အခန်း ၃၇၇

Vol. 38 Ch. 377

အခန်း (၃၇၇) ၉၉ ကြိမ်မြောက် စွန့်ပစ်ဂြိုဟ်ဆီသို့

ကျန်းယဲ့က ဆူညံနေမှုများကို တိတ်ဆိတ်သွားစေရန် လက်ကာပြလိုက်ပြီး သူ၏ အကြည့်များက ရူးသွပ်နေကြသည့် အကျဉ်းသားများအပေါ်သို့ တည်ငြိမ်စွာ ကျရောက်သွား၏။ "လူတိုင်း ပါဝင်ချင်တယ်ဆိုတာ ငါ သိတယ်... ဒါပေမဲ့ နေရာတွေက ကန့်သတ်ထားတယ်..."

သူ စကားပင် မဆုံးသေးခင်မှာပဲ အကျဉ်းသားတစ်ယောက်က သူ၏ အိတ်ကပ်ထဲမှ အဖိုးတန်ပစ္စည်းတစ်ခုကို ချက်ချင်း ထုတ်ယူကာ ကျန်းယဲ့အား ပေးလိုက်လေသည်။

"အစ်ကိုကြီး... ဒါက အစ်ကိုကြီးအတွက် ကျွန်တော့်ရဲ့ ပူဇော်သက္ကာပါ..."

ထိုမြင်ကွင်းကို မြင်လိုက်ရသည့်အခါ အခြားသူများကလည်း အခွင့်အရေးရရန် မျှော်လင့်ချက်ဖြင့် သူတို့ထံတွင်ရှိသည့် ပစ္စည်းကောင်းမျိုးစုံကို ထုတ်ကာ ရှေ့သို့ တိုးဝှေ့လာကြ၏။

မီကာတိုကလည်း အတင်းတိုးဝှေ့ကာ ရှေ့သို့ရောက်လာပြီး သူတန်ဖိုးထားရသည့် စွမ်းအင်ဆေးရည် ပုလင်းငယ်များကို ရတနာများကဲ့သို့ ဆက်သလိုက်ကာ မြှောက်ပင့်ပြောဆိုလိုက်သည်။ "အစ်ကိုကြီး... ကျွန်တော်လည်း သွားချင်တယ်... ဒါက ကျွန်တော့်ရဲ့ သေးငယ်တဲ့ ကျေးဇူးဆပ်မှုလေးပါ... ကျွန်တော့်ကို ခေါ်သွားပေးပါ... နောက်ဆိုရင် အစ်ကိုကြီးကို ကျွန်တော် သစ္စာရှိပါ့မယ်လို့ ကတိပေးပါတယ်..."

ကျန်းယဲ့က ယခင်အငြိုးများကြောင့် သူ့အား ငြင်းပယ်လိမ့်မည်ဟု သူ ထင်ထားခဲ့သော်လည်း ကျန်းယဲ့က သူ့အား တစ်ချက်ကြည့်လိုက်ပြီးနောက် ခေါင်းညိတ်ပြလိုက်၏။ "ကောင်းပြီ... မင်းကိုလည်း စာရင်းထဲ ထည့်ပေးလိုက်မယ်..."

မီကာတိုမှာ အလွန် ဝမ်းသာသွားပြီး စိတ်လှုပ်ရှားစွာဖြင့် အကြိမ်ကြိမ် ကျေးဇူးတင်စကား ဆိုလေတော့သည်။

ဘေးတွင် ရပ်နေသည့် လွေ့ရှီက မီကာတို၏ ဝမ်းသာအားရဖြစ်နေသည့် မိုက်မဲသော အမူအရာကို ရွံရှာမှု၊ သနားမှုတို့ဖြင့် ကြည့်လိုက်ပြီးနောက် သူ၏ အကြည့်ကို တိတ်ဆိတ်စွာ လွှဲဖယ်လိုက်၏။

အစက စိတ်ဝင်စားနေခဲ့သည့် ဒါးရ်မှာမူ ကျန်းယဲ့က မီကာတိုကို အလွယ်တကူ လက်ခံလိုက်သည်ကို မြင်လိုက်ရပြီးနောက် ရှေ့သို့တိုးရန် တုံ့ဆိုင်းသွားရသည်။

သူ၏ သတိထားတတ်သော သဘာဝအရ ထူးဆန်းမှုတစ်ခုခုကို အာရုံခံမိသွားခြင်းပင်။

ဒါက ထူးဆန်းတယ်...

