အခန်း ၂၈၆

အခန်း (၂၈၆) နှမြောစရာပဲ၊ သူမက အရမ်းအားနည်းလွန်းနေတယ်

ကျောက်ခွမ်း၏ မျက်နှာအမူအရာက ကြမ်းကြုတ်နေသော်လည်း နန်ကုန်းယွီက မှန်ကန်စွာ ခန့်မှန်းမိသွားသည့်အလား သူ၏ မျက်လုံးများက အနည်းငယ် မှန်းဆရခက်နေသည်။

တစ်ချိန်တည်းမှာပင် တေးဂီတက ဆက်လက်ထွက်ပေါ်နေသော်လည်း ယင်းက တိကျသောအရာတစ်ခုခုဆီသို့ ဦးတည်နေပုံရသည်။

မိုင်တစ်ရာ ပတ်လည်အတွင်း၌ မိစ္ဆာစွမ်းအင်ကို ကျင့်ကြံထားသူများပင် မိစ္ဆာချီ၏ တုန်ခါမှုကို အများဆုံး ခံစားရမည်ဖြစ်ပြီး မိစ္ဆာချီကို သူတို့၏ ခန္ဓာကိုယ်ပေါ်တွင် ပေါ်လာစေရုံသာ ဖြစ်မည်။

သို့ရာတွင် တေးဂီတက အကြီးအကဲ ချင်နှင့် သူ၏အဖွဲ့ဝင် ခုနစ်ဦးကို ပစ်မှတ်ထားနေပုံရပြီး မိစ္ဆာချီကို တုန်ခါစေကာ သူ၏ ကျင့်ကြံမှုအဆင့်ကို မတည်မငြိမ်ဖြစ်စေပြီး သူ၏ ကျင့်စဉ်အဆင့်က စတင်ကျဆင်းလာသည်။

အကြီးအကဲ ချင်က ယင်းကို ခံစားမိပြီး သူ၏မျက်နှာက ထိတ်လန့်မှုကြောင့် ဖြူရော်သွားကာ သူ၏မျက်လုံးများထဲတွင် ပြင်းထန်သော ကြောက်ရွံ့မှုများ ပြည့်နှက်နေသည်။

သို့သော် သူ၏ ကျင့်ကြံမှုကို လျှို့ဝှက်ဆန်းကြယ်သော ဝတ်ရုံနက်ဝတ်လူသားက ပိတ်လှောင်ထားပြီးဖြစ်ရာ သူက သေသည်အထိ တိုက်ခိုက်ချင်လျှင်တောင် ပြုလုပ်ရန် အစွမ်းအစ လုံးဝ မရှိခဲ့ပေ။

သို့သော် ဤအခိုက်အတန့်တွင် ရုတ်တရက် အပြောင်းအလဲတစ်ခု ဖြစ်ပေါ်လာသည်။

ဤကိစ္စပြီးနောက် သူ ထွက်သွားနိုင်သည်ဖြစ်စေ၊ မထွက်သွားနိုင်သည်ဖြစ်စေ သူ၏ကံကြမ္မာကို ကြိုတင်ခန့်မှန်းနိုင်နေပြီဖြစ်ကြောင်း ကျောက်ခွမ်း သိထားပြီး သူ၏မျက်လုံးများထဲတွင် ပြတ်သားသော အလင်းတန်းတစ်ခု လက်ဖြာသွားသည်။

သူက သူ၏ သွေးကြောများ ပျက်စီးသွားမည်ကို လျစ်လျူရှုကာ လှိုင်းထနေသော ဝိညာဉ်စွမ်းအင်များကို အတင်းအကျပ် လည်ပတ်စေပြီး နန်ကုန်းယွီဆီသို့ ခုန်ဝင်သွားကာ အော်ဟစ်လိုက်သည်။

"တကယ်လို့ ငါသေရင်တောင် မင်းကိုပါ အတူတူ ဆွဲခေါ်သွားမယ်!"

"သတိထား!"

