အခန်း ၃၅၄

အခန်း (၃၅၄)

အလုပ်ကိစ္စတွေ ပြီးသွားတဲ့နောက် ကျွန်တော် အယ်လီနဲ့ တွေ့ပြီး ချောင်ဒမ်ဒေါင်းက ကဖေးတစ်ခုကို သွားခဲ့တယ်။

ကျွန်တော် သွားတဲ့နေရာတိုင်းမှာ လူတွေက စိုက်ကြည့်နေကြပေမဲ့ အခုတော့ ကျင့်သားရနေပါပြီ။ တော်သေးတာက ကျွန်တော်တို့ရဲ့ ဆက်ဆံရေးကို လူသိရှင်ကြား ချပြထားတာမလို့ ပါပါရာဇီတွေက အရင်လိုမျိုး နောက်ကနေ လိုက်မနှောင့်ယှက်ကြတော့တာပါပဲ။

အယ်လီက ကော်ဖီကို တစ်ငုံသောက်ရင်း ပြောတယ်။

"အွန်ဆောင်း မော်တာရဲ့ ကားအသစ်က တကယ့်ကို ရောင်းကောင်းနေတဲ့ပုံပဲ။ ကုမ္ပဏီက ဝန်ထမ်းတစ်ယောက်လည်း အဲဒီကားကို မှာထားတယ်လေ။ ဒါပေမဲ့ ခြောက်လလောက် စောင့်ရမယ်လို့ ပြောတယ်"

"ကြိုတင်မှာယူမှုတင် အစီးရေ ၁၀၀,၀၀၀ ရှိတယ်လို့ ပြောကြတယ်"

အွန်ဆောင်း မော်တာရဲ့ လျှပ်စစ်ကားအသစ်ဖြစ်တဲ့ Raven ထွက်လာတာနဲ့ ဝယ်ယူသူတွေဆီကို အစီအစဉ်လိုက် စတင်ပေးပို့နေပြီ ဖြစ်ပါတယ်။

အခုအချိန်ထိတော့ ကိုရီးယားမှာ အလိုအလျောက် မောင်းနှင်စနစ်ဆိုတာ လမ်းကြောင်းချော်တာကို ကာကွယ်ပေးတာနဲ့ ရှေ့ကားအလိုက် အရှိန်ထိန်းပေးတာမျိုးလို ယာဉ်မောင်းကို ကူညီပေးတဲ့ အဆင့်မှာပဲ ရှိပါသေးတယ်။

ဒါပေမဲ့ Ravenကတော့ AD စီးရီးတွေလိုပဲ တူညီတဲ့ အလိုအလျောက် မောင်းနှင်စနစ်မျိုးကို အကောင်အထည်ဖော်ထားတာပါ။ ယာဉ်မောင်း ဝင်ရောက်စွက်ဖက်စရာမလိုဘဲ ပတ်ဝန်းကျင်ကို သတိပြုမိနိုင်တယ်၊ ရပ်တန့်နိုင်တယ်၊ လမ်းကြောင်းလည်း ပြောင်းလဲနိုင်ပါတယ်။ ကားစက်နှိုးတာကနေ ပါကင်ထိုးတဲ့အထိ ယာဉ်မောင်းက လုပ်ဆောင်စရာ မလိုသလောက်ပါပဲ။

"အံ့သြစရာကောင်းတာက ကိုရီးယားက အလိုအလျောက် မောင်းနှင်စနစ်ဆိုင်ရာ စည်းမျဉ်းတွေကို တော်တော်မြန်မြန် ဆိုင်းငံ့ပေးလိုက်တာပဲ"

"ကိုရီးယားက အွန်ဆောင်း မော်တာအတွက် တစ်ဦးထဲမူပိုင် ဈေးကွက်လို ဖြစ်နေတာကြောင့်လေ"

အွန်ဆောင်း မော်တာက နည်းပညာအသစ်တွေကို မိတ်ဆက်တဲ့အခါ စည်းမျဉ်းတွေကို ဖြေလျှော့ပေးတာမျိုး ဒါမှမဟုတ် အစိုးရက ပံ့ပိုးကူညီမှု အစီအမံတွေကို ချမှတ်ပေးတတ်ပါတယ်။

မော်တော်ကားတွေက ကုန်ထုတ်လုပ်မှု ကဏ္ဍတစ်ခုလုံးနဲ့ အလုပ်အကိုင် ဖန်တီးမှုအပေါ်မှာ ကြီးမားတဲ့ သက်ရောက်မှု ရှိပါတယ်။ ဒါကြောင့် နိုင်ငံတိုင်းက သူတို့ရဲ့ ပြည်တွင်းကုမ္ပဏီတွေကို ပံ့ပိုးကူညီလေ့ ရှိကြတာပါ။

အရင်တုန်းက အွန်ဆောင်း မော်တာက ဟိုက်ဒရိုဂျင်ကားတွေမှာ ရင်းနှီးမြှုပ်နှံခဲ့စဉ်က အစိုးရက 'ဟိုက်ဒရိုဂျင် စီးပွားရေး' ဆိုပြီး ခေါင်းစဉ်တပ်ကာ ဟိုက်ဒရိုဂျင်ကားတွေအတွက် ပံ့ပိုးကူညီမှု အစီအမံ အမျိုးမျိုးကို ချမှတ်ပေးခဲ့တယ်။