ဒါးရ်က အချိန်အတော်ကြာ ချီတုံချတုံ ဖြစ်နေပြီးနောက် နောက်ဆုံးတွင် တိတ်ဆိတ်စွာ နေရန်သာ ဆုံးဖြတ်လိုက်ပြီး နေရာတစ်နေရာရရန် ရှေ့သို့ မတိုးတော့ချေ။

ထို့နောက် ပူဇော်သက္ကာမျိုးစုံဖြင့် ပေါ်တင်တစ်မျိုး၊ သွယ်ဝိုက်၍တစ်ဖုံ တောင်းဆိုမှုများနှင့် သူ၏ ကိုယ်ပိုင်ဆုံးဖြတ်ချက်များအရ ကျန်းယဲ့က လူ ၄၉ ယောက်ကို အစဉ်လိုက် ရွေးချယ်လိုက်သည်။

ကျန်ရှိနေသေးသည့် နေရာ ၅၁ နေရာကို မြင်သည့်အခါ အရွေးမခံရသည့် အကျဉ်းသားများက ပို၍ စိုးရိမ်လာကြပြီး သူတို့၏ ပေးကမ်းမှုများကို တိုးမြှင့်လာကြကာ အချို့က သူတို့ လွတ်မြောက်သွားပြီးနောက် ပိုင်ဆိုင်မှုအားလုံးကို ပေးအပ်ပါမည်ဟုပင် ကတိသစ္စာဆိုလာကြ၏။

လေထုက အမြင့်ဆုံးသို့ ရောက်ရှိသွားချိန်တွင် ကျန်းယဲ့က သူနှင့် သူ၏ ညီအစ်ကိုများပါ အတူတူ သွားကြမည်ဟု ကျယ်လောင်စွာ ကြေညာလိုက်ချေသည်။

ထိုသတင်းက ရေခဲရေတစ်ပုံးဖြင့် ပက်လိုက်သကဲ့သို့ ဆူညံနေသည့် မြင်ကွင်းကို ချက်ချင်း တိတ်ဆိတ်သွားစေခဲ့သည်။

အကျဉ်းသားများ၏ မျက်နှာများထက်တွင် အံ့ဩမှုနှင့် စိတ်ပျက်မှုများ ပြည့်နှက်သွားကြ၏။

ဤအချိန်၌ လွေ့ရှီးထက် ပို၍ ရှုပ်ထွေးသော ခံစားချက်ဖြစ်နေသူ မည်သူမျှ မရှိတော့ချေ။

ကျန်းယဲ့က အဖွဲ့ကို ကိုယ်တိုင်ဦးဆောင်ပြီး သူ၏ အဓိက လက်အောက်ငယ်သားများအားလုံးကို ခေါ်သွားမည်ဟု ကြေညာလိုက်သည်ကို ကြားလိုက်ရသည့်အခါ သူ အလွန် အံ့ဩတုန်လှုပ်သွားရသည်။

သူက ကိုယ်တိုင်ကိုယ်ကျ သွားမယ်...

သူ့လူတွေ အားလုံးကိုပါ ခေါ်သွားမယ်...

လွေ့ရှီမှာ အံ့အားသင့်ကာ မှင်တက်နေခဲ့၏။

သူပြောခဲ့တဲ့ စကားတွေကို သူကိုယ်တိုင် မယုံလို့လား... ဒါမှမဟုတ် သူ့မှာ တခြား ရည်ရွယ်ချက်တွေ ရှိနေလို့လား...

လွေ့ရှီက အံ့ဩတုန်လှုပ်နေချိန်၌ သူ၏ ဘေးတွင် ရပ်နေသည့် ဒါးရ်မှာမူ နောင်တများဖြင့် ပြည့်နှက်နေခဲ့ချေသည်။

သူက သူ၏ နဖူးကို ရိုက်လိုက်ပြီး အလွန်အမင်း သတိထားလွန်းခဲ့သဖြင့် ဤအခွင့်အရေးကို လက်လွတ်ခံလိုက်ရသည့်အတွက် နောင်တရနေခဲ့၏။

ကျန်းယဲ့က မီကာတိုကို ရွေးလိုက်ခြင်းက သူ့အနေဖြင့် အမြင်ကျယ်ပြီး သဘောထားကြီးကြောင်း သက်သေပြလိုက်ခြင်းသာ ဖြစ်ပုံရသည်။

ဟူး... ငါကတော့ နောက်ထပ် အခွင့်အရေးတစ်ခုကိုပဲ စောင့်ရတော့မှာပေါ့...

