အခန်း ၃၅၅

အခန်း (၃၅၅)

ထမင်းစားပြီးတဲ့နောက် အိုတက်ဂယူနဲ့ မင်ဟာယောင်းတို့ဟာ ကားပေါ်တက်ပြီး ကဖေးတစ်ခုဆီကို ဦးတည်ထွက်ခွာခဲ့ကြတယ်။ ဒီနေ့ တက်ဂယူ မောင်းလာတဲ့ကားကတော့ Raven အမျိုးအစားပဲ ဖြစ်ပါတယ်။

မင်ဟာယောင်းက အံ့သြသွားပြီး မေးလိုက်တယ်။

“နင် ကားတစ်စီး ထပ်ဝယ်လိုက်ပြန်ပြီလား။ ဒါ အွန်ဆောင်း မော်တာက ထွက်တဲ့ မော်ဒယ်အသစ် မဟုတ်ဘူးလား။ တကယ်ပဲ အလိုအလျောက် မောင်းလို့ရတာလား”

“အင်း၊ ရတယ်လေ”

လမ်းကြောင်း သတ်မှတ်ပေးလိုက်တာနဲ့ ကားက လမ်းမအတိုင်း အလိုအလျောက် မောင်းနှင်သွားခဲ့တယ်။ မင်ဟာယောင်းကတော့ စိတ်လှုပ်ရှားပြီး သဘောကျနေပေမဲ့ အရင်ကတည်းက AD စီးရီးကို မောင်းဖူးတဲ့ တက်ဂယူအတွက်ကတော့ သိပ်ပြီး ထူးထူးခြားခြား မခံစားရပါဘူး။

ယွန်းနမ်ဒေါင်းမှာရှိတဲ့ ကဖေးတစ်ခုကို ရောက်တဲ့အခါ နှစ်ယောက်သား နေရာရှာပြီး ထိုင်လိုက်ကြတယ်။ မင်ဟာယောင်းက Vanilla Latte ကို မှာပြီး တက်ဂယူကတော့ Strawberry Latte ကို မှာလိုက်တယ်။

မင်ဟာယောင်းက ဝဘ်ဆိုက်ပေါ်က တုံ့ပြန်မှုတွေကို ခဏခဏ စစ်ဆေးနေခဲ့တယ်။ ကိုယ့်ရဲ့ ကာတွန်းကို ပေါ်တယ်ဝဘ်ဆိုက်တစ်ခုရဲ့ ပင်မစာမျက်နှာမှာ ဖော်ပြခံရတာဟာ ဘယ်လိုပဲ တွေးတွေး အံ့သြစရာကောင်းတဲ့ ကိစ္စတစ်ခုပါပဲ။

လက်ရှိမှာ NeoTin ပေါ်မှာ တရားဝင် အပတ်စဉ် တင်ဆက်နေတဲ့ Webtoon ပေါင်း ၁၀၀ ကျော် ရှိနေပါတယ်။ လူကြိုက်များတဲ့ လက်ရာတွေ အများကြီးရှိတာမလို့ ထိပ်တန်း ၅ ခုထဲမှာ ပါဝင်နိုင်ဖို့က တကယ့်ကို ကြီးမားတဲ့ အောင်မြင်မှုတစ်ခုပါ။

ထိပ်ဆုံးနေရာတွေမှာ အားကောင်းတဲ့ လူကြိုက်များ လက်ရာတွေနဲ့ ပြည့်နှက်နေပေမဲ့ အခုနှုန်းအတိုင်းဆိုရင်တော့ ပထမနေရာကို မျှော်မှန်းဖို့က မဖြစ်နိုင်တာမျိုးတော့ မဟုတ်ပါဘူး။

Lost Fantasy ရဲ့ လူကြိုက်များမှုကြောင့်ပဲ ထင်ပါတယ်။ မင်ဟာယောင်းရဲ့ Webtoonကို ပြည်ပ ဝဘ်ဆိုက်တွေဆီ တရားဝင် မတင်ပို့ရသေးပေမဲ့လည်း အင်္ဂလိပ်၊ ဂျပန်နဲ့ တခြားဘာသာစကားတွေဆီကို အလျင်အမြန် ဘာသာပြန်ဆိုပြီး အင်တာနက်ပေါ် တင်ပြီးတာနဲ့ ပြည်ပဆိုက်တွေဆီ ပျံ့နှံ့သွားခဲ့တယ်။

“သူတို့တွေက ပြည်ပဝဘ်ဆိုက်တွေမှာပါ အပတ်စဉ် တင်ဖို့ ပြောနေကြပြီ။ ဂျပန်နဲ့ပါ တစ်ပြိုင်ထဲ တင်ဖို့ စဉ်းစားနေကြပုံပဲ”

မင်ဟာယောင်းက ပြုံးစိစိနဲ့ ဝဘ်ဆိုက်ကို ကြည့်နေရင်းကနေ ရုတ်တရက် မျက်နှာ ပျက်သွားတယ်။

“ဘာဖြစ်လို့လဲ”

“အာ... မဟုတ်ပါဘူး။ အမုန်းစကား Comment တချို့ ရှိနေလို့ပါ”

တက်ဂယူက ဖုန်းကို ယူပြီး ကြည့်လိုက်တယ်။ Comment အများစုက စိတ်ဝင်စားဖို့ကောင်းတယ်လို့ ပြောကြပေမဲ့ မကောင်းတဲ့ Comment အရေအတွက်ကလည်း မနည်းလှပါဘူး။