အဲဒီနောက် အွန်ဆောင်းမော်တာက ဟိုက်ဒရိုဂျင်ကားတွေကို စွန့်လွှတ်လိုက်ပြီး အလိုအလျောက်မောင်း လျှပ်စစ်ကားတွေကို ထုတ်လုပ်မယ်လို့ ကြေညာတဲ့အခါမှာတော့ အစိုးရက အလိုအလျောက် မောင်းနှင်စနစ်ဆိုင်ရာ စည်းမျဉ်းတွေကို ဖြေလျှော့ပေးခဲ့ပြီး လျှပ်စစ်ကားတွေအတွက် ပံ့ပိုးကူညီမှုတွေကို မြှင့်တင်ပေးခဲ့ပြန်ပါတယ်။ ချက်ချင်းဆိုသလိုပဲ အစိုးရရုံးတွေနဲ့ စူပါမားကတ်တွေမှာ လျှပ်စစ်ကား အားသွင်းဇုံ နောက်ထပ် ၁၀,၀၀၀ ကို အခွန်ငွေ သုံးစွဲပြီး တပ်ဆင်ပေးဖို့ စီစဉ်နေတာပါ။

အစိုးရတွေက အကျိုးစီးပွား ဆက်စပ်နေသူတွေရဲ့ ကန့်ကွက်မှုကြောင့် စည်းမျဉ်းတွေကို ပြင်ဆင်ဖို့ ဝေခွဲမရ ဖြစ်တတ်ကြတယ်။ ဒါပေမဲ့ ဒီတစ်ကြိမ်မှာတော့ အလိုအလျောက် မောင်းနှင်စနစ်ကိုပဲ ခွင့်ပြုပေးခဲ့တာဖြစ်ပြီး ယာဉ်မောင်း လုံးဝမပါတဲ့ ကားတွေကို ချက်ချင်း ခွင့်ပြုပေးခဲ့တာမဟုတ်လို့ ကန့်ကွက်မှုတွေက သိပ်ပြီးတော့ ပြင်းထန်မနေပါဘူး။

ဒါက အစပျိုးရုံတင် ရှိပါသေးတယ်။ အလိုအလျောက် မောင်းနှင်စနစ် နည်းပညာရဲ့ နောက်ဆုံးပန်းတိုင်က ယာဉ်မောင်းမဲ့ကားတွေပါပဲ။

လောလောဆယ်မှာတော့ ယာဉ်မောင်းခုံမှာ လူတစ်ယောက် ရှိနေရဦးမှာ ဖြစ်ပေမဲ့ အလိုအလျောက်မောင်း ကားတွေ လမ်းပေါ်ကို ပိုပြီး ရောက်လာတာနဲ့အမျှ အခြေအနေက ပြောင်းလဲသွားမှာပါ။

ယာဉ်မောင်းမဲ့ကားတွေနဲ့ ပတ်သက်ပြီး လူထုသဘောထား စစ်တမ်းကောက်ယူမှုတွေမှာ လူအတော်များများက ကားထဲမှာ ယာဉ်မောင်းတစ်ယောက် ရှိနေသင့်တယ်လို့ ဖြေဆိုခဲ့ကြတယ်။ အရေးပေါ် အခြေအနေမျိုးမှာ လူက ထိန်းချုပ်နိုင်ဖို့ လိုအပ်တယ်လို့ သူတို့က ထင်မြင်ကြလို့ပါ။

ဒါပေမဲ့ အလိုအလျောက်မောင်း ကားကို အမှန်တကယ် စီးဖူးသူတွေကတော့ မစီးဖူးသူတွေနဲ့ ယှဉ်ရင် ယာဉ်မောင်း မလိုပါဘူးလို့ ဖြေဆိုနိုင်ခြေ ပိုများပါတယ်။

အလိုအလျောက် မောင်းနှင်စနစ်က လူမောင်းတာထက် မတော်တဆဖြစ်ပွားမှုနှုန်း သိသိသာသာ ပိုနည်းတယ်ဆိုတာ အကြိမ်ကြိမ် သက်သေပြခဲ့ပြီးသားပါ။

ဥပဒေတွေ ပြောင်းလဲလာတဲ့အခါ လူတွေရဲ့ အမြင်တွေ ပြောင်းလဲလာတတ်ပြီး လူတွေရဲ့ အမြင်တွေ ပြောင်းလဲလာတဲ့အခါမှာလည်း ဥပဒေတွေ လိုက်ပြောင်းလာတတ်ပါတယ်။ အမေရိကန်မှာဆိုရင် ယာဉ်မောင်းမဲ့ မောင်းနှင်မှုကို တစ်စိတ်တစ်ပိုင်း ခွင့်ပြုပေးတဲ့ ပြည်နယ်တွေ တိုးပွားလာနေပါပြီ။ ယာဉ်မောင်းမဲ့ ကုန်တင်ကားတွေကလည်း အစုအဖွဲ့လိုက် မောင်းနှင်စနစ်ကို သုံးပြီး လမ်းမတွေပေါ်မှာ သွားလာနေကြပြီ ဖြစ်ပါတယ်။

CarOS က သယ်ယူပို့ဆောင်ရေးဝန်ဆောင်မှု လုပ်ငန်းထဲကို တိုက်ရိုက်ဝင်ရောက်လာခဲ့ပြီး ယာဉ်မောင်းမဲ့ကားတွေကို သုံးကာ အငှားယာဉ် မျှဝေစီးနင်းမှု စမ်းသပ်ဝန်ဆောင်မှုကို စတင်ခဲ့တယ်။

ဈေးကွက်ကို လွှမ်းမိုးထားတဲ့ Iver အတွက်တော့ ဒါက အရေးပေါ် ခြိမ်းခြောက်မှုတစ်ခု ဖြစ်လာခဲတာပါ။ Iverက သူတို့ရဲ့ ကိုယ်ပိုင် အလိုအလျောက် မောင်းနှင်စနစ် စမ်းသပ်မှုတွေကို ရပ်ဆိုင်းလိုက်ပြီး ယာဉ်မောင်းမဲ့ ဝန်ဆောင်မှုအတွက် AD စီးရီး ကားတွေကို ဝယ်ယူဖို့ စဉ်းစားခဲ့ပေမဲ့ ပြဿနာတစ်ခု ရှိနေပါတယ်။

