အခန်း ၁၇၂

အခန်း။ ၁၇၂

နံနက် ၁၀ နာရီ။

လူအားလုံး တရားခွင်အတွင်း နေရာယူပြီးပြီ ဖြစ်သည်။

တရားရုံးမှတ်တမ်းတင်သူက မတ်တပ်ရပ်လိုက်သည်။

တိုက်ရိုက်ထုတ်လွှင့်မှုကို ကြည့်ရှုသူဦးရေမှာလည်း တစ်သောင်းကျော်အထိ ရှိနေပြီဖြစ်ရာ စိတ်ဝင်စားမှု မြင့်မားလျက်ရှိသည်။

တရားခွင် စတင်တော့မည်ပင်။

"အားလုံး မတ်တပ်ရပ်ပေးကြပါ"

တရားရုံးမှတ်တမ်းတင်သူက ကြေညာလိုက်ရာ တရားခွင်အတွင်းရှိသူများ အားလုံး မတ်တပ်ရပ်လိုက်ကြသည်။

"တရားသူကြီးချုပ်နှင့် တရားသူကြီးများ နေရာယူရန်အတွက် ကြိုဆိုကြပါ"

လူတိုင်း၏ အကြည့်အောက်တွင် တရားသူကြီးချုပ် ဝမ်ကျုံးနှင့် တရားသူကြီးများဖြစ်ကြသော တင်ရှန်းလင်း၊ ချန်ရွှယ်ကျွင်းနှင့် ဟဲယုရှူးတို့ တရားခွင်သို့ ဝင်ရောက်လာကြသည်။ တရားသူကြီးချုပ် ဝမ်ကျုံးက အားလုံးကို တစ်ချက်ကြည့်လိုက်ပြီးနောက် တူကို ရိုက်ကာ "နေရာယူကြပါ" ဟု ပြောလိုက်သည်။

ထို့နောက် မှတ်တမ်းတင်သူက တရားရုံး၏ စည်းကမ်းချက်များကို ကြေညာသည်။

"တရားခွင်အတွင်း ပါဝင်သူများအားလုံး တရားရုံးစည်းကမ်းကို တိကျစွာ လိုက်နာရမှာ ဖြစ်ပြီး ဆူညံမှုတွေ လုံးဝမပြုလုပ်ရပါဘူး။ ပြောဆိုတာ၊ ထွက်ဆိုတာနဲ့ ဆွေးနွေးငြင်းခုံခြင်း အားလုံးကို တရားသူကြီးချုပ်ရဲ့ ခွင့်ပြုချက်ရမှသာ ပြုလုပ်ရပါမယ်"

"ဆက်လက်ပြီး လာရောက်စောင့်ကြည့်နားထောင်သူတွေအနေနဲ့ အောက်ပါစည်းကမ်းချက်တွေကို လိုက်နာပေးကြရပါမယ်။

ပထမအချက်... တရားရုံးလုပ်ငန်းစဉ်တွေကို အသံဖမ်းတာ၊ ဗီဒီယိုရိုက်ကူးတာ၊ ဓာတ်ပုံရိုက်တာ ဒါမှမဟုတ် မိုဘိုင်းဖုန်းတွေကတစ်ဆင့် အပြင်ကို လွှဲပြောင်းပေးပို့တာမျိုး လုံးဝမပြုလုပ်ရပါဘူး။

ဒုတိယအချက်... တရားခွင်အတွင်း ဘယ်သူမှ သဘောအလျောက် ထိုင်ရာကထပြီး လှုပ်ရှားသွားလာခြင်း မပြုရပါဘူး။

တတိယအချက်... ခွင့်ပြုချက်မရှိဘဲ ဝင်ရောက်ပြောဆို မေးမြန်းခြင်းကို တားမြစ်ပါတယ်။ စတုတ္ထအချက်... လက်ခုပ်တီးတာ၊ ဆူညံတာနဲ့ တရားရုံးလုပ်ငန်းစဉ်ကို အနှောင့်အယှက်ဖြစ်စေမယ့် အခြားအပြုအမူမျိုးတွေကို လုံးဝခွင့်မပြုပါဘူး"

