အခန်း ၈၄၂

အပိုင်း (၈၄၂)

ဤမြင်ကွင်းသည် အလွန် ရက်စက်ပြီး ကြောက်စရာ ကောင်းလှသည်။ အသွင်ပြောင်း ဝေလငါးကြီးသည် ပါးစပ်ကြီးကို ဟ၍ ပြင်းထန်စွာ စုပ်ယူလိုက်ရာ ချက်ချင်းပဲ လူဆယ်ဂဏန်း၊ ရာဂဏန်းခန့် ၎င်း၏ ပါးစပ်ထဲသို့ ဝင်ရောက်သွားပြီးနောက် ပြင်းထန်စွာ ဝါးစားလိုက်သည်။ ချက်ချင်းပဲ သွေးများက ပင်လယ်ပြင် တစ်ခုလုံးကို နီရဲသွားစေ၏။

တာ့ယန် အင်ပါယာ၏ ရေတပ်များ လုံးဝ အံ့ဩမှင်တက်သွားကြပြီး မျက်မှောက်ရှိ မြင်ကွင်းကို မယုံကြည်နိုင်အောင် ဖြစ်သွားကြသည်။

ရေတိုက်ပွဲကို အလွယ်တကူ အပြတ်အသတ် အနိုင်ရရှိခဲ့ပြီးနောက် ဤကဲ့သို့ ရေအောက် ဧရာမ သားရဲကြီး တစ်ကောင် ထွက်ပေါ်လာလိမ့်မည်ဟု မထင်မှတ်ထားခဲ့ကြပေ။ သူသည် ဘေးနားတွင် ဘယ်သူမှ မရှိသကဲ့သို့ လူများကို ရူးသွပ်စွာ ဝါးစားနေ၏။

တာ့ယန် အင်ပါယာ၏ ရေတပ်များလည်း ကြက်သီးမွေးညင်း ထသွားကြသည်။

ပင်လယ်ပြင်ပေါ်တွင် တာ့ယန် အင်ပါယာ၏ လေသင်္ဘောများသည် အဆက်မပြတ် ဆင်းသက်လာပြီး နည်းပညာရှင်များက ရေအောက်ရှိ အထူး အသွင်ပြောင်း ဝေလငါးကြီးကို ရှင်းလင်းစွာ ရိုက်ကူးနိုင်ရန် အစွမ်းကုန် ကြိုးစားနေကြ၏။

“ရေအောက် ဗုံးတွေ... ရေအောက် ဗုံးတွေ...”

“ရေငုပ်သင်္ဘော တော်ပီဒို ဖျက်ဗုံးတွေ...”

အမိန့်ပေးသံနှင့်အတူ စစ်သင်္ဘော အစင်း ဆယ်ဂဏန်းခန့်သည် ရေအောက်ဗုံးများကို အစွမ်းကုန် ပစ်ချကြသည်။

စစ်သင်္ဘောကြီး နှစ်စင်းကလည်း အသွင်ပြောင်း ဝေလငါးကြီးကို ချိန်ရွယ်ကာ ရေငုပ်သင်္ဘော ဖျက်ဗုံးများကို ပစ်လွှတ်ကြ၏။

“ရွှီး... ရွှီး...ရွှီး... ရွှီး......”

ရေအောက်ဗုံး အလုံး ဆယ်ဂဏန်းခန့်နှင့် ရေငုပ်သင်္ဘော ဖျက်ဗုံး လေးလုံးသည် မီတာ တစ်ရာ ရှည်လျားသော အသွင်ပြောင်း ဝေလငါးကြီးဆီသို့ အရှိန်အဟုန်ဖြင့် ပြေးဝင်သွားကြသည်။

“ဝုန်း.. ဝုန်း... ဝုန်း.. ဝုန်း... ...”

