အခန်း ၁၀၃

🍅 Chapter 103

ဇနီးဖြစ်သူ၏ ခိုင်မာသောစကားကို ကြားလိုက်ရသောအခါ စုန့်ကျစ်ချုံးမှာ အနည်းငယ် ပိုယုံကြည်သွားတော့သည်။

အိမ်သို့ပြန်ရောက်သည့်ပထမဆုံးညတွင် သူက ဇနီးဖြစ်သူကိုဖက်ကာ ကုတင်ပေါ်တွင် လှဲလျောင်းနေသော်လည်း အိပ်မပျော်နိုင်အောင် ဖြစ်နေခဲ့သည်။

မိခင်ဖြစ်သူ၏အပြောင်းအလဲများက ကြီးမားလွန်းနေပြီး မိသားစု၏အခြေအနေကလည်း အလွန်ကောင်းမွန်နေသဖြင့် အရာအားလုံးက သူ၏အိပ်မက်တစ်ခုနှယ် ခံစားနေရသည်။

အခြားတစ်ဖက်တွင်မူ။

အိမ်သို့ပြန်ရောက်ပြီးနောက် ဟောင်ချန်က ထိုကိစ္စကိုတွေးတောလေလေ တစ်စုံတစ်ရာမှားယွင်းနေကြောင်းကို ပိုမိုခံစားရလေလေ ဖြစ်နေသည်။

ထိုနေ့က ဖြစ်ပျက်ခဲ့သမျှကို ပြန်လည်သုံးသပ်ကြည့်လိုက်သောအခါ ပြဿနာ၏အဓိကသော့ချက်မှာ စုန့်ကျစ်ချုံးထံတွင်ရှိနေကြောင်း သူမ သဘောပေါက်သွား၏။

ဟုတ်ပေသည်။ အကယ်၍ စုန့်ကျစ်ချုံးသာ ပြန်မရောက်လာခဲ့ပါက သူတို့က မည်သို့လုပ်၍ ဤမျှပြင်းထန်သောရိုက်နှက်မှုကို ခံရမည်နည်း။

ထို့အပြင် ငွေငါးချောင်း ပေးလျော်ခဲ့ရသည့်အထိ ဤမျှကြီးမားသောဆုံးရှုံးမှုကိုလည်း ခံစားရမည်မဟုတ်ပေ။

ဟောင်ချန် မျက်လုံးများကို ကျဉ်းမြောင်းလိုက်သည်။

ထိုခွေးကောင်လေးကို မြစ်ကြောင်းတူးဖော်ရေးအတွက် စေလွှတ်ခဲ့သည်မှာ ထင်ရှားနေပါလျက်နှင့် သူက မည်သို့လုပ်ပြီး ပြန်ရောက်နေနိုင်မည်နည်း။

‘သူ ထွက်ပြေးလာတာ ဖြစ်ရမယ်၊ သေချာပေါက် သူ ထွက်ပြေးလာတာပဲ ဖြစ်ရမယ်'

‘ဟွန့်၊ နောက်ဆုံးတော့ နင့်ရဲ့ဟာကွက်ကို ငါဖမ်းမိပြီပေါ့’

အရုဏ်ဦး၏ ပထမဆုံးအလင်းရောင် ထွက်ပေါ်လာချိန်တွင် ဟောင်ချန် အမှောင်ထုကြားထဲမှ ရွာပြင်သို့ ထွက်ခွာသွားလေသည်။

နံနက်စောစောတွင် စုန့်ကျစ်ချုံးက အိပ်ရာမှထကာ ပေါက်တူးကို ပခုံးပေါ်ထမ်းလျက် လယ်ကွင်းများဆီသို့ ဦးတည်သွားရန် ပြင်ဆင်နေသည်။

သို့သော် သူ အိမ်ပြင်သို့ ခြေမချရသေးမီမှာပင် သူ့ကိုအော်ခေါ်လိုက်သံ ထွက်ပေါ်လာသည်။

“ဟေ့၊ ဒုတိယသား”

“လယ်ထဲမသွားခင် မနက်စာ အရင်စားသွားဦးလေ”

