အခန်း ၃၆၂
Vol. 37 Ch. 362
အခန်း (၃၆၂) ကြယ်တာရာ ကမ္ဘာ
သူ၏ စကားလုံးများနှင့် မျက်ဝန်းထဲရှိ အကြည့်များက ဖြစ်လာနိုင်သည့် ခြိမ်းခြောက်မှုတစ်ခုအကြောင်းကို ကြားလိုက်ရခြင်း မဟုတ်ဘဲ မမျှော်လင့်ထားသော အံ့အားသင့်စရာတစ်ခုကို မျှော်လင့်နေသည့်အလားပင်။
လင်ရှောင်နှင့် ချန်ချင်းက ကျန်းယဲ့၏ ရုတ်တရက် တုံ့ပြန်မှုကြောင့် အနည်းငယ် နောက်ဆုတ်သွားကြရသည်။ စိတ်လှုပ်ရှား တက်ကြွနေသည့်အလား လင်းလက်နေသော သူ၏ မျက်ဝန်းများကို ကြည့်ကာ သူတို့နှစ်ဦးမှာ ကျောရိုးတစ်လျှောက် စိမ့်တက်သွားပြီး မသိစိတ်အရပင် တုန်ယင်သွားကြလေသည်။
သူတို့နှစ်ဦး၏ ရင်ထဲတွင် ကြိုတင်ခံစားသိမြင်မှု တစ်ခုက တစ်ပြိုင်နက်တည်း ပေါ်လာ၏။
အကယ်၍ ဂျပန်ကသာ တကယ် ရူးသွပ်သွားပြီး ကျန်းယဲ့အပေါ် အစွန်းရောက်လုပ်ရပ်ဟုခေါ်သော အရာတစ်ခုခုကို လုပ်ရဲခဲ့မည်ဆိုပါက...
ထိုအကျိုးဆက်က အမြဲတမ်း ပိတ်ပင်ခံရခြင်းထက် အဆပေါင်း ထောင်ချီ၍ ပိုမိုဆိုးရွားသွားပေလိမ့်မည်။
ယခု ကျန်းယဲ့၏ တုံ့ပြန်မှုက အခြေအနေများ လုံလောက်အောင် မဆိုးရွားသေးဘူးဟု ခံစားနေရကြောင်း ရှင်းလင်းစွာ ပြသနေပြီးတစ်ဖက်လူက သူ၏ထံသို့ တမင်လာရောက် ပြဿနာရှာကာ ပိုမိုဆိုးရွားသော နည်းလမ်းများကို အသုံးပြုရန် အကြောင်းပြချက်ကောင်းတစ်ခု ပေးလာလိမ့်မည်ကိုပင် သူက တိတ်တဆိတ် မျှော်လင့်နေသေးချေသည်။
ကျန်းယဲ့၏ နူးညံ့သိမ်မွေ့သော အပြင်ပန်းသွင်ပြင်အောက်တွင် သူတို့ တစ်ခါမျှ စိတ်ကူးမယဉ်ဖူးသော စွမ်းအားတစ်ခု ရှိနေလေသည်။
ချန်ချင်းနှင့် လင်ရှောင်တို့ ထွက်သွားပြီးနောက် ကျန်းယဲ့က သူ၏ အေးအေးဆေးဆေးနှင့် ပေါ့ပေါ့ပါးပါး လူနေမှုဘဝကို ပြန်လည်စတင်လိုက်၏။
နေ့တိုင်း အလိုအလျောက် နိုးလာသည်အထိ အိပ်သည်။
ထို့နောက် ဘာစားရမလဲဆိုတာ စဉ်းစားပြန်၏။
တစ်ခါတစ်ရံ စိတ်ကူးပေါက်လျှင် မြောက်ပိုင်းတောင်ထိပ်ဘက်သို့ တောင်တက်သွားကာ အကြောအခြင်များ ဆန့်တန်းလေ့ကျင့်ခန်း လုပ်တတ်သည်။
လက်ရှိ သူ၏ နာမည်ကျော်ကြားမှုက ထိပ်တန်းအဆင့် နာမည်ကြီး အနုပညာရှင်များထက် များစွာ သာလွန်နေသဖြင့် ကျန်းယဲ့က အပြင်ထွက်တိုင်း လက်နက်အပြည့်အစုံ တပ်ဆင်ထားလေ့ရှိလေသည်။
မျက်နှာဖုံး၊ နေကာမျက်မှနိ၊ ဘေ့စ်ဘောဦးထုပ်....
