အခန်း ၁၇၅

အခန်း (၁၇၅)

ချင်ဧကရာဇ်က အစွန်းရောက်နတ်ဆိုးတွေနဲ့ ပူးပေါင်းကြံစည်နေတာလား။

ထိုခန့်မှန်းချက်သည် တက်ရောက်လာသူအားလုံး၏ မျက်နှာကို တည်ကြည်လေးနက်သွားစေသည်။ ၎င်းသည် သေးငယ်သောကိစ္စ မဟုတ်ပေ။ အကယ်၍သာ အမှန်ဖြစ်ခဲ့ပါက သူတို့၏ တောင်တန်းတစ်သောင်းနယ်မြေနှင့် ကွန်ရွှီနယ်မြေတစ်ခုလုံးရှိ လူသားမျိုးနွယ်အားလုံးအတွက် ကြီးမားသည့် ကပ်ဘေးကြီး ဖြစ်လာနိုင်သည်။

"ဒီကိစ္စအတွက် သက်သေအထောက်အထား ရှိလို့လား၊ ဒါမှမဟုတ် အခြေအမြစ်မရှိတဲ့ ခန့်မှန်းချက်သက်သက်ပဲလား" ချန်ဟွံရွှီက လေးနက်တည်ငြိမ်သော လေသံဖြင့် မေးလိုက်သည်။ ဒီကိစ္စက အလွန်အရေးကြီးတာကြောင့် သူ ပေါ့ပေါ့ဆဆ မတွေးရဲပါဘူး။

ဝိညာဉ်ခန်းမမှ အကြီးအကဲက အေးတိအေးစက်ဖြင့်

"ကောင်းကင်နတ်ဆိုးဂိုဏ်းနဲ့ မဟာနတ်ဆိုးဂိုဏ်းရဲ့ အကြွင်းအကျန်တွေဖြစ်တဲ့ ရဲ့လင်းရွှမ်၊ လီရှောင်နဲ့ တခြားလူတွေအားလုံး ချင်လော့နဲ့အတူ ရှိနေတယ်ဆိုတာကို ပြသနေတဲ့ တိကျတဲ့ သတင်းအချက်အလက်တွေ ရှိပါတယ်။ ဒါက သက်သေထူဖို့ မလုံလောက်သေးဘူးလား"

"အားလုံးပဲ... ကျွန်တော်တို့ ဒါကို လေးလေးနက်နက် စဉ်းစားရပါမယ်။ မိမိတို့ရဲ့ သက်ဆိုင်ရာ အခြေခံအင်အားစုတွေကို လှုပ်ရှားစေပြီး မဟာချင်အင်ပါယာကို စိတ်တိုင်းကျ သောင်းကျန်းခွင့် မပေးသင့်တော့ဘူး။ အကယ်၍ သူတို့က ဝိညာဉ်တိုက်စားခြင်းနယ်မြေရဲ့ အစွန်းရောက်နတ်ဆိုးတွေနဲ့ အမှန်တကယ် ပူးပေါင်းနေတာဆိုရင် ဝိညာဉ်တိုက်စားခြင်းနယ်မြေက အလုံးအရင်းနဲ့ ကျူးကျော်လာတဲ့အချိန်ကျမှတော့ နောက်ကျသွားပါလိမ့်မယ်!"

ကျန်တဲ့လူတွေက သူ့စကားကို ကြားပြီး နက်နက်နဲနဲ အတွေးများသွားကြသည်။ ဝိညာဉ်ခန်းမ၏ ရည်ရွယ်ချက်မှာ ရှင်းလင်းနေ၏။ သူတို့ကို လျှို့ဝှက်ဝှက်ဖဲတွေ ထုတ်သုံးစေပြီး မဟာချင်အင်ပါယာရဲ့ လက်ရှိအင်အားများကို အမြန်ဆုံး သုတ်သင်ရှင်းလင်းပစ်ရန် ဖြစ်သည်။