CarOS က လမ်းပေါ်က အချက်အလက်တွေကို အချိန်နဲ့တပြေးညီ ရယူဖို့၊ ကားလမ်းကြောင်းတွေ ပြောင်းလဲဖို့ ဒါမှမဟုတ် ဆော့ဖ်ဝဲလ်တွေကို Update လုပ်ဖို့အတွက် သူတို့ရဲ့ အလိုအလျောက်မောင်း ကားတွေကို သုံးပါတယ်။

အချက်အလက် (Data) က အငှားယာဉ်လုပ်ငန်းတွေအတွက် အဓိက သော့ချက်ဖြစ်ပေမဲ့ ခရီးသည်တွေကို ဘယ်အချိန်၊ ဘယ်နေရာကနေ ခေါ်ဆောင်ပြီး ပို့ဆောင်ပေးတယ်ဆိုတဲ့ အချက်အလက်အားလုံးက ကားထုတ်လုပ်သူဖြစ်ပြီး ပြိုင်ဘက်လည်းဖြစ်တဲ့ CarOS ထံကိုပဲ လုံးလုံး ရောက်ရှိသွားမှာပါ။

Iver မှာ သုံးစွဲသူ ပိုများလာလေလေ၊ ပြိုင်ဘက်ဖြစ်တဲ့ CarOS က အငှားယာဉ်ဆိုင်ရာ အချက်အလက်တွေကို အလိုအလျောက် ပိုပြီး ရရှိလေလေ ဖြစ်နေမှာလေ။ အဲဒါကြောင့် Iverအုပ်စု အတွင်းမှာ AD စီးရီးတွေကို အသုံးပြုမယ့် အစီအစဉ်အပေါ် ပြင်းပြင်းထန်ထန် ငြင်းခုံမှုတွေ ရှိခဲ့တယ်။

နည်းပညာပိုင်းဆိုင်ရာ မှီခိုမှု စတင်ပြီဆိုတာနဲ့ အဲဒီထဲကနေ ရုန်းထွက်ဖို့ မလွယ်ကူတော့ပါဘူး။ အွန်ဆောင်း မော်တာက အလိုအလျောက်မောင်း လျှပ်စစ်ကားတွေရဲ့ အဓိက အစိတ်အပိုင်းတွေဖြစ်တဲ့ ဆော့ဖ်ဝဲလ်နဲ့ ဘတ္ထရီတွေကို CarOS နဲ့ TS ကုမ္ပဏီတို့ဆီကနေ အသီးသီး ရယူနေရတာပါ။ အဲဒီအတွက်ကြောင့် အနာဂတ်မှာ အွန်ဆောင်း မော်တာအနေနဲ့ သီးခြား ရပ်တည်ဖို့ ခက်ခဲလိမ့်မယ်လို့ ကျွမ်းကျင်သူတွေအကြား စိုးရိမ်ပူပန်မှုတွေ ရှိနေကြပါတယ်။

ဒါပေမဲ့ ဒါဟာ GM နဲ့ Ford တို့အတွက်လည်း အတူတူပါပဲ။

OTK ကုမ္ပဏီရဲ့ အမြင်ကနေကြည့်ရင် ဒီကုမ္ပဏီတွေက အစားထိုးလို့ ရနိုင်ပေမဲ့ သူတို့ဘက်က ကြည့်ရင်တော့ OTK ကုမ္ပဏီက မရှိမဖြစ် လိုအပ်တာပါ။

ဘာပဲဖြစ်ဖြစ် ကိုရီးယားဟာ အလိုအလျောက် မောင်းနှင်စနစ် ကဏ္ဍမှာ ဂျပန်တင်မကဘဲ တရုတ်ထက်ပါ နောက်ကျနေတယ်လို့ အရင်က သတ်မှတ်ခံခဲ့ရတာပါ။ ဒါပေမဲ့ နည်းပညာ မိတ်ဖက်ဖြစ်မှုကြောင့် အခြေအနေက ချက်ချင်း ပြောင်းပြန်ဖြစ်သွားခဲ့ပါပြီ။

အမေရိကန်မှာလိုပဲ လုပ်ငန်းကဏ္ဍ အသီးသီးမှာ အပြောင်းအလဲတွေ စတင်လာခဲ့တယ်။ အားသွင်းဇုံတွေ၊ ထောက်ပံ့ပို့ဆောင်ရေး၊ သယ်ယူပို့ဆောင်ရေး၊ အာမခံလုပ်ငန်း စတာတွေပေါ့။

ဆိုဆောင်း အာမခံလုပ်ငန်းက အလိုအလျောက်မောင်း ကားတွေအတွက် အာမခံကြေး လျှော့ချပေးတဲ့ အာမခံထုတ်ကုန်တစ်ခုကို မိတ်ဆက်ခဲ့ပြီး ထောက်ပံ့ပို့ဆောင်ရေး လုပ်ငန်းကလည်း အစုအဖွဲ့လိုက် မောင်းနှင်နိုင်တဲ့ CarOS ရဲ့ အလိုအလျောက်မောင်း ကုန်တင်ကားတွေကို စာချုပ်ချုပ်ဆို အသုံးပြုခဲ့တယ်။

K-Mobility ကလည်း အလိုအလျောက်မောင်း ကားတွေကို သုံးပြီး အငှားယာဉ် မျှဝေစီးနင်းမှု ဝန်ဆောင်မှုကို အကောင်အထည်ဖော်ဖို့ စီစဉ်နေပါတယ်။ ဒီကဏ္ဍက ခရီးသည်သယ်ယူပို့ဆောင်ရေး ဝန်ဆောင်မှုအက်ဥပဒေရဲ့ စည်းမျဉ်းတွေအောက်မှာ ပိတ်မိနေတာကြောင့် သူတို့က လုံးဝအခမဲ့ မောင်းနှင်ပေးပြီး တခြားနည်းလမ်းတွေကနေ ဝင်ငွေရှာဖို့ စဉ်းစားနေကြတာပါ။ ဒါပေမဲ့ တက္ကစီလုပ်ငန်းဘက်ကတော့ ထပ်ပြီး ကန့်ကွက်ကြဦးမှာ အသေအချာပါပဲ။