မှတ်တမ်းတင်သူက တရားသူကြီးချုပ်ကို ကြည့်ကာ "တရားသူကြီးချုပ်ခင်ဗျား တရားလို ရွီမော်ဘဏ်နှင့် တရားခံ ကျောက်ရိရှန်းတို့ကို စစ်ဆေးပြီးပါပြီ။

တရားခွင် စတင်ဖို့ အသင့်ဖြစ်ပါပြီ" ဟု တင်ပြသည်။

တရားသူကြီးချုပ် ဝမ်ကျုံး "ဒီအမှုကို အခုပဲ တရားဝင် စတင်လိုက်ပါပြီ"

တရားသူကြီးချုပ် ဝမ်ကျုံး "မူလတရားခံ ကျောက်ရိရှန်းက ကျန်းချန်မြို့ အလယ်အလတ်တရားရုံးရဲ့ အမှတ်စဉ် ၂၃၄ တရားစီရင်ချက်အပေါ် မကျေနပ်လို့ ဒီတရားရုံးကို အယူခံဝင်ထားတာပါ။ ရာဇဝတ်မှုဆိုင်ရာ တရားစီရင်ရေးဥပဒေနဲ့ သက်ဆိုင်ရာ ဥပဒေပြဋ္ဌာန်းချက်များအရ ဒီအမှုကို လူသိရှင်ကြား ကြားနာစစ်ဆေးသွားမှာ ဖြစ်ကြောင်း ကြေညာအပ်ပါတယ်"

"အခု... တရားခံဘက်ကနေ အယူခံဝင်ရတဲ့ အချက်အလက်တွေနဲ့ အကြောင်းရင်းတွေကို တင်ပြပေးပါ"

တရားခွင် စတင်လိုက်ပြီ ဖြစ်သည်။

ဖန်တရှေ့နေရုံးခန်း၌ ကောင်းရုန်၊ သခင်လေးရွှယ်နှင့် ဒါရိုက်တာ ရွှယ်ယောင်ထင်းတို့က တရားခွင်ကို စောင့်ကြည့်နေကြသည်။

ကောင်းရုန်နှင့် သခင်လေးရွှယ်တို့သည် ယနေ့ အားလပ်နေသဖြင့် တိုက်ရိုက်ထုတ်လွှင့်မှုကို ကြည့်ရှုခြင်းပင်။

ဂူချန်၏ အမှုလိုက်နိုင်စွမ်းကို ကောင်းရုန် သိရှိထားသော်လည်း ဤအမှုမှာ အထောက်အထား ခိုင်လုံလွန်းနေသည့်အတွက် အလွန်ခက်ခဲလိမ့်မည်ဟု ယူဆထားသည်။

"ဒီအမှုက အရမ်း ရှုပ်ထွေးတယ်။ ဂူချန်အနေနဲ့ ကျောက်ရိရှန်းကို ပြစ်ဒဏ်လျှော့ပေါ့ပေးဖို့ပဲ ကြိုးစားနိုင်မှာပါ။ သူက ပြစ်မှုမှာ အပေါင်းအပါ ဖြစ်နေတာကိုး။ အနည်းဆုံး ၇ နှစ်လောက်တော့ ချမှတ်ခံရမှာ သေချာတယ်"

သခင်လေးရွှယ်က သုံးသပ်သည်။

ကောင်းရုန်ကလည်း ခေါင်းညိတ်လိုက်သည်။

"ကျွန်တော်လည်း အဲဒီလိုပဲ ထင်တယ်။ ပထမအဆင့်မှာ ၁၅ နှစ် ချမှတ်ထားတာကို ၇ နှစ်အထိ လျှော့ချနိုင်ရင်ကိုပဲ ဂူချန်အတွက် အောင်မြင်မှုတစ်ခု ဖြစ်နေမှာပါ။ ဘဏ်ကို လုယက်တဲ့သဘောမျိုး ဖြစ်နေတော့ ဒီထက်တော့ လျှော့ဖို့ မဖြစ်နိုင်တော့ပါဘူး" ဟု ထောက်ခံကာ ပြောလိုက်သည်။

သူတို့နှစ်ယောက် စကားပြောနေစဉ်တွင် ရွှယ်ယောင်ထင်းက လက်ဖက်ရည်တစ်ငုံသောက်လိုက်ပြီး လက်ဖက်ရည်ခွက်ကို စားပွဲပေါ်သို့ ဖြည်းညှင်းစွာ ချလိုက်သည်။

