အခန်း ၃၅၆

အခန်း (၃၅၆)

ပရိသတ်တွေက ဆယ်ကျော်သက်အရွယ်ကနေ အသက် ၅၀ ကျော် အမျိုးသားတွေအထိ စုံလင်လှပါတယ်။ အိုတာကူတွေလို့ ထင်ရှားတဲ့ အမျိုးသားအုပ်စုတွေအပြင် စုံတွဲတွေနဲ့ မိသားစုလိုက် လာကြတာလည်း အများကြီးပဲ။

ဘာပဲပြောပြော Lost Fantasy က နှစ်ပေါင်း ၃၀ သမိုင်းကြောင်းရှိခဲ့တာဖြစ်ပြီး စီးရီးအားလုံးပေါင်းရင် ကမ္ဘာတစ်ဝှမ်းမှာ အချပ်ရေ သန်း ၁၀၀ ကျော် ရောင်းချခဲ့ရတာပါ။ မကြာသေးခင်ကလည်း မိုဘိုင်းဗားရှင်းနဲ့ အွန်လိုင်းဗားရှင်းတွေ ဆက်တိုက်အောင်မြင်ခဲ့လို့ အသုံးပြုသူအသစ်တွေ အများကြီး ထပ်တိုးလာခဲ့တယ်။

ကစားသမားထုက တကယ့်ဝါရင့်တွေလို့ ပြောလို့ရတဲ့ အမာခံအသုံးပြုသူတွေကနေ Lost Fantasy လောကထဲကို အခုမှ စဝင်လာတဲ့ ပေါ့ပေါ့ပါးပါး ကစားသူတွေအထိ ကျယ်ပြန့်ပါတယ်။

ဒါပေမဲ့လည်း အိုတာကူအရေအတွက်ကတော့ တော်တော်လေး များပါတယ်။ ဒါဟာ ကမ္ဘာပေါ်မှာ အိုတာကူ သိပ်သည်းဆအများဆုံး ဂန္ဓဝင်ဂီတဖျော်ဖြေပွဲ ဖြစ်နိုင်မလားပဲ။

ဒီအချက်ကို အမှတ်တရပစ္စည်း အရောင်းကောင်တာမှာ အထင်အရှား မြင်နေရတာပါ။

လက်မှတ်လဲတဲ့ ကောင်တာရဲ့ ညာဘက်မှာရှိတဲ့ အမှတ်တရပစ္စည်း အရောင်းကောင်တာရှေ့က တန်းစီနေတဲ့ လူတန်းကြီးက အဆုံးမရှိနိုင်လောက်အောင် ရှည်လျားနေတာပါ။ အစီအစဉ်စာအုပ်တွေ၊ သီချင်းစီဒီတွေ၊ ဇာတ်ကောင်ရုပ်ပုံပါတဲ့ ဖုန်းကတ်ပြားတွေနဲ့ ခွက်တွေက ကိတ်မုန့်ပူပူလေးတွေလို အလုအယက် ရောင်းခဲ့ရပါတယ်။

ဒီပွဲအတွက် ထုတ်ကုန်ရောင်းချမှုကို OTK Games က တာဝန်ယူထားတာပါ။ အခုပွဲအတွက်ဆိုရင် ဖျော်ဖြေပွဲကျင်းပတဲ့နေရာမှာပဲ သီးသန့်ရောင်းချမယ့် ကန့်သတ်ထုတ်ကုန်တွေကိုတောင် အနည်းငယ် ထုတ်လုပ်ထားပါသေးတယ်။

စီနီယာဆန်းယော့ကတော့ သူ့ရဲ့ အံ့ဩမှုကို မဖုံးကွယ်နိုင်ခဲ့ဘူး။

“ဝိုး။ အိုင်ဒေါဖျော်ဖြေပွဲတစ်ခုမှာတောင် အမှတ်တရပစ္စည်း အရောင်းအဝယ်က ဒီလောက်အထိ ရောင်းကောင်းမယ်မထင်ဘူး”

တကယ့်ကို အံ့ဩစရာကောင်းတဲ့ ပရိသတ်အားပေးမှုပါပဲ။ တက်ဂယူက ဒါဟာ သာမန်ကိစ္စတစ်ခုလိုပဲ ပြောလိုက်တယ်။

“ဟက်… ကျွန်တော်တို့က ဝယ်ချင်တဲ့အရာတွေအတွက်ဆို ပိုက်ဆံသုံးဖို့ တွန့်တိုမနေဘူး။ လိုချင်တာကို မဝယ်ရတာထက်စာရင် ထမင်းငတ်ခံလိုက်တာကမှ တော်သေးတယ်လေ”

ကျွန်တော် ခေါင်းညိတ်မိတယ်။

“ငါမှတ်မိသေးတယ်။ ကျောင်းတုန်းကဆိုရင် မင်းက ဂိမ်းဝယ်ဖို့ ကျောင်းမုန့်ဖိုးတွေကို စုခိုင်းလို့ ငါတောင် ရက်တော်တော်ကြာ ထမင်းငတ်ခဲ့ရသေးတယ်”

“သူငယ်ချင်းရာ၊ မင်းပဲ အဲဒီကျေးဇူးကြောင့် ပျော်ခဲ့ရတာမဟုတ်ဘူးလား”

“ဒါတော့ ဟုတ်ပါတယ်”

