အခန်း ၅၉၅

အခန်း (၅၉၅) - လျှို့ဝှက်နည်းလမ်းများကို အထင်မသေးသင့်၊ စေတနာ့ဝန်ထမ်း

" ဒီဘက်ကိုပါ အရှင်သခင်… ကျွန်တော်မျိုးမ ရှာတွေ့ခဲ့တဲ့ လျှို့ဝှက်ဆန်းကြယ်တဲ့ နေရာက ဒီဘက်မှာပါ "

ရှာနာနတ်ဆိုးဧကရာဇ် ထောင်ချောက်မိသွားသည်ကို မြင်သောအခါ ကျိုးမေမှာ ဝမ်းသာသွားသော်လည်း အနည်းငယ်မျှပင် မပြသရဲခဲ့ပေ။ သူ၏ရင်ထဲမှ စိတ်လှုပ်ရှားမှုကို ဖိနှိပ်ထားပြီး ရှာနာနတ်ဆိုးဧကရာဇ် တစ်ခုခု ရိပ်မိသွားမည်ကို စိုးရိမ်ကာ ရှေ့မှ လမ်းပြသွားလေသည်။

ရှာနာနတ်ဆိုးဧကရာဇ်သည် ကျိုးမေ၏ အကြံအစည်လေးများကို ကောင်းစွာ သိရှိနေသော်လည်း ၎င်းကို ထုတ်ဖော်မပြခဲ့ချေ။ သူသည် မျက်နှာပေါ်တွင် မျှော်လင့်ချက် အရိပ်အယောင်ကို အပြည့်အဝ ပြသလျက် နောက်မှ တိတ်ဆိတ်စွာ လိုက်ပါသွားခဲ့၏။

မကြာမီမှာပင် ကျိုးမေ၏ လမ်းပြမှုဖြင့် သူတို့နှစ်ဦးသည် နတ်ဆိုးနယ်မြေ၏ နယ်စပ်သို့ ရောက်ရှိလာခဲ့ကြသည်။

နတ်ဆိုးနယ်မြေ နယ်စပ်ရှိ လှိုင်းထန်နေသော ဟွမ်သွမ့်စွမ်းအင်များကြားတွင် အရောင်ကိုးမျိုးရှိသော အလင်းတန်းတစ်ခု တလက်လက် တောက်ပနေလေသည်။

ပို၍ နီးကပ်စွာ ကြည့်လိုက်သောအခါ ၎င်းမှာ တိတ်ဆိတ်စွာ ပေါ်လာသော ကမ္ဘာငယ်လေးတစ်ခုမှ ထွက်ပေါ်လာခြင်းဖြစ်ကြောင်း တွေ့လိုက်ရ၏။ ထိုလျှို့ဝှက်ဆန်းကြယ်သော ကမ္ဘာငယ်လေး၏ အနက်ရှိုင်းဆုံးနေရာတွင် အဆုံးအစမရှိ လှပသော ပန်းတစ်ပွင့် တိတ်ဆိတ်စွာ ပွင့်လန်းနေသည်ကို ဝေဝါးဝါး မြင်တွေ့နိုင်လေသည်။

ထိုပန်းပွင့်လေးမှာ အဆုံးမရှိ လှပပြီး အရွက်ကိုးဖတ် ပါရှိကာ အရွက်တစ်ခုစီက အရောင်တစ်ခုစီကို ပြသနေ၏။ တလက်လက် တောက်ပနေသော အရောင်ကိုးမျိုးရှိသည့် အလင်းတန်းမှာ ဤပန်းပွင့်အရွက်များမှ ထွက်ပေါ်လာခြင်းပင် ဖြစ်သည်။

" အဲ့ဒါပဲ! "

