အခန်း ၁၉၈၂

အခန်း(၁၉၈၂) သုံးရက်ကုန်ပြီးနောက် တိုက်ပွဲကြီးတစ်ပွဲ

၎င်းမှာ ချူးယွင်ဖန်းက သူ၏ ကိုယ်ပိုင်နတ်စွမ်းအားဖြင့် ပေါင်းစည်းဖန်တီးထားသော ကျမ်းစာတစ်ခု ဖြစ်သည်။ မင်းသမီး ယွင်ယန်၏ ခန္ဓာကိုယ်ထဲသို့ ဝင်ရောက်သွားပြီးနောက် ၎င်းသည် အစအနပင်မကျန် ပျောက်ကွယ်သွားသော်လည်း သူမ၏ စိတ်အာရုံထဲတွင်မူ ရွှေရောင်စာလုံးများဖြင့် ရေးထွင်းထားသော ကျမ်းစာတစ်စောင် ပေါ်ထွက်လာခဲ့သည်။

အနုစိတ်ခြေလှမ်းများ

မူလက မင်းသမီး ယွင်ယန်က မိမိမှာ တရှ တော်ဝင်မိသားစုမှဖြစ်၍ ဤ အနုစိတ်ခြေလှမ်းများ ကို အထူးတလည် ဂရုမထားခဲ့ပေ။ တရှပြည်ထောင်၏ အင်အားအကြီးဆုံး ဂိုဏ်းကြီး (၁၀) ဂိုဏ်းသည် လောကတွင် အစွမ်းအကြီးဆုံးဟု ထင်ရသော်လည်း၊ အစစ်အမှန် ပညာရှင်များကမူ လောကတွင် အင်အားအကြီးဆုံးအဖွဲ့အစည်းမှာ တရှတော်ဝင်မိသားစုသာဖြစ်ကြောင်း သိရှိကြသည်။

အခြားဂိုဏ်းများသည် မိသားစုတစ်ခု သို့မဟုတ် လူတစ်စုက တည်ထောင်ထားခြင်း ဖြစ်သော်လည်း တရှကမူ မတူပေ။ ၎င်းသည် ကျွမ်းကျင်သူများစွာကို ဦးဆောင်သော အစစ်အမှန် ခေါင်းဆောင်ဖြစ်သည်။ အင်ပါယာ စတင်အာဏာရလာသည့် နေ့မှစ၍ စစ်ပွဲပေါင်းများစွာ တိုက်ခိုက်ခဲ့ကာ အင်အားကြီးရန်သူပေါင်းများစွာကို ချေမှုန်းခဲ့သည်။ ရှားပါးလှသော ကျင့်စဉ်အမွေအနှစ် အမြောက်အမြားကိုလည်း တော်ဝင်မိသားစုတွင် ထိန်းသိမ်းထားရှိသည်။

ထို့ကြောင့်ပင် တော်ဝင်မိသားစုတွင် ရေတွက်မကုန်နိုင်သော ပညာရှင်များအပြင် သစ္စာရှိသော အမတ်များနှင့် စစ်တပ်အတွင်းမှ ထိပ်တန်းစစ်သည်များကို မွေးထုတ်ပေးနိုင်ခြင်း ဖြစ်သည်။ အခြေခံအုတ်မြစ်ပိုင်းတွင် တရှတော်ဝင်မိသားစုသည် ကမ္ဘာပေါ်တွင် နံပါတ်တစ် ဖြစ်သည်မှာ သံသယဖြစ်ဖွယ် မရှိပေ။ မဟုတ်လျှင် ဂိုဏ်းကြီး (၁၀) ဂိုဏ်းသည် တရှ၏ အုပ်ချုပ်မှုအောက်တွင် ဤမျှ ငြိမ်ဝပ်ပုပြားနေကြမည် မဟုတ်ပေ။ သူတို့အားလုံးက သစ္စာရှိလွန်း၍ ပုန်ကန်မည့်သူ တစ်ယောက်မှ မရှိခြင်းကြောင့်ဖြစ်နိုင်သလော။

၎င်းက မဖြစ်နိုင်သည်မှာ သေချာသည်။ အဓိက အကြောင်းရင်းမှာ တော်ဝင်မိသားစုနှင့် တရှနန်းတော်၏ အင်အားသည် ရန်သူအားလုံးကို ဖိနှိပ်ထားနိုင်လောက်အောင် တောင့်တင်းခိုင်မာသောကြောင့်ပင် ဖြစ်သည်။

ဤကဲ့သို့သော မိသားစုတွင် မွေးဖွားလာသူဖြစ်၍ မင်းသမီး ယွင်ယန်က သိုင်းပညာပေါင်းစုံကို သင်ယူခဲ့ဖူးသည်။ သူမ သင်ယူခဲ့သော မည်သည့်ပညာမဆို လောကရှိ လူပေါင်းများစွာက လုယူလိုကြမည့် အဖိုးတန်ပညာများ ဖြစ်သည်။

