အခန်း ၂၈၆

286

"ဝါး ဒါ တရုတ်နှစ်သစ်ကူးပွဲတော် ရောက်နေတာလားဟ၊ ငါ အနှစ်သက်ဆုံး ဘလော့ဂါတွေ အကုန်လုံးက တစ်ချိန်တည်းမှာ သူတို့ရဲ့အကြောင်းအရာအသစ်တွေကို တပြိုင်နက်တည်း တင်လိုက်ကြတာပဲ၊ ဗီဒီယိုတွေ အကုန်လိုက်ကြည့်ဖို့တောင် အချိန်မလောက်တော့ဘူး"

"တရုတ်နှစ်သစ်ကူးတော့ မဟုတ်လောက်ပါဘူး၊ ဒါပေမဲ့ ဒါအဖွဲ့လိုက် ပျော်ပွဲစားထွက်ကြတဲ့လှုပ်ရှားမှုတစ်ခုပဲ ဖြစ်ရမယ်၊ တကယ့်ကို ပျော်စရာကြီးနော်၊ မီကောရဲ့ဗီဒီယိုတွေကတစ်ဆင့် ဘလော့ဂါအသစ်တွေ အများကြီးကို ငါ သိခွင့်ရခဲ့တယ်၊ ပြီးတော့ လူတိုင်းရဲ့ အပြန်အလှန် စနောက်နေကြတာတွေက တကယ့်ကို စိတ်ဝင်စားဖို့ကောင်းတယ်၊ ငါလည်း အဲဒီလိုသူငယ်ချင်းမျိုးတွေ လိုချင်မိသား"

"ဝါး ဝိုင်မြည်းစမ်းတဲ့ ဘလော့ဂါအသေးလေးမှာ ဒီလောက်တောင်ဖော်လိုဝါတွေ အများကြီးရှိလိမ့်မယ်လို့ တကယ်ကို ထင်မထားမိဘူး"

"ဝိုင်ကျွမ်းကျင်ပညာရှင်ယီကျွေ့ကိုငါမှတ်ထားလိုက်ပြီနော်၊ ငါတို့ရဲ့တာ့ကျင်ကို အစ်ကို့ဆီမှာ ခဏတည်းခိုခွင့်ပြုခဲ့လို့ တကယ်ကို ကျေးဇူးအများကြီးတင်ပါတယ်"

ဟဲယဲ့တည်းခိုခန်းမှ ထွက်ခွာလာကြပြီးနောက်တွင် ဘလော့ဂါများသည် သူတို့ဗီဒီယိုများကို အလျင်အမြန်ပင် တည်းဖြတ်ကြပြီး ဗီဒီယိုပလက်ဖောင်းပေါ်သို့ အပြိုင်အဆိုင်တင်လိုက်ကြတော့သည်။ ဘလော့ဂါဆယ်ဂဏန်းထက်မကသော လူအုပ်စုကြီးသည် တစ်နေရာတည်းသို့ အတူတကွသွားရောက်လည်ပတ်ကြသည်ဟူသော အချက်မှာ အလွန်ပင်မြင်တွေ့ရခဲလှသည့်ကိစ္စတစ်ခုဖြစ်ပေ၏။ ထို့အပြင် မကြာသေးမီက ဟဲယဲ့တည်းခိုခန်းရရှိခဲ့သော Michelin ကြယ်ပွင့်အဆင့်သတ်မှတ်ချက်နှင့် လက်ရှိ ရေပန်းစားနေမှုတို့ကြောင့်ပင် ဘလော့ဂါများ၏ ဗီဒီယိုများသည် ဗီဒီယိုပလက်ဖောင်းပေါ်၌ အလျင်အမြန်ပင် ခေတ်ရေစီးကြောင်းအတိုင်း နာမည်ကြီးလူကြိုက်များ သွားခဲ့ရလေတော့၏။ ထိုသို့ဗီဒီယိုများမှာ အင်တာနက်ပေါ်တွင် တဟုန်ထိုးပျံ့နှံ့ကျော်ကြားသွားသည်ကို မြင်လိုက်ရသောအခါ အခြားဘလော့ဂါများသည်လည်း သဘာဝအတိုင်းပင် ခေတ်ရေစီးကြောင်းကို အမီလိုက်နိုင်ရန်အတွက် ဟဲယဲ့တည်းခိုခန်းဆီသို့ ဦးတည်မည့် အနီးဆုံးရထားလက်မှတ်များကို အပြေးအလွှားဝယ်ယူကြပြီး ဤကျော်ကြားမှုလှိုင်းလုံးကြီးကို စီးနင်းနိုင်ရန် ကြိုးပမ်းကြတော့သည်။