Lost Fantasy ဂိမ်းတိုင်းကို အပြတ်ကစားနိုင်ခဲ့တဲ့ တက်ဂယူရဲ့ အဆင့်လောက် မရှိပေမယ့် ကျွန်တော်လည်း နာမည်ကြီးတဲ့ ဂိမ်းအများစုကိုတော့ အနည်းဆုံး တစ်ကြိမ်စီ ကစားဖူးပါတယ်။

ပြန်တွေးကြည့်တော့ စိတ်ထဲ တစ်မျိုးကြီးပဲ။

ဟိုတုန်းက အိုတက်ဂယူနဲ့ ကျွန်တော် ဂိမ်းစီဒီတွေ သွားဝယ်ခဲ့တုန်းကဆိုရင် ကျွန်တော် ကိုယ်တိုင် ဂိမ်းကုမ္ပဏီတစ်ခုမှာ တိုက်ရိုက်ရင်းနှီးမြှုပ်နှံပြီး ဖျော်ဖြေပွဲတစ်ခုကိုတောင် ပံ့ပိုးကူညီပေးရလိမ့်မယ်လို့ လုံးဝ မတွေးခဲ့မိဖူးဘူး။

ယန်ဟန်နာက သူ့အဖေနဲ့အတူ ရောက်လာပါတယ်။ ဟန်နာက ပုခုံးတစ်ဖက်ဖော်ထားတဲ့ အနက်ရောင်ဂါဝန်ကို ဝတ်ဆင်ထားပြီး မိတ်ကပ်ပါးပါးလေး လိမ်းထားတာပါ။ အလှပြင်ထားတာ သိပ်မရှိတာတောင် ဟန်နာရဲ့ အလှက ဘေးပတ်ဝန်းကျင်က လူတွေရဲ့ အကြည့်ကို ဆွဲဆောင်နိုင်ဖို့ လုံလောက်နေပါပြီ။

ဟန်နာက တက်ဂယူကို စကားပြောလိုက်တယ်။

“ငါလည်း အခုတလော Lost Fantasy Online ကို ကြိုးကြိုးစားစား ကစားနေတာ။ ဒါကြောင့် ဒီနေ့ ဖျော်ဖြေပွဲကို တကယ် မျှော်လင့်နေတာဟ”

ချက်ချင်းပဲ တက်ဂယူဆီကနေ စိတ်အားထက်သန်တဲ့ တုံ့ပြန်မှု ထွက်လာတယ်။

“အိုး။ ဟုတ်လား… ဘယ်ဇာတ်ကောင်လဲ”

“မြှားပစ်သမား။ မြှားနဲ့ပစ်တဲ့သူလေ”

“နင် သူ့ကို ဘယ်လိုပုံစံမျိုးနဲ့ ကစားတာလဲ။ မြှားပစ်စွမ်းရည်ကို မြှင့်တင်ပြီး ကင်းပုန်းဝပ်တဲ့လမ်းကြောင်းကို သွားတာလား။ ဒါမှမဟုတ် သားရဲတွေကို ထိန်းကျောင်းတဲ့စွမ်းရည်ကို သင်ယူပြီး Beast Master ဘက်ကို သွားတာလား”

ဂိမ်းကို အခုမှစကစားတဲ့သူတစ်ယောက်အတွက် ဒါက ခက်ခဲတဲ့မေးခွန်း ဖြစ်နေပုံရလို့ ဟန်နာက နည်းနည်းလေး စိတ်လှုပ်ရှားသွားပုံရတယ်။

“အာ၊ အင်း... ဘယ်တစ်ခုက ပိုကောင်းမယ်လို့ ထင်လဲ။ နင် ဘယ်လိုအကြံပေးချင်လဲ။ တက်ဂယူ”

တက်ဂယူက ကြင်ကြင်နာနာပဲ ဖြေပေးလိုက်တယ်။

“လမ်းကြောင်းနှစ်ခုလုံးမှာ အားသာချက်၊ အားနည်းချက်တွေ ရှိတယ်...”

မြှားပစ်သမားရဲ့ ဝိသေသလက္ခဏာတွေ၊ အနာဂတ် ဖွံ့ဖြိုးတိုးတက်မှု လမ်းကြောင်းတွေနဲ့ အဖွဲ့လိုက်ကစားတဲ့အခါ အသုံးဝင်မယ့် အကြံပြုချက်တွေကို တက်ဂယူက အသေးစိတ် ဆက်ပြီး ရှင်းပြပေးတယ်။ ဟန်နာက တက္ကသိုလ်က ကျောင်းသားတစ်ယောက်လို ဆရာကြီးရဲ့ သင်ခန်းစာကို အာရုံစိုက်နားထောင်ရင်း ခေါင်းကို သေသေချာချာ ညိတ်နေပါတယ်။

ကိုယ် ကောင်းကောင်းမသိတဲ့ နယ်ပယ်တစ်ခုကို စိန်ခေါ်ဖို့ဆိုတာ မလွယ်ကူပါဘူး။

အယ်လီက သူတို့ကို ကြည့်ပြီး ကျွန်တော့်ကို မေးတယ်။

“ဒီနေ့ မင်ဟာယောင်းလည်း လာမယ်လို့ နင်ပြောသေးတယ်မလား”