‘ပျင်းစရာကြီး’၊ ‘ငါဆွဲရင်တောင် ဒီထက်လှဦးမယ်’၊ ‘ကြယ်တစ်ပွင့်တောင် မတန်ဘူးဟေ့’၊ ‘Lost Fantasyရဲ့ ပုံရိပ်ကို မဖျက်ဆီးဘဲ ရပ်လိုက်ပါတော့’၊ ‘ကာတွန်းဆွဲမယ့်အစား အသုံးဝင်မယ့် ပညာတစ်ခုခု သွားသင်ပါလား’ စတာတွေ ရေးထားကြတာပါ။

“Comment တွေ အများကြီး ရှိလာတဲ့အခါ အမုန်းစကားတွေလည်း အများကြီး ရှိလာတာ သဘာဝပါပဲ”

စာအုပ်အဖြစ် ထုတ်ဝေခဲ့တဲ့ ခေတ်နဲ့မတူဘဲ အွန်လိုင်းမှာ တင်တဲ့ Webtoonတွေက စာဖတ်သူတွေရဲ့ တုံ့ပြန်မှုကို အချိန်နဲ့တပြေးညီ ရရှိနိုင်ပါတယ်။ ဒါက စာရေးဆရာအတွက်တော့ နှစ်ဖက်သွားဓားလိုပါပဲ။

“သင့်တော်တဲ့ ဝေဖန်မှုဆိုရင် လက်ခံပြီး ပြင်လိုက်ပေါ့။ မဟုတ်ရင်တော့ လျစ်လျူရှုလိုက်။ စိတ်ဝင်စားဖို့ ကောင်းနေသရွေ့တော့ လူတွေက ဆဲရင်းနဲ့ပဲ ဆက်ဖတ်ကြမှာပဲ”

မင်ဟာယောင်းက ခေါင်းညိတ်လိုက်တယ်။

“အင်း၊ ဟုတ်သားပဲ။ အိုကေ။ အာ... ငါ နင့်အတွက် ပေးစရာ ရှိတယ်”

“ဘာပေးမှာလဲ”

“မြင်ရင် မအံ့သြနဲ့နော်”

“အိုကေ၊ မအံ့သြပါဘူး”

မင်ဟာယောင်းက အိတ်ထဲကနေ ပစ္စည်းတစ်ခုကို ထုတ်လိုက်တယ်။

“ဒန် ဒန်”

“ဟင်”

မအံ့သြပါဘူးလို့ ပြောခဲ့ပေမဲ့ တက်ဂယူ လန့်သွားတယ်။ မင်ဟာယောင်း ပြလိုက်တာကတော့ တခြားမဟုတ်ဘဲ ဖျော်ဖြေပွဲ လက်မှတ်တွေပဲ ဖြစ်ပါတယ်။

ရိုးရိုး ဂန္ဓဝင်ဂီတပွဲ မဟုတ်ဘဲ...

“Lost Fantasy ဂီတပွဲ လက်မှတ်တွေလေ။ ဒါတွေ ရဖို့ ဘယ်လောက် ခက်ခဲလဲဆိုတာ နင် သိတယ်မလား”

Lost Fantasy ဂီတပွဲရဲ့ အစကတော့ ပြီးခဲ့တဲ့နှစ်ကုန်ပိုင်းလောက်က ဖြစ်ပါတယ်။ Korea Symphony Orchestra ဟာ သူတို့ရဲ့ ဖျော်ဖြေပွဲခန်းမကို ပြုပြင်မွမ်းမံဖို့ လိုအပ်နေခဲ့တာပါ။ OTK ကုမ္ပဏီရဲ့ ဒုတိယဥက္ကဌက ကုန်ကျစရိတ်ဖြစ်တဲ့ ဝမ် သန်း ၂၇၀၀ ကို ထောက်ပံ့ပေးဖို့ ကမ်းလှမ်းခဲ့ပြီး၊ အပြန်အလှန်အနေနဲ့ Lost Fantasy ဂိမ်းတေးဂီတကို ဂီတပွဲအဖြစ် ဖျော်ဖြေပေးဖို့ တောင်းဆိုခဲ့တယ်။

Korea Symphony Orchestraက အဲဒီကမ်းလှမ်းချက်ကို လက်ခံခဲ့ပြီး ကိုရီးယား ဂီတခန်းမကို ထိုင်ခုံတွေလဲလှယ်တာ၊ အသံစနစ် မြှင့်တင်တာနဲ့ သန့်စင်ခန်းတွေ ပြုပြင်တာတွေအပါအဝင် အလုံးစုံ ပြန်လည်မွမ်းမံခဲ့တယ်။

တစ်ဖက်မှာလည်း အဖွဲ့ဝင်တွေက ဂီတပွဲအတွက် အစီအစဉ်ချထားတဲ့ ဂိမ်းတေးဂီတတွေကို နေ့တိုင်း ကြိုးကြိုးစားစား လေ့ကျင့်ခဲ့ကြတယ်။ ဂီတရဲ့ ဇာတ်လမ်းနဲ့ နောက်ခံကို နားလည်ဖို့အတွက် ဂိမ်းရဲ့ ကမ္ဘာ့အမြင်ကို အတူတူ လေ့လာခဲ့ကြသလို ဂိမ်းကို ကိုယ်တိုင်လည်း ဆော့ကစားခဲ့ကြတယ်။ (ဒီလုပ်ငန်းစဉ်အတွင်း အဖွဲ့ဝင်တချို့ဟာ Lost Fantasyရဲ့ တကယ့်ပရိသတ်တွေ ဖြစ်သွားခဲ့ကြတယ်)

ကိုရီးယား ဂီတခန်းမဟာ ခေတ်မီတဲ့ ပြုပြင်မွမ်းမံမှုတွေကို အပြီးသတ်ခဲ့ပြီး ဖျော်ဖြေပွဲရက်စွဲကတော့ ဒီတစ်ပတ်ပိတ်ရက်မှာ ဖျော်ဖြေမှာပါ။