သာမန်အားဖြင့်ဆိုလျှင် အလုံးစုံတိုက်ခိုက်မှု စတင်ရန် အချိန်မတန်သေးဘဲ ယခုအချိန်တွင် လျှို့ဝှက်ဝှက်ဖဲများကို မထုတ်သုံးသင့်သေးချေ။ သို့သော်လည်း ဝိညာဉ်ခန်းမ၏ သတင်းအချက်အလက်များကလည်း အကျိုးအကြောင်း သင့်လျော်လှပေသည်။ တက်ရောက်လာသူ အားလုံးသည် လွန်ခဲ့သော နှစ်ပေါင်းတစ်သောင်းက ကပ်ဘေးကြီးမျိုးကို ထပ်မံမကြုံတွေ့လိုကြချေ။ သူတို့အတွက် ထိုအရာက သွေးနှင့် မျက်ရည်တို့ဖြင့် ရေးထိုးထားသော သမိုင်းဆိုးတစ်ခု ဖြစ်ခဲ့သည်။

"ဒီကိစ္စကို ကျွန်မတို့ မြူခိုးမြင့်မြတ်နယ်မြေအနေနဲ့ အသေးစိတ် ဆွေးနွေးပါမယ်။ ကျွန်မတို့ မြူခိုးမြင့်မြတ်နယ်မြေက မဟာသူတော်စင် နှစ်ပါးဟာ ချင်လော့ဆိုတဲ့ ကောင်စုတ်လေးရဲ့ လက်ချက်နဲ့ သေဆုံးခဲ့ရတယ်။ သူ ဒါအတွက် တန်ဖိုးပြန်ပေးရမယ်!" ဖျောင်မျောင်းမြင့်မြတ်သခင်မက အေးစက်စွာ ပြောလိုက်သည်။

အရင်ကဆိုလျှင် ထူးခြားသည့် အပြောင်းအလဲ မရှိပါက မဟာသူတော်စင်အဆင့် နောက်ဆုံးအဆင့် ကျွမ်းကျင်သူတစ်ဦးဖြစ်သည့် ထျန်းဝူစစ်သူကြီး ယန်ကျန်သည် သူတို့ မြူခိုးမြင့်မြတ်နယ်မြေ၏ လက်ရုံးတစ်ဦး ဖြစ်လာရမည်ဖြစ်သော်လည်း ယခုမူ သူ သေဆုံးသွားခဲ့ရပြီ ဖြစ်သည်။ မဟာသူတော်စင် နှစ်ပါးဆိုသည်မှာ မုန်လာဥနှစ်ဥ မဟုတ်ပေ၊ မြူခိုးမြင့်မြတ်နယ်မြေအတွက် ကြီးမားသော ဆုံးရှုံးမှုဖြစ်သည်။

ချန်ဟွံရွှီကလည်း လေးနက်သော လေသံဖြင့် "မင်းတို့ ဝိညာဉ်ခန်းမရဲ့ ကောက်ချက်ချမှုကို ငါ ဂိုဏ်းရဲ့ မဟာအကြီးအကဲကို အကြောင်းကြားလိုက်ပါမယ်။ ဝိညာဉ်ခန်းမအနေနဲ့ ပိုပြီး တိကျတဲ့ သတင်းအချက်အလက်တွေကို ပေးဖို့ မျှော်လင့်ပါတယ်။ နှစ်ပေါင်းတစ်သောင်းက ကပ်ဘေးကြီးမျိုး ထပ်ပြီး ပေါ်မလာစေရဘူး!" ဟု ဆိုလိုက်သည်။

ရွှမ်ထျန်းတာအိုဂိုဏ်းနှင့် ဆက်နွှယ်နေသော အခြားတာအိုဂိုဏ်းများကလည်း သူတို့၏ ဂိုဏ်းချုပ်များနှင့် မဟာအကြီးအကဲများထံ ပြန်လည်တင်ပြမည်ဖြစ်ကြောင်း အသီးသီး ပြောဆိုကြသည်။ အဘယ်ကြောင့်ဆိုသော် ဤကိစ္စသည် ကြီးမားလွန်းလှသဖြင့် အနည်းငယ်မျှသော ဖြစ်နိုင်ခြေရှိရုံနှင့်တင် သူတို့ လက်လွတ်မခံရဲဘဲ အကျပ်အတည်းကို အပင်ပေါက်အဆင့်မှာတင် ဆိတ်သတ်ပစ်ရမည် ဖြစ်သည်။