“အေး။ တက်ဂယူက သူဟာ OTK ကုမ္ပဏီရဲ့ ဒုတိယဥက္ကဌဆိုတာကို မင်ဟာယောင်းကို ပြောပြထားပုံရတယ်”

ကျွန်တော့်အထင်တော့ တက်ဂယူကိုယ်တိုင် ပြောပြတာထက်စာရင် မင်ဟာယောင်းက ရပ်မိသွားတာဖြစ်ဖို့များပါတယ်။ ဒါတောင် တက်ဂယူက အချိန်အတော်ကြာအောင် လျှို့ဝှက်ထားနိုင်ခဲ့တာပါ။

“မင်ဟာယောင်းက တက်ဂယူရဲ့ ပထမဆုံးအချစ်လို့ နင်ပြောဖူးတာမလို့ သူက ဘယ်လိုလူမျိုးလဲဆိုတာ ငါ သိချင်နေတာ”

တက်ဂယူကတော့ မင်ဟာယောင်းကို သဘောကျရုံတင်လို့ ပြောတာပဲ။ ဒါပေမဲ့... အဲဒါက ပထမဆုံးအချစ်လို့ ပြောရမှာပဲလေ။

ခဏအကြာမှာ မင်ဟာယောင်း ရောက်လာတယ်။ ကျွန်တော် အရင်က ဓာတ်ပုံတွေပဲ မြင်ဖူးတာပါ။ လူကိုယ်တိုင် တွေ့ရတာကတော့ ဒါပထမဆုံးအကြိမ်ပါပဲ။

မင်ဟာယောင်းက မျက်မှန်အဝိုင်းကြီးကို တပ်ထားပြီး ဆံပင်ကို မြင်းမြီးပုံစံ တစ်ချောင်းထဲ စည်းထားတယ်။ သူ့ရဲ့ဝတ်စုံက ပန်းရောင်အစင်းကြောင်းတွေပါတဲ့ ဂါဝန်လေးပါ။ ဒေါက်ဖိနပ် စီးထားပေမယ့်လည်း သူ့ပုံစံက သေးသေးလေးပါပဲ။

ဒီလို လူစုံတဲ့ပွဲမျိုးတွေနဲ့ မရင်းနှီးလောက်တဲ့ သူဟာ စိတ်လှုပ်ရှားနေတဲ့ အမူအရာနဲ့ ဟိုဟိုဒီဒီ လုပ်နေပါတယ်။

တက်ဂယူက ကျွန်တော်တို့ကို မိတ်ဆက်ပေးတယ်။

“ဒါက ငါ့ရဲ့ အချစ်ဆုံးသူငယ်ချင်း ကန်ဂျင်ဟူ။ သူ့ဘေးကတော့ သူ့ရည်းစား အယ်လီ။ နင် သူတို့နှစ်ယောက်လုံးကို သိတယ်မလား”

မင်ဟာယောင်းလည်း ကျွန်တော်တို့ မျက်နှာတွေကို မှတ်မိမှာပါ။

အယ်လီနဲ့ ကျွန်တော်က မင်ဟာယောင်းကို နှုတ်ဆက်လိုက်တယ်။

“တက်ဂယူဆီကနေ နင့်အကြောင်းတွေ အများကြီး ကြားဖူးပါတယ်”

“အာ…. မင်္ဂလာပါ”

“နင့်ရဲ့ Webtoonကို စပြီး အခန်းဆက်တင်နေပြီလို့ ကြားတယ်။ ဂုဏ်ယူပါတယ်”

“အာ... ကျေ... ကျေးဇူးတင်ပါတယ်”

အယ်လီက ကျွန်တော့်ကို တိုးတိုးလေး ကပ်ပြောတယ်။

“သူက တော်တော်လေး ချစ်စရာကောင်းတာပဲ။ တက်ဂယူနဲ့ လိုက်ဖက်မယ့်ပုံပဲ”

“တကယ်လား”

မင်ဟာယောင်းက တက်ဂယူနဲ့ စရိုက်ချင်း တူတယ်ဆိုရင် ယန်ဟန်နာကိုတော့ လုံးဝဆန့်ကျင်ဘက်လို့ ပြောရမှာပါ။ စရိုက်ပြင်းပြင်း အမျိုးသမီးတစ်ယောက်က အိုတက်ဂယူနဲ့ တစ်မျိုးတစ်ဖုံ ပိုလိုက်ဖက်တယ်လို့ ကျွန်တော် ခံစားရတယ်။

“အာ… မင်းသမီး အန်နီကဲလည်း ရှိသေးတယ် မဟုတ်လား”

ကျွန်တော် မင်းသမီး အန်နီကဲကို တွေးမိသွားတယ်။ သူက ငယ်ရွယ်ပြီး တက်ကြွတဲ့ စရိုက်ရှိတာကြောင့် ယောက်ျားလျာဆန်တဲ့ ညီမလေးတစ်ယောက်လို ခံစားရစေပါတယ်။

“ဒါပေမဲ့ မင်းသမီးက တက်ဂယူအပေါ် ခံစားချက်ရှိနေတယ်ဆိုတာတော့ မသေချာသေးပါဘူး”

ကျွန်တော့်စကားကြောင့် အယ်လီက တောက်ပစွာ ပြုံးလိုက်တယ်။

“နင် သေချာလို့လား။ အရင်က သူတို့ စကားပြောနေတာကို ငါ ကြည့်တုန်းက မင်းသမီးက တော်တော်လေး စိတ်ဝင်စားနေတဲ့ပုံပဲနော်”

“အဲဒါက မင်းသမီးက Lost Fantasy ရဲ့ ဖန်တစ်ယောက်မလို့ပါ...”

