အခန်း ၅၈

Ch-58

ရွှေဆံထိုးမှာ အလေးချိန်စီးပြီး ကျောက်မျက်ရတနာများဖြင့် အလှဆင်ထားသည်။ တန်ဖိုးကြီးမားလှကြောင်း အထင်အရှားပင်။ စွန်းမြောင်းယင်၏ရင်တွင်း၌ နှမြောတသဖြစ်မှုကြောင့် နာကျင်သွားရသည်။ သူမသည် ပြီးခဲ့သည့်နှစ်က မြို့တော်တွင် ထိုဆံထိုးကို ဝယ်ယူရန် တစ်စုံတစ်ယောက်အား အကူအညီတောင်းခဲ့ရပြီး ၎င်းမှာ ခေတ်အမီဆုံးပုံစံဖြစ်ကာ ငွေအမြောက်အမြား ပေးခဲ့ရသည်။ အဖိုးတန်ပစ္စည်းများကို စုဆောင်းလိုသော သူမရည်မှန်းချက်လေး တစ်ခု ဆုံးရှုံးသွားရ၏။

သို့သော် လင်းယွဲ့နှင့် ဝမ်စုန်ရှင်းတို့ ရင်းနှီးသော ဆက်ဆံရေးရှိနေသည်ကို မြင်တွေ့ရပြီး လင်းယွဲ့က ယနေ့ဖြစ်ရပ်ကို နောက်ပိုင်းတွင်ပြန်လည်အစဖော်မည်ကို စိုးရိမ်သဖြင့် လင်းယွဲ့အား နှစ်သိမ့်ရန် ဤဆံထိုးကိုအသုံးပြုရုံမှလွဲ၍ သူမတွင် ရွေးချယ်စရာမရှိတော့ပေ။ စွန်းမြောင်းယင်မှာ အစားအသောက်စားရန် ခံတွင်းမတွေ့တော့သလို အမွှေးတိုင်ထွန်းညှိပူဇော်ရန်လည်း စိတ်မပါတော့ပေ။ သူမသည် သမီးဖြစ်သူကို ခေါ်ဆောင်ကာ ကိစ္စရပ်များကို ဖြေရှင်းရန်အတွက် ခရိုင်မြို့တော်သို့ အမြန်ပြန်သွားလေတော့သည်။ သူမခင်ပွန်းဖြစ်သူက နောက်ပိုင်းတွင် သူမအား ဆူပူကြိမ်းမောင်းမည်ကို တွေးမိသောအခါ သူမခေါင်းကိုက်လာလေ၏။ သူတို့ ထွက်သွားပြီးနောက် ဝမ်အာ့မေက ရင်ဘတ်ကိုဖိကာ ပြောလိုက်သည်။

"ဒီကိစ္စက အခုလို ဖြေရှင်းပြီးသွားမယ်လို့ မထင်ထားခဲ့ဘူး၊ သူတို့က တကယ်ကို ဘယ်သူတွေလဲ"

"သူတို့ကို ထားလိုက်ပါတော့၊ ငါတို့က ငါတို့အလုပ်ကိုသာ ဆက်လုပ်ရမှာ"

"အဲဒီသခင်လေးက အရမ်းအရှိန်အဝါ ကြီးတာပဲ၊ ငါ့ညီမက ဒီလိုအရေးပါတဲ့လူကိုသိနေပြီးတော့ သူ့ညီမကိုတောင် ကယ်တင်ခဲ့သေးတယ် "

"ဝါး ဝါး ဝါး"

ဝမ်အာ့မေက ညည်းညူနေစဉ်မှာပင် ဝမ်ယင်း၏အကြောက်လွန်မှုများက နောက်ဆုံးတွင် ပေါက်ကွဲထွက်လာပြီး တိုးညှင်းစွာ စတင်ငိုကြွေးလေတော့သည်။

"ရပါတယ် ရပါတယ်"

လင်းယွဲ့က တာ့ယာမျက်ဝန်းများတွင်လည်း မျက်ရည်များပြည့်နှက်နေပြီး သူမသွားများက နှုတ်ခမ်းကိုကိုက်ကာ တုန်ယင်နေသည်ကို မြင်သောအခါ ပြောလိုက်သည်။ လင်းယွဲ့သည် သူတို့ကို အမြန်နှစ်သိမ့်လိုက်ပြီး နို့သကြားလုံးနှစ်လုံးကို သူတို့ပါးစပ်ထဲသို့ ထည့်ပေးလိုက်၏။

