အခန်း ၆၀၄

အခန်း (၆၀၄) - အတုအယောင်နှင့် အစစ်အမှန်၊ စီစဉ်ထားသော လှည့်ကွက်နှင့် ထောင်ချောက်ထဲသို့ ကျဆင်းသွားခြင်း

ကမ္ဘာငယ်လေးအတွင်း နတ်ဆိုးဧကရာဇ်ကြီး၏ ပုံရိပ်သည် ရုတ်တရက် ပေါက်ကွဲထွက်သွားပြီး နေရာတွင် ပျောက်ကွယ်သွားလေသည်။ ဤမြင်ကွင်းက ချီဖျန့်ဧကရာဇ်ကို အံ့အားသင့်သွားစေပြီး ခဏတာမျှ မှင်သက်သွားစေတော့သည်။

ဘာတွေဖြစ်ကုန်တာလဲ။ နတ်ဆိုးဧကရာဇ်က ဘာလို့ ကိုယ့်ကိုယ်ကိုယ် ဖျက်ဆီးပစ်ရတာလဲ။

ချီဖျန့်ဧကရာဇ်၏ စိတ်ထဲတွင် ရှုပ်ထွေးသွားပြီး နတ်ဆိုးဧကရာဇ်ကြီးမှာ ကြောက်လန့်လွန်း၍သာ အရှုံးပေးသည့်အနေဖြင့် မိမိကိုယ်ကို ဖျက်ဆီးလိုက်ခြင်းဟုပင် ယူဆလိုက်မိသည်။ သို့သော် သူ အနည်းငယ် ရယ်ချင်စိတ် ပေါက်သွား၏။ နတ်ဆိုးဧကရာဇ်အဆင့်သို့ ရောက်ရှိနေသူတစ်ယောက်က အကွက်ဆင်ခံရရုံမျှဖြင့် သူ၏ တစ်သက်တာ ကျင့်ကြံလာခဲ့သည့် တာအိုအနှစ်သာရကို စွန့်လွှတ်ကာ သေကြောင်းကြံစည်လိမ့်မည်ဟု မည်သူက ယုံနိုင်မည်နည်း။

သို့သော် မကြာမီပင် သူ တစ်ခုခုမှားနေပြီဟု ခံစားလာရ၏။ နတ်ဆိုးဧကရာဇ်ကြီးဆိုသည်မှာ ထိုမျှလောက် အရှုံးပေးလွယ်သူ မဟုတ်ပေ။

အကြောင်းမှာ ကမ္ဘာငယ်လေး အပြင်ဘက်တွင် ရုတ်တရက် ပေါ်လာသော ပုံရိပ်တစ်ခုကြောင့်ဖြစ်သည်။ ထိုသူမှာ အထဲတွင် 'သေဆုံး' သွားပြီဟု ထင်ရသော နတ်ဆိုးဧကရာဇ်ကြီးပင် ဖြစ်နေလေသည်။

" နတ်ဆိုးဧကရာဇ်?! "

ပြင်ပတွင် ရုတ်တရက် ပေါ်လာသော နတ်ဆိုးဧကရာဇ်ကြီးကို မြင်သောအခါ ချီဖျန့်ဧကရာဇ်မှာ မျက်လုံးများ ပြူးကျယ်သွားပြီး မယုံနိုင်အောင် ဖြစ်သွားရ၏။

အထဲမှာ ပေါက်ကွဲသွားတာက အစစ်အမှန် မဟုတ်ဘူးပေါ့!