သူမသည် ဘုရင်အဆင့် သိုင်းပညာများစွာကိုပါ တတ်မြောက်ထားသည်။ ဘုရင်အဆင့် သိုင်းပညာဟူသည်မှာ ဘုရင်အဆင့် ပညာရှင်ကြီးများက ဖန်တီးခဲ့ခြင်း ဖြစ်ကြောင်း သိထားရမည်။ ထိုပညာရပ်တစ်ခုတည်းဖြင့်ပင် ဂိုဏ်းကြီး (၁၀) ဂိုဏ်းထဲမှ ကြယ်ကြွေကောင်းကင်ဂိုဏ်းကဲ့သို့သော ဂိုဏ်းကြီးတစ်ခု၏ ဌာနခွဲတစ်ခုကို တည်ထောင်နိုင်သည်။ သာမန် ဂိုဏ်းငယ်လေးတစ်ခုသာ ဆိုလျှင်လည်း ပထမတန်းစား အင်အားစုများထဲသို့ တိုးဝင်လာနိုင်စေသည်။

ထို့အပြင် သူမသည် ထိုကဲ့သို့သော ပညာရပ်များကို အတွေ့အကြုံများစွာ ရှိခဲ့ပြီးဖြစ်သည်။ တော်ဝင်မိသားစုအတွင်းမှ ပညာရှင်များ ပိုင်ဆိုင်ထားသော ရှေးဟောင်း သိုင်းပညာရပ်များမှာ ပြင်ပလူများ စိတ်ကူးကြည့်၍ရနိုင်သော အရာမျိုး မဟုတ်ပေ။

သို့သော်လည်း မင်းသမီးက အနုစိတ်ခြေလှမ်းများ ကို လေ့လာဆန်းစစ်ပြီးချိန်တွင်မူ မှင်တက်သွားခဲ့ရသည်။ ၎င်းမှာ ဘုရင်အဆင့် သိုင်းပညာဖြစ်သည့်အပြင် အကောင်းဆုံးထဲမှ အကောင်းဆုံးပင် ဖြစ်သည်။ သူမသည် လှုပ်ရှားမှုပညာပေါင်းများစွာကို တွေ့မြင်ဖူးပြီး သူမကိုယ်တိုင်လည်း ဘုရင်အဆင့် လှုပ်ရှားမှုပညာတစ်ခုကို တတ်မြောက်ထားသည်။ သို့သော် ချူးယွင်ဖန်းပေးလာသည့် အနုစိတ်ခြေလှမ်းများ နှင့် နှိုင်းယှဉ်လျှင် သူမ ယခင်က တတ်မြောက်ထားသော ပညာမှာ အဆင့်အတန်းချင်း သိသိသာသာ ကွာခြားနေသည်။

ဤကဲ့သို့သော သိုင်းပညာ၏ တန်ဖိုးမှာ တိုင်းတာ၍ မရနိုင်ပေ။ ၎င်းသည် သူမအတွက် အလွန်ပင် အကျိုးရှိလှသော်လည်း၊ ချူးယွင်ဖန်း၏ အရေးမစိုက်သော အမူအရာကို ကြည့်ခြင်းအားဖြင့် ဤမျှ အစွမ်းထက်သော ပညာရပ်အပေါ် များစွာ တန်ဖိုးထားပုံမရသည်မှာ ထင်ရှားနေသည်။

ထိုအခါမှသာ မင်းသမီးယွင်ယန်က သူမ ချူးယွင်ဖန်းကို အထင်သေးခဲ့မိမှန်း သိလိုက်ရတော့သည်။ သူ၏ နောက်ကွယ်ရှိ လျှို့ဝှက်ချက်များသည် သူမ စိတ်ကူးထားသည်ထက် များစွာ ကျော်လွန်နေသည်။

"ဒီလက်ဆောင်က အရမ်း အဖိုးတန်လွန်းပါတယ်" မင်းသမီးက ပြောလိုက်သည်။

"ဒါက ကျွန်တော့်အတွက် ဘာမှမဟုတ်ပါဘူး။ ဒါ့အပြင် မင်းသမီးကလည်း ကျွန်တော့်ကို ကူညီခဲ့တာပဲ။ မင်းသမီးဘက်က အသေးအမွှားလို့ ထင်ရပေမဲ့ ကျွန်တော့်အတွက်တော့ အများကြီး အထောက်အကူ ဖြစ်စေပါတယ်" ချူးယွင်ဖန်းက ပြန်လည် ဖြေကြားခဲ့သည်။

