အခန်း ၃၇၀

Vol. 37 Ch. 370

အခန်း (၃၇၀) ရုတ်တရက် ကြီးပွားသွားခြင်း

နက်ရှိုင်းလှသည့် သတ္တုတွင်းကြီးထဲ၌ သတ္တုတူးသည့် ချွင်... ချွင်...ဆိုသည့်အသံများက အဆက်မပြတ် ပဲ့တင်ထပ်နေခဲ့သည်။

ကျန်းယဲ့နှင့် သူ့အဖွဲ့က အချိန်အတော်ကြာ ပြင်းပြင်းထန်ထန် တူးဖော်ခဲ့ကြရာ သူတို့၏ အဝတ်အစားများမှာ ချွေးများဖြင့် ရွှဲနှစ်နေပြီး လက်မောင်းများပင် နာကျင်ကိုက်ခဲလာကြရသည်။

သို့သော် သူတို့ကို စိတ်ပျက်သွားစေသည်မှာ မည်သူတစ်ဦးတစ်ယောက်ကမျှ ကြယ်တာရာအမြုတေကျောက် တစ်တုံးကိုမျှ မတူးနိုင်ခဲ့ခြင်းပင်။

ကျန်းယဲ့ ပေးထားသည့် စွမ်းဆောင်ရည်မြင့် ပေါက်တူးများကို အသုံးပြုနေရသော်ငြားလည်း ပြင်းထန်လှသည့် ကာယလုပ်အားကြောင့် လူများစွာမှာ ပင်ပန်းနွမ်းနယ်နေကြပြီ ဖြစ်၏။

တန်ကျင်းပင်းက ပထမဆုံး အရှုံးပေးလိုက်သူဖြစ်ပြီး ဘုန်းဆိုသည့် အသံနှင့်အတူ ကြမ်းပြင်ပေါ်သို့ ပြိုကျသွားကာ အမောတကော အသက်ရှူနေရသည်။ သူက မျက်နှာပေါ်မှ ချွေးများကို သုတ်လိုက်ပြီး သံသယအနည်းငယ်ဖြင့် မေးလိုက်၏။ "ဒါရိုက်တာကျန်း... ဒီနေရာမှာ တကယ်ရော သတ္တုထွက်နိုင်ချေ ရှိရဲ့လား..."

ကျန်းယဲ့က သူ၏ ပေါက်တူးကို ချထားလိုက်ပြီး '

စနစ်မျက်နှာပြင်ကို ထပ်ဖွင့်လိုက်ပြန်သည်။

မြေပုံပေါ်ရှိ သတ္တုရိုင်းသိပ်သည်းဆ မြင့်မားကြောင်း ကိုယ်စားပြုထားသည့် အနီရောင်အစက်လေးများက သူတို့ လက်ရှိရောက်နေသည့် နေရာနှင့် လုံးဝနီးပါး ထပ်တူကျနေပြီး အမှားအယွင်း လုံးဝမရှိသလောက်ပင်။

သူက သေချာပေါက် ခေါင်းညိတ်လိုက်ပြီး "ရှိတာပေါ့... ပြီးတော့ ဒါက ကြီးမားတဲ့ အခွင့်အရေးကြီးပဲ။ ငါ့ကိုယုံ... ငါတို့ နည်းနည်းလောက် ဆက်တောင့်ခံပြီး ဒီဦးတည်ချက်အတိုင်း ပိုနက်နက်လေး တူးကြည့်လိုက်မယ်ဆိုရင် ငါတို့ ချက်ချင်းကို ချမ်းသာသွားနိုင်တယ်..."

လျိုကွမ်ရွှီက လူတိုင်းကို စိတ်အေးသွားစေရန် ဝင်ပြောလိုက်လေသည်။ "ငါတို့ ဒါရိုက်တာကျန်းကို ယုံရမယ်လေ။ ဒါရိုက်တာကျန်းက ဘယ်တုန်းကများ ငါတို့ကို လမ်းမှားခေါ်သွားဖူးလို့လဲ။ သူ ရှိတယ်ပြောရင် သေချာပေါက် ရှိမှာပဲ..."