ထောင်မှူးက ကျန်းယဲ့ထံမှ စာရင်းကို ယူကာ တစ်ချက်ကြည့်လိုက်သည်။ စာရင်း၏ ထိပ်ဆုံးတွင် ကျန်းယဲ့၏ နာမည်ကို မြင်လိုက်ရပြီး သူ၏ အဓိက လက်အောက်ငယ်သားများ၏ နာမည်များ အစဉ်လိုက် ပါဝင်နေသည်ကို တွေ့လိုက်ရသည့်အခါ သူ၏ မျက်နှာတွင် ဖုံးကွယ်မရသော အံ့ဩမှုများ ပေါ်လာခဲ့၏။

"မင်းတို့လည်း ဒီတာဝန်မှာ ပါဝင်ဖို့ စီစဉ်ထားတာလား..." ထောင်မှူးက မော့ကြည့်ကာ ကျန်းယဲ့ကို အကဲခတ်လိုက်ပြီး သူ၏ ရည်ရွယ်ချက်များကို ချက်ချင်း နားမလည်နိုင် ဖြစ်သွားရသည်။

ဒီကောင်က ဒီတာဝန်ရဲ့ နောက်ကွယ်က လှည့်ကွက်တွေကို မသိလို့လား... ဒါမှမဟုတ် သူ့မှာ တခြား ရည်ရွယ်ချက်တွေ ရှိနေလို့လား...

ကျန်းယဲ့က တည်ငြိမ်စွာပင် ခေါင်းညိတ်ပြလိုက်၏။ "ဟုတ်ပါတယ်... ကျွန်တော်တို့ ညီအစ်ကိုတွေ အတူတူ သွားမှာပါ..."

ထောင်မှူးက စာရင်းပေါ်သို့ လက်ချောင်းများဖြင့် ခေါက်လိုက်ပြီး ဘာကြောင့်မှန်းမသိဘဲ ထပ်မေးလိုက်ပြန်သည်။ "မင်း ပြန်မစဉ်းစားချင်တော့ဘူး သေချာလား... အပြင်ဘက်က အန္တရာယ်ကင်းချင်မှ ကင်းမှာနော်..."

ကျန်းယဲ့က သူ၏ ထင်ရှားသော ယဉ်ကျေးသည့် အပြုံးလေးဖြင့် တည်ငြိမ်စွာ ပြန်ဖြေလိုက်၏။ "စဉ်းစားစရာ မလိုပါဘူး... စာရင်းက အဆင်ပြေတယ်ဆိုရင် ကျွန်တော်တို့ ပြန်ပြီး ပြင်ဆင်လိုက်ပါတော့မယ်..."

သူ ဆုံးဖြတ်ချက် ခိုင်မာနေသည်ကို မြင်လိုက်ရသဖြင့် ထောင်မှူးက ဆက်မပြောတော့ဘဲ စိတ်ထဲမှသာ လှောင်ပြောင်လိုက်၏။ "သေချင်နေတဲ့ ကောင်တွေကို စကားကောင်းပြောပြီး တားလို့မရပါဘူးလေ..." ထို့နောက် သူက စာရင်းကို လက်ခံလိုက်ပြီး ထွက်သွားရန် လက်ယမ်းပြလိုက်သည်။

ထို့နောက် စာရင်းများကို အမြန်စုစည်းကာ ထောင်မှူးကြီး၏ ရုံးခန်းသို့ ပေးပို့လိုက်သည်။

