အခန်း ၂၇၅

အပိုင်း(၂၇၅) အစွမ်းကုန် ရှေ့သို့ချီ

အရင်က ရွာသွန်းနေခဲ့သော မိုးဖွဲဖွဲလေးသည် ယခုအခါ မိုးသည်းထန်စွာ ရွာသွန်းမှုကြီးအဖြစ်သို့ ပြောင်းလဲသွားခဲ့ပြီ ဖြစ်သည်။

ကားပြတင်းပေါက်များနှင့် ကားခေါင်မိုးပေါ်သို့ ရိုက်ခတ်နေသော မိုးသံများသည် ချန်းရီ၏ နားထဲတွင် ပြည့်နှက်ဆူညံနေ၏။

တောင်တက်လမ်းပေါ်တွင် ရေများ ပို၍ပို၍ များပြားလာသည်ကို ချန်းရီက သိသိသာသာကြီး ခံစားသိရှိနေသည်။

ယာဉ်ဘီးများ ဖြတ်သန်းသွားသော နေရာတိုင်းတွင် ရွှံ့ဗွက်များ ထူထပ်နေသည်ကိုလည်း သူ ခံစားမိနေ၏။

တောင်တက်လမ်းသည် မိုးရေများကြောင့် စတင် ပျော့အိလာခဲ့ပြီ ဖြစ်ကြောင်း သိသာလှသည်။

အကယ်၍ ဤနေရာမှနေ၍ အမြန်ဆုံး ထွက်ခွာမသွားနိုင်ပါက။

တောင်ပြိုကျမှုကြောင့် ဖြစ်ပေါ်လာမည့် ရွှံ့နွံမြေပြိုမှုအောက်တွင် ပိတ်မိသွားမည်လား ဆိုသည်ကို ထားလိုက်ဦး။

ဤကဲ့သို့သော နေရာမျိုးတွင် ကားများပင် ရှေးဦးစွာ နွံနစ်သွားနိုင်ချေ ရှိနေသည်။

ယခုလို အခြေအနေမျိုးတွင် ကားနွံနစ်မှုသာ ဖြစ်ပေါ်ခဲ့ပါက သေချာပေါက် သေလမ်းဆီသို့ ဦးတည်သွားမည်မှာ အသေအချာပင် ဖြစ်သည်။

ရုတ်တရက် မျက်နှာပေါ်တွင် အေးစက်စက် အထိအတွေ့ကို ခံစားလိုက်ရသည်။

လက်လှမ်း၍ စမ်းကြည့်လိုက်သောအခါ လက်ဝါးထဲတွင် စိုစွတ်မှုကို ခံစားလိုက်ရ၏။

မော့ကြည့်စရာပင် မလိုဘဲ ချန်းရီ ချက်ချင်း သိလိုက်သည်။ ၎င်းမှာ စောစောက ပြိုကျလာသော ကျောက်ခဲများကြောင့် ကားခေါင်မိုး၏ တစ်နေရာရာတွင် အက်ကွဲကြောင်းငယ်လေးတစ်ခု ဖြစ်ပေါ်သွားခြင်းကြောင့်ပင်။

စောစောက ရေမယိုကျခြင်းမှာ ရေများ စိမ့်မဝင်လာသေးသောကြောင့်သာ ဖြစ်သည်။

ဤကဲ့သို့သော ရေယိုစိမ့်မှုလေးက အလွန်တရာ ဆိုးရွားလှသည်တော့ မဟုတ်ပေ။ ကမ္ဘာပျက်ကပ် ပစ်ကပ်ကား၏ စွမ်းဆောင်ရည်ကို ချက်ချင်းကြီး ထိခိုက်သွားစေမည် မဟုတ်ချေ။

ချန်းရီက နောက်ကြည့်မှန်ကို တစ်ချက် လှမ်းကြည့်လိုက်ရာ ယာဉ်တန်း၏ နောက်ဆုံးတွင် ရှိနေသော ကမ္ဘာပျက်ကပ် ခံတပ်ကားကြီးသည် မျက်စိကျစရာ ကောင်းလွန်းနေသည်။

