကြီးများက အသည်းအသန် ရုန်းကန်နေကြသော်လည်း မမြင်ရသော ဖိနှိပ်ထားမှုကို အနည်းငယ်မျှပင် မလှုပ်ရှားနိုင်ခဲ့ချေ။
ဘာပဲဖြစ်ဖြစ် ဝမ့်ကျန့်ရှင်းနှင့် ဂိုဏ်းသားသုံးယောက်မှာ အစီရင်ထောင်ချီဂိုဏ်း၏ အထက်တန်းစား တပည့်များ ဖြစ်ကြပြီး မိစ္ဆာသားရဲများ၏ ပစ္စည်းများကို ကိုင်တွယ်ဖြေရှင်းရာတွင် အတော်လေး ကျွမ်းကျင်ပြီး ပရော်ဖက်ရှင်နယ် ဆန်ကြလေသည်။
အရေခွံခွာခြင်း၊ အရွတ်ထုတ်ခြင်း၊ အရိုးနွှာခြင်း၊ အနှစ်သာရကို ထုတ်ယူခြင်း...
လုပ်ငန်းစဉ်တစ်ခုလုံးက စနစ်တကျ ရှိပြီး အလွန်တရာ မြန်ဆန်ထိရောက်ချေသည်။
မကြာမီမှာပင် တောက်ပနေသော မိုးပြာရောင်ဖားပြုတ်အရေခွံ အပြည့်အစုံ နှစ်ခု၊ တုတ်ခိုင်ပြီး မာကျောသော ဖားပြုတ်အရွတ်လေးခု၊ ရေဝိညာဉ်စွမ်းအင်များ ပါဝင်နေသည့် တိရစ္ဆာန်အရိုးနှင့် အသားအမြောက်အမြား၊ တောက်ပသော မိုးပြာရောင်အလင်းများ ထုတ်လွှတ်နေသည့် ခိုဥအရွယ်အစားခန့်ရှိသော မိစ္ဆာအမြုတေနှစ်ခုကို သပ်ရပ်စွာ စီစဉ်ထားပြီး ကျန်းယဲ့ထံသို့ ရိုသေလေးစားစွာ ကမ်းပေးလိုက်ကြသည်။
"စီနီယာ... မိစ္ဆာသားရဲကို ရှင်းလင်းလို့ ပြီးသွားပါပြီ။ ဒါတွေက တန်ဖိုးအရှိဆုံး ပစ္စည်းတွေပါ။ ကျေးဇူးပြုပြီး ကြည့်ရှုပေးပါ..." ဝမ့်ကျန့်ရှင်းက ခေါင်းငုံ့ကာ သတိထားပြီး မေးလိုက်၏။ "ကျေနပ်ရဲ့လား ခင်ဗျာ..."
ကျန်းယဲ့က မြေကြီးပေါ်ရှိ ဝိညာဉ်စွမ်းအင်များ လွှမ်းခြုံထားသော ပစ္စည်းများကို... အထူးသဖြင့် အခြေတည် အထွတ်အထိပ်အဆင့်မှ မိစ္ဆာအမြုတေ နှစ်ခုကို တစ်ချက် ကြည့်လိုက်ပြီး မျက်နှာပေါ်တွင် ကျေနပ်သော အပြုံးတစ်ခုဖြင့် ခေါင်းညိတ်လိုက်လေသည်။
"မဆိုးဘူး... တာအိုမိတ်ဆွေလေးယောက်... ပင်ပန်းသွားပြီ..."
သူ၏ စကားများက နူးညံ့နေဆဲဖြစ်သော်လည်း ဝမ့်ကျန့်ရှင်းနှင့် အခြားသုံးဦးအတွက်မူ လွတ်ငြိမ်းချမ်းသာခွင့် ရလိုက်သကဲ့သို့ ခံစားလိုက်ရပြီး အလျင်အမြန် ပြန်ဖြေလိုက်ကြ၏။
"မပင်ပန်းပါဘူးခင်ဗျာ... စီနီယာကို အလုပ်အကျွေးပြုရတာ ကျွန်တော်တို့ရဲ့ ဂုဏ်ယူစရာပါ..."
