အခန်း ၁၆၁၆

အခန်း ( ၁၆၁၆ ) အနှိမ်ခံလုလင်နှင့် ကောင်းကင်ကိုးပါးမှ နတ်ဘုရားမတို့ ဆုံစည်းကြရာ။

ဤရွှမ်ကျုံးဂိုဏ်းသား တပည့်များမှာ သတိလက်လွတ်ဖြင့် ငေးမောကြည့်နေကြတော့သည်။

ယွင်ရှီ၏ အလှတရားက လောကကြီးထဲတွင် အမှန်တကယ် ရှားပါးလှသည်။

တောင်ပိုင်းကြယ်စင်စုလောကတစ်ခုလုံးကို ကြည့်လျှင်ပင်၊ သူက အလှဆုံးများထဲမှ တစ်ဦး ဖြစ်နေသေးသည်။

လောကကြီးကို တစ်ခါမျှ မမြင်ဖူးကြသည့် လင်းယွင်ဂြိုဟ်ပေါ်ရှိ လူငယ်လေးများဆိုလျှင် ပြောနေရန်ပင် မလိုပါချေ။

ယွင်ရှီကမူ ဤကဲ့သို့သော အကြည့်မျိုးကို ကျင့်သားရနေပြီ ဖြစ်သဖြင့် မည်သို့မျှ မခံစားရပါ။

ယခုအချိန်တွင် သူမ တွေးတောနေသည်မှာ တစ်ခုသာ ရှိသည်။

လေ့ကျင့်မှုကို မြန်မြန်ဆန်ဆန် အဆုံးသတ်ရန်နှင့် သူမ၏ အစ်ကိုကြီးထံသို့ ပြန်သွားရန်ပင်။

အကယ်၍ ကျွင်းရှောင်ယောက်က သူမ၏ ခေါင်းကို ပွတ်သပ်ပေးကာ ထပ်မံ၍ ချီးမွမ်းပေးမည်ဆိုလျှင်...

၎င်းက ယွင်ရှီအတွက် အကြီးမားဆုံးသော ပျော်ရွှင်မှုနှင့် ဝမ်းမြောက်မှု ဖြစ်ပေလိမ့်မည်။

"အရှင်မင်းသမီး... ကျုပ်တို့ရဲ့ ရွှမ်ကျုံးဂိုဏ်းက နိမ့်ကျပါတယ်၊ ဒါက မင်းသမီး တည်းခိုရမယ့်နေရာ ဖြစ်နေတာကို စိတ်ထဲမထားဖို့ မျှော်လင့်ပါတယ်"

ရွှမ်ကျုံးဂိုဏ်း၏ ဂိုဏ်းချုပ်က လင်းယွင်ဂြိုဟ်ပေါ်ရှိ အသန်မာဆုံးသော ပုဂ္ဂိုလ်ကြီးများထဲမှ တစ်ဦး ဖြစ်သည်။

သို့သော်လည်း ဤအခိုက်အတန့်တွင်မူ၊ သူက အစေခံတစ်ဦးထက်ပင် ပိုမိုနိမ့်ကျလှသော ပုံစံဖြင့် လွန်စွာ နှိမ့်ချသော အမူအရာကို ပြသထားခဲ့ပေသည်။

ယွင်ရှီက အနည်းငယ် ခေါင်းညိတ်ပြလိုက်သည်။

သူက အလိုလိုက်ခံထားရသဖြင့် ထောင်လွှားသော မင်းသမီးအမျိုးအစား မဟုတ်ပါချေ။

သို့သော်လည်း သူသည် မြင့်မြတ်သော ရွှမ်ထျန်းနတ်ဘုရားမင်းဆက်တွင် မွေးဖွားလာခဲ့ပြီး အနှိုင်းမဲ့သော အစ်ကိုကြီးတစ်ဦးလည်း ရှိနေခဲ့သည်။

ထိုမွေးရာပါ သန့်စင်မွန်မြတ်ခြင်းကပင် လူတို့ကို အမှန်တကယ် ရိုသေလေးစားခြင်း ခံစားချက်ကို ဖြစ်ပေါ်စေသည်။

ဤမင်းသမီးလေးက တော်တော်လေး ကောင်းမွန်သော စိတ်နေသဘောထားနှင့် အေးချမ်းသော သဘာဝ ရှိနေသည်ကို သတိပြုမိသောအခါမှသာ...