ဖျော်ဖြေပွဲတွေ မတိုင်ခင်မှာ အသံသွင်းတဲ့ လုပ်ငန်းကို အပြီးသတ်ခဲ့ပြီး OTK GAMES က မိုဘိုင်းလ်နဲ့ အွန်လိုင်း နောက်ခံတေးဂီတကို ကန့်သတ်အချိန်အတွင်း ဂီတပွဲ ဗားရှင်းအဖြစ် ယာယီ ပြောင်းလဲပေးဖို့ ဆုံးဖြတ်ခဲ့တယ်။

အစပိုင်းမှာတော့ ဒါက Lost Fantasy စီးရီးရဲ့ အနှစ် ၃၀ ပြည့် အထိမ်းအမှတ်အဖြစ် ပရိသတ်တွေအတွက် ပြုလုပ်ပေးတဲ့ ပွဲတစ်ခုအနေနဲ့ စတင်ခဲ့တာပါပဲ။ မီဒီယာတွေကလည်း ဒါကို ထူးခြားတဲ့ ပွဲတစ်ခုအနေနဲ့သာ သဘောထားခဲ့ကြတာပါ။

ဒါပေမဲ့ Lost Fantasy Online က ကမ္ဘာတစ်ဝှမ်းမှာ အောင်မြင်မှု ရရှိသွားပြီး အိချီကာဝါ ရှီဂဲရုက VRMMORPG ထုတ်လုပ်မယ်လို့ ကြေညာလိုက်တဲ့အခါမှာတော့ အခြေအနေတွေက ပြောင်းလဲသွားခဲ့တယ်။

ဒါက ဂိမ်းလောက သမိုင်းမှာ အကြီးမားဆုံး ပရောဂျက်ဖြစ်ပြီး အောင်မြင်ခဲ့ရင် ကြီးမားတဲ့ အကျိုးအမြတ်တွေကို ပေးစွမ်းနိုင်မှာပါ။ ဂိမ်းကုမ္ပဏီတွေ၊ စာအုပ်တိုက်တွေ၊ ရန်ပုံငွေအဖွဲ့တွေနဲ့ ငွေကြေးအဖွဲ့အစည်းတွေက ရင်းနှီးမြှုပ်နှံဖို့ ဝင်ရောက်လာကြသလို မဝင်ရောက်ရသေးတဲ့သူတွေကလည်း စဉ်းစားနေကြပြီ ဖြစ်ပါတယ်။ ကမ္ဘာ့အကြီးဆုံး အချုပ်အခြာအာဏာပိုင် ရန်ပုံငွေအဖွဲ့ဖြစ်တဲ့ နယ်သာလန်ရဲ့ GPFG ကလည်း ထုတ်လုပ်ရေး ကုန်ကျစရိတ်တွေမှာ ရင်းနှီးမြှုပ်နှံဖို့ စိတ်ဝင်စားကြောင်း ဖော်ပြခဲ့ပြီး ညှိနှိုင်းမှုတွေ လုပ်ဆောင်နေပြီ ဖြစ်ပါတယ်။

Lost Fantasyအပေါ် စိတ်ဝင်စားမှု မြင့်တက်လာတာနဲ့အမျှ ဂီတပွဲ ဖျော်ဖြေပွဲအပေါ် စိတ်ဝင်စားမှုကလည်း ပေါက်ကွဲထွက်လာခဲ့တယ်။ ဒါပေမဲ့ ရာနဲ့ချီတဲ့ ထိုင်ခုံတွေကတော့ Lost Fantasy ပရိသတ်တွေကြောင့် စောစောစီးစီးကတည်းက လက်မှတ်ကုန်သွားခဲ့ပြီ ဖြစ်ပါတယ်။

စိတ်ဝင်စားမှုတွေ မြင့်တက်လာတာနဲ့အမျှ မှောင်ခိုလက်မှတ် စျေးနှုန်းတွေကလည်း ပိုမိုမြင့်တက်လာခဲ့တယ်။ ဖျော်ဖြေပွဲ အရေအတွက် တိုးမြှင့်ပေးဖို့ တောင်းဆိုမှုတွေ အများကြီး ရှိခဲ့ပေမဲ့ ပြည်ပ ဖျော်ဖြေရေး ခရီးစဉ်တွေ ရှိနေတာကြောင့် အဆင်မပြေခဲ့ပါဘူး။

တက်ဂယူက လက်မှတ်တွေကို ယူပြီး စစ်ဆေးကြည့်လိုက်တယ်။ ဂိမ်းတေးဂီတ ဖြစ်ပေမဲ့လည်း ဂီတပွဲ ဖျော်ဖြေပွဲ ဖြစ်တာကြောင့် အပေါစား ထိုင်ခုံတွေတောင် ဝမ် တစ်သိန်းလောက် ပေးရပါတယ်။

ဒါပေမဲ့ မင်ဟာယောင်း ယူလာတဲ့ လက်မှတ်တွေကတော့ VIP ထိုင်ခုံတွေ ဖြစ်နေတာပါ။

“ဒါတွေ ဘယ်လိုရလာတာလဲ”

မင်ဟာယောင်းက ဂုဏ်ယူစွာနဲ့ ပြောလိုက်တယ်။

“OTK GAMES ကိုရီးယားက ငါ့ရဲ့ Webtoon အပတ်စဉ် စတင်ထုတ်လွှင့်တာကို ဂုဏ်ပြုတဲ့အနေနဲ့ ပို့ပေးတာလေ”

“အာ...”