"မကြောက်နဲ့နော်၊ ဒါလေး စားလိုက်၊ အော် ဒါနဲ့ ဒီနေ့လက်ဖက်ရည်အချို အသစ်တစ်မျိုးလုပ်မလို့၊ သောက်ချင်ကြလား"

"ဘယ်လို လက်ဖက်ရည်မျိုးလဲဟင်"

"လျှို့ဝှက်ချက်ပဲ၊ မျှော်လင့်ထားလိုက်နော်၊ နောက်ခဏနေရင် ယူလာခဲ့မယ်၊ ချိုမြိန်ပြီး အရမ်းအရသာရှိတယ်"

လင်းယွဲ့သည် မီးဖိုချောင်ထဲသို့ တစ်ယောက်တည်း ဝင်သွားလိုက်၏။ မီးဖိုထဲတွင် မီးမသေသေးသဖြင့် ထင်းနှစ်ချောင်းကို အမြန်ထည့်လိုက်ရာ မီးတောက်များ ပြန်လည်တောက်လောင်လာလေသည်။ သူမသည် ကာရာမယ်ပြုလုပ်ရန် သကြားဖြူများကို ထည့်လိုက်ပြီးနောက် ရေလောင်းထည့်ကာကျိုလိုက်ပြီး နို့မှုန့်များကိုပါ ထည့်လိုက်၏။ ကျက်သွားသောအခါ ကာရာမယ်နို့ရည်ကို လက်ဖက်ရည်ထဲသို့ လောင်းထည့်လိုက်သည်။ သူမသည် အမြန်အေးသွားစေရန် ရေခဲတုံး အနည်းငယ်ကိုထည့်လိုက်၏။ လင်းယွဲ့က အရင်ဆုံး တစ်ငုံမြည်းကြည့်လိုက်သည်။ နို့ရနံ့က ပြည့်ဝနေပြီး လက်ဖက်ရည်က လတ်ဆတ်ကာ အရသာနှစ်မျိုးစလုံးက အလွန်အမင်း ကွဲပြားမှုမရှိဘဲ ပြီးပြည့်စုံစွာ ပေါင်းစပ်သွားလေသည်။ ကာရာမယ်အရသာနှင့် ပေါင်းစပ်လိုက်သောအခါ ချိုမြိန်မှုက သူမပါးစပ်တစ်ခုလုံးသို့ ပြည့်နှက်သွားလေ၏။

“အရသာရှိလိုက်တာ”

ရှေးခေတ်ကာလတွင် လင်းယွဲ့အနေဖြင့် ကယ်လိုရီ သို့မဟုတ် အချိုဓာတ်များကို ဂရုစိုက်နေစရာမလိုသဖြင့် သူမသည် အလွန်အမင်းနှစ်ခြိုက်စွာ သောက်သုံးလိုက်သည်။ လင်းယွဲ့သည် နို့လက်ဖက်ရည်ကို လက်ဖက်ရည်ကရားထဲသို့ လောင်းထည့်လိုက်ပြီး ကရားထဲသို့ ရေခဲတုံး အများအပြားကိုပါ ထည့်လိုက်၏။ ကြွေကရားဖြစ်သဖြင့် ရေခဲများကိုမမြင်ရဘဲ ရေစစ်ပေါက်က ပိတ်ထားသဖြင့် ရေခဲတုံးများလည်း အပြင်သို့ ထွက်မကျနိုင်ပေ။

"ရပြီ"

လင်းယွဲ့က လက်ဖက်ရည်ကရားကို သယ်လာပြီး လက်ဖက်ရည်ပန်းကန်လုံးထဲသို့ လောင်းထည့်ရင်း ပြောလိုက်သည်။ နို့ရောင်သန်းနေသော အညိုရောင်လက်ဖက်ရည်သည် ပန်းကန်လုံးထဲသို့ ကျဆင်းသွားစဉ် ခုံးဝိုက်သော ပုံသဏ္ဌာန်ဖြစ်ပေါ်သွားပြီး ချိုမြိန်သော ရနံ့များက ပတ်ဝန်းကျင်သို့ပျံ့နှံ့သွားလေ၏။ တာ့ယာက မစောင့်နိုင်တော့ဘဲ တစ်ငုံ သောက်လိုက်သည်။ ပူလိမ့်မည်ဟုထင်မှတ်ကာ အချိန်အတော်ကြာအောင်မှုတ်ပြီးနောက် သောက်လိုက်သောအခါ အေးစက်နေသည်ကို တွေ့လိုက်ရသည်။ နို့အရသာက သူမပါးစပ်တစ်ခုလုံးကို ပြည့်နှက်သွားပြီး နူးညံ့ချောမွေ့ကာ နို့၏ထူးခြားသောချိုမြိန်မှုလည်း ပါဝင်နေ၏။ သူမ ငယ်ငယ်က ဆိတ်နို့ သောက်ခဲ့ဖူးသည်။