နောက်ကြည့်မှန် တစ်ခုလုံး၏ နေရာအများစုကို မီးရောင်များ ထိန်ထိန်လင်းနေသည့် ထိုဧရာမ ကမ္ဘာပျက်ကပ် ခံတပ်ကားကြီးကသာ နေရာယူထားလေသည်။

ချန်းရီက နောက်ကြည့်မှန်ကို ကြည့်ရင်း လမ်းဘယ်လို ဖယ်ပေးရမည်ကို စဉ်းစားနေချိန်မှာပင်။

ချန်းရီက စကားပြောစက်ကို ယူကာ ဆက်သွယ်ရန်ပင် အချိန်မရလိုက်ပေ။

ထို ကမ္ဘာပျက်ကပ် ခံတပ်ကားကြီးသည် လမ်းဘေးရှိ တောင်စောင်းပေါ်သို့ တိုက်ရိုက် မောင်းနှင်သွားပြီး ကားတစ်စီးလုံး စောင်းငဲ့ကာ တောင်စောင်းပေါ်မှနေ၍ ရှေ့သို့ ရူးသွပ်စွာဖြင့် အရှိန်ပြင်းပြင်း မောင်းနှင်သွားသည်ကို မြင်လိုက်ရသည်။

ဤမြင်ကွင်းကို ကြည့်ရင်း ချန်းရီမှာ ချက်ချင်းပင် ပါးစပ်အဟောင်းသားနှင့် ကြက်သေသေသွားတော့သည်။

ချန်းရီ တစ်ယောက်တည်း ဤသို့ အံ့သြတုန်လှုပ်သွားခြင်း မဟုတ်ပေ။

ပန်းရောင်ဆံပင်နှင့် ကောင်မလေးနှင့် တင်းတုံတို့ နှစ်ယောက်သည်လည်း စိတ်ကူးမယဉ်ရဲလောက်အောင် ကြီးမားလှသော ကမ္ဘာပျက်ကပ် ခံတပ်ကားကြီးက ဧရာမ သားရဲကြီးတစ်ကောင်အလား တောင်စောင်းမျက်နှာပြင်ပေါ်မှ ဖြတ်သန်းကြိတ်နယ်သွားသည်ကို မျက်တောင်မခတ်တမ်း ကြည့်နေမိကြသည်။

သိထားရမည်မှာ ဤတောင်တက်လမ်းသည် ပြုပြင်ထိန်းသိမ်းမှု မရှိသည်မှာ ကြာပြီဖြစ်သောကြောင့် လမ်းမပေါ်တွင် တောင်ပြိုကျမှုကြောင့် ဖြစ်ပေါ်လာသော ကျောက်တုံးကျောက်ခဲများ အများအပြား ရှိနေပြီး လမ်းအက်ကွဲကြောင်းများကြားမှ ပေါက်ရောက်နေသော ချုံပုတ်များနှင့် သစ်ပင်များလည်း ရှိနေသည်။

ဤကဲ့သို့သော လမ်းအခြေအနေတွင် ကားမောင်းရန်မှာ အလွန်တရာ ခက်ခဲလှပြီ ဖြစ်သည်။

အကယ်၍ ယာဉ်တန်းထဲတွင် သဘာဝလွန် အစွမ်းပိုင်ရှင်များသာ မပါရှိပါက ဤလမ်းမှ ဖြတ်သန်းသွားလာရန်မှာ လုံးဝ မဖြစ်နိုင်ပေ။

တောင်တက်လမ်း၏ တစ်ဖက်တစ်ချက်စီရှိ တောင်စောင်းများသည်ကား ပို၍ပင် ဆိုးရွားလှသည်။

တောင်ပြိုကျမှုကြောင့် ဖြစ်ပေါ်လာသော ကျောက်တုံးများနှင့် မျိုးစုံသော အပင်များ ရောထွေးနေသဖြင့် ကားမောင်းရန်မှာ ဆိုဖွယ်ရာမရှိ၊ လူတစ်ယောက် လမ်းလျှောက်သွားရန်ပင် မဖြစ်နိုင်သလောက် ရှိပေသည်။

ထိုသို့ မတ်စောက်ပြီး ထောင့်ချိုးကျနေသော တောင်စောင်းမျက်နှာပြင်များပေါ်တွင် လမ်းဆိုတာ လုံးဝကို မရှိပါချေ။