ရွှယ်ယောင်ထင်းက "မနေ့ညက ငါ့မြေးမနဲ့ စကားပြောဖြစ်တယ်" ဟု ပြောလိုက်သည်။ ကောင်းရုန်နှင့် သခင်လေးရွှယ်တို့နှစ်ယောက်လုံး ရွှယ်ယောင်ထင်းထံသို့ ချက်ချင်း အကြည့်ရောက်သွားကြသည်။

ရွှယ်ယောင်ထင်းက အေးဆေးစွာပင် "ငါ့မြေးမလေး ပြောပြတာကတော့ ဂူချန်က ဒီအမှုမှာ ကျောက်ရိရှန်းအတွက် အပြစ်မရှိကြောင်းလျှောက်လဲပေးဖို့ ပြင်ဆင်နေတယ်တဲ့" ဟု ပြောသည်။

သခင်လေးရွှယ် "……"

ကောင်းရုန် "….."

အပြစ်မရှိကြောင်း လျှောက်လဲမယ် ဘယ်လိုလုပ် ဖြစ်နိုင်မှာလဲ။

ကျောက်ရိရှန်းက လုယက်သူတွေရဲ့ အပေါင်းအပါ ဖြစ်နေတာကို။

ကိုယ်တိုင် မလုယက်ရင်တောင် အပေါင်းအပါအဖြစ် ပါဝင်နေတာက ပြစ်မှုတစ်ခုပဲလေ။

သူ့အဖေဆေးကုဖို့ပဲ ဖြစ်ဖြစ်၊ ဘာအကြောင်းပြချက်ပဲ ရှိရှိ၊ သူက လုယက်မှုမှာ ပူးပေါင်းပါဝင်နေတာပဲ။

ဘဏ်ပိုင်ဆိုင်မှုကို ခိုးယူပြီး လွှဲပြောင်းတာက ပြစ်မှုမြောက်ပါတယ်။

"အပြစ်မရှိကြောင်း လျှောက်လဲမယ် ဘယ်လိုလုပ် ဖြစ်နိုင်မှာလဲ"

သခင်လေးရွှယ်က မယုံနိုင်စွာဖြင့် ခေါင်းခါသည်။

"မဖြစ်နိုင်ဘူး လုံးဝ မဖြစ်နိုင်ဘူး ဘယ်ရှေ့နေကများ ဒီလိုအမှုမှာ အပြစ်မရှိကြောင်း လျှောက်လဲပေးရဲမှာလဲ။ ဂူချန်သာ ဒီအမှုမှာ အပြစ်မရှိကြောင်း လျှောက်လဲနိုင်ရင် တကယ့်ကို ထူးဆန်းလွန်းပြီး ငါတောင် သူ့ဆီက သင်ယူရလိမ့်မယ်။ ဒါက တကယ့်ကို အမှုကြီးပါပဲ"

ကောင်းရုန်ကလည်း "ကျွန်တော်လည်း အဲဒီအတိုင်းပဲ ထင်တယ်။ အပြစ်မရှိကြောင်း လျှောက်လဲဖို့ဆိုတာ မဖြစ်နိုင်ပါဘူး" ဟု ထောက်ခံသည်။

တိုက်ရိုက်ထုတ်လွှင့်မှုရှိ ပရိသတ်များအကြားမှာလည်း မှတ်ချက်များဖြင့် ဆူညံလျက် ရှိသည်။

[ဒီအမှုကတော့ အနိုင်ရဖို့ အရမ်းခက်ခဲပုံပဲ]

[တစ်ဖက်က ရွီမော်ဘဏ် သူတို့ရဲ့ ဥပဒေဌာနက အရမ်း တောင့်တာ]

[ရှေ့နေဂူ ဒီအမှုကို ကိုင်တွယ်နိုင်ပါ့မလား]

[အမှုက ဘယ်မှ မရောက်နိုင်ပါဘူး။ ကျောက်ရိရှန်းရဲ့ ပြစ်ဒဏ် လျှော့ချပေးနိုင်ရင်ပဲ ကျေးဇူးတင်ရမှာ။ ဘယ်လောက် လျှော့ပေးနိုင်မလဲပဲ ကြည့်ရမှာပေါ့]