ဤဝတ်စုံက လမ်းပေါ်တွင် အာရုံစိုက်မှုကို မလွဲမသွေ ဆွဲဆောင်နိုင်သော်လည်း ယေဘုယျအားဖြင့်တော့ ဘေးကင်းပြီး စိတ်အားထက်သန်သော လူအုပ်ကြီး၏ ဝိုင်းအုံမှုကို တစ်ခါမျှ မခံခဲ့ရဖူးချေ။
ထိုနေ့တွင် သူက မြောက်ပိုင်းတောင်ထိပ်၏ ကျောက်တုံးလှေကားထစ်များအတိုင်း ဖြည်းညှင်းစွာ တက်လာစဉ် မလှမ်းမကမ်းရှိ အနားယူရာ နေရာလေးမှ လူငယ်အမျိုးသမီးနှစ်ဦးက သူ့ဘက်သို့ လက်ညှိုးထိုးကာ တီးတိုးပြောနေကြသည်ကို သတိထားမိလိုက်၏။
ထို့ကြောင့် ကျန်းယဲ့၏ နှလုံးသားက တစ်ချက် ခုန်သွားရသည်။
တကယ်လို့ တောင်တက်နေတုန်း တစ်ဝက်လောက်မှာ လူမိသွားပြီး ခရီးသွားတွေ ဝိုင်းအုံတာကို ခံရရင်တော့ တောင်တက်တာက လွယ်ပေမဲ့ တောင်ဆင်းဖို့က ခက်ခဲသွားလိမ့်မည်။
သူက မသိစိတ်အရ ဦးထုပ်ကို အနည်းငယ် ငုံ့ချလိုက်ပြီး ခြေလှမ်းများကို နှေးလိုက်ကာ အခြေအနေ မဟန်ပါက အချိန်မရွေး လှည့်ပြန်ရန် အသင့်ပြင်ထားလိုက်ချေသည်။
သို့သော် သူ ပိုနီးကပ်သွားသောအခါ လေထဲတွင် လွင့်ပါလာသော ထိုမိန်းကလေးနှစ်ဦး၏ စကားပြောသံများကို ခပ်သဲ့သဲ့ ကြားလိုက်ရ၏။
"ဟိုက လူကို ကြည့်လိုက်ဦး... တစ်ကိုယ်လုံး ဖုံးအုပ်ထားတာတောင် အရမ်းချောနေသလိုပဲနော်..."
"ဟုတ်တယ် ဟုတ်တယ်... သူ့ရဲ့ အငွေ့အသက်က တကယ်ကို အမိုက်စားပဲ... ဝတ္ထုထဲကနေ ထွက်လာတဲ့ မင်းသားလိုပဲ အေးစက်ပြီး ခပ်တည်တည် အငွေ့အသက်လေး ရှိတယ်..."
"သူ့ခန္ဓာကိုယ်ကလည်း အရမ်းမိုက်တာပဲ... လမ်းလျှောက်တာလေးကအစ စတိုင်လ်ကျနေတာပဲ..."
ကျန်းယဲ့ : "......"
အော်... ရုပ်ရည်အကြောင်း ပြောနေတာကိုး...
သူက အနည်းငယ် စိတ်အေးသွားသော်လည်း သတိထားနေဆဲပင်။
သူတို့ဘေးမှ ဖြတ်သွားချိန်တွင် သူတို့၏ ပူလောင်နေသော အကြည့်များက သူ့ထံသို့ စူးစိုက်နေကြောင်း ရှင်းလင်းစွာ ခံစားလိုက်ရသည်။
တကယ်လို့ သူတို့က ငါ့ဆီလာပြီး ဖုန်းနံပါတ်တွေ ဘာတွေ လာတောင်းရင် ဘယ်လိုလုပ်မလဲ....
