အခန်း ၁၇၆

အခန်း။ ၁၇၆

"တရားသူကြီးချုပ်ခင်ဗျား ကျွန်တော့်ရဲ့ လျှောက်လဲချက် ပြီးဆုံးပါပြီ"

ဂူချန်၏ စကားအပြီးတွင် တရားခွင်တစ်ခုလုံးမှာ တုန်လှုပ်ချောက်ချားသွားသည်။

တရားရုံးအတွင်းရှိ လူအများမှာလည်း ပွက်လောရိုက်သွားကြသည်။

အင်တာနက်ပေါ်မှ တိုက်ရိုက်ထုတ်လွှင့်မှုကို ကြည့်ရှုနေသူများမှာလည်း အံ့အားသင့်လွန်၍ ပါးစပ်အဟောင်းသား ဖြစ်သွားကြသည်။

[သောက်ကျိုးနည်း တကယ်လား]

[ရှေ့နေဂူကတော့ တကယ့်ကို အံ့ဩစရာပဲ]

[ဒီအတိုင်းဆိုရင် ကျောက်ရိရှန်းက အပြစ်မရှိဘူးဆိုတာ သေချာသွားပြီပေါ့]

[ကျောက်ရိရှန်းက အပြစ်မရှိဘူးလား။ ရှေ့နေဂူက တကယ်ပဲ အပြစ်မရှိကြောင်း လျှောက်လဲလိုက်တာလား မယုံနိုင်စရာပဲ။ တကယ့်ကို မယုံနိုင်စရာပဲ]

[တကယ်လို့ ကျောက်ရိရှန်းသာ အပြစ်မရှိဘူးဆိုရင် ရှေ့နေဂူရဲ့ ခုခံချေပပုံက တကယ့်ကို အံ့မခန်းပဲ]

[ဒါကြောင့်မို့လို့ ရှေ့နေဂူကို ဥပဒေမဲ့မိုက်ရူးရဲလို့ ခေါ်တာပေါ့]

လုယက်သူတွေကို မသိကျွမ်းကြောင်း သက်သေပြနိုင်လိုက်သည့်အတွက် သူသည် အပြစ်မရှိသူ ဖြစ်သွားခဲ့ကာ ကောင်တာကို ထုရိုက်မိခဲ့သည့်အတွက် လျော်ကြေးပေးရုံဖြင့် အမှုမှာ ပြေလည်သွားနိုင်သည့် အနေအထား ဖြစ်သည်။

တရားခံနေရာတွင် ထိုင်နေသည့် ကျောက်ရိရှန်းမှာ ဂူချန်၏ စကားများကို နားထောင်ရင်း စိတ်ထဲတွင် ရုန်းကန်နေရသည်။

လုယက်သူများနှင့် တိုက်ဆိုင်မှုများစွာ ဖြစ်ပေါ်ခဲ့သည့်အတွက် သူ့အနေဖြင့် ရှင်းပြရန် ခက်ခဲခဲ့သည်။

သူသည် အလွန်ပင် စိတ်ဓာတ်ကျနေခဲ့သော်လည်း ယခုအခါတွင်မူ မျှော်လင့်ချက် ရောင်ခြည်သန်းလာသည်။

ရှေ့နေဂူက... ငါ့အတွက် အပြစ်မရှိကြောင်း လျှောက်လဲပေးနေတာလား...

ငါ တကယ်ပဲ ဒီအမှုကနေ လွတ်မြောက်နိုင်မှာလား...

ထောင်ထဲ မသွားရတော့ဘူးပေါ့...

ငါ တကယ် ထောင်ထဲမသွားချင်ဘူး။

ဘဏ်ရဲ့ မတရားအနိုင်ကျင့်မှုတွေနဲ့ အဓိပ္ပာယ်မရှိတဲ့ စည်းမျဉ်းစနစ်တွေကြောင့်သာ... ငါ ဒီလောက်အထိ အတိဒုက္ခရောက်ပြီး လမ်းပျောက်ခဲ့ရတာ...

လုယက်တဲ့သူတွေ ပေးသွားတဲ့ ပိုက်ဆံက ဘယ်လိုပဲဖြစ်ဖြစ်... ငါက ဒီလုယက်မှုထဲမှာ ပါဝင်ပတ်သက်ခဲ့တာမှ မဟုတ်တာ….

