အခန်း ၂၆၀

အပိုင်း(၂၆၀) ခိုးနားထောင်သည့် ရေဒီယို၏ လျှို့ဝှက်ချက်

ကောင်းကင်ယံထက်၌ မိုးဖွဲလေးများ ဆက်လက် ရွာသွန်းနေဆဲ ဖြစ်သည်။

ရှီးနင်မြို့နယ် အဝင်ဝနေရာရှိ လေထုမှာမူ လူကို ခြောက်ခြားစေလောက်အောင် ဖိစီးမွန်းကျပ်နေ၏။

တဖွဲဖွဲကျဆင်းနေသော မိုးရေစက်များက လူတို့၏ စိတ်အစဉ်ကို ပိုမို လေးလံထိုင်းမှိုင်းသွားစေသည်။

မူလက ချူချယ်သည် ယခင်ကအတိုင်း လူတိုင်း ရိက္ခာပစ္စည်းများ ရှာဖွေစုဆောင်းပြီးစီးသည်အထိ မြို့နယ်အဝင်ဝတွင် စောင့်ဆိုင်းကာ အတူတကွ ထွက်ခွာရန် ရည်ရွယ်ထားခဲ့ခြင်း ဖြစ်သည်။

သို့သော် ပန်းရောင်ဆံပင်နှင့် ကောင်မလေး သယ်ဆောင်လာသော သတင်းကြောင့် ထိုနေရာရှိ လေထုမှာ ပြင်းထန်စွာ လေးလံသွားခဲ့ရသည်။

ချူချယ်၏ ရင်ထဲတွင် အလွန်တရာ နောင်တရနေမိ၏။

သူက ဤကာလအတွင်း လှုပ်ရှားရန် သင့်တော်မည့် ပစ်မှတ်တစ်ခုကို အမြဲတစေ ရှာဖွေနေခဲ့သည်။

သို့သော် ဤကိစ္စသည် လွယ်ကူသော အလုပ်တစ်ခုတော့ မဟုတ်ပေ။

မြို့ကြီးပြကြီးများတွင်ဖြစ်စေ ကျေးလက်မြို့ငယ်များတွင်ဖြစ်စေ ထိုနေရာများ၌ ထူးဆန်းသည့် အငွေ့အသက်များမှာ နည်းပါးလှသည် မဟုတ်ကြောင်း သိထားရမည်။

ထို့အပြင် ဤထူးဆန်းသည့် အငွေ့အသက်များသည်လည်း တစ်နေ့တခြား ပိုမို အားကောင်းလာနေကြသည်။

၎င်းတို့ ကြီးထွားလာသော နှုန်းထားသည် လူသား အစွမ်းပိုင်ရှင်များထက်ပင် များစွာ သာလွန်နေသေးသည်။

အထူးသဖြင့် ထိုမြို့ကြီးပြကြီးများပင် ဖြစ်သည်။

ဥပမာအားဖြင့် ပြီးခဲ့သည့်အကြိမ် မြူခိုးမြို့တွင် တွေ့ကြုံခဲ့ရသော မြူခိုးကျွန်များ ဖြစ်စေ ဝူကျန်းမြစ် မြွေကြီးပဲဖြစ်စေ။

ယခု ပြန်တွေးကြည့်လျှင်ပင် ချူချယ်၏ ကျောရိုးတစ်လျှောက် စိမ့်တက်သွားစေသည်အထိ ကြောက်မက်ဖွယ် ကောင်းလှသည်။

ယခု လက်ရှိ ယာဉ်တန်းတွင်လည်း လမ်းစဉ် အဆင့် (၃) အစွမ်းပိုင်ရှင် ဆို၍ တစ်ယောက်သာ ရှိသေးသည်။

ယာဉ်တန်း၏ လက်ရှိ အင်အားဖြင့် ထိုထူးဆန်းသည့် အရာများကို ထိပ်တိုက်ရင်ဆိုင်ရန်မှာ အမှန်တကယ် ပညာရှိရာ မရောက်လှပေ။

ရှီးနင်မြို့နယ်ကို ပစ်မှတ်အဖြစ် သတ်မှတ်ခဲ့ခြင်းမှာ သူ ကိုယ်တိုင် အဖန်ဖန် အထပ်ထပ် ချိန်ဆတွေးတောခဲ့ပြီးမှ ဆုံးဖြတ်ခဲ့ခြင်း ဖြစ်သည်။

ရှီးနင်မြို့နယ်တွင်လည်း ထူးဆန်းသည့် အငွေ့အသက်များ ရှိနေသည်။

သို့သော် အခြား မြို့ကြီးများ၊ ကျေးရွာများနှင့် နှိုင်းယှဉ်ပါက ရှီးနင်မြို့နယ်၏ ထူးဆန်းသည့် အငွေ့အသက်များက သိသိသာသာ အားနည်းနေသည်။