ကျန်းယဲ့ တစ်ယောက် တွေးတောနေစဉ် ထိုမိန်းကလေးနှစ်ဦးက သူ့ကို လှမ်းကြည့်ရုံသာ ကြည့်နေပြီး မလှုပ်မရှား ရပ်နေခဲ့ကြသည်။
ဟွန့်... ဘယ်သူကမှ ငါ့ကို လာမပရောပပါလားကွ...
ဟူး... ကြည့်ရတာ ငါ့ဆီမှာ ဆွဲဆောင်မှု မလုံလောက်သေးဘူးထင်တယ်....
ကျန်းယဲ့က ဆယ်မီတာကျော်ခန့် အဝေးသို့ ရောက်သွားချိန်မှသာ သူတို့၏ တီးတိုးပြောသံများ ထပ်မံလွင့်ပါလာသည်ကို ခပ်သဲ့သဲ့ ကြားလိုက်ရပြန်သည်။
"ဟေး... သူက နာမည်ကြီး တစ်ယောက်ယောက်များ ဖြစ်နေမလားဟင်... နည်းနည်းတော့ ရင်းနှီးနေသလိုပဲ..."
"နင် ပြောမှပဲ ငါလည်း ခံစားမိတယ်... သူက နည်းနည်းလေး... ဒါရိုက်တာကျန်းနဲ့ တူနေသလိုပဲ..."
"ဒါရိုက်တာကျန်း... ဘယ် ဒါရိုက်တာကျန်းလဲ... သေလိုက်ပါတော့... ဟို အချိန်ခရီးသွားအေဂျင်စီက တစ်ယောက်လား..."
ဒါရိုက်တာကျန်းဟူသော စကားလုံးကို ကြားလိုက်ရချိန်တွင် ကျန်းယဲ့မှာ ကျောရိုးတစ်လျှောက် စိမ့်တက်သွားသလို ခံစားလိုက်ရ၏။ ထို့နောက် သူက ခြေလှမ်းများကို အလျင်အမြန် သွက်လိုက်ပြီး အပေါ်သို့ ခုန်တက်မတတ် ပြေးတက်သွားကာ အရှေ့ရှိ ကွေ့အကွယ်တွင် ပျောက်ကွယ်သွားလေတော့သည်။
သူက မြောက်ပိုင်းတောင်ထိပ်တွင် ခေတ္တမျှ လမ်းလျှောက်ရင်း ရှုခင်းများကို ခံစားလိုက်ပြီးနောက် အိမ်သို့ ဘေးကင်းစွာ ပြန်နိုင်ရန်အတွက် ခရီးသွားများ နည်းပါးသော တိတ်ဆိတ်သည့် လမ်းလေးတစ်ခုကို ရွေးချယ်ကာ တောင်ပေါ်မှ ဆင်းလာခဲ့ပြန်သည်။
ထိုနေ့တွင် တောင်တက်ရာမှ ပြန်ရောက်ပြီးနောက် ကျန်းယဲ့က ရေချိုးသန့်စင်လိုက်ပြီး ကွန်ပျူတာကို ပေါ့ပေါ့ပါးပါး ဖွင့်ကာ တိုရင်အကောင့်ထဲသို့ ဝင်လိုက်၏။
ကိုယ်ပိုင် မက်ဆေ့ချ်များနှင့် မှတ်ချက်များက သဘာဝကျစွာပင် ၉၉+ အနီရောင်အစက်များ ပြသနေလေသည်။
သူက ထုံးစံအတိုင်း ကျော်သွားရန် ရည်ရွယ်ထားသော်လည်း သူ၏ အကြည့်များက ဝေ့ကြည့်လိုက်ချိန်တွင် ရင်းနှီးနေသော ID အချို့ကြောင့် သူ တစ်ခဏမျှ ရပ်တန့်သွားရသည်။