စုန့်ကျစ်ချုံးမှာ အံ့အားသင့်သွားလေ၏။

‘မနက်စာလား၊ အိမ်မှာ ဘယ်အချိန်ကတည်းက ဒီလိုမျိုးအလေ့အထ ရှိနေခဲ့တာလဲ'

မိသားစုဝင်များက သူတို့၏အလုပ်များကို ချထားခဲ့ကာ လက်ဆေးပြီး အိမ်ဧည့်ခန်းမကြီးထဲသို့ ဝင်သွားကြသည်ကို သူ စောင့်ကြည့်နေပြီးနောက် သူကိုယ်တိုင်လည်း ထိုအတိုင်းလိုက်လုပ်လိုက်သည်။

စားပွဲပေါ်တွင်တော့ ပျစ်နှစ်နေသော အသားပြုတ်များ အပြည့်ထည့်ထားသည့် ပန်းကန်လုံးကြီးများကို တည်ခင်းထားလေသည်။

ထိုမျှမက ကလေးများ၏ပန်းကန်ဘေးတွင် ကြက်ဥတစ်လုံးစီကိုလည်း ချထားပေးသေး၏။

သူတို့က ထိုအရာများကို ကျင့်သားရနေပြီဖြစ်သည့်အလား ကြက်ဥများကို ကောက်ယူကာ စားပွဲအစွန်းတွင် ပျော်ရွှင်စွာ စားသောက်နေကြသည်။

စုန့်ထုန်ဟွာက ကြက်ဥတစ်လုံးကို ကမ်းပေးလိုက်၏။

“အဖေ၊ အဖေ့အတွက်လည်း ကြက်ဥတစ်လုံးပါတယ်”

စုန့်ကျစ်ချုံးမှာ တစ်ခဏမျှ မှင်တက်သွားပြီးနောက် လက်လှမ်းကာ ကြက်ဥအနည်းငယ်ကိုဖဲ့ယူ၍ ပါးစပ်ထဲသို့ ထည့်လိုက်သည်။

အရသာကို သူ သိနေသည်။

ဤအရာက အိပ်မက်မဟုတ်သည်မှာ သေချာပေ၏။

မွှေးကြိုင်လှသောအသားဆန်ပြုတ်ကို သောက်နေရင်းဖြင့်ပင် စုန့်ကျစ်ချုံးမှာ လက်တွေ့မဆန်သောခံစားချက်ကြီး လွှမ်းမိုးနေဆဲဖြစ်သည်။

အသက်သုံးဆယ်နီးပါး နေထိုင်လာခဲ့သည့် သူ၏ဘဝတစ်လျှောက်လုံးတွင် မနက်စာစားဖူးသည်မှာ ဤသည်က ပထမဆုံးအကြိမ်ပင်။

စုန့်ကျစ်ချုံးက ဝူယွီလန်ကို အကဲခတ်ကြည့်လိုက်သည်။

သူမှတ်မိနေသေးသည်မှာ မိခင်ဖြစ်သူ၏မျက်နှာတွင် အရေးအကြောင်းများ ပြည့်နှက်နေပြီး သူမ၏မျက်လုံးများကလည်း တွဲကျနေတတ်သည်။

သို့သော် ယခု သူ့ရှေ့တွင် ရှိနေသောသူမှာ သူ၏မိခင်ထက် ငါးနှစ်၊ ခြောက်နှစ်ခန့် ပိုငယ်နေသယောင် ရှိနေသည်။

ဤသူက သူ၏မိခင် အစစ်အမှန်ပင် ဟုတ်ပါလေစ။

ဒုတိယသားဖြစ်သူက သူမအား အကဲခတ်နေကြောင်းကို ဝူယွီလန်က သဘာဝကျစွာပင် သိနေသော်လည်း သူမက မသိချင်ယောင်ဆောင်ကာ တည်တည်ငြိမ်ငြိမ်ပင် နေလိုက်သည်။

“ဒီနေ့ ငါတို့ တောင်ပေါ်တက်ပြီး ဆေးဘက်ဝင်အပင်တွေ သွားမရှာတော့ဘူး၊ မင်း အားတဲ့အချိန် လယ်ထဲကအလုပ်တွေကို အပြီးသတ်လိုက်၊ ငါတော့ စုတ်တံနဲ့ မင်ရည်သွားဝယ်ဖို့ မြို့ပေါ်သွားလိုက်ဦးမယ်”