သို့သော် ဤကဲ့သို့သော အခြေအနေမျိုးတွင်ပင်။

ထို ကမ္ဘာပျက်ကပ် ခံတပ်ကားကြီးက တောင်စောင်းပေါ်သို့ စောင်းငဲ့ကာ အကြိတ်အနယ် တက်သွားခဲ့သည်။

ကြီးမားသော ကျောက်တုံးကြီးများသည် ကမ္ဘာပျက်ကပ် ခံတပ်ကားကြီး၏ ကင်းခြေများအလား ကြီးမားလှသော ကားဘီးကြီးများရှေ့တွင် ကားမီးရောင်အောက်၌ အမှုန့်အဖြစ် ကြိတ်ချေခံလိုက်ရသည်ကို ချန်းရီ မြင်တွေ့လိုက်ရသည်။

အရွယ်ရောက်ပြီးသူ တစ်ယောက်၏ ပေါင်လုံးခန့် တုတ်သော သစ်ပင်များမှာလည်း ကမ္ဘာပျက်ကပ် ခံတပ်ကားကြီး၏ ဝင်တိုက်မှုကြောင့် ခါးလယ်မှ ကျိုးပဲ့သွားကြသည်။

ကားကိုယ်ထည်ကြီးမှာ အနည်းငယ်မျှပင် တုံ့ဆိုင်းသွားခြင်း မရှိဘဲ ထိုအတိုင်း ကြိတ်နယ် ဖြတ်သန်းသွားခဲ့၏။

အနီးသို့ ရောက်လာမှသာ ဤကမ္ဘာပျက်ကပ် ခံတပ်ကားကြီး၏ ကားဘီးများသည် အမြင့် သုံးပေကျော်ခန့် ရှိကြောင်း ချန်းရီ သတိထားမိလိုက်သည်။

ဤကဲ့သို့သော ကားဘီးမျိုး ဤကားကြီးတွင် ဆယ်ဂဏန်းမက၊ ဆယ်ဂဏန်း အတော်များများပင် ပါရှိနေသည်။

မျက်စိတစ်မှိတ်အတွင်း ဖြတ်သန်းသွားခြင်း ဖြစ်ပြီး ကောင်းကင်ယံကလည်း မှောင်မည်းနေသောကြောင့် ချန်းရီ၏ မျက်လုံးစွမ်းရည်ဖြင့်ပင် အတိအကျ ရေတွက်၍ မရနိုင်ခဲ့ပေ။

ဒီကားကြီးက... တကယ်ကို ဘာကြီးလဲဟ။

သေစမ်း။

စိတ်လွင့်သွားသည့် ခဏလေးအတွင်းမှာပင် ကမ္ဘာပျက်ကပ် ခံတပ်ကားကြီးက ကျောင်းကား၊ ကုန်တင်ကားနှင့် ချန်းရီ၏ ကိုယ်ပိုင် ကမ္ဘာပျက်ကပ် ပစ်ကပ်ကားတို့ကို ကျော်တက်သွားခဲ့ပြီ ဖြစ်သည်။

ကမ္ဘာပျက်ကပ် ခံတပ်ကားကြီးက အရှေ့ဆုံးသို့ ရောက်ရှိသွားသောအခါ။

လမ်းအခြေအနေက သိသိသာသာ ကောင်းမွန်သွားကြောင်း ချန်းရီ ခံစားလိုက်ရသည်။

ပြုပြင်ထိန်းသိမ်းမှု ကင်းမဲ့နေခဲ့သော တောင်တက်လမ်းသည် ကမ္ဘာပျက်ကပ် ခံတပ်ကားကြီး ဖြတ်သန်းသွားပြီးနောက် ကမ္ဘာပျက်ကပ် မတိုင်မီက လမ်းအခြေအနေမျိုးသို့ ပြန်လည်ရောက်ရှိသွားသည်ဟု မဆိုနိုင်သော်လည်း။

ယခု လမ်းအခြေအနေမှာ လမ်းကြိတ်စက်ဖြင့် တစ်ကြိမ် ကြိတ်နယ်ထားသကဲ့သို့တော့ ဖြစ်သွားခဲ့သည်။

