အခန်း ၃၅၈

အခန်း (၃၅၈) ခါမဲဒါအီချီရို၏ သေဆုံးမှု

​[ ပြင်သစ် ] : ဒီကံဆိုးတဲ့ စူးစမ်းရှာဖွေသူအတွက် ဝမ်းနည်းပူဆွေးရပါတယ်။ ဒါပေမဲ့ ဒါက အံ့သြစရာတော့ မဟုတ်ဘူးမလား... သဘာဝလွန် စွမ်းအားတွေနဲ့ ကြောက်မက်ဖွယ်ကောင်းတဲ့ မိစ္ဆာသားရဲတွေရှိတဲ့ ကမ္ဘာကြီးတစ်ခုက ဘယ်လိုလုပ်ပြီး အကြွင်းမဲ့ ဘေးကင်းလုံခြုံနိုင်မှာလဲ... အခွင့်အရေးဆိုတာ အမြဲတမ်း အန္တရာယ်နဲ့ ဒွန်တွဲနေတာပဲလေ...

​[ ဗြိတိန် ] : အဖြစ်ဆိုးပေမဲ့လည်း စီစဉ်သူတွေကို အပြစ်တင်ဖို့ကတော့ ခက်ခဲပါတယ်။ တောရိုင်းစူးစမ်းလေ့လာရေး ခရီးထွက်တာ ဒါမှမဟုတ် ဧဝရက်တောင်ကို တက်တာမျိုးတွေလိုပဲ... အန္တရာယ်ရှိကြောင်း သတိပေးချက်ကို လက်မှတ်ရေးထိုးပြီး အကျိုးဆက်တွေကို ကိုယ်တိုင် တာဝန်ယူရမှာပါ။ သူ ကံဆိုးသွားတယ်လို့ပဲ ပြောရမှာပေါ့...

​[ ဩစတြေးလျ ] : ရဲရင့်သူတွေကို ကံတရားက မျက်နှာသာပေးတာပဲ.... သေရမှာကြောက်ရင် အစကတည်းက အဲ့ဒီနေရာလေးတစ်ခုအတွက် သွားမလုခဲ့သင့်ဘူး... အသက်နှစ်ဆယ် ပိုရှည်စေဖို့နဲ့ နတ်ဘုရားအဖြစ် ကျင့်ကြံခွင့်ရဖို့ဆိုတာ အသက်စွန့်ရဲလောက်အောင် တန်တဲ့အရာတွေပဲ... ဒီစစ်သည်တော်ကြီး ကံဆိုးသွားတယ်လို့ပဲ ပြောနိုင်ပါတယ်...

​[ ကနေဒါ ] : ဒီကိစ္စကြောင့် အချိန်နဲ့ ဟင်းလင်းပြင် ခရီးသွားအေဂျင်စီအနေနဲ့ ပိုပြီးအသေးစိတ်ကျတဲ့ အန္တရာယ်သတိပေးချက်နဲ့ ဘေးကင်းလုံခြုံရေး စည်းမျဉ်းတွေကို ထုတ်ပြန်လာနိုင်တယ် မဟုတ်လား... ဒါပေမဲ့ ဒီကိစ္စလေးတစ်ခုကြောင့် ပရောဂျက်တစ်ခုလုံးကို ပယ်ဖျက်လိုက်မယ်ဆိုရင်တော့ မိုက်မဲရာကျမှာပါ...

​[ ဂျာမနီ ] : စိတ်မကောင်းစရာပါပဲ... ဒါပေမဲ့ ယုတ္တိဗေဒအရတော့ ရှောင်လွှဲလို့မရတဲ့ ကိစ္စပါ။ သေဆုံးရတဲ့ အကြောင်းရင်းက မိစ္ဆာသားရဲကြောင့်လား... တိုက်ခိုက်မှုကြောင့်လား... ဒါမှမဟုတ် တခြား မတော်တဆမှုတစ်ခုခုကြောင့်လားဆိုတာကို ရှင်းလင်းဖို့ ပိုမိုတိကျတဲ့ စုံစမ်းစစ်ဆေးမှု အစီရင်ခံစာ ထွက်ပေါ်လာမယ်လို့ မျှော်လင့်ပါတယ်။ ဒါက အရမ်း အရေးကြီးပါတယ်...