ထိုအချိန်က ရွာထဲတွင် ဆိတ်မွေးသူ တစ်ဦးရှိပြီး ဆိတ်နို့ အနည်းငယ်ကို ရောင်းချလေ့ရှိသည်။ သို့သော် ဆိတ်နို့မှာချိုသော်ငြားလည်း အနည်းငယ် ညှီနံ့ထွက်နေပြီး လတ်ဆတ်မှုမရှိသောကြောင့် ဖြစ်နိုင်ပေသည်။ သူမ သောက်ရသည်ကို သိပ်မကြိုက်သလို ရွာသူရွာသားများလည်း မကြိုက်ကြပေ။ တဖြည်းဖြည်းနှင့် သူတို့သည် ဝက်မွေးမြူခြင်းသို့ ပြောင်းလဲသွားကြသည်။ သို့သော် ဤနို့မှာ ထူးဆန်းသော အရသာ လုံးဝမရှိပေ။ ထို့ပြင် လက်ဖက်ရည်၏ ဖန်တန်တန်အရသာ အနည်းငယ် ပါဝင်နေပြီး ယင်းက နို့၏ပြည့်ဝသော အရသာကို ပြီးပြည့်စုံစွာ ဟန်ချက်ညီစေသည်။ ချိုမြိန်မှုအကြောင်းကိုတော့ ပြောစရာပင်မလိုတော့ပေ။ တာ့ယာက အမြန်သောက်လိုက်ပြီး ထပ်သောက်ချင်နေသေးသည်။ လင်းယွဲ့က သူမအား နောက်ထပ်တစ်ပန်းကန် လောင်းထည့်ပေးလိုက်ပြီး အပြုံးဖြင့်မေးလိုက်သည်။

"အရသာရှိလား"

"အရသာရှိတယ်"

ဝမ်ယင်းသည်လည်း ခေါင်းကို အဆက်မပြတ်ညိတ်ပြကာ အငမ်းမရ မော့သောက်လိုက်ပြီးနောက် သူ၏ ပန်းကန်လုံးကို လင်းယွဲ့ထံကမ်းပေးကာ နောက်ထပ်တစ်ခွက် ထည့်ပေးရန် အချက်ပြလိုက်သည်။ လင်းယွဲ့လောင်းထည့်ပေးပြီးနောက် ဝမ်ယင်းမှာ သောက်ချင်စိတ်ပြင်းပြနေသော်လည်း သူ့ပန်းကန်လုံးကို ဝမ်အာ့မေထံကမ်းပေးလိုက်သည်။

"အမေ၊ အမေ နည်းနည်းမြည်းကြည့်ပါဦး"

ဝမ်အာ့မေက တစ်ငုံသောက်လိုက်ရာ သူမမျက်လုံးများ အနည်းငယ်ပြူးကျယ်သွားပြီး မျက်ဝန်းများ အရောင်လက်ကာ ဝမ်ယင်းအားခေါင်းညိတ်ပြလိုက်သည်။

"အဲဒါက ဘာလဲ"

ထိုအချိန်တွင် လူအချို့ဖြတ်သွားလေသည်။ နွားလှည်းစီးလာသော မိသားစု သုံးဦးသည် လက်ဖက်ရည်ဆိုင်တွင် အနားယူနေကြပြီး လင်းယွဲ့လောင်းထည့်နေသော နို့လက်ဖက်ရည်ကိုမြင်တွေ့သွားကြရာ သူတို့မေးလိုက်ကြသည်။

“အဲ့ဒါ ဘာလဲဟင်”

"နို့လက်ဖက်ရည်ပါ"

