အခန်း ၁၆၁၁

အခန်း ( ၁၆၁၁ ) အနက်ရောင်ကပ်ဘေးမျိုးနွယ်၏ လျှို့ဝှက်ချက်။

ရွှမ်ထျန်းဧကရီသည် စွမ်းအားကြီးသလို အမြဲတစေ အရှိန်အဝါကြီးမားသူ ဖြစ်ပေသည်။

သူကဲ့သို့ ဧကရီတစ်ပါးက ဤအမူအရာမျိုး ပြသလာခြင်းမှာ ကြီးမားသော ကပ်ဘေးတစ်ခုက သေချာပေါက် ကျရောက်လာတော့မည်ဟူသော အဓိပ္ပာယ်ပင်။

ကျွင်းရှောင်ယောက်၏ မျက်နှာမှာလည်း လေးနက်သွားခဲ့သည်။ သူက ပြောလိုက်၏။

"အမေ၊ ကျွန်တော်က အနက်ရောင်ကပ်ဘေးမျိုးနွယ်အကြောင်းကို ပိုပြီး စိတ်ဝင်စားလာပါပြီ"

ကျွင်းရှောင်ယောက်က သူ့စိတ်ထဲမှလည်း တွေးလိုက်မိသည်။

ဤအနက်ရောင်ကပ်ဘေးမျိုးနွယ်မှာ ဖျက်ဆီးခြင်း အနက်ရောင်ကပ်ဘေးဟု ခေါ်ဆိုကြသည့်အရာနှင့် အလွန်တရာ နီးကပ်သော ဆက်စပ်မှု ရှိနေသင့်သည်။

ရွှမ်ထျန်းဧကရီကလည်း သူ၏ သားသမီးများအပေါ်တော့ ဖုံးကွယ်မထားခဲ့ပေ။

ထို့နောက်တွင်မူ၊ ရွှမ်ထျန်းဧကရီက ကျွင်းရှောင်ယောက်အား အနက်ရောင်ကပ်ဘေးမျိုးနွယ်နှင့် ပတ်သက်သည့် လျှို့ဝှက်ချက်အချို့ကို ပြောပြလိုက်သည်။

အနက်ရောင်ကပ်ဘေး အုပ်စုများဟု ခေါ်ဆိုကြသည့်အရာမှာ နိုမန်မရဏမြေတွင် နေထိုင်ကြသူများ ဖြစ်ကြသည်။

အနက်ရောင်ကပ်ဘေးအုပ်စုက မည်သည့်နေရာမှ ရောက်ရှိလာခဲ့ကြောင်းကိုမူ မည်သူမျှ မသိရှိကြပါချေ။

လူတိုင်း သိရှိထားသမျှမှာ၊ နယ်နိမိတ်ပင်လယ်တွင် နိုမန်မရဏနယ်မြေ ဖြစ်ပေါ်လာကတည်းက အနက်ရောင်ကပ်ဘေးမျိုးနွယ်မှာ တည်ရှိနေခဲ့ပြီး ဖြစ်ကြောင်းသာ ဖြစ်သည်။

အနက်ရောင်ကပ်ဘေးများက အုပ်စုတစ်စုတည်းမဟုတ်ဘဲ၊ အုပ်စုအများအပြားဖြင့် ဖွဲ့စည်းထားခြင်း ဖြစ်ပေသည်။

ဟင်းလင်းပြင်အက်ကွဲကြောင်းတွင် ထွက်ပေါ်လာခဲ့သော ပါ့မျိုးနွယ်မှာ အနက်ရောင်ကပ်ဘေးမျိုးနွယ်စုများထဲတွင် အစွမ်းအထက်ဆုံးသော မျိုးနွယ်တစ်ခု ဖြစ်သည်။

ပါ့မျိုးနွယ်သည် မွေးဖွားလာခဲ့စဉ်ကတည်းက အနှိုင်းမဲ့သော ခန္ဓာကိုယ်ကြံ့ခိုင်မှု စွမ်းအား ရှိကြသည်။