အနည်းဆုံးတော့ အတော်လေး ညီညာသွားခဲ့ပြီ ဖြစ်သည်။

တောင်တက်လမ်းပေါ်ရှိ ရေအိုင်များပင် ကမ္ဘာပျက်ကပ် ခံတပ်ကားကြီး၏ ထက်မြက်သော ဓားတစ်လက်အလား ခွဲခြမ်းသွားမှုကြောင့် ဖယ်ရှားခံလိုက်ရသည်။

လောင်လီနှင့် ရွှီနန်တို့၏ ဖိအားများလည်း ချက်ချင်းပင် အတော်လေး လျော့ကျသွားခဲ့၏။

"ဟေ့... ခပ်မြန်မြန် မောင်းစမ်းပါ"

လမ်းအခြေအနေ အနည်းငယ် ကောင်းလာသည်နှင့် ရှေ့မှ ဧရာမ ကားကြီးကို အရှိန်တင်ရန် ချန်းရီက စတင် တိုက်တွန်းတော့သည်။

ဤမျှ အစွမ်းထက်သော ကားကြီး၏ အရှိန်က ဒီလောက်လေးတော့ သေချာပေါက် မဟုတ်နိုင်ပေ။

မိုးက ပို၍ပို၍ သည်းထန်လာသည်။

အန္တရာယ်က နီးကပ်လာနေ၏။

လမ်းပြသူ လမ်းစဉ်၏ ရာသီဥတု အာရုံခံနိုင်စွမ်း မရှိလျှင်တောင်မှ။

အစွမ်းပိုင်ရှင်တစ်ယောက်၏ ထက်မြက်သော ဆဋ္ဌမအာရုံကြောင့် အန္တရာယ် နီးကပ်လာနေပြီ ဖြစ်ကြောင်း ချန်းရီ ခံစားမိနေသည်။

"ဟမ့်... မင်းလို တောသားကများ ငါ ဘာလုပ်လုပ် ဝင်စွက်ဖက်စရာ အကြောင်းမရှိဘူး"

"မင်းက အရှင်မင်းကြီးရဲ့ နိုင်ငံသား ဖြစ်နေရင်တောင်မှ အခုလောလောဆယ် ဘာစွမ်းဆောင်ရည်မှ မပြရသေးတော့ အောက်ခြေလူတန်းစား တစ်ယောက်ပဲ"

"ငါ အလုပ်လုပ်နေတာကို မင်းကများ ဝင်ပါရဲတယ်ပေါ့... ဘေးကင်းတဲ့နေရာ ရောက်တဲ့အခါ မင်းကို စည်းကမ်းဆိုတာ ဘာလဲဆိုတာ သေချာပေါက် သိအောင် လုပ်ပေးမယ်"

ချန်းရီ၏ နဖူးမှ သွေးကြောများ ထောင်ထလာပြီး ထိုစူးရှရှ လူ၏အသံပိုင်ရှင်ကို ယခုချက်ချင်း ပြေးသွားကာ အသေအလဲ ထိုးကြိတ်ပစ်လိုက်ချင်စိတ်များ ပေါက်သွားသည်။

ဒီလူက ဘယ်လိုလုပ်ပြီး ဒီလောက်တောင် အထိုးခံချင်စရာ ကောင်းနေရတာလဲ။

သူ့လို မျက်နှာပြောင်တိုက်တတ်တဲ့ လူတောင်မှ မယှဉ်နိုင်ပါလား။

စကားပြောစက်ထဲမှ ခပ်သဲ့သဲ့ ရယ်မောသံများ ထွက်ပေါ်လာသည်။

ခေါင်းဆောင်ချူ၏ အေးစက်စက် အသံက ဝင်ရောက်လာ၏။

"တစ်နာရီ... နောက်ထပ် တစ်နာရီ ကြာရင် တောင်စောင်း နှစ်ဖက်စလုံးမှာ ကြီးမားတဲ့ တောင်ပြိုကျမှုတွေ ဖြစ်လာလိမ့်မယ်... အဲဒီအခါကျရင် ဒီနေရာက မြေပြန့်ကြီး ဖြစ်သွားလိမ့်မယ်"

"တစ်နာရီတောင် မလိုလောက်ဘူး"

"နာရီဝက်လောက်ဆိုရင်ပဲ ဒီနေရာက မြေပြန့်ကြီး ဖြစ်သွားနိုင်တယ်"