ကျန်းယဲ့က မိစ္ဆာသားရဲပစ္စည်းပုံကြီးကို ဂရုတစိုက် သိမ်းဆည်းလိုက်ပြီးနောက် ကြောက်လန့်တကြား တုန်ရီနေကြသော အစီရင်ထောင်ချီဂိုဏ်းမှ တပည့်လေးဦးဆီသို့ အကြည့်ပြန်ရောက်သွားပြန်သည်။ သူက ထိုလျှို့ဝှက်ဆန်းကြယ်သော အပြုံးကို ပြုံးထားဆဲဖြစ်ပြီး သာမန်ကာလျှံကာ မေးလိုက်၏။
"ဒါနဲ့... ခင်ဗျားတို့က အစီရင်ထောင်ချီဂိုဏ်းက တပည့်တွေဆိုတော့... အစီအရင်တွေနဲ့ ပတ်သက်ရင် တော်တော်လေး ကျွမ်းကျင်မှာပဲနော်..."
ဒါက သိသာထင်ရှားနေသည်ဖြစ်ရာ ဝမ့်ကျန့်ရှင်းနှင့် အခြားသုံးဦးမှာ မတတ်သာဘဲ ခေါင်းညိတ်လိုက်ရသည်။
"စီနီယာရဲ့ ဒီလိုချီးကျူးစကားကို ကျွန်တော်တို့ လက်မခံရဲပါဘူး။ ကျွန်တော်တို့က အပေါ်ယံလောက်ပဲ နားလည်တာပါ..."
ကျန်းယဲ့က သူတို့၏ နှိမ့်ချသော စကားများကို မကြားဟန်ဆောင်ကာ ဆက်ပြောလိုက်သည်။
"ခုလေးတင် ခင်ဗျားတို့ ပြောတာက... ကယ်တင်ပေးရင် ဆုကြေးပေးမယ်ဆို။ ကျွန်တော်ကတော့ ခင်ဗျားတို့ ဂိုဏ်းရဲ့အစီအရင်တွေကို တော်တော်လေး စိတ်ဝင်စားတယ်။ အစီအရင်တွေ မှတ်တမ်းတင်ထားတဲ့ ကျောက်စိမ်းမှတ်တမ်းလိုမျိုး ပစ္စည်းတွေများ ရှိမလား မသိဘူး။ သေချာတာကတော့ ဝိညာဉ်ကျောက်တုံး ဘာညာတွေကိုလည်း ကျွန်တော် လိုအပ်တာပေါ့လေ..."
သူ၏ စကားများက အလွန် ပွင့်လင်းနေပြီး အကျိုးအမြတ်ကို တိုက်ရိုက် တောင်းဆိုလိုက်ခြင်းပင်။
ဝမ့်ကျန့်ရှင်းနှင့် အခြားသုံးဦးမှာ ချက်ချင်းပင် ရင်ကွဲမတတ် နာကျင်သွားကြရသည်။ အစီအရင် ကျောက်စိမ်းမှတ်တမ်းဆိုသည်မှာ ဂိုဏ်း အမွေအနှစ်၏ အရေးကြီးသော အစိတ်အပိုင်းတစ်ခု ဖြစ်ပြီး ဝိညာဉ်ကျောက်တုံးများ၊ ပင်ပင်ပန်းပန်း စုဆောင်းထားသော ဝိညာဉ်ဆေးပင်များနှင့် မိစ္ဆာသားရဲ ပစ္စည်းများအားလုံးကလည်း သူတို့၏ သွေးချွေးများပင်။
သို့သော်လည်း အခြေအနေက သူတို့ထက် ပိုမို အားကောင်းနေသဖြင့် သူတို့က မပေးဘဲ မနေရဲကြချေ။ အကူအညီတောင်းခံစဉ်က သူတို့ကိုယ်တိုင် ကတိပေးခဲ့သည်ကို ဆိုစရာပင် မလိုတော့....