ရွှမ်ကျုံးဂိုဏ်း၏ ဂိုဏ်းချုပ်မှာ တိတ်တဆိတ် စိတ်သက်သာရာရကာ သက်ပြင်းချလိုက်မိသည်။

ထို့နောက် ရွှမ်ကျုံးဂိုဏ်းချုပ်က ကောင်းမွန်စွာ သူမအား တည်ခင်းဧည့်ခံခဲ့လေသည်။

ရက်အနည်းငယ် ကြာပြီးနောက်...

ရောက်ရှိလာကြသော အင်မော်တယ်အင်အားစု အသီးသီးမှ တပည့်များအားလုံးက ဟင်းလင်းပြင်အက်ကွဲကြောင်းသို့ သူတို့၏ လေ့ကျင့်မှုခရီးစဉ်များကို စတင်ခဲ့ကြသည်။

ယွင်ရှီ၊ ရှန်းလဲ့နှင့် ရွှမ်းထျန်းနတ်ဘုရားမင်းဆက်၏ အခြားသော ပါရမီရှင်များလည်း ထွက်ခွာခဲ့ကြ၏။

ရွှမ်ကျုံးဂိုဏ်းမှ တပည့်အချို့ကလည်း အစေခံများကဲ့သို့ နောက်ကွယ်မှ လိုက်ပါလာခဲ့ကြပေသည်။

အခြားတစ်ဖက်တွင်မူ...

ဝေးလံခေါင်ဖျားသော အရပ်မှ အလယ်ဗဟိုဒေသသို့ ရောက်ရှိလာသော စူးယုသည်လည်း ဟင်းလင်းပြင်အက်ကွဲကြောင်းဆီသို့ ဦးတည်သွားခဲ့သည်။

သူသည် မိမိကိုယ်ကိုယ် ကံကြမ္မာ၏သားတော်ဟု ယုံကြည်ထားပြီး၊ ဤမျှကြီးမားသော ကံကောင်းမှုများနှင့်အတူ မည်သည့်ပြဿနာမျှ ရှိမနေသင့်ဟု ယုံကြည်ထား၏။

အကယ်၍ သူက အကျပ်အတည်းတစ်ခုနှင့် ရင်ဆိုင်ရလျှင်ပင်၊ အဆုံးသတ်တွင်မူ အခြေအနေကို ပြောင်းလဲပစ်နိုင်သင့်ပေသည်။

စူးယု၏ ခန့်မှန်းချက်က အမှန်တကယ် မှန်ကန်နေခဲ့သည်။

သူသည် ဟင်းလင်းပြင်အက်ကွဲကြောင်းထဲသို့ ဝင်ရောက်လိုက်သည်နှင့် ဖုတ်ကောင်နတ်ဆိုးနှင့် ရင်ဆိုင်ခဲ့ရသည်။

အန္တရာယ်များသော အခြေအနေ ကြုံခဲ့ရ၏။

သို့သော်လည်း နောက်ဆုံးတွင်မူ သူက ၎င်းကို သတ်ဖြတ်နိုင်ခဲ့ပေသည်။

ထို့ပြင်၊ မမျှော်လင့်ထားသော ရှာဖွေတွေ့ရှိမှုတစ်ခုက စူးယုကို ပျော်ရွှင်စေခဲ့သည်။

၎င်းမှာ ဤနတ်ဆိုးဝိညာဉ်များကို ကျောက်စိမ်းဆွဲပြားက သန့်စင်ပေးနိုင်ခြင်းပင်။

ထို့နောက် ၎င်းက သန့်စင်သော စွမ်းအင်အဖြစ် ပြောင်းလဲသွားခဲ့ပြီး၊ သူက ၎င်းကို စုပ်ယူလိုက်သည်။

