အခန်း ၄၃၁

အခန်း ၄၃၁ နတ်မိမယ်လေး၏ ရမ္မက်မီးတောက်နှင့် ကျွန်တော်တို့ဘက်မှ အသာစီးရနေမှု

ပေလင်ဒေသရှိ တောင်တန်းတစ်နေရာထက်တွင်။

မြေပြင်ပေါ်၌ ပိုးသားဝတ်ရုံအချို့က ဖရိုဖရဲ ပြန့်ကျဲနေပြီး ပတ်ဝန်းကျင်တစ်ခုလုံးတွင် ရမ္မက်ဆန်ဆန် အငွေ့အသက်များ လွှမ်းခြုံနေလေသည်။ ကျောက်ရှန်းကျီသည် ခန္ဓာကိုယ်ထက်မှ အဝတ်အစားများကို ဖြည်းညင်းစွာ ပြန်လည်ဝတ်ဆင်လိုက်ရင်း မွှေးပျံ့သော သက်ပြင်းတစ်ချက်ကို မှုတ်ထုတ်လိုက်၏။

ကျန်းချဲ့သည် ဤနတ်မိမယ်လေးကို ပေလင်နယ်စပ်အထိ လိုက်ပို့ပေးရုံသာမက ကောင်းကင်ဘုံသို့ပါ ရောက်ရှိသွားအောင် ပို့ဆောင်ပေးခဲ့ခြင်း ဖြစ်ပေသည်။

"အချိန်အတန်ကြာ မတွေ့ရတဲ့အတွင်း မင်းက ပိုပြီး ကြမ်းတမ်းလာသလိုပဲ" ဟု ကျောက်ရှန်းကျီက တိတ်ဆိတ်မှုကို အရင်ဆုံး ဖြိုခွင်းလိုက်သည်။ ကျန်းချဲ့နှင့် သူမတို့ကြား ဤကဲ့သို့ နက်နက်ရှိုင်းရှိုင်း ဆက်ဆံခဲ့ရသည်မှာ တစ်ကြိမ်နှစ်ကြိမ်မက ရှိနေပြီဖြစ်သော်လည်း အကြိမ်တိုင်း၌ ကျန်းချဲ့၏ စွမ်းအားများက အမြဲတမ်း တိုးတက်လာသလို ခံစားနေရ၏။

အစောပိုင်းကာလများက သူမက အသာစီးရခဲ့သော်လည်း နောက်ပိုင်းတွင် ရင်ပေါင်တန်းနိုင်လာခဲ့သည်။ ယခုအချိန်၌မူ သူမတွင် ရေခဲနှင့် မီးတောက် စွမ်းအင်နှစ်ရပ် ပေါင်းစပ်နေသည့် ထူးခြားသော ခန္ဓာကိုယ် ရှိနေသည့်တိုင် ကျန်းချဲ့ကို မယှဉ်နိုင်တော့သလို ခံစားလာရသည်။ ဤအချက်ကြောင့် သူမ၏ ရင်တွင်း၌ အံ့သြချီးကျူးမှုများ ဖြစ်ပေါ်လာရ၏။ ကျန်းချဲ့၏ တိုးတက်မှုနှုန်းမှာ အလွန်တရာ မြန်ဆန်လွန်းနေပေသည်။

"ဒီလောက် မကြမ်းတမ်းရင် ရှန်းကျီရှေ့မှာ ကိုယ့်ကိုယ်ကိုယ် ယုံကြည်မှု ရှိမှာမဟုတ်ဘူးလေ" ဟု ကျန်းချဲ့က ဟက်ဟက်ပက်ပက် ရယ်မောလိုက်ပြီး မတ်တတ်ရပ်ကာ နတ်မိမယ်လေး၏ သွယ်လျသော ခါးလေးကို ဆွဲဖက်လိုက်သည်။

ဤသည်မှာ သူ၏ ရင်တွင်းမှ စစ်မှန်သော စကားများသာ ဖြစ်သည်။ အဘယ်ကြောင့်ဆိုသော် အစပိုင်း၌ ကျောက်ရှန်းကျီ၏ ကျင့်စဉ်အဆင့်က သူ့ထက် များစွာ သာလွန်နေပြီး ထူးခြားသော ခန္ဓာကိုယ်ပါ ပိုင်ဆိုင်ထားသောကြောင့် တိုက်ပွဲဝင်သည့်အချိန်တိုင်း အချိန်တိုအတွင်းမှာပင် သူက အရှုံးပေး လက်မြှောက်ခဲ့ရခြင်း ဖြစ်၏။

ထိုအရာက သူ တည်ဆောက်ထားခဲ့သော ယုံကြည်မှုများကို အတော်လေး ထိခိုက်စေခဲ့သည်။ သို့သော် ယခုအချိန်တွင် သူ၏ ကျင့်စဉ်စွမ်းအားများ အဆမတန် တိုးတက်လာသည့်အပြင် ခန္ဓာကိုယ်ကလည်း သာလွန်ထူးကဲသော အဆင့်သို့ ရောက်ရှိသွားပြီဖြစ်ရာ ယခုအခါတွင် ကျောက်ရှန်းကျီကို သူ အနည်းငယ် အနိုင်ယူနိုင်ပြီဟု ရဲရဲဝင့်ဝင့် ပြောနိုင်နေပြီ ဖြစ်လေသည်။

ကျောက်ရှန်းကျီက နှုတ်ခမ်းကိုသာ ကိုက်ထားလိုက်ပြီး ဘာမျှ ထပ်မပြောတော့ဘဲ ကျန်းချဲ့၏ ရင်ခွင်ထဲသို့ နူးညံ့စွာ မှီတွယ်လိုက်သည်။ သူမ၏ အကြည့်များက ခပ်လှမ်းလှမ်းသို့ ငေးမောနေပြီး မျက်ဝန်းများထဲတွင် ရှုပ်ထွေးဝေခွဲမရသော ခံစားချက်များ ကိန်းအောင်းနေ၏။

"ဘာတွေ တွေးနေတာလဲ" ဟု ကျောက်ရှန်းကျီ၌ စိတ်အနှောင့်အယှက် တစ်ခုခု ရှိနေသည်ကို ရိပ်မိသွားသော ကျန်းချဲ့က မေးလိုက်သည်။

"ဘာမှမဖြစ်ပါဘူး" ဟု ကျောက်ရှန်းကျီက ခေါင်းခါပြလိုက်သည်။

"နင်ပင်းနဲ့ ဝမ်ကျွန်းတို့ ကိစ္စကြောင့်များလား" ဟု ကျန်းချဲ့က ဆက်မေးလိုက်သောအခါ ကျောက်ရှန်းကျီက ခေါင်းမော့ကြည့်လာပြီး အနည်းငယ် တုန်လှုပ်သွားသည်။ သူမက ကျန်းချဲ့ကို တိုက်ရိုက် မဖြေဆိုခဲ့သော်လည်း တိတ်ဆိတ်နေခြင်းကပင် အကောင်းဆုံး အဖြေတစ်ခု ဖြစ်နေပေသည်။

