အခန်း ၆၁၃

အခန်း (၆၁၃) - လျှို့ဝှက်ဆန်းကြယ်သော နတ်ဆိုးဧကရာဇ်၊ တစ်ခါမျှ မကြားဖူးခြင်းနှင့် အရေးပေါ်ကိစ္စ

" အင်း "

နတ်ဆိုးဧကရာဇ်ကြီးမှ သူ့ကို ခေါ်လိုက်သည်ကို မြင်သောအခါ ကုချန်သည် အခြားမည်သည့် တုံ့ပြန်မှုမျှ မပြဘဲ ခေါင်းကိုသာ ဖြည်းညင်းစွာ ညိတ်ပြလိုက်လေသည်။

ကုချန် ခေါင်းညိတ်သည်ကို မြင်လျှင် နတ်ဆိုးဧကရာဇ်ကြီးသည် လက်ကို ဝှေ့ယမ်းကာ ကုချန်နှင့်အတူ ထွက်ခွာရန် ပြင်လိုက်၏။

သို့သော် ထိုအချိန်မှာပင် အဝေးဆီမှနေ၍ အလွန်နာကျင်စွာ အော်ဟစ်လိုက်သော အသံကြီးတစ်ခုကို ကြားလိုက်ရလေသည်။

" ချူးဧကရာဇ်! ရှာနာ! ပြီးတော့ မင်း! ငါအရှင်က မင်းတို့ကို လုံးဝ အလွတ်ပေးမှာ မဟုတ်ဘူး… ငါအရှင်က သေချာပေါက် အလွတ်ပေးမှာ မဟုတ်ဘူး!!! "

ထိုအသံကြီးမှာ ကောင်းကင်ယံကိုပင် ထိုးဖောက်သွားမတတ် ကျယ်လောင်လှပြီး မိုင်ပေါင်း သောင်းချီ ကွာဝေးနေသော်လည်း နတ်ဆိုးဧကရာဇ်ကြီးသည် ရှင်းလင်းပြတ်သားစွာ ကြားလိုက်ရလေသည်။

ထိုအသံကို ကြားလိုက်ရပြီးနောက် နတ်ဆိုးဧကရာဇ်ကြီး၏ မျက်နှာအမူအရာမှာ မပြောင်းလဲဘဲ မနေနိုင်တော့ချေ။

အဘယ်ကြောင့်ဆိုသော် ထိုအသံပိုင်ရှင်မှာ သူနှင့် အလွန် ရင်းနှီးကျွမ်းဝင်နေသူ တစ်ဦးဖြစ်ပြီး သူ စွန့်ပစ်ခဲ့သော ချီဖျန့်ဧကရာဇ်ပင် ဖြစ်နေသောကြောင့်တည်း။

" တောင့်မခံနိုင်တော့ဘူးလား "

ချီဖျန့်ဧကရာဇ်၏ နာကျင်စွာ အော်ဟစ်သံကို ကြားလိုက်ရချိန်တွင် နတ်ဆိုးဧကရာဇ်ကြီး၏ ရင်ထဲ၌ စိမ့်ခနဲ အေးစက်သွားတော့၏။

ယနေ့ အခြေအနေများအရ ချီဖျန့်ဧကရာဇ်မှာ လွတ်မြောက်နိုင်ရန် မဖြစ်နိုင်တော့ချေ။ ဤအရာကို နတ်ဆိုးဧကရာဇ်ကြီးက ကြိုတင် မျှော်လင့်ထားပြီးဖြစ်သော်လည်း သူ၏ ခန့်မှန်းချက်အရ ချီဖျန့်ဧကရာဇ်သည် မလွတ်မြောက်နိုင်လျှင်တောင်မှ အချိန်အတိုင်းအတာ တစ်ခုအထိတော့ တောင့်ခံနိုင်စွမ်း ရှိသင့်ပေသည်။

မည်သို့ပင်ဖြစ်စေ သူ့တွင် နတ်ဆိုးဧကရာဇ် မဟာအစီအရင်၏ အကာအကွယ် ရှိနေသေးသည်။ ပြင်းထန်သော ဒဏ်ရာများကို ရရှိထားပြီး နတ်ဆိုးဧကရာဇ် အများအပြားနှင့် တစ်ပြိုင်နက်တည်း တိုက်ခိုက်နေရလျှင်တောင်မှ အချိန်အနည်းငယ်မျှတော့ တောင့်ခံနိုင်သင့်ပေသည်။