စုန့်ကျစ်ချုံး မျက်ခုံးပင့်လိုက်သည်။ ထင်သည့်အတိုင်းပင်၊ အမေက လေးယောက်မြောက်သားကို အချစ်ဆုံးဖြစ်နေဆဲပင်။

သူ့အတွက် စုတ်တံနှင့် မင်ရည်ဝယ်ရန် မြို့ပေါ်သွားဖို့ကိုသာ တွေးနေတော့သည်။

အငယ်ဆုံးသားက သူဌေးလုအိမ်တွင် ရေရှည်အလုပ်သမားအဖြစ် တကယ်ပဲစေလွှတ်ခံလိုက်ရခြင်းလော။ သို့မဟုတ် မြို့ပေါ်ရှိ ကိုယ်ပိုင်ကျောင်းတွင် နေထိုင်နေခြင်းလော။

မိခင်ဖြစ်သူက မည်သို့လုပ်၍ ဤမျှအထိ အလွယ်တကူပြောင်းလဲသွားနိုင်မည်နည်း။

လေးယောက်မြောက်သားက မည်မျှပင် ယုံကြည်ကိုးစား၍ မရဘဲ ကောက်ကျစ်စဉ်းလဲနေပါစေ မိခင်ဖြစ်သူကတော့ သူ့ကို အဖိုးတန်ရတနာတစ်ပါးနှယ် အမြတ်တနိုး ယုယကာ ကာကွယ်ပေးနေဆဲပင်။

စုန့်ကျစ်ချုံးက ခေါင်းကို ခပ်ကြမ်းကြမ်းခါရမ်းလိုက်ပြီးနောက် စားပွဲပေါ်ရှိ ပန်းကန်များနှင့် တူများကို သိမ်းဆည်းကာ ဆေးကြောရန် ယူဆောင်သွားလေ၏။

ဝူယွီလန်က သူ မည်သို့တွေးနေသည်ကို ဂရုမစိုက်အားပေ။

အိမ်အလုပ်များကို အနည်းငယ် ရှင်းလင်းသိမ်းဆည်းပြီးနောက် မြို့ပေါ်သို့ နွားလှည်းစီးသွားရန်အတွက် ရွာထိပ်ဆီသို့ ဦးတည်ထွက်ခွာလာခဲ့သည်။

ယခုတစ်ခေါက် မြို့ပေါ်သို့သွားရခြင်းမှာ ကလေးများအတွက် စက္ကူနှင့် စုတ်တံများ ဝယ်ယူရန်ဖြစ်ပြီး ထိုမှတစ်ဆင့် ရွာလူကြီးစုန့်ကျန်းရှုအတွက် လက်ဆောင်ပေးရန် လက်ဖက်ရည်ပန်းကန်လုံးအစုံကိုပါ ဝယ်ယူရန်ရည်ရွယ်ထားသည်။

ထိုအဘိုးအိုက ကိစ္စရပ်များကို ကိုင်တွယ်ဖြေရှင်းရာတွင် တရားမျှတမှုရှိပြီး အားကိုးရသူတစ်ဦးဖြစ်သည်။

သူ့ကို အိမ်ဆောက်လုပ်ရေးကိစ္စများ လွှဲအပ်ထားခြင်းမှာ အမှန်ကန်ဆုံးသော ရွေးချယ်မှုပင် ဖြစ်ပေသည်။

ထိုအကြောင်းများကို စိတ်ထဲမှ တွေးတောရင်းဖြင့် ဝူယွီလန်တစ်ယောက် စာအုပ်ဆိုင်တစ်ဆိုင်ရှေ့သို့ ရောက်ရှိလာခဲ့၏။