သူတို့တွေ တကယ်ပဲ ဒီလို အဓိပ္ပာယ်မရှိတာမျိုးကို လုပ်ခဲ့တာလား။

ဒါက တကယ့်ကို အနေရခက်တဲ့ အခြေအနေတစ်ခုပဲ။ ဘာလို့လဲဆိုတော့ ဒီဖျော်ဖြေပွဲကို အိုတက်ဂယူ ကိုယ်တိုင်က ပံ့ပိုးကူညီပြီး စီစဉ်ပေးခဲ့တာကြောင့်ပါ။

မင်ဟာယောင်းက မျက်နှာလေး အနည်းငယ် နီမြန်းသွားပြီး ပြောတယ်။

“န... နင် အဲဒီနေ့ အားလား။ နင်လည်း Lost Fantasyကို ကြိုက်တယ်မလား”

“အားတော့ အားပါတယ်၊ ဒါပေမဲ့...”

ဆိုးလ်မြို့က ဖျော်ဖြေပွဲတွေက စုစုပေါင်း သုံးရက်ကြာမှာပါ။

ပထမဆုံးနေ့မှာ Lost Fantasy စီးရီးရဲ့ အထွေထွေ ဂီတဒါရိုက်တာဖြစ်တဲ့ ကွန်ဒို ဟာယာရှီလည်း တက်ရောက်ဖို့ စီစဉ်ထားပါတယ်။

တက်ဂယူက ဂျင်ဟူနဲ့အတူ သွားဖို့ စောစောကတည်းက စီစဉ်ထားပြီးသား ဖြစ်နေတာပါ။

ဒါပေမဲ့ မင်ဟာယောင်း ယူလာတဲ့ လက်မှတ်တွေက တိုက်တိုက်ဆိုင်ဆိုင် ပထမဆုံးနေ့ ဖြစ်နေတယ်လေ။

ချက်ချင်းဆိုသလို အတွေးပေါင်းများစွာက တက်ဂယူရဲ့ ခေါင်းထဲမှာ လှည့်ပတ်သွားခဲ့တယ်။

အခြေအနေတွေ ဒီလိုဖြစ်လာလိမ့်မယ်လို့ မထင်ထားခဲ့ဘူး။ ငါ့ရဲ့ သရုပ်မှန်ကို ဖွင့်ပြောရုံကလွဲလို့ တခြားရွေးချယ်စရာ မရှိတော့ဘူးထင်တယ်။

မင်ဟာယောင်းက တက်ဂယူရဲ့ အထက်တန်းကျောင်းတုန်းက အတန်းဖော်ပါ။ သူတို့တွေက ကျောင်းပြင်ပ လှုပ်ရှားမှုတွေကနေတစ်ဆင့် သိကျွမ်းခဲ့ကြပြီး ကာတွန်းတွေနဲ့ ဂိမ်းတွေအကြောင်း နက်နက်နဲနဲ ဆွေးနွေးခဲ့ကြဖူးတယ်။ ကျောင်းပြီးတဲ့နောက် အဆက်အသွယ် ပြတ်သွားခဲ့ပေမဲ့ ပိရမစ်စနစ် (Multi-level marketing) ဖြစ်ရပ်တစ်ခုကြောင့် ပြန်လည် ဆုံတွေ့ခဲ့ကြတာပါ။ တက်ဂယူက မင်ဟာယောင်းကို ကာတွန်းတွေ ပြန်ဆွဲနိုင်ဖို့ ကူညီပေးနေစဉ်မှာ သူ ဘယ်သူလဲဆိုတာကို ဖုံးကွယ်ထားခဲ့တယ်။ သူက အမြဲတမ်း ဖုံးကွယ်ထားဖို့ ရည်ရွယ်ထားတာ မဟုတ်ဘဲ သင့်တော်တဲ့ အချိန်ကျရင် ပြောပြဖို့ စိတ်ကူးထားခဲ့တာပါ။ ပြဿနာက တစ်ကြိမ် ဖုံးကွယ်ထားပြီးတဲ့နောက်မှာတော့ ဖွင့်ပြောပြဖို့က ပိုပိုပြီး ခက်ခဲလာခဲ့တယ်။ ဒါကြောင့် အခုအချိန်အထိ ဘာမှ မပြောဖြစ်ခဲ့တာပါ... ဒါပေမဲ့ အခုတော့ မင်ဟာယောင်းက ပေါ်တယ်ဝဘ်ဆိုက်ကြီးတစ်ခုရဲ့ တရားဝင် Webtoon အနုပညာရှင်တစ်ယောက် ဖြစ်နေပါပြီ။

ဒါဆိုရင် အခုအချိန်က သူ ဘယ်သူလဲဆိုတာကို ဖွင့်ပြောရမယ့် အချိန်ဖြစ်လောက်မလား။

တက်ဂယူက စိတ်ပိုင်းဖြတ်လိုက်ပြီး ပါးစပ်ကို ဟလိုက်တယ်။

“တကယ်တော့ အဲဒါကလေ...”

“OTK ကုမ္ပဏီရဲ့ ဒုတိယဥက္ကဌက ဒီဖျော်ဖြေပွဲကို စီစဉ်ခဲ့တာ နင်သိတယ်မလား”

“...ဟင်”

မင်ဟာယောင်းရဲ့ မျက်လုံးတွေက တောက်ပသွားပြီး ပြောလိုက်တယ်။

“အဲဒီလူက တကယ် မိုက်တယ်မလား။ သူက Lost Fantasyကို ပြန်လည် အသက်သွင်းပေးခဲ့တဲ့လူလေ။ တကယ်လို့ အဲဒီ ဒုတိယဥက္ကဌက ရင်းနှီးမြှုပ်နှံမှု မလုပ်ခဲ့ရင် Lost Fantasy Mobileရော ၊ Lost Fantasy Onlineပါ ထွက်လာမှာ မဟုတ်ဘူး။ ဒါဆိုရင် ငါလည်း Lost Fantasy Webtoonကို ဆွဲခွင့်ရမှာ မဟုတ်ဘူး။ တကယ်လို့ ဖျော်ဖြေပွဲမှာ အဲဒီလူကို တွေ့ရင် ငါ ကျေးဇူးတင်စကား ပြောရင်ကောင်းမလားမသိဘူး”

“...”