ဤအရာကို သိရှိရသည့်အခါ စူးယုမှာလည်း အလွန် အူမြူးသွားတော့သည်။

ဤဟင်းလင်းပြင်အက်ကွဲကြောင်းက သူ့အတွက် ကျင့်ကြံရန် ရတနာသိုက်တစ်ခု ဖြစ်နေခဲ့ပြီ ဖြစ်သည်။

ထို့ပြင်၊ စူးယုက ပိုမိုမြင့်မားသော လောကကြီးများမှ လာရောက်ကြသည့် ပါရမီရှင်များ မည်မျှအထိ သန်မာသည်ကိုလည်း မြင်တွေ့ချင်နေခဲ့ပေသည်။

သူ၏ ကံကောင်းမှုများနှင့်ဆိုလျှင်၊ သူက သူတို့ထဲမှ အချို့နှင့် ဆက်နွှယ်မှုအချို့ပင် ပြုလုပ်နိုင်လောက်သည်။

ဥပမာအားဖြင့်၊ အချို့သော ပုံပြင်ပြောသူများ ပြောပြလေ့ရှိသည့် ပုံပြင်များထဲတွင်...

ဆင်းရဲသား ကောင်လေးတစ်ယောက်က ကောင်းကင်ကိုးပါးမှ နတ်ဘုရားမနှင့် ဆုံတွေ့သည့် ပုံပြင်မျိုးပင်။

ဤအကြောင်းများကို တွေးတောရင်း စူးယုက ဟင်းလင်းပြင်အက်ကွဲကြောင်း၏ အနက်ရှိုင်းဆုံးအပိုင်းသို့ ဖြည်းညှင်းစွာ စတင်ဝင်ရောက်ခဲ့သည်။

သို့သော်လည်း သူက ပိုမိုနက်ရှိုင်းစွာ ဝင်ရောက်လေလေ၊ ပို၍ မျက်မှောင်ကုတ်မိလေလေပင်။

ဟင်းလင်းပြင်အက်ကွဲကြောင်း၏ အန္တရာယ်က သူ၏ မျှော်လင့်ချက်များကို ကျော်လွန်နေပုံရသည်။

သူ့ထံတွင် ထူးခြားသော အထောက်အထားနှင့် ကြီးမားသော ကံကောင်းမှုများ ရှိနေသော်လည်း...

စူးယုက သူသာ ဆက်လက်၍ ပိုမိုနက်ရှိုင်းစွာ ဝင်ရောက်သွားလျှင် အခြေအနေကို မသေချာတော့ပေ။

စူးယုက တွန့်ဆုတ်သွားပြီး ခတ္တမျှ နောက်ဆုတ်ကာ အနားယူရန် ပြင်ဆင်နေစဉ်မှာပင်...

ရုတ်တရက်...

"ဂီး..."

နားကွဲမတတ် အော်ဟစ်သံတစ်ခုနှင့်အတူ အားကောင်းသော အရှိန်အဝါဖိအားများ ထွက်ပေါ်လာခဲ့သည်။

ကောင်းကင်တစ်ခုလုံးကို ဖုံးလွှမ်းလောက်အောင် ကြီးမားသော ဂဠုန်ငှက်နတ်ဆိုးတစ်ကောင်က ဟင်းလင်းပြင်မှ ပြင်းထန်စွာ ထိုးဆင်းလာတော့သည်။

ထိုဂဠုန်ငှက်ကြီး၏ တောင်ပံများက နေရောင်ခြည်ကိုပင် ကွယ်ပျောက်စေခဲ့သည်။

၎င်း၏ အတောင်ပံများကို တစ်ချက်ခတ်လိုက်ရုံဖြင့်၊ ဟင်းလင်းပြင်ကို ဆုတ်ဖြဲပစ်နိုင်ပေသည်။

