အခန်း ၅၉၉

အခန်း (၅၉၉) - အချိန်ကျရောက်လာခြင်း၊ အကြံအစည်များ ပေါ်လွင်လာခြင်းနှင့် ထောင်ချောက်အတွင်း ပိတ်မိသွားခြင်း

ချူးဧကရာဇ် ကမ္ဘာငယ်လေးထဲသို့ ဝင်ရောက်သွားသည်နှင့်တစ်ပြိုင်နက် မိုင်ထောင်ချီ အဝေးတွင်ရှိနေသော ချီဖျန့်ဧကရာဇ်၏ မျက်နှာပေါ်တွင် ဝမ်းသာမှုအရိပ်အယောင်များ ချက်ချင်း ပေါ်လာလေသည်။ ငါးစာမိသွားပြီဖြစ်ရာ သူ၏ နှစ်ပေါင်းများစွာ စီစဉ်ထားမှုများမှာ အလဟဿ မဖြစ်ခဲ့တော့ပေ!

" ငါတို့ လှုပ်ရှားတော့မလား "

ချူးဧကရာဇ် ထောင်ချောက်ထဲသို့ ကျဆင်းသွားသည်ကို မြင်သောအခါ နတ်ဆိုးဧကရာဇ်ကြီးက ချီဖျန့်ဧကရာဇ်ကို ကြည့်ကာ မေးမြန်းလိုက်၏။

" ခဏလောက် စောင့်ပါဦး… ချူးဧကရာဇ် နည်းနည်း ပိုနက်နက် ဝင်သွားမှ လှုပ်ရှားကြတာပေါ့ "

ချီဖျန့်ဧကရာဇ်က နှုတ်ခမ်းကိုသပ်လိုက်ရာ သူ၏စကားသံတွင် ဖုံးကွယ်မရနိုင်သော စိတ်လှုပ်ရှားမှုများ ပါဝင်နေလေသည်။

ချူးဧကရာဇ်သည် ကမ္ဘာငယ်လေးထဲသို့ ဝင်ရောက်သွားပြီဖြစ်သော်လည်း လုံခြုံစေရန်အတွက် ချီဖျန့်ဧကရာဇ်သည် ချူးဧကရာဇ် အနည်းငယ် ပို၍ နက်ရှိုင်းစွာ ဝင်ရောက်သွားချိန်အထိ စောင့်ဆိုင်းပြီးမှသာ လှုပ်ရှားရန် ရည်ရွယ်ထား၏။

ကမ္ဘာငယ်လေးကို ထင်ဟပ်နေသော ပုံရိပ်ယောင်ထဲတွင် ချူးဧကရာဇ်သည် အထဲသို့ ဝင်ရောက်ပြီးနောက် ရှာနာပန်းရှိရာဆီသို့ ချက်ချင်း သွားခြင်းမရှိပေ။ ထို့အစား သူသည် ပတ်ဝန်းကျင်ကို သတိကြီးစွာဖြင့် စစ်ဆေးနေပြီး အလွန်တရာ ဂရုတစိုက်ရှိနေလေသည်။ သေချာစွာ စစ်ဆေးပြီးနောက် မည်သည့်အန္တရာယ်မျှ မတွေ့ရသဖြင့် ချူးဧကရာဇ်သည် နောက်ဆုံးတွင် စိတ်အေးသွားပုံရကာ ရှာနာပန်းဆီသို့ ပျံသန်းသွားတော့သည်။

အသက်ရှူကြိမ် အနည်းငယ်မျှသာ ကြာသောအချိန်သည် ချီဖျန့်ဧကရာဇ်အတွက်မူ နှစ်ပေါင်းများစွာကဲ့သို့ ခံစားရစေ၏။ နောက်ဆုံးတွင် ချူးဧကရာဇ်သည် ရှာနာပန်း၏ အနီးသို့ ရောက်ရှိသွားချိန်၌ ချီဖျန့်ဧကရာဇ်၏ မျက်လုံးများမှ စိတ်လှုပ်ရှားမှု အရောင်အဝါများ ချက်ချင်း ထွက်ပေါ်လာလေသည်။

" အခုပဲ! တက်စမ်း! "

ချီဖျန့်ဧကရာဇ်သည် ကျယ်လောင်စွာ အော်ဟစ်လိုက်၍ သူ၏လက်များကို အဆက်မပြတ် လှုပ်ရှားကာ လက်သင်္ကေတများကို ဆက်တိုက် ဖန်တီးလိုက်၏။ နောက်တစ်ခဏတွင် ကမ္ဘာငယ်လေး၏ ထွက်ပေါက်သည် ရုတ်တရက် ပိတ်သွားကာ အဟကလေးတစ်ခုမျှပင် မကျန်ရစ်တော့ချေ။