သူတို့ သွားလေရာ အရပ်တိုင်းတွင် မြေကမ္ဘာ ခြောက်သွေ့ပျက်စီးသွား၏။

သက်ရှိအားလုံး၏ အဆီအနှစ်များမှာလည်း သူတို့၏ စုပ်ယူခြင်းကို ခံရကာ အရာခပ်သိမ်း ညှိုးနွမ်းပျက်စီးသွားကြရပေသည်။

ထို့ပြင်၊ ဤမျိုးနွယ်စုတွင် အခြားသော လက္ခဏာတစ်ခု ရှိနေသေးသည်။

သူတို့က သက်ရှိသတ္တဝါအားလုံး၏ အဆီအနှစ်၊ သွေး၊ အရိုးနှင့် အသားတို့ကို စားသုံးခြင်းအား နှစ်သက်ကြသည်။

ဤအကြောင်းများကို ကြားလိုက်ရသောအခါ...

ကျွင်းရှောင်ယောက် အံ့အားသင့်သွားခဲ့ပေသည်။

ဒါက ဒဏ္ဍာရီထဲက ဖုတ်ကောင်ကြီး မဟုတ်ဘူးလား။

သူဟာ ဒဏ္ဍာရီထဲက ခြောက်သွေ့ခြင်း မိစ္ဆာအကြောင်းကို တွေးတောလိုက်မိသည်။

၎င်းဖြတ်သန်းသွားရာ အရပ်တိုင်းတွင် မြေကမ္ဘာ လောင်ကျွမ်းကာ ခြောက်သွေ့ပျက်စီးသွားခဲ့ရပေသည်။

ထို့ပြင် ခြောက်သွေ့ခြင်းမိစ္ဆာက ဖုတ်ကောင်များ၏ ဘိုးဘေးများထဲမှ တစ်ဦး ဖြစ်သည်။

ထို့ထက်၊ ပါ့မျိုးနွယ်သည်လည်း ဖုတ်ကောင်မျိုးနွယ်စုတစ်ခုပင် မဟုတ်ပါလား။

ကျွင်းရှောင်ယောက်က မိမိဘာသာ တွေးတောလိုက်မိသည်။

သို့သော်လည်း၊ နိုမန်မရဏမြေ၏ ထူးဆန်းသော ခြောက်ခြားဖွယ်ရာများကို ထည့်သွင်းစဉ်းစားကြည့်လျှင် ပါ့မျိုးနွယ်ကဲ့သို့သော မျိုးနွယ်စုတစ်ခု ထိုနေရာမှ ထွက်ပေါ်လာနိုင်ခြင်းက မဖြစ်နိုင်သောအရာတော့ မဟုတ်ပါချေ။

သို့သော်လည်း ကျွင်းရှောင်ယောက်က ပိုပြီး စိတ်ဝင်စားသည်မှာ ပါ့မျိုးနွယ်၏ လားရာကို ဖြစ်သည်။

၎င်းက သုတ်သင်ခြင်း ခံလိုက်ရပြီဖြစ်သော အမှောင်ထုကပ်ဘေးဟု ခေါ်ဆိုသည့်အရာနှင့် ဘာများ ပတ်သက်နေသနည်း။

ကျွင်းရှောင်ယောက်က တွေးတောနေစဉ်မှာပင် ရွှမ်ထျန်းဧကရီက ဆက်ပြောဆိုလိုက်သည်။

“ရှောင်အာ... ဟင်းလင်းပြင်အက်ကွဲကြောင်းတစ်ခု ထွက်ပေါ်လာတဲ့အချိန်တိုင်းမှာ အနက်ရောင်ကပ်ဘေးမျိုးနွယ် ပေါ်လာခဲ့မယ်ဆိုရင် အဲဒါက ဒီလောကကြီးဟာ အနက်ရောင်ကပ်ဘေးမျိုးနွယ်ရဲ့ ပစ်မှတ်ထားခြင်းကို ခံလိုက်ရပြီဆိုတာ သက်သေပြနေတာပဲ"

