အခန်း ၁၇၁

အခန်း (၁၇၁)

ဓားဆန္ဒပြည့်စုံခြင်းနှင့် ကောင်းကင်မဟာမိတ်အဖွဲ့မှ သူတော်စင်များ အကြပ်အတည်းဆိုက်ခြင်း

"မင်းရဲ့အသက်က ဘယ်လောက်တန်ဖိုးရှိတယ်လို့ မင်းထင်လဲ" ချင်လော့က စုမုကို နောက်ပြောင်ကျီစယ်သော အကြည့်ဖြင့် မေးလိုက်သည်။

ယခုအချိန်တွင် သူသည် စိတ်အခြေအနေ အလွန်ကောင်းမွန်နေသည်။ ယခုတစ်ကြိမ် ချူဖုန်းကို သတ်ဖြတ်ခြင်းမှ သူရရှိခဲ့သော ဆုလာဘ်များမှာ သူမျှော်လင့်ထားသည်ထက် များစွာကျော်လွန်နေသောကြောင့် စုမုကို အခွင့်အရေးအနည်းငယ် ပေးရန် သူ ဆုံးဖြတ်လိုက်ခြင်း ဖြစ်သည်။

[စနစ်အကြောင်းကြားချက်]

[ကံကြမ္မာသားတော် ချူဖုန်းကို အောင်မြင်စွာ သတ်ဖြတ်နိုင်ခဲ့သဖြင့် ကံကြမ္မာအရှိန်အဝါ အားလုံးကို ရရှိပြီး ဗီလိန်မှတ်များအဖြစ် အလိုအလျောက် ပြောင်းလဲပြီးဖြစ်ပါသည်။]

[ရရှိသောဆုလာဘ် - ပြည့်စုံခြင်းအဆင့် ဓားဆန္ဒ။]

[ရရှိသောဆုလာဘ် - ဝိညာဉ်ဆေးကြောခြင်း။ ဆေးကြောခြင်း ခံယူပြီးနောက် ဝိညာဉ်သည် အသစ်တစ်ဖန် ပြန်လည်မွေးဖွားလာပြီး သူတော်စင်ဝိညာဉ်အဖြစ်သို့ အပြည့်အဝ စုစည်းသွားမည်ဖြစ်ပါသည်။]

[ရရှိသောဆုလာဘ် - လေနိယာမအား သဘောပေါက်နားလည်ခြင်း (အနည်းငယ်အောင်မြင်ခြင်းအဆင့်)။]

[မှတ်ချက်။ ။ နိယာမကျင့်ကြံခြင်းအဆင့်များ ခွဲခြားမှု - အစပြုခြင်း၊ အနည်းငယ်အောင်မြင်ခြင်း၊ ကြီးမားစွာအောင်မြင်ခြင်း၊ ပြည့်စုံခြင်း။ သူတော်စင်ဝိညာဉ်ကို စုစည်းပြီးနောက် တိုက်ရိုက်သဘောပေါက် နားလည်သွားခြင်းဖြစ်သည်။]

သူတော်စင်အဆင့်သို့ ဝင်ရောက်နိုင်ခြင်း၏ နိမိတ်လက္ခဏာမှာ နိယာမစွမ်းအားကို သဘောပေါက်နားလည်ခြင်း ဖြစ်သည်။

ယေယုယျအားဖြင့် သူတော်စင်များသည် နိယာမစွမ်းအားကို အစပြုခြင်းအဆင့်မျှသာ နားလည်နိုင်ကြသည်။ သာမန်အခြေအနေများတွင် သူတော်စင်ဘုရင်အဆင့် အစွမ်းထက်ပုဂ္ဂိုလ်များသာလျှင် ၎င်းကို အနည်းငယ်အောင်မြင်ခြင်းအဆင့်အထိ နားလည်သဘောပေါက်နိုင်သည်။