စက္ကန့် ဆယ်ဂဏန်းခန့် အကြာတွင် ရေအောက် ဗုံးများနှင့် ရေငုပ်သင်္ဘော ဖျက်ဗုံးများသည် ပင်လယ်ရေအောက်တွင် ပေါက်ကွဲသွား၏။

ရေလှိုင်းကြီးများ အဆက်မပြတ် ဖြစ်ပေါ်လာပြီး ပေါက်ကွဲမှုများ အဆက်မပြတ် ဖြစ်ပေါ်နေသည်။

မိနစ် အတော်ကြာပြီးနောက် ပင်လယ်ပြင် တစ်ခုလုံး ငြိမ်သက်သွားပြီး သွေးများနှင့် အပျက်အစီးများမှလွဲ၍ ဘာမှ မရှိတော့သကဲ့သို့ ဖြစ်သွား၏။

လူတိုင်း အချင်းချင်း ကြည့်လိုက်ကြသည်။

‘အသွင်ပြောင်း ဝေလငါးကြီး သေသွားပြီလား။ သေသွားလောက်ပြီ မလား။ စောစောက ရေအောက် ဗုံးတွေ အများကြီး ပေါက်ကွဲသွားသလို ရေငုပ်သင်္ဘော ဖျက်ဗုံးတွေလည်း ပေါက်ကွဲသွားတာလေ။’

သို့ပေမည့် စက္ကန့် ဆယ်ဂဏန်းခန့် အကြာတွင် ကျယ်လောင်သော အသံကြီး တစ်ခုက လူတိုင်း၏ မျှော်လင့်ချက်များကို ရိုက်ချိုးပစ်လိုက်၏။

“ဝုန်း...”

ကျယ်လောင်သော အသံကြီး တစ်ခု ထွက်ပေါ်လာပြီးနောက် ...

နောက်ထပ် တာ့ယန် အင်ပါယာ၏ စစ်သင်္ဘော တစ်စင်း မှောက်လှန်ခံလိုက်ရပြီး ပင်လယ်ထဲသို့ တိုက်ရိုက် နစ်မြုပ်သွားသည်။

နောက်ဆက်တွဲ အနေဖြင့် ဤကြောက်စရာကောင်းသော အသွင်ပြောင်း ဝေလငါးကြီးသည် ရူးသွပ်စွာ သောင်းကျန်းကာ တာ့ယန် အင်ပါယာ၏ စစ်သင်္ဘောများကို ရူးသွပ်စွာ ဝင်တိုက်လေတော့၏။

အင်အားကြီးမားသော ရေယာဉ်စုကြီးသည် ၎င်းကို လုံးဝ အရှုံးပေးလိုက်ရပြီး ရေယာဉ်စုသည် အစွမ်းကုန် လူစုခွဲကာ ရေအောက် ဗုံးများကို ရူးသွပ်စွာ ပစ်ချပြီး ရေငုပ်သင်္ဘော ဖျက်ဗုံးများကို ပစ်လွှတ်ကြသည်။

သို့ပေမည့် ဤအသွင်ပြောင်း ဝေလငါးကြီး၏ စွမ်းအားနှင့် အမြန်နှုန်းမှာ အလွန် မြန်ဆန်လွန်းသောကြောင့် ရေငုပ်သင်္ဘော ဖျက်ဗုံးများက လုံးဝ လိုက်မမီသလို ချိန်ရွယ်၍လည်း မရနိုင်ပေ။

ဆယ့်ငါးမိနစ် အချိန်တိုအတွင်းမှာပဲ တာ့ယန် အင်ပါယာ၏ စစ်သင်္ဘော သုံးစင်း ဖျက်ဆီးခံလိုက်ရပြီး လေးစင်း မှောက်လှန်ခံလိုက်ရသည်။ ကြီးမားသော ဆုံးရှုံးမှုကြီးပင် ဖြစ်၏။

ထိုအချိန်မှာပဲ ဝေလငါးကြီးသည် ရေယာဉ်စုနှင့် ရုတ်တရက် ဝေးကွာသွားပြီးနောက် လူတစ်ယောက်က ဝေလငါးကြီး၏ ခေါင်းပေါ်တွင် ပေါ်လာ၏။ ဤသည်မှာ အမျိုးသမီး တစ်ဦး ဖြစ်ပြီး လှပသော မြွေမလေး တစ်ကောင်ကဲ့သို့ ဖြစ်နေသည်။