အယ်လီက သူ့ရဲ့ မေးစေ့ကို လက်နဲ့ထောက်ရင်း ပြောပါတယ်။

"ပြီးခဲ့တဲ့ နှစ်အနည်းငယ်တုန်းက ဂျင်ဟူ ငွေတွေ လျှောက်ပြီး ရင်းနှီးမြှုပ်နှံနေတုန်းက ဒီလောက်အထိ အဆင်ပြေသွားလိမ့်မယ်လို့ ငါ လုံးဝ မထင်ခဲ့မိဘူး"

ကျွန်တော် ပြုံးပြီး ခေါင်းညိတ်လိုက်တယ်။

"ဟိုဟိုဒီဒီစိုက်ပျိုးခဲ့တဲ့ မျိုးစေ့တွေက အခုတော့ အသီးအပွင့်တွေ ဝေဆာနေပြီလေ"

ကော်ဖီသောက်ရင်း စကားပြောနေကြတုန်းမှာပဲ လူတွေက ကျွန်တော့်နာမည်နဲ့ အယ်လီ့နာမည်ကို တီးတိုးပြောနေကြတာကို ကြားနေရပါတယ်။ တော်သေးတာက ကျွန်တော့်ရဲ့ သက်တော်စောင့်တွေက အနားမှာ ရှိနေလို့ ဘယ်သူမှ အနားကို ကပ်မလာကြပါဘူး။

"နာမည်ကြီးတာက ဆိုးကျိုးတွေလည်း အတော်များသားပဲနော်"

အယ်လီကလည်း သဘောတူတဲ့အနေနဲ့ ခေါင်းညိတ်တယ်။

"ဟုတ်ပါ့။ တစ်ခါတလေ မသိတဲ့လူတွေက ငါ့ကို လက်မှတ် လာတောင်းကြသေးတယ်"

တီဗီကြော်ငြာ ထုတ်လွှင့်တာ ပြီးသွားပြီ ဖြစ်ပေမဲ့ အယ်လီ ပါဝင်ထားတဲ့ ထုတ်ကုန်ဓာတ်ပုံတွေကိုတော့ ဝက်ဘ်ဆိုက်ပေါ်မှာ မြင်တွေ့နေရတုန်းပါပဲ။ သူတို့က နွေရာသီမှာ တီဗီကြော်ငြာဗားရှင်းအသစ်တစ်ခုကို ထုတ်လွှင့်ဖို့ စီစဉ်နေကြပါတယ်။

Vester က နောက်ထပ် ကြော်ငြာရိုက်ကူးဖို့ တောင်းဆိုခဲ့ပေမဲ့ အယ်လီက ယဉ်ကျေးစွာပဲ ငြင်းပယ်ခဲ့တယ်။

"တခြား နာမည်ကြီးတွေ ဘယ်လို နေထိုင်ကြလဲဆိုတာ ငါ တကယ်ကို မသိတော့ဘူး"

တချို့ နာမည်ကြီးတွေကတော့ နားရက်တွေမှာ ပြည်ပကို သွားရတာ လွတ်လပ်တယ်လို့ ပြောကြပေမဲ့ ကျွန်တော့်မျက်နှာကို ကမ္ဘာအနှံ့က သိကြတာဆိုတော့ ကျွန်တော့်အတွက်တော့ ပြည်ပကိုသွားဖို့က ခက်ခဲပါတယ်။ နိုင်ငံတွင်းက တောတောင်တွေဆီပဲ လျှောက်သွားနေလို့လည်း မရဘူးလေ။

မရှောင်လွှဲနိုင်ရင်တော့ ပျော်အောင်နေရမှာပဲ မဟုတ်ဘူးလား။

ကျွန်တော် သက်ပြင်းချရင်း ပြောလိုက်တယ်။

"တက်ဂယူ တစ်ယောက် သူ့မျက်နှာကို လူတွေသိမှာကို ဘာလို့ ဒီလောက် မုန်းလဲဆိုတာ အခုမှပဲ နားလည်တော့တယ်"

အမေရိကန် သမ္မတက ရိုနယ် စတန်ပါ ဆိုတာကို လူတွေ သိကြရင်တောင်မှ အမေရိကန်လူမျိုး အတော်များများက ဒုတိယသမ္မတက ဘယ်သူလဲဆိုတာ မသိကြပါဘူး။

ဆိုဆောင်း အုပ်စုရဲ့ ဥက္ကဌက လင်ဂျင်ယုံ ဖြစ်ပါတယ်။ ဒါပေမဲ့ ဒုတိယဥက္ကဌက ဘယ်သူလဲ။ Berkshire Hathaway ရဲ့ ဥက္ကဌ ဝါရင် ဘတ်ဖတ် က အတော်လေး နာမည်ကြီးပြီး 'အိုဟိုင်းယိုးရဲ့ ပညာရှိ' လို့တောင် တင်စားခေါ်ဝေါ်ကြပါတယ်။ ပြီးတော့ ဒုတိယဥက္ကဌ ချာလီ ဗိန်း ကလည်း ကမ္ဘာကျော် ရင်းနှီးမြှုပ်နှံသူတစ်ဦးပါ။

သူက ရင်းနှီးမြှုပ်နှံမှုတွေနဲ့ ပတ်သက်ပြီး ဝါရင် ဘတ်ဖတ်ကို အမြဲတမ်း အကြံဉာဏ်ပေးလေ့ရှိပြီး သူတို့နှစ်ဦးက အိုဟိုင်းယိုးမှာ ကျင်းပတဲ့ Berkshire Hathaway ရှယ်ယာရှင်များ အစည်းအဝေးမှာ နှစ်စဉ် အတူတူ ပေါ်ထွက်လာလေ့ ရှိပါတယ်။