ထောင်မှူးကြီးက အကျဉ်းထောင်အသီးသီးမှ ပေးပို့လာသည့် နာမည်များကို ဂရုတစိုက် စစ်ဆေးကြည့်ရှုနေ၏။ အမှတ်(၁၅) အကျဉ်းထောင်၏ စာရင်းကို မြင်လိုက်ရသည့်အခါ အထူးသဖြင့် ကျန်းယဲ့နှင့် သူ၏ လူငါးဆယ် ပါဝင်နေသည်ကို တွေ့လိုက်ရသည့်အခါ သူ၏ မျက်ခုံးများက တွန့်ချိုးသွားပြီး သူ၏ လက်ချောင်းများက ကျန်းယဲ့ဆိုသည့် နာမည်ကို အလိုအလျောက် အကြိမ်ကြိမ် ပွတ်ဆွဲနေမိခဲ့သည်။

"ထူးဆန်းတယ်... အရမ်းကို ထူးဆန်းတယ်..." ထောင်မှူးကြီးက သံသယများ ပြည့်နှက်နေသည့် မျက်ဝန်းများဖြင့် ရေရွတ်လိုက်၏။

သူတို့က ဘာလို့ ဒီတာဝန်မှာ ပါဝင်ဖို့ တောင်းဆိုခဲ့ကြတာလဲ...

သူတို့ ပြသခဲ့တဲ့ အင်အားတွေနဲ့ ထောင်ထဲမှာ သူတို့ ရရှိထားတဲ့ အဆင့်အတန်းတွေအရ ဒီလို စွန့်စားဖို့ လုံးဝ မလိုအပ်ပါဘူး...

နောက်ခဏ၌ အတွေးတစ်ခုက သူ၏ စိတ်ထဲသို့ အလိုအလျောက် ဝင်ရောက်လာလေသည်။

သူတို့က တန်ခိုးအာဏာကြီးမားတဲ့ သူတွေကို ပြစ်မှားပြီး ပြည်နှင်ဒဏ်ခံရတဲ့အထိ စွန့်စားကာ ဒီအကျဉ်းထောင်ထဲကို ဝင်လာခဲ့တာက ဒီတာဝန်အတွက်များလား...

ဒါမှမဟုတ်ရင် ဒီတာဝန်မှာ ရှင်းလင်းရမယ့် ကြယ်တာရာ အာကာသယာဉ် အပျက်အစီးတွေအတွက်များလား...

ထိုအတွေးက ယုတ္တိမတန်ဟု သူထင်မိသော်လည်း သူ၏ရှေ့မှောက်ရှိ အခြေအနေများက ထိုဘက်သို့ တွေးမိစေရန် တွန်းအားပေးနေချေသည်။

တကယ်လို့ ပိုကြီးမားတဲ့ အစီအစဉ်တစ်ခုခုသာ မရှိဘူးဆိုရင် သူတို့က ဘာလို့ ဒီလောက်အထိ အပင်ပန်းခံကြမှာလဲ...

အဲ့ဒီလိုသာဆိုရင် စွန့်ပစ်တော့မယ့် အဲ့ဒီ အာကာသယာဉ် အပျက်အစီးတွေထဲမှာ မသိနိုင်သေးတဲ့ ကြီးမားလှတဲ့ လျှို့ဝှက်ချက် ဒါမှမဟုတ် ရတနာသိုက် တစ်ခုခု ဖုံးကွယ်နေလို့များလား...

အဲ့ဒီလောက်အထိ တန်ဖိုးရှိနေလို့သာ အခွင့်အရေးတစ်ခုရဖို့ သူတို့ရဲ့ အသက်တွေကိုတောင် စွန့်ပြီး ဒီနာမည်ဆိုးနဲ့ကျော်ကြားတဲ့ အကျဉ်းထောင်ထဲကို ခိုးဝင်လာခဲ့ကြတာများလား...

မဟုတ်သေးဘူး... တကယ်လို့ သူတို့က အဲ့ဒီ စစ်သင်္ဘော အပျက်အစီးတွေကို တကယ် လိုချင်တာဆိုရင် ရနိုင်တဲ့ နည်းလမ်းတွေ အများကြီး ရှိတာပဲ... ဒီလောက်အထိ အပင်ပန်းခံစရာ မလိုပါဘူး...