“ယွင်ကျုံးဟဲ့ ပြန်ရောက်လာပြီလား။” အမျိုးသမီးက ဖြည်းညင်းစွာ မေးလိုက်၏။

ကျီးယန်က ဖြေသည်။ “ဟုတ်ပါတယ်။ အရှင်မင်းကြီး ပြန်ရောက်လာပါပြီ။”

ထိုအမျိုးသမီးက ပြောလိုက်၏။ “ကျွန်မ နာမည် ပိုင်ရှယ် (မြွေဖြူ) လို့ ခေါ်တယ်။ သူ အရင်က ကျွန်မကို မသိခဲ့ပေမယ့် အခုတော့ သိသွားပြီ။”

နောက်ဆက်တွဲ အနေဖြင့် တာရှန်းမိစ္ဆာနိုင်ငံ၏ အသက်ရှင် ကျန်ရစ်သော ရေတပ် စစ်သည် အားလုံးသည် ဤအသွင်ပြောင်း ဝေလငါးကြီး၏ ကျောပေါ်သို့ ဖြည်းညင်းစွာ တက်လာကြပြီးနောက် မြောက်ဘက်သို့ ဖြည်းညင်းစွာ ကူးခတ်သွားကြသည်။

အသွင်ပြောင်း ကျီးကန်း ရာပေါင်းများစွာသည်လည်း ဝေလငါးကြီး၏ ခေါင်းပေါ်တွင် ရပ်နားကာ စစ်မြေပြင်မှ ထွက်ခွာသွားကြသည်။ ဤအသွင်ပြောင်း ဝေလငါးကြီး ကူးခတ်သွားသော လမ်းတစ်လျှောက်လုံး သွေးများ ကျန်ရစ်ခဲ့၏။

စောစောက ပထမအကြိမ် ရေအောက် ဗုံးများ၏ ကြီးမားသော ပေါက်ကွဲမှုနှင့် ရေငုပ်သင်္ဘော ဖျက်ဗုံးများ၏ ပေါက်ကွဲမှုတွင် ၎င်းသည် အလွန် မြန်ဆန်စွာ ရှောင်တိမ်းနိုင်ခဲ့သော်လည်း ထိခိုက် ဒဏ်ရာ ရရှိသွားခဲ့သည်။

နောက်ဆက်တွဲ အနေဖြင့် တာ့ယန် အင်ပါယာ၏ ရေယာဉ်စုသည် စစ်မြေပြင်ကို ရှင်းလင်းကြသည်။ နစ်မြုပ် သွားသော စစ်သင်္ဘောများကို မဆယ်နိုင်သော်လည်း ရေထဲ ကျနေသော ရေတပ် စစ်သည်များကို တတ်နိုင်သမျှ ကယ်တင်ခဲ့ကြ၏။

ထို့နောက် ရေယာဉ်စု တစ်ခုလုံး ယွင်ပြည်နယ်သို့ ပြန်လည် ရောက်ရှိလာသည်။

ယွင်ကျုံးဟဲ့ အစီရင်ခံစာကို ရရှိပြီးနောက် ချက်ချင်းပဲ နှလုံးနာကျင်သွား၏။

ဤပထမဆုံး တိုက်ပွဲသည် အလွန် ခမ်းနားကြီးကျယ်ခဲ့ပြီး အစပိုင်းတွင် လုံးဝ အသေအပျောက် မရှိဘဲ တာရှန်းမိစ္ဆာနိုင်ငံ၏ ရေယာဉ်စု အားလုံးကို အမြစ်ပြတ် ချေမှုန်းနိုင်ခဲ့၏။ သို့ပေမည့် ဤအသွင်ပြောင်း ဝေလငါးကြီး တစ်ကောင်ကြောင့် စစ်သင်္ဘော ခုနစ်စင်းတိတိ ဆုံးရှုံးခဲ့ရသည်။

ယွင်ကျုံးဟဲ့သည် ဓာတ်ပုံပေါ်ရှိ အသွင်ပြောင်းထားသော ဝေလငါးကြီးကို ကြည့်လိုက်ရာ တကယ်ကို ကြောက်စရာကောင်းပြီး ရက်စက် ကြမ်းကြုတ်လို့နေ၏။