လင်းယွဲ့ကပြုံးရင်း ပြန်ဖြေလိုက်သည်။

"ဧည့်သည်တော် တစ်ပန်းကန်လောက် သောက်မလားရှင်၊ တစ်ပန်းကန်ကို ကြေးပြားနှစ်ပြားပါ၊ ရိုးရိုး လက်ဖက်ရည်ကတော့ တစ်ပန်းကန်ကို တစ်ပြားဖြစ်ပြီး လျံဖန်းကတော့ တစ်ပွဲကို သုံးပြားပါ"

စီးပွားရေး ဖွံ့ဖြိုးတိုးတက်စေရန်အတွက် ဖောက်သည်များကို ဆွဲဆောင်လိုသော လင်းယွဲ့၏ရည်မှန်းချက်က အပြုံးဖြင့်ဧည့်ခံခြင်းတွင် ပေါ်လွင်နေသည်။

"အမေ၊ သား နို့လက်ဖက်ရည်သောက်ချင်တယ်"

ကောင်လေးက အမျိုးသမီး၏အင်္ကျီလက်ကို ဆွဲလိုက်သည်။

"ကြေးပြားနှစ်ပြားတောင်"

အမျိုးသမီးက အနည်းငယ်နှမြောသွားသည်။

"အဲဒီပိုက်ဆံကို ဘုရားမှာအမွှေးတိုင် သွားထွန်းရင် ပိုမကောင်းဘူးလား"

အမျိုးသားက ထန်းရွက်ယပ်တောင်ဖြင့် ယပ်ခတ်ရင်းပြောလိုက်သည်။

"ဒီနေ့က ပူတယ်လေ၊ ပြီးတော့ ငါတို့မှာ ရေလည်းကုန်သွားပြီ၊ တာ့ကွမ်ဘုန်းကြီးကျောင်းကိုရောက်ဖို့ အဝေးကြီး လိုသေးတယ်၊ ရှေ့မှာမြစ်တွေ ချောင်းတွေလည်း မရှိတော့ဘူး၊ ငါတို့ လမ်းတစ်လျှောက်လုံး ရေဆာခံသွားရမှာလား"

"နို့လက်ဖက်ရည် တစ်ပန်းကန်ပေးပါ"

အမျိုးသမီးက သူမပိုက်ဆံအိတ်ကို ထုတ်ယူလိုက်သည်။

"ပန်းကန်လုံးကကြီးတာပဲ၊ ရှင်တို့နှစ်ယောက် တစ်ပန်းကန်ကို မျှသောက်ကြလေ၊ ကျွန်မက ရေမဆာလို့ မသောက်တော့ဘူး"

"ကောင်းပြီလေ"

ရက်ရောသော ဖောက်သည်အချို့မှလွဲ၍ လူအများစုမှာ ဤကဲ့သို့ပင်ဖြစ်ကြပြီး နှစ်ယောက် သို့မဟုတ် သုံးယောက် တစ်ပန်းကန်ကို မျှသောက်လေ့ ရှိကြသည်။ လင်းယွဲ့က နို့လက်ဖက်ရည်ကို ပန်းကန်လုံးအပြည့် လျှံကျမတတ်ထည့်၍ ကမ်းပေးလိုက်၏။ ကောင်လေးက ဖိတ်ကျမည်ကို စိုးရိမ်သဖြင့် ချက်ချင်းတစ်ငုံ သောက်လိုက်သည်။ ထိုတစ်ငုံသောက်လိုက်သည်နှင့် တစ်ပြိုင်နက် သူ့မျက်လုံးများ ပြူးကျယ်သွားသည်။

"သိပ်ချိုတာပဲ၊ သိပ်အရသာရှိတာပဲ"

သူသည် တစ်နှစ်ပတ်လုံးမှ နှစ်သစ်ကူးကာလတွင်တစ်ကြိမ်သာ သကြားလုံး စားရလေ့ရှိသည်။ သူ့ပါးစပ်မှာ များသောအားဖြင့် အရသာမရှိသဖြင့် အနည်းငယ်ချိုမြိန်မှုကိုပင် တိကျစွာ အရသာခံနိုင်ပြီး ဤမျှချိုမြိန်သော အရာကိုဆိုလျှင် ပြောစရာပင်မလိုတော့ပေ။ ၎င်းတွင် နို့၏ချိုမြိန်မှုသာမက ကာရာမယ်၏ချိုမြိန်မှုလည်း ပါဝင်နေသည်။ ကောင်လေး၏မျက်ဝန်းများ အရောင်လက်သွားပြီး အမျိုးသားထံ အမြန်ကမ်းပေးလိုက်သည်။