သူမက ကျန်းချဲ့နှင့် ပတ်သက်၍ ရင်ထဲတွင် အစွဲအလမ်း နှစ်ခု ရှိနေသည်။ ပထမတစ်ခုမှာ ကျန်းချဲ့က အိမ်ထောင်သည် အမျိုးသားတစ်ဦး ဖြစ်နေခြင်းပင်။ သူမ၏ ယခုလုပ်ရပ်က နားထောင်ကောင်းအောင် ပြောရလျှင် ရင်းနှီးသော မိန်းမလှလေးတစ်ဦး ဖြစ်သော်လည်း အဆိုးဆုံးပြောရလျှင် သူတစ်ပါးလင်ကို မြူဆွယ်သည့် မိန်းမပျက်သာ ဖြစ်ပေမည်။

ဒုတိယအချက်မှာ သူမနှင့် ချီညီအစ်မနှစ်ယောက်၏ ကွယ်လွန်သွားပြီဖြစ်သော မိခင်တို့ကြားတွင် ရင်းနှီးမှု ရှိခဲ့ခြင်း ဖြစ်သည်။ ထိုညီအစ်မနှစ်ဦးက သူမကို အဒေါ်တစ်ဦးလိုပင် ခေါ်ဆိုရမည်ဖြစ်ရာ ဆွေမျိုးစပ်ကြည့်လျှင် သူမက ချီညီအစ်မနှစ်ဦး၏ လူကြီးသူမ နေရာတွင် ရှိနေ၏။ လူကြီးသူမ တစ်ယောက်က တူမများ၏ ခင်ပွန်းကို မြူဆွယ်သည်ဟူသော ကောလာဟလများ ထွက်ပေါ်သွားပါက သူမအနေဖြင့် တကယ်ကို ရင်ဆိုင်နိုင်စွမ်း ရှိမည် မဟုတ်ပေ။

"အရမ်းကြီး တွေးမနေပါနဲ့... စိတ်ချပါ ကိုယ် မင်းအတွက် ကျေနပ်စရာကောင်းတဲ့ အဖြေတစ်ခုကို သေချာပေါက် ပေးမှာပါ... လောလောဆယ် ကိုယ့်ရဲ့ ကျင့်စဉ်အဆင့်က မလုံလောက်သေးလို့ မင်းကို လူသိရှင်ကြား လက်ထပ်မယ်ဆိုရင် အတင်းအဖျင်း ပြောစရာတွေ ဖြစ်လာနိုင်တယ်... ဒါပေမဲ့ ကိုယ့်ကို အချိန်နည်းနည်းလောက် ပေးပါ... ကိုယ် သိုင်းသူတော်စင်အဆင့်ကို ရောက်တဲ့တစ်နေ့ ဘယ်သူကမှ ဒီကိစ္စနဲ့ပတ်သက်ပြီး စကားဟရဲမှာ မဟုတ်တော့ဘူး... ဒါပေမဲ့ ဝမ်ကျွန်းနဲ့ နင်ပင်းက အိမ်တော်ထဲကို အရင်ရောက်နှင့်နေတဲ့သူတွေဆိုတာတော့ အမှန်ပဲ... မင်း ကိုယ့်အိမ်ကို ရောက်လာတဲ့အခါ ဝမ်ကျွန်းက ပထမဇနီးကြီး ဖြစ်ပြီး နင်ပင်းက ဒုတိယဇနီး ဖြစ်လိမ့်မယ်... မင်းကတော့ တတိယဇနီးပေါ့... ဒါပေမဲ့ ကိုယ့်ရင်ထဲမှာတော့ မင်းတို့အားလုံးက ကိုယ့်အတွက် အတူတူပါပဲ... ဘယ်သူက ပိုမြင့်တယ် ပိုနိမ့်တယ်ဆိုတာ မျိုး မရှိပါဘူး" ဟု ကျန်းချဲ့က ရှင်းပြလိုက်သည်။

ကျောက်ရှန်းကျီက ရွှယ်ပိုင်ကျိန်းနှင့် မတူညီပေ။ ရွှယ်ပိုင်ကျိန်းမှာ အကြပ်ကိုင်ခံရပြီးနောက်မှ ပြောင်းလဲသွားခြင်း ဖြစ်သော်လည်း ကျောက်ရှန်းကျီမှာမူ ထိုသို့မဟုတ်ပေ။ သူတို့နှစ်ဦး ရင်းနှီးခဲ့သည့် အချိန်ကာလမှာ သိပ်မကြာလှသော်လည်း သူမ၏ ကိုယ်ကျင့်တရားကို သူ အသိအမှတ် ပြုထားသည်။ ထို့ပြင် သူမက သူ့အပေါ်တွင်လည်း မည်သည့် ဖုံးကွယ်မှုမျှ မရှိဘဲ အပြည့်အဝ ယုံကြည်ထားသူ ဖြစ်၏။

"အင်း" ဟု ကျောက်ရှန်းကျီက တိုးညှင်းစွာ ပြန်ဖြေလိုက်သည်။

ယောကျ်ားကောင်းတစ်ယောက် ဇနီးသုံးယောက် ကိုယ်လုပ်တော် လေးယောက် ထားရှိခြင်းမှာ ဤလောကကြီးတွင် ဆန်းကြယ်သော ကိစ္စရပ်တစ်ခု မဟုတ်ပေ။ အထူးသဖြင့် ကျန်းချဲ့၏ ယခု လက်ရှိ အဆင့်အတန်းနှင့် သြဇာအာဏာအရ ဆိုရလျှင် သူက အတော်လေးကို စည်းကမ်းတကျ နေထိုင်တတ်သူဟု ဆိုရမည် ဖြစ်သည်။ တတိယဇနီး နေရာက ပထမဇနီးနှင့် ဒုတိယဇနီးတို့လောက် မမြင့်မားသော်လည်း ကိုယ်လုပ်တော်အဆင့် မဟုတ်ဘဲ တရားဝင် ဇနီးမယား နေရာတွင် ရှိနေဆဲပင် ဖြစ်၏။

"ဒါနဲ့ ဒီကိစ္စကို ကိုယ် ဝမ်ကျွန်းနဲ့ နင်ပင်းတို့ကို အရင်ဆုံး အသိပေးထားချင်တယ်... မင်း သဘောကရော ဘယ်လိုရှိလဲ" ဟု ကျန်းချဲ့က မေးလိုက်သည်။