" ဟားဟားဟား… တာအိုမိတ်ဆွေ နတ်ဆိုးဧကရာဇ်ကြီး လာခဲ့တော့… မင်းက ရှာနာနတ်ဆိုးဧကရာဇ်ကို သွားရှင်း… ငါက ချူးဧကရာဇ်ကို ကိုင်တွယ်မယ်! "

ရန်သူများ ထောင်ချောက်ထဲသို့ ကျဆင်းသွားပြီကို မြင်သောအခါ ချီဖျန့်ဧကရာဇ်သည် ချက်ချင်းပင် မတ်တတ်ရပ်ကာ ကမ္ဘာငယ်လေးထဲသို့ ပျံသန်းဝင်ရောက်သွားလေသည်။

ဤအခြေအနေကို မြင်သောအခါ နတ်ဆိုးဧကရာဇ်ကြီးသည် ကုချန်ကို တစ်ချက်ကြည့်လိုက်ကာ တိုးညင်းသောအသံဖြင့် ပြောဆိုလိုက်၏။

" မိတ်ဆွေလေး… မင်း ဒီကနေပဲ တိုက်ပွဲကို စောင့်ကြည့်နေလိုက်ပါ… ငါနဲ့ လိုက်လာစရာ မလိုဘူး "

နတ်ဆိုးဧကရာဇ်ကြီးမှ ကုချန်ကို ခေါ်လာရခြင်းမှာ အပိုအာမခံချက် တစ်ခုအနေဖြင့်သာ ဖြစ်သည်။ မည်သို့ပင်ဆိုစေ ဤအရာမှာ နတ်ဆိုးဧကရာဇ်များကြားမှ တိုက်ပွဲဖြစ်ရာ အကယ်၍ ကုချန်သာ ကမ္ဘာငယ်လေးထဲသို့ လိုက်ပါလာပါက သူ့အတွက် မလိုအပ်သော စိုးရိမ်မှုများ ဖြစ်ပေါ်လာနိုင်ပေသည်။

ထို့ကြောင့် နတ်ဆိုးဧကရာဇ်ကြီးသည် ကုချန်ကို ဤနေရာမှနေ၍သာ စောင့်ကြည့်ခိုင်းထားပြီး အခြေအနေများ ထိန်းချုပ်မရဖြစ်သွားပါက အရန်အစီအစဉ်အနေဖြင့် ထားရှိရန်သာ ရည်ရွယ်ထားခြင်း ဖြစ်သည်။

ဤစကားကို ကြားသောအခါ ကုချန်သည် ဇွတ်မလုပ်တော့ဘဲ ဖြည်းညင်းစွာ ခေါင်းညိတ်လိုက်၏။

ဤနေရာတွင် ကျန်ရစ်နေခြင်းက နောက်ထပ် သူလုပ်မည့်အရာများအတွက် ပိုမို အဆင်ပြေစေလေသည်။

ကုချန်ကို ညွှန်ကြားပြီးနောက် နတ်ဆိုးဧကရာဇ်ကြီးသည် မတ်တတ်ရပ်ကာ ချီဖျန့်ဧကရာဇ်နှင့်အတူ ကမ္ဘာငယ်လေးထဲသို့ ပျံသန်းဝင်ရောက်သွားတော့သည်။

ချီဖျန့်ဧကရာဇ်နှင့် နတ်ဆိုးဧကရာဇ်ကြီးတို့ ကမ္ဘာငယ်လေးထဲသို့ အတူတကွ ဝင်ရောက်သွားချိန်တွင် အလွန်တရာ မျက်နှာပျက်၍ ဒေါသထွက်နေကြသော ရှာနာနတ်ဆိုးဧကရာဇ်နှင့် ချူးဧကရာဇ်တို့ကို မြင်တွေ့လိုက်ရ၏။

" ဟားဟားဟား! ချူးဧကရာဇ်နဲ့ ရှာနာ… မတွေ့ရတာ ကြာပြီနော်! "

ရန်သူအချင်းချင်း တွေ့ဆုံချိန်တွင် မျက်လုံးများ၌ အမုန်းတရားများ တောက်လောင်နေလေသည်။ ချီဖျန့်ဧကရာဇ်သည် ချူးဧကရာဇ်နှင့် ရှာနာနတ်ဆိုးဧကရာဇ်တို့ကို အနီးကပ် ရင်ဆိုင်လိုက်ရချိန်တွင် သူ၏မျက်လုံးများထဲမှ အမုန်းတရားများမှာ လျှံကျလုမတတ် ဖြစ်နေတော့၏။