ယခုအချိန်တွင် သူတို့သာ စကားကို ပြန်ရုပ်သိမ်းရန် သို့မဟုတ် ဖုံးကွယ်ထားရန် ကြိုးစားပါက တစ်ဖက်လူ၏ မှန်းဆ၍မရသော၊ သဘောပေါက်ရခက်သော စရိုက်လက္ခဏာဖြင့်ဆိုလျှင် သူတို့ကို စောင့်ကြိုနေသည်မှာ သေလမ်းတစ်ခုသာ ရှိကြောင်း သူတို့ ကောင်းစွာ သိရှိကြလေသည်။
ထို့အပြင် သူတို့ သေသွားလျှင်လည်း သိုလှောင်အိတ်ထဲရှိ ပစ္စည်းများအားလုံးက တစ်ဖက်လူ၏ လက်ထဲသို့ ရောက်သွားမည်သာ ဖြစ်၏။
ယခုအချိန်တွင် အများစုကို လိမ္မာပါးနပ်စွာ လွှဲပြောင်းပေးလိုက်ပြီး အခြေအနေကို နားလည်ကြောင်း ပြသလိုက်လျှင် အသက်ရှင်သန်ခွင့် ရနိုင်လောက်ပေသည်။
သူတို့ လေးယောက်က အချင်းချင်း ခါးသီးသော အကြည့်များ ဖလှယ်လိုက်ကြပြီးနောက် အံကိုကြိတ်ကာ နာကျင်မှုကို မြိုသိပ်ပြီး သူတို့၏ သိုလှောင်အိတ်များထဲမှ ပစ္စည်းများကို စတင် ထုတ်ယူလိုက်ကြတော့သည်။
နတ်ဆေးလုံး ပုလင်းများ၊ အစီအရင် အလံများနှင့် အစီအရင်ပြားအစုံများ၊ အခြေခံအစီအရင်များနှင့် လက်တွေ့ကျသော အစီအရင်အချို့ကို မှတ်တမ်းတင်ထားသည့် ကျောက်စိမ်းမှတ်တမ်းများ၊ ခုလေးတင် ကောက်ယူထားပြီး ယခင်က စုဆောင်းထားခဲ့သော ဝိညာဉ်ဆေးပင်အမြောက်အမြား၊ ယခင်က အခြား မိစ္ဆာသားရဲများကို သတ်ဖြတ်ကာ ရရှိထားသော အရေခွံနှင့် အရိုးပစ္စည်းများပင် ပါဝင်လေသည်။
ပူဇော်သက္ကာယ ပြုနေသည့်အလား ကျန်းယဲ့ရှေ့တွင် ပစ္စည်းများ အများအပြား စုပုံသွားပြီး မကြာမီမှာပင် တောင်ပူစာလေး တစ်ခုကဲ့သို့ ဖြစ်သွားခဲ့သည်။
သူတို့က အရေးကြီးဆုံးဖြစ်သော ကိုယ်ပိုင်အစီအရင်ပြားများနှင့် အသက်ကယ်ရန်အတွက် ဆေးလုံးနှင့် ဝိညာဉ်ကျောက်တုံးအနည်းငယ်ကိုသာ တိတ်တဆိတ် ချန်ထားရဲကြပြီး အခြားအရာအားလုံး၏ ဆယ်ပုံ ခုနစ်ပုံ ရှစ်ပုံခန့်ကို လွှဲပြောင်းပေးလိုက်ကြ၏။
ကျန်းယဲ့က သူ့ရှေ့ရှိ တောင်ပူစာလေးလို စုပုံနေသော ပူဇော်သက္ကာယများကို ကြည့်ကာ အနည်းငယ် မှင်တက်သွားရသည်။
သူက အစီအရင်ဗဟုသုတများနှင့် ဝိညာဉ်ကျောက်တုံး အနည်းငယ်ကိုသာ လိုချင်ခဲ့သော်လည်း တစ်ဖက်လူက ဤမျှလောက် ရိုးသားနေပြီး သူတို့၏ ပစ္စည်း အများစုကို တိုက်ရိုက် ထုတ်ပေးလိမ့်မည်ဟု မမျှော်လင့်ခဲ့ချေ။
ထိုအခါ သူ၏ မျက်နှာပေါ်ရှိ အပြုံးက မသိမသာ ပိုမို စိတ်ရင်းမှန်သွားပြီး သူ၏ လေသံကလည်း အနည်းငယ် နူးညံ့သွားခဲ့သည်။
(NT-မျက်နာများတဲ့ အကိုကျန်း... ဒါပေမဲ့ သူမကိုတော့ မမှီခဲ့ပါဘူးဗျာ...)