နိယာမစွမ်းအား ကြီးမားစွာအောင်မြင်ခြင်းအဆင့်သို့ ရောက်ရှိခြင်းသည် မဟာသူတော်စင်အဆင့်ရှိ အစွမ်းထက်ပုဂ္ဂိုလ်တစ်ဦး၏ တိုက်ခိုက်ရေးစွမ်းရည်ကို ပိုင်ဆိုင်ထားပြီးဖြစ်ကြောင်း အခြေခံအားဖြင့် သက်သေပြနေခြင်းပင် ဖြစ်သည်။

လေနိယာမကို သဘောပေါက်နားလည်ခြင်း၏ အကြီးမားဆုံး အကျိုးသက်ရောက်မှုမှာ လျင်မြန်မှု ဖြစ်သည်။ လှုပ်ရှားမှုအရှိန်၊ တိုက်ခိုက်မှုအရှိန်...

၎င်းသည် သူ၏ဓားသိုင်းပညာကို ပြီးပြည့်စုံစွာ ဖြည့်ဆည်းပေးနိုင်သည်။ ပြည့်စုံခြင်းအဆင့် ဓားဆန္ဒတစ်ခုတည်းအပေါ်တွင်သာ အခြေခံ၍ပင် ချင်လော့သည် သူတော်စင်တစ်ဦးကို ချက်ချင်း သတ်ဖြတ်ရန် လုံလောက်နေပြီ ဖြစ်သည်။ လေနိယာမကိုပါ ထပ်မံသဘောပေါက်နားလည်သွားချိန်တွင်မူ ချင်လော့သည် သူတော်စင်အဆင့်အတွင်း၌ ပြိုင်ဘက်ကင်းလုနီးပါး ဖြစ်သွားခဲ့ပြီဖြစ်ပြီး၊ ၎င်းမှာ သူ၏ခန္ဓာကိုယ်အစွမ်းကို ထည့်မတွက်ရသေးခင်ပင် ဖြစ်သည်။

သူတော်စင်ဘုရင်တစ်ပါးကိုပင် ထိပ်တိုက်ရင်ဆိုင် စိန်ခေါ်နိုင်စွမ်းရှိသည်။ အကယ်၍ သူ၏ကျင့်ကြံမှုအဆင့်သာ ထပ်မံတိုးတက်လာပါက သူတော်စင်အဆင့်သို့ပင် မဝင်ရောက်ဘဲ သူတော်စင်ဘုရင်တစ်ပါးကို သတ်ဖြတ်နိုင်မည် ဖြစ်သည်။

စုမုသည် ချင်လော့ကို ထိတ်လန့်တုန်လှုပ်စွာ ကြည့်ရင်း "ကျွန်တော့်အသက်ကို ရွေးဖို့အတွက် အဆင့်မြင့်သူတော်စင်လက်နက်တစ်ခု ပေးရင်ကော ဘယ်လိုလဲ" ဟု ပြောလိုက်သည်။

ချင်လော့ ခေါင်းမခါပြမီမှာပင် စုမုသည် မိမိ၏ကမ်းလှမ်းချက်ကို ချက်ချင်း ပြန်လည်ငြင်းပယ်လိုက်သည်။ သူက နာကျင်နေသော မျက်နှာအမူအရာဖြင့် "မဟုတ်သေးဘူး... ကျွန်တော် အဆင့်မြင့်သူတော်စင်လက်နက်တစ်ခု ပေးပါ့မယ်!" ဟု အလျင်အမြန် ပြင်ပြောလိုက်သည်။

သူ၏နှလုံးသားမှ သွေးယိုစီးနေသကဲ့သို့ ခံစားလိုက်ရသည်။ ဤအရာကား အဆင့်မြင့်သူတော်စင်လက်နက်တစ်ခု ဖြစ်သည်! ဤမျှလောက် များပြားလှသောအရာကို ရရှိရန်အတွက် သူ မစ်ရှင်ပေါင်း မည်မျှအထိ လုပ်ဆောင်ရမည်နည်း။ အနည်းဆုံးအားဖြင့် မဟာသူတော်စင်နှစ်ပါး — မဟုတ်သေးပါ၊ သုံးပါးခန့်ကို သတ်ဖြတ်မှသာ ဤမျှတန်ဖိုးရှိသောအရာကို ရှာဖွေနိုင်မည် ဖြစ်သည်။