"မဟာချင်အင်ပါယာနဲ့ ဝိညာဉ်တိုက်စားခြင်းနယ်မြေရဲ့ ကိစ္စက တကယ့်ကို ကြီးမားတဲ့ ပြဿနာတစ်ခုဖြစ်လို့ ကျွန်တော်တို့ရဲ့ အင်အားစုအသီးသီးက သေသေချာချာ စုံစမ်းစစ်ဆေးရပါမယ်" ချန်ဟွံရွှီ၏ စကားကို အခြားလူများကလည်း သဘောတူညီကြသည်။

"လောလောဆယ်မှာတော့ ပုန်းကွယ်နဂါးအဆင့်သတ်မှတ်ချက် ပြိုင်ပွဲကလည်း အလွန်အရေးကြီးတဲ့ ကိစ္စတစ်ခုပဲ။ ဒါက ကျွန်တော်တို့ရဲ့ အနာဂတ်နဲ့ သက်ဆိုင်နေတာမို့ ဒါကို အရင်ဆုံး ကိုင်တွယ်ဖြေရှင်းသင့်တယ်"

"မှန်တယ်... အကယ်၍ ဝိညာဉ်တိုက်စားခြင်းနယ်မြေရဲ့ ကိစ္စသာ အမှန်ဖြစ်ခဲ့ရင် ဒီပုန်းကွယ်နဂါးအဆင့်သတ်မှတ်ချက် ပြိုင်ပွဲမှာ ကောင်းကင်တာအိုက အဲဒီမျိုးဆက်သစ်လူငယ်တွေကို ကံကြမ္မာကောင်းချီးပေးမှုတွေ ပိုပြီး ပေးသနားမှာ သေချာတယ်။ ကွန်ရွှီလျှို့ဝှက်နယ်မြေထဲမှာ သူတို့တွေ ကံကြမ္မာအခွင့်အလမ်းတွေ ပိုပြီး ရရှိနိုင်တယ်"

ဝိညာဉ်ခန်းမမှ အကြီးအကဲက ခန္ဓာကိုယ်ကို မတ်မတ်ထားပြီး ခေါင်းညိတ်ပြလျက် "ကျွန်တော်တို့ ခန်းမသခင်က ပုန်းကွယ်နဂါးအဆင့်သတ်မှတ်ချက်မှာ ရှိနေတဲ့ ပါရမီရှင်တွေကို ဆုချီးမြှင့်ဖို့အတွက် ကျွန်တော်တို့ ဝိညာဉ်ခန်းမကလည်း အရင်းအမြစ်မြောက်မြားစွာ ထောက်ပံ့ပေးမယ်လို့ ပြောထားပါတယ်" ဟု ဆိုသည်။

အစည်းအဝေးအပြီးတွင် သူက ချန်ဟွံရွှီနှင့် အခြားလူအနည်းငယ်ကို သီးသန့်ခေါ်ယူကာ စကားပြောခဲ့သည်။

"နောက်ထပ် ကိစ္စတစ်ခု ရှိသေးတယ်၊ အဲဒါက ချင်ရှောင်နဲ့ ပတ်သက်တာပဲ။ အချိန်ကတော့ ပြည့်လုနီးပါး ဖြစ်နေပြီ"

အားလုံးကလည်း အတွင်းရေးကို သိထားကြသဖြင့် ခေါင်းညိတ်လိုက်ကြပြီး "ဒီကိစ္စက အလွန် အရေးကြီးတယ်။ ချင်ရှောင်က ကျွန်တော်တို့ တောင်တန်းတစ်သောင်းနယ်မြေကို နှစ်ပေါင်းများစွာ ဖိနှိပ်ထားခဲ့တာ။ သူ့ကို နှုတ်ဆက်ရမယ့် အချိန်ရောက်ပြီ" ဟု ဆိုကြသည်။