ယင်းကို ကြားသောအခါ ကြမ်းပြင်ပေါ်တွင် နားနေကြသည့် လူများမှာ စိတ်ဓာတ်ကျနေမှုများ ပျောက်ကွယ်သွားပြီး စိတ်အားထက်သန်မှုများ ပြန်လည်ရရှိလာကြသည်။ သူတို့က ပြန်ထကာ ပေါက်တူးများကို ကိုင်ဆောင်ပြီး ကျောက်နံရံကို ဆက်လက်ထုခွဲကြလေတော့သည်။

ဒီတစ်ကြိမ်တွင်တော့ သူတို့က ပို၍ပင် သေချာစွာ တူးဖော်ကြသည်။

ရုတ်တရက် ချွင်ဆိုသည့် ကျယ်လောင်သော အသံတစ်သံ ထွက်ပေါ်လာ၏။ ထိုအသံက အနည်းငယ် ကြည်လင်ပြတ်သားနေချေသည်။

ဝူကွေ့လီက သူ၏ရှေ့ရှိ သာမန်အမည်းရောင်ကျောက်တုံးဟု ထင်ရသောအရာ၏ ထောင့်တစ်နေရာကို ပေါက်တူးဖြင့် တစ်ချက်တည်း ထုခွဲလိုက်ခြင်းပင်။ ကျောက်စများ လွင့်စင်သွားသည်နှင့်အတူ နက်ရှိုင်းပြီး စစ်မှန်သော အပြာရောင်အလင်းတန်းတစ်ခုက ကျောက်တုံးထဲမှ ထိုးဖောက် ထွက်ပေါ်လာခဲ့သည်။

ဝူကွေ့လီ ခေတ္တမျှ မှင်တက်သွားပြီးနောက် ပျော်ရွှင်စွာ အော်ဟစ်လိုက်တော့သည်။ "ငါ တွေ့ပြီ... ငါ တွေ့ပြီဟေ့... အဲဒါ ကြယ်တာရာ အမြုတေကျောက်ပဲကွ.. "

ထိုအော်ဟစ်သံကြောင့် လူတိုင်းက သူတို့ လုပ်နေသည်များကို ရပ်တန့်လိုက်ကြပြီး အပြေးအလွှား ရောက်လာကြ၏။

သေချာပေါက်ပင် ပြိုကျသွားသည့် ကျောက်နံရံအတွင်း၌ လက်သီးဆုပ်ခန့် အရွယ်အစားရှိပြီး နက်ရှိုင်းသည့် အပြာရင့်ရောင်ရှိကာ မျက်နှာပြင်မှ အလင်းရောင်များ တလက်လက် တောက်နေသည့် သတ္တုရိုင်းတုံးလေးတစ်ခုက ထိုနေရာ၌ တိတ်ဆိတ်စွာ မြုပ်နှံနေပြီး ဆွဲဆောင်မှုရှိလှသည့် အလင်းဝန်းတစ်ခုကို ထုတ်လွှတ်နေချေသည်။

"ဘုရားရေ... တကယ်ပဲ ကြယ်တာရာ အမြုတေကျောက်ပဲ.."

"ဒါက စွမ်းအင်အရင်းအမြစ်အဖြစ် သုံးလို့ရတဲ့ ကျောက်တုံးလား။ တကယ်ကို လှပလွန်းတယ်...."

"ဒီအလင်းရောင်က ကြယ်တွေလင်းနေတဲ့ ကောင်းကင်ကြီးလိုပဲ..."