ထို့အပြင် ခေါင်းဆောင်ချူက ခိုးနားထောင်သည့် ရေဒီယို၏ အစွမ်းကို အသုံးပြု၍ အကြိမ်ကြိမ် အတည်ပြုပြီးမှသာ ဤနေရာကို ပစ်မှတ်အဖြစ် သတ်မှတ်ခဲ့ခြင်း ဖြစ်သည်။

ယခင်က ခေါင်းဆောင်ချူ၏ ဦးဆောင်မှုအောက်တွင် ယာဉ်တန်းသည် အကြိမ်တိုင်း ရိက္ခာများကို အပြည့်အဝ ရရှိခဲ့သည်။

ယာဉ်တန်းတိုင်းသည် တရားမျှတရေး ယာဉ်တန်းကဲ့သို့ ရိက္ခာထွက်ရှာတိုင်း အများအပြား သယ်ဆောင်ပြန်လာနိုင်သည် မဟုတ်ကြောင်း သိထားရမည်။

အစောပိုင်းကာလများတွင် လူသားများ သေဆုံးမှု များပြားလွန်းပြီး မြန်ဆန်လွန်းလှသဖြင့် မြို့များအတွင်း၌ ရိက္ခာများ အများအပြား ကျန်ရှိနေသေးသည်။

သို့သော် ရာခိုင်နှုန်းပြည့် အမြဲတမ်း ရိက္ခာရနိုင်မည်ဟုတော့ မဆိုလိုပေ။

လက်ဗလာဖြင့် ပြန်လာရမည့် အကြိမ်များလည်း သေချာပေါက် ရှိလာမည်သာ ဖြစ်သည်။

အကယ်၍ နှစ်ကြိမ်ဆက်တိုက်သာ ရိက္ခာမရဘဲ လက်ဗလာဖြင့် ပြန်လာခဲ့ရပါက ယာဉ်တန်းတစ်ခုလုံး အန္တရာယ်နှင့် ရင်ဆိုင်ရပေတော့မည်။

သို့သော် ချူချယ်ကတော့ ထိုသို့ မဖြစ်အောင် စွမ်းဆောင်နိုင်ခဲ့သည်။

ယခင်အကြိမ်များတွင် ခေါင်းဆောင်ချူ ဦးဆောင်၍ အဖွဲ့သားများနှင့်အတူ ရိက္ခာရှာထွက်တိုင်း တစ်ကြိမ်မျှ လက်ဗလာဖြင့် ပြန်မလာခဲ့ရဖူးချေ။

ထိုသို့ ဖြစ်ရခြင်းမှာ ခိုးနားထောင်သည့် ရေဒီယိုတွင် လျှို့ဝှက်အစွမ်း တစ်ခု ရှိနေသောကြောင့်ပင်။

ထိုအစွမ်းနှင့် ပတ်သက်၍ သူက မည်သူ့ကိုမျှ မပြောပြခဲ့ဖူးပေ။

ဤလျှို့ဝှက်ချက်ကို သူ သေသည်အထိ မြေအောက်ထဲသို့ ယူဆောင်သွားရန်ပင် ရည်ရွယ်ထားခဲ့သည်။

အင်းပေါ့၊ လျှို့ဝှက်ချက်များပြည့်နှက်နေသော ခေါင်းဆောင်ချူတွင် ဤလျှို့ဝှက်ချက် တစ်ခုတည်း ရှိနေခြင်းတော့ မဟုတ်ပေ။

လွန်ခဲ့သောနှစ်များက ဦးလေးအားပေါင်ပင်လျှင် ခိုးနားထောင်သည့် ရေဒီယို ရှိနေခြင်းကို သိထားခဲ့သည်။

သို့သော် ဦးလေးအားပေါင်ပင်လျှင် ခိုးနားထောင်သည့် ရေဒီယို၌ ဤကဲ့သို့သော အစွမ်းမျိုး ရှိနေကြောင်းကိုမူ မသိခဲ့ချေ။

ဤအစွမ်းကပင်လျှင် ခိုးနားထောင်သည့် ရေဒီယိုအား နံပါတ်စဉ် ၀၁၂၅၇ အဖြစ် ခိုင်မာစွာ ရပ်တည်နိုင်စေသည့် အကြောင်းအရင်း ဖြစ်သည်။

ထို့ပြင် ၎င်းသည် သူ ယာဉ်တန်းကို ဦးဆောင်ရာတွင် မည်သည့်အခါမျှ လက်ဗလာဖြင့် မပြန်ရစေသည့် အဓိက အကြောင်းအရင်းလည်း ဖြစ်၏။