သူ၏မျက်နှာအမူအရာကို ကြည့်ပြီး ချင်လော့မှာ ရယ်ချင်စိတ် ဖြစ်သွားရသည်။ သူက ခေါင်းကို ဖြည်းညှင်းစွာခါယမ်းရင်း "မင်းကို လွှတ်ပေးဖို့ဆိုတာ မဖြစ်နိုင်ဘူး" ဟု ပြောလိုက်သည်။

"ဒါပေမဲ့ မင်းကို ရွေးချယ်စရာတစ်ခုတော့ ပေးနိုင်ပါတယ်။ ငါ့ရဲ့ လုပ်ကြံသတ်ဖြတ်သူ ဖြစ်လာခဲ့ပါ။ ငါ့ရဲ့အမိန့်ကိုပဲ နာခံရမယ့် လုပ်ကြံသတ်ဖြတ်သူတစ်ယောက်ပေါ့"

စုမု၏ မျက်နှာအမူအရာ ပြောင်းလဲသွားသည်။ သူသည် လူအမဟုတ်သဖြင့် ဤအရာမှာ သွယ်ဝိုက်သောနည်းဖြင့် ချင်လော့၏ လက်အောက်ခံဖြစ်လာစေရန် လုပ်ဆောင်ခြင်းဖြစ်ကြောင်း ချက်ချင်း သဘောပေါက်လိုက်သည်။

သူသည် လွတ်လပ်သော လုပ်ကြံသတ်ဖြတ်သူတစ်ဦးဖြစ်ပြီး မိမိ၏ကျွမ်းကျင်မှုပညာဖြင့် အသက်မွေးဝမ်းကျောင်းပြုသူဖြစ်သည်။ သူသည် သူတစ်ပါး၏ အိမ်စေကျွန်တစ်ဦး မဖြစ်လိုပေ။

"ကျွန်တော် ခင်ဗျားအတွက် လူတွေအများကြီးကို သတ်ပေးနိုင်ပါတယ်၊ ဒါပေမဲ့ ကျွန်တော်က..."

ချင်လော့က သူ၏စကားကို ဖြတ်ပြောလိုက်သည်။ "ဟင့်အင်း၊ မင်းမှာ ရွေးချယ်စရာမရှိဘူး။ ဘာလို့လဲဆိုတော့ ငါက မင်းကို ဒီရွေးချယ်စရာတစ်ခုတည်းပဲ ပေးထားလို့ပဲ။ အကယ်၍ မင်း သဘောမတူဘူးဆိုရင်တော့ ငါက မင်းရဲ့ ယာယီအဖွဲ့ဝင်မိတ်ဆွေတွေနောက်ကိုပဲ လိုက်ပါသွားအောင် ပို့ဆောင်ပေးရလိမ့်မယ်"

ချင်လော့က ချူဖုန်း ပြာအဖြစ်သို့ ပြောင်းလဲသွားခဲ့သော နေရာကို လက်ညှိုးထိုးပြလိုက်သည်။

"အသက်သုံးရှိုက်စာ အချိန်ဆိုရင် မင်းအတွက် လုံလောက်ပါပြီ ဟုတ်တယ်မလား။ ကဲ... မင်း စရေတွက်လိုက်တော့!" ချင်လော့က တွမ့်မုလင်ကို ညွှန်ပြကာ ပြောလိုက်သည်။

တွမ့်မုလင်သည် တုံ့ဆိုင်းမနေဘဲ ချက်ချင်းပင် ရေတွက်လိုက်သည်။ "တစ်!"

"နှစ်!"