ရှန်ကွမ်ယွဲ့ရှီး၏ အမူအရာ ပြောင်းလဲသွားပြီး နန်ကုန်းယွီ၏ရှေ့တွင် ဝင်ရပ်ရန် ပြင်လိုက်သည်။

သို့သော် နန်ကုန်းယွီက သူမထက် ပိုမြန်နေသည်။

နန်ကုန်းယွီက အေးစက်စွာ နှာခေါင်းရှုံ့လိုက်ပြီး သူ၏လက်ချောင်းများက ကြိုးများကို ညင်သာစွာ တီးခတ်လိုက်သည်။ ရုတ်တရက် ချောမွေ့နေသော တေးဂီတထဲတွင် သတ်ဖြတ်လိုသည့် ရည်ရွယ်ချက်တစ်ခု ပေါ်လာပြီး အသံလှိုင်းတစ်ခုက ထက်မြက်သော ဓားသွားအဖြစ် ပြောင်းလဲကာ ကျောက်ခွမ်းနှင့် အခြားသူများဆီသို့ ပြေးဝင်သွားသည်။

မျက်စိတစ်မှိတ်အတွင်း ကျောက်ခွမ်းမှာ ထိမှန်သွားပြီး နောက်သို့ လွင့်စင်သွားကာ မြေကြီးပေါ်သို့ ပြင်းထန်စွာ ကျဆင်းသွားသည်။

သူသာမက အကြီးအကဲ ချင်နှင့် သူ၏အဖော် ခြောက်ဦးပါ မမျှော်လင့်ထားသော ဘေးဒုက္ခကို ခံစားလိုက်ရပြီး အားလုံး ကုချင်းသံကြောင့် လွင့်စင်သွားကြသည်။

"ဖူး}” ဖူး! ဖူး!"

ကုချင်းသံနှင့် ရောနှောနေသော သွေးအန်သံများစွာ ထွက်ပေါ်လာသည်။ ကျောက်ခွမ်းနှင့် အခြားသူများက တစ်ယောက်ပြီးတစ်ယောက် သွေးများ အန်ချလိုက်ပြီး သူတို့၏မျက်နှာများက ပြာနှမ်းသွားသည်။

သူတော်စင်တစ်ပိုင်းအဆင့်ဖြစ်သော အကြီးအကဲ ချင်ပင် ချွင်းချက် လုံးဝ မဟုတ်ပေ။

ဤတိုက်ခိုက်မှုအပြီးတွင် ကျောက်ခွမ်းနှင့် အခြားခြောက်ဦး၏ ကျင့်ကြံမှုအဆင့်များက လျင်မြန်စွာ စတင်ကျဆင်းသွားပြီး မျက်စိတစ်မှိတ်အတွင်း ဝိညာဉ်ပြောင်းလဲခြင်းအဆင့်တွင်ပင် မရှိတော့ပေ။

အကြီးအကဲ ချင်သည် ကျင့်စဉ်အဆင့် သုံးဆင့် ကျဆင်းသွားပြီး ဝိညာဉ်ဧကရာဇ်အဆင့်သို့ ပြန်ရောက်သွားသည်။ နောက်ပိုင်းအဆင့် ကျင့်ကြံမှုသို့ ရောက်သွားခြင်း ဖြစ်သည်။

ဤမြင်ကွင်းကို မျက်မြင်တွေ့ရှိချိန်တွင် ဘေးလူများမှာ ထိတ်လန့်သွားကြပြီး သူတို့၏ မျက်နှာများထက်တွင် မယုံကြည်နိုင်မှုများ ပေါ်လွင်နေသည်။

"ဝိုး! သူက သူတော်စင်တစ်ပိုင်းအဆင့်ကိုတောင် အောက်ဆွဲချနိုင်တာလား ဒါက အံ့မခန်း ကုချင်းစွမ်းရည်ပဲ..."

"ဘုရားရေ ဒီကုချင်းပညာကို ဘယ်မှာ သင်လို့ရမလဲ ငါ တကယ် သင်ချင်တယ်..."

"စောစောက လျှို့ဝှက်ဆန်းကြယ်တဲ့လူ ဝင်လှုပ်ရှားတာများလား..."

"အင်း လုံးဝ မဖြစ်နိုင်တာတော့ မဟုတ်ဘူး..."

"ဒါဆိုလည်း ဘာဖြစ်လဲ ငါက တကယ် သင်ချင်တာ..."

"ဒါက အဲဒီလောက် မလွယ်ပါဘူး..."

"ဒီကောင်လေးရဲ့ ကျင့်စဉ်အဆင့်ကို မင်းတို့ သိချင်စိတ် မဖြစ်ကြဘူးလား သူက ဝိညာဉ်စွမ်းအင် သုံးသွားတာကို ငါ ရှင်းရှင်းလင်းလင်း ခံစားမိပေမယ့် သူ့ရဲ့ ကျင့်စဉ်အဆင့်ကို ငါ ခံစားလို့ မရသေးဘူး..."