ဤအစွမ်း၏ အမည်မှာ "ပဲ့တင်သံ" ဟု ခေါ်သည်။

ပဲ့တင်သံ၏ အဓိက အလုပ်လုပ်ပုံမှာ နယ်မြေတစ်ခု သို့မဟုတ် ပစ်မှတ်တစ်ခုကို သတ်မှတ်လိုက်ခြင်း ဖြစ်သည်။

ထိုအခါ ရေဒီယိုက သတ်မှတ်ထားသော နယ်မြေအတွင်း သို့မဟုတ် သတ်မှတ်ထားသော ပစ်မှတ်၏ လွန်ခဲ့သော ခြောက်လအတွင်း ပြောဆိုခဲ့သော မည်သည့်စကား၊ ထုတ်လွှင့်ခဲ့သော မည်သည့် အသံကိုမဆို ပြန်လည် ထုတ်လွှင့်ပေးခြင်း ဖြစ်သည်။

ဥပမာအားဖြင့် လွန်ခဲ့သော ငါးလခန့်က ချန်းရီသည် ချူချယ်အား "ခြေဗလာနဲ့ ထိပ်ပြောင်ကြီး" ဟု တိတ်တဆိတ် ကျိန်ဆဲခဲ့သည် ဆိုပါစို့။

ငါးလအကြာတွင် ခေါင်းဆောင်ချူက ချန်းရီကို "ပဲ့တင်သံ" ၏ ပစ်မှတ်အဖြစ် သတ်မှတ်လိုက်ပါက ချန်းရီက သူ့ကို "ခြေဗလာနဲ့ ထိပ်ပြောင်ကြီး" ဟု ကျိန်ဆဲခဲ့သည်ကို ကြားရရန် အလွန် ဖြစ်နိုင်ခြေ များသွားသည်။

ဤအစွမ်းမှာ သဘာဝ၏ စည်းမျဉ်းများကို ဆန့်ကျင်လွန်းလှသည်။

ချူချယ်က သူ၏ နေရာတွင် ဝင်ရောက် ခံစားကြည့်ဖူးသည်။ အကယ်၍ တစ်စုံတစ်ယောက်က မိမိ လွန်ခဲ့သော လအနည်းငယ်က ပြောခဲ့သည့် စကားများကို ပြန်ကြားနိုင်မည် ဆိုပါက မည်သို့ နေမည်နည်း။

ထိုကြားလိုက်ရသော စကားက "ဗိုက်ဆာပြီလား" သို့မဟုတ် "ဒီည ဘာစားကြမလဲ" ဟူသော ရိုးရှင်းသည့် စကားတစ်ခွန်းမျှသာ ဖြစ်နေစေကာမူ။

ထိုသို့ တွေးကြည့်လိုက်ရုံဖြင့်ပင် လူတစ်ယောက်၏ ကျောချမ်းသွားစေရန် လုံလောက်လှပေသည်။

သေချာသည်မှာ ခိုးနားထောင်သည့် ရေဒီယို၏ ဤအစွမ်းသည် ရာခိုင်နှုန်းပြည့် ပြီးပြည့်စုံနေခြင်းတော့ မဟုတ်ပေ။

ဤအစွမ်းတွင် သေချာပေါက် ကျပန်းဖြစ်နိုင်ခြေများ ရှိနေသည်။

ရိုးရိုးရှင်းရှင်း ပြောရလျှင် မည်သည့်အကြောင်းအရာကို ကြားရမည်ဆိုသည်မှာ ကံတရားနှင့် ရေစက်အပေါ်တွင်သာ မူတည်နေ၏။

လူတစ်ယောက်၏ တစ်နေ့တာတွင် အချိန်အများစု၌ အဓိပ္ပာယ်မရှိသော စကားများကိုသာ ပြောဆိုနေတတ်ကြသည်။

အရေးကြီးသော သတင်းအချက်အလက် ဆိုသည်မှာ စကားတစ်ခွန်း၊ နှစ်ခွန်းခန့်သာ ပါဝင်တတ်သည်။

ထို့ကြောင့် ခေါင်းဆောင်ချူသည်လည်း ထိုအချက်အလက်များကို ကြားရရန် ဖြစ်နိုင်ခြေရှိရုံ သက်သက်သာ ဖြစ်သည်။

ဥပမာအားဖြင့် ယခင်က ရုံမြို့တွင် ရှိနေစဉ်က ချူချယ်သည် ဤခိုးနားထောင်သည့် ရေဒီယိုကို အသုံးပြု၍ ဝူကျန့်ရှန်းအား သတ်မှတ်ပြီး ခိုးနားထောင်ခဲ့ဖူးသည်။

