အခန်း ၉၈၀

အခန်း (၉၈၀) - ရိတ်သိမ်းမှု

အသက်ရှူ အကြိမ် အနည်းငယ်မျှ ကြာပြီးနောက်... သူ၏ အကြည့်များ က စစ်မြေပြင်နယ်မြေ ဆီသို့ ပြန်လည် ရောက်ရှိသွားတော့သည်။

ထို အခိုက်အတန့် တွင်... သူ့နည်းတူ စစ်မြေပြင်နယ်မြေ ကို စူးစိုက် ကြည့်နေသော အခြားသူ တစ်ယောက် လည်း ရှိနေသေး၏။

အစစ်အမှန်သိုင်းကမ္ဘာ အရှင်သခင်။

၎င်းမှာ တောင်နှင့် ပင်လယ် ကမ္ဘာ ကို တွယ်ကပ်နေသော နွယ်ပင် တစ်ပင် အလား၊ အဆုံးအစ မရှိသော နယ်မြေများ ပင်လယ် ထဲတွင် လွင့်မျော နေသော်ငြားလည်း... တောင်နှင့် ပင်လယ် ကမ္ဘာ မှ လုံးဝ (လုံးဝ) ခွဲထွက်မသွားပေ။

ကမ္ဘာ နှစ်ခု လုံး ကို မျက်စိဖြင့် သေချာ မမြင်နိုင်လောက်အောင် သေးငယ်သော နွယ်ပင် လေး တစ်ခု က ဆက်သွယ် ပေးထားပြီး... ဒါက ကမ္ဘာ နှစ်ခု အကြား ဝင်ထွက်သွားလာနိုင်သည့် လမ်းကြောင်း တစ်ခု ပင် ဖြစ်တော့၏။

ကမ္ဘာ့အရှင်သခင် နင်ချီသည် နယ်နိမိတ် နံရံ အနီးသို့ ချဉ်းကပ်သွားပြီး... စစ်မြေပြင်နယ်မြေ ကို စူးစိုက်ကြည့်နေသည်။

မဟုတ်သေး... သူသည် တောင်နှင့် ပင်လယ် ကမ္ဘာ နှင့် ကျယ်ပြန့်သော ကမ္ဘာ တို့ ၏ အခြေအနေများကို တစ်ပြိုင်နက်တည်း အကဲခတ် လေ့လာနေခြင်း ပင်။

ဝိညာဉ်ကမ္ဘာ နှစ်ခု ၏ ပြင်ပ တွင် ရှိနေသော သက်ရှိ တစ်ခု အနေဖြင့်... သူ ဖြစ်စေ၊ အစစ်အမှန်သိုင်းကမ္ဘာ ဖြစ်စေ... ယခု အချိန်အထိ ဝိညာဉ်ကမ္ဘာ နှစ်ခု သို့မဟုတ် ဘိုးဘေးကြီး သုံးပါး တို့ ၏ ရှာဖွေ တွေ့ရှိ မခံရသေးပါ။

အကယ်၍ နင်ချီ ၏ ပင်မ ခန္ဓာကိုယ် က တောင်နှင့် ပင်လယ် ကမ္ဘာ အတွင်းသို့ ဝင်ရောက် လိုသည် ဆိုပါက... ဤ ဟင်းလင်းပြင် လမ်းကြောင်း မှတစ်ဆင့် တိုက်ရိုက် ဝင်ရောက်သွားနိုင်စွမ်း ရှိ၏။

ဝင်စား ခန္ဓာကိုယ် ကို တောင်နှင့် ပင်လယ် ကမ္ဘာ အတွင်းသို့ ကြိုတင် စေလွှတ် ထားခဲ့ပြီး ဖြစ်သလို... ဝင်စား ခန္ဓာကိုယ် မှာ ယခုအခါ စစ်မြေပြင်နယ်မြေ အတွင်း၌ ရှိနေသောကြောင့်... နင်ချီ ၏ ပင်မ ခန္ဓာကိုယ်သည် ဝင်စား ခန္ဓာကိုယ် နှင့် ချိတ်ဆက်မှု မှတစ်ဆင့် စစ်မြေပြင်နယ်မြေ ထံသို့ ဟင်းလင်းပြင် ဆက်သွယ်ရေး လမ်းကြောင်း တစ်ခု ကို တိုက်ရိုက် ဖန်တီး တည်ဆောက် နိုင်စွမ်း ရှိသည်။