တကယ်လို့သာ... ထောင်ဒဏ်ကနေ ကင်းလွတ်ခွင့်ရမယ်ဆိုရင် ဘယ်လောက်တောင် ကောင်းလိုက်မလဲ...

ဒါက... ဥပဒေမဲ့ရူးသွပ်သူလို့ နာမည်ကြီးတဲ့ ရှေ့နေဂူရဲ့ စွမ်းဆောင်ရည်ပေါ့...

ပထမအဆင့်တရားခွင်တုန်းက ရှေ့နေထက်စာရင်တော့ အဆပေါင်းများစွာကို ပိုပြီး တော်လွန်းပါတယ်။

အခုဆို ရှေ့နေဂူက ငါ့အတွက် အပြစ်မရှိကြောင်း ခိုင်လုံတဲ့ အကြောင်းပြချက်အထောက်အထားတွေနဲ့အတူ တရားဝင် ခုခံချေပပေးနေပြီ...

ဒါမှ... တကယ့် ရှေ့နေအစစ်အမှန်ပဲ……

ပရိသတ်အကြားတွင် ထိုင်နေသော နွီရှကျွမ်းမှာ ဂူချန်ကို ကျေးဇူးတင်သော မျက်လုံးများဖြင့် စိုက်ကြည့်နေသည်။

သူမသည် သားဖြစ်သူ၏ ထောင်ဒဏ်ကို လျှော့ချပေးရန်သာ မျှော်လင့်ခဲ့သော်လည်း ဂူချန်ကမူ သူမသားကို လုံးဝ အပြစ်မရှိသူအဖြစ် လျှောက်လဲပေးလိုက်သည်။

ဒါက ထိပ်တန်းရှေ့နေပဲ။

ညက ဂူချန်၏ တိုက်ရိုက်ထုတ်လွှင့်မှုကို ကြည့်ရှုရင်း သူ့ကို ဆက်သွယ်ရန် နည်းလမ်းရှာခဲ့သည့်အတွက် ယခုအခါတွင်မူ သူမ အလွန်ပင် ဝမ်းသာနေမိသည်။

ရှေ့နေခ ပိုပေးရသည်ဖြစ်စေ သူ၏ စွမ်းရည်မှာ တကယ့်ကို ထိုက်တန်လှသည်။

ပထမအဆင့် ရှေ့နေနှင့် ကွာခြားချက်မှာ ကောင်းကင်နှင့် မြေကြီးပမာပင်။

အကယ်၍ သူမသားသာ အပြစ်မရှိကြောင်း အမိန့်ချမှတ်ခံရပါက မည်သည့်ကုန်ကျစရိတ်ကိုမဆို သူမ ပေးဆပ်ရကျိုးနပ်သည်။

ဘေးတွင် ရှိနေသည့် လက်ထောက် ရွှယ်ချင်းချင်းပင် ဂူချန်၏ ခုခံချေပပုံမှ တစ်ခုခုကို သင်ယူလိုက်ရပြီဟု ခံစားမိလိုက်သည်။

"သူဌေးရဲ့ ခုခံချေပချက်က တကယ့်ကို အံ့မခန်းပဲ"

ထိပ်တန်းရှေ့နေကြီးများပင် ဤသို့သော ခုခံချေပချက်မျိုးကို စဉ်းစားမိကြမည်မဟုတ်ပေ။

ဖန်တရှေ့နေရုံးခန်းအတွင်းတွင် သခင်လေးရွှယ်က "လှလိုက်တဲ့အကွက်… တကယ့်ကို တော်တော်လေးမိုက်တဲ့ အမှုတစ်ခုပဲ" ဟု ချီးကျူးလိုက်သည်။

ကောင်းရုန်ကလည်း အံ့ဩတကြီးဖြင့် "မတူညီတဲ့ ဖြစ်ရပ်တဲ့။ ဟုတ်တယ်။ ဒါတွေက သီးခြားစီ ဖြစ်ပျက်ခဲ့တာပဲ။ ပြီးတော့ ရဲတပ်ဖွဲ့ရဲ့ သက်သေခံချက်လည်း ရှိနေသေးတယ်။ ဘယ်လိုပဲ တွက်ချက်ကြည့်ပါစေ။ ကျောက်ရိရှန်းကို လုယက်မှုနဲ့ စွဲချက်တင်လို့ မရတော့ဘူး" ဟု ပြောလိုက်သည်။

သခင်လေးရွှယ်က "ဟုတ်တယ် ဟုတ်တယ်။ ကျွန်တော့်ရဲ့ ယောက်ဖအဖြစ် ရှေ့နေကြီး ဂူချန်ကို ကျွန်တော် လက်ခံပြီ" ဟု ပြောလိုက်သည်။

ကောင်းရုန် "……."