"ဒါကြောင့် အသစ်ရောက်လာတဲ့ မိန်းမလျာကြီး... အရှိန်တင်လိုက်တော့"

ကမ္ဘာပျက်ကပ် ခံတပ်ကားကြီးထဲတွင်။

ရှောင်တယ်ဇီက ခေါင်းဆောင်ချူ၏ အေးစက်စက် အသံကို ကြားလိုက်ရသဖြင့် ကြောင်အမ်းသွားသည်။

တောင်တက်လမ်း တစ်ဖက်တစ်ချက်စီရှိ မှောင်မည်းအုံ့ဆိုင်းနေသော တောင်တန်းကြီးများကို ကြည့်လိုက်မိ၏။

ရှောင်တယ်ဇီသည် မနေနိုင်တော့ဘဲ တစ်ချက် တုန်တက်သွားသည်။

တစ်နာရီတောင် ဟုတ်လား။

အခြေအနေက...

ဒီလောက်တောင် အန္တရာယ် များနေပြီလား။

"ရှေ့ကို ဆက်သွား... အစွမ်းကုန် အမြန်မောင်းစမ်း"

စူးရှသော အသံကြီးက ကမ္ဘာပျက်ကပ် ခံတပ်ကားကြီး၏ ပထမထပ် တစ်ခုလုံးတွင် ပဲ့တင်ထပ်သွားသည်။

ထိုအသံကို ကြားလိုက်ရသောအခါ။

အစောပိုင်းက ပြတင်းပေါက်ရှေ့တွင် ရပ်ကာ အပြင်ဘက် ရှုခင်းများကို ကြည့်ရှုနေကြသော လူများ၏ မျက်နှာအမူအရာများ ချက်ချင်း ပြောင်းလဲသွားကြသည်။

ထို့နောက် ခန်းမကြီး၏ နောက်ဘက်ရှိ အခန်းတစ်ခန်းဆီသို့ အလျင်စလို ပြေးဝင်သွားကြ၏။

ထိုအခန်း၏ တံခါးပေါ်တွင် "လျှပ်စစ်ပေးဝေရေးခန်း" ဟူသော စာလုံးကြီးများ ရေးသားထားသည်။

တံခါးကို တွန်းဖွင့်လိုက်သည်နှင့် ဖုံးကွယ်၍ မရနိုင်သော ချွေးစော်နံကြီးများနှင့်အတူ လူများက စက်ဘီးကို ရူးသွပ်စွာ နင်းနေကြသော အသံများကို ကြားလိုက်ရသည်။

မော့ကြည့်လိုက်သောအခါ ဤအခန်းထဲတွင် လေ့ကျင့်ရေးစက်ဘီး အစီး နှစ်ရာနီးပါးခန့် ပြည့်ကျပ်နေသည်ကို တွေ့လိုက်ရ၏။

လူတစ်ရာခန့်က ထိုစက်ဘီးများကို အစွမ်းကုန် နင်းနေကြသည်။

တကယ်တော့ ဤကမ္ဘာပျက်ကပ် ခံတပ်ကားကြီးပေါ်တွင် ခုနက လူအနည်းငယ်သာ ရှိနေခြင်း မဟုတ်ဘဲ ပိုမိုများပြားသော လူအုပ်ကြီးက လျှပ်စစ်ပေးဝေရေးခန်းထဲတွင် ပုန်းအောင်းနေကြခြင်း ဖြစ်သည်။

အသစ်ဝင်လာသော လူများကလည်း ဤကဲ့သို့သော အခြေအနေမျိုးကို ယဉ်ပါးနေပြီးသား ဖြစ်ပုံရသည်။

သူတို့သည် လွတ်နေသော စက်ဘီးများဆီသို့ သွားကာ စက်ဘီးများကို စတင် နင်းကြတော့သည်။

အခန်းထဲတွင် အကြမ်းစား တေးဂီတသံများ စတင် ဖွင့်လှစ်လာသည်။

လူအားလုံးက ထိုတေးဂီတ အသံနှင့်အတူ စည်းချက်ကျကျ စက်ဘီးကို စတင် နင်းလာကြ၏။

စွမ်းအင်စီးကြောင်းများ စုစည်းသွားပြီး ကမ္ဘာပျက်ကပ် ခံတပ်ကားကြီး၏ စွမ်းအင်စနစ်ဆီသို့ ပို့ဆောင်ပေးလိုက်သည်။