သေချာသည်မှာ မည်သည့် အနှစ်သာရရှိသော သတင်းကိုမျှ ခိုးနားထောင်၍ မရခဲ့ပေ။

အဓိက အကြောင်းအရင်းမှာ ဝူကျန့်ရှန်းက အလွန် မျိုသိပ်တတ်သူ ဖြစ်ပြီး ပုံမှန်အားဖြင့် သူ၏ စိတ်ထဲရှိ အစီအစဉ်များကို ထုတ်ပြောလေ့ မရှိခြင်းကြောင့်ပင်။

ထိုအချိန်က ချူချယ်သည် ရုံမြို့ အမှတ်(၂) မူလတန်းကျောင်းကို နယ်မြေအလိုက် "ပဲ့တင်သံ" နားထောင်ရန် သတ်မှတ်ခဲ့သည်။

ရလဒ်အနေဖြင့် ခိုးနားထောင်ရရှိခဲ့သော အသံအများစုမှာ မရဏနတ် ဂိုဏ်းဝင်များ၏ အဓိပ္ပာယ်မရှိသော စကားများသာ ဖြစ်နေခဲ့၏။

အတင်းအဖျင်း စကားများကို အများအပြား ကြားခဲ့ရသော်လည်း အရေးကြီးသော သတင်းအချက်အလက် တစ်ခုကိုမျှ မကြားခဲ့ရချေ။

အဓိကမှာ ထို မရဏနတ် ဂိုဏ်းဝင်များသည် မည်သည့်အုပ်စုဖြစ်စေကာမူ သိထားသော သတင်းများက များများစားစား မရှိကြသောကြောင့် ဖြစ်သည်။

ထို့ကြောင့် အချိန်အများစုတွင် သိပ်ပြီး အကျိုးသက်ရောက်မှု မရှိခဲ့ပေ။

နောက်ပိုင်း နတ်ဆင်ရွာသို့ ရောက်သောအခါ ချူချယ်က ရိုးရိုး ခိုးနားထောင်သည့် အစွမ်းကိုသာ အသုံးပြု၍ နတ်ဆင်ရွာ၏ "လျှို့ဝှက်ချက်ကြီး" ကို ကြားသိခဲ့ရသည်။

ထို့ကြောင့် ပဲ့တင်သံကို ထပ်မံ အသုံးပြုရန် အဓိပ္ပာယ် သိပ်မရှိတော့ပေ။

သို့သော် ထိုသို့ဖြစ်နေပါစေ ခိုးနားထောင်သည့် ရေဒီယို၏ ဤအစွမ်းမှာ လူတစ်ယောက်ကို ကျောချမ်းသွားစေရန် လုံလောက်နေဆဲပင်။

အချိန်နှင့်တစ်ပြေးညီ ခိုးနားထောင်နိုင်ခြင်းကပင် ပြဿနာ မရှိသေးပေ။

မိမိ လွန်ခဲ့သော ခြောက်လအတွင်း ပြောဆိုခဲ့သော မည်သည့်စကားကိုမဆို ပြန်လည် ခိုးနားထောင်နိုင်ခြင်းက လူတို့၏ ရင်ထဲ အနက်ရှိုင်းဆုံး နေရာမှစ၍ အေးစက်တုန်လှုပ်သွားစေရန် လုံလောက်လှသည်။

ကျပန်းဖြစ်နိုင်ခြေ အတိုင်းအတာ တစ်ခုအထိ ရှိနေသည် ဆိုသော်ငြားလည်း...

ဤအစွမ်းသည် လုံလောက်အောင် ကြောက်မက်ဖွယ် ကောင်းနေဆဲပင်။

သေချာသည်မှာ ခေါင်းဆောင်ချူ အများဆုံး အသုံးပြုသော ဤအစွမ်း၏ လုပ်ဆောင်ချက်မှာ နယ်မြေသတ်မှတ်၍ ခိုးနားထောင်ခြင်းပင် ဖြစ်သည်။

မည်သို့ပင်ဖြစ်စေ ယာဉ်တန်းထဲရှိ ကောင်များက သူ့ထံတွင် ခိုးနားထောင်သည့် ရေဒီယို ဟူသော ထူးဆန်းသည့် ပစ္စည်း ရှိနေမှန်း သိသွားပြီးနောက်ပိုင်း သူတို့ဘာသာ တစ်ယောက်တည်း စကားပြောခြင်းမျိုး အလွန် နည်းပါးသွားခဲ့ကြပြီ ဖြစ်သည်။

ထို့ကြောင့် ပဲ့တင်သံကို အသုံးပြုခြင်းမှာလည်း အလဟဿ ဖြစ်သွားစေသည်။

ယခင်က ခေါင်းဆောင်ချူသည် ဤနည်းလမ်းကို အသုံးပြု၍ သူတို့ သွားရောက်မည့် နေရာသို့ အခြားသူများ ရောက်ဖူးခြင်း ရှိမရှိကို ဆုံးဖြတ်ခဲ့သည်။