“ဒါပေမဲ့ သူက ဘယ်သူ ဖြစ်မလဲ။ ဘေးနားက လူတွေကိုတောင် သူ ဘယ်သူလဲဆိုတာ ဖုံးကွယ်ထားတာများလားမသိဘူး”

တက်ဂယူက ပေါ့ပေါ့ပါးပါးပဲ မေးလိုက်တယ်။

“တကယ်လို့ အဲဒီဒုတိယဥက္ကဌက နင်သိတဲ့လူတစ်ယောက် ဖြစ်နေရင် နင် ဘယ်လို ခံစားရမလဲ”

မင်ဟာယောင်းက မျက်မှောင်ကြုတ်လိုက်တယ်။

“ငါ လုံးဝ သစ္စာဖောက်ခံရသလို ခံစားရမှာပဲ။ တွေးကြည့်ရုံနဲ့တင် စိတ်ထဲ မကောင်းတော့ဘူး”

“ဂလု”

“စဉ်းစားကြည့်လေ။ တကယ့်ကို နောက်ကျောကို ဓားနဲ့ အထိုးခံရသလို ဖြစ်မှာ မဟုတ်ဘူးလား။ ပိုက်ဆံရှိရုံနဲ့ လူတွေကို ကစားနေတာမျိုး မဟုတ်ဘူးလား။ ဟုတ်တယ်မလား”

တက်ဂယူက မြန်မြန်ပဲ ခေါင်းညိတ်လိုက်တယ်။

“ဟု... ဟုတ်တာပေါ့”

ဘာမှ မပြောတာကပဲ ပိုကောင်းမယ့်ပုံပဲ။

“အာ... နင် OTK ကုမ္ပဏီနဲ့ အမျိုးသမီးနဲ့ မိသားစုရေးရာ ဝန်ကြီးဌာနတို့အကြားက စကားစစ်ထိုးပွဲ ဗီဒီယိုကို ကြည့်ပြီးပြီလား။ အဲဒါ တော်တော်လေး ရေပန်းစားခဲ့တာနော်။ ဒုတိယဥက္ကဌရဲ့ မျက်နှာကို မပြထားဘဲ အသံကို ပြောင်းထားပေမဲ့ ထူးဆန်းတာက စကားပြောတဲ့ပုံစံက တော်တော်လေး ရင်းနှီးနေသလိုပဲ။ တစ်နေရာရာမှာ ခဏခဏ ကြားဖူးသလိုမျိုးဟ”

တက်ဂယူ ပျာယာခတ်သွားတယ်။

“တ... တကယ်လား”

“ဘာဖြစ်လို့လဲမသိဘူး၊ ဒီနေ့ နင်နဲ့ စကားပြောနေရင်း အဲဒီဗီဒီယိုက ခေါင်းထဲ ရောက်လာတယ်။ အခုမှ သတိထားမိတာ၊ နင့်ရဲ့ စကားပြောပုံစံက နည်းနည်း ဆင်တူနေသလိုပဲ...”

မင်ဟာယောင်းက စကားကို ဖြတ်လိုက်ပြီး အိုတက်ဂယူကို စူးစူးစိုက်စိုက် ကြည့်လိုက်တယ်။ ခဏလောက် သူတို့ မျက်လုံးချင်း ဆုံသွားခဲ့ကြတယ်။

မင်ဟာယောင်းက ပြုံးပြီး နောက်ပြောင်တဲ့သဘောနဲ့ မေးလိုက်တယ်။

“နင်က OTK ကုမ္ပဏီရဲ့ ဒုတိယဥက္ကဌတော့ မဟုတ်ပါဘူးနော်။ ဥပမာ... OTK ဆိုတာ အိုတက်ဂယူကို ဆိုလိုတာမျိုးလား”

“...”

အဖြေပေးမယ့်အစား တက်ဂယူက အကြည့်လွှဲလိုက်တယ်။

အဲဒီအခိုက်အတန့်မှာ မင်ဟာယောင်းက အရင်က ဖြစ်ပျက်ခဲ့သမျှ အရာအားလုံးကို ပြန်လည် သတိရသွားခဲ့တယ်။ ဘဏ်အကောင့်ထဲမှာ ဝမ် သန်း ၁သောင်း ဘယ်လိုလုပ် ရှိနေတာလဲ။ ဗန်ဆန်းရဲ့ စီအီးအိုနဲ့ အစိုးရရှေ့နေတွေကို လှုပ်ရှားစေပြီး JG Blockchain ကို ဘယ်လို ခြေမှုန်းနိုင်ခဲ့တာလဲ။ ပြီးတော့ အဲဒီ အရက်သောက်တဲ့ ဝိုင်းကို ယန်ဟန်နာနဲ့ CL Chemicals ရဲ့ ဥက္ကဌက ဘာကြောင့် ရောက်လာခဲ့ကြတာလဲ။