အယ်လီက သူ့လက်ညှိုးကို ခါယမ်းပြလိုက်တယ်။

“သေချာစဉ်းစားကြည့်စမ်းပါဟ။ Lost Fantasy ကို ပြန်လည်အသက်သွင်းပေးခဲ့တဲ့သူက တက်ဂယူ ကိုယ်တိုင်ပဲ။ ဘယ်အမျိုးသမီးကများ ကိုယ့်အပေါ် ခံစားချက်မရှိတဲ့ အမျိုးသားတစ်ယောက်နဲ့ သုံးနာရီကြာအောင် တစ်ယောက်ထဲ စကားပြောနိုင်မှာလဲ”

မင်းသမီး အန်နီကဲမှာ ဂိမ်းပြပွဲတစ်ခုမှာ Cosplay လုပ်ခဲ့ဖူးတဲ့အထိ အိုတာကူ စရိုက်တွေ ရှိပါတယ်။ နော်ဝေနိုင်ငံက ရေနံနဲ့ ဂက်စ်ကနေ ရရှိတဲ့ ပိုက်ဆံတွေနဲ့ နိုင်ငံရဲ့ အိုင်တီနဲ့ ဂိမ်းလုပ်ငန်းတွေကို တက်ကြွစွာ ပျိုးထောင်နေတာကြောင့် မင်းသမီးကလည်း ပရိုမိုးရှင်း မော်ဒယ်အဖြစ် ထိရောက်စွာ ဆောင်ရွက်ပေးနေတာပါ။

နေပါဦး။ တကယ်လို့ သူတို့အဆင်ပြေသွားရင် အိုတက်ဂယူက နော်ဝေဘုရင်ရဲ့ သမက်ဖြစ်လာမှာလား။

“...”

ဒါက တကယ်ပဲ ဖြစ်နိုင်ပါ့မလား။ အိုတက်ဂယူက အောင်မြင်တဲ့ အိုတာကူတစ်ယောက်ရဲ့ ပြယုဂ်ဖြစ်နေရင်တောင် ဘုရင့်သမက် ဆိုတာကြီးက အောင်မြင်လွန်းနေတာ မဟုတ်ဘူးလား။

ယန်ဟန်နာက မင်ဟာယောင်းကို ကြည့်ပြီး ပြောလိုက်တယ်။

“အို။ ဒီမှာ ပြန်တွေ့ရတာ ဝမ်းသာပါတယ်နော်။ တွေ့ရတာ ဝမ်းသာပါတယ်”

“အာ… ဟုတ်ကဲ့။ မင်္ဂလာပါ”

“နင့်ရဲ့ Webtoon စ တင်လိုက်ပြီလို့ တက်ဂယူဆီက ကြားတယ်။ ဂုဏ်ယူပါတယ်နော်”

“ဒါက တက်ဂယူရဲ့ အကူအညီကြောင့်ပါ။ သူက အခုထိ အခန်းတိုင်းကို ကြည့်ပေးပြီး အကြံဉာဏ်တွေ ပေးနေတုန်းပဲလေ”

“အဲလိုလား။ တက်ဂယူက တကယ် ကြင်နာတတ်တာပဲ။ ကျွန်မလည်း မကြာသေးခင်ကမှ ဂိမ်းစကစားတာဆိုတော့ နောက်ဆို သူ့ကို မေးစရာတွေ အများကြီး ရှိလာမှာသေချာတယ်။ ဒါပေမဲ့ မဟာယောင်းက အခန်းဆက်တွေနဲ့ အလုပ်ရှုပ်နေရင် ဂိမ်းကစားဖို့ အချိန်ရှိမှာ မဟုတ်ဘူးမလား”

“အာ… မဟုတ်ပါဘူး။ ကျွန်မလည်း စဆော့တော့မှာပါ။ စာရေးဆရာတွေက ဂိမ်းကစားရင်းနဲ့ စိတ်ကူးဉာဏ်သစ်တွေ ရတတ်လို့လေ”

သူတို့နှစ်ယောက်လုံး ပြုံးပြုံးလေးနဲ့ အပေါ်ယံ ရင်းနှီးတဲ့ စကားတွေပြောနေခဲ့တယ်။

ဒီအတောအတွင်း ကျွန်တော်တို့က တခြားရောက်လာတဲ့သူတွေကို နှုတ်ဆက်ကြပါတယ်။ ဂျပန်က လာတဲ့ OTK Games ကိုယ်စားလှယ်တွေ ရောက်လာကြပါပြီ။

ဥက္ကဌ အိချီကာဝါကတော့ သူ့ရဲ့ အလုပ်များတဲ့ အစီအစဉ်တွေကြောင့် မလာနိုင်ခဲ့ပေမယ့် Lost Fantasy ရဲ့ အထွေထွေ ဂီတဒါရိုက်တာ ဖြစ်တဲ့ ကွန်ဒို ဟာယာရှီ ကတော့ အစားထိုး ရောက်လာခဲ့တယ်။