"ဒီကိစ္စကို ခဏလောက် အချိန်ဆွဲထားရအောင်... နောက်ပိုင်း အခြေအနေ အချိန်အခါ ပေးလာမှ ပွင့်ပွင့်လင်းလင်း ပြောကြတာပေါ့" ဟု ကျောက်ရှန်းကျီက ပြန်ဖြေလိုက်သည်။ ယခုအချိန်တွင် သူမက ထိုကိစ္စများကို ရင်မဆိုင်ချင်သေးပေ။ ချီညီအစ်မနှစ်ဦးကို မျက်နှာချင်းဆိုင်ရန် သူမကိုယ်တိုင်ပင် အသင့်မဖြစ်သေးရာ ထိုညီအစ်မနှစ်ဦးအတွက်ဆိုလျှင် ပို၍ပင် ခက်ခဲပေလိမ့်မည်။

"ကောင်းပါပြီ... အရာအားလုံး မင်းသဘောအတိုင်းပါပဲ" ဟု ကျန်းချဲ့က ခေါင်းညိတ်ပြလိုက်သည်။

အနည်းငယ် စကားစမြည် ပြောဆိုပြီးနောက် ကျန်းချဲ့က အဓိက ကိစ္စကို စတင် ပြောဆိုလိုက်သည်။

"နောက်ထပ် အချိန်အတန်ကြာရင် ကိုယ် ထျန်းလုံ ဘုန်းကြီးကျောင်းကို ရှင်းလင်းဖို့ စီစဉ်ထားတယ်... အဲဒီအချိန်ကျရင် မင်း ကိုယ့်ကို လာကူညီပေးပါ"

သူ့ဘက်တွင် ယွမ်ယင်းအဆင့် သိုင်းပညာရှင် တစ်ဦး ထပ်တိုးလာခြင်းက သူ၏ ယုံကြည်မှုကို ပိုမို ခိုင်မာစေသည်။ ဤသည်မှာလည်း အဆိုးဆုံး အခြေအနေများအတွက် ကြိုတင် ပြင်ဆင်ထားခြင်းသာ ဖြစ်၏။

အမှန်တကယ်တော့ ထျန်းလုံ ဘုန်းကြီးကျောင်းက နဂါးကျား တာအိုဂိုဏ်းထက် နှိမ်နင်းရ ပို၍ လွယ်ကူပေသည်။ အဘယ်ကြောင့်ဆိုသော် ထျန်းလုံ ဘုန်းကြီးကျောင်းမှာ ဗုဒ္ဓဘာသာဂိုဏ်း၏ အကိုင်းအခက်တစ်ခုသာ ဖြစ်ပြီး ကျောင်းတော်အတွင်း၌ သိုင်းသူတော်စင်အဆင့် ရှိသူ တစ်ဦးမျှ မရှိသောကြောင့်ပင်။ ရဟန္တာတစ်ပါးက ဗောဓိသတ်အဆင့်သို့ တက်လှမ်းသွားနိုင်သည်နှင့် တစ်ပြိုင်နက် သူတို့အားလုံးက တာ့လေ့ယင် ဘုန်းကြီးကျောင်းသို့ သွားရောက်ကာ ဆက်လက် ကျင့်ကြံကြရသည်။ အင်အားအကြီးဆုံးသူ ဆိုလျှင်ပင် ဖုန်းယွင် အဆင့်သတ်မှတ်ချက်စာရင်းတွင် ပါဝင်သော ထိပ်တန်း ရဟန္တာတစ်ပါးမျှသာ ဖြစ်၏။

"ကောင်းပါပြီ" ဟု ကျောက်ရှန်းကျီက ပြန်ဖြေလိုက်သည်။ သူမက ဘာကြောင့်လဲ ဟုလည်း မမေးသလို မည်သည့်အချိန်တွင် စတင်လှုပ်ရှားမည်ကိုလည်း မမေးမြန်းဘဲ ခေါင်းညိတ်ကာ သဘောတူလိုက်၏။

သူမ၏ နူးညံ့သိမ်မွေ့မှုများကြောင့် ကျန်းချဲ့၏ ရင်တွင်း၌ ပိုမို မြတ်နိုးယုယချင်စိတ်များ ဖြစ်ပေါ်လာပြီး သူမ၏ နားနားသို့ ကပ်ကာ တိုးညှင်းစွာ ပြောလိုက်သည်။

"နတ်မိမယ်လေး... ကိုယ် မင်းကို နောက်တစ်ကြိမ်လောက် ကျင့်ကြံရာမှာ ကူညီပေးရမလား"

ကျောက်ရှန်းကျီ၏ မျက်နှာထက်တွင် ရှက်သွေးဖြာသွားပြီး စိတ်ကို ပြန်လည် တည်ငြိမ်အောင် ထိန်းလိုက်ကာ တည်ကြည်သော အသံဖြင့် ပြောလိုက်သည်။

"အဲဒါဆို ရှင် မလုပ်ရဘူးနော်"

တောင်ပိုင်းစစ်တပ် စခန်း၊ ဗိုလ်ချုပ်ကြီး၏ ရွက်ဖျင်တဲအတွင်း၌။

တောင်ပိုင်းနယ်စားကြီး လီချန်ကော၏ မွေးစားသားများ အားလုံး ရွက်ဖျင်တဲအတွင်း၌ စုဝေးနေကြသည်။ သို့သော် ယခုအချိန်တွင် အရင်နေ့များကလို ဆူညံပွက်လောရိုက်မနေဘဲ အားလုံးက တိတ်ဆိတ်ငြိမ်သက်နေကြ၏။ သူတို့အားလုံး၏ ရင်ထဲတွင် မမြင်နိုင်သော ဖိအားတစ်ခုက လွှမ်းမိုးနေသကဲ့သို့ ရှိနေသည်။ အထက်ပိုင်း နေရာတွင် ထိုင်နေသော လီချန်ကော၏ မျက်နှာကလည်း အနည်းငယ် မှောင်မိုက်နေလေသည်။

သူတို့အားလုံး ဤကဲ့သို့ ဖြစ်နေရခြင်း၏ အဓိက အကြောင်းရင်းမှာ ကျန်းချဲ့၏ ရာထူးနေရာကြောင့်ပင် ဖြစ်၏။