မတူညီသော ဘလော့ဂါအသီးသီးထံမှ တင်ဆက်ထားသည့် ဗီဒီယိုများအကြားတွင် ဟဲယဲ့တည်းခိုခန်း၌ရရှိနိုင်သော သွားရည်ကျစရာအစားအသောက်များအပြင် လူအများအာရုံကို အဖမ်းစားနိုင်ဆုံးအရာမှာ ဧကန်မုချ Holographic ရုပ်ရှင်ရုံပင်ဖြစ်ပေသည်။ အထူးသဖြင့် မီကောတင်လိုက်သော ဗီဒီယိုများထဲတွင်မူ ဘလော့ဂါများမှာ သရဲရုပ်ရှင် ကြည့်ရှုပြီးနောက်ဖြစ်ပေါ်လာကြသည့် ဟာသမြောက်ဖွယ်ရာ တုံ့ပြန်မှုများကို အမိအရရိုက်ကူးပြသထားခဲ့၏။ ဗီဒီယိုထဲတွင် ဘလော့ဂါတာ့ကျင်မှာ တကယ့်ကို အလွန်အမင်းကြောက်ရွံ့သည့်ပုံစံမျိုးဖြစ်နေခဲ့ပြီး ခြေလှမ်းအနည်းငယ် လှမ်းလိုက်တိုင်း သူ့နောက်မှ တစ်စုံတစ်ခုလိုက်လံဖမ်းဆီးနေသကဲ့သို့ မကြာခဏဆိုသလို နောက်သို့ လှည့်လှည့်ကြည့်နေခဲ့ရှာသည်။ စင်္ကြံလမ်းမထက်မှ မည်သည့်ခြေသံမျိုးမဆို သို့မဟုတ် ဝေးလံလှသော နေရာမှ ထွက်ပေါ်လာသည့် အသံလေးတစ်ခုခုကြောင့်ပင် သူ့ရင်ဘတ်ထဲမှ နှလုံးသားမှာ ဒိတ်ခနဲခုန်သွားရပြီး ခြေဦးတည့်ရာသို့ အတင်းထွက်ပြေးမိစေခဲ့၏။ သူ၏ထိတ်လန့်တုန်လှုပ်နေသော အမူအရာနှင့် အလွယ်တကူ ကြောက်လန့်တတ်သော အခြေအနေများမှာ ဗီဒီယိုကြည့်ရှုသူပရိသတ်များအတွက် သဘာဝအတိုင်းပင် ဟာသဖြစ်စရာ အရင်းအမြစ်တစ်ခုဖြစ်လာခဲ့ပြီး ကြည့်ရှုသူများကို အလွန်အမင်း ရယ်မောမဆုံးဖြစ်စေခဲ့တော့သည်။ တာ့ကျင်သည် ဗီဒီယိုကြည့်ရှုသူပရိသတ်များ၏လှောင်ပြောင်သရော်မှုများကို မြင်တွေ့လိုက်ရသောအခါ မခံမရပ်နိုင်ဖြစ်ကာ ဗီဒီယို၏မှတ်ချက်ကဏ္ဍတွင် ဝင်ရောက်၍ မှတ်ချက်တစ်ခုချန်ထားခဲ့လေ၏။

"မင်းတို့လည်း အဲဒါကိုကြည့်ပြီးရင် မကြောက်ဘဲ နေနိုင်မလားဆိုတာကြည့်ကြတာပေါ့"

ထိုအခါ စနောက်လိုသောပရိသတ်တစ်ဦးမှ ပြန်လည်စိန်ခေါ်တုံ့ပြန်လိုက်သည်။

"တကယ်လို့ ငါကမကြောက်ဘူးဆိုရင်ရော"

တာ့ကျင်သည်လည်း သဘာဝအတိုင်း အရှုံးမပေးလိုသဖြင့် ပြန်လည်ကြွေးကြော်လိုက်တော့သည်။

"တကယ်လို့ မင်းသာဒီစိန်ခေါ်မှုကို အောင်မြင်အောင် လုပ်နိုင်မယ်ဆိုရင် ငါ မင်းကို ဆုကြေးငွေယွမ်တစ်သိန်းတိတိ ပေးမယ် "