"ပြဿနာပဲ"

စူးယု၏ မျက်နှာအမူအရာ အကြီးအကျယ် ပြောင်းလဲသွားခဲ့ရသည်။

ဤနတ်ဆိုး၏ စွမ်းအားက သူ၏ အကန့်အသတ်များကို ကျော်လွန်နေခဲ့ချေပြီ။

အကယ်၍ ဤအကောင်မျိုးကို ရင်ဆိုင်တိုက်ခိုက်မည်ဆိုလျှင်၊ သူ့ထံတွင် ကြီးမားသည့် ကံကောင်းမှုများ ရှိနေစေဦးတော့...

အခြေအနေဆိုးများ ဖြစ်မလာပါဟု အာမ မခံနိုင်တော့ပါ။

စူးယု၏ နှလုံးခုန်သံများမှာ ရူးသွပ်စွာ မြန်ဆန်လာခဲ့သည်။

သူ့ခန္ဓာကိုယ်မှာလည်း မြှားတစ်စင်းကဲ့သို့ ပစ်ထွက်သွားခဲ့၏။

ဤကဲ့သို့ အရေးကြီးသော အခိုက်အတန့်တွင်...

နတ်ဘုရားဆန်သော အလင်းတန်းတစ်ခုက ကောင်းကင်ယံကို ဖြတ်သန်းလျက် ငဠုန်ငှက်နတ်ဆိုးကို ထိမှန်သွားခဲ့သည်။

သွေးမိုးများ ဖြာကျလာ၏။

စူးယုလည်း မှင်တက်သွားခဲ့ရပြီး ထိုနတ်ဘုရားဆန်သော အလင်းတန်း ထွက်ပေါ်လာရာ အရပ်သို့ ကြည့်လိုက်မိသည်။

ရုတ်တရက်၊ သူ၏ မျက်နှာအမူအရာမှာ ခဏမျှ အေးခဲသွားခဲ့ရသည်။

သူ့ခန္ဓာကိုယ်မှာလည်း မိုးကြိုးပစ်ခံလိုက်ရသကဲ့သို့ ခံစားလိုက်ရပြီး ထိုနေရာမှာပင် မလှုပ်မယှက် တောင့်တောင့်ကြီး ဖြစ်သွား၏။

၎င်းက သူ့ရှေ့တွင် ရှိနေသမျှ အရာအားလုံး ပျောက်ကွယ်သွားသကဲ့သို့ပင်။

ကျန်ရှိနေခဲ့သည်မှာ အံ့မခန်း လှပလွန်းသော ပုံရိပ်လေးတစ်ခုသာ ဖြစ်သည်။

သူမက လွတ်လပ်စွာ စီးဆင်းနေသော အနက်ရောင် ဆံနွယ်များနှင့် အစိမ်းရောင် အဝတ်အစားများကို ဝတ်ဆင်ထားသည့် မိန်းကလေးတစ်ဦး ဖြစ်ပေသည်။

သေမျိုးလူသားလောကသို့ သက်ဆင်းလာသော နတ်သမီးတစ်ပါးကဲ့သို့...

သူမ၏ မျက်နှာက ဖြူနု၍ အပြစ်အနာအဆာ ကင်းမဲ့ကာ အလွန်တရာ လှပသည်။

သူမ၏ မျက်ဝန်းများမှာ ကြယ်တာရာများကဲ့သို့ ဖြစ်ပြီး မျက်တောင်များမှာလည်း ရှည်လျားကော့ညွှတ်နေ၏။

ဇင်ယော်တောင်ကဲ့သို့ မျက်ခုံးအစုံလည်း ရှိသေးသည်။

သူမ၏ အစိမ်းရောင် ဝတ်စုံအနားစများက လွင့်ပျံနေခဲ့ရာ၊ ရွှံ့နွံထဲမှ ရုန်းထွက်လာသော်လည်း ပတ်ဝန်းကျင်၏ အရိပ်အယောင်များ မထင်ကျန်နေခဲ့သော ကြာပန်းတစ်ပွင့်ကဲ့သို့...