ပထမဆုံး စီးရီးမှာ အလုပ်လုပ်ခဲ့တဲ့ လူငယ်လေးက အခုတော့ သက်လတ်ပိုင်း လူကြီးတစ်ယောက် ဖြစ်နေပါပြီ။ ဒါပေမဲ့ သူက Lost Fantasy စီးရီးအတွက် ဂီတနဲ့ အသံပိုင်းဆိုင်ရာတွေကို ထူးချွန်တဲ့ စွမ်းရည်တွေနဲ့ ဆက်လက် ကြီးကြပ်နေဆဲပါ။

တက်ဂယူက သူ့ရဲ့ လက်နှစ်ဖက်လုံးနဲ့ ဒါရိုက်တာရဲ့ လက်တွေကို ဆုပ်ကိုင်လိုက်တယ်။

“ဒါရိုက်တာရဲ့ ဂီတကြောင့် ကျွန်တော် စီးရီးတိုင်းကို ပျော်ပျော်ရွှင်ရွှင် ကစားနိုင်ခဲ့တာပါ။ Lost Fantasy ဖန်တွေအားလုံးလည်း ဒီလိုပဲ ခံစားရလိမ့်မယ်လို့ ကျွန်တော် ယုံကြည်ပါတယ်”

အဖွဲ့ခေါင်းဆောင် ဂျောင်ကီဟုမ် က ဘာသာပြန်ပေးပြီးနောက် ဂီတဒါရိုက်တာ ကွန်ဒိုက ပြုံးရွှင်ကာ ပြန်ပြောပါတယ်။

“အခုလို ပြောပေးလို့ ကျေးဇူးတင်ပါတယ်။ ဒုတိယဥက္ကဌ။ ကျွန်တော် ဂိမ်းဂီတကို ဖန်တီးတုန်းက Orchestraအဖွဲ့နဲ့ ဒီလိုမျိုး ဖျော်ဖြေရလိမ့်မယ်လို့ လုံးဝ မတွေးခဲ့မိဘူး။ ကျွန်တော်တို့ကို ဒီလို အံ့သြစရာကောင်းတဲ့ အခွင့်အရေး ပေးခဲ့တဲ့အတွက် ကျေးဇူးတင်ပါတယ်”

Orchestra ဖျော်ဖြေပွဲ စတင်ခဲ့ပါပြီ။

စီးရီးတစ်ခုချင်းစီက အခန်းတွဲတွေကို နောက်ခံscreenပေါ်မှာ ဂီတနဲ့အတူ အချိန်ကိုက် ပြသခဲ့တယ်။ 2D Pixelခေတ်ကနေ အခုအချိန်အထိ၊ ဂီတနဲ့အတူ စီးရီးရဲ့ တိုးတက်ပြောင်းလဲလာမှုကို ကိုယ်တိုင် မြင်တွေ့နေရတာပါ။

ဂိမ်းဂီတဖြစ်တာကလွဲရင် ဒါက တခြားဘယ်ဖျော်ဖြေပွဲနဲ့မဆို သိပ်မကွာခြားပါဘူး။ အပိုင်းတစ်ခုချင်းစီ ပြီးဆုံးသွားတိုင်း ပရိသတ်တွေဆီကနေ စိတ်အားထက်သန်တဲ့ လက်ခုပ်သံတွေ ထွက်ပေါ်လာခဲ့တယ်။

အိဂျိ တာကာဟာရှီ ရဲ့ ပီယာနိုတီးခတ်မှုပြီးသွားတော့ နာမည်ကြီး အဆိုတော်တစ်ယောက် ထွက်လာကာ LF12 ရဲ့ အဖွင့်သီချင်း အင်္ဂလိပ်ဗားရှင်းကို သီဆိုခဲ့တယ်။ သီချင်းဆိုအဖွဲ့တောင် ပါဝင်လာခဲ့သေးတာပါ။ သီချင်းဆိုအဖွဲ့ရဲ့ အသံတွေက Orchestraနဲ့ ပေါင်းစပ်လိုက်တဲ့အခါ လေထုက ခန့်ညားထည်ဝါပြီး စိတ်လှုပ်ရှားစရာတောင် ကောင်းလာခဲ့တယ်။

“ဒါက LF7 ရဲ့ တိုက်ပွဲနောက်ခံသီချင်း မဟုတ်လား”

ကျောင်းက ပြန်လာပြီးတာနဲ့ အမေ ဆူတာကို ခံရရင်း ဒီဂိမ်းကို ကစားခဲ့တာကို ကျွန်တော် မှတ်မိသွားတယ်။

တက်ဂယူက စိတ်လှုပ်ရှားနေတဲ့ မျက်နှာနဲ့ ခေါင်းညိတ်ပြတယ်။

“ဟုတ်တယ်။ ဒီဂီတကို ဒီလိုမျိုး ကြားရလိမ့်မယ်လို့ တွေးတောင် မတွေးခဲ့မိဘူး”

နှစ်နာရီကြာ ဖျော်ဖြေမှု ပြီးဆုံးသွားတဲ့အခါ လူတိုင်းက မတ်တပ်ရပ်ပြီး အားပေးချီးကျူးခဲ့ကြပါတယ်။

လူတိုင်း ပျော်ရွှင်နေပုံရတယ်။ Lost Fantasy စီးရီးဖန်တွေအတွက် အမှတ်တရကောင်းတွေ ဖန်တီးပေးဖို့ တက်ဂယူရဲ့ အစီအစဉ်က ကွက်တိ မှန်ကန်သွားခဲ့တယ်ဆိုတဲ့ သဘောပါပဲ။

