အခန်း ၃၅၆

အခန်း (၃၅၆) ကမ္ဘာ့သူဌေးကြီးတွေရဲ့ ရူးသွပ်မှု

​အမြဲတမ်း ကျက်သရေရှိပြီး တည်ငြိမ်နေတတ်သော သက်ကြီးရွယ်အို အိမ်တော်ထိန်းသည် သူ၏ ဘဝတွင် ပထမဆုံးအကြိမ်အဖြစ် အသက်ရှူမှားသွားပြီး ပါးစပ်အဟောင်းသား ဖြစ်သွားကာ သူ၏ လက်ထဲရှိ တက်ဘလက် ကွန်ပျူတာလေးပင် အောက်ရှိ ကော်ဇောအထူကြီးပေါ်သို့ ဘုတ်ခနဲ ပြုတ်ကျသွားခဲ့သည်။

​အရှေ့အလယ်ပိုင်းရှိ ဇိမ်ခံရုံးခန်းကြီးတစ်ခုထဲတွင်... မင်းသားက ဤသတင်းကောင်းကို ဖခင်ဖြစ်သူထံသို့ ပြောပြရန် ဖုန်းကို စိတ်လှုပ်ရှားစွာ ကောက်ကိုင်လိုက်စဉ် အနောက်သို့ လှည့်ကြည့်လိုက်ရာ သူ၏ ရွှေစင်စားပွဲကြီး၏ အလယ်ဗဟိုတွင် ထူးခြားသော ရနံ့များ သင်းပျံ့နေသည့် နတ်ဆေးလုံးလေးတစ်လုံး လေထဲမှ ရုတ်တရက် ပေါ်လာသည်ကို မြင်လိုက်ရ၏။

​ကမ္ဘာတစ်ဝန်းရှိ အခြားသော နေရာ ၁၈ ခုတွင်လည်း ဤကဲ့သို့ အံ့ဖွယ်ကောင်းသော မြင်ကွင်းများ တစ်ပြိုင်နက်တည်း ဖြစ်ပေါ်နေလေသည်။

​ပို့ဆောင်ပေးသူ မရှိ၊ လူချင်းလွှဲပြောင်းပေးခြင်း မရှိသလို မည်သည့် ကြိုတင်သတိပေးချက်မျှလည်း မရှိခဲ့ချေ။

​တောင်တန်းများနှင့် သမုဒ္ဒရာများကို ဖြတ်ကျော်ကာ... အကွာအဝေးများနှင့် နိုင်ငံနယ်နိမိတ်များကို လျစ်လျူရှု၍...

​ကျန်းယဲ့ စကားပြောပြီးသည်နှင့် ခဏအကြာမှာပင် ဝယ်ယူသူတိုင်း၏ မျက်စိရှေ့တွင် ဆေးလုံးက တိကျစွာ လေထဲမှ ပေါ်လာခဲ့ခြင်းပင်။

​ထိုအချိန်လေးတွင် အောင်မြင်စွာ ဝယ်ယူနိုင်လိုက်သည့် ကြီးမားသော ပျော်ရွှင်မှုအားလုံးက ဤမယုံနိုင်စရာကောင်းလှသော ပို့ဆောင်မှုနည်းလမ်းကြောင့် ဖြစ်ပေါ်လာသည့် အတိုင်းအဆမဲ့ တုန်လှုပ်မှုဖြင့် အစားထိုး ဝင်ရောက်သွားကြသည်။

​ကျန်းယဲ့က စခရင်ပေါ်တွင် ရူးသွပ်လုမတတ် အဆက်မပြတ် တက်နေဆဲဖြစ်သော မှတ်ချက်များကို ကြည့်ကာ ပြုံးပြီး မေးလိုက်၏။ "ခုနက အသက်ရှည်ဆေးလုံးကို ဝယ်နိုင်လိုက်တဲ့ မိတ်ဆွေအယောက်နှစ်ဆယ်လုံး ပစ္စည်းတွေ ရောက်ပြီလား... ကျေးဇူးပြုပြီး အတည်ပြုပေးပါဦး... အားလုံး အဆင်ပြေတယ်ဆိုရင် ကျွန်တော်တို့ရဲ့ အရောင်းအဝယ် ကိစ္စပြီးပါပြီ..."