လင့်ခ်ကို ဖွင့်ကြည့်လိုက်ချိန်တွင် ၎င်းတို့မှာ အဆိပ်ဖြေဆေးလုံး သောက်သုံးရန် ရွေးချယ်ခံခဲ့ရသော ကလေးအချို့၏ မိဘများထံမှ ဖြစ်ကြောင်း သေချာသွားခဲ့သည်။
နေ့စဉ်နီးပါး ရေးသားထားသော ထိုမက်ဆေ့ချ်များထဲတွင် လှိုက်လှိုက်လှဲလှဲ ကျေးဇူးတင်စကားများနှင့် ကလေးငယ်၏ ပြန်လည်ကျန်းမာလာမှု အခြေအနေများကို အပ်ဒိတ်လုပ်ထားပြီး စကားလုံးတိုင်းက သူတို့၏ ခံစားချက်များကို သူ မတွေ့မည်ကို စိုးရိမ်နေသည့်အလား ကျေးဇူးတင်မှုများဖြင့် ပြည့်နှက်နေကြသည်။
ကျန်းယဲ့၏ ရင်ထဲတွင် နွေးထွေးသွား၏။ သူ၏ လက်ချောင်းလေးများက ကီးဘုတ်ပေါ်တွင် ကလစ်နှိပ်လိုက်ပြီး သူတို့အားလုံးထံ ရိုးရှင်းသော မက်ဆေ့ချ်တစ်ခု ပြန်ပို့လိုက်သည်။ "ရပါတယ်... ကလေးတွေ ပြန်လည်ကျန်းမာလာတာကို မြင်ရလို့ ဝမ်းသာပါတယ်... ကောင်းကောင်း ရှင်သန်ကြပါ..."
ပြန်စာပို့ပြီးနောက် သူ ကွန်ပျူတာကို ပိတ်ရန် ပြင်လိုက်ချိန်တွင် ရင်းနှီးနေသော စက်ရုပ်အသံက သူ၏ စိတ်ထဲတွင် ရုတ်တရက် ပဲ့တင်ထပ်လာ၏။
[ ဒင်... နောက်ဆုံးပေါ် ခရီးသွားနေရာ အချက်အလက်များကို ထုတ်ပြန်လိုက်ပါပြီ ]
[ ရှုခင်းသာအမည် ] : ကြယ်တာရာ ကောင်းကင်ယံသို့ လှည့်လည်သွားလာခြင်း · အနာဂတ်ခေတ်
[ ကမ္ဘာ့နောက်ခံသမိုင်း ] : ကြယ်တာရာ ပြက္ခဒိန် ၉၉၈၉၊ အလွန်တရာ တိုးတက်နေသော ကြယ်တာရာ ယဉ်ကျေးမှုခေတ်။
[ ခရီးစဉ် ] : ခုနစ်ရက်တာ အသေးစိတ် လေ့လာရေး ခရီးစဉ်။
[ ခေါ်ယူမည့် လူအရေအတွက် ] : ၅၀ ဦး။
[ စျေးနှုန်း ] : ၁၀၀,၀၀၀ ယွမ် / တစ်ဦး။
[ မှာယူရန် ဖွင့်လှစ်မည့်အချိန် ] : ယခုအပတ် တနင်္ဂနွေနေ့ နေ့လယ် ၁၂:၀၀ နာရီတိတိ။
[ မှာယူနိုင်မည့် ကြာချိန် ] : ၃၀ မိနစ်။
[ တာဝန် ဆုကြေးငွေ ] : ခရီးသွားတာဝန်ကို အောင်မြင်စွာ ပြီးမြောက်ပါက သက်တမ်း +၁၈၀ ရက်နှင့် အပိုဆုကြေးငွေ ယွမ် +၁,၀၀၀,၀၀၀ ရရှိမည် ဖြစ်သည်။
[ သတိပေးချက် ] : ဤခရီးစဉ်အတွက် အမျိုးသား ခရီးသွားများကိုသာ ဦးစားပေး ခေါ်ယူရန် အကြံပြုအပ်ပါသည်။
ကြယ်တာရာ ကမ္ဘာ...
