အခန်း ၆၀၈

အခန်း (၆၀၈) - ချီဖျန့်ဧကရာဇ် ထွက်ပြေးခြင်း၊ သေတွင်းမှ အသက်ရှင်ကျန်ရစ်ခြင်းနှင့် မျှော်လင့်ချက် မျှင်မျှင်လေး

" တာအိုမိတ်ဆွေ ချီဖျန့်… ကိုယ့်ကံကြမ္မာကိုယ်သာ ဆုတောင်းလိုက်ပါတော့ "

ချီဖျန့်ဧကရာဇ်ကို နောက်ဆုံး တစ်ချက်ကြည့်ပြီးနောက် နတ်ဆိုးဧကရာဇ်ကြီးသည် ဆက်လက် တွန့်ဆုတ်မနေတော့ဘဲ လှည့်ကာ အဝေးသို့ ပျံသန်းထွက်ခွာသွားလေသည်။

ထွက်ပြေးသွားသော နတ်ဆိုးဧကရာဇ်ကြီးကို ကုချန်က အေးစက်သော အကြည့်ဖြင့်သာ ကြည့်နေလိုက်သည်။ သူ၏ ယနေ့ ရည်မှန်းချက်မှာ ချီဖျန့်ဧကရာဇ်ကို ဖမ်းဆီးရန် ဖြစ်သည်။ နတ်ဆိုးဧကရာဇ်ကြီးနှင့် ပတ်သက်၍မူ သင့်လျော်သော အခွင့်အရေး မရှိဘဲ အလွယ်တကူ မလှုပ်ရှားခြင်းက အကောင်းဆုံးပင် ဖြစ်သည်။

ဝါးနိုင်သလောက်ပဲ ဝါးရမည်ဆိုသည့် သဘောတရားကို ကုချန် ကောင်းစွာ နားလည်ထား၏။

အကယ်၍ ယခု နတ်ဆိုးဧကရာဇ်ကြီးကို အတင်းအကျပ် ဆွဲထားရန် ကြိုးစားမည်ဆိုပါက သူနှင့် ချီဖျန့်ဧကရာဇ် နှစ်ဦးစလုံးကို နှိမ်နင်းနိုင်ကောင်း နှိမ်နင်းနိုင်မည် ဖြစ်သော်လည်း သူ ပေးဆပ်ရမည့် တန်ဖိုးမှာ ပြောရခက်လှပေသည်။

ထိုသို့ အန္တရာယ်များသော လုပ်ရပ်ကို လုပ်မည့်အစား ချီဖျန့်ဧကရာဇ်ကို ဦးစွာ တည်ငြိမ်စွာ နှိမ်နင်းလိုက်ခြင်းက ပို၍ ကောင်းမွန်ပေသည်။ နတ်ဆိုးဧကရာဇ်ကြီးကိုမူ နောက်မှ ကိုင်တွယ်ဖြေရှင်းလည်း အဆင်ပြေ၏။

" နတ်ဆိုးဧကရာဇ်ကြီး!!! "

နတ်ဆိုးဧကရာဇ်ကြီး မည်သည့် တွေဝေမှုမျှမရှိဘဲ ထွက်ခွာသွားသည်ကို မြင်သောအခါ ချီဖျန့်ဧကရာဇ်၏ မျက်လုံးများထဲတွင် နောက်ဆုံး၌ မျှော်လင့်ချက်မဲ့ခြင်းများ ပြည့်နှက်သွားတော့သည်။

အကယ်၍ နတ်ဆိုးဧကရာဇ်ကြီးကသာ ကူညီရန် ရွေးချယ်ခဲ့ပါက သူတို့နှစ်ဦး ပူးပေါင်း၍ ဝိုင်းရံထားမှုကို ဖောက်ထွက်နိုင်မည့် အခွင့်အရေး ရှိနိုင်ကြောင်းကို သူ ကောင်းစွာ သိထား၏။

သို့သော် ယခု နတ်ဆိုးဧကရာဇ်ကြီးမှာ လှည့်မကြည့်ဘဲ ထွက်သွားပြီဖြစ်ရာ သူတစ်ယောက်တည်း နတ်ဆိုးဧကရာဇ် လေးပါး၏ ဝိုင်းရံတိုက်ခိုက်မှုကို ရင်ဆိုင်ရတော့မည်ပင်။