"တကယ်လို့ လောကတစ်ခုခုက အနက်ရောင်ကပ်ဘေးမျိုးနွယ်ရဲ့ ပစ်မှတ်ထားခြင်းကို ခံရမယ်ဆိုရင်၊ နောက်ဆုံးရလဒ်ကတော့ လုံးဝဥဿုံ သုတ်သင်ရှင်းလင်းခံရဖို့၊ သက်ရှိသတ္တဝါအားလုံး ပျက်သုဉ်းသွားဖို့နဲ့ သေဆုံးခြင်းနယ်ပယ်တစ်ခုအဖြစ် ပြောင်းလဲသွားဖို့ပဲ ရှိလိမ့်မယ်"

"လောကတစ်ခုလုံးရဲ့ အစစ်အမှန် အဆီအနှစ်တွေဟာ အနက်ရောင်ကပ်ဘေးမျိုးနွယ်ရဲ့ စုပ်ယူခြင်းကို ခံရလိမ့်မယ်။ သူတို့က ကျိုင်းကောင်တွေလိုပဲ၊ သူတို့ သွားလေရာ အရပ်တိုင်းမှာ အရာအားလုံး ပျက်စီးသွားရတတ်တယ်"

ရွှမ်ထျန်းဧကရီသည် လေးနက်လှသော လေသံဖြင့် ပြောလိုက်သည်။

ကျွင်းရှောင်ယောက်၏ မြင့်မြတ်ခန္ဓာ တာအိုသန္ဓေကဲ့သို့သော နတ်ဆိုးဆန်လှသည့် ပါရမီဖြင့်ဆိုလျှင်...

သူ့အား နှစ်ပေါင်းတစ်ရာခန့် အချိန်ပေးလိုက်ပါက အနက်ရောင်ကပ်ဘေးမျိုးနွယ်စုတွေထဲကမှ ဘယ်သူ့ကိုမှ ကြောက်ရွံ့နေစရာ လိုအပ်လိမ့်မည် မဟုတ်ချေ။

သို့သော်လည်း အခုတော့၊ ကျွင်းရှောင်ယောက်၏ ခန္ဓာအသစ်မှာ အသက်တစ်ဆယ့်ငါးနှစ်သာ ရှိသေးသည်။

ဤအချိန်တွင်၊ ကမ္ဘာပျက်ကပ် ကပ်ဘေးကြီးတစ်ခု ဆိုက်ရောက်လာခြင်းက အလွန်တရာ ကံဆိုးလှသည်ဟုသာ ဆိုနိုင်သည်။

ထိုစကားကို ကြားလိုက်ရသောအခါ ကျွင်းရှောင်ယောက် ဆွံ့အသွားလေသည်။

သူ၏ ကံကြမ္မာက ဤမျှအထိ ဆိုးရွားလိမ့်မည်ဟု သူ မထင်မှတ်ထားခဲ့မိချေ။

တောင်ပိုင်းကြယ်စင်စုလောကသို့ ရောက်ရှိလာသည်နှင့် ချက်ချင်းပင်၊ ဤလောကကြီးမှာ ကမ္ဘာပျက်ကပ် ကပ်ဘေးကြီးတစ်ခုနှင့် တိုက်ရိုက် ရင်ဆိုင်လိုက်ရချေပြီ။

၎င်းက သူ သွားလေရာ အရပ်တိုင်းတွင် လူတွေ သေဆုံးတတ်သည့် ကံဆိုးခြင်း၏ ဘုရင်ကြီးတစ်ပါးနှင့်ပင် တူလှသည်။