​ဂျပန် အွန်လိုင်းအသိုင်းအဝိုင်းတွင်မူ ခံစားချက်များက ပို၍ပြင်းထန်ပြီး ရှုပ်ထွေးနေလေသည်။

​[ ဂျပန် ] : အရူး... ဘာလို့ ပထမဆုံး သေတဲ့သူက ဂျပန်လူမျိုး ဖြစ်နေရတာလဲ.... ဒါက သေချာပေါက် ပူးပေါင်းကြံစည်မှုတစ်ခုပဲ... ဒါက ကျန်းယဲ့ရဲ့ လျှို့ဝှက်အကြံအစည်ပဲ... သမိုင်းဝင် ရန်ငြိုးတွေကြောင့် ခါမဲဒါစန်းကို သူ တမင်သတ်လိုက်တာ....

​[ ဂျပန် ] : တရုတ်နိုင်ငံအနေနဲ့ အမှန်တရားကို ဖော်ထုတ်ပေးဖို့ ငါတို့ တောင်းဆိုတယ်... အချိန်နဲ့ ဟင်းလင်းပြင် ခရီးသွားအေဂျင်စီအနေနဲ့ အပြည့်အဝ တာဝန်ယူဖို့ တောင်းဆိုတယ်... ပြစ်မှုကျူးလွန်သူတွေကို ပြင်းပြင်းထန်ထန် အပြစ်ပေးရမယ်.... ဒါက ငါတို့ ယာမာတိုလူမျိုးတွေအတွက် အရှက်ရစေတာပဲ... ငါတို့ ဒီကိစ္စကို လုံးဝ အလွတ်ပေးမှာ မဟုတ်ဘူး...

​[ ဂျပန် ] : ငါတို့က ဝမ်းနည်းဒေါသထွက်နေပေမဲ့လည်း... စာရင်းသွင်းတုန်းက သဘောတူညီချက် စည်းကမ်းချက်တွေမှာတော့ အမည်မသိ အန္တရာယ်တွေနဲ့ ကိုယ်ပိုင်တာဝန်ယူမှုဆိုင်ရာ အချက်တွေ ပါဝင်နေခဲ့တာ အမှန်ပဲ... သေချာတာပေါ့... ခရီးသွားအေဂျင်စီရဲ့ လုံခြုံရေးတာဝန်ယူမှုကိုတော့ ရှောင်လွှဲလို့မရဘူး.... အသေးစိတ် ရှင်းလင်းချက်တစ်ခု လိုအပ်တယ်...

​ကမ္ဘာတစ်ဝန်း၏ အာရုံစိုက်မှုက ကျန်းယဲ့နှင့် သူ၏ အချိန်နဲ့ ဟင်းလင်းပြင် ခရီးသွားအေဂျင်စီအပေါ်သို့ နောက်တစ်ကြိမ် ထပ်မံကျရောက်လာပြန်သည်။ သို့သော် ဤတစ်ကြိမ်တွင်တော့ ထိုအကြည့်များက သံသယများ၊ စိစစ်ဝေဖန်မှုများနှင့်အတူ သတိမထားမိလောက်အောင် တိုးညင်းသည့် အကြောက်တရား အနည်းငယ်ဖြင့် ပြည့်နှက်နေချေသည်။

​ပထမဆုံး သေဆုံးမှုဖြစ်စဉ် ထွက်ပေါ်လာခြင်းက အရူးအမူး ရေပန်းစားနေသည့် အချိန်နှင့် ဟင်းလင်းပြင်ခရီးသွားခြင်းအပေါ် ရေအေး တစ်ပုံး လောင်းချလိုက်သကဲ့သို့ပင်။

​ည ၇ နာရီ ၅၀ မိနစ်အချိန်တွင် ကျန်းယဲ့က ပြတင်းပေါက်ကို ပျင်းရိစွာ မှီထားပြီး ညနေခင်း လေပြေအေးလေးက ဖြတ်သန်းတိုက်ခတ်နေခဲ့သည်။

