အခန်း ၂
Vol. 1 Ch. 2
အခန်း-(၂)
လန့်ဖျပ်သွားပြီးနောက်တွင် ဝမ်ပင်းက မအော်ဘဲ မနေနိုင်ခဲ့ဘူး။
မိန်းကလေးကတော့ သူမရဲ့လေ့လာတွေ့ရှိချက်များမှတဆင့် ဝမ်ပင်းကို လူသစ်တစ်ဦးဖြစ်ကြောင်း အကဲဖြတ်ထားပြီးဖြစ်သည်။ သူမကို ရှာဖွေတွေ့ရှိသွားပြီးကတည်းက သူမက ပုန်းမနေတော့ဘဲ ပြတင်းပေါက်မှခုန်တက်လာကာ တောက်ပြောင်နေသည့် ဓားမြှောင်တစ်လက်ဖြင့် သူ့အနီးသို့ ချဉ်းကပ်သွားခဲ့သည်။
"မင်း အနားကိုမလာနဲ့"
ဝမ်ပင်းက အနောက်သို့ဆုတ်ခွာနေရင်းနဲ့ပဲ သူရဲ့စစ်သုံးတူရွင်းကို ဝှေ့ယမ်းလိုက်သည်။
ကောင်မလေးကတော့ အေးစက်နေသောအမူအရာဖြင့် ဝမ်ပင်း အနီးသို့ ဖြည်းညှင်းစွာချဉ်းကပ်လာပြီး နောက်ဆုံးတွင်တော့ သူ့ကို ချုပ်ထားလိုက်သည်။
ယခုချိန်မှာတော့ သူတို့နှစ်ယောက်က အရမ်းကိုနီးကပ်နေပြီမို့ ဝမ်ပင်းက သူမကို ရှင်းရှင်းလင်းလင်း မြင်နေရပါသည်။ မျက်နှာပေါ်တွင် အညစ်အကြေးများရှိနေသော်လည်း သန့်စင်လိုက်ပြီးပါက လှပနေမည်မှာ သေချာပါသည်။
သူမရဲ့ ၀တ်စားဆင်ယင်မှုက ကိုယ်ခံပညာဇာတ်ကားများထဲမှ ဓားပြတစ်ဦးနှင့်ဆင်တူပြီး ညစ်ပတ်စုတ်ပြတ်နေသော အဝတ်အစားများနှင့် အဝတ်စများကို သူမရဲ့လက်တွင် ရစ်ပတ်ထားသည်။
"မင်း အသက်ရှင်ချင်သေးရင် ကျောပိုးအိတ်ကိုထားခဲ့"
ဝမ်ပင်းက မလွတ်မြောက်နိုင်တော့ဘူးဆိုတာကို မြင်လိုက်ရတော့မှ ကောင်မလေးက စကားစပြောလာသည်။
သူမတောင်းဆိုတာကိုကြားတော့ ဝမ်ပင်းက နောင်တရသလို ခံစားလိုက်ရသည်။ အပြင်မထွက်ခင်မှာ ကျောပိုးအိတ်ကို သူဘာလို့မဝှက်ထားခဲ့ရတာလဲ။ သူ့အားလုယက်လာရန်အတွက်တစ်စုံတစ်ယောက်ကို ဖိတ်ခေါ်နေမိသည်။
ဒါပေမယ့် နောင်တရဖို့အတွက်က အရမ်းနောက်ကျသွားပါပြီ။ အခုတော့ သူဘာလုပ်ရမလဲပဲ စဉ်းစားနေရသည်။
သူမရဲ့အမူအရာကို အကဲဖြတ်ကြည့်ရလျှင်တော့ သူမက ကြောက်မက်ဖွယ်ကောင်းပုံရပြီး တိုက်ပွဲတွင်အနိုင်ရရန်က အခွင့်အလမ်းနည်းပါးသည်။ ဒါပေမယ့် သူ့ရဲ့ကျောပိုးအိတ်ကိုပေးလိုက်ရင်ရော နောက်ခုနစ်ရက်အတွင်းမှာ သူ ဘယ်လိုလုပ်ပြီး ရှင်သန်နိုင်မှာလဲ။
ဝမ်ပင်းသည် အံကြိတ်ကာ တိုက်ခိုက်ရန်သာ ဆုံးဖြတ်လိုက်သည်။မအောင်မြင်နိုင်ရင်တောင်မှ ဖြတ်ကျော်ဖို့တော့ ကြိုးစားရမည်။