ဒါတောင်မှ သူ့ရဲ့ နာမည်က အများပြည်သူကြားထဲမှာ ရေပန်းမစားပါဘူး။

OTK ကုမ္ပဏီလည်း ထို့အတူပါပဲ။ စီအီးအို ကန်ဂျင်ဟူ က အာရုံစိုက်မှု အများကြီး ခံရသလောက် ဒုတိယဥက္ကဌရဲ့ တည်ရှိမှုကိုတော့ လူသိနည်းပါတယ်။

ဒါပေမဲ့လည်း Subculture (လူနည်းစု ယဉ်ကျေးမှု) လောကထဲမှာတော့ သူ့ရဲ့ တည်ရှိမှုက အဆမတန် ကြီးမားလှပါတယ်။ အဲဒီအထဲမှာ ဂိမ်းစည်းမျဉ်းတွေနဲ့ ပတ်သက်ပြီး အမျိုးသမီးနဲ့ မိသားစုရေးရာ ဝန်ကြီးဌာနနဲ့ ထိပ်တိုက်တွေ့ခဲ့တဲ့ ကိစ္စက အဓိက အကြောင်းအရာ ဖြစ်ခဲ့ပါတယ်။

အမျိုးသမီးနဲ့ မိသားစုရေးရာ ဝန်ကြီးဌာနက Subculture အပေါ်မှာ စည်းမျဉ်းအမျိုးမျိုး ချမှတ်လေ့ရှိတာကြောင့် နာမည်ဆိုးနဲ့ ကျော်ကြားပါတယ်။ မန်ဂါ၊ အန်နီမေးနဲ့ ဂိမ်းတွေကို ဆင်ဆာဖြတ်တောက်တာတွေ အပါအဝင် ဝန်ကြီး ရှင်ဂျွန်မီ ကလည်း ကလေးနဲ့ လူငယ်များ ကာကွယ်ရေးဥပဒေကို ကာတွန်းဇာတ်ကောင်တွေအပေါ်မှာပါ ပိုပြီး တင်းတင်းကြပ်ကြပ် အသုံးချသင့်တယ်လို့ အကြိမ်ကြိမ် ပြောဆိုခဲ့တာပါ။

ဒါပေမဲ့ OTK ကုမ္ပဏီရဲ့ ဒုတိယဥက္ကဌက တမင်တကာ ရှေ့ထွက်လာပြီး ဒီကိစ္စနဲ့ ပတ်သက်လို့ ဝန်ကြီးဌာနရဲ့ လုပ်ပိုင်ခွင့်အာဏာကို ထိရောက်စွာ ဖြိုခွဲလိုက်တဲ့အခါမှာတော့ ဘက်ပေါင်းစုံကနေ ချီးမွမ်းသံတွေ ထွက်ပေါ်လာခဲ့တယ်။

ရလဒ်အနေနဲ့ ဝန်ကြီး ရှင်ဂျွန်မီ ရာထူးကနေ နှုတ်ထွက်ခဲ့ရပြီး ဝန်ကြီးဌာနကလည်း ဒီကိစ္စအပေါ် စည်းမျဉ်းချမှတ်နိုင်တဲ့ အာဏာ ဆုံးရှုံးသွားခဲ့တယ်။

အဲဒီတုန်းက အငြင်းပွားပွဲ ဗီဒီယိုကို စာတန်းထိုးပြီး A-Tube လိုမျိုး ဗီဒီယိုဆိုက်တွေပေါ် တင်ခဲ့ကြတာမလို့ ခဏလောက်တော့ ကမ္ဘာ့လှောင်ပြောင်စရာ ကိစ္စတစ်ခု ဖြစ်ခဲ့ပါသေးတယ်။

ဒါ့အပြင် ဒုတိယဥက္ကဌ ကိုယ်တိုင် ရင်းနှီးမြှုပ်နှံထားတဲ့ Lost Fantasy စီးရီးက မိုဘိုင်းမှာရော၊ အွန်လိုင်းမှာပါ အကြီးအကျယ် အောင်မြင်ခဲ့ပါတယ်။ Lost Fantasy Online... အတိုကောက် LFO က ကိုရီးယား၊ ဂျပန်၊ အရှေ့တောင်အာရှနဲ့ တရုတ်၊ မြောက်အမေရိက ဈေးကွက်တွေအထိ သိမ်းပိုက်နိုင်ခဲ့တယ်။

အခုအချိန်ထိ ဂျပန်ရဲ့ Consoleဂိမ်းတွေက ကမ္ဘာ့အဆင့်မှာ အောင်မြင်မှု ရလေ့ရှိပေမဲ့ အွန်လိုင်းဂိမ်းတွေကတော့ အတော်လေး နှေးကွေးခဲ့တာပါ။ ဒါပေမဲ့ LFO ကတော့ မကြုံစဖူး အောင်မြင်မှုကို မှတ်တမ်းတင်နိုင်ခဲ့တယ်။

နီရှီဒါ စတော့ပွဲစားကုမ္ပဏီ ကိစ္စတုန်းက OTK ကုမ္ပဏီက အဓိက ရှယ်ယာရှင် ဖြစ်နေတာကြောင့် ပုတ်ခတ်ရေးသားခဲ့တဲ့ ဂျပန်မီဒီယာတွေကလည်း ဂိမ်းက အကြီးအကျယ် အောင်မြင်သွားတဲ့အခါကျမှ LFO ကို ဂျပန်ဂိမ်းလောကရဲ့ အောင်ပွဲတစ်ခုအဖြစ် ချက်ချင်း ပြောင်းလဲချီးမွမ်းခဲ့ကြတယ်။