အယ်လီကလည်း မတ်တပ်ရပ်ပြီး အားတက်သရော လက်ခုပ်တီးခဲ့တယ်။

“ငါက ဒါကို ဂိမ်းဂီတတစ်ခုအနေနဲ့ပဲ သာမန်ပဲ တွေးထားတာ၊ ဒါပေမဲ့ တကယ်ကို စိတ်လှုပ်ရှားဖို့ ကောင်းတာပဲ။ ဖျော်ဖြေပွဲကို ကြည့်ပြီးနောက်မှာ ငါလည်း ဒီဂိမ်းကို စမ်းကစားကြည့်ချင်စိတ် ပေါက်လာတယ်”

ကျွန်တော် ခဏလောက် စဉ်းစားပြီးမှ ပြောလိုက်တယ်။

“လက်ရာမွန်တွေက လက်ရာမွန်ဖြစ်နေရတဲ့ အကြောင်းရင်း အမြဲရှိပါတယ်။ အရင်ဆုံး LF10 ကို စမ်းဆော့ကြည့်ပေါ့။ ငါ့အမြင်အရတော့ LF10ရဲ့ ဇာတ်လမ်းက စိတ်လှုပ်ရှားစရာ အကောင်းဆုံးပဲ”

“LF10ရဲ့ ဘာကို သဘောကျတာလဲ”

“ဂရပ်ဖစ်တွေက အခုအချိန်အထိ တော်တော်လေး ကောင်းမွန်နေသေးတဲ့အပြင် License Board ကို သုံးထားတဲ့ ဇာတ်ကောင်တိုးတက်မှုစနစ်က ဇာတ်ကောင်တည်ဆောက်မှုကို ပျော်စရာကောင်းစေတယ်။ ဇာတ်လမ်းကိုယ်တိုင်ကလည်း တကယ့်ကို စိတ်ခံစားမှုအပြည့်ပဲ”

“နင်နဲ့ တက်ဂယူ ဘာလို့ အချစ်ဆုံးသူငယ်ချင်းတွေ ဖြစ်နေရလဲဆိုတဲ့ အကြောင်းရင်းက ရှိနေတာပဲ”

“ဟုတ်လား”

အယ်လီက ကျွန်တော့်လက်မောင်းကို တွဲပြီး ပြောလိုက်တယ်။

“ငါက ဂိမ်းတွေဆော့တာမှာ သိပ်မကျွမ်းကျင်တော့ ဂျင်ဟူက ငါ့ဘေးကနေ သင်ပေးရမယ်နော်”

[အသစ်ဖွင့်လှစ်လိုက်တဲ့ ကိုရီးယား Korea Music Hallမှာ 'Lost Fantasy Concert' ကျင်းပခဲ့]

Korea Symphony Orchestraအဖွဲ့က အသစ်ပြန်လည် ပြင်ဆင်ထားတဲ့ ကိုရီးယား Korea Music Hallမှာ Lost Fantasy Concert ကို သုံးရက်ကြာ ကျင်းပနေပါတယ်။ မူလက ဖျော်ဖြေပွဲ တစ်ကြိမ်ထဲလုပ်ဖို့ပဲ စီစဉ်ထားသော်လည်း ဖန်တွေရဲ့ တောင်းဆိုမှုကြောင့် နောက်ထပ် ပွဲနှစ်ပွဲ ထပ်တိုးခဲ့ရပြီး ထိုင်ခုံနေရာအားလုံး စောစီးစွာ ရောင်းကုန်သွားခဲ့တယ်။ မကြာသေးမီက ဂန္ဓဝင်ဂီတဖျော်ဖြေပွဲ ဈေးကွက် ကျဆင်းနေတာကို ထည့်သွင်းစဉ်းစားရင် ဒါဟာ မကြုံစဖူး လက်မှတ်ရောင်းအား စံချိန်တင်မှုတစ်ခုလို့ပဲ ပြောရမှာပါ။

ဆောင်းအုပ်စု ဥက္ကဌ လင်ဂျင်ယုံ၊ ဆီလွန်ဟိုတယ် ဥက္ကဌ လင်ဆိုမီ နဲ့ CL Chemical ဥက္ကဌ ယန်ဟိုယောင်း အပါအဝင် စီးပွားရေးလောကက စီအီးအိုတွေလည်း တက်ရောက်ခဲ့ကြပြီး ပွဲကို ပိုမိုတင့်တယ်စေခဲ့တယ်။

ဖျော်ဖြေပွဲအပြီးမှာတော့ ပရိသတ်တွေက 'ဂိမ်းများနှင့် Orchestraတို့၏ အံ့သြဖွယ် ဆုံတွေ့မှု' ဟု ခေါ်ဆိုကာ ချီးကျူးစကားတွေ ပြောခဲ့ကြပါတယ်။