မကြာသေးမီက တော်ဝင်နန်းတော်မှ ကျန်းချဲ့ကို တောင်ပိုင်း နတ်သံတမန်အပြင် ယွဲ့ပြည်နယ် မြို့တော်ဝန်အဖြစ်ပါ ခန့်အပ်လိုက်ကြောင်း သတင်းများက ယွဲ့ပြည်နယ်သို့ ရောက်ရှိလာပြီးနောက် တောင်ပိုင်းစစ်တပ်မှ အဆင့်မြင့် အရာရှိများ အားလုံး မမြင်နိုင်သော ခြိမ်းခြောက်မှုတစ်ခုကို ခံစားလိုက်ကြရသည်။ တောင်ပိုင်း နတ်သံတမန် ဆိုသည်က ကိစ္စမရှိလှသော်လည်း ယွဲ့ပြည်နယ် မြို့တော်ဝန် ရာထူးကိုပါ ပူးတွဲ ထမ်းဆောင်ရမည်ဆိုပါက တော်ဝင်နန်းတော်၏ ရည်ရွယ်ချက်မှာ အလွန် သိသာထင်ရှားလွန်းနေပေသည်။ ဤသည်မှာ တောင်ပိုင်းစစ်တပ်ကို တိုက်ရိုက် ပစ်မှတ်ထားလိုက်ခြင်းဖြစ်ကြောင်း မည်သူမဆို သိနိုင်၏။ တော်ဝင်နန်းတော်က အင်အား ချိန်ခွင်လျှာကို ညှိချင်နေခြင်းပင်။

"တစ်ချိန်တုန်းက ငါ့ရှေ့မှာ ခါးညွှတ် အရိုအသေပေးပြီး နယ်စားကြီးလို့ ခေါ်ခဲ့တဲ့ လူငယ်လေးက အခုတော့ ငါ့အတွက် တကယ့် ဆူးငြောင့်ခလုတ်ကြီး ဖြစ်လာခဲ့ပြီပဲ" ဟု လီချန်ကောက ခေါင်းမော့ကာ ပြောလိုက်သည်။ သူ၏ မျက်နှာထက်မှ မှောင်မိုက်နေသော အမူအရာများက ပျောက်ကွယ်သွားပြီး တည်ငြိမ်မှုများဖြင့် အစားထိုး ဝင်ရောက်လာ၏။

သို့သော် သေချာစွာ အကဲခတ်ကြည့်မည်ဆိုပါက လီချန်ကော၏ မျက်ဝန်းအောက်ခြေတွင် အေးစက်စက် အငွေ့အသက်များ ကိန်းအောင်းနေသည်ကို မြင်တွေ့နိုင်ပေသည်။

"မွေးစားအဖေရဲ့ အရင်တုန်းက လှုပ်ရှားမှုတွေကြောင့် တော်ဝင်နန်းတော်က သတိထားမိသွားပြီး အခုလို မွေးစားအဖေကို ထိန်းချုပ်ဖို့ ကျန်းချဲ့ကို စေလွှတ်လိုက်တာ ဖြစ်ရမယ်" ဟု ဘေးဘက်တွင် ရပ်နေသော လီယွမ်ရှိုးက အလျင်အမြန် ထောက်ခံပြောဆိုလိုက်သည်။

"မွေးစားအဖေကို ထိန်းချုပ်မယ် ဟုတ်လား... အဲဒီကျန်းချဲ့က အရည်အချင်းရော ပြည့်မီလို့လား" ဟု လီတုန်းရှန်းက နှာခေါင်းရှုံ့ကာ ပြောလိုက်သည်။ ယခုလက်ရှိ လောကတစ်ခွင်လုံး တုန်ဟည်းသွားစေခဲ့သော ကျန်းချဲ့၏ ဂုဏ်သတင်းအပေါ် သူက အကြောင်းပြချက် မရှိဘဲ မကျေမနပ် ဖြစ်နေမိ၏။ သူတို့အားလုံးက ယွဲ့ပြည်နယ်မှ ထွက်ပေါ်လာသူများ ဖြစ်ပြီး အစပိုင်းတွင် အဖွဲ့အစည်းမဲ့ ကျင့်ကြံသူများသာ ဖြစ်ခဲ့ကြသည်။ ကျန်းချဲ့က ဘာကြောင့်များ ဤမျှလောက် အောင်မြင်နေရသနည်း ဟု တွေးတောကာ သူကတော့ သူတစ်ပါး၏ မွေးစားသားအဖြစ်သာ ရိုးရိုးသားသား နေထိုင်နေရသည်ကို မကျေမချမ်း ဖြစ်နေမိသည်။

"ကျန်းချဲ့ တစ်ယောက်တည်းကတော့ မလုံလောက်ပါဘူး... ဒါပေမဲ့ သူ့နောက်ကျောမှာ ပေလင် ချီမိသားစုရဲ့ ထောက်ပံ့မှုတွေ ရှိနေတယ်ဆိုတာကို မမေ့ပါနဲ့... ငါ့ခန့်မှန်းချက်သာ မမှားဘူးဆိုရင် တော်ဝင်နန်းတော်က သူ့ကို ရာထူးပေးလိုက်တာဟာ ပေလင် ချီမိသားစုကြောင့်ပဲ ဖြစ်ရမယ်... တော်ဝင်နန်းတော်က မွေးစားအဖေနဲ့ ပေလင် ချီမိသားစုကို အချင်းချင်း တိုက်ခိုက်စေပြီး နှစ်ဦးနှစ်ဖက် အကျိုးယုတ်အောင် လုပ်ချင်နေတာပဲ" ဟု လီယွမ်ရှိုးက ခေါင်းမော့ကာ လေးနက်သော အသံဖြင့် ပြောလိုက်သည်။

"ဒါဆို မွေးစားအဖေက ဘယ်လို လုပ်ဖို့ စီစဉ်ထားပါသလဲ... တိုက်မှာလား ဒါမှမဟုတ် ငြိမ်းချမ်းရေး ယူမှာလား" ဟု အခြားသော မွေးစားသားများထဲမှ ဒုတိယ ဗိုလ်ချုပ်တစ်ဦးက ရှေ့ထွက်လာပြီး လီချန်ကော၏ သဘောထားကို မေးမြန်းလိုက်သည်။

"ငြိမ်းချမ်းရေး ယူရမယ် ဟုတ်လား... ဒုတိယအစ်ကိုရာ ကျန်းချဲ့ဆိုတဲ့ ကောင်ဆီမှာ ငြိမ်းချမ်းရေး ယူချင်တဲ့ အရိပ်အယောင်လေး တစ်စက်လောက်များ တွေ့နေရလို့လား... ယွင်ပြည်နယ်ကို ရောက်နေတာ အတော်ကြာနေပြီကို မွေးစားအဖေဆီ လာပြီး ဂါရဝပြုဖို့ နေနေသာသာ စာတစ်စောင်တောင် မပို့ဘူး... ဒါက ဘာသဘောလဲ... မွေးစားအဖေကပဲ သူ့ဆီ သွားပြီး ဂါရဝပြုရမယ်လို့များ ထင်နေတာလား" ဟု လီတုန်းရှန်းက ဒေါသတကြီး ဝင်ရောက် ပြောဆိုလိုက်သည်။