"အာ ငါလည်း အတူတူပဲ ငါ့စွမ်းရည်က နိမ့်လွန်းလို့ မသိနိုင်တာလို့ ထင်နေတာ..."

"ငါလည်း မသိနိုင်ဘူး..."

"..."

ဘေးလူများက သူတို့အချင်းချင်း တီးတိုးဆွေးနွေးနေကြသည်။

တစ်ချိန်တည်းမှာပင် နန်ကုန်းယွီဘက်တွင် တေးဂီတက လျော့ကျမသွားဘဲ ဆက်လက်ထွက်ပေါ်နေပြီး ပို၍ပင် အရေးတကြီး အရှိန်မြန်လာသည်။

သို့ရာတွင် တေးဂီတထဲရှိ သတ်ဖြတ်လိုသော ရည်ရွယ်ချက်က အနည်းငယ်မျှ လျော့နည်းမသွားပေ။ ယင်းက ထက်မြက်နေဆဲဖြစ်သော်လည်း ကျောက်ခွမ်းနှင့် သူ၏အဖော် ခုနစ်ဦးဆီသို့သာ ဦးတည်နေသည်။

ဤမြင်ကွင်းက မယုံနိုင်လောက်အောင် စိတ်လှုပ်ရှားဖွယ် ကောင်းလှသည်။

သို့သော် ယင်းက အကဲခတ်တတ်သူများကို တစ်ခုခု မှားယွင်းနေကြောင်း သတိပြုမိသွားစေသည်။

အရမ်း ပစ်မှတ်ထားလွန်းနေသည်။

သူတို့က နန်ကုန်းယွီကို လေးနက်သော အမူအရာများဖြင့် ကြည့်လိုက်ကြပြီး လုံးဝ အံ့အားသင့်သွားကြသည်။

ကြမ်းကြုတ်သော သတ်ဖြတ်လိုသည့် ရည်ရွယ်ချက်က တေးဂီတထဲတွင် ပါဝင်နေသော်လည်း သူက ယင်းကို ပြီးပြည့်စုံစွာ ထိန်းချုပ်ထားပြီး သန့်စင်သောကြာပန်း ဂိုဏ်း၏ အဖွဲ့ဝင် ခုနစ်ဦးကိုသာ ပစ်မှတ်ထားနေသည်။

သူတော်စင်တစ်ပိုင်းကို ပြင်းထန်စွာ ဒဏ်ရာရစေနိုင်သည့် ကြောက်မက်ဖွယ်ကောင်းသော ကုချင်းကျင့်စဉ်ကို သူ ထိန်းချုပ်နိုင်သည့်အချက်ကို ဖယ်ထားလျှင်တောင် သူ၏ ထိန်းချုပ်နိုင်စွမ်းက ဤလူငယ်လေးသည် မည်မျှ ထူးခြားအံ့မခန်းဖြစ်ကြောင်းကို ပြသရန် လုံလောက်ပေသည်။

ဤသူက ဘယ်အဖွဲ့အစည်းက လာသနည်း။

"ချွင်!"

နောက်ထပ် ကုချင်းတေးသွားတစ်ခု ထွက်ပေါ်လာချိန်တွင် ကျောက်ခွမ်းနှင့် အခြားခြောက်ဦး၏ အမူအရာများ အကြီးအကျယ် ပြောင်းလဲသွားပြီး သူတို့၏မျက်နှာများတွင် ကြောက်ရွံ့မှုများ ပြည့်နှက်နေသည်။

"ဘန်း! ဘန်း! ဘန်း”"

သို့သော် ထို့နောက် လုံ့နေသော ရိုက်ခတ်သံတစ်ခုကို ကြားလိုက်ရပြီး လူခြောက်ဦးက စူးရှစွာ အော်ဟစ်လိုက်ကြသည်။ ယင်းနောက် သူတို့၏ မျက်နှာပေါက် ခုနစ်ပေါက်မှ သွေးများ စီးကျလာပြီး သူတို့၏ အသက်ဓာတ်များက လျင်မြန်စွာ လွင့်စင်ပျောက်ကွယ်သွားသည်။

ယင်းကို မြင်ချိန်တွင် အားလုံး တစ်ဖန် ထိတ်လန့်သွားကြပြီး နန်ကုန်းယွီကို ရှုပ်ထွေးသော အမူအရာများဖြင့် ကြည့်လိုက်ကြသည်။