ခဏလေး ဘယ်အချိန်ကတည်းက ယောက်ဖ ဖြစ်သွားတာလဲ။

ရှေ့ပိုင်းမှာ သခင်လေးရွှယ်က ဂူချန်အပေါ် အမြင်မကြည်လင်ခဲ့ပါဘူး။

ကောင်းရုန်က "သခင်လေးရွှယ် ဂူချန်ကို ယောက်ဖလို့ မခေါ်ခင်မှာ အခြေအနေကို စောင့်ကြည့်ရဦးမယ်လို့ ပြောထားတာ မဟုတ်ဘူးလား။ ဂူချန်ရဲ့ ရုံးခန်းက နိုင်ငံမှာ ထိပ်တန်းစာရင်းဝင်မှလို့ ဆိုခဲ့တာလေ" ဟု မေးသည်။

သခင်လေးရွှယ်က ခေါင်းခါလိုက်ပြီး "အဲဒါကတော့ ပြောရုံသာပါ။ နိုင်ငံမှာ ထိပ်တန်း ရုံးခန်းဆိုတာ လက်ချိုးရေလို့ ရပါတယ်။ တစ်ယောက်ယောက်က ထိပ်တန်းရုံးခန်း တည်ဆောက်ပြီးမှ ကျွန်တော့်ညီမနဲ့ လက်ထပ်ရမယ်ဆိုရင် ကျွန်တော့်ညီမ အပျိုကြီးဖြစ်ဖို့ပဲ ရှိတော့မှာပေါ့" ဟု ပြန်ဖြေသည်။

ကောင်းရုန် "..."

သခင်လေးရွှယ်က ဆက်လက်၍ "ဂူချန်က အမှုတွေကို ကျွမ်းကျွမ်းကျင်ကျင်နဲ့ သေချာ ကိုင်တွယ်တယ်။ အချိန်ရရင် သူ့ရုံးခန်းကို သွားလည်ရမယ်" ဟု ပြောလိုက်သည်။

……

ရွီမော်ဘဏ်ရုံးခန်းတွင်မူ ဥက္ကဋ္ဌဝမ်သည် စားပွဲကို ဒေါသတကြီး ထုလိုက်သည်။

"ဘာတွေဖြစ်နေတာလဲ ရှေ့နေဂူချန်က အရည်အချင်းမရှိတဲ့ အလုပ်သင်တစ်ယောက်ပဲဆို။ အခုတော့ ပထမအဆင့် ရှေ့နေထက် အဆပေါင်းများစွာ ပိုတော်နေပါလား။ ဒီရှေ့နေနှစ်ယောက်ရဲ့ အရည်အချင်းက ကွာခြားချက်က အကြီးကြီးပဲ"

"ဒီအတိုင်းဆိုရင် ကျွန်တော်တို့ ဘဏ်က အမှုရှုံးတော့မှာ မဟုတ်ဘူးလား။

ကျန်းဟုန်ရှန်း ဘယ်ရောက်သွားလဲ။

ဒီကိုခေါ်ခဲ့ အမှုရှုံးတော့မလား၊ ဖြေရှင်းပေးနိုင်လားလို့ မေးလိုက်စမ်း။

တစ်နိုင်ငံလုံးက အွန်လိုင်းကနေ စောင့်ကြည့်နေတာ။

ဘဏ်ရဲ့ ဂုဏ်သိက္ခာကို ဘယ်လိုဆက်လုပ်မလဲ။

ဟိုဘက်က လုယက်သူကို အနိုင်ပေးလိုက်ရမှာလား ဘာတွေလုပ်နေကြတာလဲ ဟမ်"

ဥက္ကဋ္ဌဝမ်က အေးစက်သော လေသံဖြင့် အော်ဟစ်လိုက်သည်။

"ဥက္ကဋ္ဌခင်ဗျား... တစ်ဖက်ရှေ့နေက ဒီလောက်ထိ ထက်မြက်လိမ့်မယ်လို့ မထင်ထားခဲ့မိပါဘူး..."