ယွမ်တစ်သိန်းဆုကြေးငွေပေးအပ်မည်ဟူသော ကြေညာချက်ထွက်ပေါ်လာခြင်းသည် ချက်ချင်းပင် အင်တာနက် လူမှုကွန်ရက်ပေါ်တွင် ကြီးမားသော လှုပ်ခတ်မှုတစ်ခုကို ဖြစ်ပွားစေခဲ့တော့သည်။ ဘလော့ဂါတာ့ကျင်ကို ကိုယ်စားပြုထားသည့် အေဂျင်စီ ကုမ္ပဏီသည် ဗီဒီယိုကြည့်ရှုသူ ပရိသတ်များအကြား ထိုအကြောင်းအရာနှင့် ပတ်သက်၍ ဆွေးနွေးမှု အရှိန်အဟုန်မြင့်မားနေသည်ကို မြင်တွေ့လိုက်ရသောအခါ ထိုအခွင့်အရေးကို ချက်ချင်းပင် ဆုပ်ကိုင်လိုက်ပြီး ရဲရင့်သူတို့၏စိန်ခေါ်ပွဲဟူသော Hashtagကို စတင်အသုံးပြုကာ လှုံ့ဆော်မှုများပြုလုပ်ခဲ့၏။ ၎င်းသည် ဆုကြေးငွေယွမ်တစ်သိန်း ပေးအပ်မည့် သာမန်အရပ်သားပြည်သူများအတွက် စိန်ခေါ်ပွဲတစ်ခုအဖြစ် ပေါ်လွင်စေခဲ့ပြီး ကြားရသူတိုင်းအတွက် အလွန်ပင်စိတ်ဝင်စားစရာ ကောင်းလှပေသည်။ အင်တာနက် အသုံးပြုခြင်းကို ဝါသနာပါသူဖြစ်သော ရှောင်ယင်းသည် သဘာဝအတိုင်းပင် ဤရေပန်းစားနေသည့် အကြောင်းအရာကို သတိပြုမိသွားခဲ့ပြီး ဟဲယဲ့တည်းခိုခန်း၏ တရားဝင်အကောင့်ပေါ်တွင် ထိုသတင်းစကားကို ချက်ချင်းမျှဝေလိုက်ကာ ဆုကြေးငွေကိုပါ ထပ်မံဖြည့်စွက်ပေးလိုက်တော့သည်။

"ဟဲယဲ့တည်းခိုခန်းအနေနဲ့ လူတိုင်းရဲ့ တုံ့ပြန်ချက်တွေကို လက်ခံရရှိထားပြီး ဖြစ်ပါတယ်၊ ဒါကြောင့်မို့လို့ ကျွန်မတို့ တည်းခိုခန်းအနေနဲ့ ညစဉ်ညတိုင်း ည (၁၁)နာရီနဲ့ ည (၁၂)နာရီအချိန်တွေမှာ သရဲရုပ်ရှင်ပြသမှုတွေကို ထပ်မံတိုးမြှင့်ပေးသွားမှာဖြစ်ပါတယ်လို့ အသိပေးပါရစေ၊ အခန်းကြိုတင်မှာယူထားဖို့မလိုပါဘူး၊ အောက်မှာဖော်ပြထားတဲ့ ကျူအာကုဒ်ကို စကန်ဖတ်ပြီး စာရင်းသွင်းရုံပါပဲ၊ ဒီရုပ်ရှင်ပြသမှုတွေဟာ တစ်လတိတိကြာမြင့်မှာဖြစ်ပြီး ရဲရင့်တဲ့ စိတ်ဝိညာဉ်ပိုင်ရှင်အားလုံး စိန်ခေါ်မှုကိုလာရောက် ရင်ဆိုင်ဖို့ဖိတ်ခေါ်ပါတယ်နော်၊ ကျွန်မတို့အနေနဲ့ ရုပ်ရှင်ပြသမှုအကြိမ်တိုင်းကနေ ကံထူးရှင်တစ်ဦးစီကိုလည်း ရွေးချယ်ပေးသွားမှာဖြစ်ပြီး သူတို့ကို အပန်းပြေစားသောက်စရာ လက်ဆောင်အိတ်တွေကိုလည်း ပေးအပ်ချီးမြှင့်သွားမှာဖြစ်ပါတယ်"