တစ်ယောက်နဲ့ လေးယောက် ဟုတ်လား။

ချီဖျန့်ဧကရာဇ်တွင် နတ်ဆိုးဧကရာဇ် မဟာအစီအရင်၏ အကူအညီ ရှိနေလျှင်တောင်မှ ဤအရာကို လုံးဝ မစွမ်းဆောင်နိုင်ပေ။

ထို့အပြင် သူသည် ယခင်က ချူးဧကရာဇ်နှင့် အခြားသူများ၏ ခြုံခိုတိုက်ခိုက်မှုကို ခံခဲ့ရပြီးဖြစ်ရာ သူ၏ စွမ်းအားများမှာ ပြင်းထန်စွာ ထိခိုက်နေခဲ့ပြီ ဖြစ်သည်။

ထို့ကြောင့် သူ၏ကံကြမ္မာမှာ လုံးဝ သတ်မှတ်ပြီးသား ဖြစ်နေပြီပင်။

“ ငါအရှင့်ကို သတ်ချင်တယ်ဆိုရင် မင်းတို့ ဘယ်လောက် ပေးဆပ်ရမလဲဆိုတာ ကြည့်ကြသေးတာပေါ့! "

လွတ်မြောက်ရန် မျှော်လင့်ချက် မရှိတော့သည်ကို မြင်သောအခါ ချီဖျန့်ဧကရာဇ်၏ မျက်လုံးများထဲတွင် ရူးသွပ်မှု အရိပ်အယောင်တစ်ခု ဖြတ်ပြေးသွားလေသည်။

သူသည် ယခင်က တစ်ကြိမ် ရှင်သန်ခဲ့ပြီးဖြစ်ရာ သွေးကန်ထဲတွင် စုဆောင်းထားသော စွမ်းအားများသည် အချိန်တိုအတွင်း ဒုတိယအကြိမ် ပြန်လည် ရှင်သန်နိုင်ရန် လုံလောက်တော့မည် မဟုတ်ပေ။

ထို့ကြောင့် သူ၏အခြေအနေမှာ နောက်ဆုတ်စရာ လမ်းမရှိတော့ချေ။

သို့သော် လမ်းဆုံးရောက်နေသည့် အခြေအနေမျိုးကို ရင်ဆိုင်နေရချိန်တွင်ပင် ချီဖျန့်ဧကရာဇ်သည် သူ၏ နောက်ဆုံး မျှော်လင့်ချက် မျှင်မျှင်လေးကို အရှုံးမပေးခဲ့ပေ။

သူသည် သူတို့ထဲမှ တစ်ယောက်ကို ပစ်မှတ်ထားကာ ကိုယ့်အသက်ကို ဂရုမစိုက်ဘဲ အသေအလဲ တိုက်ခိုက်ရန် ဆုံးဖြတ်လိုက်သည်။ ဤလူလေးယောက်က ဘာကြောင့် မဟာမိတ်ဖွဲ့ထားကြသလဲဆိုတာကို သူ မသိသော်လည်း သူတို့၏ မဟာမိတ်အဖွဲ့မှာ သေချာပေါက် ခိုင်မာမှုမရှိလောက်ဟု ချီဖျန့်ဧကရာဇ် ယုံကြည်ထား၏။

အကယ်၍ သူသာ လူတစ်ယောက်တည်းကို အာရုံစိုက်တိုက်ခိုက်ပြီး သူတို့ကို ကြောက်ရွံ့သွားစေနိုင်ပါက သူသည် ဤလွတ်လမ်းမရှိသော ပိုက်ကွန်ကြီးထဲမှ သွေးထွက်သံယို လမ်းကြောင်းတစ်ခုကို ဖောက်ထွက်နိုင်ပြီး အောင်မြင်စွာ လွတ်မြောက်နိုင်ပေလိမ့်မည်။

ထို့ပြင် ဤပြင်းထန်သော တိုက်ခိုက်မှု၏ ပစ်မှတ်အဖြစ် ချီဖျန့်ဧကရာဇ်သည် ချူးဧကရာဇ်ကို ရွေးချယ်လိုက်၏။