တစ်နည်းအားဖြင့် ဆိုရလျှင်... သူသည် ယခုအခါ တောင်နှင့် ပင်လယ် ကမ္ဘာ နှင့် စစ်မြေပြင်နယ်မြေ အတွင်းသို့ အလွတ်လပ်ဆုံး ဝင်ထွက်သွားလာနိုင်ပြီ။

ကမ္ဘာ့အရှင်သခင် နင်ချီ လုံးဝ ရောက်ရှိ၍ မရနိုင်သေးသော တစ်ခုတည်းသော နေရာမှာ... ကျယ်ပြန့်သော ကမ္ဘာ ပင် ဖြစ်သည်။

သို့သော်ငြားလည်း... ဝင်စား ခန္ဓာကိုယ် က စစ်မြေပြင်နယ်မြေ အတွင်းရှိ ကျယ်ပြန့်သော ကမ္ဘာ မှ ကျင့်ကြံသူများကို မျိုးတုံး သတ်ဖြတ်ပြီးလေပြီ။ ကျင့်ကြံသူ များ၏ အသက်ဝိညာဉ် အမှတ်အသား အမြောက်အမြား ကိုလည်း ပြန်လည် ပေးပို့ ထားပြီး ဖြစ်သည်။

နင်ချီ ၏ ပင်မ ခန္ဓာကိုယ်သည် ထို အသက်ဝိညာဉ် အမှတ်အသားများကို ခွဲခြမ်းစိတ်ဖြာ လေ့လာခြင်း ဖြင့်... ကျယ်ပြန့်သော ကမ္ဘာ ၏ ဟင်းလင်းပြင် နယ်နိမိတ် အမှတ်များကို တိုက်ရိုက် ရှာဖွေ တွက်ချက် နိုင်စွမ်း ရှိ၏။

သို့သော်... အစစ်အမှန်သိုင်းကမ္ဘာ နှင့် ကျယ်ပြန့်သော ကမ္ဘာ အကြားရှိ နယ်နိမိတ် အတားအဆီးများကို ချိုးဖျက်ပြီး အစစ်အမှန်သိုင်းကမ္ဘာ နှင့် တောင်နှင့် ပင်လယ် ကမ္ဘာ အကြား ရှိသည့် ဆက်သွယ်မှု မျိုး အလားတူ တစ်ခု ကို တည်ဆောက်ရန် ဟူသော... အခက်အခဲကြီး တစ်ခု ကတော့ ရှိနေဆဲ ပင်။

စစ်မြေပြင်နယ်မြေ နှင့် မတူညီဘဲ... ကျယ်ပြန့်သော ကမ္ဘာ ၏ နယ်နိမိတ် နံရံ များမှာ အဆပေါင်းများစွာ ပိုမို ခိုင်မာ တောင့်တင်း လှ၏။

ထို့ကြောင့် နင်ချီ အနေဖြင့်... ကျယ်ပြန့်သော ကမ္ဘာ သို့ တိုက်ရိုက် ရောက်ရှိနိုင်မည့် လျှို့ဝှက် လမ်းကြောင်း တစ်ခု ကို မဖြစ်မနေ တည်ဆောက်ရန် လိုအပ်သည်။

ကမ္ဘာ့အရှင်သခင် နင်ချီသည် စစ်မြေပြင်နယ်မြေ တစ်ခုလုံး ကို စူးစိုက် ကြည့်ရှုနေပြီး... ထိုအထဲတွင် ဖြစ်ပျက်နေသမျှ အရာအားလုံး ကို ကိုယ်တိုင် ကိုယ်ကျ ရောက်ရှိနေသည့်အလား ရှင်းလင်းစွာ မြင်တွေ့နေရ၏။

‘ဒီ ကိစ္စ အတွက် ကတော့ ငါ ဘာမှ တတ်နိုင်တာ မဟုတ်ဘူးလေ... ဘယ်လိုပဲ ဖြစ်ဖြစ် ငါက ဝင်စား ခန္ဓာကိုယ် ရဲ့ အာရုံခံစားမှု တွေကို မျှဝေ ခံစား နိုင်တယ် မဟုတ်လား’

သူတော်စင် ဘိုးဘေးကြီး နှင့် ပင်လယ်ဘိုးဘေးကြီး တို့ ၏ အစစ်အမှန် ခန္ဓာကိုယ် များ အချင်းချင်း အသေအလဲ တိုက်ခိုက် နေကြသည်ကို ကြည့်ရင်း... နင်ချီ သိမ်မွေ့စွာ ပြုံးလိုက်မိသည်။