အသက်ရှူမှားလောက်အောင် လှချင်တိုင်းလှနေတော့သည်။

စူးယု၏ ဦးနှောက်တစ်ခုလုံး ဟာလာဟင်းလင်း ဖြစ်သွားခဲ့ရသည်။

ဤလောကတွင် ဤကဲ့သို့သော နတ်သမီးမျိုး ရှိနေနိုင်သေးပါသလား။

ဤမိန်းကလေးနှင့် နှိုင်းယှဉ်လျှင်၊ သူ ယခင်က ဆုံတွေ့ခဲ့ဖူးသော မိစ္ဆာမျိုးနွယ် မင်းသမီးနှင့် တော်ဝင်မင်းသမီးများမှာ လုံးဝ အရေးမပါတော့ပေ။

ရုပ်ရည်နှင့် စိတ်နေသဘောထားအရဆိုလျှင်၊ သူတို့က မသူ့ရှေ့တွင် ရှိနေသော မိန်းကလေး၏ တစ်သောင်းပုံတစ်ပုံကိုပင် မမှီနိုင်ပါ။

ဒါက မည်ကဲ့သို့သော အနှိုင်းမဲ့ အလှတရားမျိုး ဖြစ်သနည်း။

စူးယု၏ လောကအမြင်တစ်ခုလုံး အကြီးအကျယ် တုန်လှုပ်သွားခဲ့ရသည်။

ပိုမိုအရေးကြီးသည်မှာ၊ စွမ်းအားကြီးမားသော ငဠုန်ငှက်နတ်ဆိုးက သူ့ရှေ့ရှိ မိန်းကလေး၏ တိုက်ကွက်တစ်ကွက်တည်းဖြင့် ချက်ချင်း သတ်ဖြတ်ခြင်း ခံလိုက်ရခြင်း ဖြစ်သည်။

ဒါက ဤမိန်းကလေးမှာ လင်းယွင်ဂြိုဟ်မှ ဒေသခံတစ်ဦး မဟုတ်ကြောင်း သက်သေပြရန် လုံလောက်ပေသည်။

ဆန့်ကျင်ဘက်အနေဖြင့်၊ သူက ပိုမိုမြင့်မားသော လောကကြီးမှ တည်ရှိမှုများ ဖြစ်နိုင်သည်။

သူမ၏ ရုပ်ရည်၊ အငွေ့အသက်၊ ပါရမီ၊ စွမ်းအားနှင့် အဆင့်အတန်း အားလုံးက အပြစ်ပြောစရာ မရှိအောင် ပြည့်စုံလှပေသည်။

ကောင်းကင်ယံထက်မှ နတ်ဘုရားမတစ်ပါးကဲ့သို့သော တည်ရှိမှုမျိုးပင် ဖြစ်သည်။

ဤမိန်းကလေးမှာ သဘာဝအတိုင်း အတွေ့အကြုံရှာဖွေရန် ရောက်ရှိလာသော ယွင်ရှီ ဖြစ်ပေသည်။

ထိုနေရာတွင် သစ်သားရုပ်ကြီးတစ်ခုကဲ့သို့ တွေဝေငေးမောလျက် မတ်တပ်ရပ်နေသော ကောင်လေးကို မြင်တွေ့ရသောအခါ...

ယွင်ရှီက တစ်ချက်မျှသာ ကြည့်လိုက်ပြီး အကြည့်များကို လွှဲဖယ်လိုက်သည်။

အကယ်၍ သူမသည်သာ ယခင်က သူမ၏ အစ်ကိုကြီးကို မမြင်တွေ့ဖူးခဲ့ဘူးဆိုလျှင်...