ကျန်းဟုန်ရှန်းက တုန်လှုပ်စွာ ဖြေကြားသည်။

တကယ်တမ်းမှာ သူက ဥက္ကဋ္ဌကို အစကတည်းက ဂူချန်ဟာ အနိုင်ရနှုန်း ၁၀၀ ရာခိုင်နှုန်း ရှိသူဖြစ်ကြောင်း သတိပေးခဲ့ခြင်းပင်။

ဥက္ကဋ္ဌဝမ်ကိုယ်တိုင်ကသာ ဂူချန်ကို အလုပ်သင်တစ်ယောက်ဟု အထင်သေးကာ လျှော့တွက်ခဲ့ခြင်းပင်။

သို့သော်လည်း ဂူချန်က သူ့ကိုယ်ပိုင် ရှေ့နေရုံးခန်းကို စတင်ဖွင့်လှစ်ထားပြီး ဖြစ်ကြောင်းကိုမူ မည်သူမျှ မသိရှိခဲ့ကြပေ။

"အဲ့ဒါဆို အခု ဘယ်လိုဆက်လုပ်ကြမလဲ။ အကယ်၍သာ ကျွန်တော်တို့ အမှုရှုံးခဲ့ရင် ခင်ဗျားပဲ တာဝန်ယူရမယ်"

ဥက္ကဋ္ဌဝမ်က ပြောသည်။

"ဥက္ကဋ္ဌခင်ဗျား ကျွန်တော်တို့ အမှုရှုံးမယ်လို့ မသေချာသေးပါဘူး"

"ကျွန်တော်တို့ရဲ့ ဥပဒေဌာနရဲ့ စွမ်းဆောင်ရည်ကို ဥက္ကဋ္ဌ သိပြီးသားပါ။ ကျွန်တော်တို့ဘဏ်ကို အမှုရှုံးအောင်လုပ်ဖို့ဆိုတာ လွယ်တဲ့ကိစ္စမဟုတ်ဘူး။ ဂူချန်ပြောသမျှက အဓိပ္ပာယ်မဲ့စကားသက်သက်ပါပဲ"

ကျန်းဟုန်ရှန်းက ပြန်ဖြေလိုက်သည်။

"ကောင်းပြီ ကျွန်တော် စောင့်ကြည့်နေမယ်။ အကယ်၍သာ ဒီအမှုမှာ ရှုံးခဲ့ရင် ဥပဒေဌာနတစ်ခုလုံး အလုပ်ထွက်ကြတော့"

ဥက္ကဋ္ဌဝမ်က ဒေါသတကြီး ပြောလိုက်သည်။

အကယ်၍သာ ဤအမှုကို တကယ်ရှုံးခဲ့ပါက ရွီမော်ဘဏ်အတွက် ဆုံးရှုံးမှုမှာ အလွန်ကြီးမားမည်ဖြစ်ပြီး ဘဏ်အနေဖြင့် ထိုဆုံးရှုံးမှုကို ခံနိုင်ရည်ရှိမည် မဟုတ်ပေ။

ကျန်းဟုန်ရှန်းက ယုံကြည်မှုရှိရှိဖြင့် "စိတ်မပူပါနဲ့ ဥက္ကဋ္ဌ တစ်ဖက်ရှေ့နေရဲ့ စကားတွေက စကားလုံးသက်သက်ပါ။ သူပြောတိုင်း အမှန်ဖြစ်လာမှာလား ကျွန်တော်တို့မှာ အထောက်အထား အပြည့်အစုံ ရှိထားပြီးသားပါ။ ကျောက်ရိရှန်း လွတ်မသွားစေရပါဘူး" ဟု ပြောလိုက်သည်။

ဥက္ကဋ္ဌဝမ်က "ခင်ဗျားတို့ ဘယ်နည်းလမ်းသုံးသုံး ကျွန်တော် ဂရုမစိုက်ဘူး။ ကျောက်ရိရှန်း ထောင်ကျအောင်လုပ် သူ့ရဲ့ ပြစ်ဒဏ်ကို ပိုတိုးမြှင့်ရမယ် မဟုတ်ရင် ကျွန်တော်တို့ဘဏ်ကို လူတွေက အနိုင်ကျင့်လို့ လွယ်တယ်လို့ ထင်ကုန်မှာပေါ့" ဟု ပြောလိုက်သည်။