"တောင်းပန်ပါတယ်... ခင်ဗျားတို့ အပေါ် မှာ ကျွန်တော့် ရဲ့ စွမ်းအင် တွေကို အခုချိန်မှာ အာရုံ မစိုက်နိုင်သေးဘူး"

စကားပုံ တစ်ခု ရှိသည် မဟုတ်ပါလော... "သူ က နွားကျောင်းသား... မင်း က ထင်းခုတ်သမား။ မင်း က နွားကျောင်းသား နဲ့ တစ်နေကုန် စကားထိုင်ပြောနေမယ် ဆိုရင်... သူ က နွားကျောင်း ပြီးလို့ အိမ်ပြန်သွားတဲ့ အချိန်ကျရင်၊ မင်း ရဲ့ ထင်း တွေ က ခုတ်လို့ ပြီးဦးမှာ မဟုတ်ဘူး" ဟူ၍။

ဝင်စား ခန္ဓာကိုယ် က အခြေအနေများကို စောင့်ကြည့်ပေး နေပြီ ဆိုမှတော့... သူ၏ ပင်မ ခန္ဓာကိုယ် အနေဖြင့်လည်း... နောက်ဆုံးတွင် ကမ္ဘာ နှစ်ခု ကို သိမ်းပိုက် နိုင်ရန် အတွက် လိုအပ်သော ပြင်ဆင်မှု များ ပြုလုပ်ရာတွင် တစ်ထောင့် တစ်နေရာ ကနေ ပါဝင်သင့်သည် မဟုတ်ပါလော။

နင်ချီ တွင် မကောင်းသော ရည်ရွယ်ချက် လုံးဝ မရှိခဲ့ချေ။ သူ က ဘိုးဘေးကြီး တွေ တိုက်ပွဲ ဖြစ်နေတုန်း၊ ဝိညာဉ်ကမ္ဘာ နှစ်ခု ရဲ့ အခြေစိုက် စခန်း တွေကို ခိုးဝင်ပြီး လုယူ ဖို့လောက်ပဲ ရည်ရွယ်ထားသည်လေ။

နင်ချီ ၏ မျက်နှာပေါ်တွင် "သဘောကောင်းသော" အပြုံး တစ်ခု ပေါ်လွင် နေသော်ငြားလည်း... သူတို့ ရဲ့ အိမ် တွေ အခိုးခံလိုက်ရပြီ ဆိုတာကိုသာ အဲဒီ ဘိုးဘေးကြီး တွေ သိသွားလျှင် သူတို့ ရဲ့ မျက်နှာ တွေ ဘယ်လို ဖြစ်သွားမလဲ ဆိုတာကို တွေးကြည့်၍ ရနိုင်ပါသည်။

အချုပ်အားဖြင့် ဆိုရလျှင်... နင်ချီ ကတော့ ထိုအချိန် ကို အလွန်အမင်း စောင့်မျှော် နေမိတော့၏။

ယခုအခါ... သူ၏ ပထမဆုံး တာဝန် မှာ သူ ရရှိထားသော အသက်ဝိညာဉ် အမှတ်အသားများကို အသုံးပြုကာ အစစ်အမှန်သိုင်းကမ္ဘာ နှင့် ကျယ်ပြန့်သော ကမ္ဘာ အကြား ဆက်သွယ်မှု တစ်ခု ကို တည်ဆောက်ရန် ပင် ဖြစ်သည်။

တကယ်တမ်း တွင်... ဤ အသက်ဝိညာဉ် အမှတ်အသား များမှ တစ်ဆင့်သွားရန်ပင် မလိုအပ်ချေ။

ကျယ်ပြန့်သော ကမ္ဘာ မှ ကျင့်ကြံသူ များ ၏ ပထမဆုံး အသက်ဝိညာဉ် အမှတ်အသား များ စတင် ပေါ်ထွက်လာကတည်းက... နင်ချီ ၏ ပင်မ ခန္ဓာကိုယ်သည် လူဝင်စား နည်းစနစ် ကို အသုံးပြုကာ အစစ်အမှန်သိုင်းကမ္ဘာ မှ ကျင့်ကြံသူ အများအပြား ၏ အသက်ဝိညာဉ် အမှတ်အသားများကို ကျယ်ပြန့်သော ကမ္ဘာ အတွင်းသို့ လူဝင်စား အဖြစ် ပြန်လည် မွေးဖွား စေခဲ့ပြီး ဖြစ်၏။