ကျီးယန်၏ ခန့်မှန်းချက် မှန်ကန်၏။ တာရှန်းမိစ္ဆာနိုင်ငံ၏ အားသာချက်မှာ အသွင်ပြောင်း စစ်တပ်များ ဖြစ်သည်။

“အရှင်... ဒီအသွင်ပြောင်း ဝေလငါးကြီးရဲ့ အမြန်နှုန်းက အရမ်းမြန်ပြီး ကျွန်မတို့ရဲ့ စစ်သင်္ဘောတွေထက်တောင် ပိုမြန်ပါတယ်။”

ကျီးယန်က ပြောလိုက်၏။ “ကျွန်မတို့ရဲ့ စစ်သင်္ဘောကြီးတွေက ရေစူးတန်ချိန် တစ်သောင်းခွဲကျော် ရှိပြီး အရမ်း ကြီးမားလွန်းလို့ ဒီအသွင်ပြောင်း ဝေလငါးကြီးက သွားမတိုက်ရဲသေးတာပါ။ ဒါပေမဲ့ သူကသာ ဝင်တိုက်မယ် ဆိုရင် ကျွန်မတို့ စစ်သင်္ဘောကြီးတွေရဲ့ သံချပ်ကာတွေက ခံနိုင်ရည် ရှိမှာ မဟုတ်ပါဘူး။”

ရေတပ် စစ်သူကြီး ကျီးဖန်က ပြောလိုက်သည်။ “အရှင်... ဒီအသွင်ပြောင်း ဝေလငါးကြီးက ရေအောက်မှာ ပုန်းနေလို့ လုံးဝ ကာကွယ်ဖို့ ခက်ခဲပါတယ်။ ပြီးတော့ ကျုပ်တို့ရဲ့ ရေယာဉ်စုတွေ အားလုံးက ယွင်ပြည်နယ် ဆိပ်ကမ်းမှာ ရပ်နားထားတာဆိုတော့ အကယ်၍ ဒီအသွင်ပြောင်း ဝေလငါးကြီးက လာပြီး ခိုးတိုက်မယ် ဆိုရင် နောက်ဆက်တွဲ အကျိုးဆက်တွေက တွေးကြည့်လို့တောင် မရနိုင်ပါဘူး။”

ယွင်ကျုံးဟဲ့ အလွန် ခေါင်းကိုက်သွားသည်။ အင်အားကြီးမားသော ရေယာဉ်စု၏ ရေကြောင်း စိုးမိုးမှုသည် အသွင်ပြောင်း ဝေလငါးကြီး တစ်ကောင်ကြောင့် ပျက်စီးသွားလိမ့်မည်ဟု မထင်မှတ်ထားခဲ့ပေ။

‘ဘယ်လို လုပ်ရမလဲ။ အသွင်ပြောင်း ဝေလငါးကြီးကို လိုက်လံ သတ်ဖြတ်ဖို့ ရေငုပ်သင်္ဘော တည်ဆောက် ရမလား။ မဖြစ်နိုင်ဘူး။ ရေငုပ်သင်္ဘောရဲ့ လှုပ်ရှားနိုင်စွမ်းက အရမ်း ညံ့ဖျင်းလို့ ပင်လယ်အောက် ရောက်သွားရင် ဒီမိစ္ဆာကောင်ကြီးရဲ့ သတ်ဖြတ်မှုကို ခံရဖို့ပဲ ရှိတယ်။

ပြီးတော့ ဒီအသွင်ပြောင်း ဝေလငါးကြီးက အရမ်း သွက်လက်ပြီး အာရုံခံစားမှု မြန်တယ်။ အဲဒီအပြင် တာရှန်း မိစ္ဆာနိုင်ငံရဲ့ ယဇ်ပုရောဟိတ် တစ်ယောက်က ထိန်းချုပ်ထားတာ ဆိုတော့ ရေငုပ်သင်္ဘော ဖျက်ဗုံးတွေနဲ့ သူ့ကို ထိမှန်ဖို့ အရမ်း ခက်ခဲတယ်။