"တာအိုမိတ်ဆွေလေးယောက်... တကယ်ကို အားနာတတ်တာပဲ။ ဘယ်လိုလုပ်ပြီး အားနာရမလဲတောင် မသိတော့ပါဘူး..."
သူက ပါးစပ်ကနေ အားနာကြောင်း ပြောနေသော်လည်း သူ၏ လက်လှုပ်ရှားမှုများက အနည်းငယ်မျှပင် ရပ်တန့်မသွားချေ။ သူ၏ စိတ်ကူးတစ်ချက်ဖြင့် သူ့ရှေ့ရှိ တောင်ပူစာလေးလို စုပုံနေသော ရတနာများမှာ ချက်ချင်းပျောက်ကွယ်သွားပြီး သူ၏ ကိုယ်ပိုင်သိုလှောင်ရေး ဟင်းလင်းပြင်ထဲသို့ အားလုံး သိမ်းဆည်းခံလိုက်ရလေသည်။
မှတ်သားစရာ တစ်ချက်မှာ... စနစ်က သူ့ကို ထူးချွန်သော ဝန်ထမ်းအဖြစ် သတ်မှတ်ပြီးနောက်တွင် သူ၏အကျိုးခံစားခွင့်များနှင့် လစာများက သိသိသာသာ တိုးတက်လာခဲ့ပြီး သူ၏ ကိုယ်ပိုင်သိုလှောင်ရေးဟင်းလင်းပြင်မှာလည်း အဆပေါင်းများစွာ ကျယ်ပြန့်သွားခဲ့ကာ ဤပစ္စည်းများအားလုံးကို ထည့်ရန် လုံလောက်ရုံတင်မကဘဲ အများကြီးပင် ပိုနေသေးချေသည်။
အရာအားလုံးကို သိမ်းဆည်းပြီးနောက် ကျန်းယဲ့၏ စိတ်အခြေအနေမှာ အလွန် ကောင်းမွန်နေခဲ့သည်။ ထို့နောက် တစ်ဖက်လူက အစောပိုင်းတွင် ပြောခဲ့သော ကျောက်စိမ်းရည်ကို သတိရသွားသဖြင့် သူက ပြုံးကာ ပြောလိုက်၏။
"တာအိုမိတ်ဆွေလေးယောက်... အခု ကျွန်တော်တို့ကို မိုးပြာရောင်ရေဖားပြုတ်ရဲ့ အသိုက်ကို သွားပြပါဦး..."