[ပြစ်ဒဏ် လျှော့ပေးဖို့တောင် ခက်မယ် ထင်တယ်။ သူက လုယက်မှုမှာ အပေါင်းအပါလေ။ သူ မလုရင်တောင် အပေါင်းအပါ ဖြစ်နေတာက ပြစ်မှုပဲ မဟုတ်လား]

[ကျောက်ရိရှန်းကတော့ လမ်းဆုံးရောက်နေပြီ။ ရှေ့နေဂူရဲ့ နာမည်ကြောင့်ပဲ ငှားလိုက်တာနေမှာ။ သူ့မိသားစုလည်း အများကြီး အကုန်အကျခံထားရမှာပဲ]

[အဲ့ဒီတော့ ဥပဒေမဲ့မိုက်ရူးရဲတောင် မကူညီနိုင်လောက်ဘူး။ ဂူချန်က ဘာလို့ ဒီအမှုကို လက်ခံတာလဲ ပိုက်ဆံအတွက်လား]

[ဘယ်ရှေ့နေမဆို ပိုက်ဆံအတွက်ပဲ လက်ခံတာပေါ့။ ဒါပေမဲ့ ဒီအမှုက ဘယ်သူမှ မကိုင်တွယ်နိုင်ဘူး။ ဥပဒေအတိုင်း ပြောရရင် ကျောက်ရိရှန်းက ပြစ်မှု ကျူးလွန်ထားတာလေ]

ရွီမော်ဘဏ်၌ ဘဏ်ဥက္ကဋ္ဌ ဝမ်ရွေသည် ရုံးခန်းအတွင်း တိုက်ရိုက်ထုတ်လွှင့်မှုကို ကြည့်နေသည်။

ဥပဒေရေးရာဌာနမှူး ကျန်းဟုန်ရှန်းလည်း ဘေးတွင် ရှိနေသည်။

ဝမ်ရွေက တည်ကြည်သော မျက်နှာဖြင့် "ကြည့်ရှုသူ တစ်သိန်းကျော်သွားပြီ ဒီအမှုမှာ ငါတို့ မဖြစ်မနေ အနိုင်ရရမယ်" ဟု ပြောသည်။

ကျန်းဟုန်ရှန်းက ယုံကြည်မှုအပြည့်ဖြင့် ပြုံးလျက် "စိတ်ချပါ ဥက္ကဋ္ဌ ဒီအမှုမှာ ရှုံးဖို့ အကြောင်းမရှိပါဘူး။ ကျောက်ရိရှန်းက လုယက်သူ ကျွန်တော်တို့က နစ်နာသူပဲ။ ကျွန်တော်တို့ဘက်က ဘာအမှားမှ မရှိဘူး။ အနိုင်ရရုံတင်မကဘူး ကျောက်ရိရှန်းရဲ့ ပြစ်ဒဏ်ကို ပိုတိုးအောင် လုပ်ဖို့ပါပဲ" ဟု ပြန်ဖြေသည်။

တစ်နိုင်ငံလုံးက စောင့်ကြည့်နေသည့် ဤအမှုတွင် အကယ်၍သာ ဘဏ်ရှုံးနိမ့်ခဲ့ပါက ဖြစ်ပေါ်လာမည့် လူထုတုံ့ပြန်မှုမှာ ခန့်မှန်းရခက်လှသည်။

တရားသူကြီးချုပ် ဝမ်ကျုံးက "အခု တရားလိုဘက်မှ အမှုအကြောင်းအရာများနှင့် အယူခံဝင်ရသည့် အကြောင်းရင်းများကို တင်ပြပေးပါ" ဟု ပြောလိုက်သည်။

ထိုအချိန်တွင် ဂူချန်က မတ်တပ်ရပ်လိုက်သည်။

ဂူချန်က "ကျွန်တော့်အမှုသည်ရဲ့ ထွက်ဆိုချက်အရ ဘဏ်လုယက်မှု ဖြစ်ပွားခဲ့တဲ့နေ့က ဖြစ်ပျက်ခဲ့တဲ့ အကြောင်းအရာတွေကို ကျွန်တော် နောက်တစ်ခေါက်လောက် ပြန်တင်ပြပါရစေ" ဟု ပြောလိုက်သည်။