အတိုတောင်းဆုံး အချိန်အတွင်းမှာ ဒီအသွင်ပြောင်း ဝေလငါးကြီးကို နှိမ်နင်းနိုင်မယ့် လက်နက်ကို မဖြစ်မနေ တီထွင်ရမယ်။ အဲဒီလိုမှ မဟုတ်ရင် ကြီးမားတဲ့ ရေတိုက်ပွဲတွေကို ဆက်လက် လုပ်ဆောင်ဖို့ အခြေခံအားဖြင့် မဖြစ်နိုင်တော့ဘူး။’

မကြာမီ ယွင်ကျုံးဟဲ့သည် အစီအစဉ် နှစ်ခုကို စဉ်းစားလိုက်မိသည်။

ပထမ အစီအစဉ်- စက်အမြောက်များ အမြောက်အမြား ထုတ်လုပ်ရန် ဖြစ်သည်။ သာမန် ရေငုပ်သင်္ဘော ဖျက်ဗုံးများ ပစ်လွှတ်သည့် အမြန်နှုန်းမှာ အလွန် နှေးကွေးလွန်းပြီး ရေအောက် ဗုံးများ ပစ်ချခြင်းကလည်း မဖြစ်နိုင်ပေ။ တိကျမှု အလွန် ညံ့ဖျင်းသလို အရမ်းလည်း နှေးကွေး၏။

အကယ်၍ အမြန်နှုန်း မြင့်မားစွာ ပစ်ခတ်နိုင်သော စက်အမြောက်များ ရှိလာပါက ဤအသွင်ပြောင်း ဝေလငါးကြီး ရေပေါ် ပေါ်လာချိန်တွင် ချက်ချင်း ရူးသွပ်စွာ ပစ်ခတ်နိုင်မှာဖြစ်သည်။

သို့ပေမည့် ဤလက်နက်မျိုးတွင်လည်း အန္တရာယ် တစ်မျိုး ရှိသည်။ အဘယ်ကြောင့်ဆိုသော် အသွင်ပြောင်း ဝေလငါးကြီးက မိမိတို့၏ ရေယာဉ်စုကို စတင် တိုက်ခိုက်ချိန်တွင် ဤစက်အမြောက်များသည် ကိုယ့်ရေယာဉ်စုကို မှားယွင်း ပစ်ခတ်မိရန် လွယ်ကူသောကြောင့်ပင်။

ထို့အပြင် နောက်ထပ် အချက်တစ်ခုမှာ ဤကဲ့သို့ အမြန်နှုန်း မြင့်မားစွာ ပစ်ခတ်နိုင်သော စက်အမြောက်များသည် ဓာတ်ခွဲခန်း အတွင်းတွင် စောစောတည်းက ပေါ်ထွက်နေပြီ ဖြစ်သော်လည်း လောလောဆယ်တွင် မတည်ငြိမ်သေးသလို အဆင့်မမြင့်သေးပေ။

ဒုတိယ အစီအစဉ်- ဧရာမ ဒူးလေးကြီးများ ထုတ်လုပ်ရန် ဖြစ်သည်။

ဤအရာ ပိုပြီး နောက်ကျသွားခြင်း မဟုတ်ဘူးလား။ သို့ရာတွင် ထိုအရာတို့သည် သာမန် ဧရာမဒူးလေးကြီးများ မဟုတ်ကြပေ။ ဒူးလေးမြားများ၏ ထိပ်ဖျားတွင် အာရုံကြောအဆိပ်များကို သုတ်လိမ်းထားသည့်အတွက် မြားတံသည် ခန္ဓာကိုယ်အတွင်းသို့ ထိုးဖောက်ဝင်ရောက်သွားသည်နှင့် တပြိုင်နက် အဆိုပါအဆိပ်များသည် အသွင်ပြောင်းဝေလငါးကြီး၏ ကိုယ်တွင်းသို့ ချက်ချင်း ပျံ့နှံ့စိမ့်ဝင်သွားမှာဖြစ်၏။

အရေးအကြီးဆုံးအချက်မှာ ယင်းဧရာမဒူးလေးကြီးများ၌ ဗို့အားမြင့် လျှပ်စစ်ကြိုးများကို တပ်ဆင်ထားခြင်း ဖြစ်သည်။