ထောင်မှူးကြီး၏ စိတ်ထဲတွင် မှန်းဆချက်များစွာ ဖြတ်ပြေးသွားခဲ့သော်လည်း မှန်းဆချက်တိုင်းက ယုတ္တိရှိသလိုလိုနှင့် တစ်ခုခု လွဲချော်နေသကဲ့သို့ ခံစားရလေသည်။

အတိုချုပ်ပြောရလျှင် အရာအားလုံးက ထူးဆန်းနေပြီး ဟာကွက်များ ပြည့်နှက်နေကာ ကျိုးကြောင်းဆီလျော်မှုနှင့် ယုတ္တိမတန်မှုများ ရောထွေးနေခဲ့သည်။

"တောက်..." ထောင်မှူးကြီးက မနေနိုင်တော့ဘဲ ကျိန်ဆဲလိုက်၏။

ဒီလူစုက တကယ်ကို ပြဿနာရှာနေတာပဲ...

မဖြစ်ဘူး... ဒီလူတွေကို ရှင်းထုတ်ပစ်ဖို့ နည်းလမ်းတစ်ခုခု ရှာရမယ်... မဟုတ်ရင် အနှေးနဲ့အမြန် သူတို့က ငါ့အတွက် ပြဿနာ ဖြစ်လာလိမ့်မယ်...

"၉၉ ကြိမ်မြောက် စွန့်ပစ်ဂြိုဟ်ကို သွားရမယ့် ဒီတာဝန်နဲ့ ပတ်သက်တဲ့ အသေးစိတ် အချက်အလက်တွေကို ငါ့ကို ပေးပါ... အထူးသဖြင့် အာကာသယာဉ် အပျက်အစီးတွေရဲ့ ဇာစ်မြစ်နဲ့ စာရင်းကို ပိုပြီး အသေးစိတ်လေ ပိုကောင်းလေပဲ..."

"ပြီးတော့ မင်းကိုယ်တိုင် ဦးဆောင်တဲ့ အထက်တန်းစား အစောင့်တပ်ဖွဲ့တစ်ဖွဲ့ကို ဒီတာဝန်အတွက် လုံခြုံရေးအဖွဲ့ထဲ ထည့်လိုက်... အမှတ်(၁၅) အကျဉ်းထောင်က အဖွဲ့ကို သေချာစောင့်ကြည့်... အထူးသဖြင့် ကျန်းယဲ့ကိုပေါ့... သူတို့ရဲ့ လှုပ်ရှားမှုတိုင်းကို ငါ သိဖို့လိုတယ်..."

"ဟုတ်ကဲ့ပါ ထောင်မှူးကြီးခင်ဗျာ..."

နောက်တစ်နေ့ နံနက်တွင် တာဝန်တွင် ပါဝင်ရန် ရွေးချယ်ခံထားရသော အကျဉ်းသားများက အစောင့်များ၏ လုံခြုံရေးပေးမှုဖြင့် ရင်ပြင်တွင် ရပ်နားထားသော အထူးသယ်ယူပို့ဆောင်ရေး အာကာသယာဉ်ပေါ်သို့ တက်ရောက်လိုက်ကြသည်။

သတ္တုတွင်းများသို့ သွားလာရာတွင် အသုံးပြုလေ့ရှိသည့် အခြေခံအာကာသယာဉ်များနှင့် မတူဘဲ ပြင်ပတာဝန်များအတွက် အသုံးပြုသည့် ဤအာကာသယာဉ်က သိသိသာသာ ပို၍ ကြီးမားကာ ပိုမိုချောမွေ့သော ပုံစံရှိပြီး အတွင်းပိုင်း အသုံးအဆောင်များကလည်း ပို၍ ပြည့်စုံချေသည်။ ရိုးရှင်းသော ထိုင်ခုံများနှင့် ကြည့်ရှုရန် ပြတင်းပေါက်များပင် ပါဝင်ပြီး ဇိမ်ကျမှု အငွေ့အသက်များကို ပေးစွမ်းနေ၏။

မီကာတိုအပါအဝင် အကျဉ်းသားများက ဤအရာများနှင့် ရင်းနှီးနေပုံရပြီး လူတိုင်းက နေရာကိုယ်စီ ရှာထိုင်ကာ မျက်လုံးမှိတ်၍ အနားယူခြင်း သို့မဟုတ် တီးတိုး စကားပြောခြင်းများကို ပြုလုပ်နေခဲ့ကြသည်။

ကျန်းယဲ့နှင့် သူ၏ လူငါးဆယ့်တစ်ယောက်မှာမူ အာကာသယာဉ်သစ်ကြီးနှင့် ပတ်သက်၍ စူးစမ်းချင်စိတ်များ ပြည့်နှက်နေကြ၏။