​သူက ဖုန်းတစ်လုံးကို ကိုင်ထားပြီး တစ်ဖက်လိုင်းတွင်တော့ ချန်ချင်း ဖြစ်သည်။

​"အွန်လိုင်းပေါ်က ဆူညံပွက်လောရိုက်နေတာတွေကို ခင်ဗျား တွေ့ပြီးပြီ မဟုတ်လား... ဂျပန်မှာ အတော်လေး ဆူပူနေပြီး လျှို့ဝှက်အကြံအစည် သီအိုရီ မျိုးစုံတောင် ထွက်နေပြီ... ဒါကို ဘယ်လို ကိုင်တွယ်ဖို့ စီစဉ်ထားလဲ..." ချန်ချင်း၏ အသံတွင် စိုးရိမ်ပူပန်မှု အနည်းငယ် ပါဝင်နေ၏။

​ပြတင်းပေါက်အပြင်ဘက်ရှိ မြို့ပြ၏ နီယွန်မီးရောင်များကို ကြည့်ကာ ကျန်းယဲ့က ပေါ့ပေါ့ပါးပါးပင် ပြောလိုက်၏။ "သူ့ကိုယ်သူ ဒုက္ခရှာတာလေ... တခြားဘယ်သူ့ကိုမှ အပြစ်တင်လို့ မရဘူး..."

​ချန်ချင်းက သက်ပြင်းချလိုက်၏။ "ခါမဲဒါအီချီရိုရဲ့ တိကျတဲ့ အခြေအနေကို ကျွန်တော်တို့ စုံစမ်းသိရှိထားပြီးပါပြီ... သူ သေသင့်တယ်ဆိုတာ သေချာပါတယ်... ဒါပေမဲ့ လူထုအမြင်ဆိုတာက အမြဲတမ်း အကြောင်းပြချက်ကို လိုက်နာလေ့မရှိဘူးလေ... ပြီးတော့ ပြဿနာကို ပိုကြီးလာအောင် သွေးထိုးလှုံ့ဆော်ချင်နေတဲ့ လူတွေလည်း အတော်လေး ရှိနေတယ်... ဒီကိစ္စ ဆက်ပြီး ကြီးထွားလာရင် ခင်ဗျားရဲ့ ဂုဏ်သိက္ခာကို ထိခိုက်လာမှာကို ကျွန်တော် စိုးရိမ်တယ်..."

​ကျန်းယဲ့က ပေါ့ပေါ့ပါးပါး ဆက်နေရင်း တခစ်ခစ် ရယ်မောလိုက်လေသည်။ "စိတ်မပူပါနဲ့... ဒီည တိုက်ရိုက်ထုတ်လွှင့်မှုမှာ ကျွန်တော် ရှင်းလိုက်ပါ့မယ်... ခင်ဗျားတို့ ဝင်ပါစရာ မလိုပါဘူး... စကားမစပ် ဂျပန်အစိုးရက ရှင်းလင်းချက်ပေးဖို့ ခင်ဗျားတို့ကို ဖိအားပေးလာသေးလား..."

​ချန်ချင်းက ဖုန်းတစ်ဖက်မှနေ၍ ရယ်မောလိုက်၏။ "လူအဖွဲ့ တချို့ လာကြတယ်ဗျ... အခွင့်ကောင်းယူဖို့ ကြိုးစားနေကြတာ... ဒါပေမဲ့ အားလုံးကို ပြန်လွှတ်လိုက်တယ်... သူတို့ကို ကျွန်တော်တို့ လျစ်လျူရှုထားလိုက်တယ်..."

​ထိုစကားကို ကြားသောအခါ ကျန်းယဲ့က အော်ရယ်လိုက်လေသည်။ "ဟက်... သူတို့က ကိုယ့်နေရာကိုယ် ဘယ်တော့မှ မသိကြဘူးပဲ... သူတို့ကိုယ်သူတို့ အထူးအဆန်းများ မှတ်နေလား မသိဘူး..."

​ချန်ချင်းကလည်း သဘောတူညီစွာဖြင့် ပြန်ပြောလိုက်သည်။ "သူတို့က တကယ်ကို ရိုင်းစိုင်းတဲ့ကောင်တွေပဲ..."