ကျိုးမေသည် ကမ္ဘာငယ်လေးမှ ထွက်ပေါ်လာသော မှိန်ဖျော့သည့် အရောင်ကိုးမျိုးရှိ အလင်းတန်းကို ကြည့်လိုက်၏။ သူ၏ရင်ထဲတွင် ၎င်းကဘာဆိုတာကို သိထားသော်လည်း သူ၏မျက်နှာပေါ်တွင်တော့ ယစ်မူးသွားသည့် အရိပ်အယောင်တစ်ခုကိုသာ ပြသလိုက်လေသည်။

ထိုပန်းပွင့်လေးသည် လောကရှိ အလှတရားအားလုံးကို စုစည်းထားသည့်အလားရှိနေကာ ရှာနာ၏ မျက်တောင်တစ်ခတ်စာ တောက်ပမှုဆိုသည့် အဓိပ္ပာယ်အစစ်အမှန်ကို သိမ်မွေ့စွာ ဖော်ပြနေ၏။ တစ်ချက်ကြည့်လိုက်ရုံဖြင့် လူတွေကို ထာဝရကာလထဲ ရောက်သွားသကဲ့သို့ ထင်ယောင်ထင်မှားဖြစ်မှုကို အလိုအလျောက် ခံစားသွားရစေသည်။

" တကယ်ကို အထွတ်အထိပ် ရတနာတစ်ခုပဲ! "

ထောင်ချောက်တစ်ခုမှန်း သိထားသော်လည်း ထိုအဆုံးအစမရှိ လှပသော ပန်းပွင့်လေးကို ဝေဝါးဝါး မြင်လိုက်ရသောအခါ ရှာနာနတ်ဆိုးဧကရာဇ်၏ နှလုံးသားမှာ မလွဲမသွေ တုန်ခါသွားပြီး ရိုးသားသော ဆန္ဒတစ်ခု ဖြစ်ပေါ်လာခဲ့၏။

သူ ထိုပန်းကို လိုချင်၏။ အကယ်၍ ၎င်းကို ရရှိပြီး သန့်စင်နိုင်ပါက သူ၏ ရှာနာတာအိုသည် သံသယဖြစ်စရာမလိုဘဲ ကြီးကြီးမားမား တိုးတက်သွားမည်ပင်။

ရှာနာနတ်ဆိုးဧကရာဇ်၏ နှလုံးသားမှာ ခုန်ပေါက်နေ၏။ အကယ်၍ သူသာ ထောင်ချောက်တစ်ခုမှန်း ကြိုမသိခဲ့ပါက ဤအထွတ်အထိပ် ရတနာ၏ သွေးဆောင်မှုအောက်တွင် သူသည် ၎င်းကို ရရှိရန် မည်သည့် တွေဝေမှုမျှမရှိဘဲ ထိုအထဲသို့ အမှန်တကယ်ပင် ခုန်ဆင်းသွားလောက်သည်။

သို့သော် ယခု ထောင်ချောက်တစ်ခုမှန်း သူ သိနေပြီဖြစ်၍ ရှာနာနတ်ဆိုးဧကရာဇ်သည် သေချာပေါက် အလွယ်တကူ စိတ်လိုက်မာန်ပါ လုပ်မည်မဟုတ်ပေ။

ထို့အပြင် သူ၏အရှင်သခင်သည် သူ့ကို အမိန့်မပေးရသေးပေ!

ရှာနာနတ်ဆိုးဧကရာဇ်သည် သူ့ကိုယ်သူ တည်ငြိမ်အောင် ထိန်းလိုက်၍ ကျိုးမေကို သိမ်မွေ့စွာ တစ်ချက်ကြည့်ကာ အေးဆေးစွာ ပြောဆိုလိုက်၏။

" မင်း ငါအရှင်ကို မလိမ်ခဲ့ဘူးပဲ… ဒီနေရာက ကံကောင်းမှုက တကယ်ကို ထူးခြားတယ်… ငါအရှင် ဒီကံကောင်းမှုကို ရတာနဲ့ မင်းကို ပြန်ရောက်ရင် သေချာပေါက် ကြီးကြီးမားမား ဆုချမယ်! "

" ကျေးဇူးတင်ပါတယ် အရှင်သခင်! "