"ဒီကိစ္စတွေကို မွေးစားအဖေကိုယ်တိုင် ဆုံးဖြတ်ပါလိမ့်မယ်... မင်းက ဒီနေရာမှာ လာပြီး မီးထိုးယပ်ခတ် လုပ်နေဖို့ မလိုဘူး" ဟု ထို ဒုတိယ ဗိုလ်ချုပ်က လီတုန်းရှန်းကို တစ်ချက် စိုက်ကြည့်လိုက်သည်။ သူ၏ အကြည့်များက လီတုန်းရှန်းကို အရေးမစိုက်သည့် အသွင်ပေါ်နေ၏။

"မင်း..." ဟု လီတုန်းရှန်းက ပြောမည်ပြုသော်လည်း စကားလုံးများက လည်ချောင်းဝတွင် တစ်ဆို့သွားပြီး ပါးစပ်ဟလျက်သားနှင့်ပင် စကားများကို ပြန်လည် မျိုချလိုက်ရသည်။

သူတို့ နှစ်ဦးစလုံးက မွေးစားသားများ ဖြစ်ကြသော်လည်း ထိုသူက သူ့ထက် လုပ်သက်ပိုရင့်ကာ ကျင့်စဉ်အဆင့်လည်း ပိုမြင့်မားသည့်အပြင် ရာထူးကလည်း သူ့ထက် များစွာ သာလွန်နေပေသည်။ ထိုသူက လီချန်ကော၏ လက်ယာရုံး လက်ဝဲရုံးဟုပင် ခေါ်ဆိုနိုင်ပြီး သူကမူ များစွာ ကွာဟနေဆဲပင် ဖြစ်၏။

လီချန်ကောက လက်ကာပြကာ မွေးစားသား နှစ်ဦး၏ အငြင်းပွားမှုကို တားဆီးလိုက်ပြီး အေးစက်စက် ပြောလိုက်သည်။

"တော်ဝင်နန်းတော်ရဲ့ ရည်ရွယ်ချက်က ရှင်းနေပါပြီ... ကျန်းချဲ့ကို သုံးပြီး ငါ့ကို ထိန်းချုပ်ချင်နေတာပဲ... သူက ငြိမ်းချမ်းရေး ယူချင်တယ် ဆိုရင်တောင် တော်ဝင်နန်းတော်က ခွင့်ပြုမှာ မဟုတ်ဘူး... ဒါကြောင့် ကျန်းချဲ့နဲ့ တစ်ပွဲတစ်လမ်း ယှဉ်ပြိုင်ရုံကလွဲပြီး တခြား ရွေးချယ်စရာ မရှိတော့ဘူး... တစ်ချိန်တုန်းက လူငယ်လေးက အခုအချိန်မှာ ဘယ်လောက်အထိ အရည်အချင်းတွေ ရှိနေပြီလဲဆိုတာကို ငါ တကယ်ပဲ သိချင်နေပြီ"

လီချန်ကော၏ အသံက ကျယ်လောင်ခြင်း မရှိသော်လည်း ထိုစကားများထဲတွင် အလွန် ခိုင်မာသော ယုံကြည်မှုများ ကိန်းအောင်းနေပေသည်။

လီတုန်းရှန်းက ချက်ချင်းပင် ဝမ်းသာအားရ ဖြစ်သွားပြီး အသံကျယ်ကျယ်ဖြင့် ထောက်ခံလိုက်သည်။

"မှန်ပါတယ်... မွေးစားအဖေ ပြောတာ မှန်တယ်... အဲဒီကျန်းချဲ့က ဘယ်လောက်တောင် အရည်အချင်း ရှိနေလို့လဲ... မွေးစားအဖေက ယွဲ့ပြည်နယ်မှာ အုပ်ချုပ်လာခဲ့တာ နှစ်ပေါင်းများစွာ ကြာခဲ့ပြီဖြစ်လို့ အမြစ်တွယ်နေပြီ... လက်အောက်မှာလည်း နယ်ခြားစောင့် အထက်တန်းစား စစ်သည် တစ်သိန်းရှိတဲ့အပြင် အစ်ကိုတွေရဲ့ ကူညီပံ့ပိုးမှုတွေလည်း ရှိနေသေးတယ်... ဘယ်လိုပဲပြောပြော ကျွန်တော်တို့ဘက်က အသာစီး ရနေတာပါ... ကျန်းချဲ့က ပေလင် ချီမိသားစုကို ကျောထောက်နောက်ခံ ပြုထားတယ် ဆိုရင်တောင် အဲဒီ ပေလင် ချီမိသားစုက ယွဲ့ပြည်နယ်က ဒေသခံ အင်အားစု မဟုတ်ဘူး... ယွင်ပြည်နယ်ကနေ ယွဲ့ပြည်နယ်ထဲကို ဝင်ရောက် စွက်ဖက်ဖို့ဆိုတာ အဝေးကြီး လိုပါသေးတယ်"

"မွေးစားအဖေ... သားရဲ့ အမြင်ကို ပြောရမယ်ဆိုရင် အရင်တုန်းက သုံးခဲ့တဲ့ နည်းလမ်းဟောင်းကိုပဲ ပြန်သုံးပြီး တောင်ပိုင်း ယွဲ့ပြည်နယ်နဲ့ ပဋိပက္ခတွေ ဖန်တီးလိုက်ရင်ရော... ဒါဆိုရင် တော်ဝင်နန်းတော်က အလျှော့ပေးလာမှာ သေချာတယ်" ဟု လီချန်ကောက ဆုံးဖြတ်ချက် ချလိုက်ပြီဖြစ်ကြောင်း သိလိုက်ရသောအခါ အခြားသော မွေးစားသားများကလည်း အကြံဉာဏ်များ ချက်ချင်း ပေးလာကြသည်။

"ဟုတ်ပါတယ်... ဒီနယ်စပ် တစ်ခွင်လုံးကို ကျွန်တော်တို့ကပဲ ထိန်းချုပ်ထားတာပါ... တိုက်မယ်ဆိုလည်း ကျွန်တော်တို့ပဲ ငြိမ်းချမ်းရေး ယူမယ်ဆိုလည်း ကျွန်တော်တို့ပဲ... တော်ဝင်နန်းတော်က နောက်ထပ် စစ်ပွဲတစ်ခုကို မဖန်တီးချင်ဘူးဆိုရင် နောက်ဆုံးမှာ အလျှော့ပေးရမှာပါပဲ"