သတင်းကို ရရှိပြီးနောက် ဝိညာဉ်ခန်းမ၏ ခန်းမသခင်သည် စိတ်ကျေနပ်စွာ ခေါင်းညိတ်လျက် "ရေကို နောက်အောင်လုပ်မှပဲ ငါးဖမ်းလို့ရမှာ။ သူတို့တွေ နှစ်တွေတစ်လျှောက် ဘယ်လောက်တောင် လျှို့ဝှက်ဝှက်ဖဲတွေ စုဆောင်းထားလဲဆိုတာ ငါ ကြည့်ချင်သေးတယ်။ အကယ်၍ သူတို့ကို အချင်းချင်း ပြန်ပြီး တိုက်ခိုက်ခိုင်းလို့ရရင် အကောင်းဆုံး ရလဒ်ပဲ ဖြစ်လိမ့်မယ်။ ပြင်ဆင်ကြတော့။ လင်ယယွမ်၊ ဟွမ်ယီ... မင်းတို့နှစ်ယောက် သွားပြီး ချင်ရှောင်ကို သူ့ရဲ့ နောက်ဆုံးခရီးစဉ်အတွက် ပို့ဆောင်ပေးလိုက်ပါ။ မှတ်ထားပါ... ရွှမ်ထျန်းတာအိုဂိုဏ်းက လူတွေကို ရှေ့တန်းကနေ ဦးဆောင်ခိုင်းလိုက်။ သူတို့ထဲက လူအချို့ သေဆုံးသွားတာက အကောင်းဆုံးပဲ" ဟု ရေရွတ်လိုက်သည်။

အလတ်ပိုင်းအရွယ် အမျိုးသားနှစ်ဦး ထွက်လာပြီး လေးနက်သောလေသံဖြင့် "အမိန့်အတိုင်းပါ!" ဟု ပြန်လည်ဖြေကြားလိုက်သည်။

မြူခိုးမြင့်မြတ်နယ်မြေအတွင်း၌ ရှန်ဝမ်နင်သည် ယန်ရှန်းကို မျက်နှာပျက်ပျက်ဖြင့် စိုက်ကြည့်ရင်း "အကြီးအကဲယန်... မြင့်မြတ်သခင်မက တကယ်ပဲ ဘာကို ဆိုလိုတာလဲ" ဟု မေးလိုက်သည်။

ယန်ရှန်းက ရှန်ဝမ်နင်ကို ရှုပ်ထွေးသော အမူအရာဖြင့် ကြည့်ကာ "ဝမ်နင်... မင်းက ငါတို့ မြူခိုးမြင့်မြတ်နယ်မြေရဲ့ သူတော်စင်မလေးပဲ၊ ဂိုဏ်းရဲ့ အကျိုးစီးပွားကို ဦးစားပေးသင့်တယ်။ ဒါပေမဲ့ မင်းက မြူခိုးမြင့်မြတ်နယ်မြေရဲ့ သတင်းအချက်အလက်တွေကို ခွင့်ပြုချက်မရှိဘဲ ပေါက်ကြားအောင်လုပ်ခဲ့လို့ ငါတို့ဂိုဏ်းက မဟာသူတော်စင်တစ်ပါး သေဆုံးခဲ့ရတယ်။ ဒီကိစ္စမှာ မင်းမှားခဲ့တယ်" ဟု ပြောလိုက်သည်။

ရှန်ဝမ်နင်သည် ဒေါသထွက်လွန်းသဖြင့် ရယ်မောလိုက်ပြီး "မင်းတို့က ငါ့ရဲ့ စီနီယာအစ်ကိုကို သတ်ဖို့ လူလွှတ်တုန်းကကော ငါ့ရဲ့ ခံစားချက်ကို ထည့်တွေးပေးခဲ့ဖူးလို့လား။ အခုကျမှ ငါ့ကို မှားတယ်လို့ ပြောနေတာလား"