ကမ္ဘာပျက်ကပ် ခံတပ်ကားကြီးမှ ယခင်က စုဆောင်းထားသော စွမ်းအင်များကိုပါ စတင် ထုတ်ယူ အသုံးပြုလာသည်။

ဤမယုံနိုင်စရာ ကောင်းလှသော ကမ္ဘာပျက်ကပ် ခံတပ်ကားကြီးက အလွန် ကြီးမားလှသော စွမ်းအင်များကို ပေါက်ကွဲထွက်ပေါ်လာစေခဲ့သည်။

ကားမီးရောင်များအောက်တွင် ကမ္ဘာပျက်ကပ် ခံတပ်ကားကြီး၏ အနောက်ဘက်မှ မီးခိုးမည်းကြီးများ အများအပြား မှုတ်ထုတ်လိုက်ပြီး ကမ္ဘာပျက်ကပ် ခံတပ်ကားကြီးက ချက်ချင်း အရှိန် မြင့်တက်သွားတော့သည်။

တကယ်ကိုပဲ ဤကမ္ဘာပျက်ကပ် ခံတပ်ကားကြီးက ရိုးရှင်းမနေပါချေ။

ဒီလောက် ကြီးမားလှတဲ့ ကားကိုယ်ထည်ကြီးနဲ့တောင် ဒီလောက် မြန်နေသေးသည်။

တကယ်ကို မယုံနိုင်စရာပင်။

ချန်းရီက ခေါင်းဆောင်ချူအတွက် တိတ်တဆိတ် လက်မထောင်ပေးလိုက်မိသည်။

ထိုအချိန်မှာပင် ကားလီဗာကိုလည်း အားကုန် နင်းချလိုက်၏။

၂.စ အင်ဂျင်ကြီးက ဝန်ပိနေသော ဟိန်းဟောက်သံကြီးကို ထုတ်လွှတ်လိုက်သည်။

အစွမ်းကုန် ပေါက်ကွဲထွက်နေသော ကမ္ဘာပျက်ကပ် ခံတပ်ကားကြီး၏ အရှိန်ကြောင့် ကမ္ဘာပျက်ကပ် ပစ်ကပ်ကားနှင့် အကွာအဝေးက တဖြည်းဖြည်း ကျယ်ဟသွားလေသည်။

အစိမ်းရောင် မိုးမခကိုင်း တစ်ကိုင်းက ကားပြတင်းပေါက်ထဲမှ ထွက်ပေါ်လာပြီး မိုးသက်မုန်တိုင်းကြားထဲတွင် ရှေ့သို့ရောက်ရန် ကြိုးစား ပျံ့နှံ့သွားသည်။

ယခုအချိန်သည် ညအချိန်ဖြစ်ပြီး သွေးရောင်လမင်း မရှိသော်ငြား မိုးမခကိုင်း၏ အရှည်ကတော့ အနည်းငယ် တိုးလာခဲ့သေးသည်။

မိုးမခကိုင်းသည် လက်တံတစ်ခုအလား ရှေ့သို့ အစွမ်းကုန် ဆန့်ထုတ်ကာ ထိုကမ္ဘာပျက်ကပ် ခံတပ်ကားကြီး၏ အမြီးပိုင်းကို ချိတ်ဆက်ရန် ကြိုးစားနေ၏။

နောက်ဆုံးတွင်တော့ မိုးမခကိုင်းက ကမ္ဘာပျက်ကပ် ခံတပ်ကားကြီး၏ အငေါက်တစ်ခုကို ထိမိသွားပြီး မိုးမခကိုင်းများ ရူးသွပ်စွာ ပျံ့နှံ့သွားကာ ထိုအငေါက်ကို တိုက်ရိုက် ရစ်ပတ်လိုက်တော့သည်။

မိုးမခကိုင်းက ဆွဲကြိုးတစ်ချောင်းအဖြစ် ပြောင်းလဲသွားပြီး ကမ္ဘာပျက်ကပ် ပစ်ကပ်ကား၏ အရှိန် မြင့်တက်လာကာ ခေါင်းဆောင်ချူနှင့် ပန်းရောင်ဆံပင်နှင့် ကောင်မလေးတို့၏ ပြုပြင်ထားသော လမ်းကြမ်းမောင်းကား နှစ်စီးကို ချက်ချင်း ကျော်တက်သွားတော့သည်။