" ချီဖျန့်ဧကရာဇ်လား… မင်း အသက်ရှင်နေသေးတာလား?! ဒါ ဘယ်လိုလုပ် ဖြစ်နိုင်မှာလဲ! "

ချူးဧကရာဇ်၏ မျက်နှာပေါ်တွင် ချီဖျန့်ဧကရာဇ် အသက်ရှင်နေသေးသည်ဆိုသောအချက်ကို လုံးဝ မျှော်လင့်မထားခဲ့သကဲ့သို့ အလွန်အမင်း အံ့အားသင့်သွားသည့် အမူအရာ ပေါ်လာခဲ့၏။

ချက်ချင်းဆိုသလိုပင် သူသည် ရှာနာနတ်ဆိုးဧကရာဇ်ကို လှည့်ကြည့်ကာ ဒေါသတကြီးဖြင့် ပြောဆိုလိုက်သည်။

" ရှာနာ… မင်း ငါ့ကို လှည့်စားရဲတယ်ပေါ့?! "

ယခုအခြေအနေတွင် ဤအရာအားလုံးမှာ သူ့အတွက် ဆင်ထားသော ထောင်ချောက်တစ်ခုဖြစ်ပြီး ရှာနာနတ်ဆိုးဧကရာဇ်၏ အစောပိုင်း လုပ်ရပ်များအားလုံးမှာ သူ့ကို ထောင်ချောက်ထဲသို့ သွေးဆောင်ရန်သက်သက်သာဖြစ်သည်ဟု ချူးဧကရာဇ် ယုံကြည်သွားပုံရလေသည်။

" အရူး… စကားမပြောခင် သေချာကြည့်ဦး! ငါလည်း သူတို့ရဲ့ လှည့်စားတာကို ခံလိုက်ရတာပဲ! "

ရှာနာနတ်ဆိုးဧကရာဇ်သည် ချီဖျန့်ဧကရာဇ်နှင့်အတူ ပေါ်လာသော နတ်ဆိုးဧကရာဇ်ကြီးကို ကြည့်လိုက်ရာ သူ၏မျက်နှာအမူအရာမှာလည်း အလွန် ဆိုးရွားနေလေသည်။

" နတ်ဆိုးဧကရာဇ်ကြီး… ရှင်က ဒီချီဖျန့်ဧကရာဇ်နဲ့ ပူးပေါင်းထားလိမ့်မယ်လို့ ကျွန်မ မထင်ထားခဲ့ဘူး "

" ကြည့်ရတာ ဒါတွေ အားလုံးက ချီဖျန့်ဧကရာဇ် ငါတို့အတွက် ဆင်ထားတဲ့ ထောင်ချောက်ပဲ "

အစပိုင်း 'အံ့အားသင့်မှု' အပြီးတွင် ချူးဧကရာဇ်သည် လျင်မြန်စွာ နားလည်သွားပုံရပြီး သူ၏ အကြည့်များက ချီဖျန့်ဧကရာဇ်ပေါ်သို့ ကျရောက်သွားကာ စိတ်ပျက်ဒေါသထွက်နေသော အမူအရာဖြင့် ပြောဆိုလိုက်၏။

" ဟက်! ရက်စက်ရင် ရက်စက်သလို တုံ့ပြန်ရမှာပဲလေ… ချူးဧကရာဇ်... အဲ့ဒီတုန်းက မင်းနဲ့ ရှာနာ ပေါင်းပြီး ငါ့ကို ခြုံခိုတိုက်ခိုက်တုန်းက ဒီလိုနေ့မျိုး ရောက်လာမယ်လို့ တွေးမိခဲ့ရဲ့လား "

ချီဖျန့်ဧကရာဇ်သည် အိုးထဲပိတ်မိနေသော လိပ်နှစ်ကောင်ကို ကြည့်နေသည့်အလား ချူးဧကရာဇ်နှင့် ရှာနာနတ်ဆိုးဧကရာဇ်တို့ကို အေးဆေးတည်ငြိမ်စွာ ကြည့်လိုက်ရာ သူ၏အမူအရာတွင် ဖော်ပြ၍မရနိုင်လောက်အောင် ကျေနပ်ဂုဏ်ယူမှုများ ပါဝင်နေလေသည်။