သူက စစ်သုံးတူရွင်းဖြင့် သူမအား တိုက်ခိုက်လိုက်သော်လည်း မိန်းကလေးရဲ့လှုပ်ရှားမှုများက မယုံနိုင်လောက်အောင်ကို သွက်လက်သည်။ အနည်းငယ်ရှောင်တိမ်းကာ သူမက သူရဲ့တိုက်ခိုက်မှုကို ရှောင်ရှားလိုက်ပြီးနောက်မှာတော့ အော်ဟစ်လို့ သူ့ရဲ့ဝမ်းဗိုက်ကိုကန်ထုတ်ပြီး မြေပေါ်သို့ကျသွားစေသည်။
မိန်းကလေးသည် ဝမ်ပင်းရဲ့အနီးသို့ လျင်မြန်စွာရောက်ရှိလာပြီး သူ့ရဲ့လည်ချောင်းကို ဓားမြှောင်တစ်ချောင်းနှင့် ထောက်လိုက်သည်။ နည်းနည်းလေးတောင် လှုပ်ရှားလိုက်ဝံ့ရင် လည်ချောင်းကို လှီးဖြတ်လိုက်မယ်ဆိုတာက သံသယဖြစ်စရာတောင် မလိုပါဘူး။
"မင်းရဲ့လက်နက်ကို ပစ်ချလိုက်"လို့ မိန်းကလေးက ပြောလာသည်။
သူ့ရဲ့လည်ချောင်းကို ဓားမြှောင်နှင့် ထောက်ခံထားရတဲ့ ဝမ်ပင်းသည် သူ့ရဲ့ စစ်သုံးတူရွင်းကို မြေပြင်ပေါ် နာခံစွာချလိုက်ဖို့ကလွဲလို့ အခြား ရွေးချယ်စရာ မရှိတော့ပါဘူး။
သူ့ရဲ့လက်နက်ကို ပစ်ချလိုက်တာမြင်တော့ "မင်းရဲ့ ကျောပိုးအိတ်ကိုထားခဲ့လိုက်ပါ ပြီးရင်သွားလို့ရပြီ"လို့ မိန်းကလေးက ထပ်ပြောလာသည်။
ဝမ်ပင်းက ဘာမှပြန်မပြောဘဲ သူ့ရဲ့လွယ်ထားတဲ့ကျောပိုးအိတ်ကို ချွတ်လိုက်သည်။ လက်တစ်ဖက်ကို လွှတ်လိုက်ပြီး နောက်တစ်ဖက်ကို လွှတ်လိုက်စဉ်တွင်ပဲ လည်ချောင်းဆီမှ ဓားမြှောင်ကို ဘယ်ဘက်လက်ဖြင့်တွန်းထုတ်ပြီး ညာဘက်ခါးမှ လျှပ်စစ်တုတ်ကို ဆွဲထုတ်ကာကောင်မလေးကို တို့လိုက်တယ်။
ပြီးတာနဲ့ ဝမ်ပင်းက အရှေ့ကို လျင်မြန်စွာ လှမ်းသွားပြီး မြေပြင်မှဓားမြှောင်ကို ကောက်ယူကာ ကောင်မလေးရဲ့ လည်ချောင်းတွင် တင်လိုက်သည်။
တခဏတာ တုံ့ဆိုင်းသွားပြီးနောက်မှာတော့ သူမကို အန္တရာယ်ပြုဖို့ကို သူမလုပ်နိုင်ခဲ့ပါဘူး။ အဲဒါကြောင့်ပဲ သက်ပြင်းတစ်ချက်ချပြီး ဓားမြှောင်ကို ဖယ်ထုတ်လိုက်ကာ စစ်သုံးတူရွှင်းကို ပြန်ယူလိုက်သည်။
ကောင်မလေးကတော့ မြေပြင်ပေါ်မှာလဲနေသေးပြီး အနည်းငယ် တုန်တုန်ယင်ယင် ဖြစ်နေသေးတာကိုလည်း မြင်လိုက်ရသဖြင့် ဝမ်ပင်းသည် သူ့ကျောပိုးအိတ်ထဲမှ ပေါင်မုန့်တစ်တုံး ၊ ဝက်ပေါင်ခြောက်တစ်ထုပ် ၊ ကိုလာတစ်ပုလင်းကို ယူကာ သူမအရှေ့တွင်ထားပေးပြီး အခန်းထဲကထွက်သွားလိုက်သည်။
ဝမ်ပင်းသည် သူမရဲ့အသက်ကို ချမ်းသာပေးရုံသာမကဘဲ စွဲမက်ဖွယ် အစားအစာတွေကိုပါ ချန်ထားပေးခဲ့တဲ့အတွက် မိန်းကလေးက အံ့သြသွားသည်။