​ဖုန်းချပြီးသွားချိန်တွင် တိုက်ရိုက်ထုတ်လွှင့်ရမည့် အချိန်သို့ ရောက်လုနီးပါး ဖြစ်နေခဲ့ချေပြီ။

​ကျန်းယဲ့က ကွန်ပျူတာဆီသို့ တည်ငြိမ်စွာ လျှောက်သွားကာ ထိုင်လိုက်၏။ ထို့နောက် သူ၏ အကောင့်သို့ ကျွမ်းကျင်စွာ ဝင်ရောက်လိုက်ပြီး တိုက်ရိုက်ထုတ်လွှင့်မှုကို စတင်လိုက်လေသည်။

​တိုက်ရိုက်ထုတ်လွှင့်မှု စခရင်လင်းလာသည်နှင့် တစ်ပြိုင်နက် များပြားလှသော ကြည့်ရှုသူများက ဒီရေလှိုင်းကြီးတစ်ခုကဲ့သို့ အလုအယက် ဝင်ရောက်လာကြပြီး အွန်လိုင်းမှ ကြည့်ရှုနေသူ အရေအတွက်က ယခင်ကထက် များစွာ ကျော်လွန်ကာ ထိုးတက်သွားကြသည်။

​သို့သော် ဤတစ်ကြိမ်တွင် မှတ်ချက်များထဲရှိ လေထုက လုံးဝကို ကွဲပြားခြားနားနေလေသည်။

​ပုံမှန်တွေ့နေကျ မင်္ဂလာညချမ်းပါ ဒါရိုက်တာကျန်း နှင့် ဒီနေ့ ဘာရောင်းမှာလဲ စသည့် မှတ်ချက်များအပြင် ဂျပန် IP လိပ်စာများ သို့မဟုတ် ဂျပန် ID များဖြင့် ရေးသားထားသော မှတ်ချက်အများအပြားက စခရင်ပေါ်တွင် ပြည့်လျှံနေပြီး အသုံးအနှုန်းများကလည်း အလွန် ရိုင်းစိုင်းပြင်းထန်နေခဲ့သည်။

​[ လူသတ်သမား.. ခါမဲဒါရဲ့ အသက်ကို ပြန်ပေး... ]

​[ ခါမဲဒါအီချီရို သေရတဲ့ အကြောင်းရင်းကို ရှင်းရှင်းလင်းလင်း ရှင်းပြရမယ်... ]

​[ ငါတို့ ဂျပန်လူမျိုးတွေ သေအောင် မင်း တမင်လုပ်ခဲ့တာလားကွ... ]

​[ ကမ္ဘာကြီးကို ရှင်းလင်းချက်တစ်ခု ပေး... ဒီအန္တရာယ်များတဲ့ လူသတ်ပွဲကြီးကို ရပ်တန်းက ရပ်ရမယ် ]

​[ ပူးပေါင်းကြံစည်မှုတစ်ခုပဲ... ဒါက သေချာပေါက် လျှို့ဝှက်အကြံအစည်ပဲ.. ]

​[ တောင်းပန်... လျော်ကြေးပေး... နောင်တရစမ်း... ]

​ဂျပန် IP လိပ်စာများထံမှ လွှမ်းမိုးနေသော ပြစ်တင်ရှုတ်ချမှုများနှင့် မေးခွန်းထုတ်မှုများက တရုတ်အင်တာနက် အသုံးပြုသူများ၏ ဒေါသကို ချက်ချင်း မီးပွင့်သွားစေလေသည်။

​မည်သည့် စည်းရုံးမှုမှ မလိုအပ်ဘဲ တရုတ်အင်တာနက် အသုံးပြုသူများက သူတို့၏ ဒေါသများဖြင့် ချက်ချင်း စည်းလုံးသွားကြပြီး သူတို့၏ လက်ချောင်းများက ကီးဘုတ်ပေါ်တွင် အလျင်အမြန် ပြေးလွှားကာ ပြင်းထန်သော တန်ပြန်တိုက်စစ်ကို စတင်လိုက်ကြ၏။