"သူတော်စင်မလေး... မင်းရဲ့ အဆင့်အတန်းကို မင်း သတိရသင့်တယ်။ မင်းက မြူခိုးမြင့်မြတ်နယ်မြေရဲ့ သူတော်စင်မလေး ဖြစ်ပြီး မင်းပိုင်ဆိုင်သမျှ အရာအားလုံးကို မြူခိုးမြင့်မြတ်နယ်မြေက ပေးသနားထားတာ။ မြင့်မြတ်သခင်မက အမိန့်ချမှတ်ထားတယ်... သူတော်စင်မလေးအနေနဲ့ တံခါးပိတ်ကျင့်ကြံဖို့အတွက် မြူခိုးမြင့်မြတ်နယ်မြေရဲ့ တားမြစ်နယ်မြေထဲကို ဝင်ရောက်ရပါမယ်။ သူတော်စင်အဆင့်ကို မရောက်မချင်း အပြင်ကို ထွက်ခွင့်မရှိပါဘူး!"

"အစောင့်တွေ... သူတော်စင်မလေးကို တားမြစ်နယ်မြေဆီ ခေါ်သွားကြ!" ယန်ရှန်း၏ အမိန့်ပေးမှုနှင့်အတူ သူတော်စင်အချို့သည် ရှန်ဝမ်နင်ထံသို့ ပြေးဝင်လာပြီး သူမ၏ ရုန်းကန်မှုကို ဂရုမစိုက်ဘဲ မြင့်မြတ်နယ်မြေ၏ တားမြစ်နယ်မြေသို့ အဓမ္မ ခေါ်ဆောင်သွားခဲ့ကြသည်။

"ငါ မြင့်မြတ်သခင်မကို တွေ့ချင်တယ်! ငါ့ဆရာကို တွေ့ချင်တယ်! ငါ ဒီကိစ္စမှာ မမှားဘူး! သူမ ငါ့ကို ကတိပေးခဲ့တာတွေကို အမှတ်ရသေးရဲ့လား။ မြင့်မြတ်သခင်မ... ထွက်ခဲ့စမ်းပါ! အရင်က ငါ့ကို ပေးခဲ့တဲ့ ကတိတွေက အတည်မဖြစ်တော့ဘူးလား!"

ရှန်ဝမ်နင်၏ အသံမှာ တဖြည်းဖြည်းနှင့် ဝေးကွာတိုးညှင်းသွားသည်ကို နားထောင်ရင်း ယန်ရှန်းက သက်ပြင်းချကာ သူမတစ်ဦးတည်းသာ ကြားနိုင်သော လေသံဖြင့် "မြင့်မြတ်နယ်မြေထဲကို တစ်ခါဝင်ပြီးရင် မိမိကိုယ်ကိုယ် မိမိ မပိုင်တော့ဘူး။ ဒါတင်မကသေးဘူး... မင်းက သူတော်စင်မလေး ဖြစ်နေတာကြောင့် မင်းရဲ့ ကံကြမ္မာကို မင်းကိုယ်တိုင် ထိန်းချုပ်ခွင့် မရှိပါဘူး" ဟု ရေရွတ်လိုက်သည်။

ထို့နောက် သူမသည် လှည့်ထွက်ကာ မြင့်မြတ်သခင်မ၏ ပင်မနန်းဆောင်သို့ ရောက်ရှိလာခဲ့သည်။

"သူမကို အထဲကို ပို့လိုက်ပြီလား" အေးစက်သောအသံတစ်ခု ထွက်ပေါ်လာသည်။

"မြင့်မြတ်သခင်မထံ တင်ပြအပ်ပါတယ်... သူတော်စင်မလေးကို တားမြစ်နယ်မြေထဲ ပို့ဆောင်ပေးလိုက်ပါပြီ"