Lost Fantasy ရဲ့ Contentတွေကို အသုံးချပြီး လုပ်ငန်းအမျိုးမျိုးကိုလည်း လုပ်ဆောင်နေပါတယ်။ ဟောလိဝုဒ် ရုပ်ရှင်အဖြစ် ပြောင်းလဲရိုက်ကူးဖို့ ပြောဆိုမှုတွေ ရှိနေသလို Netplay ကလည်း ရာသီအလိုက် ဒရမ်မာစီးရီးအဖြစ် ထုတ်လုပ်ဖို့ စီစဉ်နေပါတယ်။

ကိုရီးယားရဲ့ အဓိက ပေါ်တယ်ဆိုက်တစ်ခုမှာလည်း Lost Fantasy ရဲ့ univerကို နောက်ခံထားတဲ့ Webtoonကို အပတ်စဉ် စတင်ဖော်ပြနေပြီ ဖြစ်ပါတယ်။

ဝက်သားကင်ဆိုင်ကို အရင်ဆုံး ရောက်ရှိလာတဲ့ မင်ဟာယောင်း က ဝင်ထိုင်လိုက်တယ်။

မင်ဟာယောင်းက ခန္ဓာကိုယ် သေးသေးသွယ်သွယ်နဲ့ ဆံပင်ကို မြင်းမြီးပုံစံ စည်းထားပြီး မျက်မှန်အဝိုင်းကို တပ်ထားပါတယ်။ သူ့ပုံစံက ယုန်လေးတစ်ကောင်နဲ့ တူတဲ့ မျက်လုံးတစ်စုံနဲ့ ကျစ်ကျစ်လျစ်လျစ် ရှိတဲ့ မျက်နှာသွင်ပြင်ကြောင့် ဘယ်နေရာသွားသွား 'ချစ်စရာကောင်းတယ်' လို့ ချီးမွမ်းခံရမယ့် ပုံစံမျိုးပါ။

ခဏလောက် စောင့်ဆိုင်းပြီးတဲ့နောက်မှာတော့ ဆံပင်တိုတိုနဲ့ မျက်မှန်တပ်ထားတဲ့ လူတစ်ယောက် ရောက်လာပါတယ်။ သူက SPA အမှတ်တံဆိပ်က အားကစားဝတ်စုံကို ဝတ်ဆင်ထားတာပါ။

တက်ဂယူ က မင်ဟာယောင်းရဲ့ မျက်နှာချင်းဆိုင်မှာ ဝင်ထိုင်ရင်း ပြောလိုက်တယ်။

"ဂုဏ်ယူပါတယ်။ တကယ့်ကို အောင်မြင်သွားတာပဲ"

ဒီနေ့ သူတို့ တွေ့ဆုံရတဲ့ အကြောင်းရင်းက မင်ဟာယောင်း ရဲ့ ဝက်ဘ်တွန်းက နိုင်ငံရဲ့ အကြီးဆုံး ပေါ်တယ်ဆိုက်ဖြစ်တဲ့ Neotin ရဲ့ စစ်ဆေးမှုကို ဖြတ်ကျော်နိုင်ခဲ့ပြီး အပတ်စဉ် ဖော်ပြခြင်း ခံခဲ့ရလို့ပါ။

မင်ဟာယောင်းက ပေါ်တယ်ဆိုက်ဆီကနေ လစဉ် စာမူခကို ရရှိမှာဖြစ်ပြီး အကြိုကြည့်ရှုခ၊ ပြည်ပတင်ပို့ခ၊ စာအုပ်ထုတ်ဝေခ စတာတွေကိုတော့ သီးခြားစီ ရရှိမှာ ဖြစ်ပါတယ်။ စိတ်ဝင်စားစရာကောင်းမှုနဲ့ လူကြိုက်များမှုအပေါ် မူတည်ပြီး ဝင်ငွေက အများကြီး တိုးလာနိုင်ပါတယ်။

အခုလို Neotin မှာ အပတ်စဉ် ဖော်ပြခွင့် ရပြီဖြစ်လို့ မင်ဟာယောင်းအနေနဲ့ ဘယ်နေရာမှာမဆို ကိုယ့်ကိုကိုယ် ဝက်ဘ်တွန်းရေးဆွဲသူတစ်ဦးလို့ ရဲရဲဝံ့ဝံ့ ပြောနိုင်ပါပြီ။

ကာတွန်းဆွဲသူ ဖြစ်လာဖို့က မင်ဟာယောင်းရဲ့ တစ်သက်တာ အိမ်မက်ဖြစ်ခဲ့တာမလို့ ပျော်ရွှင်မှုက အဆပေါင်းများစွာ ပိုမိုခဲ့ပါတယ်။ ဒါ့အပြင် တုံ့ပြန်မှုကလည်း မျှော်လင့်ထားတာထက် ပိုကောင်းခဲ့တယ်။

မင်ဟာယောင်း က စိတ်လှုပ်ရှားစွာနဲ့ ပြောတယ်။

"စစချင်းတင်ပြီး နှစ်ပတ်အကြာမှာတင် အဆင့် ၅ အထိ တက်လာခဲ့တယ်။ ဒါက Lost Fantasy ရဲ့ လူကြိုက်များမှုကြောင့် တစ်ဝက်လောက် ပါနေတာလည်း ဖြစ်နိုင်ပါတယ်"

"ဒါလည်း ပါတာပေါ့၊ ဒါပေမဲ့ စိတ်ဝင်စားဖို့ကောင်းလို့လည်း ဖြစ်မှာပါ"

အရင်တုန်းက ဂိမ်းလောကကို နောက်ခံထားတဲ့ ဝက်ဘ်တွန်းတွေ အများကြီး ရှိခဲ့ဖူးပေမဲ့ အဲဒီထဲက အတော်များများကတော့ အကြီးအကျယ် ကျရှုံးခဲ့ဖူးပါတယ်။