မင်းသမီးယွင်ယန်က ခဏမျှ စဉ်းစားလိုက်ပြီးမှ ပြန်ဖြေလိုက်သည်။

"အဲ့ဒီလိုဆိုရင်လည်း ကျွန်မ ငြင်းမနေတော့ပါဘူး။ ဒါပေမဲ့ ရှင့်မှာ အချိန်အများကြီး မကျန်တော့ဘူးနော်။ ကမ္ဘာအနှံ့က ပညာရှင်တွေ တစ်စစနဲ့ ရောက်လာနေကြပြီ။ အချိန်ကြာလေလေ ရှင်ရင်ဆိုင်ရမယ့် အခြေအနေက ပိုဆိုးလေလေပဲ ဖြစ်လိမ့်မယ်"

"ရပါတယ်။ သူတို့က လူပြက်တစ်သိုက်ပါပဲ။ ခဏတဖြုတ်တော့ ကခုန်ခွင့် ပေးထားလိုက်ပါဦးမယ်" ချူးယွင်ဖန်းက အေးစက်စွာ ပြုံးလိုက်ရာ သူ၏ မျက်ဝန်းထဲမှ အအေးဓာတ်မှာ ပိုမို ပြင်းထန်လာသည်။

"ဒါဆို ကျွန်မ ပြန်ခွင့်ပြုပါဦး"

မင်းသမီး ယွင်ယန်က အနုစိတ်ခြေလှမ်းများ ကို လေ့လာရန် မအောင့်နိုင်အောင် ဖြစ်နေပြီဖြစ်၏။ ၎င်းသည် သူမ၏ ကျင့်ကြံမှုအဆင့်ကို တိုက်ရိုက် မတိုးတက်စေသော်လည်း သူမ၏ တိုက်ခိုက်ရေးစွမ်းရည်ကိုမူ အဆမတန် မြင့်တက်စေမည်မှာ သေချာသည်။ ဤလှုပ်ရှားမှုပညာကို တတ်မြောက်သွားပါက သူမသည် အရှုံးမရှိသော အခြေအနေသို့ ရောက်ရှိသွားမည် ဖြစ်သည်။

မင်းသမီးယွင်ယန် ထွက်ခွာသွားသည်ကို ကြည့်ပြီးနောက် ချူးယွင်ဖန်းက တောင်မြစ်ပန်းချီကားသို့ ဝင်ကာ တောင်မြစ်ဆေးအိုးကြီးကို ထုတ်ယူလျက် သူ၏အကျွမ်းကျင်ဆုံးသော အလုပ်ဖြစ်သည့် ဆေးဖော်စပ်ခြင်း ကို စတင်လေသည်။

မင်းသမီးကို ဆေးပင်များ ရှာခိုင်းရခြင်းမှာ သူ၏ ဝှက်ဖဲတစ်ခုအဖြစ် အသုံးပြုရန် ဖြစ်သည်။ သူသည် သတ္တိရှိ၍ ရဲတင်းပုံရသော်လည်း မည်သည့် ပြင်ဆင်မှုမျှ မရှိဘဲ တိုက်ခိုက်မည့်သူမျိုး မဟုတ်ပေ။ အချိန်အများစုတွင် သူ မည်သည့်အရာများဖြစ်လာမည်ကို ကြိုတင်ခန့်မှန်းထားတတ်သည်။ တစ်စုံတစ်ဦးကို သတ်ရန် ဝံ့ရဲသည်ဆိုကတည်းက ၎င်း၏ အကျိုးဆက်ကိုလည်း ကြိုတင်တွေးတောပြီးသား ဖြစ်သည်။ နောက်ဆုံးမိနစ်ကျမှ ပျာယာခတ်တတ်သူ မဟုတ်ပေ။

အကယ်၍ ကြယ်ကြွေကောင်းကင်ဂိုဏ်းမှ တပည့်များသာ လှုပ်ရှားခဲ့လျှင် ထိုရန်သူအင်အားစုများက အလွယ်တကူ လွှတ်ပေးမည် မဟုတ်ပေ။ သို့သော် မင်းသမီးမှာမူ တစ်ခုခု မှားနေသည်ဟု ခံစားရလျှင်ပင် သူမကို တားဆီးရန် မဝံ့ရဲကြချေ။ အကြောင်းမှာ နတ်အင်မော်တယ်တောင်ကြားမှ လူမှာ တော်ဝင်မိသားစုမှ မင်းသမီးကြီး ဖြစ်ကြောင်း လူတိုင်းသိထားကြသဖြင့် သူမ၏ လှုပ်ရှားမှုကို ဝင်ရောက် စွက်ဖက်မည် မဟုတ်သောကြောင့်ပင်။

"မင်းတို့အားလုံး ငါ့ကို သတ်ချင်ကြတာလား။ ဒါဆိုလည်း မင်းတို့မှာ အဲ့ဒီလောက် အရည်အချင်း ရှိမရှိ ကြည့်ရသေးတာပေါ့" ချူးယွင်ဖန်းက လှောင်ပြုံး ပြုံးလိုက်သည်။