ကျန်းယဲ့က အနည်းငယ် ကြောင်အသွားပြီးနောက် သူ၏ မျက်ဝန်းများထဲတွင် ပြင်းထန်သော စိတ်ဝင်စားမှုတစ်ခု လက်ဖြာသွားရသည်။
သို့သော် ထို့နောက် သူ၏ အကြည့်များက နောက်ဆုံးရှိ သတိပေးချက် အပေါ်သို့ ကျရောက်သွားချိန်တွင် အေးခဲသွားပြန်သည်။
"အမျိုးသား ခရီးသွားတွေကို ဦးစားပေးရမယ်.... " ကျန်းယဲ့က စိတ်ထဲမှနေ၍ စနစ်ကို လှမ်းခေါ်လိုက်၏။ "စနစ်... ထွက်လာပြီး ရှင်းပြစမ်း... ဘာလို့ ဒီတစ်ခါ ယောကျ်ားလေးတွေကိုပဲ ခေါ်ဖို့ အထူးသတိပေးနေရတာလဲ... ဘာလို့ မိန်းကလေးတွေ မရတာလဲ... အဲ့ဒီ ကြယ်တာရာကမ္ဘာမှာ တစ်ခုခု ထူးခြားတဲ့ အကြောင်းပြချက် ရှိလို့လား..."
စနစ် : "......"
သူ၏ စိတ်ထဲတွင် လုံးဝကို တိတ်ဆိတ်နေပြီး အေးစက်သော စနစ်က မည်သည့် တုံ့ပြန်မှုမျှ မပြဘဲ သူ၏ မေးခွန်းကို လျစ်လျူရှုထားလိုက်သည်။
ကျန်းယဲ့က စက္ကန့်အနည်းငယ် စောင့်ကြည့်လိုက်ပြီး စနစ်က သေချင်ယောင်ဆောင်နေသည်ကို မြင်သောအခါ မနေနိုင်ဘဲ နှုတ်ခမ်းမဲ့လိုက်ခေသည်။
"ကောင်းပြီလေ... ဒီကောင်က ဘာမှပြောဖို့ အစီအစဉ်မရှိဘူးပဲ..."
သူက ညည်းတွားလိုက်သော်လည်း ၎င်းကို အလေးအနက်ထား စဉ်းစားလိုက်၏။
စနစ်က အေးစက်စက်နိုင်လှသော်လည်း ၎င်းပေးသော သတိပေးချက်များက ဘယ်သောအခါမှ အခြေအမြစ်မရှိဘဲ ပေါ်လာခြင်း မဟုတ်ချေ။
၎င်းက ဤမျှ ရှင်းလင်းသော သတိပေးချက်ကို ပေးထားသည်ဆိုမှတော့ သူတို့သွားမည့် ကြယ်တာရာ ကမ္ဘာတွင် အမျိုးသမီးများအတွက် အဆင်မပြေသော သို့မဟုတ် အန္တရာယ်ရှိနိုင်သော အချက်အလက် တစ်ခုခု ပါဝင်နေနိုင်သည်ဟု ဆိုလိုခြင်းပင်။
ဤအချက်ကို စိတ်ထဲမှတ်ထားလျက် ကျန်းယဲ့က ချက်ချင်း စတင်လှုပ်ရှားလိုက်၏။
သူက ဂုဏ်သတင်းအမှတ်အချို့ကို အသုံးပြုကာ ပစ်မှတ်ထားရာ ကြယ်တာရာကမ္ဘာနှင့် ပတ်သက်သည့် ရင်သပ်ရှုမောဖွယ် ဗီဒီယိုအတိုတစ်ခုကို စနစ်ထံမှ ဝယ်ယူလိုက်သည်။