ကျိုးမေသည် ဝမ်းသာအားရဖြစ်သည့် အမူအရာကို ချက်ချင်း ပြသလိုက်၏။

သို့သော် မကြာမီမှာပင် ရှာနာနတ်ဆိုးဧကရာဇ်၏ နောက်ဆက်တွဲ စကားများက ကျိုးမေ၏ မျက်နှာကို ရုတ်တရက် တောင့်တင်းသွားစေခဲ့သည်။

" ကောင်းပြီ… ဒီနေရာမှာ အန္တရာယ်တစ်ခုခု ရှိမရှိဆိုတာကို ကြည့်ဖို့ မင်း ငါအရှင်နဲ့ အတူတူ လိုက်စစ်ဆေးရမယ် "

ရှာနာနတ်ဆိုးဧကရာဇ်၏ အသံမှာ တည်ငြိမ်နေကာ ပေါ့ပေါ့ပါးပါး ပြောဆိုလိုက်၏။

ငါ့ကို အတူတူ လိုက်သွားခိုင်းတယ် ဟုတ်လား။

ကျိုးမေ၏ မျက်နှာမှာ တောင့်တင်းသွားခဲ့၏။

ထိုကမ္ဘာငယ်လေးမှာ ရှာနာနတ်ဆိုးဧကရာဇ်အတွက် ပြင်ဆင်ထားသော ထောင်ချောက်တစ်ခုမှန်း သူ သိထားသည်မှာ ကြာပြီဖြစ်သည်။ အကယ်၍ သူ ဝင်သွားပြီး ရှာနာနတ်ဆိုးဧကရာဇ်က တစ်ခုခု လွဲချော်နေသည်ကို သတိထားမိသွားပါက သူ ဘယ်လိုလုပ် အသက်ရှင်နိုင်ပါတော့မည်နည်း။

" အရှင်သခင်... ကျွန်တော်မျိုးမရဲ့ စွမ်းအားက အားနည်းလွန်းပါတယ်… ကျွန်တော်မျိုးမ အရှင်သခင်နဲ့ အတူတူ လိုက်သွားရင် အရှင်သခင်အတွက် ဝန်ထုပ်ဝန်ပိုးတစ်ခုပဲ ဖြစ်နေမှာ မဟုတ်ဘူးလား "

ကျိုးမေမှ သဘာဝမကျသော အမူအရာဖြင့် ပြောဆိုလိုက်၏။

" ကျွန်တော်မျိုးမ နတ်ဆိုးဧကရာဇ်အရှင်သခင်ကို ဒီကနေပဲ စောင့်နေပါ့မယ်… ပြီးတော့ နတ်ဆိုးဧကရာဇ် အောင်ပွဲခံပြီး ပြန်လာဖို့ကိုလည်း ဆုတောင်းပေးနေပါ့မယ် "

ရှာနာနတ်ဆိုးဧကရာဇ်နှင့် ကျိုးမေတို့ စကားပြောဆိုနေစဉ်၌ မိုင်တစ်သောင်းအကွာရှိ လျှို့ဝှက်အစီအရင်တစ်ခုအတွင်းတွင်တော့ ချီဖျန့်ဧကရာဇ်၊ နတ်ဆိုးဧကရာဇ်ကြီးနှင့် ကုချန်တို့မှာ တိတ်ဆိတ်စွာ ရပ်နေကြ၏။ သူတို့ရှေ့တွင် ပြသထားသောအရာမှာ ရှာနာနတ်ဆိုးဧကရာဇ်နှင့် ကျိုးမေတို့၏ စကားပြောဆိုနေသည့် မြင်ကွင်းပင် ဖြစ်သည်။

" ဟက်ဟက်… ရှာနာက တကယ်ကို သတိထားတာပဲ… ငါ ကြိုပြင်ဆင်ထားလို့ တော်သေးတယ် "