ရလဒ်ကို အတည်ပြုပြီးသည်နှင့် တစ်ပြိုင်နက် လူတိုင်း၏ ပင်ပန်းနွမ်းနယ်မှုများက ကြီးမားလှသည့် စိတ်လှုပ်ရှားမှုများဖြင့် အစားထိုးသွားကာ သူတို့၏ စိတ်အားထက်သန်မှုကလည်း ယခင်က တစ်ခါမှ မရှိဖူးလောက်အောင် မြင့်တက်သွားကြသည်။

ဝူကွေ့လီ၏ အောင်မြင်သော အစပြုမှုနှင့်အတူ သတင်းကောင်းများက တစ်ခုပြီးတစ်ခု ဆက်တိုက် ထွက်ပေါ်လာချေသည်။

မကြာမီမှာပင် မလှမ်းမကမ်းရှိ ကွမ်ယုထံမှလည်း တိုးညင်းသည့် အာမေဍိတ်သံတစ်ခု ထွက်ပေါ်လာ၏။ သူက ကျောက်ပြားတစ်ခုကို သတိထားကာ ခွာချလိုက်ရာ အောက်ဘက်၌ အနည်းငယ် သေးငယ်သော်လည်း တူညီစွာ တောက်ပနေသည့် ကြယ်တာရာအမြုတေကျောက် တစ်တုံး ရှိနေသည်ကို တွေ့လိုက်ရ၏။

"ငါလည်း တစ်တုံး တွေ့ပြီဟေ့..."

ထို့နောက် ခလုတ်တစ်ခုကို ဖွင့်လိုက်သည့်အလား သတ္တုတွင်း၏ နေရာအသီးသီးမှ အောင်ပွဲခံ အော်ဟစ်သံများ ဆက်တိုက် ထွက်ပေါ်လာတော့သည်။

"ငါ့ဆီမှာလည်း တွေ့ပြီ..."

"ဟားဟား... ငါလည်း တစ်တုံး တူးမိပြီကွ..."

"ဟက်... ငါလည်း နောက်မကျပါဘူး... တစ်တုံး တွေ့ထားပြီ..."

သတ္တုတွင်းတစ်ခုလုံးက ရိတ်သိမ်းရရှိမှု၏ ပျော်ရွှင်မှုများဖြင့် ချက်ချင်း လွှမ်းခြုံသွားတော့သည်။ လူတိုင်းက သူတို့၏ ပေါက်တူးများကို ပိုမိုပြင်းထန်စွာ ခုတ်ထွင်းကြပြီး ကြယ်တာရာအမြုတေကျောက် အသစ်များကိုလည်း အဆက်မပြတ် တူးဖော်ရရှိနေကြ၏။

သို့သော်ငြားလည်း ဤမျှ စည်ကားသက်ဝင်နေသည့် မြင်ကွင်းကြားထဲ၌ ကျန်းယဲ့ တစ်ယောက်တည်းသာ ဘာအကျိုးအမြတ်မှ မရရှိသေးချေ။

သူ့အဖွဲ့သားများထံမှ ရံဖန်ရံခါ ထွက်ပေါ်လာသည့် အံ့သြဝမ်းသာ အော်ဟစ်သံများကို နားထောင်ရင်း သူတို့က တစ္ဆေတစ်ကောင်ကဲ့သို့ အပြာရောင် လင်းလက်နေသည့် ကြယ်တာရာအမြုတေကျောက်များကို ကျောက်လွှာများကြားမှ အဆက်မပြတ် တူးဖော်နေကြသည်ကို ကြည့်နေရင်းဖြင့် လက်ချည်းသက်သက် ဖြစ်နေသေးသည့် ကျန်းယဲ့မှာ မည်သည့် စိတ်မရှည်မှု အရိပ်အယောင်မျှ မပြခဲ့ချေ။

သူက မူလစည်းချက်အတိုင်းသာ ထိန်းသိမ်းထားပြီး ပေါက်တူးကို ဖြည်းညင်းစွာနှင့် သေချာစွာ ရွယ်ကာ သာမန်ဟု ထင်ရသည့် အမည်းရောင် ကျောက်နံရံဆီသို့ တိကျစွာဖြင့် တစ်ချက်ပြီးတစ်ချက် ထုခွဲနေလိညက်သည်။