သူမအနေဖြင့် မိမိရှေ့တွင်ရှိသော ကောင်လေး၌ ထူးခြားသော အရာတစ်ခုခု ရှိနေသည်ဟု ခံစားမိကောင်း ခံစားမိလိမ့်မည်။

၎င်းက သူ၏ ချောမောသော ရုပ်ရည်သွင်ပြင်ကြောင့် မဟုတ်ပါချေ။

သူ့ထံတွင် လူတို့ကို သိလိုစိတ်ဖြစ်ပေါ်စေသော ထူးခြားသည့် ဆွဲအားတစ်ခု အမြဲတမ်း ရှိနေခြင်းကြောင့် ဖြစ်သည်။

သို့သော်လည်း၊ ကျွင်းရှောင်ယောက်ကို မြင်တွေ့ပြီးနောက်တွင်မူ...

ယွင်ရှီက တောင်ပိုင်းကြယ်စင်စုလောကတစ်ခုလုံးတွင် သူမ၏ အစ်ကိုကြီးထက် ပိုမိုထူးချွန်ပြောင်မြောက်သော အမျိုးသားတစ်ဦးကို ဘယ်တော့မှ ဆုံတွေ့ရတော့မည်မဟုတ်ဟု ခံစားလိုက်ရသည်။

ယွင်ရှီ၏ အကြိုက်ကို ကျွင်းရှောင်ယောက်က လုံးဝ ဖျက်ဆီးထားခဲ့ချေပြီ။

သူမက တစ်ချက်မျှသာ ကြည့်လိုက်ပြီးနောက် အကြည့်များကို လွှဲဖယ်ကာ ထွက်ခွာရန် ပြင်ဆင်လိုက်သည်။

ဤအခိုက်အတန့်တွင်၊ စူးယုက နောက်ဆုံး၌ သတိပြန်လည်လာခဲ့သည်။

ယွင်ရှီ ထွက်ခွာတော့မည်ကို မြင်တွေ့ရသည့်အခါ၊ သူက အလျင်အမြန် လှမ်းပြောလိုက်၏။

"ကူညီပေးခဲ့တဲ့အတွက် ကျေးဇူးတင်ပါတယ် မိန်းကလေး... ကျုပ်နာမည်က စူးယုပါ"

စူးယုက အနည်းငယ် ရှက်ရွံ့နေပြီး အတွေ့အကြုံမရှိပုံစံဖြင့် လက်ယှက်ပြကာ နှုတ်ဆက်လိုက်သည်။

သူ၏ ချောမောသော ရုပ်ရည်နှင့် ညှို့အားကို ပေါင်းစပ်လိုက်သည့်အခါ မိန်းကလေးများ၏ သိလိုစိတ်နှင့် အာရုံစိုက်မှုကို သေချာပေါက် ဆွဲဆောင်နိုင်ပေသည်။

သို့သော်ငြားလည်း၊ ယွင်ရှီက "ဪ"ဟုသာ ရိုးရိုးရှင်းရှင်း တုံ့လိုက်ပြီး ထွက်ခွာသွားဆဲ ဖြစ်သည်။

စူးယု ကြက်သေသေသွားခဲ့၏။

မဟုတ်သေးပါဘူး...

သူ၏ ခရီးစဉ်တစ်လျှောက်တွင်၊ သူသည် မိစ္ဆာမင်းသမီးများနှင့် တော်ဝင်မင်းသမီး အမြောက်အမြားကို ဆုံတွေ့ခဲ့ဖူးသည်။

ပထမဦးစွာ သူတို့က သူ့အပေါ်တွင် သိလိုစိတ် ဖြစ်ပေါ်ကြလိမ့်မည်။

ထို့နောက် ဖြည်းည်းချင်း သူ့အပေါ်တွင် သံယောဇဉ်အချို့ ထွက်ပေါ်လာလိမ့်မည်ဖြစ်ကာ နောက်ဆုံးတွင်မူ သူ့ကို လုံးဝ စွဲလမ်းနှစ်သက်သွားကြလိမ့်မည် ဖြစ်သည်။