ရှာနာနတ်ဆိုးဧကရာဇ်သည် ကျိုးမေအား သူနှင့်အတူ အန္တရာယ်များသော နေရာသို့ ဝင်ရောက်ရန် အတင်းအကျပ် ခိုင်းစေနေပုံရပြီး ကျိုးမေက ဆန္ဒမရှိပုံရှိနေသည်ကို ချီဖျန့်ဧကရာဇ် မြင်တွေ့လိုက်ရ၏။ ဤအခြေအနေကို သူ ကြိုတင်မျှော်လင့်ထားပြီးဖြစ်ကာ သူ၏နတ်ဘုရားအာရုံ အနည်းငယ် လှုပ်ရှားလိုက်သည်နှင့် ကျိုးမေ၏ မျက်နှာမှာလည်း ရုတ်တရက် ပြောင်းလဲသွား၍ အနည်းငယ် တွေဝေရှုပ်ထွေးနေသော အမူအရာဖြင့် ရှာနာနတ်ဆိုးဧကရာဇ်အား ပြောဆိုလိုက်လေသည်။

" ကျွန်တော်မျိုးမက ကျိန်းသေပေါက် နတ်ဆိုးဧကရာဇ်နဲ့ အတူတူ လိုက်သွားရမှာပေါ့… တကယ်လို့ ကံကောင်းမှု တစ်ခုခုများ ရှိလာရင် အရှင်သခင် ကျွန်တော်မျိုးမကို သတိရပေးဖို့ပဲ မျှော်လင့်ပါတယ် "

ကျိုးမေ ရုတ်တရက် ပြောင်းလဲသွားသည်ကို မြင်သောအခါ နတ်ဆိုးဧကရာဇ်ကြီးမှ စူးစမ်းလိုစိတ်ဖြင့် မေးမြန်းလိုက်၏။

" တာအိုမိတ်ဆွေ ချီဖျန့်… မင်းက အင်မော်တယ်ဘုရင်တစ်ပါးကို ထိန်းချုပ်နိုင်တယ် ဟုတ်လား "

အင်မော်တယ်ဘုရင်အဆင့်သို့ ရောက်ရှိသွားသည်နှင့် မည်သူကမျှ အနိုင်ကျင့်၍မရတော့သကဲ့သို့ နတ်ဆိုးဧကရာဇ်တစ်ပါးကပင် ၎င်းကို မစွမ်းဆောင်နိုင်ပေ။ ဤအရာမှာ နတ်ဆိုးနယ်မြေ၏ သံမဏိစည်းမျဉ်း ဖြစ်သည်။

ယခု ချီဖျန့်ဧကရာဇ်က အင်မော်တယ်ဘုရင်တစ်ပါးကို ထိန်းချုပ်နိုင်စွမ်းရှိနေသည်ကို မြင်သောအခါ နတ်ဆိုးဧကရာဇ်ကြီးမှာ စူးစမ်းလိုစိတ် ဖြစ်သွားရ၏။

" ဟက်ဟက်… လှည့်ကွက်လေး တစ်ခုပါ "

ချီဖျန့်ဧကရာဇ်သည် များစွာ ရှင်းပြမနေဘဲ မှိန်ဖျော့ဖျော့သာ ပြုံးလိုက်၏။

နတ်ဆိုးဧကရာဇ်ကြီးကလည်း ဤအခြေအနေကို မြင်သောအခါ ဆက်လက်၍ မေးခွန်းမထုတ်တော့ချေ။ နတ်ဆိုးဧကရာဇ်တိုင်းတွင် ကိုယ်ပိုင် ထူးခြားသော နည်းလမ်းများ ရှိကြပြီး ၎င်းတို့ကို ပြင်ပလူများအား အလွယ်တကူ ပြောပြမည်မဟုတ်ပေ။ ချီဖျန့်ဧကရာဇ်မှ ဤနည်းလမ်းကို သူ့ရှေ့တွင် ပြသခဲ့ခြင်းကပင် ရှားပါးလှသော ရိုးသားမှုကို ပြသလိုက်ခြင်း ဖြစ်သည်။