သူ လက်တစ်ချက် ဝှေ့ယမ်းလိုက်သည်နှင့် မူလက ကမ္ဘာငယ်လေး၏ အနက်ရှိုင်းဆုံးနေရာတွင် အမြစ်တွယ်နေသော ရှာနာပန်းသည် အမိန့်တစ်ခုကို ရရှိလိုက်သည့်အလား အထက်သို့ ပျံတက်လာကာ ကမ္ဘာငယ်လေးကို ဖြတ်သန်းပြီး သူ၏ လက်ဖဝါးထဲသို့ ကျရောက်လာလေသည်။

ရှာနာနတ်ဆိုးဧကရာဇ်၏ ဒေါသထွက်နေသော မျက်နှာကို ကြည့်ရင်း ချီဖျန့်ဧကရာဇ်သည် ပို၍ပင် ကျေနပ်ဂုဏ်ယူသွားတော့သည်။

" ရှာနာ... ဒီရှာနာပန်းကို ဒီကမ္ဘာမှာ မွေးဖွားလာတဲ့ ရှားပါးရတနာတစ်ခုလို့ မင်း တကယ်ပဲ ထင်နေခဲ့တာလား… ဟားဟား… ဒီပစ္စည်းက ငါ ပိုင်ဆိုင်တဲ့ အထွတ်အထိပ် ရတနာတစ်ခုပဲ… မင်းနဲ့ ဘယ်လိုလုပ် ရေစက်ပါနိုင်မှာလဲ "

" ချီဖျန့်ဧကရာဇ်… မင်းကို သစ္စာဖောက်တာက ချူးဧကရာဇ်လေ… ငါနဲ့ ဘာဆိုင်လို့လဲ "

ရှာနာနတ်ဆိုးဧကရာဇ်မှ အခြေအနေမကောင်းသည်ကို ရိပ်မိကာ ကိုယ်လွတ်ရုန်းချင်သည့်ဟန်ဖြင့် ပြောဆိုလိုက်၏။

သို့သော် ချီဖျန့်ဧကရာဇ်မှ သူ၏စကားကို နားထောင်မည်မဟုတ်ကြောင်း သိသာလှပေသည်။

" မဆိုင်ဘူး ဟုတ်လား… အဲ့ဒီတုန်းက ကွေ့ရွှီးနယ်မြေမှာ မင်းလည်း ငါ့ကို တိုက်ခိုက်ခဲ့တာပဲ မဟုတ်ဘူးလား… ဒီနေ့ တာအိုမိတ်ဆွေ နတ်ဆိုးဧကရာဇ်ကြီး ဒီမှာ ရှိနေတာ ကောင်းပါတယ်… မင်းတို့နှစ်ယောက်ကြားက ရန်ငြိုးတွေကို မင်းတို့ဘာသာ ရှင်းကြပေါ့… ဒါပေမယ့် တာအိုမိတ်ဆွေ နတ်ဆိုးဧကရာဇ်ကြီးကိုတော့ ငါ့ဘက်က အကူအညီလေး တစ်ခုလောက် ပေးပါ့မယ် "

ချီဖျန့်ဧကရာဇ် စကားပြောနေစဉ်မှာပင် သူ၏စိတ်အာရုံမှာ လှုပ်ရှားသွားခဲ့၏။

မျက်တောင်တစ်ခတ်အတွင်းမှာပင် ဤကမ္ဘာငယ်လေးထဲရှိ မရေမတွက်နိုင်သော တာအိုဥပဒေသ သံကြိုးများသည် သူ၏ ဆန္ဒအတိုင်း လှုပ်ရှားလာကြကာ ချူးဧကရာဇ်နှင့် ရှာနာနတ်ဆိုးဧကရာဇ်တို့ကို ဝန်းရံသွားလေသည်။

တာအိုဥပဒေသ သံကြိုးများသည် လှောင်ချိုင့်တစ်ခုကဲ့သို့ သူတို့နှစ်ဦးကို အထဲတွင် တင်းကျပ်စွာ ပိတ်လှောင်လိုက်ပြီး ပြင်ပကမ္ဘာနှင့် သူတို့၏ ဆက်သွယ်မှုကို တိုက်ရိုက် အားနည်းသွားစေသည်။ သူတို့၏ တာအိုနားလည်သဘောပေါက်နိုင်စွမ်းများပင်လျှင် လျော့ကျသွားပြီး သူတို့၏ တိုက်ခိုက်ရေးစွမ်းအားကို အနည်းဆုံး ရာခိုင်နှုန်း သုံးဆယ်ခန့်အထိ ကျဆင်းသွားစေတော့သည်။