ယင်းကို ကြားသောအခါ ဝမ့်ကျန့်ရှင်းနှင့် အခြားသုံးဦးက လက်ကွက်များ ဖော်ကာ ဓားများပေါ်တွင် တက်၍ လမ်းပြရန် အလိုအလျောက် ပြင်ဆင်လိုက်ကြသည်။
"ဟေး... ခဏစောင့်ပါဦး..." ကျန်းယဲ့က သူတို့ကို လှမ်းခေါ်လိုက်ပြန်သည်။ "ကျွန်တော်တို့က ဓားပေါ်မှာ မပျံသန်းနိုင်လို့... ခြေလျင်ပဲ လမ်းပြပေးပါ..."
လူလေးယောက် - "....."
ဝမ်ကျန်ရှင်းနှင့် အခြားသုံးဦး၏ မျက်နှာပေါ်ရှိ အမူအရာများ ချက်ချင်း အေးခဲသွားပြီး သွေးအန်လုမတတ်ပင် ဖြစ်သွာရသည်။
လခွီးပဲ.... ဓားပေါ်မှာ မပျံသန်းနိုင်ဘူး... ဟုတ်လား...
ခင်ဗျားက ခုလေးတင် မျက်တောင်တောင် မခတ်ဘဲ ဒီလောက်များတဲ့ ပစ္စည်းတွေကို ခင်ဗျားရဲ့ သိုလှောင်ရေးဟင်းလင်းပြင်ထဲကို သိမ်းလိုက်ပြီးတော့... အခုမှ ဓားပေါ်မှာ မပျံသန်းနိုင်ဘူးလို့ လာပြောနေတာလား။
ခင်ဗျားက ကျွန်တော်တို့ကို အရူးလုပ်နေတာလား...
ဒါက ငါတို့ရဲ့ ဉာဏ်ရည်ကို ဗြောင်ကျကျ စော်ကားနေတာပဲကွ...
လူလေးယောက်မှာ စိတ်ထဲတွင် ကျိန်ဆဲနေကြသော်လည်း မျက်နှာပေါ်တွင် မပြရဲကြချေ။ သူတို့က သြော်... အဲဒီလိုကိုး ၊ ကျွန်တော်တို့ မှားတွေးမိသွားတယ်.. ဟူသော ရိုသေလေးစားသည့် အမူအရာများကို အတင်းဖန်တီးကာ သဘောတူကြောင်း အကြိမ်ကြိမ် ခေါင်းညိတ်လိုက်ကြ၏။
"ဟုတ်... ဟုတ်ကဲ့ပါ စီနီယာ ပြောတာ မှန်ပါတယ်။ ကျွန်တော်တို့ လစ်ဟင်းသွားတာပါ..."
ထိုသို့ဖြင့် စိတ်ထဲတွင် ငိုကြွေးနေသော်လည်း အပြင်ဘက်တွင် အတင်းပြုံးထားရသော အစီရင်ထောင်ချီဂိုဏ်းမှ အထက်တန်းစား တပည့်လေးဦး၏ ဦးဆောင်မှုဖြင့် ကျန်းယဲ့နှင့် သူ၏အဖွဲ့က မိုးပြာရောင်ရေဖားပြုတ်၏ အသိုက်ဆီသို့ ခမ်းနားစွာ ချီတက်သွားလိုက်ကြသည်။
ဤမြင်ကွင်းက ယုံကြည်နိုင်စရာ မရှိလောက်အောင် ထူးဆန်းနေချေသည်။
ဝမ့်ကျန့်ရှင်း၏ ဦးဆောင်မှုဖြင့် အဖွဲ့က မိုးပြာရောင် ရေဖားပြုတ်၏ အသိုက်သို့ ရောက်ရှိသွားခဲ့ကြသည်။
၎င်းက နက်ရှိုင်းသော ရေကန်တစ်ခု၏ မျက်နှာချင်းဆိုင်ရှိ ကျောက်ကမ်းပါးယံ တစ်ဝက်တွင် တည်ရှိသော ဂူတစ်ခုပင်။
ရေကန်က နက်ရှိုင်းပြီး အေးစက်ကာ မှိန်ပျပျ အအေးဓာတ်များကို ထုတ်လွှတ်နေခဲ့သည်။ မျက်နှာချင်းဆိုင်ရှိ ကျောက်ကမ်းပါးယံက မတ်စောက်ပြီး ချော်နေသဖြင့် သာမန်လူများအတွက် တက်ရန် မဖြစ်နိုင်ချေ။
ကျန်းယဲ့က မြေမျက်နှာပြင်ကို တစ်ချက်ကြည့်လိုက်ပြီး ဝမ့်ကျန့်ရှင်းကို သဘာဝကျကျ ပြောလိုက်၏။ "တာအိုမိတ်ဆွေဝမ့်... ကျွန်တော့်ကို ခင်ဗျားရဲ့ ဓားပေါ် တင်ပြီး အဲဒီကို ခေါ်သွားဖို့ အကူအညီ တောင်းရတော့မယ် ထင်တယ်..."