နောက်ခဏ၌ ပေါက်တူးတစ်ချက် ကျသွားသည်နှင့် မျက်နှာသစ်ဇလုံ အရွယ်အစားခန့်ရှိသော အမည်းရောင်ကျောက်တုံးကြီးတစ်ခုက ကျိုးပဲ့ ထွက်ကျလာ၏။ ယင်း ပြုတ်ကျသွားမှုက ခလုတ်တစ်ခုကို ရုတ်တရက် ဖွင့်လိုက်သကဲ့သို့ ဖြစ်သွားပြီး ၎င်း၏ ပတ်ဝန်းကျင်ရှိ သာမန်ကျောက်တုံးကြီးများစွာကိုပါ တစ်ပြိုင်နက်တည်း ကွာကျသွားစေလေသည်။

မျက်စိတစ်မှိတ်အတွင်းမှာပင် ယခင်က တွေ့ခဲ့ရသည့် မည်သည့် ကြယ်တာရာအမြုတေကျောက်ထက်မဆို ပိုမိုပြင်းထန်ပြီး စစ်မှန်လှသည့် နက်ရှိုင်းသော အပြာရောင်အလင်းတန်းကြီးက ပြိုကျသွားသည့် ကျောက်နံရံအနောက်မှ ရုတ်တရက် ထွက်ပေါ်လာတော့သည်။

ထိုအလင်းရောင်က အလွန်တရာစူးရှလွန်းလှသဖြင့် မီးမောင်းများ၏ အလင်းရောင်အောက်၌ ပေါ်ထွက်လာသည့် သတ္တုရိုင်းနံရံကြီးတစ်ခုလုံးက ရေတွက်၍မရနိုင်လောက်အောင် တောက်ပပြီး စူးရှလှသည့် အပြာရောင်အလင်းဝန်းများကို ရောင်ပြန်ဟပ်နေကာ ကျောက်နံရံထဲ၌ သေးငယ်သော ကြယ်တာရာ ကောင်းကင်ယံတစ်ခုကို မြုပ်နှံထားသကဲ့သို့ ဖြစ်နေချေသည်။

ချက်ချင်းပင် နက်ရှိုင်းသည့် အပြာရောင်အလင်းတန်းကြီးက ဒီရေတစ်ခုလို ပြန့်နှံ့သွားကာ သတ္တုတွင်းတစ်ခုလုံးကို လွှမ်းခြုံသွားပြီး မူလက မှိန်ပျပျဖြစ်နေသည့် နေရာကြီးကို အိပ်မက်ဆန်ဆန် အပြာရောင် နန်းတော်ကြီးတစ်ခုအဖြစ် ပြောင်းလဲပစ်လိုက်သည်။

ရုတ်တရက် ထွက်ပေါ်လာကာ အရာအားလုံးကို လွှမ်းခြုံသွားသည့် ထိုအလင်းရောင်က ကျန်းယဲ့ သတိပေးစရာပင် မလိုဘဲ ဂူထဲရှိ လူတိုင်း၏ အာရုံစိုက်မှုကို ချက်ချင်း ဆွဲဆောင်သွားခဲ့၏။

"ဟင်..."

"ဘာအလင်းရောင်ကြီးလဲ..."

"ဟိုမှာ..."

သူတို့အလုပ်တွင် နစ်မြုပ်နေကြသည့် ခရီးသွားများက လုပ်လက်စများကို ရပ်တန့်လိုက်ကြပြီး တညီတညွတ်တည်း လှည့်ကြည့်လိုက်ကြရာ အလင်းရောင်ထွက်ပေါ်လာရာ အရင်းအမြစ်ကို ကြည့်ကာ သူတို့၏ မျက်လုံးများက အံ့သြမှုကြောင့် ပြူးကျယ်သွားကြရသည်။