စုမု၏မျက်နှာမှာ ပြာနှမ်းသွားခဲ့သည်။ သူ၏စိတ်ထဲတွင် အတွေးတစ်ခု ပဲ့တင်ထပ်နေ၏။ 'လွတ်လပ်မှုက တန်ဖိုးရှိပါတယ်၊ ဒါပေမဲ့ အသက်က ပိုပြီးတော့ တန်ဖိုးရှိတယ်!'

"သုံး!"

သူ၏ဝိညာဉ်ထံမှ ဆွဲငင်ခံရသည့် ခံစားချက်ကြောင့် သူ ချက်ချင်း တုံ့ပြန်လိုက်ပြီး "ကျွန်တော် သဘောတူပါတယ်!" ဟု အလျင်အမြန် အော်ပြောလိုက်တော့သည်။ ချူဖုန်း ယခုလေးတင် ကြုံတွေ့သွားခဲ့ရသည့် ဝိညာဉ်ချုပ်ငြိမ်းပြီး ခန္ဓာကိုယ် ပြာမှုန့်အဖြစ်သို့ ပျက်စီးသွားရသည့် အဖြစ်ဆိုးကို သူ အသေအချာပင် မကြုံတွေ့လိုတော့ပေ။

"ဉာဏ်ပညာရှိတဲ့ ရွေးချယ်မှုပဲ"

သေခြင်းရှင်ခြင်းတံဆိပ်တုံးကို သဘာဝကျကျပင် ရိုက်နှိပ်လိုက်ရသည်။ စုမုသည် ချင်လော့၏ ထိန်းချုပ်မှုကို ခံယူရုံမှတစ်ပါး အခြားရွေးချယ်စရာ မရှိတော့ပေ။

[စနစ်အကြောင်းကြားချက်]

[ကံကြမ္မာသားတော် စုမုကို ကျွန်ပြုလိုက်ပြီ ဖြစ်သည်။ စုမုသည် ကံကြမ္မာသားတော် အဆင့်အတန်း ဆုံးရှုံးသွားပြီး ကံကြမ္မာအရှိန်အဝါ အားလုံးကို ရရှိကာ ဗီလိန်မှတ်များအဖြစ် အလိုအလျောက် ပြောင်းလဲပြီးဖြစ်ပါသည်။]

ဤတစ်ကြိမ် ရိုက်ချက်မှာ အလွန်ပင် တွက်ခြေကိုက်လှပေသည်။

"အပြင်ထွက်ပြီး သွားကြည့်ရအောင်။ ငါ့အထင်တော့ တိုက်ပွဲက အဆုံးသတ်ဖို့ နီးကပ်နေပြီထင်တယ်"

ချင်လော့၏ စကားဆုံးသည်နှင့်တစ်ပြိုင်နက် သူနှင့် စုမုတို့သည် အပြင်ဘက်သို့ ပေါ်ထွက်လာကြသည်။

မဟာသူတော်စင် ကွယ်လွန်သွားပြီးနောက် ဝေ့ရှောင်လင်သည် ချက်ချင်းပင် ဆုတ်ခွာရန် ရွေးချယ်လိုက်သည်။ ယဲ့လန်သည် ဝေ့ရှောင်လင်ကို တစ်ချက်မျှသာ လှမ်းကြည့်လိုက်သည်။ ဤအဖိုးကြီးမှာ စောစောနှင့် နောက်နောက် သေရမည်ဖြစ်သော်လည်း ငါးရှဉ့်ကဲ့သို့ ချောချေလှသဖြင့် သူ့ကို သတ်ရမည့်အချိန် မရောက်သေးပေ။ ပထမဦးစွာ လက်ငင်းအရေးကိစ္စများကို ရှင်းလင်းရမည်။

"အစ်ကိုလင်း... ဒါက မဖြစ်နိုင်တော့ဘူး၊ ဆုတ်ကြစို့!" ဝေ့ရှောင်လင်သည် မိမိကိုယ်တိုင် ဆုတ်ခွာရုံတင်မကဘဲ သူ၏မိတ်ဆွေကိုပါ အလျင်အမြန် အော်ဟစ်ခေါ်ယူလိုက်သည်။

ရွှစ်!