OTK Games က Lost Fantasy စီးရီးရဲ့ နှစ် ၃၀ ပြည့် အထိမ်းအမှတ်အနေနဲ့ ဖန်တွေအတွက် ပုံစံအမျိုးမျိုးသော Contentတွေကို ဆက်လက် ဖန်တီးပေးသွားဖို့ စီစဉ်ထားကြောင်း ပြောကြားခဲ့တယ်။ Korea Symphony Orchestra စီအီးအို ပတ်ဟဲဂျင် ကလည်း ဒါဟာ ဂန္ဓဝင်ဂီတကို လူထုနဲ့ ပိုမိုရင်းနှီးကျွမ်းဝင်လာစေမယ့် အခွင့်အရေးတစ်ခု ဖြစ်ခဲ့ကြောင်း သူ့ရဲ့ အမြင်ကို မျှဝေခဲ့ပါတယ်။

ကျွန်တော် ဆောင်းပါးကို ဖတ်ပြီး ပြောလိုက်တယ်။

“လုံးဝကို အောင်မြင်သွားတာပဲ”

မီဒီယာတွေရဲ့ ဖော်ပြမှုကလည်း အလွန်ကောင်းမွန်ပါတယ်။ အစပိုင်းမှာ စိုးရိမ်ပူပန်မှုတွေ ဖော်ပြခဲ့ကြတဲ့ ဂီတဝေဖန်ရေးသမားတွေတောင် ဒါဟာ အမျိုးအစား နယ်နိမိတ်တွေကို ချိုးဖျက်လိုက်တာဖြစ်ကြောင်း ထောက်ခံတဲ့ ဆောင်းပါးတွေ ရေးသားခဲ့ကြတယ်။

ဒုတိယဥက္ကဌရဲ့ ဝါသနာတစ်ခုအနေနဲ့ စတင်ခဲ့တဲ့အရာက ဒီလောက်အထိ ကြီးမားတဲ့ အောင်မြင်မှု ရလိမ့်မယ်လို့ မထင်ခဲ့မိတာပါ။

တက်ဂယူက ခေါင်းညိတ်တယ်။

“ဂျပန်မှာဆိုရင် virtual idol ဖျော်ဖြေပွဲတွေက လူပေါင်းထောင်ချီကို ဆွဲဆောင်နိုင်တယ်။ Cultural Contentတွေက ဖျော်ဖြေပွဲတွေကို ဘယ်လိုအသုံးချသလဲဆိုတဲ့အပေါ် မူတည်ပြီး အဆုံးမဲ့တန်ဖိုးတွေကို ဖန်တီးပေးနိုင်တာကွ။ ကိုရီးယားရဲ့ ရှုထောင့်ကနေကြည့်ရင်တော့ ဂိမ်းတွေကို စွဲလမ်းစေတဲ့အရာ၊ လူငယ်တွေအတွက် အန္တရာယ်ရှိတဲ့ မီဒီယာလို့ သတ်မှတ်ထားတာဆိုတော့ ဒီဖျော်ဖြေပွဲက တခြားနိုင်ငံက ဇာတ်လမ်းတစ်ပုဒ်လိုပဲ ဖြစ်နေမှာသေချာတယ်”

“ဒါကြောင့်လည်း ငါတို့က တခြားနိုင်ငံတွေမှာ စီးပွားရေးလုပ်နေတာပေါ့ကွာ”

OTK Games က ဒီထရိုက်မှာ သူတို့ရဲ့ အခြေစိုက်စခန်းအသစ်ကို တည်ထောင်ပြီးသား ဖြစ်ပါတယ်။ ကိုရီးယား ဂိမ်းကုမ္ပဏီတွေကလည်း ပြောင်းရွှေ့ဖို့ စတင်နေကြပါပြီ။ တခြား ဂိမ်းကုမ္ပဏီ အနည်းငယ်ကလည်း ပြောင်းရွှေ့ဖို့ စဉ်းစားနေကြတာပါ။

အစိုးရကလည်း လန့်သွားပြီး ဒီလုပ်ငန်းကို ပြုစုပျိုးထောင်ဖို့နဲ့ ပံ့ပိုးပေးဖို့ အစီအစဉ်တွေကို အလျင်အစလို ကြေညာခဲ့တယ်။ အရင်က ဂိမ်းတွေကို 'အဓိက စွဲလမ်းစေတဲ့ အရာလေးခု' ထဲက တစ်ခုအဖြစ် သတ်မှတ်ပြီး လက်ညှိုးထိုးခဲ့ကြရာကနေ အခုတော့ 'ပို့ကုန်သူရဲကောင်းများ' အဖြစ် ရုတ်တရက် ပြောင်းလဲချီးကျူးလာခဲ့ကြတာပါ။ ဒါပေမဲ့ ဂိမ်းလုပ်ငန်းဘက်က တုံ့ပြန်မှုကတော့ 'ကျွန်တော်တို့ အရင်က အပူလောင်ခံဖူးပြီးပြီ' ဆိုတာပါပဲ။

နှစ်ရက်အကြာမှာတော့ ဥက္ကဌ လင်ဂျင်ယုံဟာ ကုမ္ပဏီကို ရောက်လာခဲ့တယ်။

သူ့ပုံစံက တော်တော်လေး ပင်ပန်းနေပုံရပါတယ်။ သူ့မျက်လုံးအောက်က ကွင်းအမည်းကြီးတွေက သူ့မေးစေ့အထိ ရောက်တော့မယ့်အတိုင်းပါ။

“အဆင်ပြေရဲ့လား”

“မနေ့ညက အိပ်တာ တော်တော်နောက်ကျသွားလို့ပါ”