လီယွမ်ရှိုးက ခေါင်းခါပြလိုက်သည်။

"ဒီအချိန်က အရင်အချိန်တွေနဲ့ မတူတော့ဘူး... အရင်တုန်းက မွေးစားအဖေက ဒီနည်းလမ်းကို သုံးခဲ့လို့ တော်ဝင်နန်းတော်က သည်းခံခဲ့ပေမဲ့ အခုတော့ တောင်ပိုင်းစစ်တပ်ရဲ့ သြဇာအာဏာက ယွဲ့ပြည်နယ် တစ်ခုလုံးကို လွှမ်းခြုံလုနီးပါး ဖြစ်နေပြီ... တော်ဝင်နန်းတော်ဘက်က ဆက်ပြီး အလျှော့ပေးဖို့ဆိုတာ မဖြစ်နိုင်တော့ဘူး... မွေးစားအဖေအတွက် အခု လတ်တလော ရွေးချယ်စရာ နည်းလမ်း နှစ်ခုပဲ ရှိတော့တယ်... ပထမတစ်ခုက အာဏာကို ခွဲဝေပေးပြီး တော်ဝင်နန်းတော်ကို အကျိုးအမြတ်တွေ ပေးလိုက်တာပဲ... ဒါဆိုရင် လတ်တလောတော့ အန္တရာယ်ကင်းနိုင်တယ်... ဒုတိယ နည်းလမ်းကတော့ တော်ဝင်နန်းတော် လက်အောက်ကနေ ခွဲထွက်ပြီး သီးခြားနယ်မြေတစ်ခုအဖြစ် ရပ်တည်ဖို့ပါပဲ"

ထိုစကားများ ထွက်ပေါ်လာသည်နှင့် တစ်ပြိုင်နက် ရွက်ဖျင်တဲအတွင်း၌ ချက်ချင်းပင် တိတ်ဆိတ်ငြိမ်သက်သွားသည်။ လီချန်ကောက သူ၏ လက်အောက်ရှိ မွေးစားသားများကို ခံစားချက် ကင်းမဲ့နေသော မျက်နှာထားဖြင့် အကဲခတ်ကြည့်နေ၏။ လီယွမ်ရှိုး၏ စကားများက သဘာဝကျစွာပင် သူ၏ ညွှန်ကြားချက်အရ ပြောဆိုခြင်း ဖြစ်ပြီး အကြောင်းရင်းမှာ ဤမွေးစားသားများက သူနှင့် စိတ်တူကိုယ်တူ ရှိမရှိ စမ်းသပ်လိုသောကြောင့်ပင် ဖြစ်သည်။

ချင်းထျန်းမိစ္ဆာဂိုဏ်းနှင့် ပူးပေါင်းမည့် ကိစ္စတွင် ယခုအချိန်အထိ လီယွမ်ရှိုး တစ်ယောက်သာ ပါဝင်ပတ်သက်နေသေးပြီး ကျန်ရှိသော မွေးစားသားများကမူ အသေးစိတ်ကို မသိရှိကြသေးပေ။ ထိုသူများ အားလုံးကို သူက နှစ်ပေါင်းများစွာ ပြုစုပျိုးထောင်ခဲ့သည် ဆိုသော်ငြားလည်း တစ်ချိန်ချိန်တွင် သစ္စာဖောက်သွားလျှင်ကော မည်သို့ လုပ်မည်နည်း။

အစောပိုင်းက လီတုန်းရှန်းကို အပြစ်တင်ခဲ့သော ဒုတိယ ဗိုလ်ချုပ် လီခွမ့်က ပထမဆုံး စတင် စကားဆိုလာပြီး အထက်ပိုင်းရှိ လီချန်ကောကို အရိုအသေ ပေးလိုက်သည်။

"မွေးစားအဖေက တော်ဝင်နန်းတော်အတွက် နယ်စပ်မှာ နှစ်တစ်ရာနီးပါး ကာကွယ်ပေးခဲ့ပြီး ကြီးမားတဲ့ အကျိုးဆောင်မှုတွေ ရှိခဲ့ပါတယ်... ဒါပေမဲ့ တော်ဝင်နန်းတော်က နှမြောတွန့်တိုပြီး မွေးစားအဖေကို မြို့စား ရာထူးလေး တစ်ခုတောင် မပေးခဲ့ဘူး... သားအနေနဲ့ ဒီကိစ္စကို စိတ်ခုနေတာ ကြာပါပြီ... တကယ်လို့ မွေးစားအဖေကများ သီးခြား ခွဲထွက်ဖို့ ဆန္ဒရှိတယ်ဆိုရင် သားက မွေးစားအဖေအတွက် အသက်ပေးပြီး တာဝန်ထမ်းဆောင်သွားပါ့မယ်"

"မွေးစားအဖေအတွက် အသက်ပေးပြီး တာဝန် ထမ်းဆောင်ပါ့မယ်"

"မွေးစားအဖေအတွက် အသက်ပေးပြီး တာဝန် ထမ်းဆောင်ပါ့မယ်"

"ကျွန်တော်လည်း အတူတူပါပဲ"

လီခွမ့်က စတင်လိုက်သည်နှင့် အခြားသူများကလည်း တစ်ယောက်ပြီးတစ်ယောက် ဒူးထောက် အရိုအသေပေးကာ သူတို့၏ သဘောထားများကို ပြသလိုက်ကြသည်။

ထိုမြင်ကွင်းကို ကြည့်ရင်း လီချန်ကော၏ နှုတ်ခမ်းထောင့်တွင် အပြုံးရိပ်တစ်ခု ပေါ်လာသည်။ ယနေ့ မွေးစားသားများ၏ လုပ်ရပ်များက သူ၏ ပြုစုပျိုးထောင်မှုများကို အလဟဿ မဖြစ်စေခဲ့ပေ။ နှစ်ပေါင်း တစ်ရာနီးပါးတိုင်အောင် တောင်ပိုင်းစစ်တပ်ကို သူ၏ ကိုယ်ပိုင် တပ်မတော်တစ်ခုအဖြစ် လေ့ကျင့်ပေးခဲ့ရခြင်းမှာ ယနေ့ကဲ့သို့ အထက်အောက် စိတ်တူကိုယ်တူ ဖြစ်စေရန်အတွက်ပင် ဖြစ်၏။