​သူ စကားပြောပြီးသည်နှင့် တစ်ပြိုင်နက် လက်ဆောင် အထူးပြုလုပ်ချက်များနှင့် သာမန်မှတ်ချက်များ ပြည့်နှံနေသည့် တိုက်ရိုက်ထုတ်လွှင့်မှု စခရင်ပေါ်တွင် အရာသစ်တစ်ခု ရုတ်တရက် ပေါ်လာချေသည်။

​ရွှေရောင်ဘောင် အမိုက်စားများ၊ ဧရာမ စာလုံးကြီးများနှင့် ကောင်းကင်ယံတွင် ပျံသန်းနေသော ဖီးနစ်ငှက် အထူးပြုလုပ်ချက်များပင် ပါဝင်သည့် မျက်စိဖမ်းစားနိုင်သော မက်ဆေ့ချ်များက စခရင်ကို တစ်ခုပြီးတစ်ခု ဖြတ်သန်းသွားပြီး လူတိုင်း၏ အာရုံကို ဖမ်းစားသွားသည်။

​[ ရရှိပါပြီ... ကျေးဇူးတင်ပါတယ် မစ္စတာကျန်း.. ]

​[ ရရှိပါပြီ.... တကယ့်ကို အံ့မခန်းပါပဲ.. ]

​[ ရရှိကြောင်း အတည်ပြုပါတယ်... မယုံနိုင်စရာပါပဲ... ]

​[ ရရှိပါပြီ... အရမ်းကို ကျေးဇူးတင်ပါတယ်...]

​...

​ရရှိပါပြီဟူသော ကြေညာချက် အခုနှစ်ဆယ်က သီးသန့်ဖြစ်ပြီး ဂုဏ်သိက္ခာကြီးမားလှသော အထူးပြုလုပ်ချက်အပြည့်အစုံဖြင့် စခရင်ပေါ်တွင် စစ်ရေးပြပွဲတစ်ခုကဲ့သို့ သပ်ရပ်ပြီး အံ့မခန်းဖွယ်ရာ ဖြတ်သန်းသွားကြသည်။

​ဤမြင်ကွင်းက တိုက်ရိုက်ထုတ်လွှင့်မှုကို ကြည့်ရှုနေကြသည့် သာမန်အင်တာနက်အသုံးပြုသူများကို လုံးဝ ကြက်သေ သေသွားစေခဲ့ပြီး အားကျတဲ့ မျက်ရည်များပင် စီးကျလာကြရသည်။

​[ သေလိုက်ပါတော့... ဒါက သူဌေးတွေအတွက် သီးသန့်လုပ်ပေးထားတဲ့ မှတ်ချက်ပေးတဲ့စနစ်လား... ]

​[ တောက်.. အထူးပြုလုပ်ချက်တွေ၊ မြင်ကွင်းတွေက ရရှိပါပြီဆိုတဲ့ မက်ဆေ့ချ်လေး တစ်ကြောင်း ပို့တာတောင် အရမ်းကို မိုက်လွန်းနေပြီကွာ... ]

​[ ငါ ငိုလိုက်ပြီ... သူဌေးတွေရဲ့ ကမ္ဘာက လုံးဝကို ကွဲပြားတာပဲ... မှတ်ချက်ပေးတာလေးကအစ ငါတို့နဲ့ မတူဘူး... ]

​[ ဒါရိုက်တာကျန်းရဲ့ ပို့ဆောင်မှုနည်းလမ်းက အံ့မခန်းပဲ... အဝေးကနေ ပို့လိုက်တာတဲ့.. ဒါက တကယ့်ကို နတ်ဘုရားစွမ်းရည်ပဲ.. ]

​[ ဒါရိုက်တာကျန်းက ငါ့ရဲ့ နတ်ဘုရားပဲလို့ ငါ ကြေညာတယ်... ]