သို့သော် သူ ထွက်ခွာသွားသည်နှင့် တစ်ပြိုင်နက် ချီဖျန့်ဧကရာဇ်မှာ ချက်ချင်းပင် မတောင့်ခံနိုင်တော့မည်ဟု သူ မမျှော်လင့်ထားခဲ့ချေ။

“ ကြည့်ရတာ ရှာနာနဲ့ အခြားသူတွေဆီမှာ တကယ့်ကို ထူးခြားတဲ့ နည်းလမ်းတွေ ရှိနေတာပဲ! “

နတ်ဆိုးဧကရာဇ်ကြီး၏ ရင်ထဲတွင် ကျောချမ်းသွားရလေသည်။

အရင်က သူ့ကို အထင်သေးခဲ့သည့် လုပ်ရပ်များအတွက် ရှာနာကို မည်သည့်အချိန်တွင် ပြန်လည် လက်စားချေရမည်ကို သူ စဉ်းစားနေခဲ့ခြင်း ဖြစ်သည်။

သို့သော် ယခု ချီဖျန့်ဧကရာဇ် ရှုံးနိမ့်သွားသည့် အရှိန်အဟုန်နှင့် ရှာနာနှင့် ထိုလျှို့ဝှက်ဆန်းကြယ်သော နတ်ဆိုးဧကရာဇ် နှစ်ပါးကြားရှိ ဆက်ဆံရေးတို့ကို ပေါင်းစပ် စဉ်းစားကြည့်လိုက်သောအခါ ရှာနာ့ကို ထပ်မံ ပစ်မှတ်ထားလိုပါက သူ့အနေဖြင့် အလေးအနက်ထား၍ ပြန်လည် စဉ်းစားရတော့မည်ပင်။

" တကယ် ထူးဆန်းတာပဲ… ဒီနတ်ဆိုးဧကရာဇ် နှစ်ပါးက နတ်ဆိုးနယ်မြေမှာ ဘယ်အချိန်ကတည်းက ပေါ်လာခဲ့တာလဲ… ဘာလို့ ငါအရှင်က အရင်က တစ်ခါမှ မကြားဖူးခဲ့ရတာလဲ "

နတ်ဆိုးဧကရာဇ်ကြီးမှ တီးတိုးရေရွတ်လိုက်၏။

နတ်ဆိုးနယ်မြေအတွင်းရှိ နတ်ဆိုးဧကရာဇ်အဆင့် တည်ရှိမှု အရေအတွက်မှာ အမှန်တကယ်ပင် အလွန် နည်းပါးလှပြီး အဆုံးမဲ့ ရှည်လျားလှသော သမိုင်းမှတ်တမ်းများကို ပြန်ကြည့်လျှင်တောင်မှ ဤအချက်မှာ မှန်ကန်နေဆဲဖြစ်သည်။

နတ်ဆိုးဧကရာဇ်တိုင်းကို လက်ချိုးရေတွက်၍ ရနိုင်သည်ဟုပင် ဆိုနိုင်၏။

နတ်ဆိုးဧကရာဇ်ကြီးသည် နတ်ဆိုးနယ်မြေအတွင်း အရှေးအကျဆုံးသော နတ်ဆိုးဧကရာဇ်များထဲတွင် မပါဝင်သော်လည်း ထိုရှေးဟောင်း နတ်ဆိုးဧကရာဇ်များအကြောင်းကိုမူ သူ ကြားဖူးထားခဲ့သည်။

ထို့ပြင် နတ်ဆိုးဧကရာဇ်တိုင်းသည် မတူညီသော တာအိုများကို ကျင့်ကြံထားကြသဖြင့် သူတို့နှင့်သာ သက်ဆိုင်သော ထူးခြားသည့် စရိုက်လက္ခဏာများကို ပိုင်ဆိုင်ထားကြ၏။

အကယ်၍ သူတို့သာ မလှုပ်ရှားခဲ့ပါက သူတို့ မည်သူမည်ဝါဖြစ်ကြောင်းကို ဖုံးကွယ်ထားနိုင်ကောင်း ဖုံးကွယ်ထားနိုင်လိမ့်မည်။