ခေါင်းဆောင်ချူက ဟက်ဟက်ပက်ပက် ရယ်မောလိုက်ပြီး ကားပြတင်းပေါက်ထဲမှ ကြိုးတစ်ချောင်းကို လှမ်းပစ်လိုက်ကာ မိုးမခကိုင်းနှင့် ရစ်ပတ်ချိတ်ဆက်လိုက်သည်။

"အမဝမ်းကွဲ"

ရှောင်ယွီက သဲကြီးမဲကြီး ရွာသွန်းနေသော မိုးရေများ ကားထဲသို့ ဝင်လာသည်ကိုပင် ဂရုမစိုက်ဘဲ ကားပြတင်းပေါက်ကို ဖွင့်ကာ လက်မောင်းလုံးခန့် တုတ်သော ကြိုးတစ်ချောင်းကို တိုက်ရိုက် လှမ်းပစ်လိုက်သည်။

ကမ္ဘာပျက်ကပ်တွင် ရွှေ့ပြောင်းသွားလာရာ၌ ကားတိုင်းလိုလို ကြိုးများကို အနည်းနှင့်အများ ပြင်ဆင်ထားတတ်ကြသည်။

ကြိုးကဲ့သို့သော အရာများသည် ရွှေ့ပြောင်းသွားလာရာတွင် မရှိမဖြစ် လိုအပ်သော ပစ္စည်းတစ်ခုပင် ဖြစ်သည်။

ပန်းရောင်ဆံပင်နှင့် ကောင်မလေးက လက်တစ်ချက် ဝှေ့ယမ်းကာ ကြိုးကို ရှေ့သို့ တိုက်ရိုက် လွှဲပစ်လိုက်၏။

နှမြောစရာကောင်းသည်မှာ ကြိုး၏အရှည်က ကမ္ဘာပျက်ကပ် ခံတပ်ကားကြီးဆီသို့ လုံးဝ မရောက်နိုင်ခဲ့ပေ။

ထိုအချိန်မှာပင် ကမ္ဘာပျက်ကပ် ပစ်ကပ်ကား၏ ပြတင်းပေါက်ထဲမှ လက်တစ်ဖက် ထွက်လာပြီး ကြိုးကို လှမ်းဖမ်းလိုက်သည်။

ကြိုးနှင့် မိုးမခကိုင်းတို့ ရစ်ပတ်သွားကြသည်။

ပန်းရောင်ဆံပင်နှင့် ကောင်မလေး၏ လမ်းကြမ်းမောင်းကားကလည်း ချက်ချင်း အရှိန် မြင့်တက်လာတော့သည်။

ကုန်တင်ကားနှင့် ကျောင်းကားတို့ကလည်း အလျော့မပေးချေ။

သူတို့နှစ်ယောက်လုံးကလည်း ကြိုးများကို အသီးသီး လှမ်းပစ်လိုက်ကြသည်။

အစွမ်းပိုင်ရှင်များ၏ အကူအညီဖြင့် နောက်ဆုံးတွင် အားလုံးသည် ကမ္ဘာပျက်ကပ် ခံတပ်ကားကြီး၏ အကူအညီကို ရယူနိုင်ခဲ့ကြသည်။

ကမ္ဘာပျက်ကပ် ခံတပ်ကားကြီးက လျှပ်စီးတန်းတစ်ခုအလား ကောက်ကွေ့နေသော တောင်တက်လမ်းပေါ်တွင် အရှိန်အဟုန်ဖြင့် ပြေးလွှားနေ၏။

ဤကမ္ဘာပျက်ကပ် ခံတပ်ကားကြီးက တကယ်ကို မိုက်လွန်းသည်ဟု ချန်းရီ မချီးကျူးဘဲ မနေနိုင်တော့ပေ။

ဒီလောက် ကားတွေ အများကြီးကို ဆွဲခေါ်ထားတာတောင်မှ ဒီလောက် မြန်မြန် ပြေးနိုင်သေးတာပဲ။

ဆက်ရန်...