ဤလေးယောက်ထဲတွင် ရှာနာမှာ ရှာနာတာအိုကို ကျင့်ကြံထားပြီး သူ၏ လှုပ်ရှားမှုများမှာ လွန်စွာ ခန့်မှန်းရခက်ကာ ထွက်ပြေးရာတွင် ပထမတန်းစား ဖြစ်သည်။ သူ့ကို အချိန်တိုအတွင်း သိသာထင်ရှားသော တိုးတက်မှုရအောင် လုပ်နိုင်ရန်မှာ စိတ်ကူးယဉ်သက်သက်သာ ဖြစ်ပေလိမ့်မည်။ အခြား လျှို့ဝှက်ဆန်းကြယ်သော နတ်ဆိုးဧကရာဇ် နှစ်ပါးနှင့် ပတ်သက်၍မူ ချီဖျန့်ဧကရာဇ်သည် သူတို့၏နောက်ခံကိုပင် မသိရသေးသဖြင့် သဘာဝကျကျပင် သူတို့ကို ပြင်းထန်သော တိုက်ခိုက်မှု၏ ပစ်မှတ်များအဖြစ် မထားနိုင်ပေ။

ချူးဧကရာဇ်သာလျှင်။ သူသည် ချူးဧကရာဇ်နှင့် ရင်းနှီးကျွမ်းဝင်ပြီး သူတို့နှစ်ဦးကြားတွင် နက်ရှိုင်းသော အမုန်းတရားများ ရှိနေသဖြင့် သူသည် သံသယဖြစ်စရာမလိုဘဲ အကောင်းဆုံး ကိုယ်စားလှယ် ဖြစ်ပေသည်။

" သေစမ်း! "

ကုချန်၏ တတိယကိုယ်ပွားက ရှေ့တွင် ရပ်နေသော်လည်း ချီဖျန့်ဧကရာဇ်သည် ဖောက်ထွက်ရန် မရွေးချယ်ဘဲ မဟာအစီအရင်ထဲသို့ တိုက်ရိုက် ပြန်ဝင်သွားလေသည်။

သူသည် ချူးဧကရာဇ်ကို အသေအလဲ တိုက်ခိုက်ရန် ပစ်မှတ်ထားပြီး ဤဆိုးရွားလှသော အခြေအနေမျိုးတွင် လွတ်မြောက်နိုင်မည့် အခွင့်အရေးလေးတစ်ခုကို ရှာဖွေရန် ရည်ရွယ်ထားခြင်း ဖြစ်၏။

ဟင်?

ချီဖျန့်ဧကရာဇ်မှ ဘာကိုမှ ဂရုမစိုက်ဘဲ မဟာအစီအရင်ထဲသို့ ပြန်ဝင်သွားသည်ကို မြင်သောအခါ ကုချန်၏မျက်လုံးများထဲတွင် နားမလည်နိုင်သည့် အမူအရာတစ်ခု ပေါ်လာလေသည်။

လွတ်မြောက်ဖို့ မျှော်လင့်ချက် မရှိတော့ဘူးဆိုတာကို သူ သိသွားလို့ အသေအလဲ တိုက်ခိုက်ဖို့ ဆုံးဖြတ်လိုက်တာလား။

သို့သော် ချီဖျန့်ဧကရာဇ်၏ နောက်ဆက်တွဲ လုပ်ရပ်များက ကုချန်အား ချီဖျန့်ဧကရာဇ်၏ အတွေးများကို နားလည်သွားစေခဲ့သည်။

ချီဖျန့်ဧကရာဇ်သည် မဟာအစီအရင်ထဲသို့ ပြန်ဝင်သွားပြီးနောက် ကုချန်၏ ခန္ဓာကိုယ်အစစ်အမှန်နှင့် ရှာနာနတ်ဆိုးဧကရာဇ်တို့ကို လျစ်လျူရှုကာ ချူးဧကရာဇ်ဆီသို့ တည့်တည့် သွားလေသည်။ သူ၏ အသေအလဲ တိုက်ခိုက်မည့် အမူအရာက သူ မသေမီ ချူးဧကရာဇ်ကို သူ့နောက်သို့ ဆွဲခေါ်သွားချင်သည့် ရည်ရွယ်ချက်ကို ရှင်းလင်းစွာ ပြသနေလေသည်။

လက်ချောင်းဆယ်ချောင်းကို တိုက်ခိုက်တာက တစ်ချောင်းတည်းကို ထိခိုက်အောင် လုပ်တာလောက် မထိရောက်ဘူး။

ကြည့်ရတာ ချီဖျန့်ဧကရာဇ်ရဲ့ လုပ်ရပ်က လူတစ်ယောက်တည်းကို အာရုံစိုက်ပြီး အဲ့ဒီကနေ လွတ်လမ်းလေးတစ်ခု ရှာဖို့ ကြိုးစားနေတာများလား။

ကုချန်မှ တွေးတောလိုက်၏။