ရှန်ကွမ်ယွဲ့ရှီးသည် မိန်းကလေးငယ်၏ လက်ကို ကိုင်ထားရင်း သူမ၏သားကို အနည်းငယ် ရှုပ်ထွေးသော အမူအရာဖြင့် ကြည့်လိုက်သည်။

သူမ၏ ကလေးက တကယ်ပဲ အရွယ်ရောက်လာခဲ့ပြီ။

ပြတ်သားပြီး သနားညှာတာမှုကင်းမဲ့စွာဖြင့်။

သူ့တွင် ကိုယ်ပိုင်အတွေးအခေါ်များနှင့် ဆုံးဖြတ်ချက်များလည်း ရှိနေပြီဖြစ်သည်။

သို့သော် အကယ်၍ သူမသာ တတ်နိုင်မည်ဆိုပါက သူမ၏ကလေးက ဘယ်တော့မှ အရွယ်မရောက်လာရန် (သို့မဟုတ်) ထိုကဲ့သို့သော သတ်ဖြတ်မှုမျိုးကို ဘယ်တော့မှ မလုပ်ရန်သာ ဆန္ဒရှိမိလိမ့်မည်။

လူသတ်ခြင်းက ယွီအာ့၏ လက်များကိုသာ စွန်းထင်းစေလိမ့်မည်။

ကံမကောင်းစွာဖြင့် သူမက အရမ်းအားနည်းလွန်းနေခဲ့သည်။

ထိုသို့မဟုတ်လျှင် ဤသတ်ဖြတ်မှုကို သူမသာ လုပ်ဆောင်ခဲ့သင့်ပေသည်။

အကြီးအကဲ ချင်၏ မျက်နှာက ဒေါသကြောင့် တွန့်လိမ်နေပြီး သူ၏မျက်လုံးများထဲတွင် ထိတ်လန့်မှုများ ပြည့်နှက်နေသည်။ သူ ကြောက်ရွံ့နေခဲ့ပြီ။

ယခု သူ၏ ကျင့်စဉ်အဆင့်က တစ်ဖန် ထပ်မံကျဆင်းသွားပြီး ဝိညာဉ်ဧကရာဇ်အဆင့်သို့ ရောက်ရှိသွားသည်။ ဝိညာဉ်ဧကရာဇ်အဆင့် အစောပိုင်းအဆင့်မှ အောက်သို့ ကျဆင်းသွားမည့် အရိပ်အယောင် ခပ်ဖျော့ဖျော့ ရှိနေသည်။

သူ ကြောက်နေခဲ့ပြီ။

ဤကောင်လေးက အရူးတစ်ယောက်၊ လုံးဝ အရူးတစ်ယောက်ပင်။ သူက သန့်စင်သောကြာပန်း ဂိုဏ်း၏ အဖွဲ့ဝင်များကို အမှန်တကယ် သတ်ဖြတ်ရဲနေသည်။

အနာဂတ်တွင် ပြန်လည်ဆုံတွေ့နိုင်ရန်အတွက် တခြားသူများအတွက် ထွက်ပေါက်တစ်ခု ချန်ထားပေးသင့်သည်ဟု ဆိုလေ့ရှိသော်လည်း ဤလူငယ်လေးက ထိုသို့ လုံးဝ တွေးတောပုံမရကြောင်းကို သူ ခံစားလိုက်ရသည်။

သူက သတ်ဖြတ်ချင်ရုံ သက်သက်သာ ဖြစ်သည်။

အကြီးအကဲ ချင်မှာ စိတ်ဆင်းရဲပြီး ကြောက်ရွံ့နေပုံရသည်။ သူ ထွက်ပြေးချင်သော်လည်း သူ၏ကျင့်ကြံမှုက ပိတ်လှောင်ခံထားရသဖြင့် ပြုလုပ်ရန် လုံးဝ မဖြစ်နိုင်ပေ။

ထိုအချိန်တွင် အဝေးမှ အလင်းတန်းသုံးခု ပျံသန်းလာသည်။

မျက်စိတစ်မှိတ်အတွင်း လူအများရှေ့တွင် လူရိပ်သုံးခု ပေါ်လာပြီး ဝတ်ရုံနက်ဝတ်အဘိုးအိုတစ်ဦး၊ ဝတ်ရုံစိမ်းဝတ်အဘိုးအိုတစ်ဦးနှင့် ခရမ်းရောင်ဝတ်စုံဝတ် အမျိုးသမီးချောတစ်ဦးတို့ ဖြစ်ကြောင်း ပေါ်လွင်သွားသည်။