ကုချန်မှာမူ ဤမြင်ကွင်းကို ကြည့်ရင်း စိတ်ထဲမှ တိတ်တဆိတ် သတိထားလိုက်၏။

သူသည် ယခင်က ဧကရာဇ်၏ မူလသဘောသဘာဝ ထိန်းချုပ်ခြင်း ပညာရပ်ကို ရရှိခဲ့ပြီး အင်မော်တယ်ဘုရင်များနှင့် နတ်ဆိုးဧကရာဇ်အဆင့်ရှိ တည်ရှိမှုများကို သူတစ်ဦးတည်းသာ ထိန်းချုပ်နိုင်သည်ဟု ယုံကြည်ထားခဲ့သည်။ သို့သော် ယခု ဤချီဖျန့်ဧကရာဇ်သည် သူ၏ နည်းလမ်းများဖြင့် အင်မော်တယ်ဘုရင်များကို လွှမ်းမိုးနိုင်ရုံသာမက ၎င်းတို့ကို ခြယ်လှယ်နိုင်စွမ်း ရှိနေ၏။

ဒါဆိုရင် ဧကရာဇ်ရဲ့ မူလသဘောသဘာဝ ထိန်းချုပ်ခြင်း ပညာရပ်လိုမျိုး အင်မော်တယ်ဘုရင်တွေကို လွှမ်းမိုးနိုင် ခြယ်လှယ်နိုင်စွမ်းရှိတဲ့ တခြားနည်းလမ်းတွေရော ဒီလောကမှာ ရှိနေသေးတာလား။

ဖြစ်နိုင်ချေများပါတယ်။

သူရဲကောင်းတွေဆိုတာ မြစ်ကိုဖြတ်ကူးတဲ့ ငါးကြင်းတွေလိုပဲ အများကြီးရှိတယ်။ ဘယ်သူ့ကိုမှ အထင်သေးလို့မရဘူး!

မြင်ကွင်းထဲတွင် ကျိုးမေ၏ သဘောထား ပြောင်းလဲသွားသည်ကို မြင်သောအခါ ကုချန်သည် သူ၏စိတ်ထဲမှတစ်ဆင့် ရှာနာနတ်ဆိုးဧကရာဇ်ထံ တိတ်တဆိတ် အမိန့်တစ်ခု ပေးလိုက်၏။

" အရမ်းကောင်းတယ် "

ကျိုးမေမှ သဘောထားကို ပြောင်းလဲကာ ထိုကမ္ဘာငယ်လေးထဲသို့ သူနှင့်အတူ ဝင်ရောက်ရန် ဆန္ဒရှိကြောင်း ပြသသည်ကို မြင်သောအခါ ရှာနာနတ်ဆိုးဧကရာဇ်၏ မျက်နှာမှာ သိသိသာသာ လင်းလက်သွား၏။ ထို့နောက် သူ၏စိတ်ထဲတွင် ကုချန်၏ အမိန့်ကို ကြားလိုက်ရသဖြင့် သူသည် ဆက်လက် တွေဝေမနေတော့ဘဲ ကျိုးမေကို ချက်ချင်း ဆွဲကိုင်ကာ ဟွမ်သွမ့်နယ်မြေ၏ အနက်ရှိုင်းဆုံးနေရာရှိ ကမ္ဘာငယ်လေးဆီသို့ ပျံသန်းသွားလေတော့သည်။

" နောက်ဆုံးတော့ ထောင်ချောက်မိသွားပြီပဲ! "

ရှာနာနတ်ဆိုးဧကရာဇ် နောက်ဆုံးတွင် ထောင်ချောက်မိသွားသည်ကို မြင်သောအခါ ချီဖျန့်ဧကရာဇ်၏ မျက်နှာပေါ်တွင် ဝမ်းသာမှု အရိပ်အယောင်တစ်ခု ချက်ချင်း ပေါ်လာလေသည်။