ဓားချီတစ်ချက် ပေါက်ကွဲထွက်လာသည်။ လင်းချင်းရှန်းသည် စုချန်ချန်ကို တစ်ချက်လှမ်းကြည့်ကာ တုံ့ဆိုင်းမနေဘဲ ချက်ချင်း ဆုတ်ခွာရန် ပြင်လိုက်တော့သည်။

ယဲ့လန်သည် ဤမြင်ကွင်းကို မြင်သောအခါ နှာခေါင်းရှုံ့လှောင်ပြောင်လျက် "မင်းတို့ သဘောရှိ လာချင်တိုင်းလာပြီး သွားချင်တိုင်း သွားလို့ရမလား။ ဒီလောကမှာ အဲဒီလို ကောင်းတဲ့အရာ ဘယ်မှာရှိမှာလဲ! ဒီမှာပဲ ကျန်ခဲ့စမ်း!" ဟု ပြောလိုက်သည်။

ရွှစ်!

ယဲ့လန်၏ တိုက်ခိုက်ရေးစွမ်းရည်မှာ ဤလူထက် အနည်းငယ် ပိုမိုအားကောင်းသည်။ သူမသည် မိမိ၏အစွမ်းကုန် ထုတ်သုံးကာ ဤလူကို ပိတ်ဆို့ထားလိုက်သည်။

ဝူး! ဝူး! ဝူး!

ထန်ကျင်း၊ ဟွင်ယွဲ့၊ နင်တင့်ဖန်နှင့် ချန်ထုန်တို့သည် အပြေးအလွှား ရောက်ရှိလာကြပြီး ကောင်းကင်မဟာမိတ်အဖွဲ့ဝင်များကို ဝိုင်းရံပိတ်ဆို့မှုကြီး တစ်ခုအဖြစ် တိုက်ရိုက် ဝန်းရံလိုက်ကြသည်။

"ရိုရို... ဒါက မဖြစ်နိုင်တော့ဘူး၊ ငါတို့ အမြန်သွားကြစို့!" ယန်ကျန်၏ မျက်နှာအမူအရာ ရုတ်တရက် ပြောင်းလဲသွားသည်။ အခြေအနေများ ဤမျှအထိ လျင်မြန်စွာ ပြောင်းလဲသွားလိမ့်မည်ဟု သူ မထင်မှတ်ထားခဲ့ပေ။ သူသည် လီမိုနှင့် ထိုပါယန်တို့ကို ဖိနှိပ်ထားခြင်းကိုသာ လက်လွှတ်လိုက်ရပြီး ထာဝရသူတော်စင်မ၏ ဘေးနားသို့ ခုန်ပျံသွားလိုက်တော့သည်။

တစ်ဖက်တွင် မဟာသူတော်စင်အဆင့်ရှိ အစွမ်းထက်ပုဂ္ဂိုလ် ရှစ်ပါးရှိနေပြီး မိမိတို့ဘက်တွင်မူ ငါးပါးသာ ရှိတော့သည်။ အောင်ပွဲ၏ ချိန်ခွင်လျှာမှာ လုံးဝ တိမ်းစောင်းသွားခဲ့ပြီ ဖြစ်သည်။

"ဒီကိစ္စကတော့ မအောင်မြင်နိုင်တော့ဘူး" ဖန်ရှောက်ပင်သည် ဤမြင်ကွင်းကို ကြည့်ရင်း သူ၏မျက်ဝန်းများထဲတွင် နက်ရှိုင်းသော မကျေနပ်မှုများ ထင်ဟပ်နေသည်။ သူသည် ဇနီးသည်ကိုရော စစ်တပ်ကိုပါ ဆုံးရှုံးခဲ့ရပြီ ဖြစ်သည်။