"ပဲ့တင်သံ" ကို အသုံးပြုရန် အကောင်းဆုံး အချိန်မှာ ဤကဲ့သို့သော အချိန်မျိုးပင် ဖြစ်သည်။

အစွမ်းပိုင်ရှင်ဖြစ်စေ သာမန်လူဖြစ်စေ မြို့ရွာများအတွင်းသို့ ဝင်ရောက်ကာ ရိက္ခာရှာဖွေချိန်တွင် များသောအားဖြင့် အပိုစကား ပြောလေ့မရှိဘဲ ပြောဆိုသမျှ စကားအများစုမှာ ရိက္ခာများနှင့်သာ သက်ဆိုင်နေတတ်သည်။

"ပဲ့တင်သံ" ဖြင့် ကြုံသလို တစ်ခွန်းနှစ်ခွန်းခန့် ကြားရရုံဖြင့်ပင် အခြေအနေ အကြမ်းဖျင်းကို ခန့်မှန်းနိုင်ပေသည်။

ထို့ကြောင့် ဤကဲ့သို့သော အခြေအနေမျိုးတွင် "ပဲ့တင်သံ" ကို အသုံးပြုခြင်းက အထူး အကျိုးသက်ရောက်မှု ရှိလှသည်။

သေချာသည်မှာ ချူချယ်သည် ဤနည်းလမ်းက ရာခိုင်နှုန်းပြည့် ယုံကြည်စိတ်ချရသည် မဟုတ်ကြောင်းကိုလည်း သိထား၏။

တစ်နေ့နေ့တွင် အလုပ်မဖြစ်တော့မည့် အချိန် ရောက်လာမည်ကိုလည်း သူ သိထားသည်။

သို့သော် ထိုနေ့သည် ယနေ့ဖြစ်နေလိမ့်မည်ဟုတော့ သူ လုံးဝ မထင်မှတ်ထားခဲ့ပေ။

ဤတစ်ကြိမ်တွင် ခေါင်းဆောင်ချူက ရှီးနင်မြို့နယ်ကို "ပဲ့တင်သံ" ၏ နယ်မြေအဖြစ် သတ်မှတ်ခဲ့သည်။

အကြိမ်ပေါင်းများစွာ အဖန်ဖန် အထပ်ထပ် စမ်းသပ်ကြည့်ခဲ့၏။

သို့သော် လွန်ခဲ့သော ခြောက်လအတွင်း မည်သည့် သက်ရှိလူသား၏ အသံကိုမျှ ခေါင်းဆောင်ချူ မကြားခဲ့ရချေ။

ထူးဆန်းသည့် အရာများ၏ ရူးသွပ်ခြောက်ခြားဖွယ် ကယောင်ကတမ်း အသံများကိုသာ ကြားခဲ့ရသည်။

ထို့ကြောင့် ခေါင်းဆောင်ချူက ရှီးနင်မြို့နယ်သို့ လွန်ခဲ့သော ခြောက်လအတွင်း မည်သူမျှ ရောက်မလာခဲ့ဖူးဟု ကောက်ချက်ချခဲ့ခြင်း ဖြစ်သည်။

ရလဒ်အနေဖြင့် ယာဉ်တန်းသည် လက်ဗလာဖြင့် ပြန်လာခဲ့ရလေသည်။

ယခင်က "သုံးရက်ပြီး သုံးရက်" ဆက်တိုက် နှောင့်နှေးခဲ့မှုများကြောင့်။

ယာဉ်တန်း၏ ရိက္ခာများမှာ အရေးပေါ် အခြေအနေသို့ ဆိုက်ရောက်နေပြီ ဖြစ်သည်။

ဤတစ်ကြိမ် လက်ဗလာဖြင့် ပြန်လာခဲ့ရခြင်းက ယာဉ်တန်းအတွက် သေရေးရှင်ရေး တိုက်ခိုက်မှု တစ်ခု ဖြစ်လာရန် လုံလောက်နေသည်။

တစ်ခါတစ်ရံ ဤတစ်ကြိမ်တွင် အစွမ်းပိုင်ရှင်များမှလွဲ၍ ကျန်ရှိနေသော အသက်ရှင်ကျန်ရစ်သူ အားလုံး အငတ်ဘေးဖြင့် သေဆုံးသွားနိုင်ပေသည်။