ပစ်မှတ်ကို တိကျစွာချိန်ရွယ်ပစ်ခတ်၍ ထိမှန်သွားသည်နှင့် တပြိုင်နက် အထူးဗို့အားမြင့် လျှပ်စီးကြောင်းများကို ထုတ်လွှတ်ပေးနိုင်စွမ်းရှိသည်။ ထိုမျှပြင်းထန်လှသော လျှပ်စီးကြောင်းမျိုးကို အသွင်ပြောင်းဝေလငါးကြီး အနေဖြင့်လည်း ခံနိုင်ရည်ရှိမည် မဟုတ်ပေ။

ဆွေးနွေးပြီးနောက် ဒုတိယ အစီအစဉ်ကို မြန်ဆန်စွာ အသုံးပြုရန် ဆုံးဖြတ်လိုက်၏။ တာ့ယန် အင်ပါယာ၏ ကုန်ထုတ်လုပ်မှု စွမ်းအားဖြင့် ဤကဲ့သို့သော ဧရာမ ဒူးလေးကြီးများကို ထုတ်လုပ်ရန်မှာ လုံးဝ လွယ်ကူလှပြီး အနည်းဆုံး မီတာ ခြောက်ရာကျော်အထိ ပစ်ခတ်နိုင်သည်။

လိုအပ်ပါက အမြောက် ပုံစံမျိုးဖြင့်ပင် တည်ဆောက်နိုင်ပြီး ပစ်လွှတ်လိုက်သည်မှာ ဧရာမ ဒူးလေးမြားများ ဖြစ်ရန်သာ လိုအပ်၏။

စစ်တပ်နှင့်အတူ လိုက်ပါလာသော လက်မှုပညာရှင်များသည် နေ့မအိပ် ညမအိပ် စတင် တည်ဆောက်ကြသည်။

ရက်အနည်းငယ် အကြာတွင် လက်နက်သစ် နှစ်မျိုး ယွင်ကျုံးဟဲ့၏ ရှေ့တွင် ပေါ်ထွက်လာ၏။

ယွင်ကျုံးဟဲ့ ချက်ချင်း အနည်းငယ် အံ့ဩမှင်တက်သွားသည်။ ‘သူတို့ရဲ့ တွေးခေါ်နိုင်စွမ်းက တကယ့် ပါရမီရှင်တွေပဲ။’

ပထမဆုံး အနေဖြင့် ဧရာမ ဒူးလေးကြီးမှာ အလွန် သာမန်ဖြစ်ပြီး ထူးခြားမှု မရှိပေ။ ပစ်ခတ်နိုင်သည့် အကွာအဝေးမှာ မီတာ ခြောက်ရာ သုံးဆယ်ခန့် ရှိ၏။

သို့ပေမည့် ဤအမြောက်သစ်ကတော့ ယွင်ကျုံးဟဲ့ကို အလွန် အံ့ဩသွားစေခဲ့၏။ ဤသည်မှာ အလွန် သေးငယ်သော အမြောက်ပြောင်းဝ ပါရှိသည့် အမြောက် တစ်လက် ဖြစ်ပြီး အတွင်းတွင် အတွင်းရစ်များလည်း ပါရှိသည်။

အမြောက်ဆန်မှာ သေးသွယ် ရှည်လျားပြီး ဆယ်မီတာတိတိ ရှိကာ အမြောက်ဝမှ တိုက်ရိုက် ထွက်နေပြီး နောက်မှ ထည့်ရသော အမြောက်ဆန်လည်း ဖြစ်၏။

ပစ်ခတ်မည့် အချိန်တွင် ဤအထူး သေးသွယ် ရှည်လျားသော အမြောက်ဆန်ကို အမြောက်ပြောင်း အတွင်းသို့ အရင် ထည့်သွင်းရမှာဖြစ်ပြီးနောက် အဆိပ်များနှင့် ဗို့အားမြင့် လျှပ်စစ်ကြိုးများ တပ်ဆင်ထားသော မြားဖူးကို အမြောက်ဆန်၏ ထိပ်တွင် တပ်ဆင်ရမှာဖြစ်သည်။

“ပစ်...”

“ဝုန်း...”

“ရွှီး...”