သူသည် ချင်လော့၏ လူသားဧကရာဇ်အလံတော် ဖုံးလွှမ်းထားရာ အရပ်မျက်နှာသို့ နောက်ဆုံးအကြိမ်အဖြစ် နက်နက်နဲနဲ လှမ်းကြည့်လိုက်ပြီးနောက် လှည့်ထွက်သွားခဲ့တော့သည်။ ဤနေရာသည် ရေရှည်နေထိုင်ရန် မသင့်တော်သောနေရာ ဖြစ်ပေသည်။

ချင်လော့နှင့် စုမုတို့ အပြင်သို့ ထွက်လာချိန်တွင် ကောင်းကင်မဟာမိတ်အဖွဲ့ဝင်များ ဝန်းရံခံထားရသည်ကို မြင်တွေ့လိုက်ရသည်။

"ကစားပွဲက တော်တော်လေး မြန်မြန်ဆန်ဆန် တိုးတက်နေတာပဲ၊ အဆုံးသတ်တော့မယ်"

ရှစ်ယောက်နှင့် ငါးယောက်၊ အားသာချက်မှာ ချင်လော့ဘက်၌ လုံးဝရှိနေသည်။ ဆန့်ကျင်ဘက်အဖွဲ့တွင် မည်သည့်အခွင့်အရေးမျှ မရှိတော့ပေ။

"မင်း သွားပြီး မင်းရဲ့တန်ဖိုးကို သက်သေပြလိုက်စမ်း။ မဟာသူတော်စင်တစ်ပါးကို သတ်လိုက်ပါ" ချင်လော့က စုမုကို အမိန့်ပေးလိုက်သည်။

စုမုသည် မသိစိတ်ဖြင့် "ကျွန်တော် ပိုက်ဆံဘယ်လောက် ရမှာလဲ" ဟု လွှတ်ခနဲ မေးလိုက်မိသည်။

"ဟင်..." ချင်လော့၏ စူးရှသောအကြည့်က စုမုအပေါ်သို့ ကျရောက်သွားရာ စုမုကို တုန်လှုပ်သွားစေသည်။ သူက ရှက်ကိုးရှက်ကန်း ပြုံးလိုက်ရင်း "လက်အောက်ခံက အမိန့်အတိုင်း နာခံပါ့မယ်!" ဟု ပြောလိုက်သည်။

ဝူး!

သူသည် လေဟာနယ်အတွင်း၌ ချက်ချင်းပင် ကိုယ်ရောင်ဖျောက်လိုက်ပြီး အချိန်မရွေး တိုက်ခိုက်ရန် အသင့်ပြင်ထားလိုက်သည်။ လုပ်ကြံသတ်ဖြတ်သူတစ်ဦးအနေဖြင့် သူသည် ကြီးမားသော သည်းခံစိတ် လိုအပ်သည်။ သူသည် တစ်ကြိမ်ကျရှုံးခဲ့ပြီး ဖြစ်သဖြင့် ယခုတစ်ကြိမ်တွင်မူ မုချအောင်မြင်ရမည် ဖြစ်သည်။

'ဒါက ပိုက်ဆံမရဘဲ အလုပ်တစ်ခုကို ပထမဦးဆုံးအကြိမ် လုပ်ရတာပဲ။ ငါ့အတွက်တော့ တော်တော်ခက်ခဲတာပဲ' စုမုသည် အလွန်ပင် စိတ်မကောင်းဖြစ်နေမိသည်။ သို့သော် သူ၏အသက်မှာ ချင်လော့၏လက်ထဲတွင် ရှိနေပြီဖြစ်ရာ လှုပ်ရှားခြင်းမှတစ်ပါး အခြားမရှိချေ။

ချင်လော့၏ အသံသည် စစ်မြေပြင်တစ်ခုလုံးတွင် ဟိန်းထွက်သွားခဲ့သည်။

"ငါ့ရဲ့ ထိုက်ရွှီးခံတပ်ကို လာရောက်တိုက်ခိုက်ဝံ့တဲ့သူမှန်သမျှကို ညှာတာမှုမရှိဘဲ သတ်ဖြတ်ပစ်ရမယ်!"

"သတ်ကြစို့!"