“ဒီရက်ပိုင်း အလုပ်တွေ အဲလောက်တောင် အလုပ်များနေလို့လား”

ဥက္ကဌ လင်ဂျင်ယုံက အားနာပြုံးတစ်ခု ပြုံးလိုက်တယ်။

“အလုပ်မဟုတ်ပါဘူး၊ ဂိမ်းကစားနေတာ”

“ဗျာ”

“ဖျော်ဖြေပွဲကို ကြည့်ပြီးနောက်မှာ ငါ စိတ်ဝင်စားသွားလို့ Lost Fantasy Online ကို စမ်းကစားကြည့်တာ။ ဒီလိုဂိမ်းမျိုးကို ပထမဆုံးအကြိမ် ကစားတာဆိုတော့ မလွယ်ကူလှဘူး။ ဒါနဲ့ပဲ ဝန်ထမ်းအသစ်တစ်ယောက်ကို အကူအညီတောင်းပြီး နည်းနည်း သင်ယူလိုက်ရတယ်”

တက်ဂယူက အံ့သြသွားတယ်။

“အိုး။ ဟုတ်လား။ ဘယ်လိုလဲ။ ပျော်စရာကောင်းတယ်မလား”

“အင်း။ ကွန်ပျူတာတွေနဲ့ ဂိမ်း လက်တော့ပ်တွေ ရောင်းနေတာတောင် လူတွေ ဘာလို့ ဂိမ်းကစားကြလဲဆိုတာ ငါ ကောင်းကောင်းနားမလည်ခဲ့ဘူး။ ဒါပေမဲ့ အခုတော့ နားလည်သွားပြီ ထင်တယ်။ ငါ့အဆင့်ကလည်း နည်းနည်းတက်လာပြီဆိုတော့ အခုဆို Kanols တွေကို အမဲလိုက်နိုင်ပါပြီကွာ”

တက်ဂယူက စိတ်လှုပ်ရှားစွာနဲ့ လက်ခုပ်တီးလိုက်တယ်။

“ကျွန်တော် ခင်ဗျားကို Itemတချို့ shareပေးရမလား”

“ဝမ်းမြောက်ဝမ်းသာ လက်ခံရမှာပေါ့။ စကားမစပ် ငါ့ကုမ္ပဏီက ဝန်ထမ်းအတော်များများလည်း ဒီဂိမ်းကို ကစားကြတယ်ကွ။ သူတို့က မဟာမိတ်တွေဖွဲ့ပြီး အဖွဲ့လိုက်ကစားကြတယ်လို့ ကြားတယ်။ ငါလည်း တစ်ချိန်ချိန်မှာ သူတို့ရဲ့ စီးနင်းမှုအဖွဲ့ထဲ ဝင်ခွင့်ပေးဖို့ တောင်းဆိုကြည့်မလားလို့ စဉ်းစားနေတာ”

“ခင်ဗျားရဲ့ Classက ဘာလဲ”

“Male Paladin”

တက်ဂယူက ခေါင်းညိတ်တယ်။

“ခင်ဗျားက အသံထွက်ကို အင်္ဂလိပ်လို သေသေချာချာ ဖတ်ရမယ့် အတန်းအစားကို ရွေးချယ်ခဲ့တာပဲ။ ဒါပေမဲ့လည်း Paladin က အကောင်းဆုံးပဲ။ Paladin က ဘုရင်ပဲ”

“...”

ဒါကတော့ ဂိမ်းဆော့တဲ့လူတွေပဲ နားလည်နိုင်မယ့် စကားတွေပါ။

ဘာပဲဖြစ်ဖြစ်၊ ဥက္ကဌက ဝန်ထမ်းတွေရဲ့ စီးနင်းမှုအဖွဲ့ထဲ ဝင်မှာလား။

တကယ်လို့ သူတို့က Monster Bossကို စီးနင်းတိုက်ခိုက်နေချိန်မှာ ဥက္ကဌ လင်ဂျင်ယုံ ကို အချိန်မီ သွေးဖြည့်မပေးတာ ဒါမှမဟုတ် ကုသမှု ပေးတာ မလုပ်မိလို့ ဥက္ကဌသာ အရင်ဆုံး သေသွားခဲ့ရင် ဝန်ထမ်းတွေအားလုံး အလုပ်ပြုတ်ကုန်ကြလောက်မယ်ထင်တယ်။

ပြီးတော့ ဒီလိုအလုပ်များတဲ့ လူတစ်ယောက်က Lost Fantasy Online ကို အကြောင်းပြချက်မရှိဘဲ စကစားမှာ မဟုတ်ပါဘူး။

သူ အချိန်ပေးပြီး ဂိမ်းကို ကိုယ်တိုင်ကစားရတဲ့ အကြောင်းရင်းကောင်းတစ်ခု ရှိနေရလောက်မယ်ထင်တယ်။

ဥက္ကဌ လင်ဂျင်ယုံက ပြောတယ်။

“ဒီဂိမ်းကိုကစားကြည့်လိုက်တာက ငါ့ကို ဆုံးဖြတ်ချက်ချဖို့ ကူညီပေးခဲ့တယ်။ ဆောင်း အီလက်ထရောနစ် အနေနဲ့လည်း OTK Games ရဲ့ VRMMORPG ဖွံ့ဖြိုးတိုးတက်ရေး ပရောဂျက်မှာ ပါဝင်ချင်ပါတယ်”