ကျောက်နံရံတစ်ခုလုံး နီးပါးကို ဖုံးလွှမ်းနေပြီး သိပ်သည်းစွာ စုပြုံနေသည့် အရည်အသွေးမြင့် အပြာရင့်ရောင် ကြယ်တာရာအမြုတေကျောက်များဆီသို့ သူတို့၏ အကြည့်များ ရောက်သွားသောအခါ လူတိုင်းမှာ အလွန်အမင်း အံ့အားသင့်သွားကြပြီး ပါးစပ်များမှာ အိုပုံစံ ဟသွားကာ မျက်လုံးများမှာလည်း အံ့သြမှုကြောင့် ပြူးကျယ်သွားကြရတော့သည်။

ခေတ္တမျှ တိတ်ဆိတ်သွားပြီးနောက် သတ္တုတွင်းထဲမှ အံ့သြတုန်လှုပ်ဖွယ် ရေရွတ်သံများ ထွက်ပေါ်လာလေသည်။

"ဘုရားရေ... သေစမ်း.."

"မယုံနိုင်စရာပဲ... ဒါက အရမ်းကို လွန်လွန်းနေပြီ.."

"ဘုရားသခင်... နံရံတစ်ခုလုံးမှာ အပြည့်ပဲဟ..."

"ဒါရိုက်တာကျန်း... ခင်ဗျားက ကြယ်တာရာ အမြုတေကျောက်တွေရဲ့ ဌာနချုပ်ကိုများ သွားမွှေလိုက်တာလား..."

"ငါတို့ ချမ်းသာပြီ...တကယ်ကြီးကို ချမ်းသာသွားပြီဟေ့.."

အာမေဍိတ်သံများ၊ အော်ဟစ်သံများနှင့် စိတ်လှုပ်ရှားဖွယ် အော်သံများက ရောယှက်သွားပြီး လူတိုင်းက အချင်းချင်း ဆက်စပ်နေသည့် ကြယ်တာရာအမြုတေကျောက် သတ္တုရိုင်းများကြောင့် မှင်တက်အံ့သြနေကြသည်။

ကျန်းယဲ့၏ ရိတ်သိမ်းရရှိမှုနှင့် နှိုင်းယှဉ်လိုက်လျှင် သူတို့ စောစောက တူးဖော်ရရှိခဲ့သည့် ဟိုတစ်စဒီတစ်စ သတ္တုရိုင်းအနည်းငယ်မှာ ရွှေတွင်းကြီးတစ်ခုကို ရှာတွေ့သည့် ကမ်းခြေမှ ကျောက်စရစ်ခဲလေးများကဲ့သို့သာ ဖြစ်နေချေတော့သည်။

သူ့ရှေ့ရှိ စူးရှတောက်ပနေသော အပြာရောင် သတ္တုတွင်း နံရံကြီးကို ကြည့်ကာ ကျန်းယဲ့က နောက်ဆုံးတွင် ကျေနပ်စွာ ပြုံးလိုက်၏။

ထို့နောက် သူက အနည်းငယ် နာကျင်နေသည့် လက်မောင်းများကို ညင်သာစွာ လှုပ်ခါလိုက်ပြီး မှင်တက်နေသည့် လူအုပ်ကြီးကို ပြုံးကာ ပြောလိုက်၏။ "မင်းတို့အားလုံး ဘာရပ်ကြည့်နေကြတာလဲ။ လာကူကြလေ.... ဒီနေ့ ငါတို့ရဲ့ ရည်မှန်းချက်က... ဒီနေရာကို ပြောင်သလင်းခါသွားအောင် တူးဖို့ပဲ..."

ကျန်းယဲ့ စကားပြောပြီးသည်နှင့် တစ်ပြိုင်နက် သူတို့က ဗိုက်ဆာနေသည့် ဝံပုလွေများကဲ့သို့ ဟိန်းဟောက်ကာ ပြေးလာကြပြီး သူတို့၏ စွမ်းဆောင်ရည်မြင့် ပေါက်တူးများကို ဝှေ့ယမ်းလျက် ပေါ်ထွက်နေသည့် ကြယ်တာရာအမြုတေကျောက် သတ္တုရိုင်းနံရံကြီးကို အသည်းအသန် စတင်ခုတ်ထွင်းလိုက်ကြသည်။

"ဂရုစိုက်ကြဦး... မကွဲသွားစေနဲ့..."