" ချီဖျန့်ဧကရာဇ်… မင်းရဲ့ အကြံအစည်တွေက မရိုးဖြောင့်မှန်း ငါသိပြီးသားပါ… ကံကောင်းလို့ ငါ အရံအစီအစဉ်လေး တစ်ခု ကြိုပြင်ထားမိတာ "

နတ်ဆိုးဧကရာဇ်ကြီးမှ တည်ငြိမ်စွာပင် ပြောဆိုလိုက်၏။

အခုမှပင် ချီဖျန့်ဧကရာဇ် နားလည်သွားတော့သည်။ သူ စွန့်လွှတ်လိုက်သော ပုံရိပ်မှာ ကိုယ်ပွားတစ်ခုသာ ဖြစ်ပြီး နတ်ဆိုးဧကရာဇ်ကြီး၏ ခန္ဓာကိုယ်အစစ်အမှန်မှာ အစကတည်းက ဤကမ္ဘာငယ်လေးထဲသို့ ဝင်ရောက်လာခြင်း မရှိခဲ့ပေ။

" မင်း ငါ့ကို အစကတည်းက မယုံကြည်ခဲ့ဘူးပေါ့! "

ချီဖျန့်ဧကရာဇ်၏ မျက်နှာမှာ ဒေါသကြောင့် ပျက်ယွင်းသွားရ၏။ ဤမြေခွေးအိုကြီးမှာ သူ့ကို အစကတည်းက လှည့်စားနေခဲ့ခြင်း ဖြစ်သည်။

" မင်းလို လူမျိုးကို ဘယ်လိုယုံကြည်ရမလဲ… ကျိုးမေကို ထိန်းချုပ်နိုင်တဲ့ မင်းရဲ့ နည်းလမ်းတွေလိုပဲ ငါ့မှာလည်း အတုကို အစစ်နဲ့ မှားယွင်းအောင် လုပ်နိုင်တဲ့ ထူးခြားတဲ့ နည်းလမ်းတွေ ရှိတာပေါ့ "

နတ်ဆိုးဧကရာဇ်ကြီးမှ အေးဆေးစွာပင် ပြန်လည် ပြောဆိုလိုက်၏။

နတ်ဆိုးဧကရာဇ်အဆင့်သို့ ရောက်ရှိနေသူတိုင်းတွင် ကိုယ်ပိုင် နည်းပညာများ ရှိကြစမြဲဖြစ်သည်။ ချီဖျန့်ဧကရာဇ်မှ ကျိုးမေကို ခြယ်လှယ်နိုင်သကဲ့သို့ နတ်ဆိုးဧကရာဇ်ကြီးသည်လည်း ချီဖျန့်ဧကရာဇ်ကိုယ်တိုင် အစစ်အမှန်ဟု ထင်မှတ်မှားသွားစေသည့် ကိုယ်ပွားကို ဖန်တီးနိုင်ခဲ့သည်။

သူသည် အစောပိုင်း ဟောကိန်းရလဒ်များအရ အန္တရာယ်ရှိနေမည်ကို ကြိုသိထားသဖြင့် အချိန်မရွေး နောက်ဆုတ်နိုင်ရန် အမြဲတမ်း အရန်လမ်းကြောင်း ဖောက်ထားလေ့ရှိသူ ဖြစ်သည်။

" ဒါကြောင့်မလို့ မင်းက ရှာနာကို အရင်ဆုံး မတိုက်ခိုက်ခဲ့တာပဲ… မင်းက ဖော်ထုတ်ခံရမှာကို ကြောက်နေတာကိုး! "

ချီဖျန့်ဧကရာဇ်မှာ အရာအားလုံးကို ချက်ချင်း သဘောပေါက်သွားပြီးနောက် အလွန်တရာ ဒေါသထွက်သွားရ၏။ နတ်ဆိုးဧကရာဇ်ကြီးမှ ရှာနာကို မတိုက်ခိုက်ရသည့် အကြောင်းရင်းမှာ သူ၏ ကိုယ်ပွားအစစ်အမှန် ဖော်ထုတ်ခံရမည်ကို စိုးရိမ်နေ၍ပင် ဖြစ်သည်။

ယခုအခါတွင်မူ ချီဖျန့်ဧကရာဇ်မှာ အလွန်တရာ အခြေအနေ ဆိုးရွားသွားပြီဖြစ်သည်။