"အဖေ၊ အဖေ တစ်ငုံသောက်ကြည့်၊ သိပ်ကောင်းတာပဲ"

အမျိုးသားသည် နဖူးမှချွေးများကို သုတ်နေရာ ထိုစကားကိုကြားသောအခါ သူ အထူးပင်ကျေနပ်သွားပြီး ကောင်လေး၏ခေါင်းကို ပွတ်သပ်လိုက်သည်။

"လိမ္မာလိုက်တဲ့ သားလေး"

သူ လက်ဖက်ရည်ပန်းကန်လုံးကို ယူလိုက်သောအခါ သူထင်မှတ်ထားသည်နှင့်မတူဘဲ အေးစက်နေသည်ကို အံ့ဩဖွယ် တွေ့လိုက်ရ၏။ သောက်လိုက်သောအခါ ပထမဆုံးအေးမြမှုက သူ့ပါးစပ်ထဲရှိ အပူငွေ့များကိုငြိမ်းအေးသွားစေပြီးနောက် ပြည့်ဝသောနို့အရသာနှင့် ချိုမြိန်မှုတို့ကလိုက်ပါလာကာ နောက်ဆုံးမြိုချပြီးနောက်တွင် လက်ဖက်ရည်၏ ဖန်တန်တန်အရသာလေးက ပါးစပ်ထဲတွင်စွဲကျန်ရစ်လေသည်။

"တကယ်ကို အရသာရှိတာပဲ"

အပူဒဏ်ကြောင့် စိတ်တိုနေသော အမျိုးသား၏စိတ်အခြေအနေမှာ ချက်ချင်းပင် သိသိသာသာလျော့ကျသွားသည်။

"အိုး မင်း.... မင်းလာပြီး သောက်ကြည့်ပါဦး၊ တကယ်ကောင်းတယ်"

အမျိုးသားက အမြန်ကမ်းပေးလိုက်သည်။

"ကျွန်မ ရေမဆာပါဘူးဆို"

အမျိုးသမီးက မျက်မှောင်ကြုတ်လိုက်သည်။ သူမအကြည့်များက နို့လက်ဖက်ရည်ပေါ်၌ စူးစိုက်နေပြီး သိချင်စိတ် အနည်းငယ်ပေါ်လွင်နေသော်လည်း လက်ယမ်းကာ အကြိမ်ကြိမ်ငြင်းဆန်နေ၏။

"ကျွန်မ နောက်မှဘုရားကျောင်းနားက ရေချိုကိုသောက်တော့မယ်၊ ဒါကိုမသောက်တော့ဘူး"

"ဒါက ဘုရားကျောင်းနားက ရေချိုထက် ပိုကောင်းတယ်"

အမျိုးသားက ပန်းကန်လုံးကိုရှေ့တိုးပေးလိုက်သည်။

"တကယ်ပါ၊ မြည်းကြည့်လိုက်ပါ"

"မသောက်ဘူး၊ မသောက်ဘူး"

အမျိုးသားသည် ဇနီးဖြစ်သူ၏စရိုက်ကို ကောင်းစွာသိရှိ၏။ သူမသည် ကောင်းသောအရာအားလုံးကို သူနှင့် သားဖြစ်သူအတွက် ချန်ထားပေးလိုခြင်းဖြစ်သည်။ သူမ မသောက်ချင်၍ မဟုတ်ဘဲ သူတို့ကိုပိုသောက်စေချင်၍သာဖြစ်၏။ အမျိုးသားသည် ပန်းကန်လုံးကို ရှေ့သို့အတင်းတိုးကာ လက်တစ်ဖက်ဖြင့် ဇနီးဖြစ်သူ၏ခါးကို ဖက်လိုက်ပြီး အခြားလက်တစ်ဖက်ဖြင့် ပန်းကန်လုံးကို သူမနှုတ်ခမ်းနားသို့ တေ့ပေးလိုက်သည်။

"တစ်ငုံလောက် သောက်ကြည့်လိုက်စမ်းပါ၊ မြန်မြန်"

အမျိုးသမီးက မသောက်ချင်သောက်ချင်ဖြင့် တစ်ငုံသောက်လိုက်ရာ သူမမျက်လုံးများ ချက်ချင်းအရောင်လက်သွားလေသည်။

"ကောင်းတယ် မဟုတ်လား”