မျှော်လင့်ထားသည့်အတိုင်း၊ သူ၏ ကံကြမ္မာမှာ ကံကြမ္မာကျင့်စဉ်ငယ်ကို အသုံးပြုခဲ့ခြင်းကြောင့် ဖြစ်ပေါ်လာသော ကုန်ခမ်းမှု၏ သက်ရောက်ခြင်းကို ခံနေရဆဲပင်။

နောက်ပိုင်းတွင်၊ ကံကြမ္မာကို ပြန်လည်ဖြည့်တင်းရန်အတွက် ကံကြမ္မာ၏ကလေးငယ်များကို အရေးတကြီး ရိတ်သိမ်းသင့်သည်။

ရွှမ်ထျန်းဧကရီက ဆက်လက် ပြောဆိုလိုက်၏။

"ပုံမှန်ဆိုရင်တော့ အမေတို့ရဲ့ တောင်ပိုင်းကြယ်စင်စုလောကဟာ ကျယ်ပြောပြီး အတိုင်းအဆမရှိတဲ့ လောကကြီးတစ်ခု ဖြစ်တာမို့၊ သာမန် နတ်ဆိုးမျိုးနွယ်စုတွေက တိုက်ခိုက်သိမ်းပိုက်နိုင်မှာ မဟုတ်ပါဘူး"

"အမေ ပူပန်နေမိတာက ပါ့မျိုးနွယ်စုရဲ့ ဘုရင်တစ်ပါး ပေါ်လာမှာကိုပဲ"

"ပါ့မျိုးနွယ်ရဲ့ ဘုရင် ဟုတ်လား"

ကျွင်းရှောင်ယောက်၏ မျက်နှာထက်တွင် သံသယများဖြင့် မေးမြန်းလိုက်သည်။

ရွှမ်ထျန်းဧကရီက ရှင်းပြလိုက်၏။

"ပါ့မျိုးနွယ်စုမှာလည်း မတူညီတဲ့ အဆင့်အတန်းတွေ ရှိကြတယ်၊ ဒါက သူတို့ရဲ့ မျက်လုံးအရောင်နဲ့ ခွဲခြားရတာလေ။ အဲဒါကိုတော့ မင်း မြင်ခဲ့လိမ့်မယ်လို့ အမေယုံတယ်"

ကျွင်းရှောင်ယောက်က ခေါင်းညိတ်လိုက်သည်။

သူတော်စင်နယ်ပယ် ကိုးခုရှိ ပါ့မျိုးနွယ်များတွင် အဖြူရောင် မျက်လုံးများ ရှိကြကြောင်း သူ သိရှိခဲ့သည်။

အဓိပတိနယ်ပယ် ခုနစ်ခုရှိ ပါ့မျိုးနွယ်များ၏ မျက်လုံးများမှာမူ အစိမ်းရောင် ရှိကြ၏။

အရောင် အနု့အရင့်သာ ကွဲပြားမှုများ ရှိကြသည်။

"ပြီးတော့ ပါ့မျိုးနွယ်စုရဲ့ ခေါင်းဆောင်တွေကတော့ ဧကရာဇ်တစ်ပါးနဲ့ ဘုရင်သုံးပါးပဲ"

"သူတို့ရဲ့ စွမ်းအားက အရမ်း ကြောက်မက်ဖွယ်ကောင်းတယ်။ ဘုရင်သုံးပါးကတင် လုံလောက်အောင် အစွမ်းထက်နေခဲ့ပြီလေ၊ ဧကရာဇ်ဆိုရင် စိတ်ကူးယဉ်ဖို့တောင် ခက်ခဲတယ်"

"ကံကောင်းချင်တော့ ပါ့မျိုးနွယ်စုရဲ့ အဲဒီဧကရာဇ်ဟာ ခေတ်ကာလအတော်များများကတည်းက ပျောက်ကွယ်သွားခဲ့ပုံရတယ်"