စာဖတ်သူတွေက မျက်နှာသာမပေးတတ်ကြပါဘူး။ ပျင်းစရာကောင်းတဲ့ ကာတွန်းကို ဘယ်သူမှ ဖတ်မှာမဟုတ်ဘူးလေ။

"ဒါထက် အပတ်စဉ် ဆွဲရမှာကို အဆင်ပြေပါ့မလား။ ဒါက မလွယ်ဘူးနော်"

"ဒါပေါ့။ ငါ့ရဲ့ အဘိဓာန်မှာ အားလပ်ရက်ဆိုတာ မရှိဘူး။ တစ်ခါ စတင်ပြီးရင် ဘယ်လိုပဲဖြစ်ဖြစ် အနားမယူဘဲ အဆုံးထိ ဆက်သွားမှာပါ"

မင်ဟာယောင်း ရဲ့ မျက်နှာက စိတ်အားထက်သန်မှုတွေနဲ့ ပြည့်နှက်နေပါတယ်။

ဖန်တီးသူအားလုံးက စတင်ခါစမှာ ဒီလိုပဲ တွေးတတ်ကြတာပါ။ ပြီးရင်တော့ အကြောင်းပြချက် အမျိုးမျိုးကြောင့် အနားယူတတ်ကြတာပဲလေ။

'ကဲ... လုံးဝ ရပ်နားမပစ်သရွေ့တော့ အဆင်ပြေမှာပါပဲ’

တက်ဂယူ က မေးတယ်။

"ဒါနဲ့ ဒီနေ့ အပြင်ထွက်လာတာ အဆင်ပြေရဲ့လား။ ကာတွန်းတွေ အပြင်းအထန် ဆွဲနေရမှာ မဟုတ်ဘူးလား"

"အဆင်ပြေပါတယ်၊ ကြိုတင်ဆွဲထားတာတွေ ရှိသေးတယ်"

"..."

ဖန်တီးသူအားလုံးက ကြိုတင်ဆွဲထားတာတွေနဲ့ စတင်တတ်ကြပါတယ်။ ဒါပေမဲ့ အဲဒါတွေက ခဏလေးအတွင်း တင်လို့ကုန်သွားတတ်ပြီး အချိန်မီ အမှီဆွဲရတဲ့ ဒုက္ခနဲ့ ရင်ဆိုင်ရတတ်ပါတယ်။

'နောက်တစ်လလောက်ကြာရင် သူ ဘယ်လိုဖြစ်နေမလဲဆိုတာ မျက်စိထဲ ရှင်းရှင်းလင်းလင်း မြင်နေရသလိုပဲ’

ပုံမှန်အားဖြင့် သူတို့နှစ်ယောက် တွေ့ရင် တက်ဂယူ ကပဲ အစားအသောက်ဖိုး ပေးလေ့ရှိတာပါ။ ဒါပေမဲ့ ဒီနေ့တော့ တရားဝင် အပတ်စဉ် ဖော်ပြခွင့်ရတဲ့ အထိမ်းအမှတ်အနေနဲ့ မင်ဟာယောင်း ကပဲ ကျွေးဖို့ ဆုံးဖြတ်ခဲ့တယ်။

"ဒီနေ့ ငါကျွေးမှာမလို့ စိတ်ကြိုက်စားနော်"

"တကယ် အဆင်ပြေရဲ့လား"

"ဒါပေါ့"

တက်ဂယူ က Menuကို ဖွင့်ကြည့်လိုက်တယ်။

"အို... ဝက်သားကင်ပဲ"

အဓိက ဟင်းလျာက ပြည်ပက တင်သွင်းတဲ့ ဝက်သားကင် ဖြစ်ပါတယ်။ ဈေးနှုန်းလည်း ချိုသာပါတယ်။ အဲဒါကြောင့်ပဲ ဘေးပတ်ဝန်းကျင်က ဝိုင်းတွေမှာ တက္ကသိုလ်ကျောင်းသား အတော်များများကို မြင်တွေ့နေရတာပါ။

မင်ဟာယောင်း က လက်နှစ်ဖက်ကို စုပြီး ပြောတယ်။

"ဆ... ဆောရီးနော်။ သိတဲ့အတိုင်း ငါက အကြွေးတွေ ဆပ်နေရတုန်းမလို့ပါ။ န... နည်းနည်းလောက် စောင့်ပေးပါ။ ငါ အောင်မြင်လာတဲ့အခါကျရင် အမဲသား သေချာပေါက် ကျွေးပါ့မယ်"

မင်ဟာယောင်းက ပိရမစ်စနစ် (Multilevel marketing) ထဲကနေ လွတ်မြောက်နိုင်ခဲ့ပေမဲ့ အဲဒီတုန်းက ဝယ်ခဲ့တဲ့ အမှိုက်ကွိုင်တွေက အကြွေးအဖြစ် ကျန်ရှိနေခဲ့တာပါ။ မိဘတွေက အရင် ဆပ်ပေးထားခဲ့တာဖြစ်ပြီး မင်ဟာယောင်းက အခု တဖြည်းဖြည်း ပြန်ဆပ်နေရတာ ဖြစ်ပါတယ်။

"ရပါတယ်။ ငါလည်း ဝက်သားကင် ကြိုက်တယ်"

မင်ဟာယောင်းက အသားနဲ့ ဘီယာကို မှာယူလိုက်တယ်။ သူက အသက်မပြည့်သေးတဲ့ ပုံစံမျိုး ပေါက်နေလို့ထင်တယ်၊ ဝန်ထမ်းက မင်ဟာယောင်းရဲ့ မှတ်ပုံတင်ကို ယူပြီး သေချာ စိုက်ကြည့်နေခဲ့ပါသေးတယ်။