သူသာ ဒုတိယဥက္ကဌဆိုရင်တော့ အဲ့ဒီအချက်အားလုံးကို သေချာပေါက် ရှင်းပြီးသားဖြစ်သွားမှာပါ။ ဒါပေမဲ့ မင်ဟာယောင်းကတော့ မယုံနိုင်သေးပါဘူး။

OTK ကုမ္ပဏီဟာ ရင်းနှီးမြှုပ်နှံမှုတွေ မြောက်မြားစွာမှာ အောင်မြင်ခဲ့ပြီး ကမ္ဘာ့အကြီးဆုံး ကော်ပိုရေးရှင်းကြီးတွေထဲက တစ်ခုအဖြစ် ကြီးထွားလာခဲ့တာလေ။ အဲဒီလို ကုမ္ပဏီမျိုးရဲ့ ဒုတိယဥက္ကဌက အိုတက်ဂယူ ဖြစ်နေတာတဲ့လား။

“ဒီ... ဒီလို အဓိပ္ပာယ်မရှိတဲ့ ကိစ္စမျိုးက တကယ် ဖြစ်နိုင်ပါ့မလား...”

ဒါပေမဲ့ ကွက်တိပဲ၊ စားပွဲပေါ်မှာ တင်ထားတဲ့ တက်ဂယူရဲ့ ဖုန်းက တုန်ခါလာခဲ့တယ်။ အံ့သြစရာကောင်းတာက screenပေါ်မှာ ‘ကန်ဂျင်ဟူ’ ဆိုတဲ့ နာမည် ပေါ်လာတာပါပဲ။

တက်ဂယူက ကြောင်အမ်းအမ်း ဖြစ်နေတဲ့ မင်ဟာယောင်းဘက်လှည့်ပြီး ပြောလိုက်တယ်။

“အဲဒီ ‘အဓိပ္ပာယ်မရှိတဲ့ ကိစ္စ’ က တကယ် ဖြစ်နေတာပါ”

မင်ဟာယောင်းက ထိုင်နေရာကနေ ဝုန်းခနဲ ထရပ်ပြီး အော်လိုက်တယ်။

“ဟာ။ နင်နဲ့ အတူတူနေတဲ့ သူငယ်ချင်းက ကန်ဂျင်ဟူလို့ မပြောနဲ့နော်”

အနားမှာရှိတဲ့ လူတွေက အံ့သြတကြီးနဲ့ လှည့်ကြည့်လာကြတယ်။ မင်ဟာယောင်းက သူ့အမှားကို သတိပြုမိသွားပြီး ပါးစပ်ကို အမြန်ပိတ်ကာ ပြန်ထိုင်လိုက်တယ်။

ခဏအကြာမှ စိတ်ကို ပြန်စုစည်းပြီးနောက် မင်ဟာယောင်းက Vanilla Latteကို ဂလုခနဲ သောက်ချလိုက်တယ်။

အဲဒါ မပူဘူးလားဟင်။

ဒါပေမဲ့ မင်ဟာယောင်းကတော့ ဂရုမစိုက်နိုင်ဘဲ ချက်ချင်း မေးလိုက်တယ်။

“နင် ဘာလို့ ဒီအချိန်အထိ ငါ့ကို လိမ်ထားခဲ့တာလဲ”

“အဲဒါကတော့... လိမ်တယ်ဆိုတာထက် မလိုအပ်တဲ့ အချက်အလက်တွေကို မပြောဘဲ ချန်ထားခဲ့တာပါ၊ TMI မဖြစ်အောင်လို့ပေါ့”

“နင် အခု နောက်နေတာလား။ နင့်မှာ ပိုက်ဆံ ဘယ်လောက်တောင် ရှိတာလဲ”

“ငါ ကိုယ်တိုင်လည်း သေချာ မသိဘူး။ ငါ့ရှယ်ယာတွေက ပြန်မရောင်းမချင်းတော့ တကယ့် ပိုက်ဆံ မဟုတ်သေးဘူးလေ”

ကမ္ဘာ့အချမ်းသာဆုံးလူကတော့ ငြင်းပယ်လို့မရအောင် ကန်ဂျင်ဟူပဲ ဖြစ်ပါတယ်။ ပြီးတော့ ဒုတိယ အချမ်းသာဆုံးကတော့ အိုတက်ဂယူပါ။ ဆက်တိုက်ဆိုသလို ရင်းနှီးမြှုပ်နှံမှုတွေ အောင်မြင်ခဲ့တာကြောင့် OTK ကုမ္ပဏီရဲ့ တန်ဖိုးဟာ ဒေါ်လာ သိန်းပေါင်း ၁ ကုဋေကို ကျော်လွန်သွားခဲ့ပြီး အိုတက်ဂယူရဲ့ ပိုင်ဆိုင်မှုကလည်း ဒေါ်လာ သန်းပေါင်း ၂သိန်းကို ကျော်လွန်သွားခဲ့ပြီ ဖြစ်ပါတယ်။

မင်ဟာယောင်းရဲ့ အမြင်အရတော့ ပမာဏက ကြီးမားလွန်းတာကြောင့် ပမာဏအတိုင်းအတာကိုတောင် မခန့်မှန်းနိုင်တော့ပါဘူး။

“န... နင် Cryptocurrencyကနေ ပိုက်ဆံအများကြီး ရခဲ့တာ မဟုတ်ဘူးလား”

တကယ်ပဲ Cryptocurrencyကနေ ပွပေါက်တိုးခဲ့ဖူးတဲ့ လူတွေ ရှိခဲ့ဖူးပါတယ်။ ဒါကြောင့်လည်း တက်ဂယူက ဗန်ဆန်း စီအီးအိုနဲ့ ရင်းနှီးတာလို့ ထင်ခဲ့တာပါ။ ပြီးတော့ သူက အမြဲတမ်း ဂိမ်းတွေကို ကြိုက်တတ်တာကြောင့် OTK GAMES ကိုရီးယားက လူတစ်ယောက်ယောက်နဲ့ တိုက်တိုက်ဆိုင်ဆိုင် သိနေတာလို့ ထင်ခဲ့တာလေ။