"သူမရဲ့ စိတ်ကို သေသေချာချာ ပြန်ရှင်းခိုင်းလိုက်ပါ။ သူမရဲ့ ကိုယ်ပိုင်အဆင့်အတန်းကို သဘောမပေါက်မချင်း အပြင်ထွက်ခွင့် ပေးမှာ မဟုတ်ဘူး! ဒီကိစ္စရဲ့ အဓိကအရင်းအမြစ်ကတော့ အဲဒီချင်လော့ဆီမှာပဲ ရှိနေတုန်းပဲ။ သေးငယ်လှတဲ့ မဟာချင်အင်ပါယာရဲ့ မင်းသားလေးတစ်ပါးကို ချင်ဧကရာဇ်က ဒီလောက်အထိ အရေးတယူ လုပ်လိမ့်မယ်လို့ ငါ ထင်မထားခဲ့ဘူး"

"စွန်းယွီရို သေဆုံးရတဲ့ ကိစ္စနဲ့ပတ်သက်လို့ ငါ့ရဲ့ ဆုံးဖြတ်ချက်က မှားယွင်းသွားခဲ့တယ်။ ဒါကို ကြိုသိခဲ့ရင် အဲဒီကောင်စုတ်လေးကို ငါကိုယ်တိုင် သွားသတ်ခဲ့မှာ။ လူတွေကို အဲဒီကောင်စုတ်လေးကို စောင့်ကြည့်ခိုင်းထားလိုက်။ လတ်တလော အရေးကြီးဆုံးကိစ္စကို ငါ ဖြေရှင်းပြီးတာနဲ့ ငါကိုယ်တိုင် လှုပ်ရှားပြီး အဲဒီကောင်စုတ်လေးကို လမ်းဆုံးပို့ပေးလိုက်မယ်"

ယန်ရှန်းက အနည်းငယ် တွန့်ဆုတ်နေသော အမူအရာ ပြသလျက် "မြင့်မြတ်သခင်မ... အကယ်၍ မြင့်မြတ်သခင်မကိုယ်တိုင် လှုပ်ရှားမယ်ဆိုရင် သူတော်စင်မလေးက နောင်အနာဂတ်မှာ မြင့်မြတ်သခင်မအပေါ် သေချာပေါက် ရန်ငြိုးဖွဲ့ပါလိမ့်မယ်" ဟု တင်ပြလိုက်သည်။

"ဟွန့်..." ထိုအမျိုးသမီးက အေးစက်စွာ နှာခေါင်းရှုံ့လျက်

"သူမ ရင့်ကျက်လာတဲ့အခါ ငါလုပ်သမျှ အရာအားလုံးက သူမကောင်းဖို့အတွက်ဆိုတာကို သိလာလိမ့်မယ်! သူမက ငါ့ရဲ့ မြူခိုးမြင့်မြတ်နယ်မြေရဲ့ သူတော်စင်မလေးပဲ၊ သူမရဲ့ အရာအားလုံးက ငါတို့ မြူခိုးမြင့်မြတ်နယ်မြေနဲ့ပဲ သက်ဆိုင်ရမယ်! အဲဒီကောင်စုတ်လေးက သေကိုသေရမယ်၊ မဟုတ်ရင် သူက နောင်အနာဂတ်မှာ ငါ့ရဲ့ မဟာစီမံကိန်းတွေကို ဖျက်ဆီးပစ်လိမ့်မယ်!" ထိုအမျိုးသမီးက ပြတ်သားစွာ ပြောဆိုလိုက်သည်။

စစ်သေနာပတိချုပ်စံအိမ်အတွင်း၌ ချောင်ယဲ့သည် ချင်ဖန်ထံမှ အပြုသဘောဆောင်သော တုံ့ပြန်မှုကို ရရှိခဲ့သဖြင့် သူ၏မျက်နှာတွင် ဖားယားလိုလားသော အပြုံးတစ်ခု ပေါ်ပေါက်လာခဲ့သည်။