အမျိုးသားက ကျေနပ်အားရစွာဖြင့် မေးလိုက်သည်။

"မဆိုးပါဘူး"

အမျိုးသမီးသည် ပါးစပ်ထဲရှိအရသာကိုခံစားရင်း အနည်းငယ် နှမြောတသ ဖြစ်နေသော်လည်း ပြတ်သားစွာပြောလိုက်သည်။

"ဒါပေမဲ့ ကျွန်မတကယ် ရေမဆာပါဘူး၊ ရှင်တို့နှစ်ယောက်ပဲ သောက်လိုက်ကြပါ"

ကောင်လေး၏စိတ်အားထက်သန်နေသောအကြည့်များကို မြင်သောအခါ အမျိုးသားက နှစ်ငုံသောက်လိုက်ပြီးနောက် ပန်းကန်လုံးကို ကောင်လေးထံ ကမ်းပေးလိုက်သည်။

"ငါ ထပ်မသောက်နိုင်တော့ဘူး၊ မင်းပဲ အကုန်သောက်လိုက်တော့"

ကောင်လေး၏မျက်လုံးများ တောက်ပသွားပြီး အငမ်းမရ အမြန်သောက်လိုက်လေတော့သည်။ လင်းယွဲ့သည် ဤနွေးထွေးသောမြင်ကွင်းလေးကိုကြည့်ရင်း သူမကိုယ်တိုင်လည်း ရင်တွင်း၌ ကြည်နူးမှုများကို ခံစားလိုက်ရ၏။ ထိုအချိန်တွင် အခြားလူများရောက်လာကြသည်။

"သူတို့ ဘာတွေသောက်နေကြတာလဲ၊ ကျွန်တော့်ကိုလည်း တစ်ပန်းကန်ပေးပါ"

ခဏတာအတွင်းမှာပင် လူအများအပြား မှာယူကြလေတော့သည်။

"ဆိုင်ရှင်၊ ဒါက တကယ်အရသာရှိတာပဲ၊ ဘုန်းကြီးကျောင်းနားက ရေချိုထက်တောင် ပိုကောင်းသေးတယ်"

"ဟေ့ ဆိုင်ရှင် ဘုန်းကြီးကျောင်းနားမှာ ဆိုင်သွားဖွင့်လို့ရတယ်နော်၊ လဆန်းတစ်ရက်နဲ့ လပြည့်နေ့တိုင်း အဲဒီမှာ လူအများကြီးရှိတယ်"

"မပြောပါနဲ့တော့၊ အဲဒီမှာပစ္စည်းရောင်းတဲ့သူတွေ အများကြီးပဲ၊ ပြီးတော့ အမွှေးတိုင်တွေကလည်း ဈေးပေါတယ်လေ"

လင်းယွဲ့သည်လည်း ဖောက်သည်များနှင့် သက်သောင့်သက်သာစကားပြောဆိုနေသည်။

"ကျွန်မ ဘုန်းကြီးကျောင်းကိုမရောက်ဖူးသေးဘူး၊ အဲဒီမှာ လူအများကြီးရှိလားဟင်"

"ဒါပေါ့၊ အနီးအနား အရပ်ရပ်ကလူတွေ အဲဒီကိုသွားကြတာ၊ ဘုရားရှင်ရဲ့မွေးနေ့ကျရင် လူတွေပိုတောင်များသေးတယ်"

တစ်စုံတစ်ယောက်က နို့လက်ဖက်ရည်ကို တစ်ငုံသောက်လိုက်ပြီး နှုတ်ခမ်းကို သပ်ကာ အရသာခံရင်းပြောလိုက်သည်။

"ငါ့ကို မပြောနဲ့၊ အဲဒီဘုန်းကြီးတွေတော့ တော်တော် စီးပွားဖြစ်နေလောက်ပြီ၊ အနီးအနားက မြေတွေအကုန်လုံးက သူတို့ပိုင်တာလေ၊ သူတို့က ငါတို့ကိုဆိုင်ခန်းခ ကောက်ရုံတင်မကဘူး၊ လူတွေကလည်း အလှူငွေတွေလာလှူကြသေးတယ် ကျက်သရေမရှိလိုက်တာ၊ ငါတို့က သေမတတ်အလုပ်လုပ်နေရတာကို ဘုန်းကြီးဝတ်တာလောက်တောင် မကောင်းဘူး"