​ဤမက်ဆေ့ချ် အခုနှစ်ဆယ်က အချက်ပြလိုက်သကဲ့သို့ ဖြစ်သွားပြီး နောက်တစ်စက္ကန့်တွင် တိုက်ရိုက်ထုတ်လွှင့်မှုတစ်ခုလုံးရှိ လက်ဆောင် အထူးပြုလုပ်ချက်များက လုံးဝကို ရူးသွပ်သွားသည့် အခြေအနေသို့ ရောက်ရှိသွားလေတော့သည်။

​ပွဲတော်၊ စကြဝဠာ နှလုံးသား၊ အိပ်မက်ရဲတိုက် ... တိုရင်၏ ထိပ်တန်းအဆင့် လက်ဆောင် အထူးပြုလုပ်ချက်များက နျူကလီးယား ပေါက်ကွဲသကဲ့သို့ ပေါက်ကွဲထွက်လာပြီး တိုက်ရိုက်ထုတ်လွှင့်မှု စခရင်တစ်ခုလုံးကို လုံးဝ ဖုံးလွှမ်းသွားလုမတတ် ဖြစ်သွားရသည်။

ယွမ် ထောင်ပေါင်းများစွာ၊ သောင်းပေါင်းများစွာ တန်ဖိုးရှိသည့် ဤလက်ဆောင်များက တကယ်ပဲ အလကားရနေသကဲ့သို့ အဆက်မပြတ်နှင့် ရပ်တန့်သွားခြင်း အလျဉ်းမရှိဘဲ ဆက်တိုက် တက်လာနေခဲ့သည်။

​ယခုလေးတင် အံ့ဖွယ် ပို့ဆောင်မှုကို ကိုယ်တိုင်ကြုံတွေ့ခဲ့ရသော ကံကောင်းသည့် ဝယ်ယူသူ နှစ်ဆယ်က အထူးသဖြင့် ရက်ရောကြပြီး သူတို့၏ စိတ်လှုပ်ရှားမှုများနှင့် ကျန်းယဲ့အပေါ် ကြည်ညိုလေးစားမှုများကို လှိုင်းလုံးများကဲ့သို့ ဆက်တိုက် တက်လာနေသော စူပါလက်ဆောင်ကြီးများဖြင့် ဖော်ပြနေကြသည်။

​မှတ်ချက်များကဏ္ဍတွင် အံ့အားသင့်သည့် အော်ဟစ်သံများဖြင့် ပြည့်နှက်နေလေသည်။

​[ သူတို့ ရူးသွားပြီ.. သူတို့အားလုံး ရူးသွားကြပြီဟေ့.. ]

​[ ငါ့မျက်လုံးတွေက အထူးပြုလုပ်ချက်တွေကြောင့် မျက်စိတွေတောင် ကျိန်းနေပြီကွာ.. ]

​[ အဲ့ဒါက တကယ့်ကို ငွေတွေ အများကြီး ကုန်မှာပဲ... မိနစ်တိုင်း မိနစ်တိုင်းမှာ သန်းနဲ့ချီ လောင်ကျွမ်းနေတာ... ]

​ဤအလွန်အမင်း ရူးသွပ်နေမှုများကြားတွင် သာမန်မှတ်ချက်တစ်ခုက မရေမတွက်နိုင်သော အထူးပြုလုပ်ချက်များကြားမှ ဆန်းကြယ်စွာ လူတို့၏ အာရုံစိုက်မှုကို ရရှိသွားခဲ့သည်။

​[ ဒါရိုက်တာကျန်း... Top 1 က ဖောက်သည်အတွက် အထူးခံစားခွင့်လေး ဘာလေး မရှိဘူးလား... ဥပမာ- နောက်တစ်ခါ ဆေးလုံးတွေ ရောင်းရင် အလုအယက် ဝယ်စရာမလိုဘဲ ကြိုတင်ရွေးချယ်ပေးတာမျိုးလေ... ]