အမှားအယွင်း ဖြစ်လာမည့် တစ်နေ့ ရှိလာမည်ကို သူ ကြိုတင် တွေးထားခဲ့ပြီး ဖြစ်သည်။

သို့သော် ထိုနေ့သည် ယနေ့ဖြစ်လာလိမ့်မည်ဟု လုံးဝ မထင်မှတ်ထားခဲ့ပေ။

ရှီးနင်မြို့နယ်သို့ အခြားယာဉ်တန်းများ သေချာပေါက် ရောက်လာခဲ့ဖူးသည်။

တစ်ကြိမ်ထက်မက ရောက်လာခဲ့ခြင်းပင် ဖြစ်နိုင်၏။

သို့တည်းမဟုတ် ယာဉ်တန်းတစ်ခုထက် ပို၍ ရောက်လာခဲ့ခြင်းလည်း ဖြစ်နိုင်သည်။

သူက အခြားနေရာများ အန္တရာယ်များကြောင်း အာရုံခံသိရှိနိုင်သကဲ့သို့။

အခြားယာဉ်တန်းများမှ လမ်းပြသူများကလည်း အာရုံခံသိရှိနိုင်ပေသည်။

ဤနယ်မြေတစ်ဝိုက်တွင် ရိက္ခာရှာဖွေလိုပါက လမ်းပြသူ အများစုသည် အန္တရာယ် နှိုင်းယှဉ်ချက်အရ ပိုမိုနည်းပါးသော ရှီးနင်မြို့နယ်ကိုသာ ရွေးချယ်ကြမည်မှာ အသေအချာပင်။

ကမ္ဘာပျက်ကပ်ကြီး စတင်ခဲ့သည်မှာ ယခုဆိုလျှင် တစ်နှစ်နီးပါးခန့် ရှိနေပြီ ဖြစ်သည်။

လွန်ခဲ့သော ခြောက်လက ဤနေရာကို ယာဉ်တန်းများ ဖြတ်သန်းသွားခဲ့ခြင်းမှာ မဖြစ်နိုင်သော ကိစ္စတော့ မဟုတ်ပေ။

တိုက်ဆိုင်လွန်းလှသည်မှာ လွန်ခဲ့သော ခြောက်လအတွင်း မည်သည့်ယာဉ်တန်းမှ ရောက်မလာခဲ့ခြင်းပင် ဖြစ်သည်။

သို့မဟုတ်ပါက ခေါင်းဆောင်ချူက "ပဲ့တင်သံ" ဖြင့် စကားတစ်ခွန်းတစ်ပါဒမျှ ခိုးနားထောင်မိလျှင် ယနေ့ ဤမျှလောက် ကြီးမားသော အမှားမျိုးကို ကျူးလွန်မိမည် မဟုတ်ပေ။

"နောက်ထပ် စမ်းကြည့်လို့ရမယ့် နည်းလမ်းတစ်ခု ရှိသေးတယ်... "

ချန်းရီ၏ သွေးရောင်မျက်လုံးများက အရောင်လက်သွားသည်။

ချန်းရီသည် ယခုလို အချိန်မျိုးတွင် စကားကို ထိမ်ချန်ထားရလောက်အောင် မိုက်မဲသူ မဟုတ်သဖြင့် သူ၏ အတွေးကို တိုက်ရိုက် ထုတ်ပြောလိုက်သည်။

နာရီဝက်အချိန်အတွင်း မိနစ်အတော်များများ ကုန်လွန်သွားခဲ့ပြီ ဖြစ်သည်။

"ငါတို့ လူနေတိုက်ခန်းတွေဘက် သွားကြည့်ရင် ကောင်းမယ်... သာမန်အိမ်တွေမှာလည်း အနည်းနဲ့အများတော့ ရိက္ခာ အနည်းအကျဉ်း ရှိတတ်ကြတယ်"

"စူပါမားကတ်တွေ... ဟိုတယ်ဂိုဒေါင်တွေလောက် မများရင်တောင်မှ လုံးဝမရှိတာထက်တော့ ပိုကောင်းတာပေါ့"

ချန်းရီက သူ၏ အကြံအစည်ကို လျင်မြန်စွာ ပြောပြလိုက်သည်။

ကမ္ဘာပျက်ကပ် မတိုင်မီက လူ့အဖွဲ့အစည်းသည် ရိက္ခာပစ္စည်းများ အလွန်အမင်း ပေါကြွယ်ဝသော ခေတ်ကာလ တစ်ခု ဖြစ်ခဲ့သည်။

အိမ်အောက်ထပ်တွင် စူပါမားကတ်များ ရှိပြီး ဖုန်းထဲတွင် ငွေရှိနေသရွေ့ အချိန်မရွေး နေရာမရွေး အစားအသောက်များ ရရှိနိုင်ပေသည်။

ထို့ကြောင့် လူအများစုမှာ အိမ်တွင် ရိက္ခာများ သိုလှောင်ထားလေ့ မရှိကြပေ။

သို့သော် လုံးဝ မရှိသည်တော့ မဟုတ်ချေ။

ဥပမာအားဖြင့် အချို့သူများသည် အိမ်တွင် ကိုယ်တိုင် ဟင်းချက်စားရသည်ကို နှစ်သက်ကြပြီး ဆန်ဝယ်တိုင်း တစ်အိတ်လုံး ဝယ်၍ အိမ်သို့ ထမ်းပြန်တတ်ကြသည်။