လက်ရှိ သူ၏ ကျင့်ကြံမှုမှာ ဖန်ဆင်းရှင် ဒုတိယအဆင့်၌ ရှိနေသည်။ တိုက်ခိုက်ရေး စွမ်းရည်အရမူ သာမန် ဖန်ဆင်းရှင် ဆဠမအဆင့် များပင်လျှင် သူ့ကို ယှဉ်နိုင်မည် မဟုတ်ပေ။ ဖန်ဆင်းရှင် သတ္တမအဆင့်နှင့် ဆုံတွေ့လျှင်ပင် သူ ကြောက်ရွံ့နေမည် မဟုတ်ချေ။

သူသည် နဂါးကျားအားတိုးဆေးဟု ခေါ်သော ဆေးလုံးကို ဖော်စပ်ရန် ပြင်ဆင်နေသည်။ ဖန်ဆင်းရှင်အဆင့် ပညာရှင်တစ်ဦးပင်လျှင် ဤဆေးလုံးကို သုံးခြင်းဖြင့် တိုတောင်းသော အချိန်အတွင်း ကျင့်ကြံမှုကို အကြီးအကျယ် တိုးတက်စေနိုင်သည်။ သို့သော် ရွှေခြောက်စင်းဆေးလုံးနှင့်နှိုင်းယှဉ်လျှင် ဆေးအာနိသင်မှာ ထိုမျှအထိ ပြင်းထန်ပြီး ထိတ်လန့်စရာ မကောင်းပေ။

အာနိသင်ချင်း မယှဉ်နိုင်သော်လည်း ချူးယွင်ဖန်းအတွက် လက်ရှိတွင် ဤဆေးလုံးသာ လိုအပ်သည်။ သူ့တွင် ရွှေခြောက်စင်းဆေးများ မကျန်တော့သဖြင့် အခြားတစ်လုံး ထပ်မံ မဖော်စပ်နိုင်သရွေ့ သူ၏ ယခင်နည်းလမ်းကို သုံး၍မရနိုင်တော့ပေ။ သို့သော် ထိုဆေးကို ဖော်စပ်ရန် လိုအပ်သော အဖိုးတန်ဆေးပင်များကို စဉ်းစားလိုက်ရုံနှင့်ပင် ချူးယွင်ဖန်း၏ ဘဏ္ဍာရေးအခြေအနေ ပျက်ပြားသွားနိုင်သဖြင့် ၎င်းမှာ မဖြစ်နိုင်သော အရာပင်ဖြစ်လာ၏။

အချိန်သည် မျက်စိတစ်မှိတ်အတွင်း ကုန်ဆုံးသွားခဲ့သည်။ သုံးရက်မြောက်သို့ ရောက်ရှိလာပြီ ဖြစ်သည်။ အရှေ့ပင်လယ်ပြင်ထက်တွင် ပေပေါင်းသောင်းချီ မြင့်မားသော လှိုင်းလုံးကြီးများ ကောင်းကင်သို့ ရိုက်ခတ်နေပြီး ပင်လယ်လေများ တဝေါဝေါ တိုက်ခတ်နေသည်။ အာကာသ အလွှာအထပ်ထပ်ကြားတွင် နတ်အင်မော်တယ်တော်တန်း သည် နတ်ဘုံနတ်နန်းကဲ့သို့ တည်ရှိနေပြီး ဖြတ်သန်းသွားလာသူ အပေါင်း၏ အာရုံကို ဖမ်းစားထားသည်။

သို့သော် ယခုအကြိမ်တွင်မူ ဟင်းလင်းပြင်အတွင်းမှ ရေတွက်မကုန်နိုင်သော အကြည့်များသည် တစ်စုံတစ်ခုကို မျှော်လင့်နေသကဲ့သို့ နတ်အင်မော်တယ်တောင်တန်းကိုစိုက်ကြည့်နေကြသည်။ ရုတ်တရက် လူတိုင်း၏ မျှော်လင့်ချက်အတိုင်း လူရိပ်တစ်ခုသည် တောင်ပေါ်မှ လှမ်းထွက်လာခဲ့သည်။

"ချူးယွင်ဖန်း နောက်ဆုံးတော့ ထွက်လာပြီဟေ့"

တစ်စုံတစ်ယောက်က အော်ဟစ်လိုက်ရာ လူတိုင်း၏ အာရုံသည် ချက်ချင်း ထိုနေရာသို့ ရောက်ရှိသွားတော့သည်။

အားလုံးက သူ့ကို ဝိုင်း၍ စိုက်ကြည့်နေကြသည်။

ချူးယွင်ဖန်းမှတပါး အခြား မည်သူ ရှိနိုင်ဦးမည်နည်း။

--