“အာ... အဲဒီအပိုင်းကတော့ ဟုတ်ပါတယ်။ ငါက အဲဒီပိုက်ဆံကို သုံးပြီး OTK ကုမ္ပဏီကို စတင်ခဲ့တာ၊ ဒါပေမဲ့ ဂျင်ဟူက ကုမ္ပဏီကို ဒီလောက်အထိ ကြီးထွားအောင် လုပ်နိုင်လိမ့်မယ်လို့ ငါ ကိုယ်တိုင်လည်း မသိခဲ့ဘူး”

“...”

မင်ဟာယောင်းကတော့ ဆွံ့အသွားပြီး စကားတောင် သေချာ မပြောနိုင်တော့ပါဘူး။

မင်ဟာယောင်းက Webtoon အနုပညာရှင်တစ်ယောက် ဖြစ်လာရင် တက်ဂယူရဲ့ ဘေးနားမှာ ဂုဏ်ယူစွာနဲ့ ရပ်တည်နိုင်လိမ့်မယ်လို့ ထင်ခဲ့တာပါ...

မင်ဟာယောင်းကတော့ စိတ်ပျက် အားလျော့သွားခဲ့တယ်။

OTK ကုမ္ပဏီရဲ့ ဒုတိယဥက္ကဌဆိုတာကတော့... ဒါက များလွန်းတယ်လေ။

သေသေသပ်သပ် ပြုပြင်မွမ်းမံထားတဲ့ ကိုရီးယား ဂီတခန်းမဟာ တံခါးတွေကို အသစ်ပြန်လည် ဖွင့်လှစ်ခဲ့ပါပြီ။ ဒီနေ့ကတော့ Lost Fantasy ဂီတပွဲရဲ့ ပထမဆုံး ဖျော်ဖြေပွဲပါ။ ဖျော်ဖြေပွဲခန်းမဟာ အချိန်အတော်ကြာမှ ပထမဆုံးအကြိမ်အဖြစ် လူတွေနဲ့ စည်ကားနေခဲ့တယ်။

ကျွန်တော်က တက်ဂယူနဲ့အတူ ပွဲကျင်းပမယ့်နေရာကို စောစော ရောက်ရှိခဲ့ပြီး Korea Symphony Orchestraက လူတွေကို နှုတ်ဆက်ခဲ့တယ်။ စီအီးအို ပတ်ဟဲဂျင်၊ ဂီတမှူး ဂျန်ကီဟွန်းနဲ့ ဂီတပွဲ အဖွဲ့ဝင်တွေက ပံ့ပိုးမှုအတွက် ကျေးဇူးတင်ကြောင်း ပြောခဲ့ကြတယ်။

စီအီးအို ပတ်ဟဲဂျင်က ပြောတယ်။

“ရိုးရိုးသားသား ပြောရရင် အစတုန်းကတော့ ဂီတပွဲနဲ့ ဂိမ်းတေးဂီတကို ဖျော်ဖြေဖို့ စိတ်ကူးကို သံသယဖြစ်ခဲ့မိတယ်။ ဒါပေမဲ့ အခုတော့ အတွေးတွေ ပြောင်းလဲသွားပါပြီ။ ဒီပွဲကြောင့် ကမ္ဘာကြီးဆီကို ဂန္ဓဝင် ဂီတနဲ့ Korea Symphony Orchestraကို မိတ်ဆက်ပေးဖို့ အခွင့်အရေးကောင်းတစ်ခု ဖြစ်လာခဲ့ပြီလေ။ ပြီးတော့ Lost Fantasy စီးရီးကိုလည်း သဘောကျလာခဲ့ပါပြီ”

ကျွန်တော် ခေါင်းညိတ်လိုက်တယ်။

တက်ဂယူက ဒီဂိမ်းအကြောင်းကို အစဆုံး ပြောပြတုန်းက ကျွန်တော်လည်း ‘သူ ဘာတွေ ပြောနေတာလဲ’ လို့ တွေးခဲ့မိသေးတယ်။ ဒါပေမဲ့ ဒီဂိမ်းက ဒီလောက်အထိ အောင်မြင်လိမ့်မယ်လို့ မထင်ထားခဲ့ဘူး။

အကျိုးအမြတ်တွေအပြင် ဒီပွဲက ဂိမ်းကို ကြော်ငြာဖို့နဲ့ ဂန္ဓဝင် ဂီတကို လူကြိုက်များစေဖို့ အများကြီး ကူညီပေးခဲ့တယ်။

ကျွန်တော်တို့က သတင်းထောက်တွေ မဝင်ရောက်နိုင်တဲ့ အထဲမှာပဲ နေပြီး လူတွေကို နှုတ်ဆက်နေခဲ့တယ်။ ယခင် ဂိမ်းစည်းကမ်း ထိန်းသိမ်းရေး ပြဿနာတုန်းက ချိတ်ဆက်မှုတွေ ရှိခဲ့တဲ့ စီးပွားရေးလောကနဲ့ ဂိမ်းလောကက လူတွေလည်း ဝင်ရောက်လာခဲ့ကြတယ်။

ဥက္ကဌ လင်ဂျင်ယုံနဲ့ ဥက္ကဌ လင်ဆိုမီတို့လည်း သူတို့ရဲ့ ကလေးတွေနဲ့အတူ ရောက်လာခဲ့ကြတယ်။