"မင်းတို့ရဲ့ စိတ်နေသဘောထားကို ငါ နားလည်ပါတယ်... ဒါပေမဲ့ ငါက တော်ဝင်နန်းတော်အပေါ်မှာ သစ္စာစောင့်သိတဲ့ စိတ်ထား ရှိနေတုန်းပါပဲ... မတတ်သာတဲ့ အခြေအနေမျိုးကို မရောက်မချင်း ငါက တော်ဝင်နန်းတော်ကို ဘယ်တော့မှ သစ္စာဖောက်မှာ မဟုတ်သလို နောင်လာနောက်သားတွေရဲ့ ကဲ့ရဲ့ရှုတ်ချမှုတွေကိုလည်း ခံယူမှာ မဟုတ်ဘူး" ဟု လီချန်ကောက လက်ဝှေ့ယမ်းပြကာ ဗိုလ်ချုပ်များ အားလုံးကို မတ်တတ်ရပ်ရန် အချက်ပြလိုက်သည်။

လီယွမ်ရှိုးက လေးနက်သော အသံဖြင့် ပြောလိုက်သည်။

"မွေးစားအဖေရဲ့ ရည်ရွယ်ချက်ကို မင်းတို့ နားလည်ကြပြီလား... တော်ဝင်နန်းတော်က ဒီအတိုင်းပဲ ရပ်တန့်သွားမယ်ဆိုရင်တော့ ကိစ္စမရှိဘူး... ဒါပေမဲ့ တော်ဝင်နန်းတော်က ဆက်ပြီး အကျပ်ကိုင်လာမယ်ဆိုရင်တော့ ကျွန်တော်တို့ တောင်ပိုင်းစစ်တပ်က ဘယ်တော့မှ လက်ခံမှာ မဟုတ်ဘူး"

ဗိုလ်ချုပ်များ အားလုံး အချင်းချင်း မျက်နှာချင်းဆိုင် ကြည့်လိုက်ကြပြီးနောက် လီခွမ့်၏ မျက်ဝန်းများ အရောင်လက်သွားကာ ချက်ချင်းပင် ပြောလိုက်သည်။

"နားလည်ပါပြီ... ပြန်ရောက်တာနဲ့ သားရဲ့ လက်အောက်က ဗိုလ်ချုပ်တွေကို စုစည်းပြီး မွေးစားအဖေအပေါ် တော်ဝင်နန်းတော်က ဖိနှိပ်နေတဲ့ ကိစ္စနဲ့ ပတ်သက်ပြီး တုံ့ပြန်မှုတွေ လုပ်ခိုင်းလိုက်ပါ့မယ်"

"တောင်ပိုင်းစစ်တပ် တစ်ခုလုံးက မွေးစားအဖေအတွက် အသက်ပေးပြီး သစ္စာရှိရှိ တာဝန် ထမ်းဆောင်သွားပါ့မယ်"

"ကောင်းပြီ... မင်းတို့ အရင် ပြန်သွားကြတော့... ငါ နည်းနည်း ပင်ပန်းနေပြီ" ဟု လီချန်ကောက ခပ်ရေးရေး ပြုံးလိုက်ပြီး လက်ကို မြှောက်ကာ ဝှေ့ယမ်းပြလိုက်သည်။

"သားတို့ ပြန်ခွင့်ပြုပါဦး"

"သားတို့ ပြန်ခွင့်ပြုပါဦး"

"တကယ်တော့ မွေးစားအဖေက အရမ်း တွေးပူနေတာပါ... တောင်ပိုင်းစစ်တပ်ရဲ့ စိတ်ဓာတ်က သုံးလို့ရနေသေးပါတယ်" ဟု လီယွမ်ရှိုးက အေးအေးဆေးဆေး ပြုံးကာ ပြောလိုက်သည်။

"မသေချာတဲ့ ကိစ္စတစ်ခုအတွက် ကြိုတင် ကာကွယ်ထားတာ အကောင်းဆုံးပဲ... တော်ဝင်နန်းတော်က ငါ့အပေါ် သံသယ ဝင်နေတာ ကြာပြီ... သူတို့တွေက တောင်ပိုင်းစစ်တပ်ထဲကို သူလျှိုတွေ မထည့်ထားဘူးလို့ ပြောလာရင် ငါ လုံးဝ ယုံမှာ မဟုတ်ဘူး... ဒါကြောင့် ဒီသူလျှိုတွေကို ရှင်းလင်းရမယ့် တာဝန်ကို မင်းကိုပဲ လွှဲပေးလိုက်မယ်... ငါ့ရဲ့ တောင်ပိုင်းစစ်တပ်ထဲမှာ ဒုတိယ အသံ ထွက်လာတာမျိုးကို လုံးဝ ခွင့်မပြုနိုင်ဘူး" ဟု လီချန်ကောက လေးနက်သော အသံဖြင့် ပြောလိုက်သည်။

"ယွမ်ရှိုး လုပ်တဲ့အလုပ်မို့လို့ မွေးစားအဖေ စိတ်ချလက်ချ နေလို့ရပါတယ်" ဟု လီယွမ်ရှိုးက ခေါင်းမော့ကာ ပြောလိုက်ပြီး သူ၏ မျက်နှာထက်တွင် အပြုံးတစ်ခု ပေါ်လာ၏။

"ဒါ့အပြင် ကျန်းချဲ့ဘက်ကိုလည်း အရမ်း ချောမွေ့နေအောင် ထားလို့ မဖြစ်ဘူး... သွေးပင်လယ်ဂိုဏ်းက ပေဟုန်ယီ ကောင်းမိသားစုက ကောင်းချီရှန်းနဲ့ ကွမ်မိသားစုက ကွမ်ယွမ်ထုတို့ဆီကို သွားပြီး ဆက်သွယ်လိုက်... ငါ့အနေနဲ့ သူတို့နဲ့ ဆွေးနွေးစရာ စီးပွားရေး ကိစ္စတစ်ခု ရှိတယ်လို့ ပြောလိုက်ပါ" ဟု လီချန်ကောက တည်ငြိမ်သော လေသံဖြင့် ပြောလိုက်သည်။

သို့သော် သူ၏ နှုတ်မှ ထွက်ပေါ်လာသော နာမည် တစ်ခုစီတိုင်းမှာ ယွဲ့ပြည်နယ်ရှိ ထိပ်တန်း အင်အားစုများ၏ ခေါင်းဆောင်များပင် ဖြစ်၏။ ဤနှစ်များအတွင်း သူက တောင်ပိုင်းစစ်တပ်ကို ထိန်းချုပ်ထားရုံသာမက ထိုထိပ်တန်း အင်အားစုများ၏ ခေါင်းဆောင်များနှင့်လည်း ဆက်ဆံရေးများ တည်ဆောက်ထားခဲ့ခြင်း ဖြစ်ပေသည်။

"သူတို့က မွေးစားအဖေကို ထောက်ခံဖို့ ဆန္ဒရှိပါ့မလား" ဟု လီယွမ်ရှိုးက အနည်းငယ် တွန့်ဆုတ်စွာဖြင့် မေးလိုက်သည်။