အချို့သူများကမူ ဟင်းချက်ရန် ပျင်းရိသဖြင့် ခေါက်ဆွဲခြောက် တစ်ဖာ၊ ကြက်ဥပြုတ်များနှင့် ဝက်အူချောင်းများကို ဝယ်ယူ၍ အိမ်တွင် ပစ်ထားတတ်ကြသည်။

အချို့သူများကမူ စိတ်ကူးပေါက်၍ အိမ်တွင် ကိတ်မုန့် ဖုတ်ရန် ရည်ရွယ်ကာ ကုန်ကြမ်းပစ္စည်းများကို အများအပြား ဝယ်ယူထားတတ်ကြသည်။ ထို့နောက် တစ်ကြိမ်သာ ဖုတ်ပြီး ကျန်ရှိနေသော ပစ္စည်းများကို မေ့ထားတတ်ကြကာ ပျက်စီးသွားချိန်မှသာ အိမ်တွင် ထိုပစ္စည်းများ ရှိနေသေးကြောင်း သတိရတတ်ကြသည်။

ဤကဲ့သို့သော အဖြစ်အပျက်မျိုးမှာ အလွန် များပြားလှသည်။

ယခင်က လူတိုင်း ဤအချက်ကို မတွေးမိခဲ့ကြခြင်းတော့ မဟုတ်ပေ။ သို့သော် အိမ်တစ်အိမ်ချင်းစီ လိုက်လံ၍ ရိက္ခာရှာဖွေခြင်းမှာ အမှန်တကယ်ပင် အချိန်နှင့် လုပ်အား တန်ကြေး မကိုက်ညီလှချေ။

ရိက္ခာရှာဖွေသည့် အကြိမ်တိုင်းမှာ အလွန် အန္တရာယ်များသော လုပ်ရပ် တစ်ခု ဖြစ်သည်။

ပထမအချက်အနေဖြင့် ထိုသို့ လုပ်ဆောင်ခြင်းက ဆူညံသံများ ကြီးမားစွာ ထွက်ပေါ်စေပြီး ထူးဆန်းသည့် အရာများကို ဆွဲဆောင်မိရန် အလွန် လွယ်ကူသည်။

ဒုတိယအချက်မှာ ရိက္ခာရှာဖွေသည့် အကြိမ်တိုင်းသည် အချိန်နှင့် အပြိုင် လုရခြင်း ဖြစ်သဖြင့် တစ်နေရာတည်းတွင် စုစည်း၍ ရိက္ခာရှာဖွေနိုင်ခြင်းက သေချာပေါက် အကောင်းဆုံး ဖြစ်သည်။

ဤသည်ကပင် လူတိုင်းက စူပါမားကတ်များ သို့မဟုတ် ဆန်နှင့် ဆီအရောင်းဆိုင်များကဲ့သို့သော နေရာများကို အဘယ်ကြောင့် နှစ်သက်ကြသလဲ ဆိုသည့် အကြောင်းအရင်းပင်။

ရိက္ခာများ စုစည်းနေခြင်း။ အချိန်ကုန် သက်သာခြင်း။

ယခုအချိန်တွင်မူ ချန်းရီ၏ ဤနည်းလမ်းသည် အခြား ရွေးချယ်စရာ မရှိတော့သည့်အဆုံး အသုံးပြုရမည့် နည်းလမ်း တစ်ခု ဖြစ်လာခဲ့ပြီ။

ချန်းရီ၏ စကားအဆုံးတွင်။

ထယ်ရှီးက မျောက်ဝံကြီး တစ်ကောင်အလား မြို့နယ်အဝင်ဝနှင့် အနီးဆုံး လူနေတိုက်ခန်း တစ်ခုဆီသို့ ပြေးဝင်သွားသည်ကို တွေ့လိုက်ရသည်။

ထယ်ရှီးသည် မျောက်လွှဲကျော် တစ်ကောင်ကဲ့သို့ ပေါ့ပါးစွာ ခုန်တက်လိုက်ပြီး သူခိုးကာ သံပန်းတံခါးကို စက္ကူတစ်ရွက်ကို ဆုတ်ဖြဲလိုက်သကဲ့သို့ အလွယ်တကူ ဆွဲဖြဲလိုက်ကာ ဒုတိယထပ်ရှိ အခန်းအတွင်းသို့ တဟုန်ထိုး ဝင်ရောက်သွားလေသည်။

ထို့နောက် ဗီရိုများ၊ သေတ္တာများကို မွှေနှောက် ရှာဖွေနေသော အသံများ ဆက်တိုက် ထွက်ပေါ်လာသည်။