“အလုပ်ရှုပ်နေမှာကို တကူးတကလာပေးတဲ့အတွက် ကျေးဇူးတင်ပါတယ်”

“အလုပ်ရှုပ်နေရင်တောင် လူ့ပတ်ဝန်းကျင်မှာတော့ ပါဝင်ရမှာပေါ့။ ဖျော်ဖြေပွဲမလာဖြစ်တာလည်း တော်တော်ကြာပြီလေ”

ကျွန်တော် ကလေးတွေကိုလည်း နှုတ်ဆက်လိုက်တယ်။ ဥက္ကဌ လင်ဂျင်ယုံရဲ့ သမီးလေးကတော့ ရှက်နေပုံရပြီး သူ့ အဖေနောက်ကွယ်မှာ ပုန်းကာ ခေါင်းညိတ်ပြခဲ့တယ်။

ဒီလိုအချိန်မျိုးမှာ ကလေးတွေကို မုန့်ဖိုးပေးရမလား။

ဟင်နရီနဲ့ အစ်မ အိုဟျွန်းဂျူးတို့လည်း အတူတူ ရောက်လာခဲ့ကြတယ်။ အနောက်တိုင်းဝတ်စုံအပြည့်နဲ့ ဟင်နရီကတော့ အမြဲတမ်းလိုပဲ ချောမောခန့်ညားနေပြီး အစ်မ အိုဟျွန်းဂျူးကလည်း ပုံမှန်နဲ့မတူဘဲ မျက်မှန်ကို ချွတ်ကာ အလှပြင်လာခဲ့တယ်။ ချစ်ခင်ရင်းနှီးစွာနဲ့ လက်ချင်းချိတ်ထားတဲ့ သူတို့နှစ်ယောက်က တကယ့်ကို လိုက်ဖက်ပြီး ကြည်နူးစရာ ကောင်းနေခဲ့တာပါ။

အစ်မအိုဟျွန်းဂျူးက ခေါင်းခါရင်း ပြောတယ်။

“ငါ ဒီလို ဖျော်ဖြေပွဲမျိုးကို တက်ရောက်ရလိမ့်မယ်လို့ မထင်ထားခဲ့ဘူး”

“တက်ဂယူက နောက်ထပ် ကိစ္စကြီးတစ်ခုကို လုပ်ဆောင်နိုင်ခဲ့တာပဲနော်”

အိုတက်ဂယူကလွဲလို့ ဘယ်သူက ဒီလို ဂီတပွဲမျိုးကို စီစဉ်နိုင်မှာမလို့လဲ။

ခဏအကြာမှာတော့ ဆံပင်ညှပ်ဆိုင်ကနေ လာခဲ့တဲ့ အယ်လီ ရောက်လာခဲ့တယ်။

“ငါ ရောက်ပြီ။ ဂျင်ဟူ”

သူက ပခုံးသားကိုပေါ်လွင်စေတဲ့ ဝိုင်နီရောင် ဂါဝန်ကို ဝတ်ဆင်ထားပြီး အရောင်တောက်ပြောင်တဲ့ ဒေါက်ဖိနပ်ကို စီးထားပါတယ်။ နားကပ်နဲ့ ဆွဲကြိုးတွေကို ဆင်မြန်းထားပြီး ဆံပင်ကိုလည်း အလှဆုံး ပြင်ဆင်ထားတာကြောင့် အလုပ်လုပ်နေတဲ့ အချိန်နဲ့ လုံးဝ ကွဲပြားတဲ့ ဆွဲဆောင်မှုမျိုးကို ပေးစွမ်းနေတာပါ။

အယ်လီက ကျွန်တော့်ကို မေးတယ်။

“ငါ့ပုံစံက ကြည့်ရတာ ဘယ်လိုလဲ။ လိုက်ဖက်ရဲ့လား”

သူက အရမ်း လှလွန်းတာကြောင့် ကျွန်တော့်ရဲ့ ရင်တွေ တုန်သွားခဲ့ရတယ်။

“လှပါတယ်၊ ဒါပေမဲ့ ရင်ဘတ်ဟိုက်တာက နည်းနည်း များမနေဘူးလား”

တခြားအမျိုးသားတွေရဲ့ အကြည့်တွေ အယ်လီဆီ ရောက်သွားမှာကို ကျွန်တော် စိုးရိမ်မိတယ်။

ဒါကို ကြားတော့ အယ်လီက လျှာလေး အနည်းငယ် ထုတ်ပြီး ပြောတယ်။

“ဟိဟိ၊ အခုခေတ်မှာ လူတိုင်း ဒီလောက်တော့ ဝတ်ကြတာပဲလေ”

အယ်လီက သဘာဝကျကျပဲ ကျွန်တော့်ရဲ့ လက်ကို လာချိတ်လိုက်တယ်။

“တကယ်လို့ ဂျင်ဟူ စိုးရိမ်နေရင် ငါ့ကို ဒီလိုမျိုး ကာကွယ်ပေးထားလိုက်ပေါ့”

“အိုကေလေ”

ကျွန်တော်က အယ်လီနဲ့အတူ ဥက္ကဌတွေ၊ ဒါရိုက်တာတွေကို နှုတ်ဆက်နေတုန်းမှာ တက်ဂယူရဲ့ ဘေးနားမှာ ထင်ရှားတဲ့ စီးပွားရေး မိသားစုတွေက လာတဲ့ အမျိုးသမီးငယ်လေးတွေ ဝိုင်းအုံနေတာကို သတိပြုမိလိုက်တယ်။

“...”

ဘာလဲဟ။ သူက ဘာလို့ ဒီလောက်တောင် ရေပန်းစားနေရတာလဲ။