အာကာသယာဉ်၏ အင်ဂျင်များက ဟိန်းဟောက်ကာ ဖြည်းညင်းစွာ မြင့်တက်လာပြီး ကျောက်နက်ကြယ်တာရာအကျဉ်းထောင်ခံတပ် တည်ရှိရာ ဂြိုဟ်၏ လေထုအလွှာကို ဖြတ်သန်းသွားချိန်တွင် ပြတင်းပေါက်အပြင်ဘက်ရှိ မြင်ကွင်းက ရုတ်တရက် ပြောင်းလဲသွားချေသည်။

အလွန်ထူထဲသော ကတ္တီပါအမည်းရောင်ကြီးကဲ့သို့ နက်ရှိုင်းကျယ်ဝန်းပြီး အဆုံးအစမရှိသော စကြာဝဠာနောက်ခံကြီးက လူတိုင်း၏ မျက်စိရှေ့တွင် ပေါ်လာခဲ့သည်။

အဝေးတစ်နေရာတွင် တောက်ပသော ဂြိုဟ်ကွင်းများပါဝင်သည့် ကြီးမားလှသော ဓာတ်ငွေ့ဂြိုဟ်ကြီးတစ်ခုက ဖြည်းညင်းစွာ လည်ပတ်နေပြီး စကြာဝဠာထဲမှ ခမ်းနားလှသော ရတနာတစ်ပါးနှင့် တူနေလေသည်။

ထိုထက်ပို၍ ဝေးကွာသောနေရာရှိ နက်ဗျူလာက မှောက်ကျနေသည့် ဆေးလင်ပန်းကြီးတစ်ခုကဲ့သို့ ဆွဲဆောင်မှုရှိကာ ခမ်းနားလှသော အရောင်အသွေးများကို ဖန်တီးပေးနေ၏။ မရေမတွက်နိုင်သော ကြယ်များက တချို့တောက်ပကာ တချို့က မှေးမှိန်နေပြီး အမည်းရောင်နောက်ခံပေါ်တွင် စိန်ပွင့်များကဲ့သို့ တည်ရှိနေကာ အလွန်နီးကပ်ပြီး လက်တစ်ကမ်းတွင် ရှိနေသကဲ့သို့ ထင်ရသော်လည်း စိတ်ကူးမယဉ်နိုင်လောက်အောင် အလင်းနှစ်များစွာ ဝေးကွာနေပေသည်။

ရံဖန်ရံခါတွင် သေးငယ်သော ဥက္ကာခဲပတ်လမ်းများက မြစ်တစ်စင်းကဲ့သို့ အာကာသယာဉ်ဘေးမှ ဖြတ်သန်းသွားကာ အသက်ရှုမှားလောက်အောင် ကျယ်ဝန်းလှသည့် ခံစားချက်ကို ပေးစွမ်းနေ၏။

"ဝိုး..."

"ဘုရားရေ... ဒါက စကြာဝဠာကြီးလား..."

"အရမ်းလှတာပဲ... အရမ်းခမ်းနားတာပဲ..."

စိတ်ဝင်စားမှုမရှိသော အခြားအကျဉ်းသားများနှင့် မတူဘဲ ကျန်းယဲ့နှင့် သူ၏အဖွဲ့သားများအားလုံးမှာ ခမ်းနားပြီး နက်ရှိုင်းလှသည့် စကြာဝဠာကြီးကြောင့် အံ့ဩမှင်တက်သွားကြပြီး ပြတင်းပေါက်မှတစ်ဆင့် ထိုအံ့မခန်း မြင်ကွင်းကြီးကို စိတ်အားထက်သန်စွာ ငေးကြည့်နေကြလေသည်။

တိတ်ဆိတ်နေသည့် စကြာဝဠာကြီးထဲတွင် နေ့ဝက်ခန့် ခရီးနှင်လာပြီးနောက် မီးခိုးရောင် မှုန်ဝါးဝါး ဂြိုဟ်တစ်ခုက ရှေ့တွင် ပေါ်လာခဲ့၏။ ၎င်းကား ၉၉ ကြိမ်မြောက် စွန့်ပစ်ဂြိုဟ်ပင်။

အခန်း ၃၇၇ပြီး၏။