တက်ဂယူ ကတော့ ကျက်သွားတဲ့ အသားတွေကို သေချာ ညှပ်ပြီး မြိန်ရေယှက်ရေ စားနေပါတယ်။

သူ့ကို ကြည့်ပြီး မင်ဟာယောင်း က စိတ်ထဲမှာ နည်းနည်း လှုပ်ရှားသွားတယ်။

'သူက အမြဲတမ်း ဈေးကြီးတဲ့ အစားအစာတွေကိုပဲ စားနေကျဖြစ်မှာပါ။ ငါ အားနာမှာစိုးလို့ တမင်တကာ ပျော်ပျော်ရွှင်ရွှင် စားပြနေတာ ထင်တယ်'

ဒါက အထင်လွဲတာပါ။ တက်ဂယူ က အစကတည်းက ရိုးရှင်းတဲ့ အရသာကို သဘောကျသူဖြစ်ပြီး ဘာမဆို ကောင်းကောင်း စားတတ်သူ ဖြစ်ပါတယ်။ အခုထက်ထိလည်း အိမ်မှာ ခေါက်ဆွဲပြုတ်ကို ပျော်ပျော်ရွှင်ရွှင် ပြုတ်စားနေတုန်းပဲလေ။

သူတို့နှစ်ဦး ဘီယာခွက်ချင်း တိုက်လိုက်ကြပါတယ်။

"ပင်ပန်းသွားပြီနော်"

မင်ဟာယောင်း က စိတ်ရင်းမှန်နဲ့ ပြောတယ်။

"ဒါတွေအားလုံးက တက်ဂယူ ကြောင့်ပါ။ တက်ဂယူ သာ OTK Games နဲ့ ချိတ်ဆက်မပေးခဲ့ရင် ငါ့အတွက် ဒီလို အခွင့်အရေးမျိုး ရှိလာမှာ မဟုတ်ပါဘူး။ ပြီးတော့... ငါ့ရဲ့ အလုပ်တွေကို အမြဲတမ်း ကြည့်ရှုပြီး အကြံဉာဏ်ပေးခဲ့လို့လည်း ကျေးဇူးတင်ပါတယ်..."

မင်ဟာယောင်း စကားပြောရင်းနဲ့ မျက်နှာက ဘာကြောင့်မှန်းမသိ ပူထူလာခဲ့တယ်။

ဒါပေမဲ့ အဲဒီအချိန်မှာပဲ စာပွဲပေါ်က ဖုန်းက တုန်ခါလာပါတယ်။ မျက်နှာပြင်ကို ကြည့်လိုက်တော့ ယန်ဟန်နာ ရဲ့ နာမည် ပေါ်နေတာပါ။ သူတို့အချင်းချင်းက ပုံမှန် ဆက်သွယ်မှု ရှိနေကြတဲ့ပုံပဲ။

"ပြန်စာ မပို့ပေးဘူးလား"

မင်ဟာယောင်း က ဖာသိဖာသာပုံစံမျိုးနဲ့ မေးလိုက်တယ်။

"နောက်မှ ပို့လည်း ရပါတယ်"

တက်ဂယူ က အေးအေးဆေးဆေးပဲ ပြန်ဖြေပါတယ်။

မင်ဟာယောင်း က အရင်တုန်းက စားပွဲသောက်ပွဲတစ်ခုမှာ ယန်ဟန်နာကို တွေ့ခဲ့တာကို ပြန်တွေးမိတယ်။ နာမည်ကြီးတွေထက်တောင် ပိုပြီး လှပတဲ့ သွင်ပြင်နဲ့ CL အုပ်စုနဲ့ ဆက်စပ်နေတဲ့ မိသားစု နောက်ခံ။

မင်ဟာယောင်းရဲ့ ရုပ်ရည်နဲ့ မိသားစုနောက်ခံကတော့ ယန်ဟန်နာကို ယှဉ်လို့မရနိုင်ပါဘူး။

ဒါပေမဲ့ ပြိုင်ဆိုင်လို့ မရနိုင်တာမျိုးတော့ မဟုတ်ဘူးလေ။ အရင်က ခဏလောက် စကားပြောကြည့်ဖူးတာကြောင့် ယန်ဟန်နာ က မန်ဂါ၊ အန်နီမေး ဒါမှမဟုတ် ဂိမ်းတွေအပေါ်မှာ လုံးဝ စိတ်ဝင်စားမှု မရှိဘူးဆိုတာ သိထားပါတယ်။

'ငါတို့က ဝါသနာနဲ့ စိတ်ဝင်စားမှုချင်း တူတယ်လေ’

ပုံမှန်အားဖြင့် မေတ္တာမျှဖို့ဆိုတာ ဝါသနာချင်း တူညီတဲ့အခါမှာ အကောင်းဆုံး ဖြစ်ပေါ်လာတတ်တာမျိုးပါ။ ဥပမာအားဖြင့် ကာတွန်းစာအုပ်တွေကို အတူတူ သွားဝယ်တာမျိုး ဒါမှမဟုတ် ဂိမ်း အတူတူ ဆော့တာမျိုးပေါ့။

မင်ဟာယောင်း က ကိုယ့်ကိုကိုယ် မသိလိုက်ဘဲ လက်သီးကို ကျစ်ကျစ်ပါအောင် ဆုပ်လိုက်မိတဲ့အခါမှာတော့ တက်ဂယူ က မျက်တောင်ခတ်ရင်း မေးလိုက်တယ်။

"ဘာဖြစ်လို့လဲ"

မင်ဟာယောင်း လန့်သွားပြီး ချက်ချင်း ပြန်ဖြေလိုက်တယ်။

"ဪ... ဘာမှမဟုတ်ပါဘူး။ စားပါ။ စားပါ။ အသား ထပ်မှာလိုက်ရမလား"