မိုးမျှော်တိုက်ကြီးများကြားတွင် သွားလာနေသော လေယာဉ်ကားများ၊ ခမ်းနားလှသော ဂြိုဟ်သား ရှုခင်းများ၊ နည်းပညာအလွန်တိုးတက်နေသော မြို့ပြရှုခင်းများနှင့် ကြယ်တာရာရေတပ်ကြီးတစ်ခု၏ လျှပ်တစ်ပြက် မြင်ကွင်းများ စသည်တို့ ပါဝင်၏။
အကြမ်းဖျင်း တစ်ချက်ကြည့်လိုက်ပြီးနောက် သူက တည်းဖြတ်မှု အနည်းငယ် ပြုလုပ်လိုက်လေသည်။
ထို့နောက် တည်းဖြတ်ထားသော ဗီဒီယိုကို သူ၏ တိုရင်အကောင့်တွင် တင်လိုက်ပြီး စာသားလေး ရေးလိုက်၏။ "ခရီးစဉ်အသစ် ကြိုတင်မိတ်ဆက် : ကြယ်တာရာကောင်းကင်ယံသို့ လှည့်လည်သွားလာခြင်း အနာဂတ်ခေတ်.... ယခုအပတ် တနင်္ဂနွေနေ့ နေ့လယ် ၁၂ နာရီတိတိ.... လက်မှတ်ခ ၁ သိန်း.... နေရာ ၅၀.... အဲ့ဒီကျမှ တွေ့ကြမယ်..."
သို့သော် ဗီဒီယို၏ အဆုံးတွင်တော့ ကျန်းယဲ့က လူကိုယ်တိုင် ပေါ်လာရန် ရွေးချယ်လိုက်သည်။
သူက ပုံမှန်မဟုတ်ဘဲ လေးနက်သော အမူအရာဖြင့် ကင်မရာကို ကြည့်ကာ စနစ်၏ သတိပေးချက်ကို လေးလေးနက်နက် ထပ်ဖြည့်ပြောလိုက်ပြန်သည်။
"နောက်ဆုံးအနေနဲ့... ဒီခရီးစဉ်ကို စိတ်ဝင်စားကြတဲ့ ကမ္ဘာတစ်ဝန်းက အမျိုးသမီး နိုင်ငံသားအားလုံးကို အထူးလေးလေးနက်နက် အသိပေးချင်တာလေး တစ်ခုရှိပါတယ်... ကျေးဇူးပြုပြီး ဒီခုနစ်ရက်တာ ကြယ်တာရာခရီးစဉ် ကြိုတင်ရောင်းချမှုမှာ မပါဝင်ကြပါနဲ့.. မပါဝင်ပါနဲ့... ထပ်ပြောပါမယ်... အမျိုးသမီးတွေ ကျေးဇူးပြုပြီး မပါဝင်ကြပါနဲ့...."
"ဒါက ကျားမခွဲခြားဆက်ဆံတာ မဟုတ်ပါဘူး... ဖြစ်လာနိုင်တဲ့ အန္တရာယ်တွေကို အကဲဖြတ်မှုအပေါ် အခြေခံထားတာပါ... အကယ်၍ အမျိုးသမီး ခရီးသွားတွေက ဒီသတိပေးချက်ကို လျစ်လျူရှုပြီး လက်မှတ်တွေကို အတင်းအကျပ်ဝယ်ယူပြီးတော့ သွားမယ့်နေရာကို အောင်မြင်စွာရောက်ရှိသွားမယ်ဆိုရင်တောင် ခရီးစဉ်အတွင်းမှာ ဖြစ်ပေါ်လာနိုင်တဲ့ မမျှော်လင့်ထားတဲ့ အခြေအနေတွေအတွက် ခရီးသွားအေဂျင်စီက တာဝန်ယူမှာ မဟုတ်ပါဘူး..."
"ခင်ဗျားတို့ရဲ့ ကိုယ်ပိုင်ဘေးကင်းလုံခြုံရေးအတွက် ကျေးဇူးပြုပြီး အသိတရားနဲ့ ဆုံးဖြတ်ပါ... မဆင်မခြင် မလုပ်ကြပါနဲ့... ကျေးဇူးတင်ပါတယ်..."
အခန်း ၃၆၂ပြီး၏။