​ဤစကားတစ်ခွန်းက ပွဲကြည့်ချင်နေကြသော အင်တာနက်အသုံးပြုသူများ၏ စိတ်အားထက်သန်မှုကို ချက်ချင်း မီးတောက်လောင်သွားစေချေသည်။

​[ ဟုတ်တယ်.. ထိပ်တန်းပရိသတ်ကြီးအတွက် နေရာလေးတော့ ရှိရမှာပေါ့... ]

​[ တရားဝင် မဟုတ်တဲ့ ဆုံးဖြတ်ချက်... တရားဝင် မဟုတ်တဲ့ ဆုံးဖြတ်ချက်... တရားဝင် မဟုတ်တဲ့ ဆုံးဖြတ်ချက်ပဲကွ... ]

​[ ဟေး စထရင်းမာ... ထိပ်ဆုံးက ရောင်းအားအကောင်းဆုံးကို တစ်ချက်ကြည့်လိုက်ဦး.... လုပ်လိုက်စမ်းပါ... ]

​[ +၁ ]

​[ +၁၀၀၈၆ ]

​[ +ID နံပါတ် ]

​မရေမတွက်နိုင်သော လူများက ထိုမှတ်ချက်ကို ကော်ပီကူးကာ ချပေးနေကြသဖြင့် မှတ်ချက်များ တစ်ခုလုံး ဤစကားတစ်ခွန်းတည်းဖြင့် ချက်ချင်း ပြည့်နှံသွားလေတော့သည်။

​ထို့ကြောင့် ကျန်းယဲ့အနေဖြင့် မမြင်ချင်ယောင် ဆောင်ချင်လျှင်တောင် မရနိုင်တော့ချေ။

​သူက ထိုစာကြောင်းကို အသံထွက်ဖတ်လိုက်၏။ "Top 1 အတွက် အထူးခံစားခွင့် ရှိသလားတဲ့လား... နေရာတစ်ခု သေချာပေါက် ကြိုပေးထားရမလား... ဒါက... နည်းနည်း များလွန်းမနေဘူးလား..."

​သူက အခက်တွေ့နေသည့်ပုံစံ ပြုလုပ်လိုက်၏။

​သို့သော် ဤစကားများက ပျားအုံကို တုတ်နှင့်ထိုးလိုက်သကဲ့သို့ ဖြစ်သွားလေသည်။

​လက်ဆောင်များ မိုးရွာသကဲ့သို့ ပေးနေကြသော ထိုသူဌေးကြီး ကြည့်ရှုသူများက ပို၍ပင် ကြီးကျယ်ခမ်းနားသော အထူးပြုလုပ်ချက် မှတ်ချက်များဖြင့် တုံ့ပြန်လာကြလေသည်။

​[ ဒါက အရမ်းကောင်းတယ်လို့ ထင်ပါတယ်... ] (ပွဲတော်ဆယ်ခုတွဲလျက်)

​[ ဒါက အရမ်းကောင်းတဲ့ အကြံပြုချက်ပဲ... ] (စကြဝဠာ နှလုံးသား အခုနှစ်ဆယ်တွဲလျက်)

​[ အမိုက်စား အကြံပြုချက်ပဲ... ] အိပ်မက်ရဲတိုက်များ ဆက်တိုက်တွဲလျက်)

​မှတ်ချက်များကဏ္ဍတွင်လည်း စိတ်လှုပ်ရှားမှုများဖြင့် ဆူညံနေလေသည်။

​[ ဘော့စ်ကြီးတွေ အားလုံးက ကောင်းတယ်လို့ ပြောနေမှတော့ ဒါက တကယ်ကို ကောင်းတာပဲ... ]

​[ အလျှော့ပေးလိုက်ပါ စထရင်းမာရေ... ]

​[ ဒါရိုက်တာကျန်း... ထိပ်တန်း စပွန်ဆာကြီးရဲ့ တောင်းဆိုမှုကို သဘောတူပေးလိုက်ပါ... ]

​လုံးဝကို ထိန်းမနိုင်သိမ်းမရ ဖြစ်နေသော အခြေအနေကို ကြည့်ကာ ကျန်းယဲ့က မတတ်နိုင်စွာ ပြုံးလိုက်၏။ "ကောင်းပါပြီ... ကောင်းပါပြီ... အားလုံးက အဲ့ဒီလို ပြောနေကြမှတော့ အများဆန္ဒကို ဆန့်ကျင်ဖို့ ခက်တာပေါ့... ဒါဆိုလည်း အလျှော့ပေးလိုက်ပါ့မယ်..."