"ဒါပေမယ့်လည်း၊ ဘုရင်သုံးပါးက ပါ့မျိုးနွယ်စုကို ဦးဆောင်ဖို့ လုံလောက်နေပါသေးတယ်။ အမေ ပူပန်နေတာက ပါ့မျိုးနွယ်စုရဲ့ ဘုရင်သုံးပါးထဲက တစ်ပါးပါးက တောင်ပိုင်းကြယ်စင်စုလောကကို မျက်စိကျနေတာလား ဆိုတာပဲ"

ရွှမ်ထျန်းဧကရီ၏ မျက်ဝန်းများတွင် ပူပန်မှု အရိပ်အယောင် အနည်းငယ် ရှိနေပေသည်။

သူက နဝမကပ်ဘေး ဧကရာဇ်တစ်ပိုင်းအဆင့် ကျွမ်းကျင်သူတစ်ဦး ဖြစ်သော်လည်း...

ပါ့မျိုးနွယ်စု၏ ဘုရင်သုံးပါး၏ စွမ်းအားမှာ သာမန် ဧကရာဇ်များထက်ပင် များစွာ သာလွန်သည်။

သူတို့က ထိပ်ဆုံးအဆင့်သို့ ရောက်ရှိနေခဲ့ကြပေသည်။

ကျွင်းရှောင်ယောက်၏ မျက်ဝန်းများတွင် တွေးတောဟန်တစ်ခု ထွက်ပေါ်လာခဲ့ပြီး သူက ပြောလိုက်သည်။

"တောင်ပိုင်းကြယ်စင်စုလောကအနေနဲ့ ဒါကို ဖြေရှင်းဖို့ တကယ်ပဲ ဘာနည်းလမ်းမှ မရှိတော့ဘူးလား"

တောင်ပိုင်းကြယ်စင်စုလောကသည် မည်သို့ပင်ဖြစ်စေ ကျယ်ပြောကာ ရှုပ်ထွေးလှသော လောကကြီးတစ်ခု ဖြစ်သည်။

ဤကဲ့သို့သော လောကကြီးမျိုးမှာ၊ ကျယ်ပြောသော နယ်နိမိတ်ပင်လယ်တွင်ပင် လွန်စွာ ရှားပါးနေသေးသည်။

ထိုအလတ်စား သို့မဟုတ် အသေးစား လောကငယ်များနှင့် မတူညီဘဲ ပျက်စီးသွားရန် ထိုမျှလောက် မလွယ်ကူပါချေ။

ရွှမ်ထျန်းဧကရီက ခေါင်းညိတ်လိုက်သည်။

"သေချာတာပေါ့... ဒီလောက်ဘယ်လွယ်ပါ့မလဲ"

"တောင်ပိုင်းကြယ်စင်စုလောကမှာ ရှင်သန်နေထိုင်ကြတဲ့ အ‌ေမတို့လို အင်အားစုတွေကို ထားလိုက်ဦး"

"တောင်ပိုင်းကြယ်စင်စုလောက ကိုယ်တိုင်ကတောင် တုံ့ပြန်မှုတွေ ရှိလာလိမ့်မယ်"

"အို... အမေပြောချင်တာက..."

ကျွင်းရှောင်ယောက်၏ မျက်ဝန်းများ အနည်းငယ် တောက်ပသွားခဲ့သည်။

"ရှောင်အာ... လောကတိုင်းမှာ သူတို့ရဲ့ ကိုယ်ပိုင်စိတ်ဆန္ဒ ရှိကြတယ်ဆိုတာ မင်း သိလား"

"တစ်ခုတည်းသော ကွဲပြားချက်ဆိုလို့ စိတ်ဆန္ဒရဲ့ အင်အားအပေါ်မှာပဲ မူတည်တယ်"