မကြာမီမှာပင် ထယ်ရှီးသည် ဆန်တစ်ပြည်ကျော်ခန့် ပါသော အိတ်တစ်လုံးကို ဆွဲလျက် ထွက်ပေါ်လာပြီး သူ၏ ရိုးအသော မျက်နှာပေါ်တွင် အပြုံးများဖြင့် ပြည့်နှက်နေသည်။

လူတိုင်း၏ မျက်နှာပေါ်တွင်လည်း အလွန် ဝမ်းသာသွားကြသော်လည်း ထိုဆန်တစ်ပြည်ကျော်ခန့်ကို မြင်လိုက်ရသောအခါ သူတို့၏ မျက်နှာအမူအရာများ ခေတ္တမျှ တောင့်တင်းသွားကြသည်။

ဤဆန်အိတ်မှာ သက်တမ်းကုန်နေပြီလား၊ အရည်အသွေး ပျက်ယွင်းနေပြီလား ဆိုသည့် ပြဿနာကို ခဏထားလိုက်ဦး။

၎င်းသည် စူပါမားကတ်မှ ဝယ်ယူထားသော အိတ်သွတ်ဆန်မျိုး ဖြစ်ဟန်တူပြီး တစ်အိတ်လုံးမှ နှစ်ပြည်ခွဲခန့်သာ ရှိပေလိမ့်မည်။

ထိုအထဲမှ တစ်ဝက်ဆိုလျှင် တစ်ပြည်ကျော်ခန့်သာ ရှိမည် ဖြစ်သည်။

ထယ်ရှီး အသုံးပြုလိုက်ရသော အချိန်နှင့် တွက်ကြည့်ပါက လုံးဝ တန်ကြေးမကိုက်ညီလှပေ။

ဤကဲ့သို့ ရိက္ခာရှာဖွေခြင်းက အကျိုးသက်ရောက်မှု အလွန် နည်းပါးလွန်းလှသည်။

"အခု အများကြီး စဉ်းစားနေလို့ မရတော့ဘူး... ကျွန်မတို့ အစွမ်းပိုင်ရှင်တွေ ခပ်မြန်မြန်လေး လှုပ်ရှားကြတာပေါ့... လုံးဝ မရှိတာထက်တော့ ပိုကောင်းပါတယ်"

"အားလုံး မြန်မြန် လှုပ်ရှားကြ"

ပန်းရောင်ဆံပင်နှင့် ကောင်မလေးက သူမ၏ လက်ချောင်းများဖြင့် ဓားသိုင်းမန္တန်ကို ဖန်ဆင်းလိုက်ပြီး သူမ၏ တစ်ကိုယ်လုံးသည် ဓားနတ်ဘုရား တစ်ပါးအလား လူနေတိုက်ခန်းဆီသို့ တဟုန်ထိုး ပျံသန်းသွားလေသည်။

လူတိုင်း၏ လှုပ်ရှားမှုများက အလွန် မြန်ဆန်လှသည်။

သို့သော် ဤကဲ့သို့ လုပ်ဆောင်နိုင်စွမ်း ရှိသူမှာ ခေါင်းဆောင်ချူကိုပါ ထည့်တွက်လိုက်လျှင်ပင် အများဆုံး ငါးယောက်ခန့်သာ ရှိပေသည်။

ပြဿနာကတော့ အပြည့်အဝ ဖြေရှင်းနိုင်ခြင်း မရှိသေးပေ။

ဆက်ရန်...

နောက်အပိုင်းတွေမှာတော့... ဒီမြို့ထဲက ရိက္ခာတွေ ဘာလို့ဗလာကျင်းနေတာလဲ၊ မြို့ကိုရောက်ရောက်ချင်း ပျောက်သွားတဲ့ အရိပ်က ဘာဖြစ်နိုင်မလဲ၊ မြို့ထဲမှာ ဘယ်လို လျှို့ဝှက်ချက်တွေများ ရှိနေနိုင်မလဲ၊ ဘယ်လိုအန္တရာယ်တွေရောရှိနေမလဲ၊ ချန်းရီရဲ့ ပစ်ကပ်ကားကရော အဆင့်မြှင့်လို့ပြီးသွားရင် ဘယ်လိုအစွမ်းတွေ ရလာမလဲ၊ မီးခိုးတမန်တော်လမ်းစဉ် အဆင့် (၃) လမ်းစဉ်အခွဲရဲ့ မသိရသေးတဲ့ တတိယလမ်းစဉ်ကရော ဘာဖြစ်နိုင်မလဲ၊ ရှေ့ဆက်သူတို့ ဘယ်လိုထူးဆန်းပြီး အံ့သြစရာတွေ ကြုံရဦးမလဲ စတာတွေကို ဆက်ပြီးစောင့်မျှော်ဖတ်ရှုကြပါဦးနော်။အပိုင်း