အဘယ်ကြောင့် သူ့ရှေ့တွင်ရှိသော ကောင်းကင်ယံမှ နတ်သမီးတစ်ပါးကဲ့သို့ မိန်းကလေးက သူ့အပေါ်တွင် လုံးဝ စိတ်ဝင်စားမှု ရှိမနေရသနည်း။

ဒါက သူ့ရဲ့ ရုပ်ရည်က ဆိုးရွားနေလို့လား။

မဟုတ်သေး၊ ထိုသို့ မဟုတ်နိုင်ချေ။

ယခင် အတွေ့အကြုံများအပေါ် အခြေခံကြည့်လျှင်၊ သူ၏ ရုပ်ရည်က မိန်းကလေးများကြားတွင် တော်တော်လေး ရေပန်းစားသည်။

"ဒါက သူဟာ မြင့်မြတ်လွန်းတဲ့ နောက်ခံကနေ ဆင်းသက်လာတာမို့လို့ စံနှုန်းတွေ အရမ်းမြင့်မားနေတာ ဖြစ်နိုင်မလား"

စူးယုက ဤအရာမှာ အကောင်းဆုံးအဖြေဖြစ်မည်ဟု ခံစားလိုက်ရသည်။

သို့သော်လည်း၊ သူကိုယ်တိုင်ကမူ ဤမိန်းကလေးကို ပထမဆုံးအကြိမ် မြင်တွေ့ရုံမျှဖြင့် စွဲလမ်းနှစ်သက်သွားခဲ့မိသည်မှာ သေချာနေပြီ။

ဤကဲ့သို့သော ထူးချွန်သည့် မိန်းကလေးမျိုးကသာ အနာဂတ်တွင် တောင်ပိုင်းကြယ်စင်စုလောက၏ အုပ်ချုပ်သူ ဖြစ်လာမည့် သူနှင့် ထိုက်တန်သည်။

"ခဏလောက် စောင့်ပါဦး မိန်းကလေး။ မင်းက ပိုမိုမြင့်မားတဲ့ လောကကြီးကနေ လာတာ ဖြစ်ရမယ်"

စူးယု အနည်းငယ် ပြုံးလျက် ပြောဆိုလိုက်သည်။

"ဘာဖြစ်လို့လဲ"

ယွင်ရှီ တည်ငြိမ်စွာ မေးလိုက်၏။

သူမ၏ ဝင်ရောက်စွက်ဖက်မှုက အဓိကအားဖြင့် ထိုကောင်လေးကို ကယ်တင်ရန်အတွက် မဟုတ်ပါချေ။

ဤဂဠုန်ငှက်နတ်ဆိုးကြီးကို မြင်တွေ့ရသည်နှင့် သူက ချက်ချင်းပင် တိုက်ခိုက်ပြီး သတ်ဖြတ်ခဲ့ခြင်း ဖြစ်သည်။

ထို့နောက်မှသာ ဂဠုန်ငှက်နတ်ဆိုး၏ လိုက်လံဖမ်းဆီးခြင်းကို ခံနေရသော ကောင်လေးကို သတိပြုမိလိုက်ခြင်း ဖြစ်ပေသည်။

"ဒီလိုပါ... ကျုပ်ကလည်း ဒီသတ္တဝါတွေကို သတ်ဖြတ်ဖို့ ဒီနေရာကို လာခဲ့တာပါ။ ကျုပ်က မင်းနဲ့အတူ ခရီးသွားလို့ ရနိုင်မလား"

"နောက်ပြီးတော့ ကျုပ်က တော်တော်လေး ကံကောင်းတတ်ပါတယ်။ တကယ်လို့ ကျုပ်ကို ခေါ်သွားပေးမယ်ဆိုရင် ရရှိလာမဲ့ အသီးအပွင့်တွေက အတော်လေး များပြားလိမ့်မယ်"