"တကယ်တော့ လောကငယ်တစ်ခုမှာတောင် အရိုးရှင်းဆုံးနဲ့ အဝေဝါးဆုံးသော အသိစိတ်တစ်ခု ပါဝင်နေတတ်ပါတယ်"

"လောကငယ်အဆင့်မှာတင် အဲဒီလိုမျိုး စိတ်ဆန္ဒက မသိမသာ တည်ရှိနေခဲ့ပြီးပြီ"

"အလတ်စား ကမ္ဘာလောက၊ မဟာကမ္ဘာလောကနဲ့ ပိုပြီး မြင့်မားတဲ့ အဆင့်ရှိတဲ့ စကြဝဠာတွေမှာဆိုရင်တော့ အဲဒီစိတ်ဆန္ဒက ပိုပြီးတော့တောင် အစွမ်းထက်သေးတယ်"

"ဒါကြောင့် တောင်ပိုင်းကြယ်စင်စုလောကရဲ့ စိတ်ဆန္ဒက သူ့ရဲ့ ပျက်စီးခြင်းကို ငြိမ်ခံပြီး စောင့်ဆိုင်းနေမှာ မဟုတ်တာကတော့ သေချာပါတယ်"

ရွှမ်းထျန်းဧကရီ၏ စကားများက ကျွင်းရှောင်ယောက်၏ အာရုံကို ဖမ်းစားလိုက်သည်။

အမှန်တကယ်ပင်။

ထို့ကြောင့်ပင်၊ ကောင်းကင်ကိုးပါး အင်မော်တယ်နယ်မြေ တွင်လည်း အင်မော်တယ်နယ်ပယ်၏ စိတ်ဆန္ဒ ဟူသော တည်ရှိမှု ရှိနေခဲ့ခြင်း ဖြစ်သည်။

အင်မော်တယ်နယ်မြေ၏ စိတ်ဆန္ဒ၊ ကောင်းကင်လမ်းစဥ်၊ ကောင်းကင်ဘုံ မည်သို့ပင် ခေါ်ဆိုပါစေ အဓိပ္ပာယ်ကတော့ တစ်ခုတည်းသာ ဖြစ်သည်။

စန်းမျိုးနွယ်ကို ကောင်းကင်၏ အချစ်တော်နှင့် ကောင်းကင်လမ်းစဉ်၏ ရင်သွေးများဟု လူသိများကြ၏။

၎င်းက စန်းမျိုးနွယ်၏ အဖွဲ့ဝင်တစ်ဦးဦးသည် အင်မော်တယ်နယ်မြေ၏ စိတ်ဆန္ဒနှင့် တစ်စုံတစ်ရာသော ထိတွေ့မှုမျိုး ရှိခဲ့ဖူးသောကြောင့် ဖြစ်နိုင်ပါမည်လော။

ကျွင်းယောက်ရှောင်၏ စိတ်ထဲတွင် အတွေးအမြင်သစ်များ ပေါ်လာခဲ့ရသည်။

သို့သော်လည်း ယခုအခါ သူက နယ်နိမိတ်ပင်လယ်တွင် ရှိနေခဲ့ခြင်း ဖြစ်ရာ ထိုမျှလောက်အထိ အဝေးကြီး တွေးတောနေရန် မလိုအပ်သေးပါချေ။

သူ အင်မော်တယ်နယ်ပယ်သို့ ပြန်လည်ရောက်ရှိသည့် အခါမှ စန်းမျိုးနွယ်၏ ကိစ္စရပ်ကို သဘာဝကျစွာ စုံစမ်းစစ်ဆေးပြီး ကိုင်တွယ်ဖြေရှင်းရမည် ဖြစ်သည်။

တောင်ပိုင်းကြယ်စင်စုလောက၏ လက်ရှိအခြေအနေမှာလည်း နားလည်ရန် လွယ်ကူပေသည်။

အနက်ရောင်ကပ်ဘေးမျိုးနွယ်စုတစ်ခုဖြစ်သော ပါ့မျိုးနွယ်မှာ ဗိုင်းရပ်စ်တစ်ခုကဲ့သို့ဖြစ်၍ တောင်ပိုင်းကြယ်စင်စုလောကကတော့ လူသားခန္ဓာကိုယ် ဖြစ်သည်။