ထူးဆန်းပြီး စိတ်မသက်မသာဖြစ်စေသော တေးဂီတကို နားထောင်ရင်း သူတို့က မျက်မှောင်အနည်းငယ် ကုတ်သွားကြသည်။

ထိုအချိန်တွင် အကြီးအကဲ ချင်ကလည်း သူတို့သုံးဦးကို မြင်လိုက်ရာ သူ၏ ကြမ်းကြုတ်သော အမူအရာက ရုတ်တရက် ဝမ်းမြောက်မှုသို့ ပြောင်းလဲသွားသည်။

"အဘိုး ကျွန်တော့်ကို မြန်မြန် ကယ်ပါဦး!"

သူ၏စကားကို ကြားချိန်တွင် ဘေးလူများမှာ အမူအရာ အနည်းငယ် မပြောင်းလဲဘဲ မနေနိုင်ခဲ့ဘဲ သူတို့သုံးဦးကို သတိကြီးစွာဖြင့် ကြည့်လိုက်ကြသည်။

သန့်စင်သောကြာပန်း ဂိုဏ်းမှ လူတွေလား။

ဒါမှမဟုတ် ဘိုးဘေးအဆင့်ရှိတဲ့ အစွမ်းထက် ကျွမ်းကျင်သူများလား။

တာအို ဝင်ရောက်ခြင်း အဆင့် မဟုတ်ရင်တောင် မဟာသူတော်စင် ဒါမှမဟုတ် အဓိပတိသူတော်စင် အဆင့်ဖြစ်ဖို့ အလွန်ဖြစ်နိုင်ချေရှိတယ်။

ဒါက အရမ်း လောလွန်းသွားပြီ။

သူတို့ ဒီမှာ မနေသင့်ဘူး။ ပြီးတော့ ဒီလူသုံးယောက် ဒေါသထွက်ပြီး တခြားဘေးလူတွေအပေါ် ဒေါသပုံချမလာဘူးဆိုတာ ဘယ်သူသိနိုင်မလဲ။

အကြီးအကဲ ချင်နှင့် အခြားသူများထံမှ မိစ္ဆာချီများ ပေါ်ထွက်နေသည်ကို မြင်ချိန်တွင် အဘိုးအိုသုံးဦးမှာ ထိတ်လန့်ကာ ဒေါသထွက်သွားကြသည်။

ဤအခိုက်အတန့်တွင် ဝတ်ရုံနက်ဝတ် အဘိုးအိုက အကြီးအကဲ ချင်ကို တစ်ချက်ကြည့်လိုက်ရာ သူ၏မျက်လုံးများထဲတွင် သနားညှာတာမှု အရိပ်အယောင်တစ်ခု ပေါ်လာသည်။

သူက နန်ကုန်းယွီကို ကြည့်ကာ ဩရှသောအသံဖြင့် ပြောလိုက်သည်။

"မိတ်ဆွေရဲ့ နည်းလမ်းတွေက အရမ်းကို ရက်စက်လွန်းနေတယ်…ငါတို့ သန့်စင်သောကြာပန်း ဂိုဏ်းနဲ့ပတ်သက်တဲ့ ကိစ္စတွေကို ငါတို့ ဂိုဏ်းကပဲ ကိုင်တွယ်ဖြေရှင်းသင့်တယ်..."

နန်ကုန်းယွီက သူတို့ကို တစ်ချက်ကြည့်လိုက်ပြီးနောက် ကုချင်းကို ကိုင်ထားရင်း မတ်တတ်ရပ်ကာ တည်ငြိမ်စွာ ပြောလိုက်သည်။

"သန့်စင်သောကြာပန်း ဂိုဏ်းက သူတို့ရဲ့ တပည့်တွေကို မိစ္ဆာကျင့်စဉ် ကျင့်ကြံဖို့ အလိုလိုက်ထားတယ်…သူတို့ရဲ့ ဝိညာဉ်စွမ်းအင်တွေထဲမှာ သက်ရှိတွေကို အန္တရာယ်ပြုတဲ့ နာကြည်းချက်တွေ ပါဝင်နေပြီဆိုတာကို ငါ မြင်တယ်…ဒီကိစ္စက သန့်စင်သောကြာပန်း ဂိုဏ်းရဲ့ အတွင်းရေးကိစ္စ လုံးဝ မဟုတ်တော့ဘူး..."