​"ဒီတော့... ကျွန်တော် လိုင်းမဆင်းခင် ဆယ်မိနစ်လောက် အချိန်ကျန်ပါသေးတယ်... ကျွန်တော် လိုင်းဆင်းမယ့်အချိန်မှာ အမှတ်ပေးဇယားရဲ့ နံပါတ် ၁ နေရာမှာ ရှိနေတဲ့သူက နောက်တစ်ခါ ဘယ်ဆေးလုံးမျိုးပဲ ရောင်းရောင်း အလုအယက် ဝယ်စရာမလိုဘဲ ဦးစားပေး ဝယ်ယူခွင့် ရပါလိမ့်မယ်..."

​ဤစကားများက ဆူပွက်နေသော ဆီအိုးထဲသို့ ရေခဲရေ တစ်ခွက် လောင်းထည့်လိုက်သကဲ့သို့ပင်။

​ပေါက်ကွဲသွားခဲ့ပြီ....

​လုံးဝကို ပေါက်ကွဲသွားခြင်းပင်....

​ကမ္ဘာတစ်ဝန်းရှိ လက်ဆောင်များကို အရူးအမူး ပေးနေကြသော သူဌေးကြီးများ၏ မျက်ဝန်းများက မနာလိုမှုကြောင့် ချက်ချင်း နီရဲသွားကြသည်။

​ဥရောပရဲတိုက်ကြီးထဲတွင် သက်ကြီးရွယ်အို မြို့စားကြီးက ဖုန်းထဲသို့ အော်ဟစ်လိုက်၏။ "မြန်မြန်... ဆက်ဖြည့်နေ... မရပ်နဲ့... ဖောင်ဒေးရှင်းက သီးသန့်ဖယ်ထားတဲ့ အရင်းအနှီးတွေကိုပါ လွှဲလိုက်.... ဆယ်မိနစ်အတွင်း စာရင်းရဲ့ ထိပ်ဆုံးမှာ ငါ့နာမည်ကို တွေ့ချင်တယ်..."

​နယူးယောက်မြို့ရှိ ရုံးခန်းထဲတွင် ဆေးလုံး မဝယ်နိုင်လိုက်သော ထိုငွေရေးကြေးရေး သူဌေးကြီးက နောက်ထပ် အခွင့်အရေးတစ်ခုကို တွေ့သွားပြီး သူ၏ နည်းပညာအဖွဲ့ကို အော်ဟစ်လိုက်၏။ "တိုရင်ကို ဆက်သွယ်.... ချက်ချင်း... အခုချက်ချင်း... အမြင့်ဆုံး ငွေပေးချေမှု ကန့်သတ်ချက်ကို လိုချင်တယ်... အကန့်အသတ်မရှိ.... ပို့လိုက်.... ငါတို့ ထိပ်ဆုံးနေရာကို ရကိုရရမယ်...."

​အရှေ့အလယ်ပိုင်းမှ မင်းသားကလည်း သူ၏ ဘဏ္ဍာရေးဝန်ကြီးအား တိုက်ရိုက် အမိန့်ပေးလိုက်၏။ "ရနိုင်သမျှ ရန်ပုံငွေတွေ အားလုံးကို စုစည်းပြီး သတ်မှတ်ထားတဲ့ ဖျော်ဖြေရေး အကောင့်ထဲကို လွှဲလိုက်... မြန်မြန်"