ကျန်းဟုန်ရှန်းက "ဟုတ်ကဲ့ ဟုတ်ကဲ့ ဥက္ကဋ္ဌ ပြောတာ မှန်ပါတယ်။ စိတ်မပူပါနဲ့ ကျွန်တော်တို့ ဥပဒေဌာနက ဒီအတိုင်း ထိုင်နေတာ မဟုတ်ပါဘူး။ ဒီနေ့အထိ ကျွန်တော်တို့ ဘယ်အမှုမှာမှ မရှုံးခဲ့ဖူးသလို ဒီအမှုမှာလည်း ရှုံးမှာ မဟုတ်ပါဘူး။ အထူးသဖြင့် ကျွန်တော်တို့မှာ အကြောင်းပြချက် ခိုင်လုံနေတာကို သူက လုယက်မှုရဲ့ အပေါင်းအပါပဲ။ သူ ဘယ်လိုလုပ်ပြီး ပြစ်ဒဏ်မခံဘဲ နေနိုင်မှာလဲ" ဟု ပြောလိုက်သည်။

ဥက္ကဋ္ဌဝမ်က စိုးရိမ်တကြီးဖြင့် "ဒီဂူချန်ဆိုတဲ့လူကို ကျွန်တော် အခုလေးတင် ရှာကြည့်မိတယ်။ သူက တရားသူကြီးနဲ့ ရှေ့နေတွေကိုတောင် ထောင်ကျအောင် လုပ်နိုင်တယ်လို့ ဆိုကြတယ်။ သူ တကယ်ပဲ အဲ့လောက်ထိ အာဏာရှိတာလား" ဟု မေးမြန်းသည်။

ကျန်းဟုန်ရှန်းက ပြုံး၍ "ဥက္ကဋ္ဌ စိတ်မပူပါနဲ့။ အဲ့ဒါက ဟိုရှေ့နေနဲ့ တရားသူကြီးတွေက တကယ်ပဲ ဥပဒေချိုးဖောက်ခဲ့လို့ပါ။ စုံစမ်းလိုက်တဲ့အခါ အမှန်တရားတွေ ပေါ်လာတာပေါ့။ ကျွန်တော်တို့ဘဏ်က ဘာမှ ဥပဒေနဲ့ မညီညွတ်တာ မလုပ်ထားဘူးလေ။ သူ ကျွန်တော်တို့ကို ဘာမှ လုပ်လို့မရပါဘူး။ ဒီအမှုမှာ ကျွန်တော်တို့က နစ်နာသူဘက်က ဖြစ်နေတာမို့ ဘယ်လိုကြည့်ကြည့် ကျွန်တော်တို့ပဲ အနိုင်ရမှာပါ" ဟု ပြန်ဖြေသည်။

ဥက္ကဋ္ဌဝမ်က ခေါင်းညိတ်ပြီး "ကောင်းပြီ အဲ့ဒါမှ စိတ်အေးရတော့မယ်။ ကျွန်တော် တိုက်ရိုက်ထုတ်လွှင့်မှုကို ဆက်ကြည့်နေမယ်။ အကယ်၍သာ အမှုရှုံးခဲ့ရင် ဘဏ်ရဲ့ ဂုဏ်သိက္ခာ ဘယ်လောက်ထိ ကျဆင်းသွားမလဲ စဉ်းစားကြည့်ဦး။ ခင်ဗျားတို့ ဒီကိစ္စတွေကို ဘယ်လို ကိုင်တွယ်နေတာလဲ" ဟု ပြောလိုက်သည်။

ကျန်းဟုန်ရှန်းက အတင်းအဓမ္မ ပြုံးလိုက်ပြီး "ဥက္ကဋ္ဌ စိတ်ချပါ။ တစ်ဖက်ရှေ့နေက ဘာမှ အရေးမစိုက်နိုင်ပါဘူး။ ဒီအမှုအတွက် ကျွန်တော်တို့ ဥပဒေဌာနက တာဝန်ယူပါတယ်။ ကျွန်တော်တို့ အနိုင်ရမှာ အသေအချာပါပဲ ရာနှုန်းပြည့် အနိုင်ရမှာပါ" ဟု အာမခံချက် ပေးလိုက်သည်။