လှပစွာထုပ်ပိုးထားသော ဤပစ္စည်းများကို ရှာမတွေ့နိုင်တော့တာက နှစ်အတော်ကြာပါပြီ။ ကမ္ဘာပျက်ကပ်ရဲ့ ဥပဒေ တွေကလည်း ရန်သူများအတွက် ကရုဏာမရှိဟု ပြဋ္ဌာန်းထားသည်။ အကယ်၍များ သူမသာ ဝမ်ပင်းရဲ့အနေအထားတွင်ရှိနေပါက သူမသည် ဖြတ်ချက်တစ်ချက်တည်းနှင့်သူ့ကို အဆုံးသတ်လိုက်မည်ဖြစ်သည်။
ထိုအချိန်တွင်တော့ မိန်းကလေးရဲ့စိတ်က စိတ်အားထက်သန်လာပြီး ဝမ်ပင်းကိုလည်း စိတ်ဝင်စားလာကာ သူ့ရဲ့ပုံရိပ်က သူမစိတ်ထဲတွင် နက်နက်ရှိုင်းရှိုင်း စွဲထင်နေလေပြီ။
မကြာသေးမီက ကြုံတွေ့ခဲ့ရတဲ့ အတွေ့အကြုံကြောင့် ဝမ်ပင်းသည် ပထမဆုံးအနေနဲ့ အခြေချနေထိုင်ဖို့ရန်အတွက် နေရာရှာဖွေရန် ဆုံးဖြတ်ခဲ့ပြီး ဤကမ္ဘာကို မစူးစမ်းမီတွင်လည်း သူ့ရဲ့ကျောပိုးအိတ်ကို ဝှက်ထားရအုံးမည်။
သို့သော်လည်း သူ့ကံက အမှန်ပင် ဆိုးရွားသည်။ ထိုမိန်းကလေးဆီမှ လွတ်မြောက်ပြီး မကြာမီတွင်ပဲ သံတုတ်များကိုင်ဆောင်ထားသော အမျိုးသားသုံးဦးဆီက ဝိုင်းရံခံလိုက်ရပြန်သည်။
"ကလေး ၊ မင်းအတွက် ဘာက ကောင်းလဲဆိုတာကို သိရင် မင်းရဲ့ကျောပိုးအိတ်ကို လွှဲပေးလိုက်"လို့ အဖွဲ့ထဲက အမျိုးသားတစ်ယောက်ကပြောလာသည်။
"ဟုတ်တယ်၊ ကျောပိုးအိတ်ကိုပေးရုံပဲ မင်းကို ငါတို့ကသတ်မှာ မဟုတ်ဘူး"လို့ နောက်အမျိုးသားတစ်ယောက်ကလည်း ဝင်ပြောလာသည်။
သူ့ရဲ့ကံဆိုးမှုကို တိတ်တဆိတ်ကျိန်ဆဲရင်းနဲ့ပဲ ဝမ်ပင်းက စစ်သုံးတူရွင်းကို တင်းကျပ်စွာဆုပ်ကိုင်ထားကာ ထိုအမျိူးသား သုံးယောက်ကို ဖြတ်ကျော်ရန် နည်းလမ်းရှာနေသည်။
အတွေ့အကြုံရှိပုံရသော ထိုအမျိူးသားသုံးယောက်က ထွက်စရာလမ်းအပေါက်များမကျန်အောင်ကို ဝိုင်းရံထားကြသည်။ လွတ်မြောက်ဖို့အတွက် တိုက်ခိုက်ရလိမ့်မယ်။
အခြားရွေးချယ်စရာမရှိတော့သော ဝမ်ပင်းသည် ဘယ်လက်ဖြင့် သူ့ခါးမှ ဓားမြှောင်တစ်ချောင်းကို ဆွဲထုတ်ပြီး စစ်သုံးတူရွင်းကိုတော့ ညာဘက်လက်ဖြင့် ကိုင်ထားသည်။
ဓားမြှောင်ကိုတွေ့တော့ ထိုအမျိူးသားသုံးယောက်ကသတိထားလာကြသည်။ ဝမ်ပင်းထံမှာ စစ်သုံးတူရွင်းတစ်ခုတည်းသာရှိပါက ခေါင်းကိုရိုက်မှာကို ရှောင်နိုင်ရုံမျှဖြင့် အဆင်ပြေသည်။
ဒါပေမယ့် သူ့လက်ထဲက ဓားမြှောင်တစ်ချောင်းရဲ့ ခုတ်ထစ်ချက်နှင့်ဆို သူတို့အသက်က အဆုံးသတ်ခံလိုက်ရနိုင်သည်။