"ငါတို့အားလုံး သိတဲ့အတိုင်းပဲ မိစ္ဆာကျင့်စဉ်က နတ်ဆိုးမျိုးနွယ်ဝင်တွေ ကျင့်ကြံဖို့ အသင့်တော်ဆုံးဖြစ်ပြီး လူသားမျိုးနွယ်တွေ ကျင့်ကြံဖို့အတွက်ကျတော့ မကြာခဏဆိုသလို ကြီးမားတဲ့ ဘေးထွက်ဆိုးကျိုးတွေ ရှိတတ်တယ်..."

"အဲဒါက လူတစ်ယောက်ရဲ့ စိတ်ကို ဖျက်ဆီးနိုင်တယ်၊ ရက်စက်ကြမ်းကြုတ်စေတယ်၊ သွေးဆာစေတယ်၊ စိတ်နေသဘောထားကို မတည်မငြိမ် ဖြစ်စေတယ် စသဖြင့်ပေါ့..."

"သေချာတာပေါ့ မိစ္ဆာကျင့်စဉ် အများစုက ဖြတ်လမ်းနည်းကို သုံးကြတယ်…ဘာပဲဖြစ်ဖြစ် သက်ရှိတွေနဲ့ အသားအသွေးတွေကို အသုံးပြုပြီး ချီသန့်စင်တဲ့ ကျင့်ကြံမှုတွေ ပါဝင်နေတာပဲ ဒီလိုဆိုရင် ထက်ဝက်လောက် အားထုတ်ရုံနဲ့ ရလဒ်နှစ်ဆ သေချာပေါက် ရနိုင်တယ် ဒါပေမဲ့ ဒါက လူသားကျင့်ကြံသူတွေ ရွံရှာတဲ့ အရာလည်း ဖြစ်တယ်..."

"ရှင်းနေတာပဲ ဒီခုနစ်ယောက်က ချီစွမ်းအင် ဖန်တီးဖို့ သက်ရှိတွေရဲ့ အသားနဲ့သွေးကို အသုံးပြုခဲ့ကြတဲ့သူတွေပဲ…အခု ကျင့်ကြံမှု ပြီးသွားပြီဆိုတော့ ဒါက မင်းတို့ သန့်စင်သောကြာပန်း ဂိုဏ်းရဲ့ ကိစ္စ ဖြစ်နေသေးလို့လား..."

"ဒါမှမဟုတ် မင်းတို့က မင်းတို့ရဲ့ တပည့်တွေကို ကာကွယ်ပေးဖို့ စီစဉ်နေတာလား ဒါမှမဟုတ် မင်းတို့ကိုယ်တိုင်ရော ဒီထဲမှာ ပါဝင်ပတ်သက်နေတာလား..."

ယင်းကို ကြားချိန်တွင် သန့်စင်သောကြာပန်း ဂိုဏ်းမှ လူသုံးဦး၏ မျက်နှာက အတော်လေး ခက်ထန်သွားသည်။ ဘယ်လို တုံ့ပြန်ရမည်ကို မသေချာသဖြင့် သူတို့က အချင်းချင်း အကြည့်ချင်း ဖလှယ်လိုက်ကြသည်။

ဝတ်ရုံနက်ဝတ် အဘိုးအိုက သူ၏မြေးကို တစ်ချက်ကြည့်လိုက်ပြီးနောက် နန်ကုန်းယွီကို ကြည့်လိုက်သည်။ "မိတ်ဆွေ အခြေအနေ ဘယ်လိုပဲဖြစ်နေပါစေ ဒါက ငါတို့ သန့်စင်သောကြာပန်း ဂိုဏ်းရဲ့ မိသားစုကိစ္စပါ..."

"အကြောင်းပြချက်က ဘာပဲဖြစ်နေပါစေ မင်းက ငါတို့ သန့်စင်သောကြာပန်း ဂိုဏ်းရဲ့ အဖွဲ့ဝင်တွေကို သတ်ဖြတ်ခဲ့တာက အမှန်တရားပါပဲ ဒီအတွက် မင်း ငါတို့ကို ရှင်းပြချက်ပေးရမယ်..."

ယင်းစကားကို ကြားချိန်တွင် ရှန်ကွမ်ယွဲ့ရှီးက နန်ကုန်းယွီ၏ ဘေးသို့ အလျင်အမြန် လာရောက်ခဲ့ပြီး မျက်နှာချင်းဆိုင်ရှိ လူသုံးဦးကို သတိထားနေသော အမူအရာဖြင့် ကြည့်လိုက်သည်။