​[ ဒီကနေ ထွက်သွားစမ်း ခွေးကောင်တွေ... ဒီမှာ လာပြီး ဘာတွေ ပြဿနာလာရှာနေတာလဲကွ... ]

​[ သဘောတူညီချက်ကို လက်မှတ်ထိုးတုန်းက မင်းတို့ မျက်ကန်းဖြစ်နေတာလား.... အန္တရာယ်အားလုံးကို ကိုယ်တိုင်တာဝန်ယူရမယ်လို့ အဖြူအမည်းကွဲအောင် အတိအလင်း ရေးထားတာကို အခုကျမှ လာပြီး ဆင်ခြေပေးနေတယ်... ]

​[ ခရီးစဉ်ကို သွားဖူးတဲ့သူတိုင်း သိတယ်... ဒါရိုက်တာကျန်းရဲ့ ညွှန်ကြားချက်တွေကို လိုက်နာသရွေ့ ဘာမှမဖြစ်ဘူးဆိုတာ... ဒါက သေချာပေါက် ဟို ခါမဲဒါဆိုတဲ့ကောင် သူ့ကိုယ်သူ ဒုက္ခရှာတာပဲ....]

​[ ရှင်းလင်းချက်... ရှင်းလင်းချက်က ယီးပဲ.... မခံနိုင်ရင် မကစားနဲ့လေ... မင်းတို့က စောက်ကျင့်လည်းယုတ်တယ်... ကြွားလည်းကြွားသေးတယ်... ]

​[ သေမှာကြောက်ရင် နေရာသွားမလုနဲ့လေ.. မင်းတို့နေရာကို ငါတို့ကို ပေး... ]

​[ မင်းတို့ စိတ်ထားက ညစ်ပတ်နေတော့ အရာအားလုံးက လျှို့ဝှက်အကြံအစည်ကြီးလို မြင်နေတာပေါ့.... တောက် ]

​တရုတ်အင်တာနက် အသုံးပြုသူများက ဘာသာစကား ကြွယ်ဝမှု၊ ရန်လိုမှုနှင့် အရေအတွက် အားလုံးတွင် ပြိုင်ဘက်များကို လုံးဝ အသာစီးရသွားခဲ့သည်။

​ဂျပန်မှတ်ချက်များ ပေါ်လာရုံသာ ရှိသေးချိန်တွင် ပိုမြန်၊ ပိုများပြီး ပိုမိုပြင်းထန်လှသော တရုတ်မှတ်ချက်များ၏ ရေစီးကြောင်းအောက်တွင် ချက်ချင်း လွှမ်းမိုးခံလိုက်ရသဖြင့် သူတို့မှာ ပြန်လည်ခုခံနိုင်စွမ်းပင် မရှိတော့ချေ။

​အခြားနိုင်ငံများမှ ကြည့်ရှုသူများမှာမူ ဤပွဲကို အပြည့်အဝ အားပေးကြည့်ရှုရင်း အံ့အားသင့်ကာ တိတ်ဆိတ်နေခဲ့ကြသည်။ အချို့ဆိုလျှင် ပြဿနာကို ပိုကြီးစေလိုသည့်ဟန်ဖြင့် ချ..ချကြဟူသော မှတ်ချက်များကိုပင် တိုက်ရိုက်ထုတ်လွှင့်မှုထဲတွင် အဆက်မပြတ် ရေးသားနေကြလေသည်။

​ဖရိုဖရဲဖြစ်နေသော မှတ်ချက်များကို ကြည့်ကာ ကျန်းယဲ့က တည်ငြိမ်စွာ စကားစလိုက်ပြီး သူ၏ အသံက မိုက်ကရိုဖုန်းမှတစ်ဆင့် တိုက်ရိုက်ထုတ်လွှင့်မှု တစ်ခုလုံးသို့ ရှင်းလင်းစွာ ပျံ့နှံ့လာသည်။ "ဒီရွှမ်ဝူတိုက်ကြီး ခရီးစဉ်အတွင်းမှာ သေဆုံးမှု ရှိမရှိနဲ့ ဒီခရီးသွား ဘယ်လိုသေဆုံးသွားသလဲဆိုတာကို အားလုံးက အရမ်း စိတ်ဝင်စားနေကြပုံပဲ..."