"ဘေးဘက်ကနေ ခွာထုတ်... တစ်တုံးလုံးအတိုင်း တူးထုတ်နိုင်ရင် တန်ဖိုးပိုမြင့်တယ်..."

"ဖယ်ဦး... ဒီမှာ အက်ကွဲကြောင်း တစ်ခုရှိတယ်ထင်တယ်..."

အစပိုင်းတွင် သူတို့၏ရှေ့ရှိ နံရံကြီးက အံ့အားသင့်စရာ အရာအားလုံးဟု သူတို့ ထင်မှတ်ထားခဲ့ကြသည်။ ဤဧရာမ ကြယ်တာရာအမြုတေကျောက် သတ္တုရိုင်းကြီးကို အတူတကွ တူးဖော်နိုင်သမျှ ကာလပတ်လုံး ယင်းက လူတိုင်းအတွက် တာဝန်ကို ကျော်လွန်ရန် လုံလောက်ရုံသာမက ကြီးမားသည့် စည်းစိမ်တစ်ခုကိုပင် ဖန်တီးပေးနိုင်မည် ဖြစ်၏။

သို့သော်ငြားလည်း သူတို့က သတ္တုကြော၏ အစွန်အဖျားတစ်လျှောက် သတိထား၍ တူးဖော်ကာ သာမန်ကျောက်တုံးများကို တစ်တုံးပြီးတစ်တုံး ခွာချလိုက်သည့်အခါ ပိုမို၍ ရင်သပ်ရှုမောဖွယ်ကောင်းသော မြင်ကွင်းကြီးတစ်ခုက သူတို့ရှေ့၌ တဖြည်းဖြည်း ပေါ်လွင်လာခဲ့ချေသည်။

ဤအံ့မခန်းဖြစ်နေပြီဖြစ်သော ကြယ်တာရာအမြုတေကျောက်သတ္တုရိုင်းနံရံကြီး၏ အနောက်ဘက်၌ ကျောက်လွှာများက ကြက်သွန်နီ အခွံနွှာလိုက်သကဲ့သို့ ကွာကျသွားပြီး ပိုမိုကြီးမားကာ သိပ်သည်းပြီး အရည်အသွေး ပိုမိုမြင့်မားပုံရသည့် နက်ရှိုင်းသော အပြာရောင် သတ္တုရိုင်းကြောကြီးတစ်ခု ထွက်ပေါ်လာခဲ့၏။

ယင်း၏ အလင်းရောင်က ယခင်ကထက် ပိုမိုနက်ရှိုင်းကာ စူးရှတောက်ပနေပြီး မြေအောက်နက်နက်၌ အိပ်စက်နေသည့် ဧရာမ အပြာရောင် နဂါးကြီးတစ်ကောင်နှင့်ပင် တူနေချေတော့သည်။

"ဘုရားရေ... အနောက်မှာ အများကြီး ကျန်သေးတယ်..."

"ဘယ်လောက်... ဘယ်လောက်တောင် ကြီးမားနေတာလဲ.."

"မယုံနိုင်စရာပဲ.. ဒီမှာ အကုန်လုံး ဆက်နေတာပဲ... နေရာတိုင်းမှာ ရှိနေတယ်..."

ဤရှာဖွေတွေ့ရှိမှုက လူတိုင်း၏ အသက်ရှူနှုန်းကို မြန်ဆန် ပြင်းထန်လာစေခဲ့သည်။

ဒါက သတ္တုရိုင်းတစ်တုံးတည်း မဟုတ်တော့ဘဲ သတ္တုကြောကြီး တစ်ခုလုံးကို ရှာတွေ့လိုက်ခြင်းပင်။

အခန်း ၂၇၀ပြီး၏။