ဟိန်းဟောက်သံများ ထွက်ပေါ်လာပြီး အောက်ခြေရှိ စစ်သည်တော်များသည် ရန်သူများကို ပြင်းပြင်းထန်ထန် တိုက်ခိုက်ကြတော့သည်။ အထက်ပိုင်းအဆင့်ရှိ တိုက်ပွဲမှာ အဆုံးသတ်လုနီးပါး ဖြစ်နေပြီဖြစ်သည်။ သူတို့ ဤစစ်ပွဲကို ဧကန်မုချ အောင်နိုင်တော့မည် ဖြစ်သည်။ သူတို့၏ စိတ်ဓာတ်များမှာ ကောင်းကင်သို့ ထိုးတက်နေပြီး တိုက်ခိုက်ရေးစွမ်းရည်များလည်း တဟုန်ထိုး မြင့်တက်လာခဲ့သည်။

"သတ်ကြစို့!"

လီရှောင်သည် သူ၏ဧရာမပုဆိန်ကြီးကို ဝှေ့ယမ်းကာ ဟိန်းဟောက်ရင်း ကောင်းကင်မဟာမိတ်အဖွဲ့ထံသို့ စတင်အရှိန်ပြင်းစွာ စီးနင်းဝင်ရောက်သွားသည်။ ယနေ့တွင် သူသည် ပြင်းထန်သော ကလဲ့စားခြေမှုကို ပြုလုပ်နိုင်ပြီဖြစ်ရာ၊ ၎င်းတို့ထဲမှ တစ်ထောင်ခန့်ကို သတ်ဖြတ်ပစ်ချင်နေမိသည်။

မဟာနတ်ဆိုးဂိုဏ်း၏ နတ်ဆိုးသားတော်ပီပီ ကောင်းကင်မဟာမိတ်အဖွဲ့၏ မျိုးဆက်သစ် ပါရမီရှင်များထဲတွင် သူ့ကို ယှဉ်ပြိုင်နိုင်သူ အနည်းငယ်မျှသာ ရှိပေသည်။

ရဲ့လင်းရွှမ်၏ နှလုံးသားထဲတွင်လည်း ဒေါသမီးများ တောက်လောင်နေပြီး အရှိန်အဟုန်ဖြင့် ပြေးထွက်သွားခဲ့သည်။

ကောင်းကင်မဟာမိတ်အဖွဲ့ဝင်များသည် ဆုတ်ခွာရန် စတင်နေကြပြီဖြစ်သည်။ ယန်ကျန်၏ စစ်သည်တော်များသည် အနည်းငယ် လမ်းပျောက်နေကြပြီး ယန်ကျန်ကို မော့ကြည့်နေကြသော်လည်း ယန်ကျန်သည် ၎င်းတို့ကို မည်သည့်ညွှန်ကြားချက်မျှ မပေးခဲ့ပေ။

ယန်ကျန်သည် စွန်းယွီရို၏ ရှေ့တွင် မတ်တတ်ရပ်နေခဲ့သည်။ စွန်းယွီရိုသည် ယန်ကျန်ကို နက်နဲသော သံယောဇဉ်အကြည့်ဖြင့် ကြည့်ကာ "အခြေအနေတွေ ဒီလိုဖြစ်လာပြီဆိုတော့ ရှင်ကိုယ်တိုင် လှုပ်ရှားမှပဲ သူတို့ကို တားဆီးနိုင်ပြီး ငါတို့ လွတ်မြောက်ဖို့ အခြေအနေကို ဖန်တီးပေးနိုင်မှာ" ဟု ပြောလိုက်သည်။

သူမက စကားပြောရင်း မိမိ၏ဗိုက်ကို ညင်သာစွာပွတ်သပ်ကာ "ရှင့်အနေနဲ့ ကျွန်မဗိုက်ထဲက ကလေးကို တစ်စုံတခု ဖြစ်သွားတာမျိုး မလိုလားဘူး မဟုတ်လား" ဟု ဆိုလိုက်လေသည်။