​သူက တည်ငြိမ်စွာပြောရင်း လိုရင်းကို တိုက်ရိုက်သွားလိုက်၏။ "အချိန်ကိုက်ပါပဲ... ဒီအခွင့်အရေးကို ယူပြီး ကျွန်တော် ထပ်ရှင်းပြပါရစေ... ရွှမ်ဝူတိုက်ကြီး ၇ ရက်တာ ကျင့်ကြံခြင်းရှာဖွေရေး ခရီးစဉ်ကနေ ပြန်လာတဲ့ ခရီးသွား ငါးဆယ်အနက်မှာ တစ်ယောက် လျော့နေခဲ့တာ အမှန်ပါပဲ... ပြန်မပါလာတဲ့ ခရီးသွားက ဂျပန်နိုင်ငံက မစ္စတာ ခါမဲဒါအီချီရို ဖြစ်ပါတယ်..."

​"အွန်လိုင်းပေါ်က စွပ်စွဲချက်တွေ... အထူးသဖြင့် ဂျပန်နိုင်ငံက တချို့လူတွေ ယုံကြည်နေကြတဲ့ မစ္စတာ ခါမဲဒါအီချီရို သေဆုံးရတာက ပူးပေါင်းကြံစည်မှုတစ်ခုခုကြောင့်ဆိုတဲ့ ကိစ္စနဲ့ ပတ်သက်ပြီးတော့..."

​ဤနေရာတွင် ကျန်းယဲ့က အနည်းငယ် ရပ်နားလိုက်ပြီး သူ၏ မျက်ဝန်းများက စူးရှပြီး လေးနက်သွားရသည်။ "မစ္စတာ ခါမဲဒါအီချီရို သေဆုံးသွားရတဲ့အပေါ် ကျွန်တော် စိတ်မကောင်းဖြစ်ရပါတယ်... ဒါပေမဲ့ ဒီလို အခြေအမြစ်မရှိတဲ့ စွပ်စွဲချက်တွေနဲ့ ပတ်သက်ပြီး ကျွန်တော် ပြောနိုင်တာကတော့ ကျွန်တော် အရမ်းကို... ဝမ်းနည်းပြီး စိတ်ပျက်မိတယ် ဆိုတာပါပဲ..."

​"ခရီးမထွက်ခင် လက်မှတ်ရေးထိုးခဲ့တဲ့ သဘောတူညီချက် စည်းကမ်းချက်တွေအရဆိုရင် တကယ်တော့ ကျွန်တော် ဘယ်သူ့ကိုမှ ဘာမှရှင်းပြစရာ မလိုပါဘူး... အန္တရာယ်တွေကို ကိုယ်တိုင်တာဝန်ယူရမယ်ဆိုတာ စည်းကမ်းချက်တွေမှာ အတိအလင်း ရေးသားထားပြီးသားပါ..."

​ထို့နောက် သူက စကားလမ်းကြောင်းပြောင်းကာ ပြောလိုက်ပြန်သည်။ "ဒါပေမဲ့ မလိုအပ်တဲ့ ခန့်မှန်းချက်တွေကို ရှောင်ရှားဖို့ရယ် ဒီကိစ္စနဲ့ အချိန်နဲ့ ဟင်းလင်းပြင် ခရီးသွားခြင်းအကြောင်းကို စိုးရိမ်ပူပန်နေကြတဲ့ လူတိုင်းကို ရှင်းလင်းချက်တစ်ခု ပေးချင်တာရယ်ကြောင့် ဒီတစ်ကြိမ်တော့ ချွင်းချက်အနေနဲ့ လုပ်ဖို့ ကျွန်တော် ဆုံးဖြတ်လိုက်ပါတယ်..."

​သူ စကားပြောနေစဉ်မှာပင် ကြည်လင်ပြတ်သားသော ဗီဒီယိုတစ်ခုက တိုက်ရိုက်ထုတ်လွှင့်မှု စခရင်၏ တစ်ဖက်တစ်ချက်တွင် ပေါ်လာလေသည်။

အခန်း ၃၅၈ပြီး၏။