"ပဉ္စမမင်းသား... ကျွန်တော်တို့ ချောင်မိသားစုက နောင်အနာဂတ်မှာ မင်းသားအတွက် ကြိုးကြိုးစားစား တာဝန်ထမ်းဆောင်သွားမှာပါ။ အိမ်ရှေ့မင်းသား ရာထူးကတော့ မင်းသားတစ်ယောက်တည်းနဲ့တင် ထိုက်တန်ပါတယ်။ အရှင်မင်းကြီး ညီလာခံကို ပြန်လည်ဦးဆောင်တဲ့အခါ အရှင်မင်းကြီး တံခါးပိတ်ကျင့်ကြံနေစဉ်အတွင်း ပဉ္စမမင်းသားကို နိုင်ငံတော်အုပ်ချုပ်ရေး ကိစ္စရပ်တွေကို ကြီးကြပ်ကွပ်ကဲခွင့်ပေးဖို့ ကျွန်တော်တို့ သေချာပေါက် လျှောက်တင်ပါ့မယ်"

ချင်ဖန်က ပြုံးလျက် ခေါင်းညိတ်လိုက်သည်၊ အမှန်တကယ်တွင် သူလည်း ထိုသို့ပင် တွေးတောနေခြင်း ဖြစ်သည်။

"စစ်သူကြီးချောင်... မင်းရဲ့သား ကျင့်ကြံခြင်းအဆင့်က လိုဏ်ဂူကောင်းကင်အဆင့်ကို ရောက်နေပြီလို့ ငါကြားတယ်။ ငါလည်း မကြာခင် လျှို့ဝှက်နယ်မြေတစ်ခုကို သွားဖို့ ရှိနေတယ်၊ နောက်ရက်ကျရင် သူ ငါ့နောက်ကို လိုက်ခဲ့ရင် ဘယ်လိုလဲ"

ဤစကားကို ကြားသော် ချောင်ယဲ့၏ မျက်ဝန်းများ ဝင်းပသွားခဲ့ရသည်။ ချင်ဖန်က သူ၏သားကို ရာထူးတိုးမြှင့်ပေးရန် ကြိုးပမ်းနေခြင်း ဖြစ်သည်! ချင်ဖန် သွားမည့် လျှို့ဝှက်နယ်မြေသည် သဘာဝကျစွာပင် ထူးခြားဆန်းပြားရပေမည်။

"ပဉ္စမမင်းသားကို အထူးပဲ ကျေးဇူးတင်ရှိပါတယ်!"

ထိုနှစ်ဦးသား ပျော်ရွှင်စွာ စကားစမြည် ပြောဆိုနေကြစဉ်မှာပင် ချင်လော့သည် စစ်သေနာပတိချုပ်စံအိမ်၏ အပြင်ဘက်သို့ ရောက်ရှိနေပြီ ဖြစ်သည်။

"ဘယ်သူက စစ်သေနာပတိချုပ်စံအိမ်ထဲကို အဓမ္မ ကျူးကျော်ဝင်ရောက်ရဲတာလဲ!" လူအချို့က ချင်လော့ကို ပိတ်ဆို့ရန် ကြိုးပမ်းလာကြသည်။

"ကျန့်ရှန်းတပ်မတော်ရဲ့ ဒုတိယစစ်သူကြီး ချောင်ယဲ့က ကောင်းကင်မဟာမိတ်အဖွဲ့၊ ထျန်းဝူစစ်သူကြီး ယန်ကျန်တို့နဲ့ ပူးပေါင်းပြီး ငါတို့ရဲ့ မဟာချင်အင်ပါယာကို သစ္စာဖောက်ခဲ့တယ်။ ဒါက နိုင်ငံတော်ပုန်ကန်မှုပဲ! လူတိုင်းမှာ သူ့ကို ကွပ်မျက်ပိုင်ခွင့် ရှိတယ်!"

"ဒီနေ့မှာတော့ ငါမင်းသားက ဒီသစ္စာဖောက်ကို ကွပ်မျက်ဖို့ အထူးပဲ လာခဲ့တာ။ ငါ့ကို တားတဲ့သူမှန်သမျှ သေရမယ်!"