တည်းခိုခန်း၏တရားဝင်ပါဝင်ပတ်သက်လာမှုနှင့်အတူ ဤသာမန်ပြည်သူများ၏ လှုပ်ရှားမှုအဆင့်မျှသာ ရှိသောပွဲလေးသည် ပိုမို၍ပင်လူကြိုက်များရေပန်းစားလာခဲ့ပြီး ဟဲယဲ့တည်းခိုခန်းသည်လည်း သူတို့နယ်ပယ်ချဲ့ထွင်နိုင်စွမ်းကို အပြည့်အဝတိုးမြှင့်နိုင်ခဲ့တော့သည်။ ယခုအခါတွင် အစားအသောက်ဝါသနာအိုးများသာမကဘဲ စိန်ခေါ်မှုအစီအစဉ်ပြုလုပ်သူများ၊ လူနေမှုဘဝပုံစံပြဘလော့ဂါများနှင့် ရုပ်ရှင်နှင့် ဗီဒီယိုကဏ္ဍများမှ ဘလော့ဂါများသည်လည်း ဤနေရာသို့ ဆွဲဆောင်ခြင်းခံခဲ့ကြရ၏။ အထူးသဖြင့် ထိတ်လန့်ခြောက်ခြားဖွယ်ရာဂိမ်းများကို ထုတ်လွှင့်ပြသတတ်သောဂိမ်းတင်ဆက်သူများမှာမူ ဤမျှလောက် ကောင်းမွန်လှသော အကြောင်းအရာများကို လက်လွှတ်မခံနိုင်ကြသဖြင့် ပါဝင်ရန်အတွက် အလုအယက် စာရင်းပေးသွင်းနေကြတော့သည်။

ဂိမ်းဆော့ရသည်ကို အလွန်ရူးသွပ်သူဖြစ်သော ရှောင်ရွှီသည် သူအနှစ်သက်ဆုံးဘလော့ဂါပါ ဤပွဲ၌ပါဝင်ရန် စာရင်းသွင်းထားသည်ကို မြင်လိုက်ရသောအခါ အလွန်အမင်းစိတ်လှုပ်ရှား ဝမ်းသာသွားခဲ့ရသည်။ သူသည် ထိုနေရာသို့ ချက်ချင်းပျံသန်းသွားပြီး ဘေးမှနေ၍ စောင့်ကြည့်အားပေးချင်စိတ်များ တားမရဆီးမရဖြစ်ပေါ်လာခဲ့၏။ သူသည် ဟဲယဲ့တည်းခိုခန်း၏ တည်နေရာလိပ်စာကို ကြည့်ရှုလိုက်ပြီး အံ့ဩတကြီးဖြင့် အော်ဟစ်လိုက်မိသည်။

"ယုံမြစ်လား"

သူ့ဖခင်ဖြစ်သူမှာ ယုံမြစ်သို့ အစည်းအဝေးတက်ရောက်ရန် သွားရောက်မည်ဖြစ်ကြောင်းနှင့် ကြယ်ခြောက်ပွင့်အဆင့်ရှိဟိုတယ်တစ်ခုတွင် တည်းခိုမည်ဖြစ်ကြောင်းပြောဆိုခဲ့သည်ကို သူပြန်လည်သတိရသွားခဲ့သည်။ ဟဲယဲ့တည်းခိုခန်းမှာ ဤမျှလောက်အထိ လူကြိုက်များနေပြီး Michelinအဆင့်သတ်မှတ်ချက်ကိုလည်းရရှိထားသဖြင့် သူ့ဖခင်တည်းခိုမည့်ဟိုတယ်မှာ ဤတည်းခိုခန်းဖြစ်ရမည်ဟု သူတွေးတောလိုက်မိသည်။ ရှောင်ရွှီသည် သူ့ကွန်ပျူတာကို လက်မှ ကိုင်ဆောင်လျက် ခြေသံပြင်းပြင်းဖြင့် သူ့ဖခင်ရှိရာသို့ အပြေးအလွှားသွားခဲ့သည်။

"အဖေ အဖေ ယုံမြစ်ကိုအလုပ်ကိစ္စနဲ့ ခရီးသွားမယ်လို့ ပြောတယ်မလား၊ သားပါလိုက်ခဲ့လို့ရမလား"

မစ္စတာရွှီသည် ရှောင်ရွှီကိုဝမ်းသာအားရဖြင့် ပွေ့ချီလိုက်သည်။ သူသည် ပုံမှန်အားဖြင့် အလုပ်ကိစ္စများဖြင့်သာ အမြဲတမ်းအလုပ်ရှုပ်နေတတ်သော စီးပွားရေးလုပ်ငန်းရှင်တစ်ဦးဖြစ်သဖြင့် သူ့ကလေးနှင့်အတူ အချိန်ဖြုန်းရန်အတွက် အချိန်များစွာမရှိရှာပေ။ သဘာဝအတိုင်းပင် သူသည် ဤအလုပ်ကိစ္စခရီးစဉ်အတွင်း သူ့သားဖြစ်သူကို အတူတူခေါ်သွားချင်မိသည်။