ရှာနာနတ်ဆိုးဧကရာဇ်မှ အစာဟပ်ပြီး သူ သေချာပြင်ဆင်ထားသော ထောင်ချောက်ထဲသို့ ဝင်ရောက်သွားခြင်းမှာ သူ၏ အစီအစဉ် ထက်ဝက် အောင်မြင်သွားပြီဆိုသည့် အဓိပ္ပာယ်ပင်ဖြစ်သည်။ နောက်တစ်ဆင့်အနေဖြင့် သူသည် ရှာနာကို အန္တရာယ်တွင်းသို့ တွန်းပို့ကာ ချူးဧကရာဇ်ထံမှ အကူအညီတောင်းခံစေရန် နည်းလမ်းရှာရမည်ဖြစ်သည်။

ဤအချက်ကို တွေးမိသောအခါ ချီဖျန့်ဧကရာဇ်သည် သူ၏ နတ်ဘုရားအာရုံကို ထပ်မံလှုပ်ရှားလိုက်ပြီး ကျိုးမေကို ထပ်မံ၍ ခြယ်လှယ်လိုက်လေသည်။

ဟွမ်သွမ့်နယ်မြေ၏ အနက်ရှိုင်းဆုံးနေရာရှိ ကမ္ဘာငယ်လေး၏ အစွန်းတွင် ရှာနာနတ်ဆိုးဧကရာဇ်မှာ ကျိုးမေနှင့်အတူ ထိုကမ္ဘာငယ်လေးထဲသို့ ဝင်ရောက်တော့မည့်အချိန်မှာပင် ကျိုးမေက ရုတ်တရက် ပြောဆိုလိုက်၏။

" အရှင်သခင်… ကျွန်တော်မျိုးမ ရှေ့ကနေ သွားပြီး လမ်းရှင်းပေးပါရစေ! "

" အို… "

ကျိုးမေ၏ တုံ့ပြန်မှုကို ကြည့်ရင်း ရှာနာနတ်ဆိုးဧကရာဇ်မှာ အံ့အားသင့်သွားရ၏။ သို့သော် သူသည် အမှောင်ထဲရှိ ချီဖျန့်ဧကရာဇ်၏ အကြံအစည်များကို မသိသော်လည်း အေးဆေးစွာပင် ပြောဆိုလိုက်၏။

" ငါအရှင် မင်းရဲ့ သစ္စာရှိမှုကို မြင်ပါတယ်… စိတ်မပူပါနဲ့… နောက်ပိုင်းကျရင် ငါအရှင် မင်းအပေါ် မျက်နှာသာပေးဖို့ လုံးဝ မမေ့ပါဘူး "

" ဟုတ်ကဲ့ပါ! "

ကျိုးမေသည် ရူးသွပ်သော မျက်နှာအမူအယာတစ်ခုနှင့်အတူ ကမ္ဘာငယ်လေးထဲသို့ ချက်ချင်း ပြေးဝင်သွားကာ ရှာနာပန်းဆီသို့ ပျံသန်းသွားလေ၏။ သူသည် ရှာနာနတ်ဆိုးဧကရာဇ်အတွက် ထိုရှာနာပန်းကို ရယူပေးချင်နေပုံပင်။

သို့သော် မည်သူကမျှ မမြင်နိုင်ခဲ့သောအရာမှာ ကျိုးမေ၏ မျက်လုံးအနက်ရှိုင်းဆုံးနေရာတွင် နက်ရှိုင်းသော ရုန်းကန်မှုတစ်ခု ရှိနေပြီး တစ်ခုခုကို ဆန့်ကျင်တိုက်ခိုက်နေပုံ ရှိနေခြင်းပင်ဖြစ်၏။

သို့သော် သူ၏လုပ်ရပ်များမှာ ပြောင်းလဲခြင်း မရှိခဲ့ချေ။ သူသည် ရှာနာပန်းဆီသို့သာ တန်းတန်းမတ်မတ် ပျံသန်းသွားခဲ့လေသည်။