သို့သော် သူတို့ လှုပ်ရှားလိုက်သည်နှင့် တစ်ပြိုင်နက် အထူးသဖြင့် အခြား နတ်ဆိုးဧကရာဇ်အဆင့် တည်ရှိမှုများနှင့် တိုက်ခိုက်ရာတွင် သူတို့၏ အစစ်အမှန်များကို ဖုံးကွယ်၍ မရနိုင်ဘဲ သေချာပေါက် ပေါ်လွင်သွားမည်သာပင်။

အဘယ်ကြောင့်ဆိုသော် သူတို့၏ ရုပ်သွင်ပြင်နှင့် အငွေ့အသက်များ ပြောင်းလဲသွားနိုင်သော်လည်း သူတို့ တိုက်ခိုက်ရာတွင် ပါဝင်လာသည့် တာအိုအငွေ့အသက်များမှာမူ လုံးဝ ပြောင်းလဲ၍ မရနိုင်သောကြောင့်ပင်။

သို့သော် ဘယ်ကမှန်းမသိ ရုတ်တရက် ပေါ်ထွက်လာသော ထိုလျှို့ဝှက်ဆန်းကြယ်သည့် နတ်ဆိုးဧကရာဇ် နှစ်ပါးနှင့် ပတ်သက်၍မူ သူတို့ လှုပ်ရှားတိုက်ခိုက်ချိန်တွင်ပင် နတ်ဆိုးဧကရာဇ်ကြီး၏ စိတ်ထဲ၌ မည်သည့် မှတ်မိမှုမျိုးမျှ မရှိခဲ့ချေ။

ဤနတ်ဆိုးဧကရာဇ် နှစ်ပါးသည် ယခင်က နတ်ဆိုးနယ်မြေတွင် မည်သည့် အရိပ်အယောင်မျှ မပြသခဲ့ဖူးသည့်အလား ဖြစ်နေလေသည်။

ဤအရာမှာ တကယ်ကို ထူးဆန်းလွန်းလှပြီး နတ်ဆိုးဧကရာဇ်ကြီးကိုပင် မယုံနိုင်လောက်အောင် ထူးဆန်းနေစေခဲ့သည်။

သို့သော် ဤအတွေးမှာ နတ်ဆိုးဧကရာဇ်ကြီး၏ စိတ်ထဲတွင် ခဏတာမျှသာ ကြာမြင့်ခဲ့ပြီးနောက် ၎င်းကို လတ်တလော ဘေးဖယ်ထားလိုက်၏။

ယခု အခြေအနေမှာ အလွန် အရေးပေါ်နေပြီဖြစ်ရာ ဤကဲ့သို့သော ကိစ္စများကို တွေးတောနေရန် အချိန်မဟုတ်ကြောင်း ထင်ရှားလှပေသည်။

ချီဖျန့်ဧကရာဇ်မှာ မတောင့်ခံနိုင်တော့ဘဲ အချိန်မရွေး ပြိုလဲသွားနိုင်မည့် အန္တရာယ် ရှိနေပြီပင်။

ထို့အပြင် လွတ်မြောက်ရန် မျှော်လင့်ချက် မရှိတော့ဘဲ သေဆုံးရတော့မည့် အခြေအနေကို ရင်ဆိုင်ရချိန်တွင် နတ်ဆိုးဧကရာဇ်အဆင့် တည်ရှိမှု တစ်ခုက ဘာတွေ ဆက်လုပ်လာမည်ကို နတ်ဆိုးဧကရာဇ်ကြီးကိုယ်တိုင်ပင် ခန့်မှန်းရ ခက်ခဲလှပေသည်။

ရှာနာတို့အဖွဲ့အား ဒဏ်ရာအချို့ ရရှိစေရန်အတွက် ချီဖျန့်ဧကရာဇ်မှာ စိတ်ပျက်လက်ပျက်ဖြင့် ကိုယ့်ကိုယ်ကိုယ် ဖောက်ခွဲပစ်ရန် ရွေးချယ်သွားနိုင်၏။

သို့သော် ချီဖျန့်ဧကရာဇ်သည် လက်စားချေရန်အတွက် သူ့ကို လာရောက် ရှာဖွေမည်မဟုတ်ကြောင်း မည်သူကမျှ အာမမခံနိုင်ချေ။

ထို့ကြောင့် အရေးတကြီး အလိုအပ်ဆုံးကိစ္စမှာ ဤနေရာမှ အမြန်ဆုံး ထွက်ခွာသွားရန်သာ ဖြစ်ပေသည်။