"ရတာပေါ့ ယုံမြစ်ပဲလေ၊ အဖေကယုံမြစ်ကို ယဉ်ကျေးမှုနဲ့ ခရီးသွားလာရေး နှီးနှောဖလှယ်ပွဲတက်ဖို့သွားမှာ၊ တစ်ပတ်လောက်ကြာလိမ့်မယ်၊ သားလိုက်ခဲ့လို့ ရတာပေါ့ ဒါပေမဲ့ သားပျင်းလာတယ်ဆိုရင်တော့ စောစောစီးစီးပြန်လာလို့ မရဘူးနော်၊ ခရီးစဉ်တစ်ခုလုံး ဟိုတယ်ထဲမှာပဲနေရမှာ"

ရှောင်ရွှီသည် တစ်နေ့လုံးဗီဒီယိုများကို ကြည့်ရှုလေ့ရှိသဖြင့် ဟဲယဲ့တည်းခိုခန်းအကြောင်းကို အတော်အတန် ကောင်းမွန်စွာနားလည်သဘောပေါက်ထားပြီးဖြစ်ကာ သူ့စိတ်ကိုလည်း ပြတ်ပြတ်သားသားဆုံးဖြတ်ထားပြီးဖြစ်သည်။ သူသည် ဟဲယဲ့တည်းခိုခန်းသို့ သွားရောက်ကာ 'ရဲရင့်သူတို့၏ စိန်ခေါ်ပွဲ'တွင် ပါဝင်ဆင်နွှဲချင်သည်။ အရသာရှိလှသော မုန့်များကိုစားသောက်ချင်သည်။ ထိုက်ချီသိုင်းပညာကို သင်ယူချင်သည်။ ပြီးတော့ သူ့ဖခင်အတွက် ဆံပင်ပေါက်ဆေး ခေါင်းလျှော်ရည်ကိုလည်း ဝယ်ယူအသုံးပြုစေချင်သေးသည်။ အကြောင်းမူကား သူ့ဖခင်ဖြစ်သူ၏ဆံပင်များမှာ တဖြည်းဖြည်းနှင့် ပိုမိုပါးလွှာလာနေသောကြောင့်ဖြစ်၏။ သူ ခေါင်းကိုညိတ်ရင်းပြောလိုက်သည်။

"လုံးဝမပျင်းပါဘူး အဖေရဲ့၊ ဟဲယဲ့တည်းခိုခန်းက တကယ့်ကိုပျော်စရာကြီး"

"ဟဲယဲ့တည်းခိုခန်း ဟုတ်လား"

မစ္စတာရွှီသည် သူ့ပြောင်သလင်းခါနေသော ဦးခေါင်းကို လက်ဖြင့်ပွတ်သပ်လိုက်သည်။ ဤနေရာမှာ သူ့သားဖြစ်သူ သွားချင်နေသည့် နေရာဖြစ်နေ၍လား။ မစ္စတာရွှီသည် စိတ်ထဲတွင် အနည်းငယ် ဇဝေဇဝါဖြစ်သွားခဲ့သော်လည်း သူ့သားဖြစ်သူ၏ဆန္ဒကို ဖြည့်ဆည်းပေးရန် လိုလားနေဆဲဖြစ်သဖြင့် ပြောလိုက်သည်။

"ကောင်းပြီလေ၊ အဖေ အစည်းအဝေး ပြီးသွားတာနဲ့ သားကိုဟဲယဲ့တည်းခိုခန်းဆီ ခေါ်သွားပေးမယ်။"

ရှောင်ရွှီမှာမူ စိတ်ရှုပ်ထွေးသွားရပြီး မေးလိုက်မိသည်။

"အဖေ အဖေ ယုံမြစ်ကိုသွားရင် ဟဲယဲ့တည်းခိုခန်းမှာတည်းမှာမဟုတ်ဘူးလား"

မစ္စတာရွှီ ခေါင်းကိုခါယမ်းပြီး ငြင်းဆိုလိုက်သည်။

"မဟုတ်ဘူး အရင်နှစ်ရက်လောက်ကတင် ပွဲစီစဉ်သူတွေဘက်ကနေ အဖေတို့ တည်းခိုမယ့်နေရာက ကြယ်ခြောက်ပွင့်အဆင့်ရှိတဲ့ ဟိုင်ဖန်းဟိုတယ်လို့ တရားဝင် ကြေညာလိုက်ပြီ “