​အချို့က ဖြတ်လမ်းမှသွားရန်ပင် ကြိုးစားကြပြီး အထူးဝင်ရောက်ခွင့် တောင်းခံရန် သို့မဟုတ် အမှတ်ပေးဇယား၏ ထိပ်ဆုံးနေရာကို လက်ဝါးကြီးအုပ်ရန် တိုရင်းရုံးချုပ်သို့ အရူးအမူး ဆက်သွယ်လိုက်ကြသည်။ သို့သော် သူတို့ရရှိခဲ့သော အဖြေမှာ နည်းပညာက ဝင်စွက်ဖက်လို့ မရပါဘူး... တရားမျှတစွာ ယှဉ်ပြိုင်ကြပါဟူသော အေးစက်စက် အဖြေသာ။

​တစ်ချိန်တည်းမှာပင် တိုက်ရိုက်ထုတ်လွှင့်မှုကို ကြည့်ရှုနေကြသည့် ကမ္ဘာတစ်ဝန်းမှ ပရိသတ်များမှာ ဤဆယ်မိနစ်စာ စကြဝဠာတိုက်ပွဲကြီးကြောင့် သွားရည်များပင် ကျလာသည်အထိ လုံးဝ ကြက်သေ သေသွားကြရသည်။

​[ ငါ ထုံကျဉ်သွားပြီ... တကယ်ကြီး ထုံကျဉ်သွားပြီဟေ့... ]

​[ ဒီသူဌေးတွေ ပွဲတော်ထဲမှာ ပိုက်ဆံသုံးနေတာက ငါ ကြယ်လေးတစ်ပွင့်အတွက် ပိုက်ဆံတစ်ပြား သုံးသလိုမျိုး ပေါ့ပေါ့ပါးပါးပဲ... ]

​[ မဟုတ်ဘူး... ငါတို့စုထားတဲ့ ကြယ်လေးတွေလောက်တောင် တန်ဖိုးမရှိတာ... ဒါက တကယ့်ကို နျူကလီးယားနဲ့ ပစ်ပေါက်နေတာပဲ... ]

​[ ထိပ်တန်းအလှူရှင်က သေချာပေါက် နဂါးနှလုံးသားပဲ ဖြစ်ရမယ်လို့ ငါ ငါးပြားလောင်းတယ်... ]

​[ သေချာချင်မှ သေချာမှာ... ဟို အမည်မသိ အသုံးပြုသူ ၀၀၈ဆိုတဲ့သူ ဘယ်လောက်တောင် အကြိတ်အနယ် ဝင်တိုက်နေလဲ ကြည့်ဦး... ]

​[ လက်ဆောင် အဆင့်သတ်မှတ်ချက်ကို ကြည့်ဦး.... ဘုရားရေ... ဟိုဂူအောင်းနေသူဆိုတာက ဘယ်သူလဲ?! ဆယ်မိနစ်အတွင်းမှာကို ထိပ်ဆုံးသုံးယောက်စာရင်းရဲ့ အပြင်ဘက်ကနေ ရုတ်တရက် ခုန်တက်လာတာ... ]

​[ လောxxdeတို့၊ လော xဖေး xတို့လို နာမည်တွေက တကယ်ကြီးလား.... ]

​[ လျှို့ဝှက်ကုဒ်နာမည်တွေ အများကြီးပဲ... ရသေ့ကျောင်း၊ ခွန်းလွန်း၊ ဟုန်မန်အဖွဲ့... သေလိုက်ပါတော့... ဒါတွေက ဒဏ္ဍာရီထဲက မိသားစုတွေများလား... ]

​[ ဖိနှိပ်ခံလိုက်ရပြီ... အမည်မသိအသုံးပြုသူ ၀၀၇က သဲကန္တာရနေမင်းကို ဖိနှိပ်သွားပြီ... ]

​[ အမိုက်စားပဲ... ဒီကုဒ်နာမည်နဲ့ ဘော့စ်ကြီးတွေက လူသိရှင်ကြား ကြေညာထားတဲ့ ကမ္ဘာ့ဘီလီယံနာတွေကို အနိုင်ကျင့်နေတာပဲ... ဒါက တကယ်ကို ရှုပ်ထွေးတဲ့ အခြေအနေကြီးပဲ... ]

အခန်း ၃၅၆ပြီး၏။