မြားဖူး တပ်ဆင်ထားသော ဤအထူး သေးသွယ် ရှည်လျားသည့် အမြောက်ဆန်သည် လျှပ်စီးလက်သကဲ့သို့ ပစ်ထွက်သွားပြီး ကနဦး အမြန်နှုန်းမှာ တစ်စက္ကန့်လျှင် မီတာ ငါးရာကျော် ရှိသည်။ မီတာ ထောင်ချီ အကွာအဝေးကို အလွယ်တကူ ပစ်ခတ်နိုင်၏။

သို့ပေမည့် ၎င်း၏ အမြန်နှုန်းက အလွန် မြန်ဆန်လွန်းသောကြောင့် ဗို့အားမြင့် လျှပ်စစ်ကြိုးများ လုံးဝ မခံနိုင်ဘဲ ချက်ချင်း ပြတ်တောက်သွားသည်။

အကြိမ်ကြိမ် စမ်းသပ်မှုများမှာလည်း အတူတူပင် ဖြစ်ပြီး ပစ်လွှတ်လိုက်သည့် အခိုက်အတန့်တွင် ဗို့အားမြင့် လျှပ်စစ်ကြိုးများ ချက်ချင်း ပြတ်တောက်သွား၏။

ယွင်ကျုံးဟဲ့က ပြောလိုက်သည်။ “ခင်ဗျားတို့ရဲ့ အတွေးအခေါ်က အရမ်း ကောင်းပြီး အရမ်းလည်း အောင်မြင်ပါတယ်။ ဒီလက်နက်ကို စစ်သင်္ဘောမျိုးစုံပေါ်မှာ တပ်ဆင်ပြီး ပင်လယ်ပြင်ပေါ်က အသွင်ပြောင်း သတ္တဝါတွေကို သီးသန့် သတ်ဖြတ်ဖို့ သုံးလို့ ရပါတယ်။

ဒီလို အထူး အမြောက်တွေကို သေးငယ်အောင် လုပ်ရမယ်၊ ရွှေ့ပြောင်းရ လွယ်ကူအောင် လုပ်ရမယ်၊ ပြီးတော့ လှည့်ပတ်ရာမှာ လုံလောက်အောင် သွက်လက်ရမယ်၊ အမြောက်ဝကို အောက်ဘက် ချိန်ပြီး ပစ်ခတ်လို့တောင် ရရမယ်။

ပြီးတော့ မြားဖူးတွေ တပ်ဆင်နေဖို့ မလိုတော့ဘူး။ အသွင်ပြောင်း ဝေလငါးကြီးကို ထိမှန်သွားတာနဲ့ သူ့ခန္ဓာကိုယ်ထဲကို ဖောက်ဝင်သွားအောင် ပစ်နိုင်ရင် သူလည်း ခံနိုင်ရည် ရှိမှာ မဟုတ်ဘူးလို့ ထင်တယ်။ အဓိကက သွက်လက်ဖို့နဲ့ ပစ်ခတ်မှုနှုန်း မြန်ဆန်ဖို့ပဲ။”

လက်မှုပညာရှင်က ပြောလိုက်၏။ “ကောင်းပါပြီ အရှင်... ဒါပေမဲ့ ဒီနေရာမှာ အထူးပြု လက်နက်စက်ရုံ မရှိသေးတဲ့အတွက် အများအပြား ထုတ်လုပ်ဖို့ အချိန် နည်းနည်း ယူရပါအုံးမယ်။”

ဧရာမ ဒူးလေးကြီးများကတော့ တည်ဆောက်ရန် လွယ်ကူပြီး လိုသလောက် ရရှိနိုင်သည်။ ထို့အပြင် ပစ်လွှတ်လိုက်ချိန်တွင် ဗို့အားမြင့် လျှပ်စစ်ကြိုးများ ပြတ်တောက်သွားမည် မဟုတ်ပေ။

ယွင်ကျုံးဟဲ့သည် ဧရာမ ဒူးလေးကြီးများကို အများအပြား ထုတ်လုပ်ရန်နှင့် အတိုတောင်းဆုံး အချိန်အတွင်း စစ်သင်္ဘောများပေါ်တွင် တပ်ဆင်ရန် အမိန့်ပေးလိုက်သည်။