စာအုပ်ဆိုင်ဝန်ထမ်းလေးက လှိုက်လှဲပျူငှာစွာဖြင့် ဆီးကြိုနှုတ်ဆက်လာသည်။

“အစ်မကြီး၊ ဘာများ အလိုရှိပါသလဲ၊ ကျွန်တော်တို့ စာအုပ်ဆိုင်မှာ စုတ်တံ၊ မင်၊ စက္ကူနဲ့ မင်သွေးကျောက်တွေအပြင် အခုခေတ်မှာ ရေပန်းအစားဆုံးဖြစ်နေတဲ့ ကဗျာစုဆောင်းမှုတွေ၊ ပုံပြင်စာအုပ်တွေလည်း ရှိပါတယ်ခင်ဗျာ”

ဝူယွီလန် သူမ၏ ရည်ရွယ်ချက်ကို ပြောပြလိုက်သည်။

“ငါ့ကလေးတွေ ကျောင်းတက်ဖို့ ပြင်ဆင်နေကြလို့ သူတို့အတွက် စုတ်တံ၊ မင်၊ စက္ကူနဲ့ မင်သွေးကျောက်တွေ ဝယ်ချင်လို့ပါ”

ထိုစကားကို ကြားသောအခါ ဝန်ထမ်းလေးမှာ ပိုတက်ကြွသွားကာ ဝူယွီလန်ကို စာအုပ်ဆိုင်၏ ထောင့်တစ်နေရာဆီသို့ လမ်းညွှန်ခေါ်ဆောင်သွားလေသည်။

“အစ်မကြီး၊ ဒီဘက်ကို ကြွပါခင်ဗျာ၊ ဒီနေရာကတော့ စုတ်တံ၊ မင်၊ စက္ကူနဲ့ မင်သွေးကျောက်တွေကို ထားတဲ့နေရာပါ၊ ကျွန်တော် တစ်ခုချင်းစီ မိတ်ဆက်ပေးပါ့မယ်၊”

ဝန်ထမ်းလေးက ပစ္စည်းများကို ညွှန်ပြရင်း ဆက်လက်ရှင်းပြသည်။

“ဒီဟာတွေကတော့ စုတ်တံတွေပါ၊ အသက်သာဆုံးကတော့ ကြက်မွေးစုတ်တံတွေဖြစ်ပြီး ပြားငါးဆယ်ပဲ ကျသင့်မှာပါ၊

ဆိတ်မွေးစုတ်တံတွေကတော့ ပြားတစ်ရာ့ငါးဆယ်ဖြစ်ပြီး ဝံပုလွေမွေးနဲ့ ရောနှောထားတဲ့ စုတ်တံတွေကတော့ ပိုဈေးကြီးပါတယ်၊ ငွေတစ်ချောင်းကနေ ငါးချောင်းအထိ ရှိပါတယ်ခင်ဗျာ”

ဝန်ထမ်းလေးမှာ စကားပြောဆိုပြီးနောက် ဝူယွီလန်၏ ရွေးချယ်မှုကို စောင့်ဆိုင်းနေလိုက်သည်။

“ငါ့ကို ကြက်မွေးစုတ်တံ ဆယ့်လေးချောင်းနဲ့ ဆိတ်မွေးစုတ်တံ ခုနစ်ချောင်းပေးပါ”

ထိုသို့ပြောဆိုရင်း သူမက လက်ရာအသေသပ်ဆုံးနှင့် အကောင်းမွန်ဆုံး စုတ်တံများကို သေသေချာချာရွေးချယ်လိုက်သည်။

ဝန်ထမ်းလေးက ပြုံးပြလိုက်ပြီး ဝူယွီလန် စုတ်တံများရွေးချယ်ပြီးစီးသွားသောအခါ သူမအား မင်ရောင်းချသည့်နေရာဆီသို့ ထပ်မံခေါ်ဆောင်သွားပြန်သည်။

“ဒီမှာ ကြည့်ရှုပေးပါခင်ဗျာ၊ ဒါတွေကတော့ မင်တုံးတွေပါ၊ အများဆုံးသုံးကြတာကတော့ ထင်းရှူးမှိုင်းမင်တွေဖြစ်ပြီး တစ်တုံးကို ပြားနှစ်ရာကျသင့်မှာပါ၊

အဆင့်မြင့်မင်တုံးတွေကတော့ တစ်တုံးကို ငွေတစ်ချောင်းကနေ ငါးချောင်းအထိ ရှိပါတယ်”