"အခု လောလောဆယ်တော့ ဆန္ဒရှိမှာ မဟုတ်ဘူးပေါ့... ဒါပေမဲ့ ငါ သိုင်းသူတော်စင်အဆင့်ကို ရောက်သွားတဲ့ တစ်နေ့ကျရင် သူတို့တွေလည်း ပြောင်းလဲသွားပါလိမ့်မယ်" ဟု လီချန်ကောက ပေါ့ပေါ့ပါးပါးပင် ပြောလိုက်သည်။

ယွမ်ယင်းအဆင့် ရှိသော လီချန်ကော တစ်ယောက်က ကြီးမားသော အပြောင်းအလဲများကို မဖန်တီးနိုင်သလို တော်ဝင်နန်းတော်မှ လာသော ဖိအားများကိုလည်း မယှဉ်ပြိုင်နိုင်ပေ။ သို့သော် သိုင်းသူတော်စင်အဆင့် ရှိသော လီချန်ကော ဆိုလျှင်တော့ အခြေအနေက လုံးဝကို ကွဲပြားသွားမည် ဖြစ်သည်။ ထိုအချိန်ကျလျှင် ကိုယ့်ကိုယ်ကိုယ် ဘုရင်တစ်ပါးအဖြစ် ကြေညာနိုင်စွမ်း ရှိသွားပြီ ဖြစ်၏။

"ဒီစကားက တကယ်ကို မှန်ကန်ပါတယ်... ဒါပေမဲ့ ချင်းထျန်းမိစ္ဆာဂိုဏ်းဘက်က ပေးလာတဲ့ နည်းလမ်းကိုတော့ မွေးစားအဖေအနေနဲ့ သတိမထားဘဲ နေလို့မရဘူးနော်" ဟု လီယွမ်ရှိုးက မျက်မှောင်အနည်းငယ် ကြုတ်ကာ သတိပေး စကားဆိုလိုက်သည်။

လီချန်ကော၏ အယုံကြည်ရဆုံးသော လူတစ်ယောက်အနေဖြင့် လီယွမ်ရှိုးက လီချန်ကော၏ သတင်းအချက်အလက် ကွန်ရက်ကို ထိန်းချုပ်ထားရုံသာမက လီချန်ကောနှင့် ချင်းထျန်းမိစ္ဆာဂိုဏ်းတို့ကြားရှိ လျှို့ဝှက် ဆက်သွယ်ရေးသမား တစ်ဦးလည်း ဖြစ်ပေသည်။

ချင်းထျန်းမိစ္ဆာဂိုဏ်းဘက်က အမှန်တကယ်ပင် လီချန်ကောအတွက် လုံလောက်သော အပေးအယူတစ်ခုကို ကြိုတင် ကမ်းလှမ်းထားပြီး ဖြစ်သည်။ ၎င်းမှာ သူ သိုင်းသူတော်စင်အဆင့်သို့ ရောက်ရှိရန် ကူညီပေးမည် ဆိုခြင်းပင်။ သို့သော် ထိုအရာအတွက် ပေးဆပ်ရမည့် တန်ကြေးမှာမူ သိန်းနှင့်ချီသော ပြည်သူပြည်သားများ၏ အသက်ကို အခြေခံ အုတ်မြစ်အဖြစ် အသုံးပြုရမည် ဖြစ်၏။

အစောပိုင်း ကာလများက လီချန်ကောက သတိထားပြီး ထိုကမ်းလှမ်းမှုကို လက်မခံခဲ့သော်လည်း လွန်ခဲ့သော လအနည်းငယ်ခန့်က စတင်ကာ သူ၏ စိတ်ထဲတွင် အနည်းငယ် လှုပ်ရှားလာခဲ့ပြီး လျှို့ဝှက်စွာ ကြိုတင် ပြင်ဆင်မှုများ စတင် ပြုလုပ်နေခဲ့သည်။

"ချင်းထျန်းမိစ္ဆာဂိုဏ်းရဲ့ အကြံအစည်က ဘာလဲဆိုတာ ငါ ရှင်းရှင်းလင်းလင်း သိပါတယ်... ဒါပေမဲ့ ငါ့ကို ထိန်းချုပ်ချင်တယ်ဆိုရင်တော့ အဲဒီ သူပုန်ဂိုဏ်းက ကောင်တွေမှာ အရည်အချင်း မရှိသေးဘူး... မင်းရဲ့ စိုးရိမ်ပူပန်မှုတွေကို ငါ သိပါတယ်... ဒါပေမဲ့ ငါက အခု ကြီးမားတဲ့ အတားအဆီး တစ်ခုနဲ့ ရင်ဆိုင်နေရပြီ... ငါ့ကိုယ်ပိုင် စွမ်းအားနဲ့ သိုင်းသူတော်စင်အဆင့်ကို တက်လှမ်းဖို့ဆိုတာ မဖြစ်နိုင်သလောက်ပဲ... ချင်းထျန်းမိစ္ဆာဂိုဏ်းရဲ့ နည်းလမ်းက အန္တရာယ်များပေမဲ့ ငါကတော့ အသက်စွန့်ပြီး ကြိုးစားကြည့်ရတော့မှာပဲ" ဟု ပြောနေစဉ် လီချန်ကော၏ မျက်ဝန်းများအတွင်း၌ မှောင်မိုက်သော အငွေ့အသက်များ ဖြတ်ပြေးသွား၏။

နှစ်ပေါင်း ခြောက်ဆယ်ကျော် ကာလအတွင်း သူက အဆင့်တက်ရန် အကြိမ်ပေါင်းများစွာ ကြိုးစားခဲ့သော်လည်း အကြိမ်တိုင်း၌ မအောင်မြင်ခဲ့ပေ။ အကယ်၍ ထူးခြားသော ရတနာပစ္စည်း တစ်ခုကိုသာ အားမကိုးခဲ့ရပါက သူက စောစောစီးစီးပင် သေဆုံးသွားခဲ့လောက်ပြီ ဖြစ်သည်။ ထပ်တလဲလဲ ဖိအားများအောက်တွင် သူက အန္တရာယ်ကို မဖြစ်မနေ ရင်ဆိုင်ရတော့မည် ဖြစ်၏။ သေချာသည်မှာ ထိုအရာက အန္တရာယ်များသော်လည်း သူက အချိန်အတော်ကြာအောင် ကြိုတင် ပြင်ဆင်ထားခဲ့ပြီး ဖြစ်သည်။ သိုင်းသူတော်စင်အဆင့်သို့ ရောက်ရှိရန် ဖြစ်နိုင်ခြေမှာလည်း မနိမ့်ကျလှပေ။