ဗိုင်းရပ်စ်ပိုးတစ်ခု လူသားခန္ဓာကိုယ်ထဲသို့ ကျူးကျော်ဝင်ရောက်လာသည့်အခါ၊ ခန္ဓာကိုယ်အနေဖြင့် မည်ကဲ့သို့ မတုံ့ပြန်ဘဲ နေမည်နည်း။

၎င်းက ဗိုင်းရပ်စ်ကို တိုက်ဖျက်ရန်အတွက် ပဋိပစ္စည်းများကို ထုတ်လုပ်လိမ့်မည် ဖြစ်သည်။

မျှော်လင့်ထားသည့်အတိုင်းပင်၊ ရွှမ်းထျန်းဧကရီ နောက်ထပ် ပြောဆိုလိုက်သည့်အရာမှာ သူ့စိတ်ထဲတွင် ရှိနေခဲ့သည့်အရာနှင့် ကွက်တိပင် ဖြစ်သည်။

"တောင်ပိုင်းကြယ်စင်စုလောက အန္တရာယ်နဲ့ ရင်ဆိုင်ရတဲ့ အချိန်မှာ အဲဒါက လောကရဲ့အရွေးချယ်ခံ ဒါမှမဟုတ် လောကရဲ့ကလေးငယ် ထွက်ပေါ်လာဖို့ လှုံ့ဆော်ပေးနိုင်တယ်"

"လောကရဲ့ကလေးငယ်က ဒီလောကကြီးရဲ့ အနာဂတ် အုပ်ချုပ်သူ ဖြစ်လာလိမ့်မယ်။ ပြီးတော့ သူက လောကတစ်ခုလုံးရဲ့ မူလရင်းမြစ်နဲ့ ကံကြမ္မာရဲ့ ကောင်းချီးပေးခြင်းကို ခံရလိမ့်မယ်"

"ဒီလိုမျိုး တည်ရှိမှုတစ်ခု မွေးဖွားလာမှသာ တောင်ပိုင်းကြယ်စင်စုလောကကို ဒီအကြပ်အတည်းကနေ တွန်းလှန်ဖို့ ကူညီပေးနိုင်မှာ"

ရွှမ်ထျန်းဧကရီက ပြောလိုက်သည်။

ကျွင်းရှောင်ယောက်လည်း နောက်ဆုံးတွင် နားလည်သွားခဲ့ပြီ။

လောက၏ကလေးငယ် ဆိုသည်မှာ၊ တောင်ပိုင်းကြယ်စင်စုလောကမှ ထုတ်လုပ်လိုက်သော "ပဋိပစ္စည်း"ပင် ဖြစ်သည်။

ဤလောက၏ ကလေးငယ်မှာ ပါ့မျိုးနွယ် ကျူးကျော်မှုကို ကိုင်တွယ်ရန်အတွက် ရည်ရွယ်ထားခြင်း ဖြစ်၏။

သို့သော်...

ဒါက သူ့အတွက် ပြည့်စုံမနေဘူးလား။

ကျွင်းရှောင်ယောက်က ကံကြမ္မာကျင့်စဉ်ငယ်ကို အသုံးပြုစဉ် ဆုံးရှုံးသွားခဲ့သော ကံကြမ္မာကို မည်သို့မည်ပုံ ပြန်လည်ဖြည့်တင်းရမည်ကို တွေးတောနေခဲ့ရုံမျှသာ ရှိသေးသည်။

ယခု လတ်လတ်ဆက်ဆက် ကြက်သွန်မြိတ်လေး ပေါ်ပေါက်လာတော့မည် ဖြစ်သည်။