ဝမ့်ကျန့်ရှင်းမှာ စိတ်ထဲတွင် ကျိန်ဆဲ အော်ဟစ်နေတော့သည်။
ခင်ဗျား သရုပ်ဆောင်လို့ မပြီးသေးဘူးလားဟ...
သူက မျက်နှာပေါ်တွင် အနည်းငယ်မျှသော မလေးစားမှုများကို မပြရဲဘဲ အလျင်အမြန်နှင့် ရိုသေလေးစားစွာ ပြန်ဖြေလိုက်၏။ "စီနီယာကို အလုပ်အကျွေး ပြုရတာ ဂျူနီယာအတွက် ဂုဏ်ယူစရာပါ..."
သူက ကျန်းယဲ့ကို တင်ဆောင်ထားသော ဓားကို ဂရုတစိုက်ထိန်းချုပ်ကာ ရေကန်ကို ချောမွေ့စွာ ဖြတ်ကျော်ပျံသန်းသွားပြီး မှိန်ပျပျဝိညာဉ်စွမ်းအင်များ ထုတ်လွှတ်နေသော ဂူထဲသို့ ဝင်ရောက်သွားလိုက်သည်။
အခြား ခရီးသည်များနှင့် အစီရင်ထောင်ချီဂိုဏ်းမှ ကျန်တပည့်သုံးဦးမှာမူ ရေကန်ဘေးရှိ သူတို့၏ အသိုက်အပြင်ဘက်တွင် ကျန်ရစ်ကာ စောင့်ဆိုင်းနေကြလေသည်။
ဂူက သိပ်မနက်ဘဲ မကြာမီမှာပင် အနက်ရှိုင်းဆုံး နေရာ၌ နူးညံ့သောအလင်းရောင်နှင့် လန်းဆန်းသော ရနံ့များ ထုတ်လွှတ်နေသည့် နို့နှစ်ရောင် ကျောက်စိမ်းရည် ကန်ငယ်လေးတစ်ခုကို တွေ့ရှိသွားလေသည်။
ကျန်းယဲ့က ဝိညာဉ်အရည်များကို ထည့်ရန် သီးသန့်ဖြစ်သော ကျောက်စိမ်းပုလင်းတစ်လုံးကို စနစ်မှတစ်ဆင့် လဲလှယ်လိုက်ပြီး ကျောက်စိမ်းရည်အားလုံးကို ဂရုတစိုက် သိမ်းဆည်းလိုက်၏။
ကျန်းယဲ့က ကျောက်စိမ်းရည်ကို ယူရန် ဂူထဲသို့ ဝင်သွားချိန်လေးမှာပင် အဝေးရှိ ထူထပ်သော သစ်ပင်များအောက်နှင့် ကျောက်တုံးများနောက်ကွယ်တွင် လောဘနှင့် သတိထားမှုများ ပြည့်နှက်နေသော မျက်လုံးခြောက်စုံက ပုန်းအောင်းနေကြောင်းကို မည်သူကမျှ သတိမထားမိကြချေ။